ግንባር ቀደም ሳይንስ
ከ1,800 በላይ ሳይንቲስቶች ChatGPTን እንዴት እንደተጠቀሙና AI ለሳይንሳዊ ግኝቶች ምን አስተዋጽኦ እንዲኖረው እንደሚጠብቁ። ግኝቶቹን በአዲሱ ሪፖርታችን ይመልከቱ።
ሳይንሳዊ ዕድገት ተመራማሪዎች አዳዲስ ጥያቄዎችን በማንሳታቸውና ለእነዚህም መልስ የሚያገኙበትን መንገድ በመፈለጋቸው ላይ ይመሠረታል። AI የዚህ ሥራ አካል እየሆነ ነው፤ ሆኖም የት እንደሚረዳና ለግኝቶች ምን አስተዋጽኦ ሊኖረው እንደሚችል ገና እየተማርን ነው።
የOpenAI የኢኮኖሚ ምርምር ቡድን፣ ChatGPT ለአካዳሚክ ተመራማሪዎች በተሰኘው የሰመር ሙከራ መርሐ ግብር ውስጥ ከነበሩ 1,819 ሳይንቲስቶች የተላኩ ከ580,000 በላይ ሳይንሳዊ መልዕክቶችን አጥንቷል፤ በ251 ተሳታፊዎች ላይም የዳሰሳ ጥናት አካሂዷል።
ሳይንቲስቶች ነባር የጥናት ጽሑፎችን ከመከለስ እስከ ማስረጃዎችን መተንተንና ሐሳቦችን ማዳበር ድረስ፣ በምርምር ሂደቱ ውስጥ ChatGPTን ተጠቅመዋል። በዳሰሳ ጥናቱ የተሳተፉት፣ ያንኑ ሥራ በተመሳሳይ ጥራት ያለ AI ለማከናወን 1.9 እጥፍ ጊዜ ይወስድባቸው እንደነበር ገምተዋል። በተጨማሪም፣ ግኝቶችን ለማስገኘት ስለሚወስደው ጊዜ ላቀረብነው ጥያቄ ከመለሱት ውስጥ 98% የሚሆኑት AI በዘርፋቸው ግኝቶች የሚገኙበትን ሂደት እንደሚያፋጥን ጠብቀዋል።
OpenAI፣ ChatGPT ለአካዳሚክ ተመራማሪዎች በተሰኘው መርሐ ግብር ውስጥ ያሉ ተሳታፊዎችን መረጃ ሞዴሎቹን ለማሠልጠን በነባሪነት አይጠቀምም። የተመራማሪዎችን ግላዊነት ለመጠበቅ፣ መልዕክቶችን እንደ ነባር የጥናት ጽሑፎችን መከለስ፣ ኮድ መጻፍ ወይም መረጃ መተንተን ባሉ የምርምር ተግባራት ለመመደብ አውቶማቲክ መመደቢያዎች የሚባሉ መሣሪያዎችን ተጠቅመናል። የምርምር ቡድኑ እነዚያን ምድቦች ማየት ይችል ነበር፤ ነገር ግን ዋናዎቹን መልዕክቶች ወይም የChatGPT ምላሾች አላነበበም።
ሳይንቲስቶች በምርምር ሂደቱ ውስጥ ChatGPTን እንዴት እንደተጠቀሙ አጥንተናል።
ለእያንዳንዱ ሳይንቲስት፣ በእያንዳንዱ ተግባር ውስጥ የላካቸው ሳይንሳዊ መልዕክቶች ከጠቅላላ መልዕክቶቹ ያላቸውን ድርሻ አስልተናል፤ ከዚያም ለሁሉም ሳይንቲስቶች እኩል ክብደት በመስጠት የእነዚህን ድርሻዎች አማካይ አውጥተናል። መቶኛዎቹ ተጠጋግተዋል፤ ሌሎች የምርምር ተግባራት ከ1% በታች ድርሻ ነበራቸው።
ሳይንቲስቶች ሐሳብ ለማፍለቅ ChatGPTን እንዴት እንደተጠቀሙ ተመልክተናል። ከታች ያሉት አሃዞች ስለ ምርምር ሐሳቦች የላኳቸውን መልዕክቶች ይገልጻሉ።
በሳይንቲስቱ የተመራ
35%
በሚሆነው ጊዜ፣ ሳይንቲስቶች ChatGPT እንዲሠራበት የተወሰነ ጥያቄ አቅርበዋል።
በጋራ የዳበረ
36%
በሚሆነው ጊዜ፣ ሳይንቲስቶች ሐሳብ ይዘው በመቅረብ ChatGPT እንዲያሻሽለው ጠይቀዋል።
በChatGPT የተጠቆመ
23%
በሚሆነው ጊዜ፣ ሳይንቲስቶች ChatGPT የምርምር ጥያቄ እንዲጠቁምላቸው ጠይቀዋል።
ሌላ
6%
መልዕክቱን ከሌሎቹ ተግባራት በአንዱ ሥር መመደብ አልተቻለም።
በተለያዩ ዘርፎች ያሉ ሳይንቲስቶች AI ከሌለ 10 ዓመት የሚወስድ ግኝትን እንዲያስቡና AI ሲኖር ምን ያህል ጊዜ እንደሚወስድ እንዲገምቱ ጠይቀናቸዋል።
250 ምላሽ ሰጪዎች ለዚህ ጥያቄ መልሰዋል። ምላሽ ሰጪዎች ከአንድ በላይ ዘርፎችን መምረጥ ስለሚችሉ፣ የዘርፍ ምድቦቹ ተደራራቢ አባላት አሏቸው። መቶኛዎቹ ተጠጋግተዋል፤ ድምራቸውም 100% ላይሆን ይችላል።
ሳይንቲስቶች በተለያዩ የምርምር ተግባራት ውስጥ የChatGPT ምላሾች እንዲብራሩ፣ እንዲረጋገጡ ወይም እንዲሻሻሉ ተከታይ ጥያቄዎችን ምን ያህል ጊዜ እንዳቀረቡ ለክተናል።
እያንዳንዱ ሳይንቲስት ካቀረባቸው ጥያቄዎች ተከታይ ጥያቄ ያስከተሉት አማካይ መቶኛ።
ግኝቶች በበለጠ ፍጥነት እንደሚገኙ የጠበቁ ሳይንቲስቶችን ምክንያታቸውን እንዲያብራሩ ጠይቀናቸዋል። በመልሶቻቸው ውስጥ ሦስት ምክንያቶች ጎልተው ወጥተዋል።
52%
ምርምርን በበለጠ ፍጥነት ማጠናቀቅ
23%
ውጤታማ የመሆን ዕድላቸው የተሻለ የምርምር ጥያቄዎችን ማግኘት
14%
የበለጠ ሰፊ የጥያቄዎች ክልልን መመርመር
11%
ሌላ
ሳይንቲስቶች ከአንድ በላይ ምክንያቶችን መስጠት ይችሉ ነበር። መቶኛዎቹ በ224 የጽሑፍ ምላሾች ውስጥ ከተለዩት 367 ምክንያቶች እያንዳንዱ የያዘውን ድርሻ ያሳያሉ።
በዚህ ጥናት የተሳተፉ ሳይንቲስቶች ሐሳቦችን ለመመርመር፣ ማስረጃዎችን ለመተንተን፣ ኮድ ለመጻፍና ግኝቶቻቸውን ለማስተዋወቅ ChatGPTን ተጠቅመዋል። ምላሾቻቸው ጊዜ ከመቆጠብ በላይ የሚሄዱ ምኞቶችንም ያሳያሉ፦ ውጤታማ የመሆን ዕድላቸው የተሻለ ጥያቄዎችን ማግኘትና የበለጠ ሰፊ የምርምር ዘርፎችን መከታተል።
እነዚህ ተስፋዎች በተግባር ግኝቶችን በበለጠ ፍጥነት የሚያስገኙ መሆናቸውን ለማወቅ ተጨማሪ ምርምር ያስፈልጋል። ዕድገቱ ሳይንቲስቶች ሐሳቦቻቸውን ለመፈተሽ በሚያስፈልጋቸው የገንዘብ ድጋፍ፣ የሰው ኃይልና ሙከራ የማካሄድ አቅም ላይም ይወሰናል።
ተጨማሪ ሳይንቲስቶች AI በሥራቸው ምን ማስቻል እንደሚችል እንዲመረምሩ አቅም ልንፈጥርላቸው እንፈልጋለን። ከዚህ ምርምር ጎን ለጎን፣ በዓለም ዙሪያ ላሉ ከ200,000 በላይ ተመራማሪዎች ነጻ አገልግሎት በመስጠት ChatGPT ለአካዳሚክ ተመራማሪዎች የተሰኘውን መርሐ ግብር እያስፋፋን ነው። ሳይንቲስቶች ሐሳቦቻቸውን የሰዎችን ሕይወት ወደሚያሻሽሉ ግኝቶች እንዲቀይሩ መርዳት፣ AGI የሰው ልጆችን ሁሉ እንዲጠቅም የማድረግ ተልዕኳችን ማዕከላዊ አካል ነው።
ስለዚህ ጥናት የበለጠ ለማወቅ፣ ሙሉውን የጥናት ጽሑፍ ያንብቡ(በአዲስ መስኮት ውስጥ ይክፈታል) ወይም ዋና ዋና ግኝቶቹን ያውርዱ(በአዲስ መስኮት ውስጥ ይክፈታል)።
«እንደ ChatGPT ያሉ መሣሪያዎች ሳይንሳዊ ግኝቶችን በበለጠ ፍጥነት እንድናገኝ እየረዱን ነው። እንደ እኔ ላለ ሳይንቲስት፣ በእውነቱ ሐሳቦችን በነጻነት የመሞከሪያ ሜዳ ነው።»
ሴሳር ዴ ላ ፉዌንቴ


