ஐரோப்பிய ஒன்றிய நடைமுறை நெறிமுறையும் ஐரோப்பாவில் செயற்கை நுண்ணறிவின் எதிர்காலமும்

பொது நோக்கச் செயற்கை நுண்ணறிவுக்கான ஐரோப்பிய ஒன்றியத்தின் நடைமுறை நெறிமுறையில் கையெழுத்திடும் எங்கள் நோக்கத்தை இன்று அறிவிக்கிறோம். வரவிருக்கும் போதுமான தன்மை மதிப்பீட்டின்போது தற்போதைய பதிப்புக்குச் செயற்கை நுண்ணறிவு வாரியம் முறையாக ஒப்புதல் அளிப்பதைப் பொறுத்து இது அமையும். ஐரோப்பிய ஒன்றியச் செயற்கை நுண்ணறிவுச் சட்டத்துக்கு இணங்கச் செயற்கை நுண்ணறிவு உருவாக்குநர்களுக்கு உதவும் கட்டமைப்பே இந்த நெறிமுறை. அச்சட்டம் மற்றும் அதன் கடமைகள் குறித்து மேலும் அறிய, எங்கள் அறிமுக விளக்கத்தை இங்கே⁠ காண்க.

அதே நேரத்தில், செயற்கை நுண்ணறிவின் திறனைப் பயன்படுத்த விரும்பும் ஐரோப்பிய அரசுகள் மற்றும் வணிகங்களின் பெரும் ஆர்வத்துக்குப் பதிலளிக்கும் வகையில், ஐரோப்பாவின் செயற்கை நுண்ணறிவு எதிர்காலத்தை உருவாக்கும் பணியைத் தொடங்க “நாடுகளுக்கான OpenAI: ஐரோப்பிய அறிமுகம்” திட்டத்தைத் தொடங்குகிறோம். 

கோடிக்கணக்கான ஐரோப்பியர்களுக்கு எங்கள் தொழில்நுட்பம் இன்றியமையாததாகியுள்ளது. சந்தாதாரர்கள், பயன்பாட்டு நிரலாக்க இடைமுக உருவாக்குநர்கள் மற்றும் வணிக வாடிக்கையாளர்களுக்கான எங்கள் முன்னணி உலகச் சந்தைகளில் ஐரோப்பிய ஒன்றிய உறுப்பு நாடுகளும் இடம்பெறுகின்றன. மக்கள், உருவாக்குநர்கள், நிறுவனங்கள், தொடக்க நிறுவனங்கள் மற்றும் முன்னணி பெருநிறுவனங்கள் தினமும் பின்வரும் வழிகளில் கண்டம் முழுவதும் பொருளாதார வாய்ப்புகளை உருவாக்குகின்றன:

• உயிர்காக்கும் மருத்துவச் சிகிச்சைகளின் உருவாக்கத்தை விரைவுபடுத்துதல் மற்றும் புதிய மருந்துகளை ஆராய்ச்சியாளர்கள் இன்னும் வேகமாக வடிவமைக்க உதவுதல். சனோஃபியுடனான எங்கள் கூட்டாண்மையும்⁠(புதிய சாளரத்தில் திறக்கும்) இதில் அடங்கும்.
• பிரான்சின் சியான்ஸ் போ⁠, ஜெர்மனியின் மாக்ஸ் பிளாங்க் சங்கம்⁠ போன்ற முன்னணி ஐரோப்பிய ஆய்வகங்கள் மற்றும் பல்கலைக்கழகங்களில் அறிவியல் ஆராய்ச்சியை விரைவுபடுத்துதல்.
• எஸ்டோனியா முழுவதுமுள்ள மேல்நிலைப் பள்ளிகளுக்குச் செயற்கை நுண்ணறிவைக் கொண்டுசெல்வதன்⁠ மூலமும், தனிப்பயன் பாடத் திட்டங்களை உருவாக்கி மாணவர்களுடன் அதிக நேரம் செலவிட ஈஎஸ்சிபி வணிகப் பள்ளி ஆசிரியர்களுக்கு உதவுவதன்⁠(புதிய சாளரத்தில் திறக்கும்) மூலமும் கல்வியை மேம்படுத்துதல்.
• பார்லோவா, பிக்மென்ட் போன்ற புதிய தலைமுறைச் செயற்கை நுண்ணறிவு நிறுவனங்கள் தங்கள் தளங்களை மேம்படுத்தவும் உலகளவில் போட்டியிடவும் எங்கள் தொழில்நுட்பத்தைப் பயன்படுத்துவதன் மூலம் செழிப்பான ஐரோப்பியத் தொடக்க நிறுவனச் சூழலை உருவாக்குதல்.

ஏப்ரலில் அறிவிக்கப்பட்ட ஐரோப்பிய ஒன்றியச் செயற்கை நுண்ணறிவுக் கண்டச் செயல் திட்டத்தை முன்னெடுக்கவும், ஏற்கெனவே உணரப்படும் செயற்கை நுண்ணறிவின் தாக்கத்தை மேலும் விரிவாக்கவும் இந்த நடைமுறை நெறிமுறை ஐரோப்பாவுக்கு வழிவகுக்கிறது. 

ஐரோப்பா தனது செயற்கை நுண்ணறிவுத் திறமையாளர்களை வளர்த்து ஆதரிக்க வேண்டும். எதிர்கால வணிகங்கள், வேலைவாய்ப்புகள் மற்றும் வருவாயை உருவாக்கும் உள்ளூர் உருவாக்குநர்களுக்கும் தொழில்முனைவோருக்கும் துணைநிற்க வேண்டும். மேலும் அதிகமான மக்களுக்குச் செயற்கை நுண்ணறிவுக் கருவிகளை வழங்கி, ஐரோப்பாவை முன்னோக்கி வழிநடத்த உதவ வேண்டும். 

ஐரோப்பாவில் பெரும்பாலும் ஒழுங்குமுறையே கவனத்தைப் பெற்றுள்ளது. இப்போது இந்த நிலையை மாற்றி, ஐரோப்பாவின் எதிர்காலத்திற்காகப் புத்தாக்குநர்கள் புதுமைகளை உருவாக்கவும் கட்டமைப்பாளர்கள் உருவாக்கவும் அவர்களுக்கு அதிகாரமளிக்க வேண்டிய நேரம் இது.

மின்சாரத்தைப் போலவே, செயற்கை நுண்ணறிவும் தேசத்தைக் கட்டமைப்பதற்கான அடிப்படைத் தொழில்நுட்பமாகும். அது பொருளாதாரங்களை மாற்றியமைத்து, உற்பத்தித் திறனை உயர்த்துவதன் மூலம் மிகவும் அவசியமான வளர்ச்சியை வழங்கும். ஐரோப்பாவிலிருந்து பொருளாதார மதிப்பை வெளியேற்றிய நவீன எண்ம யுகத்தின் முந்தைய தொழில்நுட்பங்களைப் போலன்றி, செயற்கை நுண்ணறிவு ஓர் உற்பத்தித் தொழில்நுட்பம். இதைப் பொதுமக்களுக்குப் பரவலாகக் கிடைக்கச் செய்தால், மக்கள் மேலும் பலவற்றைச் செய்ய உதவும் கருவிகளை வழங்கி பொருளாதார வாய்ப்புகளை விரிவுபடுத்தும். 

ஐரோப்பாவுக்குரிய, ஐரோப்பாவால் உருவாக்கப்பட்ட, ஐரோப்பாவுக்கான செயற்கை நுண்ணறிவை வடிவமைத்து அதன் பயன்களைப் பெறும் நிலையில் தனது மக்களை வைத்திருப்பதே ஐரோப்பாவின் சவாலாகும். 

இந்த இலக்கை அடைய, ஐரோப்பாவின் செயற்கை நுண்ணறிவை மையமாகக் கொண்ட எதிர்காலப் பொருளாதாரத்தை வழிநடத்தவுள்ள உள்நாட்டுத் தொடக்க நிறுவனங்களும் சிறு வணிகங்களும் நெறிமுறை மற்றும் செயற்கை நுண்ணறிவுச் சட்டத்தின் இடர் அடிப்படையிலான கட்டமைப்புக்கு இணங்குவதை முடிந்தவரை எளிதாகவும் சீராகவும் ஆக்க வேண்டும். இந்த அடுத்த தலைமுறை நிறுவனங்களை ஆதரிக்க அதிக எளிமைப்படுத்தலும் ஒருங்கிணைப்பும் தேவை என்று நாங்கள் வலியுறுத்தியுள்ளோம்⁠. ஐரோப்பாவுக்குரிய, ஐரோப்பாவால் உருவாக்கப்பட்ட, ஐரோப்பாவுக்கான செயற்கை நுண்ணறிவுக்கு அவை முக்கியமானவை என்பதால், அவற்றின் கவலைகளுக்குத் தொடர்ந்து ஆதரவளிப்போம். 

இறுதியில், துணிச்சலான, ஒருங்கிணைந்த ஐரோப்பியச் செயற்கை நுண்ணறிவு உத்தியின் முதுகெலும்பாக அமையும் வகையில் செயற்கை நுண்ணறிவுக் கண்டச் செயல் திட்டத்துடன் இணைக்கப்பட்டால் இந்த நடைமுறை நெறிமுறை மிகச் சிறப்பாகச் செயல்படும். செயற்கை நுண்ணறிவை வளம் மற்றும் முன்னேற்றத்தின் ஆதாரமாக்க, செயற்கை நுண்ணறிவு வாரியமும் அது பிரதிநிதித்துவப்படுத்தும் உறுப்பு நாடுகளும் அந்தத் தொலைநோக்கை ஏற்று நடைமுறைப்படுத்த வேண்டும் என்று ஊக்குவிக்கிறோம்.  

ஐரோப்பாவுக்குத் தேவையான செயற்கை நுண்ணறிவு உள்கட்டமைப்பின் உருவாக்கத்தை நெறிமுறையும் செயல் திட்டமும் இணைந்து முன்னெடுக்க வேண்டும். உலக அரங்கில் போட்டியிட்டு முன்னிலை வகிப்பதற்கான கருவிகள் மக்களுக்கும் வணிகங்களுக்கும், குறிப்பாக உருவாக்குநர்களுக்கும் தொடக்க நிறுவனங்களுக்கும் கிடைப்பதை அவை உறுதிசெய்ய வேண்டும்.

தனது ஒழுங்குமுறை அமைப்புகள் செயற்கை நுண்ணறிவை ஏற்கும் வேகத்தையும், ஆற்றல் மற்றும் பயிற்சித் தரவு உள்ளிட்ட அதன் மூலப்பொருட்கள் கிடைப்பதையும் எவ்வாறு பாதிக்கக்கூடும் என்பதை ஐரோப்பிய ஒன்றியம் மதிப்பிட வேண்டும். ஐரோப்பாவின் போட்டித்திறனை உறுதிசெய்யவும், அமெரிக்காவுடனான நீண்டகால உற்பத்தித் திறன் இடைவெளியை⁠(புதிய சாளரத்தில் திறக்கும்) நிவர்த்திசெய்யவும் இது முக்கியமானதாக இருக்கும். 

அந்த உள்கட்டமைப்பை உருவாக்கத் தேவையான மூலதன முதலீட்டை ஈர்ப்பதற்கான நீண்டகால உறுதிப்பாட்டையும் தெளிவையும் ஐரோப்பிய ஒன்றியத்தின் உத்தி வழங்க வேண்டும்.

வாய்ப்பை முன்னேற்றமாக மாற்ற, உண்மையான பொருளாதாரப் பலன்களை வழங்கும் ஐரோப்பியச் செயற்கை நுண்ணறிவின் உருவாக்கத்தை விரைவுபடுத்த இந்த நெறிமுறையைத் தொடக்கத் தளமாகப் பயன்படுத்தி, ஐரோப்பியச் செயற்கை நுண்ணறிவு உள்கட்டமைப்புப் பரப்புரையைத் தொடங்குகிறோம்.

எங்கள் ஐரோப்பிய ஒன்றியப் பொருளாதாரச் செயல்திட்டம்⁠ தெளிவாகக் கூறியபடி, சரியான தொலைநோக்கும் செயலாக்கமும் இருந்தால், வளர்ச்சியை முன்னெடுக்க ஐரோப்பா செயற்கை நுண்ணறிவைப் பயன்படுத்தி, இந்த அடுத்த தொழில்நுட்பக் கட்டத்தின் உலகத் தலைவர்களில் ஒன்றாக முடியும் என்று OpenAI உறுதியாக நம்புகிறது. 

தரவு மையங்கள், பணியாளர் திறன்கள் மற்றும் திறமையாளர்கள், உள்ளூர்த் தொடக்க நிறுவனங்களுக்கான ஆதரவு உள்ளிட்ட செயற்கை நுண்ணறிவு உள்கட்டமைப்பை உருவாக்க விரும்பும் உலக நாடுகளுக்கு உதவும் எங்கள் முயற்சியான நாடுகளுக்கான OpenAI⁠ திட்டத்தை மே மாதம் தொடங்கினோம். இப்போது ஐரோப்பாவில் எங்கள் பணியை விரிவுபடுத்தத் தயாராக இருக்கிறோம்.

கோடைக்காலம் தொடங்கி இலையுதிர்காலம் வரை, பின்வருவனவற்றை நிறைவேற்ற ஐரோப்பிய அரசுகள், வணிகங்கள் மற்றும் தொடர்புடைய தரப்பினரைச் சந்திப்போம்: 

• தரவு மையத் திறன்: செயற்கை நுண்ணறிவில் முன்னிலை வகிக்கத் தேவையான உள்கட்டமைப்பு ஐரோப்பாவுக்குத் தேவைப்படும். அதனால்தான் ஐரோப்பாவில் அடுத்த தலைமுறைச் செயற்கை நுண்ணறிவு உள்கட்டமைப்பை உருவாக்கும் ஐரோப்பிய ஒன்றியத்தின் செயற்கை நுண்ணறிவுப் பெருந்தொழிற்சாலைகள் முயற்சிக்கான கூட்டமைப்புகளில் சேர விருப்ப அறிக்கைகளைச் சமர்ப்பித்துள்ளோம். இந்தத் திட்டங்கள் தொடக்க நிலையிலேயே உள்ளன. ஆனால் ஐரோப்பாவின் எதிர்காலத்திற்குத் தேவையான ஆற்றலை வழங்கவும், புதிய உள்ளூர்த் தொழில்களை ஆதரிக்கவும், இறையாண்மைமிக்க கணிப்புத் திறனை வழங்கவும் இவற்றால் முடியும். 
• செயற்கை நுண்ணறிவு சார்ந்த கல்வி: உலகம் முழுவதும் கோடிக்கணக்கான மாணவர்களும் ஆசிரியர்களும் கற்றலைத் தனிப்பயனாக்க ஏற்கெனவே ChatGPT‑ஐப் பயன்படுத்துகின்றனர்.  நாடு முழுவதுமுள்ள மேல்நிலைப் பள்ளிகளில் ChatGPT Edu-ஐ அறிமுகப்படுத்தும் உலகின் முதல் முயற்சியில் எஸ்டோனிய அரசுடன் பணியாற்றுவதில் பெருமிதம் கொள்கிறோம். இதேபோன்ற முயற்சிக்குப் பிற ஐரோப்பிய ஒன்றிய அரசுகளும் ஆர்வம் தெரிவித்துள்ளன. 
• அரசுகளுடனான உத்திசார் கூட்டாண்மைகள்: பொதுத்துறைக்கான எங்கள் சேவைகளைத் தொடர்ந்து விரிவாக்குகிறோம். செயற்கை நுண்ணறிவு யுகத்துக்கு ஏற்ற அரசு-தனியார் கூட்டாண்மைகளுக்கான புதிய வழிகாட்டியை உருவாக்க ஐரோப்பிய அரசுகளுடன் பணியாற்ற விரும்புகிறோம். நாங்கள் ஏற்கெனவே ஐரோப்பிய ஒன்றிய டேட்டா ரெசிடென்சியையும், உள்ளூர்ப் பண்பாடுகள் மற்றும் மொழிகளுக்கு ஏற்ப ChatGPT‑ஐத் தனிப்பயனாக்கும் வசதியையும் வழங்குகிறோம். ஐரோப்பிய அரசுகள் தங்கள் உள்ளூர் விழுமியங்களுக்கு இணங்க, இறையாண்மைத் தேவைகளுக்கேற்ப செயற்கை நுண்ணறிவை மாற்றிப் பயன்படுத்தும்போது அவற்றுடன் இணைந்து பணியாற்ற விரும்புகிறோம்.
• தேசியச் செயற்கை நுண்ணறிவுத் தொடக்க நிறுவன நிதிகள்: திருப்புமுனை யோசனைகளை ஐரோப்பிய வெற்றிகளாக மாற்ற, அதிகத் திறனுள்ள செயற்கை நுண்ணறிவுத் தொடக்க நிறுவனங்களுக்கு ஆரம்ப முதலீடு வழங்க விருப்பமுள்ள அரசுகளுடன் இணைந்து பிரத்யேக தேசிய நிதிகளைத் திரட்ட OpenAI ஆர்வமாக உள்ளது. உள்ளூர் நிறுவனர்களை ஆதரித்து, அதிநவீனத் தொழில்நுட்பத்திற்கான முன்கூட்டிய அணுகலையும் தொழில்நுட்ப ஆதரவையும் வழங்குவதன் மூலம் ஒவ்வொரு நிதியும் தேசிய முன்னுரிமைகளுக்குச் சேவையாற்றி, வேலைவாய்ப்புகள், வருவாய் மற்றும் புதிய தொழில்களை உருவாக்கும். 
• செயற்கை நுண்ணறிவுப் பயன்பாடு: ஐரோப்பியப் பொருளாதாரத்தின் ஒவ்வொரு துறையிலும் பயன்பாட்டை விரிவாக்குவது என்ற ஒரே இலக்கை மையமாகக் கொண்ட செயற்கை நுண்ணறிவுக் கொள்கை ஆக்கப்போட்டியை நடத்த, செப்டம்பரில் ஸ்டார்ட்அப்களுக்கான கூட்டணி மற்றும் விரிவான சூழலமைப்புடன் பிரஸ்ஸல்ஸில் இருப்போம்.

ஐரோப்பாவின் கண்ட அளவிலான செயற்கை நுண்ணறிவு இலக்குகளை நிறைவேற்றுவதில் தனது பங்கைச் செய்ய OpenAI உறுதிபூண்டுள்ளது. கோடைக்காலம் தொடங்கி இலையுதிர்காலம் வரை இந்த முயற்சிகளின் முன்னேற்றத்தைப் பகிர்வோம். 

நுண்ணறிவு யுகத்தின் பொருளாதார மற்றும் சமூகப் பலன்களில் ஐரோப்பியர்கள் முழுமையாகப் பங்கேற்கும் வகையில், திறன்மிக்க, எளிதில் அணுகக்கூடிய, பாதுகாப்பான செயற்கை நுண்ணறிவு மாடல்களை வழங்குவதற்கான எங்கள் உறுதிப்பாட்டை இந்த நெறிமுறையில் கையெழுத்திடுவது பிரதிபலிக்கிறது.

வெளிப்படைத்தன்மை, பொறுப்புடைமை மற்றும் பாதுகாப்பை முதன்மையாகக் கொண்டே நாங்கள் எப்போதும் மாடல்களை உருவாக்கியுள்ளோம். இந்தக் கொள்கைகள் நெறிமுறையிலும் பிரதிபலிக்கின்றன.

பிளெட்ச்லி பிரகடனம் (நவம்பர் 2023), சியோல் கட்டமைப்பு (மே 2024) ஆகிய இரண்டிலும் கையெழுத்திட்டது உட்பட, கடந்த பல ஆண்டுகளில் நாங்கள் முன்னோடியாக அறிமுகப்படுத்திய தொழில்துறை முன்னணி பாதுகாப்பு மற்றும் வெளிப்படைத்தன்மை நடவடிக்கைகள் பலவற்றை இந்த நெறிமுறையில் கையெழுத்திடுவது மேலும் வலுப்படுத்துகிறது.

பிளெட்ச்லி உச்சிமாநாட்டைத் தொடர்ந்து, விரிவான பாதுகாப்பு மற்றும் காப்பு நெறிமுறையை வெளியிட்ட முதல் நிறுவனங்களில் ஒன்றாக நாங்கள் இருந்தோம். அதிநவீனச் செயற்கை நுண்ணறிவு மாடல்களைப் பாதுகாப்பாகப் பயன்பாட்டுக்குக் கொண்டுவரும் எங்கள் அணுகுமுறையைப் பிரிபேர்ட்நெஸ் ஃப்ரேம்வொர்க் (2023) விளக்குகிறது. சியோல் கட்டமைப்புக்கும் உள் பொறுப்புடைமை மற்றும் ஆளுகைக் கட்டமைப்புகளைத் தொடர்ந்து ஆய்வுசெய்யும் எங்கள் உறுதிப்பாட்டுக்கும் இணங்க, புதுப்பிக்கப்பட்ட பிரிபேர்ட்நெஸ் ஃப்ரேம்வொர்க்கை ஏப்ரல் 2025-இல் வெளியிட்டோம்⁠. 

எங்கள் தொழில்நுட்பத்தைப் பொறுப்புடன் உருவாக்கிப் பயன்பாட்டுக்குக் கொண்டுவர வழிகாட்டும் தொழில்துறை முன்னணி பாதுகாப்பு நடைமுறைகளையும் உருவாக்கியுள்ளோம். அவற்றில் பின்வருவன அடங்கும். 

• எங்கள் முக்கிய வெளியீடுகளுடன் விரிவான அமைப்பு அட்டைகளை⁠ நீண்டகாலமாக வெளியிட்டு வருகிறோம். எங்கள் மாடல்களால் என்ன செய்ய முடியும், எதைச் செய்ய முடியாது, எந்த இடர்களைச் சோதித்துள்ளோம், எவற்றைப் பற்றி இன்னும் கற்றுவருகிறோம் என்பதை அவை விளக்குகின்றன. 
• பாதுகாப்பு மதிப்பீட்டு மையம்⁠ எங்கள் மாடல்களின் பாதுகாப்பு மதிப்பீட்டு முடிவுகளைப் பொதுமக்கள் அணுக வழிவகுக்கிறது.
• எங்கள் ரெட் டீமிங் வலையமைப்பு⁠ எங்கள் மாடல்களைக் கடுமையாகச் சோதிக்க வெளிப்புற நிபுணர்களை ஈடுபடுத்துகிறது.
• மனித விழுமியங்களையும் ஜனநாயக நெறிகளையும் பிரதிபலிக்கும் வகையில் மாடலின் நடத்தையை நாங்கள் எவ்வாறு வடிவமைக்கிறோம் என்பதை மாடல் ஸ்பெக்⁠(புதிய சாளரத்தில் திறக்கும்) வெளிப்படுத்துகிறது.

இந்தப் பணிகள் அனைத்தும் தொழில்துறையில் பாதுகாப்புத் தரநிலைகளை நிறுவுவதிலும் நடைமுறைக்குச் சாத்தியமான நெறிமுறையை உருவாக்க வழிகாட்டுவதிலும் முக்கியப் பங்காற்றியுள்ளன. உலகின் எந்தப் பகுதியில் இருந்தாலும் அனைவருக்கும் எங்கள் தொழில்நுட்பம் பொறுப்புடன் பயனளிப்பதை உறுதிசெய்ய, பாதுகாப்புக்கான எங்கள் அணுகுமுறையைத் தொடர்ந்து படிப்படியாக மேம்படுத்துவோம்.