ചെറുകിട സ്ഥാപനങ്ങളിലെ ആദ്യ ജീവനക്കാരനായി നിർമിതബുദ്ധി

നിർമിതബുദ്ധി ഉപയോഗിച്ചുള്ള സംരംഭകത്വം എന്നു കേൾക്കുമ്പോൾ പൊതുവേ മനസ്സിൽ വരുന്നത് സിലിക്കൺ വാലിയിൽ അടുത്ത ശതകോടി ഡോളർ സ്റ്റാർട്ടപ്പ് കെട്ടിപ്പടുക്കുന്ന ഒരു സോഫ്റ്റ്‌വെയർ സംരംഭകനെയാണ്. എന്നാൽ കൂടുതൽ വ്യാപകവും സാമ്പത്തികമായി കൂടുതൽ പ്രാധാന്യമുള്ളതുമായ മാറ്റം ഒരുപക്ഷേ രാജ്യത്തുടനീളമുള്ള ചെറുകിട സംരംഭങ്ങളിലായിരിക്കാം നടക്കുന്നത്.

2026 മാർച്ചിൽ അമേരിക്കയിൽ കുറഞ്ഞത് 40 ലക്ഷം പേർ ഒരു സംരംഭം ആസൂത്രണം ചെയ്യാനോ തുടങ്ങാനോ നടത്താനോ വളർത്താനോ ഉള്ള സഹായത്തിനായി ChatGPT ഉപയോഗിച്ചതായി പുതിയൊരു OpenAI വിശകലനം⁠(പുതിയ വിൻഡോയിൽ തുറക്കുന്നു) കണ്ടെത്തി. ഇവരിൽ ഭൂരിഭാഗവും സാങ്കേതികവിദ്യാ കമ്പനികൾ തുടങ്ങുകയായിരുന്നില്ല. കൺസൾട്ടൻസി സ്ഥാപനങ്ങൾ, ഓൺലൈൻ കടകൾ, ഗാർഹിക സേവന സംരംഭങ്ങൾ, സൗന്ദര്യപരിചരണ സ്ഥാപനങ്ങൾ, ഭക്ഷണശാലകൾ തുടങ്ങിയവയാണ് അവർ നടത്തിയിരുന്നത്. ഈ സംരംഭകർക്ക് നിർമിതബുദ്ധി പ്രധാനമായും വിൽക്കാനുള്ള ഒരു ഉൽപ്പന്നമല്ല. പുറത്തുനിന്നുള്ള വിദഗ്ധരുടെയോ അധിക ജീവനക്കാരുടെയോ പ്രത്യേക സോഫ്റ്റ്‌വെയറിന്റെയോ സഹായത്തോടെ മാത്രം ചെയ്യാനാകുമായിരുന്ന ജോലികൾ, ആവശ്യാനുസരണം നിർവഹിക്കാൻ സഹായിക്കുന്ന സംവിധാനമാണത്.

വൻകിട കമ്പനികൾ വിപണനം, ധനകാര്യം, നിയമം, ഉപഭോക്തൃ സേവനം, ഉൽപ്പന്നം, നടത്തിപ്പ് എന്നീ വിഭാഗങ്ങൾക്കിടയിൽ ജോലികൾ വിഭജിക്കുന്നു. സംരംഭകർക്ക് ആ സൗകര്യം അപൂർവമായേ ലഭിക്കാറുള്ളൂ. പ്രത്യേകിച്ച് ഒരു സംരംഭത്തിന്റെ ആദ്യഘട്ടങ്ങളിൽ, ഈ ചുമതലകളെല്ലാം സ്ഥാപകൻ തന്നെ നിർവഹിക്കേണ്ടിവന്നേക്കാം.

അതുകൊണ്ട് പലതരം ജോലികളിൽ സഹായിക്കാനാകുന്ന സംവിധാനങ്ങൾക്ക് വലിയ ആവശ്യകതയുണ്ട്. റിപ്പോർട്ടിൽ കണ്ടെത്തിയ, നിലവിൽ സംരംഭം നടത്തുന്ന ഉപയോക്താക്കളിൽ ഏറ്റവും വലിയ വിഭാഗങ്ങൾ വിദഗ്ധ, ഏജൻസി സേവനങ്ങളിലുള്ളവരും ചില്ലറ വിൽപ്പന, ഇ-കൊമേഴ്‌സ് മേഖലകളിലുള്ളവരുമായിരുന്നു. ഇവർ യഥാക്രമം 22 ശതമാനവും 21 ശതമാനവും വരും. ഗാർഹിക, കൈത്തൊഴിൽ സേവനങ്ങൾ 12 ശതമാനവും ആരോഗ്യ, സൗന്ദര്യപരിചരണ സ്ഥാപനങ്ങൾ 11 ശതമാനവും ഭക്ഷണ, ആതിഥേയ സേവന സംരംഭങ്ങൾ 8 ശതമാനവും ആയിരുന്നു.

പരിമിതമായ ജീവനക്കാരും വിഭവങ്ങളും ഉപയോഗിച്ച് പ്രവർത്തിക്കുന്ന ഇത്തരം സംരംഭങ്ങളിൽ ഉടമ പലപ്പോഴും ദൈനംദിന നടത്തിപ്പിൽ നേരിട്ട് ഇടപെടുന്നു. ഒരു കരാറുകാരൻ ചെലവുകണക്ക് പരിഷ്കരിക്കാനും അനുമതി ലഭിക്കാനുള്ള നിബന്ധന മനസ്സിലാക്കാനും വെബ്‌സൈറ്റിനുള്ള എഴുത്ത് തയ്യാറാക്കാനും ഉപഭോക്താവിന് തുടർസന്ദേശം എഴുതാനും ChatGPT ഉപയോഗിച്ചേക്കാം. ഒരു ചില്ലറ വിൽപ്പനക്കാരൻ ഉൽപ്പന്ന വിവരണങ്ങൾ തയ്യാറാക്കാനും വിലനിർണയ തന്ത്രങ്ങൾ താരതമ്യം ചെയ്യാനും വിൽപ്പനപ്രചാരണം ആസൂത്രണം ചെയ്യാനും പരാതിക്ക് മറുപടി നൽകാനും ഇത് ഉപയോഗിച്ചേക്കാം. ഇവയിലൊന്നും ഒറ്റയ്ക്ക് ഒരു സംരംഭത്തെ മാറ്റിമറിക്കില്ല. എന്നാൽ ഇവയെല്ലാം ചേർന്ന്, സംരംഭകന്റെ സമയത്തിൽ വലിയൊരു പങ്ക് അപഹരിക്കുന്ന ഭരണപരമായ ജോലിഭാരം കുറയ്ക്കാൻ കഴിയും.

സംരംഭം തുടങ്ങാൻ ആലോചിക്കുന്നവരും നിലവിൽ നടത്തുന്നവരും ChatGPT എങ്ങനെ ഉപയോഗിക്കുന്നുവെന്ന് റിപ്പോർട്ട് പരിശോധിക്കുന്നു. സംരംഭകത്വവുമായി ബന്ധപ്പെട്ട ഉപയോക്താക്കളിൽ ഏകദേശം 29 ശതമാനം പേർ സംരംഭം തുടങ്ങാൻ ആലോചിക്കുന്നവരും 71 ശതമാനം പേർ നിലവിൽ നടത്തുന്നവരുമായിരുന്നു. സംരംഭം തുടങ്ങാൻ ആലോചിക്കുന്നവർ താരതമ്യേന കൂടുതലായി ChatGPT ഉപയോഗിക്കുന്നത് ബ്രാൻഡ് രൂപപ്പെടുത്താനും ഉൽപ്പന്നം വികസിപ്പിക്കാനും സംരംഭത്തിന്റെ സാധ്യത പരിശോധിക്കാനുമാണ്. ഒരു ആശയത്തിന് വിപണിയുണ്ടോ, ഉൽപ്പന്നം എങ്ങനെ പ്രവർത്തിക്കും, സംരംഭത്തിന് എന്ത് പേരിടണം, തുടങ്ങാൻ എത്ര ചെലവാകും തുടങ്ങിയ ചോദ്യങ്ങളാകാം അവർ ചോദിക്കുന്നത്.

കമ്പനി പ്രവർത്തിച്ചുതുടങ്ങുമ്പോൾ മുൻഗണനകൾ മാറുന്നു. നിലവിൽ സംരംഭം നടത്തുന്നവരുടെ ഉപയോഗത്തിൽ 26 ശതമാനം വിപണനത്തിനും പരസ്യവാചകങ്ങൾ എഴുതാനുമാണ്. തുടർന്ന് ഉപഭോക്താക്കളുമായുള്ള ആശയവിനിമയത്തിന് 11 ശതമാനവും നിയമവും ചട്ടപാലനവും സംബന്ധിച്ച ചോദ്യങ്ങൾക്ക് 10 ശതമാനവും വരുന്നു. വിൽപ്പന, ബ്രാൻഡ് രൂപപ്പെടുത്തൽ, ബിസിനസ് വികസനം എന്നിവയും പ്രധാനമായി തുടരുന്നു.

ChatGPT‑യുടെ ഉയർന്ന ശ്രേണിയിലുള്ള വരിസംഖ്യാ പദ്ധതികളുടെ ഉപയോക്താക്കൾക്കിടയിൽ നിലവിൽ സംരംഭം നടത്തുന്നവരുടെ അനുപാതം താരതമ്യേന കൂടുതലാണ്. സൗജന്യ പദ്ധതിയിലെ സംരംഭകത്വവുമായി ബന്ധപ്പെട്ട ഉപയോക്താക്കളിൽ 67 ശതമാനം പേർ നിലവിൽ സംരംഭം നടത്തുന്നവരാണ്. പ്ലസ് പദ്ധതിയിൽ ഇത് 78 ശതമാനവും Pro പദ്ധതിയിൽ 81 ശതമാനവുമാണ്.

നിർമിതബുദ്ധി യഥാർഥ വാണിജ്യപ്രവർത്തനങ്ങളുടെ ഭാഗമാകുമ്പോൾ അതിനുള്ള ആവശ്യകത വർധിക്കുന്നുവെന്നാണ് ഈ പ്രവണത സൂചിപ്പിക്കുന്നത്. സംരംഭത്തിന് പറ്റിയ പേരുകൾ പരീക്ഷിക്കുന്ന ഒരാൾക്ക് ഇടയ്ക്കിടെയുള്ള സഹായം മതിയായേക്കാം. എന്നാൽ ഉപഭോക്താക്കളെയും സമയപരിധികളെയും നടത്തിപ്പിലെ പ്രശ്നങ്ങളെയും കൈകാര്യം ചെയ്യുന്ന സംരംഭകന് കൂടുതൽ വേഗത്തിനും കഴിവുകൾക്കുമായി പണം ചെലവഴിക്കാൻ ശക്തമായ കാരണങ്ങളുണ്ട്. അതിനാൽ നിർമിതബുദ്ധിയുടെ സാമ്പത്തിക മൂല്യം പരിശോധിക്കാൻ ഏറെ ഉപകാരപ്രദമായ ഒരു മേഖലയായി സംരംഭകത്വം മാറിയേക്കാം. 

ഒരു സംരംഭം തുടങ്ങാൻ പ്രതീക്ഷ നൽകുന്ന ആശയം മാത്രം ഒരിക്കലും മതിയായിരുന്നില്ല. സാമ്പത്തിക വിശകലനം, ഉപഭോക്തൃ സേവനം, വിൽപ്പന, വിപണനം, ഭരണനിർവഹണം തുടങ്ങി പരസ്പരം പൂരകമായ നിരവധി കഴിവുകൾ സംരംഭകർക്ക് ലഭ്യമാക്കേണ്ടതുണ്ട്. ഈ കഴിവുകൾ എല്ലാവർക്കും ഒരുപോലെ ലഭ്യമല്ല. ചില സ്ഥാപകർക്ക് ബിസിനസ് പങ്കാളികളോ തൊഴിൽപരമായ ബന്ധങ്ങളോ കുടുംബത്തിൽനിന്നുള്ള അനുഭവപരിചയമോ സഹായികളെ നിയമിക്കാനുള്ള മൂലധനമോ ഉണ്ടാകും. മറ്റുള്ളവർ മിക്കവാറും എല്ലാ കഴിവുകളും സ്വയം ആർജിക്കേണ്ടിവരുന്നു.

ഉള്ളടക്കം സൃഷ്ടിക്കുന്ന നിർമിതബുദ്ധിക്ക് സംരംഭകത്വത്തിലെ അപകടസാധ്യതകൾ ഇല്ലാതാക്കാനാവില്ല. എന്നാൽ ഉപകാരപ്രദമായ പല കഴിവുകളുടെയും പ്രാഥമിക രൂപം ലഭ്യമാക്കുന്നതിനുള്ള ചെലവ് കുറയ്ക്കാൻ അതിന് കഴിയും. വലിയ സാമ്പത്തിക ബാധ്യത ഏറ്റെടുക്കുന്നതിനുമുമ്പ് ആശയങ്ങൾ പരീക്ഷിക്കാൻ ഇത് കൂടുതൽ ആളുകളെ സഹായിച്ചേക്കാം. ഒറ്റയാൾ സംരംഭത്തിനോ രണ്ടുപേർ ചേർന്നുള്ള കമ്പനിക്കോ ഉടൻ ജീവനക്കാരെ നിയമിക്കാതെയും പലതരം വിദഗ്ധ സേവനങ്ങൾ വാങ്ങാതെയും കൂടുതൽ ജോലികൾ കൈകാര്യം ചെയ്യാൻ ഇത് സഹായിച്ചേക്കാം. അതുവഴി വളരെ ചെറിയ സ്ഥാപനങ്ങൾക്കും നിലനിൽക്കാനുള്ള സാധ്യത കൂടാം.

ഫലം അതിവേഗം വളരുന്ന സ്റ്റാർട്ടപ്പുകളുടെ ഒരു തരംഗമായിരിക്കണമെന്നില്ല. പകരം, കൂടുതൽ വേഗത്തിൽ ആരംഭിക്കുന്ന ചെറുസംരംഭങ്ങൾ വർധിച്ചേക്കാം. അല്ലെങ്കിൽ, താങ്ങാനാകാത്തവിധം കുമിഞ്ഞുകൂടുമായിരുന്ന ജോലികൾ കൈകാര്യം ചെയ്യാൻ സ്ഥാപകർക്ക് കഴിയുന്നതുകൊണ്ട് കൂടുതൽ സംരംഭങ്ങൾ നിലനിന്നേക്കാം.