Mënyra të reja për të mësuar dhe dhënë mësim me ChatGPT Work dhe Codex

IA-ja po kalon nga mjete që kryesisht u përgjigjen pyetjeve në sisteme që mund të arsyetojnë duke marrë parasysh kontekstin, të përdorin mjete të tjera dhe të ndihmojnë në kryerjen e punëve komplekse me shumë hapa. Ky ndryshim po riformëson kuptimin e të qenit i përgatitur për shkollë, punë dhe atë që vjen më pas. 

Ndërsa nxënësit, studentët, mësuesit dhe pedagogët kthehen këtë vjeshtë në klasa e kampuse, po prezantojmë tri shtesa të reja arsimore për ChatGPT Work dhe Codex, të krijuara posaçërisht për t'i ndihmuar të shfrytëzojnë aftësitë agjentike duke përdorur materialet e lëndëve dhe kontekstin që zgjedhin. Një shtesë është një paketë aplikacionesh, aftësish të posaçme për role të caktuara, udhëzimesh dhe fluksesh të zakonshme pune, që i ndihmon nxënësit, studentët, mësuesit dhe pedagogët të fillojnë menjëherë pa pasur nevojë të hartojnë vetë kërkesa komplekse. Këto shtesa të reja ofrohen si në ChatGPT Edu, ashtu edhe në instalimet e ChatGPT for Teachers në nivel distrikti.

Kjo mbështetet në parimin që udhëheq punën tonë në arsim: IA-ja duhet ta mbështetë të nxënit, jo t'i ofrojë rrugë të shkurtra, dhe përvojat më të mira mësimore ua lënë kontrollin mësuesve, pedagogëve dhe nxënësve.

Shtesat e reja përfshijnë një për studentët, një për mësuesit parauniversitar dhe një për pedagogët. Duke u lidhur me mjetet dhe materialet ku ata tashmë mbështeten, nga dokumentet dhe materialet e lëndëve te kalendarët dhe aplikacionet e tjera të miratuara, shtesat kuptojnë kontekstin dhe detyrën konkrete dhe i ndihmojnë nxënësit, studentët, mësuesit dhe pedagogët të kalojnë nga kureshtja te praktika, nga ideja e mësimit te materiali për klasën dhe nga koncepti i projektit te zbatimi.

Jemi përqendruar në bashkëpunimin me shkollat dhe universitetet për ta vënë IA-në në dispozicion në mjedise të sigurta, të administruara nga institucionet. I prezantuar në vitin 2024, ChatGPT Edu u ofron institucioneve arsimore hapësira pune të administruara, me privatësi, siguri dhe kontrolle administrative të nivelit të ndërmarrjeve. ChatGPT for Teachers⁠(hapet në një dritare të re), i prezantuar në vitin 2025, është falas për mësuesit e verifikuar në SHBA dhe distriktet e arsimit parauniversitar, si dhe ofron masa mbrojtëse e veçori pajtueshmërie të nivelit arsimor. Drejtuesit e shkollave dhe distrikteve mund të marrin nën administrim domenin e tyre për t'i bashkuar mësuesit në një hapësirë pune të përbashkët me mbikëqyrje dhe orientim më të madh, përfshirë masa mbrojtëse për të mbështetur kërkesat e FERPA-s dhe një marrëveshje për privatësinë e të dhënave. 

Shtesa për mësuesit parauniversitar është krijuar për t'i ndihmuar ata të planifikojnë dhe të krijojnë materiale për klasat e tyre. E zhvilluar së bashku me mësuesit parauniversitar, ajo mund të punojë me materialet dhe mjetet që mësuesit përdorin tashmë për të krijuar burime të diferencuara, për të hartuar materiale pamore interaktive dhe për të nxjerrë në pah njohuri të zbatueshme. Ajo integrohet gjithashtu me Learning Commons⁠(hapet në një dritare të re), një organizatë jofitimprurëse që punon për t'i shtrirë praktikat e provuara të mësimdhënies dhe të të nxënit në dobi të çdo nxënësi. Kjo u mundëson mësuesve të krijojnë materiale në përputhje me standardet, kornizat dhe drejtimet akademike vendore, duke ruajtur kontrollin mbi vendimet pedagogjike, vlerësimin dhe veprimet agjentike. 

Kjo punë pasqyron atë që kemi mësuar nga angazhimi ynë me mësuesit, përfshirë partneritetin me Federatën Amerikane të Mësuesve (AFT). OpenAI është partneri themelues i Akademisë Kombëtare për Mësimdhënien e IA-së, një nismë pesëvjeçare për të pajisur 400 000 mësues parauniversitar—rreth një në çdo 10 mësues në SHBA—që ta përdorin IA-në me efektivitet dhe të udhëheqin formësimin e mënyrës se si ajo mësohet dhe përdoret në klasat anembanë vendit.

Shtesat për pedagogët mundëson hartimin e lëndëve, mësimdhënien dhe planifikimin akademik. Stafi akademik mund të përditësojë programet mësimore, të krijojë faqe interaktive ose vlerësime multimediale, t'i përshtatë materialet për studentë me nevoja të ndryshme ose ta paketojë përmbajtjen për LMS-në e vet. Me kalendarët, dokumentet dhe mjetet e tjera të miratuara të lidhura, pedagogët mund të punojnë gjithashtu në mësimdhënie, kërkim shkencor dhe detyra të përditshme pa qenë nevoja ta rikrijojnë kontekstin për çdo projekt të ri.

Shtesat për studentët i ndihmon ata ta shndërrojnë atë që po studiojnë në përvoja mësimore më të personalizuara. Studentët mund të punojnë me një tutor udhëzues, të ushtrojnë koncepte të vështira dhe të krijojnë udhëzues studimi, kuize, kartela mësimore dhe shpjegime pamore interaktive nga burimet që zgjedhin. E krijuar me studentë universitetesh nga degë, vende dhe nivele të ndryshme njohurish për IA-në, shtesa mbështetet në shkencën e të nxënit për t'i dhënë përparësi kuptimit më të thellë dhe për të krijuar zakone më të mira studimi.

Së bashku, këto shtesa u japin nxënësve, studentëve, mësuesve dhe pedagogëve një pikënisje më të dobishme për të punuar me IA-në, duke bashkuar kontekstin, mjetet dhe flukset e duhura të punës. Kështu, ata shpenzojnë më pak kohë për të konfiguruar mënyrën se si duhet të punojë ChatGPT dhe më shumë kohë për të mësuar, dhënë mësim, hulumtuar e krijuar, ndërsa institucionet ruajnë kontrollin mbi mjetet dhe lejet e disponueshme.

Ndërsa IA-ja bëhet më e aftë, mundësia që i ofrohet arsimit është shumë më e madhe sesa thjesht t'i ndihmojë njerëzit të mësojnë përdorimin e një teknologjie të re. Ajo po i ndihmon nxënësit dhe studentët të zhvillojnë aftësinë për të vepruar në mënyrë të pavarur: t'i drejtojnë këto mjete drejt synimeve domethënëse, të ushtrojnë gjykimin, të mësojnë vazhdimisht, të zgjidhin probleme të vështira dhe t'i kthejnë idetë në diçka reale.

Më shumë se 200 milionë të rinj të moshës 18–24 vjeç përdorin tani ChatGPT çdo javë, duke u renditur ndër përdoruesit më të angazhuar të publikut të gjerë. Megjithatë, te përdoruesit në moshë universitare shohim një zgjerim global të "hendekut të aftësive", i përkufizuar si diferenca mes asaj që mund të bëjnë mjetet e IA-së dhe mënyrës se si njerëzit i përdorin realisht. Edhe studentët me përvojë i shfrytëzojnë aftësitë e ChatGPT rreth 90–99% më pak se përdoruesit ekspertë, çka tregon se ka hapësirë të konsiderueshme për t'i thelluar aftësitë në IA. 

Aksesi i strukturuar mund të ndihmojë për ta ngushtuar këtë hendek. Në instalimet e ChatGPT Edu, studentët zhvillojnë me kalimin e kohës modele më të përparuara përdorimi, duke i tejkaluar përdoruesit falas pothuajse në çdo aftësi dhe duke iu afruar sjelljes së përdoruesve ekspertë, veçanërisht në analizë, llogaritje dhe të nxënë. Që nga prezantimi i ChatGPT Edu në vitin 2024, kemi bashkëpunuar me shkolla të arsimit parauniversitar dhe distrikte, përfshirë Hjuston ISD në Teksas, Feirfaks në Virxhinia dhe Fulton në Xhorxhia, si dhe me qindra kampuse kolegjesh e universitetesh, përfshirë Shkollën Wharton të Universitetit të Pensilvanisë⁠, Universitetin e Teksasit në Austin dhe sistemin e Universitetit Shtetëror të Kalifornisë, për ta vënë IA-në në përdorim me përgjegjësi për mësuesit dhe kampuset. 

Falë investimeve tona në arsim, qindra mijëra mësues e pedagogë në arsimin parauniversitar dhe universitar kanë akses falas në mjetet, trajnimet dhe kërkimet e OpenAI për të çuar përpara barazinë dhe risitë. Tani po sjellim veçori të reja për t'i ndihmuar mësuesit dhe nxënësit t'i shfrytëzojnë më mirë aftësitë e plota të ChatGPT. 

Teknologjia avangardë duhet të shoqërohet me hapësira pune të posaçme për arsimin, trajnime, programe të drejtuara nga kolegët, kërkime rigoroze dhe partnerë të besuar, për të krijuar sigurinë e nevojshme që aftësitë e reja të përdoren me përgjegjësi. 

Për studentët, nisma e re OpenAI Student Collective është një komunitet i drejtuar nga studentët për të mësuar, krijuar dhe formësuar të ardhmen me IA-në. Tani janë hapur aplikimet⁠ që studentët të bëhen drejtues kampusi dhe ta gjallërojnë komunitetin në kampuset e tyre. Përmes përvojave të drejtuara nga bashkëmoshatarët dhe projekteve praktike, studentët mund të zhvillojnë aftësi praktike dhe t'i vënë në jetë idetë e tyre. Dhe, përmes partneriteteve me platforma si Handshake, studentët mund t'i lidhin këto aftësi me praktikat profesionale dhe mundësitë në fillim të karrierës.

Në partneritet me Walton Family Foundation, OpenAI Academy po bashkon më shumë se 1600 mësues parauniversitar, administratorë dhe drejtues distrikti në tetë qytete të SHBA-së për seminare praktike, ballë për ballë dhe falas, që zhvillojnë aftësi për zbatimin e IA-së ndaj sfidave reale në klasë.

Përmes programit të OpenAI Education for Countries, punojmë me qeveritë dhe udhëheqësit kombëtarë për të zhvilluar instalime të përshtatura me nevojat vendore dhe kërkime të bazuara në prova. Në Estoni, për shembull, ChatGPT Edu tani arrin te më shumë se 20 000 studentë dhe 4600 mësues, krahas një nisme kërkimore afatgjatë me Universitetin e Tartusë dhe Stanford-in.

Kërkimi akademik është gjithashtu thelbësor për misionin e arsimit të lartë, ndërsa IA-ja avangardë po hap mundësi të reja për zbulime shkencore. Programi i ri ChatGPT për Kërkuesit Akademikë u jep kërkuesve të kualifikuar 12 muaj akses falas të nivelit Pro, për të përdorur ChatGPT Work dhe Codex në punë shkencore ambicioze brenda një hapësire pune të sigurt.

Kapitulli i ardhshëm i IA-së në arsim do të formësohet nga ajo që krijojnë nxënësit dhe studentët, ajo që mundësojnë mësimdhënësit dhe ajo që institucionet e partnerët zbulojnë së bashku. Gjatë gjithë vitit shkollor do të vazhdojmë të ndërtojmë së bashku me komunitetin arsimor për të zhvilluar mjete të reja, për të zgjeruar trajnimet dhe kërkimet, si dhe për të ofruar njohuri të bazuara në prova. Synimi ynë i përbashkët është t'i fuqizojmë të gjithë nxënësit, studentët dhe mësimdhënësit me besimin dhe aftësitë për të zgjeruar atë që mund të mësojnë, përfytyrojnë, krijojnë dhe arrijnë.

Shtesat për mësuesit, pedagogët, nxënësit dhe studentët ofrohen në ChatGPT Edu dhe në instalimet e ChatGPT for Teachers në nivel distrikti. Kontakto ekipin tonë për të mësuar më shumë.