இளையோரின் கற்றல், திட்டமிடல், செயற்கை நுண்ணறிவின் எதிர்காலம்

18 வயதுக்குட்பட்டவர்களுடையதாக அடையாளம் காணப்படும் கணக்குகளில் தானாகவே அமையும் இயல்புநிலை அனுபவமான இளையோருக்கான ChatGPT-ஐ அறிமுகப்படுத்தியதிலிருந்து, இளையோர் அதைக் கற்கவும், கருத்துகளை ஆராயவும், அன்றாடச் சிக்கல்களைத் தீர்க்கவும் பயன்படுத்தி வருவதைக் கண்டுள்ளோம். இளையோர் அதன் கற்றல் கருவிகளை எப்படிப் பயன்படுத்துகிறார்கள் என்பது உட்பட, இளையோருக்கான ChatGPT‑இன் தொடக்ககால முன்னேற்றங்களை இன்று பகிர்கிறோம். அத்துடன், அவர்கள் படிக்கவும் கல்லூரிக்குத் தயாராகவும் புதிய வழிகளை அறிமுகப்படுத்துகிறோம்.

ChatGPT‑இன் 120 கோடி பயனர்கள் பல நாடுகள், சமூகங்கள், பின்னணிகளைச் சேர்ந்தவர்கள். இந்தப் பரவலான பயன்பாட்டால், வெவ்வேறு அளவில் வளங்களும் வாய்ப்புகளும் உள்ள இளையோர் கற்கவும் எதிர்காலத்திற்குத் தயாராகவும் உதவும் கருவிகளை உருவாக்குவது மிகவும் முக்கியமாகிறது.

இளையோர் கற்கவும், சீர்தூக்கிச் சிந்திக்கவும், தங்கள் புரிதலை ஆழப்படுத்தவும் உதவும் வகையில் இளையோருக்கான ChatGPT வடிவமைக்கப்பட்டுள்ளது. உலகளவில் மேலும் பல இளையோருக்கு இளையோருக்கான ChatGPT கிடைக்கத் தொடங்கியபோது, அதைப் பெற்றவர்கள், இன்னும் பெறாதவர்களைவிட சராசரியாகச் சுமார் 27 லட்சம் கூடுதல் கற்றல் சார்ந்த செய்திகளை அனுப்பினர்.

இணைந்த பிறகு, இளையோருக்கான ChatGPT‑இன் கற்றல் கருவிகளை இளையோர் பெருமளவில் பயன்படுத்துகின்றனர். “என் கருத்துகளை வளர்க்கக் கேள்விகள் கேள்”, “என் வரைவுக்குக் கருத்துத் தெரிவி”, “என் ஆதாரங்களைச் சரிபார்க்க உதவு” ஆகியவையே அதிகம் தேர்ந்தெடுக்கப்படும் உரையாடல் தொடக்க ப்ராம்ப்ட்கள். ஒரே வாரத்தில், கிட்டத்தட்ட 12 லட்சம் இளையோர் கணித, அறிவியல் கருத்துகளை நன்கு புரிந்துகொள்ளக் கற்றல் காட்சிப்படுத்தல்களைப் பயன்படுத்தினர். 1,80,000-க்கும் மேற்பட்டோர் படிப்படியான கற்றல் உதவிக்கு ஸ்டடி மோடைப் பயன்படுத்தினர்.

இளையோர் இடைவேளை எடுப்பதை ஊக்குவிக்க, இளையோருக்கான ChatGPT‑இல் உள்ளமைந்த நினைவூட்டல்கள் உள்ளன. இளையோர் சராசரியாக ஒரு நாளைக்கு 15 நிமிடங்களுக்கும் குறைவாகவே ChatGPT‑இல் செலவிடுகின்றனர். 2%-க்கும் குறைவான இளையோரே ChatGPT‑இல் தொடர்ந்து மூன்று மணிநேரத்திற்கும் மேலாகச் செலவிடுகின்றனர். இடைவேளை நினைவூட்டல் இடம்பெற்ற இளையோரின் உரையாடல்களில் கிட்டத்தட்ட பாதியில், ஐந்து நிமிடங்களுக்குள் அவர்கள் இடைவேளை எடுத்தனர் அல்லது உரையாடலை முடித்தனர். இளையோரின் சமூக ஊடகப் பயன்பாடு சராசரியாக 5 மணிநேரம் என பொதுவெளியில் தெரிவிக்கப்பட்டுள்ள⁠(புதிய சாளரத்தில் திறக்கும்) அளவைவிட இந்தப் பயன்பாடு மிகவும் குறைவு. இது வேறுவிதமான அனுபவத்தையும் காட்டுகிறது: ChatGPT, வெறுமனே திரையை உருட்டிப் பார்ப்பதற்காக அல்லாமல், கற்கவும், உருவாக்கவும், படைப்பாற்றலை வெளிப்படுத்தவும் வடிவமைக்கப்பட்டுள்ளது. தொடர்ந்து மூன்று மணிநேரத்திற்கும் மேலாகப் பயன்படுத்திய இளையோரில், 80%-க்கும் மேற்பட்டோர் குறைந்தது ஒரு கற்றல் சார்ந்த ப்ராம்ப்டையாவது பயன்படுத்தியிருந்தனர்.

இந்தத் தொடக்ககால அறிகுறிகள் ஊக்கமளிக்கின்றன. இளையோருக்கான ChatGPT‑ஐ மேம்படுத்த, இந்த அனுபவத்தைத் தொடர்ந்து மதிப்பிட்டு, இளையோர், குடும்பங்கள், கல்வியாளர்களிடமிருந்து கற்றுக்கொள்வோம்.

அமெரிக்காவில் வாரந்தோறும் லட்சக்கணக்கான இளையோர் கல்லூரிப் படிப்பைத் திட்டமிட ChatGPT‑ஐப் பயன்படுத்துகின்றனர். விண்ணப்பங்களைத் திட்டமிடவும், காலக்கெடுகளைக் கண்காணிக்கவும், கல்வி நிறுவனங்களை ஆராயவும், நிதியுதவியைப் புரிந்துகொள்ளவும் அதைப் பயன்படுத்துகின்றனர்.

அதனால்தான் இளையோருக்கான ChatGPT‑இல் கல்லூரித் திட்டமிடல் கருவியை விரைவில் சேர்க்கவுள்ளோம். எங்கே விண்ணப்பிக்க வேண்டும் என்பதை மாணவர்களே ஆராய்ந்து முடிவெடுப்பதை மாற்றாமல், கல்லூரிக்கு விண்ணப்பிப்பதற்கான நடைமுறைப் படிகளை நிர்வகிக்க உதவும் வகையில் இதை வடிவமைக்கிறோம். கல்லூரி விண்ணப்பங்களுக்கான உதவி எல்லா மாணவர்களுக்கும் ஒரே அளவில் கிடைப்பதில்லை. ஆலோசகர்கள், வழிகாட்டிகள், குடும்பங்களின் வழிகாட்டலுடன், நிதிநிலையைப் பொருட்படுத்தாமல் மேலும் பலருக்கு உதவி கிடைக்கச் செய்வதே எங்கள் நோக்கம்.

மாணவரின் பட்டியலில் உள்ள கல்வி நிறுவனங்களுக்கான விண்ணப்பத் தேவைகள், காலக்கெடுகள், பணிகள், நிதியுதவிப் படிகள் ஆகியவற்றைக் கல்லூரித் திட்டமிடல் கருவி ஒரே திட்டத்தில் ஒருங்கிணைக்கிறது. பல கல்லூரிகளுக்கு விண்ணப்பிக்கும் மாணவர்கள், இதில் தங்கள் முன்னேற்றத்தைப் புதுப்பிக்கலாம்; காலவரிசையைப் பயன்படுத்தி முன்கூட்டியே திட்டமிடலாம்; செய்ய வேண்டிய மீதிப் பணிகளையும் பார்க்கலாம். ஒரு தேவையின் பொருள் என்ன என்பதிலிருந்து எப்படித் தொடங்குவது என்பதுவரை, ஒவ்வொரு கட்டத்திலும் ChatGPT‑இடம் கேள்விகள் கேட்கலாம். இந்தப் படிகளை ஒருங்கிணைப்பதன் மூலம், மாணவர்கள் மற்றும் குடும்பங்களின் நேரத்தை மிச்சப்படுத்தவும், மன அழுத்தம் தரும் நடைமுறையை எளிதாகக் கையாள உதவவும் விரும்புகிறோம்.

நான்கு ஆண்டுக் கல்லூரிப் படிப்பில் சேரத் திட்டமிடும் 10–12 ஆம் வகுப்பு மாணவர்களுக்காக அமெரிக்காவில் தொடக்க அனுபவத்தை வடிவமைக்கிறோம். கல்லூரித் திட்டமிடல் கருவியை மேலும் பல நாடுகளின் மாணவர்களுக்குக் கொண்டுசெல்லவும், காலப்போக்கில் இரண்டாண்டுக் கல்லூரிகள், தொழில்நுட்பக் கல்லூரிகள், தொழிற்பயிற்சி நிலையங்கள் உள்ளிட்டவற்றுக்கான ஆதரவை விரிவுபடுத்தவும் திட்டமிட்டுள்ளோம்.

கல்லூரிச் செலவுகளை எப்படிச் சமாளிப்பது என்பதை அறியவும் கல்லூரித் திட்டமிடல் கருவி மாணவர்களுக்கு உதவுகிறது. நிதியுதவிக்கான தேவைகளைப் புரிந்துகொள்ள உதவி பெறலாம்; ஒவ்வொரு கல்வி நிறுவனத்தின் நிதியுதவிக் காலக்கெடுகளையும் கண்காணிக்கலாம்; உதவித்தொகைகள், கட்டண விலக்குகள் பற்றியும் ஆராயலாம்.

விண்ணப்பத்தைக் கண்காணிப்பது, கல்லூரிக்குத் தயாராவதில் ஒரு பகுதி மட்டுமே. தங்களுக்குள்ள வாய்ப்புகளைப் புரிந்துகொள்ளவும் பல மாணவர்களுக்கு ஒருவரின் உதவி தேவைப்படுகிறது. கல்லூரித் திட்டமிடல் கருவியுடன், காலேஜ் அட்வைசிங் கார்ப்ஸ்⁠(புதிய சாளரத்தில் திறக்கும்) அமைப்பையும் ஆதரிக்கிறோம். இந்த இலாப நோக்கமற்ற அமைப்பு, வளங்கள் குறைவான உயர்நிலைப் பள்ளிகளில் சமீபத்திய கல்லூரிப் பட்டதாரிகளை ஆலோசகர்களாக நியமித்து, மாணவர்கள் உயர்கல்வியை நோக்கிச் செல்ல உதவுகிறது. OpenAI-இன் பங்களிப்பு, இந்த அமைப்பு புதிய மாநிலங்களுக்கு விரிவடையவும் செயற்கை நுண்ணறிவுப் பயிற்சி நல்கைத் திட்டத்தை உருவாக்கவும் உதவும். இந்தத் திட்டத்தின் மூலம், பங்கேற்கும் மாநிலங்களின் ஆலோசகர்கள், மேலும் பல மாணவர்கள் கல்லூரிக்குச் செல்ல உதவும் வகையில் செயற்கை நுண்ணறிவைப் பயன்படுத்துவதற்கான நடைமுறை வழிகளைச் சோதித்துப் பகிர்வார்கள். விண்ணப்பம் மற்றும் சேர்க்கைப் பணிகளை நிர்வகிக்கச் செயற்கை நுண்ணறிவு மாணவர்களுக்கு உதவும். தங்களுக்குள்ள வாய்ப்புகளை ஆராய்ந்து, அடுத்து என்ன செய்வது என்பதை முடிவெடுக்க ஆலோசகர்கள் அவர்களுக்கு உதவலாம்.

இளையோருக்கான ChatGPT‑ஐ அறிமுகப்படுத்தியபோது, அதன் அனுபவத்தைத் தொடர்ந்து மேம்படுத்த உறுதியளித்தோம். இளையோரின் வாழ்வில் செயற்கை நுண்ணறிவின் இடம் குறித்து அவர்களிடமிருந்தே அறிந்துகொள்ளவும், அதன் வடிவமைப்பில் அவர்களுக்கு அர்த்தமுள்ள பங்களிப்பை வழங்கவும், அடுத்த மூன்று ஆண்டுகளுக்கு பாஸ்டன் குழந்தைகள் மருத்துவமனையின் டிஜிட்டல் நலவாழ்வு ஆய்வகத்தையும்⁠(புதிய சாளரத்தில் திறக்கும்) அதன் சுயாதீனமான மாணவர் ஆலோசனைக் குழுவையும்⁠(புதிய சாளரத்தில் திறக்கும்) ஆதரிக்கிறோம்.

2026–27 கல்வியாண்டில், ஆய்வகம் சுமார் 22 மாணவர்களை இரு பிரிவுகளில் ஒருங்கிணைக்கும்: தங்கள் சமூகங்களில் டிஜிட்டல் நலவாழ்வுத் திட்டங்களில் பணியாற்றும் 14–18 வயதுடைய சுமார் 12 மாணவர்கள் ஒரு பிரிவில் இருப்பார்கள். செயற்கை நுண்ணறிவு உரையாடல் நிரல்களையும் வளர்ந்துவரும் தொழில்நுட்பத்தையும் உருவாக்குவதில் கவனம் செலுத்தும் 16–20 வயதுடைய சுமார் 10 மாணவர்கள் மற்றொரு பிரிவில் இருப்பார்கள். இந்த மாணவர்கள், ஆராய்ச்சியாளர்கள் மற்றும் மருத்துவர்களுடன் இணைந்து டிஜிட்டல் நலவாழ்வு, செயற்கை நுண்ணறிவுத் திட்டங்களில் பணியாற்றுவார்கள். செயற்கை நுண்ணறிவுப் பிரிவு மாணவர்கள், கற்றலிலும் தனிப்பட்ட வாழ்விலும் அதைப் பயன்படுத்தும் விதத்தின் அடிப்படையில் கருவிகளைச் சோதித்து மாற்றங்களைப் பரிந்துரைப்பார்கள். இளையோருக்கான இயல்புநிலைப் பாதுகாப்பு அமைப்புகள், பேரென்டல் கண்ட்ரோல்ஸ் மற்றும் அறிவிப்புகள், செயற்கை நுண்ணறிவு பற்றிய அறிவு ஆகியவை குறித்துக் கருத்துகளைக் கேட்கத் திட்டமிட்டுள்ளோம்.

தங்கள் எதிர்காலத்தை வடிவமைக்கும் கருவிகளின் உருவாக்கத்தில் இளையோர் முக்கியப் பங்கு வகிக்க வேண்டும். இளையோர் கருவிகளைச் சோதித்து, அவற்றை உருவாக்குபவர்களுக்கான பரிந்துரைகளைத் தயாரிப்பார்கள். அந்தப் பரிந்துரைகளை ஆரம்பத்திலேயே தயாரிப்பு மற்றும் மாடல் தொடர்பான முடிவுகளில் இணைப்பதும், எதை மாற்றுகிறோம், ஏன் மாற்றுகிறோம் என்பதை மாணவர்களுக்குத் தெரிவிப்பதும் எங்கள் நோக்கம். இந்த ஆலோசனைக் குழு, அப்பணியில் அவர்கள் நேரடியாகக் கருத்துரைக்க வாய்ப்பளிக்கும். மேலும், இளையோருக்குச் சிறந்த கருவிகளை உருவாக்க ஒட்டுமொத்தத் துறைக்கும் உதவும் வகையில் அவர்களின் புரிதல்களையும் பரிந்துரைகளையும் பகிரும்.

குறிப்புகளைப் புகைப்படம் எடுத்து ChatGPT‑இல் பதிவேற்றப் பல மணிநேரம் ஆகலாம் என மாணவர்கள் தெரிவித்தனர். தங்கள் குறிப்புகளைப் பயிற்சி அட்டைகள், வினாடி வினாக்கள் போன்ற கற்றல் பொருட்களாக மாற்றுவதை மாணவர்களுக்கு எளிதாக்குகிறோம்.

தொடர்ந்து பல புகைப்படங்களை எடுக்கும் வசதியால், மாணவர்கள் குறிப்புகளின் பல பக்கங்களைப் படமெடுத்து, அவற்றைத் தானாகவே ஒரே பி.டி.எஃப். கோப்பாக இணைத்து ChatGPT‑இல் பதிவேற்றத் தயாராக்கலாம். இது ஐஓஎஸ்-இல் கிடைக்கிறது; ஆண்ட்ராய்டிலும் கொண்டுவரப் பணியாற்றுகிறோம்.

இளையோர் தாங்கள் கற்பதைப் பயிற்சி செய்ய உதவ, பயிற்சி அட்டைகளையும் சேர்க்கிறோம். எடுத்துக்காட்டாக, உயிரியல் தேர்வுக்குத் தயாராகும் மாணவர் வகுப்புக் குறிப்புகளைப் பதிவேற்றலாம் அல்லது ஒரு தலைப்பைத் தேர்ந்தெடுக்கலாம். ChatGPT அந்த உள்ளடக்கத்தை மீள்பயிற்சிக்கான அட்டைகளாக மாற்றும். அவர்கள் தங்களுக்குத் தெரிந்த அட்டைகளைக் குறிக்கலாம், விடை தவறிய அட்டைகளை மீண்டும் பார்க்கலாம் அல்லது அட்டைகளைக் கலைத்து இன்னொரு சுற்றுப் பயிற்சி செய்யலாம். அட்டைத் தொகுப்புகள் இளையோரின் நூலகத்தில் சேமிக்கப்படுவதால், விட்ட இடத்திலிருந்து தொடர்வது எளிது. பயிற்சி அட்டைகளைத் திறந்து காட்டவும், அவற்றைப் பயிற்சி செய்ய நேரம் ஒதுக்கிய பணியை உருவாக்கவும் மாணவர்கள் ChatGPT‑இடம் கேட்கலாம்.

பயிற்சி அட்டைகளுடன், ChatGPT‑இல் வினாடி வினாக்களை உருவாக்குவதையும் எளிதாக்கியுள்ளோம். மாணவர்கள் இப்போது தங்கள் குறிப்புகளைப் பதிவேற்றி ஊடாடும் வினாடி வினாக்களாக மாற்றலாம். உங்களுக்கு வினாடி வினா தேவைப்படுவதை உணர்ந்து, உரையாடலிலேயே நேரடியாக உருவாக்குவதிலும் ChatGPT மேம்பட்டுள்ளது.

இளையோருக்கான ChatGPT வளரும்போது, இளையோர், குடும்பங்கள், கல்வியாளர்களிடமிருந்து தொடர்ந்து கற்றுக்கொள்வோம். பாதுகாப்பு நடவடிக்கைகள் நடைமுறையில் எப்படிச் செயல்படுகின்றன என்பதைச் சரிபார்த்து, நாங்கள் அறிந்தவற்றைப் பகிர்வோம்.