യൂറോപ്യൻ യൂണിയന്റെ പ്രാക്ടീസ് കോഡും യൂറോപ്പിലെ എഐയുടെ ഭാവിയും

പൊതുവായ ആവശ്യങ്ങൾക്കുള്ള എഐ സംബന്ധിച്ച യൂറോപ്യൻ യൂണിയന്റെ പ്രാക്ടീസ് കോഡിൽ ഒപ്പിടാനുള്ള ഞങ്ങളുടെ ഉദ്ദേശ്യം ഇന്ന് പ്രഖ്യാപിക്കുകയാണ്. വരാനിരിക്കുന്ന പര്യാപ്തതാ വിലയിരുത്തലിൽ നിലവിലെ പതിപ്പിന് എഐ ബോർഡിന്റെ ഔപചാരിക അംഗീകാരം ലഭിക്കണമെന്ന നിബന്ധനയ്ക്ക് ഇത് വിധേയമാണ്. യൂറോപ്യൻ യൂണിയന്റെ എഐ നിയമം പാലിക്കാൻ എഐ വികസിപ്പിക്കുന്നവരെ സഹായിക്കുന്ന ചട്ടക്കൂടാണ് ഈ കോഡ്. എഐ നിയമത്തെയും അതിലെ ബാധ്യതകളെയും കുറിച്ചുള്ള കൂടുതൽ വിവരങ്ങൾക്ക് ഞങ്ങളുടെ ആമുഖം ഇവിടെ⁠ കാണുക.

അതോടൊപ്പം, എഐയുടെ സാധ്യതകൾ പ്രയോജനപ്പെടുത്താൻ ആഗ്രഹിക്കുന്ന യൂറോപ്യൻ സർക്കാരുകളിൽനിന്നും ബിസിനസുകളിൽനിന്നുമുള്ള വൻ താൽപ്പര്യത്തോട് പ്രതികരിച്ച് യൂറോപ്പിന്റെ എഐ ഭാവി കെട്ടിപ്പടുക്കുന്നതിനായി “രാജ്യങ്ങൾക്കായുള്ള OpenAI: യൂറോപ്യൻ വ്യാപനം” ഞങ്ങൾ ആരംഭിക്കുകയാണ്. 

ദശലക്ഷക്കണക്കിന് യൂറോപ്യർക്ക് ഞങ്ങളുടെ സാങ്കേതികവിദ്യ അനിവാര്യമായിരിക്കുന്നു. വരിക്കാർ, എപിഐ വികസിപ്പിക്കുന്നവർ, ബിസിനസ് ഉപഭോക്താക്കൾ എന്നിവരുടെ എണ്ണത്തിൽ യൂറോപ്യൻ യൂണിയൻ അംഗരാജ്യങ്ങൾ ആഗോളതലത്തിലെ ഞങ്ങളുടെ മുൻനിര വിപണികളിലൊന്നാണ്. ജനങ്ങളും വികസിപ്പിക്കുന്നവരും സ്ഥാപനങ്ങളും നവസംരംഭങ്ങളും മുൻനിര കമ്പനികളും ദിവസേന താഴെപ്പറയുന്ന മാർഗങ്ങളിലൂടെ ഭൂഖണ്ഡത്തിലുടനീളം സാമ്പത്തിക അവസരങ്ങൾ തുറക്കുന്നു:

• ജീവൻ രക്ഷിക്കുന്ന ചികിത്സകളുടെ വികസനം വേഗത്തിലാക്കുകയും പുതിയ മരുന്നുകൾ കൂടുതൽ വേഗത്തിൽ രൂപകൽപ്പന ചെയ്യാൻ ഗവേഷകരെ സഹായിക്കുകയും ചെയ്യുന്നു. സനോഫിയുമായുള്ള ഞങ്ങളുടെ പങ്കാളിത്തവും⁠(പുതിയ വിൻഡോയിൽ തുറക്കുന്നു) ഇതിൽ ഉൾപ്പെടുന്നു.
• ഫ്രാൻസിലെ സയൻസ് പോ⁠, ജർമനിയിലെ മാക്സ് പ്ലാങ്ക് സൊസൈറ്റി⁠ തുടങ്ങിയ യൂറോപ്പിലെ മുൻനിര പരീക്ഷണശാലകളിലും സർവകലാശാലകളിലും ശാസ്ത്രീയ ഗവേഷണം ത്വരിതപ്പെടുത്തുന്നു.
• എസ്റ്റോണിയയിലുടനീളമുള്ള സെക്കൻഡറി സ്കൂളുകളിൽ എഐ എത്തിച്ചും⁠ വ്യക്തിഗതമാക്കിയ പാഠപദ്ധതികൾ തയ്യാറാക്കാനും വിദ്യാർഥികളോടൊപ്പം കൂടുതൽ സമയം ചെലവഴിക്കാനും ഇഎസ്‌സിപി ബിസിനസ് സ്കൂളിലെ അധ്യാപകരെ പ്രാപ്തരാക്കിയും⁠(പുതിയ വിൻഡോയിൽ തുറക്കുന്നു) വിദ്യാഭ്യാസം മെച്ചപ്പെടുത്തുന്നു.
• ഞങ്ങളുടെ സാങ്കേതികവിദ്യ ഉപയോഗിച്ച് തങ്ങളുടെ പ്ലാറ്റ്‌ഫോമുകൾ മെച്ചപ്പെടുത്തുകയും ആഗോളതലത്തിൽ മത്സരിക്കുകയും ചെയ്യുന്ന പാർലോവ, പിഗ്മെന്റ് തുടങ്ങിയ എഐ അധിഷ്ഠിത കമ്പനികളുടെ പുതിയ തലമുറയിലൂടെ ഊർജസ്വലമായ യൂറോപ്യൻ നവസംരംഭ ആവാസവ്യവസ്ഥ കെട്ടിപ്പടുക്കുന്നു.

ഏപ്രിലിൽ പ്രഖ്യാപിച്ച യൂറോപ്യൻ യൂണിയന്റെ എഐ ഭൂഖണ്ഡ പ്രവർത്തനപദ്ധതിയുമായി മുന്നോട്ടുപോകാനും ഇതിനകം പ്രകടമായ എഐയുടെ സ്വാധീനം കൂടുതൽ ശക്തമാക്കാനും പ്രാക്ടീസ് കോഡ് യൂറോപ്പിന് വഴിതുറക്കുന്നു. 

ഭൂഖണ്ഡത്തിലെ എഐ പ്രതിഭകളെ യൂറോപ്പ് വളർത്തുകയും പിന്തുണയ്ക്കുകയും വേണം. ഭാവിയിലെ ബിസിനസുകളെയും തൊഴിലുകളെയും വരുമാനത്തെയും പ്രതിനിധാനം ചെയ്യുന്ന പ്രാദേശിക എഐ വികസിപ്പിക്കുന്നവരെയും സംരംഭകരെയും പിന്തുണയ്ക്കണം. യൂറോപ്പിനെ മുന്നോട്ടുനയിക്കാൻ കൂടുതൽ ആളുകൾക്ക് എഐ ഉപകരണങ്ങൾ ലഭ്യമാക്കുകയും വേണം. 

യൂറോപ്പിൽ പലപ്പോഴും നിയന്ത്രണങ്ങൾക്കാണ് അമിതമായ ശ്രദ്ധ ലഭിച്ചിട്ടുള്ളത്. ഇനി സമീപനം മാറ്റേണ്ട സമയമാണ്. യൂറോപ്പിന്റെ ഭാവിക്കായി നവീകരിക്കുന്നവർക്ക് പുതുമകൾ സൃഷ്ടിക്കാനും നിർമാതാക്കൾക്ക് നിർമിക്കാനും കരുത്തേകാൻ ഈ അവസരം ഉപയോഗിക്കണം.

വൈദ്യുതി പോലെ രാഷ്ട്രനിർമാണത്തിന് അടിസ്ഥാനമായ സാങ്കേതികവിദ്യയാണ് എഐ. ഉൽപ്പാദനക്ഷമത വർധിപ്പിച്ചുകൊണ്ട് അത് സമ്പദ്‌വ്യവസ്ഥകളെ പരിവർത്തനം ചെയ്യുകയും അത്യാവശ്യമായ വളർച്ച സാധ്യമാക്കുകയും ചെയ്യും. യൂറോപ്പിൽനിന്ന് സാമ്പത്തിക മൂല്യം പുറത്തേക്ക് ഒഴുകാൻ ഇടയാക്കിയ ആധുനിക ഡിജിറ്റൽ യുഗത്തിലെ മുൻകാല ചൂഷണാത്മക സാങ്കേതികവിദ്യകളിൽനിന്ന് വ്യത്യസ്തമായി, ജനങ്ങൾക്ക് കൂടുതൽ കാര്യങ്ങൾ ചെയ്യാൻ സഹായിക്കുന്ന ഉപകരണങ്ങൾ വ്യാപകമായി ലഭ്യമാക്കിയാൽ സാമ്പത്തിക അവസരങ്ങൾ വിപുലീകരിക്കുന്ന ഉൽപ്പാദനക്ഷമമായ സാങ്കേതികവിദ്യയാണ് എഐ. 

യൂറോപ്പിൽനിന്ന്, യൂറോപ്പിനാൽ, യൂറോപ്പിനുവേണ്ടി രൂപപ്പെടുന്ന എഐയെ സ്വാധീനിക്കാനും അതിൽനിന്ന് പ്രയോജനം നേടാനും അവിടത്തെ ജനങ്ങൾക്ക് കഴിയുമെന്ന് ഉറപ്പാക്കുകയാണ് യൂറോപ്പിന്റെ വെല്ലുവിളി. 

ഈ ലക്ഷ്യം കൈവരിക്കാൻ, യൂറോപ്പിന്റെ എഐ കേന്ദ്രീകൃത സമ്പദ്‌വ്യവസ്ഥയുടെ ഭാവി നേതാക്കളാകുന്ന തദ്ദേശീയ നവസംരംഭങ്ങൾക്കും ചെറുകിട ബിസിനസുകൾക്കും കോഡും എഐ നിയമത്തിലെ അപകടസാധ്യതാധിഷ്ഠിത ചട്ടക്കൂടും പാലിക്കുന്നത് കഴിയുന്നത്ര ലളിതവും കാര്യക്ഷമവുമായിരിക്കണം. ഈ പുതുതലമുറ കമ്പനികളെ പിന്തുണയ്ക്കാൻ കൂടുതൽ ലളിതവൽക്കരണവും ഏകോപനവും വേണമെന്ന് ഞങ്ങൾ വാദിച്ചിട്ടുണ്ട്⁠. യൂറോപ്പിൽനിന്ന്, യൂറോപ്പിനാൽ, യൂറോപ്പിനുവേണ്ടിയുള്ള എഐയിൽ അവ നിർണായകമായതിനാൽ അവരുടെ ആശങ്കകൾക്ക് തുടർന്നും പിന്തുണ നൽകും. 

ആത്യന്തികമായി, ധീരവും ഏകീകൃതവുമായ യൂറോപ്യൻ എഐ തന്ത്രത്തിന്റെ നട്ടെല്ലാകാൻ എഐ ഭൂഖണ്ഡ പ്രവർത്തനപദ്ധതിയുമായി പ്രാക്ടീസ് കോഡ് ഏകോപിപ്പിക്കുമ്പോഴാണ് അത് ഏറ്റവും ഫലപ്രദമാകുക. എഐയെ സമൃദ്ധിയുടെയും പുരോഗതിയുടെയും ഉറവിടമാക്കാൻ എഐ ബോർഡും അത് പ്രതിനിധാനം ചെയ്യുന്ന അംഗരാജ്യങ്ങളും ആ ദർശനം സ്വീകരിച്ച് നടപ്പാക്കണമെന്ന് ഞങ്ങൾ അഭ്യർഥിക്കുന്നു.  

ആഗോളതലത്തിൽ മത്സരിക്കാനും മുന്നിട്ടുനിൽക്കാനും ജനങ്ങൾക്കും ബിസിനസുകൾക്കും, പ്രത്യേകിച്ച് വികസിപ്പിക്കുന്നവർക്കും നവസംരംഭങ്ങൾക്കും, ആവശ്യമായ ഉപകരണങ്ങൾ ഉറപ്പാക്കിക്കൊണ്ട് യൂറോപ്പിന് വേണ്ട എഐ അടിസ്ഥാനസൗകര്യത്തിന്റെ വികസനത്തിന് കോഡും പ്രവർത്തനപദ്ധതിയും ഒരുമിച്ച് ഊർജമേകണം.

ഊർജവും പരിശീലന ഡാറ്റയും ഉൾപ്പെടെ എഐയ്ക്ക് ആവശ്യമായ അസംസ്കൃത വിഭവങ്ങളുടെ ലഭ്യതയെയും എഐ സ്വീകരിക്കുന്ന വേഗത്തെയും തങ്ങളുടെ നിയന്ത്രണക്രമം എങ്ങനെ ബാധിക്കാമെന്ന് യൂറോപ്യൻ യൂണിയൻ വിലയിരുത്തണം. യൂറോപ്പിന്റെ മത്സരക്ഷമത ഉറപ്പാക്കാനും യുഎസുമായുള്ള ദീർഘകാല ഉൽപ്പാദനക്ഷമതാ വിടവ്⁠(പുതിയ വിൻഡോയിൽ തുറക്കുന്നു) പരിഹരിക്കാനും ഇത് പ്രധാനമാണ്. 

ആ അടിസ്ഥാനസൗകര്യം നിർമിക്കാൻ ആവശ്യമായ മൂലധനനിക്ഷേപം ലഭ്യമാക്കുന്നതിന് വേണ്ട ദീർഘകാല ഉറപ്പും വ്യക്തതയും യൂറോപ്യൻ യൂണിയന്റെ തന്ത്രം നൽകണം.

സാധ്യതകളെ പുരോഗതിയാക്കി മാറ്റാൻ, യഥാർഥ സാമ്പത്തിക നേട്ടങ്ങൾ നൽകുന്ന യൂറോപ്യൻ എഐയുടെ വികസനം ത്വരിതപ്പെടുത്തുന്നതിനുള്ള തുടക്കവേദിയായി കോഡ് ഉപയോഗിച്ചുകൊണ്ട് ഞങ്ങൾ യൂറോപ്യൻ എഐ അടിസ്ഥാനസൗകര്യ പ്രചാരണം ആരംഭിക്കുകയാണ്.

ശരിയായ ദർശനവും നിർവഹണവുമുണ്ടെങ്കിൽ വളർച്ചയ്ക്ക് ഊർജമേകാനും ഈ പുതിയ സാങ്കേതിക അധ്യായത്തിലെ ആഗോള നേതാക്കളിലൊന്നാകാനും യൂറോപ്പിന് എഐ പ്രയോജനപ്പെടുത്താനാകുമെന്ന് OpenAI ഉറച്ചു വിശ്വസിക്കുന്നതായി ഞങ്ങളുടെ യൂറോപ്യൻ യൂണിയൻ സാമ്പത്തിക രൂപരേഖ⁠ വ്യക്തമാക്കിയിരുന്നു. 

ഡാറ്റാ സെന്ററുകൾ, തൊഴിൽശക്തിയുടെ നൈപുണ്യവും പ്രതിഭയും, പ്രാദേശിക നവസംരംഭങ്ങൾക്കുള്ള പിന്തുണ തുടങ്ങിയവ ഉൾപ്പെടെ എഐ അടിസ്ഥാനസൗകര്യം വികസിപ്പിക്കാൻ ആഗ്രഹിക്കുന്ന ലോകമെമ്പാടുമുള്ള രാജ്യങ്ങളെ പിന്തുണയ്ക്കാനുള്ള ഞങ്ങളുടെ സംരംഭമായ രാജ്യങ്ങൾക്കായുള്ള OpenAI⁠ മേയിൽ ആരംഭിച്ചു. ഇപ്പോൾ യൂറോപ്പിലെ ഞങ്ങളുടെ പ്രവർത്തനം കൂടുതൽ ശക്തമാക്കാൻ ഞങ്ങൾ തയ്യാറാണ്.

വേനൽക്കാലം മുതൽ ശരത്കാലം വരെ, താഴെപ്പറയുന്ന കാര്യങ്ങൾ നടപ്പാക്കാൻ യൂറോപ്പിലെ സർക്കാരുകളുമായും ബിസിനസുകളുമായും ബന്ധപ്പെട്ട കക്ഷികളുമായും ഞങ്ങൾ കൂടിക്കാഴ്ച നടത്തും: 

• ഡാറ്റാ സെന്റർ ശേഷി: എഐയിൽ മുന്നിട്ടുനിൽക്കാൻ ആവശ്യമായ അടിസ്ഥാനസൗകര്യം യൂറോപ്പിന് വേണ്ടിവരും. അതുകൊണ്ടാണ് യൂറോപ്പിൽ പുതുതലമുറ എഐ അടിസ്ഥാനസൗകര്യം നിർമിക്കാനുള്ള യൂറോപ്യൻ യൂണിയന്റെ എഐ ഗിഗാഫാക്ടറീസ് സംരംഭത്തിന്റെ കൺസോർഷ്യങ്ങളിൽ ചേരാൻ ഞങ്ങൾ താൽപ്പര്യപത്രങ്ങൾ സമർപ്പിച്ചത്. ഈ പദ്ധതികൾ പ്രാരംഭഘട്ടത്തിലാണെങ്കിലും യൂറോപ്പിന്റെ ഭാവിക്ക് ഊർജമേകാനും പുതിയ പ്രാദേശിക വ്യവസായങ്ങളെ പിന്തുണയ്ക്കാനും പരമാധികാര കമ്പ്യൂട്ടിങ് ശേഷി നൽകാനും അവയ്ക്ക് കഴിയും. 
• എഐ അധിഷ്ഠിത വിദ്യാഭ്യാസം: ലോകമെമ്പാടുമുള്ള ദശലക്ഷക്കണക്കിന് വിദ്യാർഥികളും അധ്യാപകരും പഠനം വ്യക്തിഗതമാക്കാൻ ഇതിനകം ChatGPT ഉപയോഗിക്കുന്നു.  രാജ്യത്തുടനീളമുള്ള സെക്കൻഡറി സ്കൂളുകളിൽ ChatGPT Edu ലഭ്യമാക്കുന്ന ലോകത്തിലെ ആദ്യ സംരംഭത്തിൽ എസ്റ്റോണിയൻ സർക്കാരുമായി സഹകരിക്കുന്നതിൽ ഞങ്ങൾക്ക് അഭിമാനമുണ്ട്. ഇതേ മാതൃക പിന്തുടരാൻ മറ്റ് യൂറോപ്യൻ യൂണിയൻ സർക്കാരുകളും താൽപ്പര്യം പ്രകടിപ്പിച്ചിട്ടുണ്ട്. 
• തന്ത്രപ്രധാനമായ സർക്കാർ പങ്കാളിത്തങ്ങൾ: പൊതുമേഖലയ്ക്കായുള്ള ഞങ്ങളുടെ സേവനങ്ങൾ തുടർന്നും വികസിപ്പിക്കുകയാണ്. എഐ യുഗത്തിന് അനുയോജ്യമായ പൊതു-സ്വകാര്യ പങ്കാളിത്തങ്ങൾക്കുള്ള പുതിയ പ്രവർത്തനരീതി രൂപപ്പെടുത്താൻ യൂറോപ്യൻ സർക്കാരുകളുമായി സഹകരിക്കാനും ഞങ്ങൾ ആഗ്രഹിക്കുന്നു. യൂറോപ്യൻ യൂണിയനിൽ ഡാറ്റ റെസിഡൻസിയും പ്രാദേശിക സംസ്കാരങ്ങൾക്കും ഭാഷകൾക്കും അനുസരിച്ച് ChatGPT ഇഷ്ടാനുസൃതമാക്കാനുള്ള സൗകര്യവും ഞങ്ങൾ ഇതിനകം നൽകുന്നു. സ്വന്തം മൂല്യങ്ങൾക്ക് അനുസൃതമായി പരമാധികാര ആവശ്യങ്ങൾക്കായി എഐ പൊരുത്തപ്പെടുത്തി പ്രയോഗിക്കുമ്പോൾ യൂറോപ്യൻ സർക്കാരുകളുമായി സഹകരിക്കാനും ഞങ്ങൾ ആഗ്രഹിക്കുന്നു.
• ദേശീയ എഐ നവസംരംഭ നിധികൾ: നിർണായകമായ ആശയങ്ങളെ യൂറോപ്യൻ വിജയഗാഥകളാക്കി മാറ്റാൻ, ഉയർന്ന സാധ്യതയുള്ള എഐ നവസംരംഭങ്ങൾക്ക് പ്രാരംഭധനം നൽകുന്ന പ്രത്യേക ദേശീയതല നിധികൾ സന്നദ്ധരായ സർക്കാരുകളോടൊപ്പം സമാഹരിക്കാൻ സഹായിക്കുന്നതിൽ OpenAIക്ക് താൽപ്പര്യമുണ്ട്. പ്രാദേശിക സ്ഥാപകരെ പിന്തുണച്ചും അത്യാധുനിക സാങ്കേതികവിദ്യയിലേക്കുള്ള മുൻകൂർ പ്രവേശനവും സാങ്കേതിക സഹായവും നൽകിയും ഓരോ നിധിയും ദേശീയ മുൻഗണനകൾ നിറവേറ്റുകയും തൊഴിലവസരങ്ങളും വരുമാനവും പുതിയ വ്യവസായങ്ങളും സൃഷ്ടിക്കുകയും ചെയ്യും. 
• എഐ സ്വീകരിക്കൽ: യൂറോപ്യൻ സമ്പദ്‌വ്യവസ്ഥയുടെ എല്ലാ മേഖലകളിലും എഐ സ്വീകരിക്കൽ സാധ്യമാക്കുക എന്ന ഒറ്റ ലക്ഷ്യത്തിൽ കേന്ദ്രീകരിച്ച എഐ നയ ഹാക്കത്തോൺ നടത്താൻ സെപ്റ്റംബറിൽ ഞങ്ങൾ അലൈഡ് ഫോർ സ്റ്റാർട്ടപ്പ്സിനും വിപുലമായ ആവാസവ്യവസ്ഥയ്ക്കുമൊപ്പം ബ്രസൽസിലുണ്ടാകും.

യൂറോപ്പിന്റെ ഭൂഖണ്ഡതല എഐ ലക്ഷ്യങ്ങൾ നടപ്പാക്കുന്നതിൽ സ്വന്തം പങ്ക് നിർവഹിക്കാൻ OpenAI പ്രതിജ്ഞാബദ്ധമാണ്. വേനൽക്കാലത്തും ശരത്കാലത്തും ഈ സംരംഭങ്ങളുടെ കൂടുതൽ പുരോഗതി ഞങ്ങൾ പങ്കുവയ്ക്കും. 

ബുദ്ധിയുഗത്തിന്റെ സാമ്പത്തികവും സാമൂഹികവുമായ നേട്ടങ്ങളിൽ യൂറോപ്യർക്ക് പൂർണമായി പങ്കാളികളാകാൻ ശേഷിയുള്ളതും എല്ലാവർക്കും ലഭ്യവും സുരക്ഷിതവുമായ എഐ മോഡലുകൾ നൽകാനുള്ള ഞങ്ങളുടെ പ്രതിബദ്ധതയാണ് കോഡിൽ ഒപ്പിടുന്നത് പ്രതിഫലിപ്പിക്കുന്നത്.

സുതാര്യത, ഉത്തരവാദിത്തം, സുരക്ഷ എന്നിവയ്ക്ക് മുൻഗണന നൽകിയാണ് ഞങ്ങൾ എല്ലായ്പ്പോഴും മോഡലുകൾ വികസിപ്പിച്ചിട്ടുള്ളത്. ഈ തത്ത്വങ്ങൾ കോഡിലും പ്രതിഫലിക്കുന്നു.

ബ്ലെച്ച്ലി പ്രഖ്യാപനത്തിലും (നവംബർ 2023) സോൾ ഫ്രെയിംവർക്കിലും (മേയ് 2024) ഒപ്പുവച്ചത് ഉൾപ്പെടെ, കഴിഞ്ഞ ഏതാനും വർഷങ്ങളായി ഞങ്ങൾ തുടക്കമിട്ട വ്യവസായത്തിലെ മുൻനിര സുരക്ഷാ-സുതാര്യതാ നടപടികളിൽ പലതും കോഡിൽ ഒപ്പിടുന്നതിലൂടെ കൂടുതൽ ശക്തമാകുന്നു.

ബ്ലെച്ച്ലി ഉച്ചകോടിക്കുശേഷം സമഗ്രമായ സുരക്ഷാ-സംരക്ഷണ പ്രോട്ടോക്കോൾ പ്രസിദ്ധീകരിച്ച ആദ്യ കമ്പനികളിലൊന്നായിരുന്നു ഞങ്ങൾ. അത്യാധുനിക എഐ മോഡലുകൾ സുരക്ഷിതമായി വിന്യസിക്കുന്നതിനുള്ള ഞങ്ങളുടെ സമീപനം വിശദീകരിക്കുന്ന പ്രിപെയർഡ്നസ് ഫ്രെയിംവർക്ക് (2023) ആയിരുന്നു അത്. സോൾ ഫ്രെയിംവർക്കിനും ആഭ്യന്തര ഉത്തരവാദിത്ത-ഭരണ ചട്ടക്കൂടുകൾ തുടർച്ചയായി അവലോകനം ചെയ്യാനുള്ള ഞങ്ങളുടെ പ്രതിബദ്ധതയ്ക്കും അനുസൃതമായി, പരിഷ്കരിച്ച പ്രിപെയർഡ്നസ് ഫ്രെയിംവർക്ക് 2025 ഏപ്രിലിൽ ഞങ്ങൾ പ്രസിദ്ധീകരിച്ചു⁠. 

ഞങ്ങളുടെ സാങ്കേതികവിദ്യ ഉത്തരവാദിത്തത്തോടെ വികസിപ്പിക്കാനും വിന്യസിക്കാനും വഴികാട്ടുന്ന വ്യവസായത്തിലെ മുൻനിര സുരക്ഷാ രീതികളും ഞങ്ങൾ രൂപപ്പെടുത്തിയിട്ടുണ്ട്. അവയിൽ ഉൾപ്പെടുന്നവ: 

• ഞങ്ങളുടെ പ്രധാന പതിപ്പുകൾക്കൊപ്പം വിശദമായ സിസ്റ്റം കാർഡുകൾ⁠ ഞങ്ങൾ ദീർഘകാലമായി പ്രസിദ്ധീകരിക്കുന്നു. ഞങ്ങളുടെ മോഡലുകൾക്ക് എന്തെല്ലാം ചെയ്യാനാകും, എന്തെല്ലാം ചെയ്യാനാകില്ല, ഏതൊക്കെ അപകടസാധ്യതകളാണ് പരിശോധിച്ചത്, ഏതെല്ലാം കാര്യങ്ങളാണ് ഇപ്പോഴും പഠിച്ചുകൊണ്ടിരിക്കുന്നത് എന്നിവ അവ വിശദമാക്കുന്നു. 
• ഞങ്ങളുടെ മോഡലുകളുടെ സുരക്ഷാ മൂല്യനിർണയ ഫലങ്ങൾ പൊതുജനങ്ങൾക്ക് ലഭ്യമാക്കുന്നതാണ് സുരക്ഷാ മൂല്യനിർണയ കേന്ദ്രം⁠.
• ഞങ്ങളുടെ മോഡലുകളെ സമ്മർദപരിശോധനയ്ക്ക് വിധേയമാക്കാൻ ബാഹ്യ വിദഗ്ധരെ ഉൾപ്പെടുത്തുന്നതാണ് ഞങ്ങളുടെ റെഡ് ടീമിംഗ് ശൃംഖല⁠.
• മനുഷ്യ മൂല്യങ്ങളും ജനാധിപത്യ മാനദണ്ഡങ്ങളും പ്രതിഫലിപ്പിക്കുന്ന തരത്തിൽ മോഡലുകളുടെ പെരുമാറ്റം ഞങ്ങൾ എങ്ങനെ രൂപപ്പെടുത്തുന്നു എന്നതിലേക്ക് മോഡൽ സ്പെക്⁠(പുതിയ വിൻഡോയിൽ തുറക്കുന്നു) ഒരു കാഴ്ച നൽകുന്നു.

ഈ പ്രവർത്തനങ്ങൾ ഒരുമിച്ച് വ്യവസായത്തിലെ സുരക്ഷാ മാനദണ്ഡങ്ങൾ രൂപപ്പെടുത്തുന്നതിലും പ്രായോഗികമായ പ്രാക്ടീസ് കോഡിന്റെ വികസനത്തിന് മാർഗനിർദേശം നൽകുന്നതിലും നിർണായക പങ്കുവഹിച്ചു. ലോകത്ത് എവിടെയായാലും എല്ലാവർക്കും പ്രയോജനപ്പെടുന്ന വിധത്തിൽ ഞങ്ങളുടെ സാങ്കേതികവിദ്യ ഉത്തരവാദിത്തത്തോടെ ഉപയോഗിക്കപ്പെടുന്നുവെന്ന് ഉറപ്പാക്കാൻ സുരക്ഷയോടുള്ള ഞങ്ങളുടെ സമീപനം ഘട്ടംഘട്ടമായി മെച്ചപ്പെടുത്തുന്നത് തുടരും.