OpenAI-ի տնտեսական հետազոտությունների համագործակցության հարթակ

OpenAI-ի տնտեսական հետազոտությունների թիմն ուսումնասիրում է, թե ինչպես է արհեստական բանականությունը (ԱԲ) ազդում աշխատողների, ընկերությունների, հաստատությունների և ընդհանուր տնտեսության վրա։ Դրա համար մենք համադրում ենք խիստ մեթոդաբանությամբ տնտեսական հետազոտությունները, արտադրանքի և դրա օգտագործման տվյալների՝ գաղտնիությունը պահպանող վերլուծությունը, հաճախորդների ու հաստատությունների հետ գործընկերությունը և արտաքին հետազոտողների հետ համագործակցությունը։

Մենք գործարկում ենք OpenAI-ի տնտեսական հետազոտությունների համագործակցության հարթակը՝ արտաքին հետազոտողների հետ մեր համագործակցությանը պաշտոնական ձևաչափ տալու և այն ընդլայնելու համար։ Հարթակը կաջակցի հետազոտողների հետ հստակ սահմանված շրջանակներով համագործակցությանը՝ ԱԲ-ի տնտեսական ազդեցության վերաբերյալ բարձրորակ էմպիրիկ հետազոտություններ իրականացնելու համար։

Մենք փնտրում ենք նախագծեր, որոնք ելնում են ԱԲ-ին առնչվող կարևոր տնտեսական հարցից և հստակ հիմնավորում են, թե ինչպես կարող են OpenAI-ի գործիքների օգտագործման տվյալներն այդ հարցի վերաբերյալ յուրահատուկ էմպիրիկ պատկերացում տալ՝ միաժամանակ պահպանելով օգտատերերի գաղտնիությունը։

Հրավիրում ենք ներկայացնելու առաջարկներ, որոնք անդրադառնում են ստորև նշված հիմնական հարցերից մեկին կամ մի քանիսին։ Այս ցանկը սպառիչ չէ․ ողջունում ենք նաև հիմնավոր առաջարկներ, որոնք համապատասխանում են հարթակի ավելի լայն նպատակներին։

• Ազդեցությունն աշխատաշուկայի վրա․ ինչպե՞ս կարող ենք չսահմանափակվել ԱԲ-ի հնարավոր ազդեցության գնահատմամբ և չափել, թե որ մասնագիտություններում է մոդելների կարողությունների աճին զուգահեռ իրականում հավանական կամ արդեն նկատելի աշխատողների կարողությունների ընդլայնում, աշխատուժի փոխարինում, նոր առաջադրանքների ստեղծում կամ զբաղվածության աճ։

• Գործատուների վարքագիծը և աշխատատեղերի կառուցվածքը․ ինչպե՞ս է ԱԲ-ն փոխում գործատուների վարքագիծը, այդ թվում՝ աշխատուժի պահանջարկը, թափուր հաստիքների պահանջների ձևակերպումը, թեկնածուների նախնական ընտրությունը, վարձատրությունը, թիմերի կառուցվածքը, և արդյո՞ք ընկերությունները վերակազմակերպում են աշխատատեղերը՝ հաշվի առնելով ԱԲ-ն։

• Տնային տնտեսությունների բարեկեցությունը․ ինչպե՞ս է ԱԲ-ն ազդում տնային տնտեսությունների բարեկեցության վրա պաշտոնական աշխատանքից դուրս, այդ թվում՝ որոշումների կայացման, ժամանակի օգտագործման, խնամքի, ֆինանսական պլանավորման, առողջապահական ծառայություններից օգտվելու և առօրյա տնտեսական բարեկեցության առումով։

• ԱԲ-ն և կրթությունը․ ինչպե՞ս են ուսուցիչներն օգտագործում ԱԲ գործիքները, և արդյո՞ք ԱԲ-ի շնորհիվ նրանց դերերը փոխվում կամ ընդլայնվում են։ Ինչպե՞ս է ԱԲ-ի հետ առնչվելը փոխում սովորողների ընտրությունները՝ ուսման և մասնագիտական կարիերային պատրաստվելու հարցում։ 

• Հասանելիության և ստացվող օգուտների անհավասարությունը․ ովքե՞ր չեն օգտվում ԱԲ-ի առավելություններից և ինչո՞ւ։ Ո՞ր խոչընդոտներն են առավել էական, և ինչպե՞ս կարելի է դրանք վերացնել։

• Փոքր բիզնեսը և անկախ աշխատանքը․ ինչպե՞ս է ԱԲ-ն ազդում փոքր բիզնեսների, ազատ մասնագետների, անհատ ձեռնարկատերերի, ստեղծագործողների և անկախ կամ ոչ ֆորմալ տնտեսական գործունեության այլ ձևերի վրա։

• Պետական և քաղաքացիական ոլորտները․ ի՞նչ տնտեսական ազդեցություն ունի ԱԲ-ն պետական և քաղաքացիական ոլորտներում, այդ թվում՝ պետական հատվածի արտադրողականության, նպաստների հասանելիության, կրթության կառավարման, զբաղվածության ծառայությունների, թույլտվությունների տրամադրման, հարկային վարչարարության և հանրային ծառայությունների մատուցման վրա։

• Գիտելիքի ստեղծումը և նորարարությունը․ ինչպե՞ս է ԱԲ-ն փոխում գիտելիքի ստեղծումն ու նորարարությունը, այդ թվում՝ գիտությունը, հետազոտություններն ու մշակումները, հետազոտական աշխատանքային գործընթացները, փորձագետների արտադրողականությունը, արտոնագրերը և առաջադեմ գիտելիքի տարածումը։

• Շուկայի կառուցվածքը․ ինչպե՞ս է ԱԲ-ի ներդրումն ազդում շուկայի կառուցվածքի վրա, այդ թվում՝ կենտրոնացման, ընկերությունների առավելությունների, հարթակներից կախվածության, բանակցային ուժի, մատակարարների հետ հարաբերությունների և շուկա մուտք գործելու խոչընդոտների վրա։

• Արժեքի չափումը․ ինչպե՞ս պետք է չափենք ԱԲ-ի տնտեսական արժեքը, այդ թվում՝ վճարելու պատրաստակամությունը, վարքագծով բացահայտվող արժեքը, առանձին առաջադրանքների կատարման ժամանակի խնայողությունը, կանխված ծախսերը, որակը հաշվի առնող թողարկման ծավալը և արտադրողականության կայուն աճը։

Առաջարկները կարող են կենտրոնանալ մեկ հարցի վրա կամ համատեղել փոխկապակցված հարցեր։ Մենք հատկապես խրախուսում ենք հետազոտական մոտեցումներ, որոնք նկարագրական կոռելյացիաներից անցնում են պատճառահետևանքային կապերի հավաստի բացահայտմանը, երբ հետազոտվող հարցը պահանջում է նման կապերի վերաբերյալ պնդումներ։

Մենք միտումնավոր աջակցում ենք տարբեր տևողությամբ նախագծերից կազմված պորտֆելի՝

• Կարճաժամկետ (2–6 ամիս)․ արագ իրականացվող ուսումնասիրություններ, որոնք օգտագործում են առկա՝ օգտագործման համար հաստատված տվյալներ, հանրային տվյալներ կամ գործընկերների՝ հստակ սահմանված շրջանակով տվյալներ՝ նախնական միտումները բացահայտելու համար։

• Միջնաժամկետ (6–12 ամիս)․ ուսումնասիրություններ, որոնք հետևում են արդյունքներին ժամանակի ընթացքում, փորձարկում են կոնկրետ միջամտություններ կամ օգտագործում են քվազիփորձարարական փոփոխականությունը։

Դիմորդները պետք է նշեն, թե իրենց առաջարկը որ ժամկետի համար է նախատեսված, և ինչու է այդ տևողությունը համապատասխանում ուսումնասիրվող հարցին։

Յուրաքանչյուր ընտրված նախագիծ կստանա՝

• Միանգամյա հետազոտական դրամաշնորհ՝ գլխավոր հետազոտողի կամ հետազոտողների համար․ 25 000 ԱՄՆ դոլար

• Հետազոտողի օգնականի ամսական կրթաթոշակ կամ պայմանագրային կատարողի վարձատրություն․ 7 500 ԱՄՆ դոլար

• Արտադրանքի և դրա օգտագործման՝ հաստատված, գաղտնիության համար անվտանգ տվյալների հասանելիություն՝ չբացահայտման համաձայնագրով, տվյալների կառավարման, գաղտնիության, իրավական և անվտանգության պահանջների պահպանմամբ։

• Ներքին աջակցության հստակ ընթացակարգ՝ նախագծի շրջանակի սահմանման, աշխատանքին ներգրավման, տվյալների օգտագործման հաստատման, վերանայման և արդյունքների տարածման համար։

Այս կառուցվածքը նախատեսված է համակարգման ծախսերը նվազեցնելու, աշխատանքներն արագացնելու և հետազոտողի անկախությունը պահպանելու համար՝ միաժամանակ ապահովելով նախագծի իրագործելիությունը։ Արտաքին համագործակցությունների շրջանակում բուն վերլուծությունը պետք է կատարի հրավիրված հետազոտողը կամ նրա օգնականը՝ առանց տվյալ նախագծի համար հատուկ տվյալների դուրսբերման կամ վերլուծության հարցում տնտեսական հետազոտությունների թիմի վրա հենվելու։

Ֆինանսավորվող նախագծերը պետք է նախատեսեն հստակ միջանկյալ հանգրվաններ, ոչ միայն վերջնական գիտական աշխատանքներ։ Հետազոտողներից առնվազն ակնկալվում է՝

• Սահմանել նախագծի ժամանակացույցին կապված հիմնական հանգրվաններ, օրինակ՝ հետազոտական պլանի վերջնականացում, տվյալների հասանելիություն, միջանկյալ վերլուծություն և արդյունքների նախնական տարբերակ։

• Մինչև վերլուծությունն սկսելը ավարտել աշխատանքին ներգրավման, պայմանագրերի կնքման և տվյալների հաստատված հասանելիություն ստանալու քայլերը։

• Միջանկյալ արդյունքները ներկայացնել OpenAI-ի տնտեսական հետազոտությունների թիմին։

• Մասնակցել հետազոտությունների արդյունքների պարբերական ներկայացումներին կամ կոնսորցիումի քննարկումներին։

• Պատրաստել առնվազն մեկ գրավոր նյութ, օրինակ՝ զեկուցագիր, աշխատանքային հոդված, հրապարակման նախագիծ, հանրության համար ամփոփագիր, համեմատական գնահատման հենանիշ կամ տվյալների հավաքածուի փաստաթղթեր։

• Արտաքին հաղորդակցությունը կամ հրապարակումը համաձայնեցնել OpenAI-ի հետ՝ վերանայման համաձայնեցված ընթացակարգով։

Մենք առաջնահերթություն ենք տալիս այն աշխատանքներին, որոնք սերտ հետադարձ կապ են ստեղծում էմպիրիկ փաստերի, կազմակերպության ներսում գիտելիքի կուտակման և տնտեսական հետազոտությունների էկոհամակարգի միջև։

Առաջարկները գնահատվելու են հետևյալ չափանիշներով՝

• Համապատասխանությունը տնտեսական հետազոտությունների թիմի առաջնահերթ հարցերին

• Մեթոդաբանության խստությունը և հավաստիությունը

• Իրագործելիությունը՝ հաշվի առնելով նախագծի շրջանակի, տվյալների, գաղտնիության, իրավական պահանջների և ժամկետների սահմանափակումները (օրինակ՝ մենք ոչ մի դեպքում չենք տրամադրելու զրույցների տվյալներ)

• Հանգրվանների և հաշվետվությունների ներկայացման պլանների հստակությունը

• Համապատասխանությունը հարթակի աշխատանքի մոդելին, այդ թվում՝ այն առումով, թե ով է կատարելու բուն աշխատանքը

• ԱԲ-ի տնտեսական ազդեցության վերաբերյալ հավաստի արտաքին էմպիրիկ հիմքի ձևավորմանը նպաստելու ներուժը

• OpenAI-ի հաստատված տվյալները նորարարական և գաղտնիությունը պահպանող եղանակներով օգտագործելու ներուժը

Առաջնահերթություն կտանք հետևյալ հետազոտողների առաջարկներին՝ 

• Հետազոտողներ, որոնք արդեն ունեն հրապարակումներ իրենց առաջարկած հետազոտական ոլորտներում

• Հետազոտողներ, որոնց հասանելի են եզակի տվյալներ, որոնք կնպաստեն հավակնոտ համագործակցությունների իրականացմանը

Հետազոտողները կպահպանեն անկախությունն ուսումնասիրության պլանավորման և վերլուծության հարցերում։ Արդյունքների արտաքին հրապարակումը կամ հանրային օգտագործումը կհամաձայնեցվի OpenAI-ի հետ՝ ապահովելու ճշգրտությունը, գաղտնիության պաշտպանությունը, իրավական պահանջների պահպանումը և պատշաճ համատեքստը։ Առանց հավաստի չափումների մենք արտաքին լսարանին ուղղված պնդումներ չենք անի։

Առաջարկները պետք է ներկայացնել այս ձևի միջոցով՝ լրացուցիչ տեղեկությունները տրամադրելով Google Docs-ի մեկ փաստաթղթի հղումով։ Առաջարկի ծավալը չպետք է գերազանցի երեք էջը՝ չհաշված հղումներն ու հավելվածները։ Յուրաքանչյուր առաջարկ պետք է ներառի՝

• Հետազոտական հարցը կամ հարցերը և դրանց ուսումնասիրման հիմնավորումը

• Համապատասխանությունը հարթակի մեկ կամ մի քանի առաջնահերթ հարցերի

• Առաջարկվող մեթոդաբանությունը և էմպիրիկ ռազմավարությունը

• Անհրաժեշտ տվյալները, այդ թվում՝ OpenAI-ի գործիքների օգտագործման կոնկրետ հաստատված ցուցանիշը, որը կօգնի պատասխանել ԱԲ-ի վերաբերյալ ավելի լայն հարցին, և այն, թե ինչպես է հետազոտական մոտեցումը պահպանելու գաղտնիությունը

• Նախատեսվող ժամանակացույցը և հիմնական հանգրվանները

• Հետազոտական թիմը և առաջարկվող հետազոտողի օգնականի կամ հրավիրված հետազոտողի մասնագիտական նկարագիրը

• Ակնկալվող ներդրումը էմպիրիկ հիմքի ձևավորման, կազմակերպության ներսում գիտելիքի կուտակման և հաստատված հանրային հաղորդակցության մեջ

• Նախագծի շրջանակի սահմանումը՝ հստակ նշելով դրա մեջ մտնող և դրանից դուրս մնացող վերլուծությունները, ներկայացվելիք արդյունքները, աշխարհագրական տարածքներն ու շահակիցներին

• Հաջողության չափանիշները, ձախողման պայմանները, կախվածությունները, սահմանափակումները և ռեսուրսների տրամադրման պարտավորությունները

• Առաջարկների ներկայացման հրավերի հրապարակում՝ 2026 թ. հունիսի 8

• Առաջարկների ներկայացման վերջնաժամկետ՝ 2026 թ. հուլիսի 5

• Առաջարկների վերաբերյալ որոշումների հրապարակում՝ 2026 թ. հուլիսի 31

Պատասխանատվության սահմանափակում․ առաջարկների ներկայացման այս հրավերը տրամադրվում է միայն տեղեկատվական և գնահատման նպատակներով և որևէ պարտավորություն չի ստեղծում OpenAI-ի կամ որևէ դիմորդի համար։ Այստեղ նկարագրված բոլոր պայմանները նախնական են և ենթակա են փոփոխման։ Առաջարկ ներկայացնելը կամ OpenAI-ի տնտեսական հետազոտությունների համագործակցության հարթակին մասնակցելու համար ընտրվելը ֆինանսավորման, վարձատրության կամ համագործակցության իրավունք չի առաջացնում։ Նման պարտավորություններ կառաջանան միայն OpenAI-ի և ընտրված կողմի միջև վերջնական գրավոր համաձայնագրի ստորագրումից հետո։