ഉത്തരവാദിത്തമുള്ള AI അടിസ്ഥാനസൗകര്യത്തിന് പുതിയ മാനദണ്ഡം
ഞങ്ങൾ നിർമാണം നടത്തുന്ന പ്രദേശങ്ങളിലെ ജനങ്ങൾക്ക് പുതിയ ഉറപ്പുകളും കൂടുതൽ അമേരിക്കക്കാരെ നേട്ടങ്ങളിൽ പങ്കുചേരാൻ സഹായിക്കുന്ന നയനിർദേശങ്ങളും.
സ്വന്തം ഭാവി രൂപപ്പെടുത്താൻ ആളുകൾക്ക് കൂടുതൽ കരുത്ത് നൽകുമെന്നതാണ് AI-യുടെ വാഗ്ദാനം. പുതിയൊരു വൈദഗ്ധ്യം നേടാനും സംരംഭം തുടങ്ങാനും മുമ്പ് പരിഹരിക്കാനാകാത്ത പ്രശ്നം പരിഹരിക്കാനും അത് സഹായിക്കും. അമേരിക്കയിൽ കമ്പ്യൂട്ടിംഗ് അടിസ്ഥാനസൗകര്യങ്ങളുടെ ശേഷി വർധിപ്പിക്കുന്നത്, AI ലഭ്യമാക്കാനുള്ള ചെലവ് കുറയ്ക്കാനും ഈ ഉപകരണങ്ങൾ കൂടുതൽ ആളുകളിലേക്ക് എത്തിക്കാനും ഈ സാങ്കേതികവിദ്യയിൽ അമേരിക്ക മുൻനിരയിൽത്തന്നെ നിൽക്കുന്നുവെന്ന് ഉറപ്പാക്കാനും സഹായിക്കും.
ഈ സൗകര്യങ്ങൾ സ്ഥാപിക്കുന്ന പ്രദേശങ്ങളിലെ ജനങ്ങൾക്കും സ്വന്തം ഭാവി രൂപപ്പെടുത്തുന്നതിൽ വ്യക്തമായ പങ്കുണ്ടാകണം. ക്യാമ്പസിന്റെ വികസനരീതിയിൽ സ്വാധീനം ചെലുത്താനും അതിന്റെ വൈദ്യുതിച്ചെലവ് നിർമാതാക്കൾ വഹിക്കുന്നുവെന്ന് ഉറപ്പാക്കാനും അതു സൃഷ്ടിക്കുന്ന തൊഴിൽ, വ്യാപാര അവസരങ്ങളിൽ പങ്കുചേരാനും പ്രദേശവാസികൾക്ക് കഴിയണം. AI-യുടെ നേട്ടങ്ങൾ വിശാലമായി പങ്കുവെക്കപ്പെടുമോ എന്നതിന്റെ ആദ്യ പരീക്ഷണങ്ങളിലൊന്നാണ് ഈ ക്യാമ്പസുകൾ നാം എങ്ങനെ നിർമിക്കുന്നു എന്നത്.
ഞങ്ങളുടെ ദേശീയ ജനസമൂഹ ഉടമ്പടിയും(പുതിയ വിൻഡോയിൽ തുറക്കുന്നു) കമ്പ്യൂട്ടിംഗ് ക്യാമ്പസ് നയരേഖയും(പുതിയ വിൻഡോയിൽ തുറക്കുന്നു) ഇന്ന് ഞങ്ങൾ പ്രസിദ്ധീകരിക്കുകയാണ്. ഭാവിയിൽ ഞങ്ങൾ സ്വന്തമാക്കി പ്രവർത്തിപ്പിക്കുന്ന ക്യാമ്പസുകളിൽ OpenAI-യിൽനിന്ന് പ്രദേശവാസികൾക്ക് എന്തു പ്രതീക്ഷിക്കാമെന്ന് ഈ ഉടമ്പടി വ്യക്തമാക്കുന്നു. കമ്പ്യൂട്ടിംഗ് ക്യാമ്പസ് വികസനത്തിൽ ജനങ്ങൾക്ക് അർഥവത്തായ പങ്കാളിത്തം നൽകാനും കുടുംബങ്ങളെ പുതിയ ചെലവുകളിൽനിന്ന് സംരക്ഷിക്കാനും AI-യുടെ സാമ്പത്തിക നേട്ടങ്ങൾ വിശാലമായി പങ്കിടാനും സഹായിക്കുന്ന നയങ്ങളാണ് നയരേഖ നിർദേശിക്കുന്നത്.
ഊർജച്ചെലവ് സ്വയം വഹിക്കാനും പ്രാദേശിക മുൻഗണനകൾക്കനുസരിച്ച് പദ്ധതികൾ തയ്യാറാക്കാനുമുള്ള സ്റ്റാർഗേറ്റ് ജനസമൂഹ പ്രതിബദ്ധതകൾ ജനുവരിയിൽ പ്രഖ്യാപിച്ചുകൊണ്ട് ഞങ്ങൾ ആരംഭിച്ച പ്രവർത്തനത്തിന്റെ തുടർച്ചയാണിത്. തുടർന്ന് ജോർജിയയിലും ഒഹായോയിലും ഊർജച്ചെലവ്, ജലവിനിയോഗം, പ്രാദേശിക നിക്ഷേപം, ഉത്തരവാദിത്തം എന്നിവയിൽ വ്യക്തമായ ഉറപ്പുകൾ നൽകി. ഈ പ്രവർത്തനത്തിലുടനീളം പ്രദേശവാസികൾ, പ്രാദേശിക നേതാക്കൾ, വിദ്യാലയങ്ങൾ, വ്യാപാരസ്ഥാപനങ്ങൾ എന്നിവരിൽനിന്ന് അവരുടെ സമൂഹത്തിന് പ്രധാനമായ കാര്യങ്ങൾ ഞങ്ങൾ കേട്ടറിഞ്ഞു. ആ തുടർച്ചയായ ശ്രമത്തിന്റെ അടുത്ത പടിയാണ് ഇന്നത്തെ പ്രഖ്യാപനം.
ഭാവിയിൽ OpenAI സ്വന്തമാക്കി പ്രവർത്തിപ്പിക്കുന്ന ഓരോ കമ്പ്യൂട്ടിംഗ് ക്യാമ്പസിനും അതിന്റേതായ പ്രാദേശിക ഉടമ്പടിയുണ്ടാകും. നിർദേശങ്ങൾ പദ്ധതികളെ സ്വാധീനിക്കാൻ കഴിയുന്നത്ര നേരത്തേ പ്രദേശവാസികളെ പങ്കെടുപ്പിക്കും. ക്യാമ്പസ് നിലനിൽക്കുന്ന കാലമത്രയും അവർക്ക് പ്രാദേശികമായി ബന്ധപ്പെടാൻ ഒരു പ്രതിനിധിയുണ്ടാകും. ഞങ്ങളുടെ പ്രവർത്തനത്തെക്കുറിച്ച് വർഷംതോറും പൊതുജനങ്ങൾക്ക് റിപ്പോർട്ട് നൽകും. ഓരോ ഉടമ്പടിയും പ്രാദേശിക മുൻഗണനകൾ പ്രതിഫലിപ്പിക്കും. ഒപ്പം ഈ പൊതുപ്രതിബദ്ധതകളും ഉൾക്കൊള്ളും:
ഊർജത്തിനും അടിസ്ഥാനസൗകര്യത്തിനുമുള്ള സ്വന്തം ചെലവ് വഹിക്കുക. ഞങ്ങൾ ഉപയോഗിക്കുന്ന വൈദ്യുതിയുടെയും ഞങ്ങൾക്കായി വേണ്ട അടിസ്ഥാനസൗകര്യങ്ങളുടെയും മുഴുവൻ ചെലവും ഞങ്ങൾ വഹിക്കും. വലിയ ചെലവുകൾ തുടങ്ങുംമുമ്പ് സാമ്പത്തിക ഉറപ്പുകൾ നൽകും. പദ്ധതി വൈകിയാലോ ചുരുക്കിയാലോ റദ്ദാക്കിയാലോ മറ്റ് ഉപഭോക്താക്കളെ ബാധിക്കാതിരിക്കാനാണിത്.
പ്രാദേശിക വിഭവങ്ങൾ സംരക്ഷിക്കുകയും ഞങ്ങളുടെ സ്വാധീനം റിപ്പോർട്ട് ചെയ്യുകയും ചെയ്യുക. ഓരോ ക്യാമ്പസിനും ജലവിനിയോഗ പദ്ധതി തയ്യാറാക്കും. ജലം പുനഃചംക്രമണം ചെയ്യുന്നതോ കുറച്ച് ജലം മാത്രം വേണ്ടതോ ആയ ശീതീകരണത്തിന് മുൻഗണന നൽകും. ഓരോ കേന്ദ്രത്തിലെയും ജല, വൈദ്യുതി ഉപയോഗം പ്രസിദ്ധീകരിക്കും. പ്രവർത്തനം തുടങ്ങുംമുമ്പും തുടർന്ന് എല്ലാ വർഷവും നിർമാണ പദ്ധതികളും സ്വതന്ത്ര ശബ്ദപഠനങ്ങളും പ്രസിദ്ധീകരിക്കും. സർക്കാർ ഉദ്യോഗസ്ഥരുമായി രഹസ്യസംരക്ഷണ കരാറുകൾ (NDA-കൾ) ഉപയോഗിക്കില്ല. നിയമാനുസൃത സുരക്ഷാവിവരങ്ങൾ, വ്യാപാരരഹസ്യങ്ങൾ, ഉടമസ്ഥാവകാശമുള്ളതോ മത്സരത്തെ ബാധിക്കുന്നതോ ആയ വിവരങ്ങൾ എന്നിവയ്ക്കുമാത്രം പരിമിതമായ സംരക്ഷണം അനുവദിക്കും.
പ്രാദേശിക തൊഴിലാളികൾക്കും സംരംഭങ്ങൾക്കും അവസരങ്ങൾ സൃഷ്ടിക്കുക. സൃഷ്ടിക്കാൻ പ്രതീക്ഷിക്കുന്ന തൊഴിലുകൾ പ്രസിദ്ധീകരിക്കും. അവയ്ക്കായി പ്രദേശവാസികളെ സജ്ജരാക്കാൻ തൊഴിലാളി സംഘടനകളുമായും പരിശീലനദാതാക്കളുമായും സഹകരിക്കും. നിയമനങ്ങളും തൊഴിൽപരിശീലനവും വർഷംതോറും റിപ്പോർട്ട് ചെയ്യും. തദ്ദേശവാസികളുടെ പങ്കാളിത്തത്തോടെ തിരഞ്ഞെടുക്കുന്ന മുൻഗണനകളിൽ തുടർച്ചയായി നിക്ഷേപിക്കുകയും ചെയ്യും.
ഈ മുൻഗണനകൾ ഓരോ സ്ഥലത്തും വ്യത്യസ്തമായിരിക്കും. ജോർജിയയിലെ എഫിങ്‌ഹാം കൗണ്ടിയിൽ, അവിടത്തെ 14,000 വിദ്യാർഥികൾക്കും സൗജന്യ സ്കൂൾഭക്ഷണം നൽകാനുള്ള 48 ലക്ഷം ഡോളറിന്റെ ധനസഹായം സ്വരൂപിക്കുന്നതിൽ പ്രദേശവാസികൾ പങ്കുവഹിച്ചു. ഒഹായോയിലെ പൈക്ക് കൗണ്ടിയിൽ കുടുംബങ്ങൾ ശിശുപരിചരണത്തിന് മുൻഗണന നൽകിയതോടെ OpenAI-യും എസ്‌ബി എനർജിയും ചേർന്ന് 60 ലക്ഷം ഡോളർ നൽകാൻ പ്രതിജ്ഞാബദ്ധരായി.
സ്വന്തം പ്രദേശത്ത് ആര് ക്യാമ്പസ് നിർമിച്ചാലും അടിസ്ഥാന സംരക്ഷണങ്ങൾ ലഭിക്കുമെന്ന് കുടുംബങ്ങൾക്ക് ഉറപ്പുണ്ടാകണം. കമ്പനികൾ സ്വമേധയാ നൽകുന്ന ഉറപ്പുകൾ പ്രധാനപ്പെട്ട തുടക്കമാണ്. എന്നാൽ ഞങ്ങളുടെ നയരേഖ അതിനപ്പുറം പോകുന്നു: ഈ വ്യവസായമേഖലയിലെ നിർമാണത്തിന് വ്യക്തമായ ചട്ടങ്ങൾ രൂപപ്പെടുത്താൻ ഫെഡറൽ, സംസ്ഥാന, പ്രാദേശിക നയരൂപകർത്താക്കളോട് ആവശ്യപ്പെടുന്നു. ജനങ്ങൾക്കും ജനപ്രതിനിധികൾക്കും കമ്പനികൾക്കുമിടയിൽ പരസ്പര വിശ്വാസം സ്ഥാപിക്കാൻ പുതിയ നയം ആവശ്യമാണ്. ഉത്തരവാദിത്തമുള്ള നിക്ഷേപം പ്രോത്സാഹിപ്പിക്കാനും ജനങ്ങളെ സംരക്ഷിക്കാനും AI അടിസ്ഥാനസൗകര്യത്തിന്റെ നേട്ടങ്ങൾ വിശാലമായി പങ്കിടുന്നുവെന്ന് ഉറപ്പാക്കാനും നിയമനിർമാതാക്കൾ ചട്ടങ്ങൾ രൂപപ്പെടുത്തണം.
വൈദ്യുതിക്ക് ആര് പണം നൽകുന്നു എന്നതിൽനിന്നാണ് അതിന്റെ തുടക്കം. വൻകിട വൈദ്യുതി ഉപഭോക്താക്കൾ ശൃംഖലയിലുണ്ടാക്കുന്ന അധികച്ചെലവ് സ്വയം വഹിക്കണമെന്നും പദ്ധതി നടക്കാതെപോയാൽ മറ്റു ഉപഭോക്താക്കൾ സംരക്ഷിക്കപ്പെടണമെന്നും സംസ്ഥാന വൈദ്യുതി നിയന്ത്രണ കമ്മീഷനുകൾ നിർബന്ധമാക്കണം. വൈദ്യുതിക്ഷാമമുള്ളപ്പോൾ സുരക്ഷിതമായി ഉപയോഗം കുറയ്ക്കാൻ കഴിയുന്ന ക്യാമ്പസുകൾക്ക് കണക്ഷൻ ലഭിക്കുന്നത് വൈദ്യുതി വിതരണസ്ഥാപനങ്ങൾ എളുപ്പമാക്കുകയും വേണം. ഉദാഹരണത്തിന്, എഫിങ്‌ഹാം കൗണ്ടിയിൽ ആസൂത്രണം ചെയ്ത ക്യാമ്പസിനായി ജോർജിയ പവറുമായുള്ള ഞങ്ങളുടെ കരാർ പ്രകാരം, ഉയർന്ന ഡിമാൻഡുള്ള സമയങ്ങളിൽ ഞങ്ങൾക്ക് നൽകുന്ന വൈദ്യുതിയിൽ 1,000 മെഗാവാട്ട് വരെ കുറയ്ക്കാൻ അവർക്ക് കഴിയും. പ്രസരണശൃംഖലയുടെ നവീകരണം വേഗത്തിലാക്കിയും ശുദ്ധ വൈദ്യുതിക്കുള്ള നികുതിയിളവുകൾ പുനഃസ്ഥാപിച്ച് വിപുലീകരിച്ചും വർധിക്കുന്ന ആവശ്യം നിറവേറ്റാൻ കോൺഗ്രസിന് സഹായിക്കാം.
നിർമാതാക്കളെ ഉത്തരവാദിത്തമുള്ളവരാക്കാനുള്ള മാർഗവും ജനങ്ങൾക്ക് വേണം. ജലം, ഊർജം, ശബ്ദം, നിയമനങ്ങൾ എന്നിവയെക്കുറിച്ച് പൊതുജനങ്ങൾക്ക് റിപ്പോർട്ട് നൽകണമെന്ന് നയരേഖ ആവശ്യപ്പെടുന്നു. സർക്കാർ ഉദ്യോഗസ്ഥരോട് രഹസ്യസംരക്ഷണ കരാറുകളിൽ ഒപ്പിടാൻ നിർമാതാക്കൾക്ക് ആവശ്യപ്പെടാവുന്ന സാഹചര്യങ്ങൾ കർശനമായി പരിമിതപ്പെടുത്തണമെന്നും നിർദേശിക്കുന്നു. സംസ്ഥാനങ്ങളോ തദ്ദേശ സർക്കാരുകളോ നികുതിയിളവുകൾ നൽകുമ്പോൾ വ്യവസ്ഥകൾ പരസ്യമാക്കണം. അളക്കാവുന്ന പ്രതിബദ്ധതകളും നിർമാതാവ് അവ പാലിക്കാത്തപക്ഷം ആനുകൂല്യങ്ങൾ തിരിച്ചുപിടിക്കാനുള്ള മാർഗവും ഉണ്ടായിരിക്കണം.
ഒടുവിൽ, കൂടുതൽ ജോലികൾ പ്രാദേശികമായി നിലനിർത്താനുള്ള പ്രായോഗിക മാർഗങ്ങളും നയരേഖ നിർദേശിക്കുന്നു. കമ്പ്യൂട്ടിംഗ് ക്യാമ്പസുകൾ പ്രാദേശിക തൊഴിലാളികളെയും സംരംഭങ്ങളെയും പിന്തുണയ്ക്കുന്നുവെന്ന് ഉറപ്പാക്കാനാണിത്. പ്രാദേശിക വിതരണക്കാർക്ക് കരാറുകൾക്കായി മത്സരിക്കാൻ കഴിയുന്നത്ര നേരത്തേ നിർമാതാക്കൾക്ക് വാങ്ങൽ പദ്ധതികൾ പങ്കുവെക്കാം. തൊഴിലുടമകൾക്കും നിർമാണത്തൊഴിലാളി സംഘടനകൾക്കും കമ്മ്യൂണിറ്റി കോളേജുകൾക്കും നിയമന പ്രവചനങ്ങൾ ഉപയോഗിച്ച്, ലഭ്യമാകുമെന്ന് ഉറപ്പുള്ള ജോലികൾക്കായി പ്രദേശവാസികളെ പരിശീലിപ്പിക്കാം. നിർമാണകാലത്തെ വൈദ്യുതി ജോലികൾ മുതൽ തുടർന്നുള്ള വർഷങ്ങളിലെ വൈദ്യുതി, ശീതീകരണ സംവിധാനങ്ങളുടെ പരിപാലനംവരെ ഇതിൽ ഉൾപ്പെടും.
ആഗോളതലത്തിൽ മത്സരിക്കാൻ അമേരിക്കയെ സഹായിക്കുന്ന നിക്ഷേപങ്ങൾക്ക് പ്രാദേശിക ജനസമൂഹങ്ങളുടെ അഭിവൃദ്ധിക്കും സഹായിക്കാനാകും. പദ്ധതികളിൽ മാറ്റം വരുത്താൻ കഴിയുന്ന ഘട്ടത്തിൽത്തന്നെ ജനങ്ങൾക്ക് അഭിപ്രായം പറയാൻ അവസരം നൽകുന്നതാണ് ആദ്യപടി. നിർമാതാക്കൾ ഉറപ്പുകൾ പാലിക്കുന്നുവെന്ന് ഉറപ്പുവരുത്താനുള്ള മാർഗവും ജനങ്ങൾക്ക് നൽകണം. ഞങ്ങളുടെ ഉടമസ്ഥതയിലുള്ളതും ഞങ്ങൾ പ്രവർത്തിപ്പിക്കുന്നതുമായ ക്യാമ്പസുകളിൽ ഞങ്ങൾ ഇതിനാണ് പ്രതിജ്ഞാബദ്ധരാകുന്നത്. രാജ്യത്ത് എവിടെ AI അടിസ്ഥാനസൗകര്യം നിർമിച്ചാലും ജനങ്ങൾക്ക് ഇതേ ഉറപ്പുകൾ ലഭിക്കണമെന്ന് ഞങ്ങൾ വിശ്വസിക്കുന്നു.
