ChatGPTയിൽ വിശ്വസ്ത കോൺടാക്റ്റ് അവതരിപ്പിക്കുന്നു

ആളുകൾ പഠിക്കാനും ആശയങ്ങൾ അന്വേഷിക്കാനും പ്രശ്നങ്ങൾ പരിഹരിക്കാനും വ്യക്തിപരമായ ചോദ്യങ്ങളെ കുറിച്ച് ആലോചിക്കാനും ChatGPT ഉപയോഗിക്കുന്നു. ചിലപ്പോൾ ഈ സംഭാഷണങ്ങളിൽ ഒരാൾ ബുദ്ധിമുട്ടിലാകുകയോ പിന്തുണ തേടുകയോ ചെയ്യുന്ന നിമിഷങ്ങൾ ഉണ്ടാകാം. സെൻസിറ്റീവായ സംഭാഷണങ്ങൾക്ക് ചിന്താപൂർവം പ്രതികരിക്കുകയും ആവശ്യമാകുമ്പോൾ ആളുകളെ യഥാർത്ഥ സഹായവുമായി ബന്ധപ്പെടാൻ പ്രോത്സാഹിപ്പിക്കുകയും ചെയ്യുന്ന സംവിധാനങ്ങൾ രൂപകൽപ്പന ചെയ്യുക എന്നതാണ് ഞങ്ങളുടെ ലക്ഷ്യം.

ഇന്ന് ഞങ്ങൾ 'വിശ്വസ്ത കോൺടാക്റ്റ്' അവതരിപ്പിച്ചു തുടങ്ങുകയാണ്.​​മുതിർന്നവർക്ക് അവർക്ക് വിശ്വാസമുള്ള ഒരാളെ നാമനിർദേശം ചെയ്യാവുന്ന ChatGPT‑യിലെ ഒരു ഓപ്ഷണൽ സുരക്ഷാ ഫീച്ചറാണിത്. ഇതിലൂടെ ഉപയോക്താക്കൾക്ക് തങ്ങൾ വിശ്വസിക്കുന്ന സുഹൃത്തിനെയോ കുടുംബാംഗത്തെയോ പരിചാരകരെയോ നാമനിർദ്ദേശം ചെയ്യാം. എൻറോൾ ചെയ്ത വ്യക്തി സ്വയം ഉപദ്രവിക്കുന്നതിനെക്കുറിച്ച് ഗൗരവകരമായ സുരക്ഷാ ആശങ്കയുണ്ടാക്കുന്ന രീതിയിൽ സംസാരിക്കുന്നതായി ഞങ്ങളുടെ ഓട്ടോമേറ്റഡ് സിസ്റ്റങ്ങളും പരിശീലനം ലഭിച്ച അവലോകകരും കണ്ടെത്തിയാൽ, ഇവർക്ക് വിവരം കൈമാറാൻ ഈ സംവിധാനം സഹായിക്കും. നിലവിൽ ChatGPT‑യിൽ ലഭ്യമായ പ്രാദേശിക ഹെൽപ്‌ലൈനുകൾക്ക്⁠ പുറമെ, ഒരു പ്രതിസന്ധി ഘട്ടത്തിൽ ഉപയോക്താക്കളെ അവർ വിശ്വസിക്കുന്ന ഒരാളുമായി ബന്ധിപ്പിക്കുന്നതിലൂടെ ഒരു അധിക സുരക്ഷാ പാളി കൂടി നൽകാനാണ് 'വിശ്വസ്ത കോൺടാക്റ്റ്' ലക്ഷ്യമിടുന്നത്.

ലിങ്ക് ചെയ്‌തിട്ടുള്ള കൗമാരക്കാരുടെ അക്കൗണ്ടുകളിൽ കടുത്ത മാനസിക പ്രയാസങ്ങളുടെ ലക്ഷണങ്ങൾ കണ്ടാൽ മാതാപിതാക്കൾക്കോ രക്ഷിതാക്കൾക്കോ അലേർട്ടുകൾ ലഭിക്കുന്ന പേരന്റൽ കണ്ട്രോൾ സേഫ്റ്റി നോട്ടിഫിക്കേഷനുകളുടെ⁠(പുതിയ വിൻഡോയിൽ തുറക്കുന്നു) ചുവടുപിടിച്ചാണ് വിശ്വസ്ത കോൺടാക്റ്റ് രൂപകൽപ്പന ചെയ്തിരിക്കുന്നത്. ഇപ്പോൾ, 18 വയസ്സിന് മുകളിലുള്ള ആർക്കും തങ്ങൾ വിശ്വസിക്കുന്ന ഒരാളെ വിശ്വസ്ത കോൺടാക്റ്റായി ചേർക്കാൻ കഴിയുന്ന രീതിയിൽ ഞങ്ങൾ സുരക്ഷാ അലേർട്ട് ഓപ്ഷനുകൾ വിപുലീകരിക്കുന്നു.

വിദഗ്ധ മാർഗ്ഗനിർദേശം⁠(പുതിയ വിൻഡോയിൽ തുറക്കുന്നു) സാമൂഹിക ബന്ധത്തെ ആത്മഹത്യാ അപകടസാധ്യത കുറയ്ക്കുന്നതിനുള്ള ഏറ്റവും പ്രധാനപ്പെട്ട സുരക്ഷാ ഘടകങ്ങളിൽ ഒന്നായി മനസ്സിലാക്കുന്നു. വിശ്വസ്ത കോൺടാക്റ്റ്⁠(പുതിയ വിൻഡോയിൽ തുറക്കുന്നു) ഉപയോക്താവ് ഇതിനകം വിശ്വസിക്കുന്ന ഒരാളുമായി ബന്ധപ്പെടൽ പ്രോത്സാഹിപ്പിക്കുന്നതിനായി രൂപകൽപ്പന ചെയ്തതാണ്. ഇത് പ്രൊഫഷണൽ പരിചരണത്തിനോ ക്രൈസിസ് സേവനങ്ങൾക്കോ പകരമാകുന്നതല്ല, ബുദ്ധിമുട്ടിലുള്ള ആളുകളെ പിന്തുണയ്ക്കുന്നതിനുള്ള നിരവധി സുരക്ഷാ പാളികളിൽ ഒന്നാണ് ഇത്. ആവശ്യമാകുമ്പോൾ ക്രൈസിസ് ഹോട്ട്‌ലൈനുകളെയോ അടിയന്തര സേവനങ്ങളെയോ ബന്ധപ്പെടാൻ ChatGPT ഉപയോക്താക്കളെ ഇപ്പോഴും പ്രോത്സാഹിപ്പിക്കും.

• ഉപയോക്താക്കൾക്ക് അവരുടെ ChatGPT ക്രമീകരണങ്ങളിൽ നിന്ന് ഒരു പ്രായപൂർത്തിയായ ആളെ (ആഗോളതലത്തിൽ 18+, ദക്ഷിണ കൊറിയയിൽ 19+) വിശ്വസ്ത കോൺടാക്റ്റ് ആയി ചേർക്കാം.
• വിശ്വസ്ത കോൺടാക്റ്റിന് അവരുടെ പങ്ക് വിശദീകരിക്കുന്ന ഒരു ക്ഷണം ലഭിക്കും, ഫീച്ചർ സജീവമാകുന്നതിന് ഒരു ആഴ്ചയ്ക്കുള്ളിൽ ക്ഷണം സ്വീകരിക്കണം. വിശ്വസ്ത കോൺടാക്റ്റ് നിരസിച്ചാൽ, ഉപയോക്താവിന് മറ്റൊരു മുതിർന്ന വ്യക്തിയെ ചേർക്കാൻ തിരഞ്ഞെടുക്കാം.
• ഗൗരവകരമായ സുരക്ഷാ ആശങ്കയുണ്ടാക്കുന്ന രീതിയിൽ ഉപയോക്താവ് സ്വയം ഉപദ്രവിക്കുന്നതിനെക്കുറിച്ച് സംസാരിക്കുന്നതായി ഞങ്ങളുടെ ഓട്ടോമേറ്റഡ് മോണിറ്ററിംഗ് സിസ്റ്റങ്ങൾ കണ്ടെത്തിയാൽ, വിശ്വസ്ത കോൺടാക്റ്റുകളെ ഞങ്ങൾ വിവരം അറിയിച്ചേക്കാം എന്ന് ChatGPT ഉപയോക്താവിനെ അറിയിക്കുന്നു. കൂടാതെ, ചില സംഭാഷണ മാതൃകകൾ നിർദ്ദേശിച്ചുകൊണ്ട് തങ്ങളുടെ വിശ്വസ്ത കോൺടാക്റ്റുമായി ബന്ധപ്പെടാൻ ഉപയോക്താവിനെ പ്രോത്സാഹിപ്പിക്കുകയും ചെയ്യുന്നു.
• അതിനു ശേഷം, പ്രത്യേക പരിശീലനം ലഭിച്ച വ്യക്തികളുടെ ഒരു ചെറിയ സംഘം സാഹചര്യം പരിശോധിക്കുന്നു. സംഭാഷണം ഗൗരവകരമായ സുരക്ഷാ ആശങ്കയ്ക്ക് കാരണമായേക്കാമെന്ന് ഈ വിദഗ്ധർ വിലയിരുത്തിയാൽ, ChatGPT ആ വ്യക്തിയുടെ വിശ്വസ്ത കോൺടാക്റ്റിന് ഇമെയിൽ വഴിയോ ടെക്സ്റ്റ് മെസേജ് വഴിയോ ഒരു ഹ്രസ്വ സന്ദേശം അയക്കും. അവർക്ക് ChatGPT അക്കൗണ്ട് ഉണ്ടെങ്കിൽ ഇൻ-ആപ്പ് നോട്ടിഫിക്കേഷനായും ഈ സന്ദേശം ലഭിക്കുന്നതാണ്.
• ഈ അറിയിപ്പിൽ വളരെ പരിമിതമായ വിവരങ്ങൾ മാത്രമേ ഉൾപ്പെടുത്തുകയുള്ളൂ. സ്വയം ഉപദ്രവിക്കാനുള്ള സാധ്യതയെക്കുറിച്ച് ആശങ്കാജനകമായ രീതിയിൽ സംസാരിച്ചു എന്ന പൊതുവായ വിവരം ഇത് പങ്കുവെക്കുകയും, ആ വ്യക്തിയുടെ വിവരങ്ങൾ അന്വേഷിക്കാൻ വിശ്വസ്ത കോൺടാക്റ്റിനെ പ്രോത്സാഹിപ്പിക്കുകയും ചെയ്യുന്നു. ഉപയോക്താവിന്റെ സ്വകാര്യത സംരക്ഷിക്കുന്നതിനായി, ചാറ്റിന്റെ വിശദാംശങ്ങളോ ട്രാൻസ്‌ക്രിപ്റ്റുകളോ ഇതിൽ ഉൾപ്പെടുത്തില്ല. കൂടാതെ, ഇത്തരം സെൻസിറ്റീവ് ആയ വിഷയങ്ങളിൽ എങ്ങനെ സംഭാഷണം നടത്തണം എന്നതിനെക്കുറിച്ചുള്ള വിദഗ്ധ നിർദ്ദേശങ്ങളടങ്ങിയ⁠(പുതിയ വിൻഡോയിൽ തുറക്കുന്നു) ലിങ്കും ഈ അറിയിപ്പിനൊപ്പം ഉണ്ടായിരിക്കും.
• ഉപയോക്താക്കൾക്ക് എപ്പോൾ വേണമെങ്കിലും ക്രമീകരണങ്ങളിൽ പോയി തങ്ങളുടെ വിശ്വസ്ത കോൺടാക്റ്റിനെ നീക്കം ചെയ്യാനോ മാറ്റം വരുത്താനോ സാധിക്കും. അതുപോലെ തന്നെ, വിശ്വസ്ത കോൺടാക്റ്റിന് ഞങ്ങളുടെ ഹെൽപ്പ് സെന്റർ⁠(പുതിയ വിൻഡോയിൽ തുറക്കുന്നു) വഴി ഏത് സമയത്തും ആ പദവിയിൽ നിന്ന് സ്വയം ഒഴിയാനും സാധിക്കുന്നതാണ്.

ഈ ഗൗരവകരമായ സുരക്ഷാ സാഹചര്യങ്ങൾ അപൂർവ്വമാണെങ്കിലും, അവ ഉണ്ടാകുമ്പോൾ കൃത്യസമയത്ത് പരിശോധിക്കാനും പ്രതികരിക്കാനും തക്ക രീതിയിലാണ് ഞങ്ങളുടെ സിസ്റ്റങ്ങൾ രൂപകൽപ്പന ചെയ്തിരിക്കുന്നത്. ഒരു സിസ്റ്റവും പരിപൂർണ്ണമല്ല എന്നതിനാലും, വിശ്വസ്ത കോൺടാക്റ്റിന് ലഭിക്കുന്ന അറിയിപ്പ് എല്ലായ്‌പ്പോഴും ആ വ്യക്തി അനുഭവിക്കുന്ന കാര്യങ്ങളെ കൃത്യമായി പ്രതിഫലിപ്പിക്കണമെന്നില്ല എന്നതിനാലും, ഓരോ അറിയിപ്പും അയക്കുന്നതിന് മുൻപ് പരിശീലനം ലഭിച്ച വ്യക്തികളുടെ പരിശോധനയ്ക്ക് വിധേയമാക്കുന്നുണ്ട്. ഇത്തരം സുരക്ഷാ അറിയിപ്പുകൾ ഒരു മണിക്കൂറിനുള്ളിൽ തന്നെ പരിശോധിച്ച് തീർക്കാൻ ഞങ്ങൾ പരിശ്രമിക്കുന്നു.

മാനസികാരോഗ്യം, ആത്മഹത്യാ പ്രതിരോധം എന്നീ മേഖലകളിൽ വൈദഗ്ധ്യമുള്ള ക്ലിനിഷ്യൻമാർ, ഗവേഷകർ, സംഘടനകൾ എന്നിവരുടെ മാർഗനിർദ്ദേശത്തോടെയാണ് ഞങ്ങൾ 'വിശ്വസ്ത കോൺടാക്റ്റ്' വികസിപ്പിച്ചെടുത്തത്. 60 രാജ്യങ്ങളിലായി പടർന്നുകിടക്കുന്ന, ലൈസൻസുള്ള 260-ലധികം ഫിസിഷ്യൻമാരുടെ കൂട്ടായ്മയായ ഞങ്ങളുടെ ഗ്ലോബൽ ഫിസിഷ്യൻസ് നെറ്റ്‌വർക്കും⁠, ഞങ്ങളുടെ എക്സ്പെർട്ട് കൗൺസിൽ ഓൺ വെൽ ബീയിംഗ് ആൻഡ് AI⁠-യും നൽകിയ വിവരങ്ങൾ ഇതിനായി ഉപയോഗിച്ചിട്ടുണ്ട്. കൂടാതെ അമേരിക്കൻ സൈക്കോളജിക്കൽ അസോസിയേഷൻ⁠(പുതിയ വിൻഡോയിൽ തുറക്കുന്നു) ഉൾപ്പെടെയുള്ള ബാഹ്യ സംഘടനകളുമായും ഞങ്ങൾ സഹകരിച്ച് പ്രവർത്തിച്ചു.

വിശ്വസ്ത കോൺടാക്റ്റിന് പുറമെ, ഓരോ ഘട്ടത്തിലും സെൻസിറ്റീവ് ആയ സംഭാഷണങ്ങളെ ശരിയായ രീതിയിൽ നയിക്കാൻ സഹായിക്കുന്ന സുരക്ഷാ ക്രമീകരണങ്ങൾ ChatGPT‑യിലുണ്ട്. സംഭാഷണത്തിനിടയിൽ പ്രകടിപ്പിക്കപ്പെടുന്ന വിവിധ തലത്തിലുള്ള റിസ്കുകളോട് സിസ്റ്റം പ്രതികരിക്കുന്ന രീതി ഞങ്ങൾ തുടർച്ചയായി മെച്ചപ്പെടുത്തിക്കൊണ്ടിരിക്കുകയാണ്:

• യഥാർത്ഥ സഹായത്തിന് പിന്തുണ നൽകൽ: സെൻസിറ്റീവായ നിമിഷങ്ങളിൽ, ആളുകളോട് അടിയന്തര സേവനങ്ങളെയോ ക്രൈസിസ് ഹെൽപ്പ്‌ലൈനുകളെയോ മാനസികാരോഗ്യ വിദഗ്ധരെയോ അല്ലെങ്കിൽ ജീവിതത്തിൽ അവർ വിശ്വസിക്കുന്ന വ്യക്തികളെയോ ബന്ധപ്പെടാൻ ChatGPT പ്രോത്സാഹിപ്പിച്ചേക്കാം. 
• ശ്രദ്ധയോടെയുള്ള പ്രതികരണം: മാനസിക വിഷമതകളുടെ ലക്ഷണങ്ങൾ കണ്ടെത്താനും അവയോട് പ്രതികരിക്കാനും, സാഹചര്യത്തിന്റെ തീവ്രത കുറയ്ക്കാനും, ആവശ്യമുള്ളപ്പോൾ യഥാർത്ഥ സഹായങ്ങൾക്കായി ആളുകളെ നയിക്കാനുമുള്ള ChatGPT‑യുടെ കഴിവ് മെച്ചപ്പെടുത്തുന്നതിനായി ഞങ്ങൾ 170-ലധികം മാനസികാരോഗ്യ വിദഗ്ധരുമായി⁠ സഹകരിച്ച് പ്രവർത്തിച്ചിട്ടുണ്ട്. 
• സമയത്തിന്മേലുള്ള നിയന്ത്രണം നിലനിർത്താൻ ആളുകളെ സഹായിക്കൽ: ആരോഗ്യകരമായ സാങ്കേതിക ശീലങ്ങൾ പ്രോത്സാഹിപ്പിക്കുന്നതിനായി, ചില സാഹചര്യങ്ങളിൽ കൂടുതൽ സമയം ഉപയോഗിച്ചതിന് ശേഷം ഒരു ഇടവേള എടുക്കാനോ അല്പനേരം മാറിനിൽക്കാനോ ChatGPT നിർദ്ദേശിച്ചേക്കാം.
• ഹാനികരമായ അഭ്യർത്ഥനകൾ നിരസിക്കൽ: ആത്മഹത്യയോ സ്വയം ഹാനിയോ ചെയ്യുന്നതിനുള്ള നിർദേശങ്ങൾ നൽകുന്നത് നിരസിക്കാൻ ChatGPTയെ പരിശീലിപ്പിച്ചിട്ടുണ്ട്. ഉപയോക്താക്കൾ ഇത്തരത്തിലുള്ള വിവരം ആവശ്യപ്പെടുമ്പോൾ, അത്തരം അഭ്യർത്ഥനകൾ നിരസിക്കാനും അതിന് പകരം സുരക്ഷിതമായ പ്രതികരണങ്ങളിലേക്ക് നയിക്കാനും പ്രാദേശികമായ ക്രൈസിസ് റിസോഴ്‌സുകൾ ലഭ്യമാക്കാനും ഈ സിസ്റ്റത്തിന് പരിശീലനം നൽകിയിട്ടുണ്ട്.

പ്രയാസകരമായ ഘട്ടങ്ങളിൽ ആളുകളെ സഹായിക്കുന്ന⁠ തരത്തിലുള്ള AI സംവിധാനങ്ങൾ വികസിപ്പിക്കാനുള്ള OpenAI-യുടെ വിപുലമായ ശ്രമങ്ങളുടെ ഭാഗമാണ് 'വിശ്വസ്ത കോൺടാക്റ്റ്'. വ്യക്തികൾ മാനസിക വിഷമതകളിലൂടെ കടന്നുപോകുമ്പോൾ AI സംവിധാനങ്ങൾ എങ്ങനെ പ്രതികരിക്കണം എന്നത് മെച്ചപ്പെടുത്തുന്നതിനായി ഞങ്ങൾ ക്ലിനിഷ്യൻമാർ, ഗവേഷകർ, നയരൂപകർത്താക്കൾ എന്നിവരുമായി ചേർന്ന് തുടർന്നും പ്രവർത്തിക്കും. AI സംവിധാനങ്ങൾ ഒറ്റപ്പെട്ട ഒന്നായി നിലനിൽക്കരുത് എന്നതാണ് ഞങ്ങളുടെ ലക്ഷ്യം. പകരം, യഥാർത്ഥ പരിചരണങ്ങളുമായും ബന്ധങ്ങളുമായും ഏറ്റവും പ്രധാനപ്പെട്ട ഉറവിടങ്ങളുമായും ആളുകളെ ബന്ധിപ്പിക്കാൻ അവ സഹായിക്കണം.