Մեր սկզբունքները

ԱԲ-ն կարող է էապես բարելավել հասարակության բազմաթիվ ոլորտներ։

Այս տեխնոլոգիան, ինչպես նախկինում եղած մյուսները, մարդկանց ավելի մեծ հնարավորություններ և ինքնուրույնություն կտա․ այն, ինչ մարդիկ կկարողանան անել AI-ով, էապես կգերազանցի այն, ինչ հնարավոր էր շոգեշարժիչների կամ էլեկտրականության շնորհիվ։

Մենք պատկերացնում ենք մի աշխարհ, որտեղ համատարած բարգավաճումը կլինի այնպիսի մակարդակի, որը հիմա դժվար է նույնիսկ պատկերացնել, և որտեղ անհատի ներուժը, ինքնուրույնությունը և ինքնաիրացումը զգալիորեն կաճեն։ Շատ բաներ, որոնց մասին մինչ այժմ միայն գիտաֆանտաստիկայում ենք մեզ թույլ տվել երազել, կարող են դառնալ իրականություն, և մարդկանց մեծ մասը կարող է ապրել ավելի իմաստալից կյանքով, քան այսօր շատերը կարողանում են։

Բայց այս արդյունքը երաշխավորված չէ։ Ապագայում ուժն ու վերահսկողությունը կարող են կենտրոնանալ սուպերինտելեկտն օգտագործող և վերահսկող մի քանի ընկերությունների ձեռքում, կամ էլ ապակենտրոնացված ձևով բաշխվել մարդկանց միջև։ Մենք կարծում ենք, որ երկրորդը շատ ավելի լավ է, և մեր նպատակը իսկապես ընդհանուր AI-ը հնարավորինս մեծ թվով մարդկանց հասանելի դարձնելն է։ Ինչպես ներկայում, ապագան ևս չի լինելու ամբողջությամբ վատ կամ լավ, սակայն այն որոշումները, որոնք կայացնում ենք հիմա, կարող ենառավելագույնի հասցնել դրականը ։

Մեր առաքելությունն է ապահովել, որ AGI-ն օգուտ բերի ողջ մարդկությանը։ Ահա այն սկզբունքները, որոնք ուղղորդում են մեր աշխատանքը։

1. Ժողովրդավարացում։ Մենք կդիմադրենք այն հնարավորությանը, որ այս տեխնոլոգիան ուժն ու իշխանությունը կենտրոնացվի մի քանի մարդկանց ձեռքում։

Սա նշանակում է, որ բացի AI-ի հասանելիությունը բոլորին ապահովելուց, անհրաժեշտ է նաև երաշխավորել, որ AI-ի վերաբերյալ առանցքային որոշումները կայացվեն ժողովրդավարական գործընթացների միջոցով և հավասարության սկզբունքների հիման վրա, այլ ոչ թե բացառապես AI լաբորատորիաների կողմից։

2. Հզորացում։ Մենք հավատում ենք, որ ԱԲ-ն կարող է բոլորին հնարավորություն տալ հասնել իրենց նպատակներին, ավելի շատ սովորել, լինել ավելի երջանիկ և լիարժեք, հետամուտ լինել իրենց երազանքներին, և որ դրանից կշահի նաև ամբողջ հասարակությունը։

Դրան հասնելու համար պետք է մարդկանց հնարավորություն տալ ուսումնասիրելու մեր առջև բացվող հսկայական ներուժը, և մենք պետք է մշակենք այդ հնարավորությունն ապահովող արտադրանքներ։ Օգտատերերը պետք է կարողանան վստահորեն մեր ծառայությունների միջոցով իրականացնել ավելի ու ավելի արժեքավոր առաջադրանքներ։

Աշխարհը բազմազան է, և մարդիկ տարբեր կարիքներ ունեն։ Մենք ուզում ենք մեր օգտատերերին ապահովել անհրաժեշտ ինքնավարությամբ և թույլ տալ նրանց հնարավորինս շատ բան՝ այնքանով, որքանով դա ողջամիտ է։

Թեպետ մենք ցանկանում ենք մեր օգտատերերին տրամադրել լայն ազատություն մեր ծառայությունների օգտագործման հարցում և խորապես հավատում ենք, որ AI-ը ընդհանուր առմամբ կունենա զգալի դրական ազդեցություն, մենք պատասխանատվություն ունենք այն մշակելու և ներդնելու այնպես, որ հնարավոր վնասները նվազագույնի հասցվեն։ Սա, իհարկե, ներառում է ոչ միայն աղետալի վնասների կանխումը, բայց նաև տեղային վնասների նվազեցումն ու հասարակության վրա հնարավոր բացասական և քայքայիչ ազդեցությունների կանխարգելումը։ Դա ենթադրում է զգուշավորության սկզբունքի կիրառություն և սահմանափակումների մեղմացում՝ ավելի շատ ապացույցների դեպքում։

3. Համընդհանուր բարգավաճում։ Մենք ցանկանում ենք այնպիսի ապագա, որտեղ բոլորը կարող են ունենալ բարձրորակ և լիարժեք կյանք։

Բոլորին հասանելի դարձնելով հեշտ օգտագործվող և բարձր հաշվարկային հզորությամբ AI համակարգեր՝ մենք հավատում ենք, որ մարդիկ կգտնեն արժեք ստեղծելու նոր ուղիներ և էապես կբարելավեն կյանքի որակը բոլորի համար՝ հատկապես նոր գիտական բացահայտումների շնորհիվ։

Որպեսզի բարգավաճումը լիովին իրականություն դառնա և լայնորեն բաշխվի, մենք կարծում ենք, որ 1) մեր կառավարությունները գուցե պետք է դիտարկեն նոր տնտեսական մոդելներ, որպեսզի բոլորը կարողանան մասնակցել առջև բացվող արժեքի ստեղծմանը, և 2) մենք պետք է կառուցենք հսկայական ծավալի AI ենթակառուցվածք և զարգացնենք նոր տեխնոլոգիաներ` AI ենթակառուցվածքի ծախսերը զգալիորեն նվազեցնելու համար։

Շատ բաներ, որոնք մենք անում ենք և առաջին հայացքից կարող են տարօրինակ թվալ՝ մեծ ծավալի հաշվարկային հզորություն ձեռք բերելը, երբ մեր եկամուտը համեմատաբար փոքր է, ուղղահայաց ինտեգրումը՝ ծախսերը նվազեցնելու և մեր տեխնոլոգիան ավելի հեշտ օգտագործելի դարձնելու համար, ամբողջ աշխարհում տվյալների կենտրոնների կառուցման ուղղությամբ ակտիվ քայլերը և շատ ավելին, բխում են համընդհանուր բարգավաճման ապագայի նկատմամբ մեր հիմնարար համոզմունքից։

4. Դիմակայունություն։ AI-ը կառաջացնի նոր ռիսկեր, և մենք կհամագործակցենք այլ ընկերությունների, էկոհամակարգերի, կառավարությունների և հասարակության հետ՝ դրանց լուծման ուղղությամբ։ Այս նպատակով մենք էապես կօգտագործենք մեր հիմնադրամի ռեսուրսները։

Ոչ մի AI լաբորատորիա միայնակ չի կարող ապահովել լավ ապագա։ Օրինակ՝ կարող են լինել չափազանց հզոր մոդելներ, որոնք կհեշտացնեն նոր պաթոգենների ստեղծումը, և մեզ անհրաժեշտ է հասարակության մակարդակով համապարփակ մոտեցում՝ դրանցից պաշտպանվելու համար՝ պաթոգենից անկախ հակամիջոցներով։ Մեկ այլ օրինակ․ քանի որ մոդելների կիբերանվտանգության հնարավորությունները աճում են, մենք պետք է արագ օգտագործենք այդ մոդելները՝ բաց կոդով ծրագրային ապահովումն ու կենսական ենթակառուցվածքները պաշտպանելու համար, միաժամանակ զարգացնելով մոդելները, որպեսզի օգնեն բոլորին ավելի անվտանգ ծրագրային ապահովում ստեղծել։

Սա մեր վաղեմի՝ փուլային ներդրման ռազմավարության ընդլայնումն է․ մենք կարծում ենք, որ հասարակությունը պետք է առերեսվի AI հնարավորությունների յուրաքանչյուր հաջորդ մակարդակին, հասկանա, ինտեգրի և միասին գտնի առաջ շարժվելու լավագույն ուղին։ Սա հնարավոր չէ իրականացնել մեկուսացված կերպով․ հասարակությունն ու տեխնոլոգիան համատեղ են զարգանում, և դա ժամանակ է պահանջում։

Սա չի սահմանափակում մեր անվտանգության ռազմավարությունը միայն այս մոտեցմամբ․ մենք նաև պետք է ստեղծենք անվտանգ համակարգեր և շարունակենք կատարել բարձրորակ աշխատանք տեխնիկական համպատասխանեցման ուղղությամբ։

Մենք ակնկալում ենք, որ կլինեն փուլեր, երբ անհրաժեշտ կլինի համագործակցել կառավարությունների, միջազգային կազմակերպությունների և AGI-ի վրա աշխատող այլ նախաձեռնությունների հետ՝ համոզվելու համար, որ նախքան առաջ շարժվելը բավարար չափով լուծված են համապատասխանեցման, անվտանգության և հասարակական լուրջ խնդիրները։

5. Հարմարվողականություն։ Մենք շարունակում ենք հավատալ, որ շատ անկանխատեսելի ապագայի մարտահրավերներին դիմակայելու միակ ճանապարհը նոր տեղեկության հիման վրա մեր դիրքորոշումները վերանայելու պատրաստակամությունն է։ Մենք նաև ընդունում ենք, որ OpenAI-ն այօր աշխարհում շատ ավելի մեծ դեր ունի, քան մի քանի տարի առաջ, և մենք թափանցիկ կլինենք այն հարցում, թե երբ, ինչպես և ինչու են փոխվում մեր գործառնական սկզբունքները։ Որպես օրինակ՝ թեև մենք բավականին վստահ ենք, որ համընդհանուր բարգավաճումը կմնա չափազանց կարևոր, հնարավոր է ապագայում լինեն փուլեր, երբ անհրաժեշտ կլինի որոշ չափով սահմանափակել հզորացումը՝ ավելի մեծ դիմակայունություն ապահովելու համար ։

AI-ի զարգացումը հանգեցրել է բազմաթիվ անակնկալների, և սպասվում են նորերը։ Տեխնոլոգիայի առաջընթացի հետ դրա ի հայտ եկող վարքագծերը կանխատեսելն ավելի ու ավելի դժվար է դառնում։ Մենք ընդունում ենք այդ անորոշությունը⁠՝ կարողությունները զարգացնելով զգուշորեն, համակարգերը փուլային կերպով ներդնելով և դրանց՝ աշխարհի հետ փոխազդեցություններից սովորելով։

Ոչ շատ վաղ անցյալում մենք անհանգստանում էինք GPT‑2‑ի կշիռները հրապարակելու հարցում, քանի որ վստահ չէինք, թե ինչ ազդեցություն կունենա հասարակության վրա։ Հետադարձ հայացքով պարզ է, որ դա անտեղի մտահոգություն էր, սակայն հենց դա մեզ օգնեց բացահայտել փուլային ներդրման ռազմավարությունը, որը մեր ամենակարևոր բացահայտումներից մեկն է։

__

Մենք մտնում մեծ ազդեցություն ունեցող մի փուլ, քանի որ տեխնոլոգիան շարունակում է կատարելագործվել։ Լիովին արդար է, որ մեզ քննադատում են յուրաքանչյուր որոշման համար․ մեր կատարած աշխատանքի կարևորությունն ու ազդեցությունը հաշվի առնելով՝ մենք արժանի ենք խիստ քննադատության և մանրակրկիտ դիտարկման։ Մենք ամեն ինչ ճիշտ չենք անի, բայց արագ կսովորենք և կկատարենք անհրաժեշտ ճշգրտումներ։

Մենք հանձնառու ենք մեր ներդրումն ունենալու՝ ապագան անցյալից ավելի լավ դարձնելու համար․ մենք բախտավոր ենք, որ հնարավորություն ունենք ստանձնելու նման կարևոր գործ։