Առատ արհեստական բանականության ստեղծում

AI ենթակառուցվածքն արժեքավոր չէ պարզապես իր մեծության պատճառով։ Այն արժեքավոր է նրանով, թե ինչ է հնարավոր դարձնում՝ ավելի կարողունակ արհեստական բանականություն, որն ավելի ցածր գնով հասանելի է ավելի շատ մարդկանց։

Առատությունն այսպես եմ պատկերացնում։ Այն ամրագրված է թե՛ մեր առաքելության՝ արհեստական ընդհանուր բանականությունը ողջ մարդկության համար օգտակար դարձնելու, և թե՛ մեր բիզնեսն առաջ մղող տնտեսական շարժիչի հիմքում։

Երբ օգտակար բանականության արժեքը նվազում է, ավելի շատ աշխատանք կատարելն է նպատակահարմար դառնում։ Երբ մոդելներն ավելի են հզորանում, այդ աշխատանքն ավելի մեծ արժեք է ստեղծում։ Կիրառման տարածմանը զուգընթաց` մենք ստանում ենք եկամուտ, իրական օգտագործումից հետադարձ կապ և պահանջարկի ավելի հստակ պատկեր՝ շարունակելու ներդրումները հաջորդ սերնդի հետազոտությունների ու ենթակառուցվածքի մեջ։

Ավելի լավ բանականությունը խթանում է ավելի լայն կիրառումը։ Ավելի լայն կիրառումը նպաստում է ներդրումների աճին։ Ավելի շատ ներդրումները բարելավում են բանականությունն ու արդյունավետությունը։ Մենք հենց այդ շրջափուլն ենք կառուցում։

Մեր վերջերս հրապարակած գնային հայտարարությունը ցույց է տալիս, թե այդ շրջափուլն ինչպես է արագ օգուտ տալիս հաճախորդներին։ Երեկ մենք GPT‑5.6 Luna-ի գինը նվազեցրինք 80 տոկոսով, իսկ GPT‑5.6 Terra-ինը՝ 20 տոկոսով։ Այժմ Luna-ի արժեքը մեկ միլիոն մուտքային թոքենի համար $0.20 է, իսկ մեկ միլիոն ելքային թոքենի համար՝ $1.20. Terra-ի դեպքում արժեքը համապատասխանաբար $2 և $12 է։

GPT‑5.6 Sol-ի Արագ ռեժիմը ստանդարտ մշակման կրկնակի գնով ապահովում է մինչև 2.5 անգամ ավելի մեծ արագություն՝ առանց բանականության մակարդակի փոփոխության։

Սրանք պարզապես գնացուցակի փոփոխություններ չեն։ Դրանք ընդլայնում են գործնականում իրագործելի աշխատանքների շրջանակը և հաճախորդներին ավելի ճկուն հնարավորություն տալիս հավասարակշռելու բանականությունը, արագությունը, հուսալիությունն ու արժեքը։

Ճիշտ հարցն այն չէ, թե որ առաջադրանքի համար որ մոդելն է նախատեսված։ Հարցն այն է, թե ցանկալի արդյունքի համար որքան արհեստական բանականություն է պահանջվում, որքան արագ է այն անհրաժեշտ և որքան պետք է արժենա այդ արդյունքին հասնելը։ Նույն աշխատանքային գործընթացում այդ հավասարակշռությունը կարող է մի քանի անգամ փոխվել։

Հաճախորդները թոքեններ չեն գնում պարզապես դրանք ունենալու համար։ Նրանք ցանկանում են, որ աջակցության խնդիրը լուծվի, ծրագրաշարը թողարկվի, պայմանագիրը վերանայվի կամ գիտական հարցի պատասխանը գտնվի։ Ճիշտ չափանիշը հաջող արդյունքի արժեքն է՝ ներառյալ դրա համար պահանջվող ժամանակը, կրկնակի փորձերը, վերահսկողությունն ու սխալները։

Ավելի հզոր մոդելը, որը աշխատանքը ճիշտ և արդյունավետ է կատարում, ի վերջո կարող է ավելի տնտեսող լինել, քան բազմակի փորձեր կամ մարդու լայնածավալ միջամտություն պահանջող ավելի էժան մոդելը։ Եվ հակառակը՝ ավելի էժան մոդելը կարող է կտրուկ ընդլայնել հասանելիությունը, եթե համապատասխանում է որակի նույն չափանիշին։ Հնարավորությունն օգտակար բանականության առավելագույն մակարդակը ճիշտ գնով կիրառելն է։

Այդ արժեքն ապահովելու համար միայն լրացուցիչ տվյալների կենտրոններ կառուցելը բավարար չէ։ Անհրաժեշտ է հաշվարկային հզորության յուրաքանչյուր միավորն ավելի արդյունավետ դարձնել։

Մեր վերջին ինժեներական աշխատանքը ցույց է տալիս, թե դա գործնականում ինչ տեսք ունի։ Մեր տեխնիկական թիմերի հետ աշխատելով՝ GPT‑5.6 Sol-ն օգնեց օպտիմալացնել մեր մոդելների սպասարկման համար օգտագործվող արտադրական ծրագրաշարը՝ ամբողջական սպասարկման ծախսերը նվազեցնելով 20 տոկոսով։ Այն նաև օգնեց բարելավել կանխատեսական ապակոդավորումը՝ թոքենների գեներացման արդյունավետությունն ավելացնելով ավելի քան 15 տոկոսով։

Նույնքան կարևոր է, որ արդյունավետությունը միայն մոդելով չի որոշվում։ Կարևոր է նաև այն շրջապատող համակարգը։ Ավելի լավ երթուղավորումն ապահովում է սարքավորումների արդյունավետ աշխատանքը։ Համատեքստի ավելի խելացի կառավարումը թույլ չի տալիս ագենտներին կրկնել նույն աշխատանքը։ Ավելի հզոր գործիքներն ու պրոդուկտի ճիշտ դիզայնը նվազեցնում են առաջադրանքն ավարտելու համար անհրաժեշտ քայլերի քանակը։

Վերջերս կատարված հենանիշային վերլուծության ընթացքում պահպանված դատողության և համատեքստի կառավարման բարելավումները GPT‑5.6 Sol-ի արդյունքը հանրային ARC-AGI-3 առաջադրանքների հավաքածուում 13.3 տոկոսից հասցրին 38.3 տոկոսի՝ օգտագործելով վեց անգամ պակաս ելքային թոքեն։ Մոդելը չէր փոխվել։ Փոխվել էր այն շրջապատող համակարգը։

Այս ձեռքբերումները բազմապատկում են միմյանց ազդեցությունը։ Ավելի հզոր մոդելներն օգնում են մեր թիմերին արդյունավետության նոր աղբյուրներ բացահայտել։ Այդ արդյունավետությունը նվազեցնում է հաճախորդների սպասարկման ծախսերը և ընդլայնում նույն ենթակառուցվածքով մեր աջակցած աշխատանքների շրջանակը։ Դա իր հերթին ավելի հասանելի է դարձնում հաջորդ սերնդի արհեստական բանականությունը։

Ենթակառուցվածքի, մոդելների, հարթակի և արտադրանքների բոլոր մակարդակներում աշխատելու առավելությունը պարզապես դրանցից յուրաքանչյուրում մեր ներգրավվածությունը չէ, այլ այն է, որ յուրաքանչյուր մակարդակ բարելավում է մյուսները։

Պրոդուկտների իրական կիրառությունը ցույց է տալիս, թե որտեղ են հաճախորդները արժեք ստանում իսկ որտեղ՝ բախվում դժվարությունների ։ Այդ հետադարձ կապն օգնում է ուղղորդել մեր հետազոտությունները։ Հետազոտական բարելավումներն ուժեղացնում են մեր արտադրանքները և նվազեցնում դրանց սպասարկման ծախսերը։ ChatGPT‑ի, ChatGPT Work-ի, Codex-ի և API-ի պահանջարկն օգնում է ավելի ճիշտ որոշումներ կայացնել, թե որտեղ ավելացնել հզորությունը։

Այդ ուսուցման մասշտաբը կարևոր է: Մեր մոդելներն այժմ հասանելի են ավելի քան մեկ միլիարդ ակտիվ օգտատիրոջ և ավելի քան երկու միլիոն ձեռնարկության։ Տեխնոլոգիայի նկատմամբ վստահության աճին զուգընթաց մարդիկ այն ավելի խորությամբ են կիրառում։ Գրանցվելուց վեց ամիս անց մարդիկ օրական մոտ 50 տոկոսով ավելի շատ հաղորդագրություն են ուղարկում և ChatGPT‑ն օգտագործում մոտ երկու անգամ ավելի շատ տեսակի աշխատանքի համար։ ChatGPT Work-ը փոխում է գիտելիքի ոլորտի աշխատողի աշխատանքի մասին պատկերացումները՝ հարցերին պատասխանելուց անցնելով բարդ, բազմափուլ աշխատանքների կատարմանը՝ «հարցնելուց» դեպի «գործելը»։ OpenAI-ում Codex-ի միջոցով ագենտային աշխատանքն այժմ կազմում է շաբաթական ելքային թոքենների 99.8%-ը, ընդ որում` Ֆինանսները այն թիմերից է, որոնք ագենտային գործիքները դարձրել են իրենց աշխատանքի հիմնական բաղադրիչը։

Կազմակերպությունների ներսում պատկերը նման է։ Ընկերությունը կարող է սկսել մեկ թիմից կամ մեկ աշխատանքային գործընթացից։ Որակի և տնտեսական արդյունավետության աճին զուգընթաց` կիրառումը տարածվում է տարբեր գործառույթներում, իսկ ԱԲ-ն դառնում է բիզնեսի գործունեության մի մասը։

Դա արժեքավոր հետադարձ կապի օղակ է ստեղծում պահանջարկի, արտադրանքի կատարելագործման, արդյունավետության և ենթակառուցվածքի պլանավորման միջև։ Դրա համար պարտադիր չէ տիրապետել յուրաքանչյուր ակտիվի կամ ինքնուրույն ստեղծել յուրաքանչյուր բաղադրիչը։ Կարող ենք ինքներս տնօրինել, գործընկերություն հաստատել կամ գնել՝ կախված նրանից, թե որ տարբերակն է լավագույնս ծառայում հաճախորդին և տնտեսապես առավել նպատակահարմար։ Կարևորը համակարգի աշխատանքը համակարգելն ու դրա բոլոր մակարդակներից սովորելն է։

ԱԲ ենթակառուցվածքը պետք է պլանավորել դրա անհրաժեշտությունից տարիներ առաջ, մինչդեռ մոդելները, արտադրանքները և հաճախորդների պահանջարկը շատ ավելի արագ են զարգանում։ Այդ անհամապատասխանությունը կարգապահությունը դարձնում է առանցքային։

Մեր ներդրումային որոշումները հիմնված են փաստերի վրա՝ հաշվի առնելով օգտատերերի և ծանրաբեռնվածության աճը, ձեռնարկությունների ստանձնած պարտավորությունները, API-ի սպառումը, օգտագործման մակարդակը, եկամուտի և մոդելների կարողությունների ու արդյունավետության առաջընթացը։ Տեխնիկական և առևտրային նշաձողերն օգնում են որոշել, թե երբ պետք է նախագծերն առաջ շարժվեն։ Երկարաժամկետ գործընկերությունները միավորում են լայնածավալ արդյունք ապահովելու համար անհրաժեշտ ֆինանսավորումը, ենթակառուցվածքն ու գործառնական փորձը։

Արտադրանքի եկամուտը, մասնավոր կապիտալը և առևտրային գործընկերությունները տարբեր կերպ են նպաստում այդ աճին։ Նպատակը հնարավորինս մեծ ենթակառուցվածք ստեղծելը չէ, այլ անհրաժեշտ հզորությունը ճիշտ ժամանակին հասանելի դարձնելը՝ հիմնվելով վստահելի պահանջարկի վրա։

Ինձ համար առանցքային հարցերը պարզ են. որքան արագ է նոր հզորությունն արդյունավետ գործարկվում, որքան արդյունավետ է այն օգտագործվում, հաճախորդների ինչ պահանջարկ է այն բավարարում, որքան արագ կարող է տեխնիկական առաջընթացը նվազեցնել օգտակար բանականության տրամադրման արժեքը։

Այս հարցերը երկարաժամկետ հավակնությունները կապում են գործառնական կարգապահության հետ։

Մենք դեռ ճանապարհի սկզբում ենք։ Ավելի հզոր համակարգերը կիրականացնեն ավելի երկարատև նախագծեր, կհամակարգեն տարբեր գործիքների աշխատանքը և կկատարեն գաղափարից մինչև պատրաստի արդյունք ընկած աշխատանքի ավելի մեծ մասը։ Անհատներն ու փոքր ձեռնարկությունները կստանան հնարավորություններ, որոնք նախկինում հասանելի էին միայն շատ ավելի խոշոր կազմակերպություններին։ Ձեռնարկություններն իրենց գործունեության մեջ արհեստական բանականությունն ավելի լայնորեն կկիրառեն։

Մեր նպատակը պարզապես ավելի շատ հաշվարկային հզորությունը, ավելի մեծ մոդելները կամ թոքենների ավելի ցածր գները չեն։ Նպատակն ավելի օգտակար և հասանելի արհեստական բանականությունն է։

Ահա թե ինչ է նշանակում առատություն. արհեստական բանականություն, որը շարունակաբար դառնում է ավելի կարողունակ, ավելի մատչելի և ավելի արժեքավոր այն օգտագործողների համար։ Մեր առաջընթացը կչափենք նրանով, թե որքան օգտակար աշխատանք է այն հնարավոր դարձնում, որքան արդյունավետ ենք այն մատուցում և որքան լայնորեն կարող են հասանելի դառնալ դրա օգուտները։