ஆர்கெஸ்ட்ரா பயோவை வாங்குகிறது OpenAI

மருந்து உருவாக்கத்தின் சிக்கலான செயல்முறையை ஒருங்கிணைக்க உயிரிமருந்துத் துறைக் குழுக்களுக்கு உதவும் தளமான ஆர்கெஸ்ட்ரா பயோவை⁠(புதிய சாளரத்தில் திறக்கும்) OpenAI வாங்கியுள்ளது. ஆர்கெஸ்ட்ராவின் குழுவையும் தொழில்நுட்பத்தையும், உயிர் அறிவியல் ஆராய்ச்சிக்கான எங்கள் செயற்கை நுண்ணறிவு மாதிரிகள் மற்றும் கருவிகளை உள்ளடக்கிய ரோசலிண்டுடன் இணைக்கிறோம். விஞ்ஞானிகள் புதிய கண்டுபிடிப்புகளை நிகழ்த்தவும், அவற்றை நோயாளிகளை விரைவில் சென்றடையும் சிகிச்சைகளாக மாற்றத் தேவையான பணிகளை நிர்வகிக்கவும் உதவுவதே எங்கள் நோக்கம்.

புதிய மருந்தை உருவாக்குவது மிகவும் சிக்கலான செயல். அமெரிக்காவில், மருந்து செயல்பட வேண்டிய உயிரியல் இலக்கைக் கண்டறிவது முதல் ஒழுங்குமுறை ஒப்புதலைப் பெறுவது வரை சராசரியாக சுமார் 10 முதல் 15 ஆண்டுகள் ஆகின்றன. அறிவியல் பணிகளுக்கு அப்பால், உள் துறைகளையும் வெளிப்புறக் கூட்டாளர்களையும் இணைத்துத் திட்டங்களை இக்குழுக்கள் ஒருங்கிணைக்க வேண்டும். இதற்கு அவை பெரும்பாலும் ஒன்றோடொன்று இணைக்கப்படாத அமைப்புகளையே சார்ந்துள்ளன. இந்தச் சிறப்புப் பணிகளையும் சிக்கலான பணிச்செயல்முறைகளையும் மேற்கொள்ளச் செயற்கை நுண்ணறிவு உதவக்கூடிய ஒரு திருப்புமுனையில் இப்போது இருக்கிறோம்.

உயிர் அறிவியல் ஆராய்ச்சியாளர்களுக்கு எங்கள் செயற்கை நுண்ணறிவு மாதிரிகளையும் கருவிகளையும் ரோசலிண்ட் வழங்குகிறது. உயிரியல் மற்றும் வேதியியல் கேள்விகளைப் பகுத்தாராய விஞ்ஞானிகளுக்கு GPT‑ரோசலிண்ட் உதவுகிறது. ரோசலிண்ட் பணிமேடை⁠, இந்தத் திறன்களை அறிவியல் கருவிகள் மற்றும் தரவுகளுடன் இணைத்து, முடிவுகளைப் பகுப்பாய்வு செய்யவும் பரிசோதனைகளைத் திட்டமிடவும் ஆராய்ச்சியாளர்களுக்கு உதவுகிறது.

ஆர்கெஸ்ட்ரா, உயிரித் தொழில்நுட்பம், மென்பொருள், செயற்கை நுண்ணறிவு ஆகிய துறைகளில் அனுபவமுள்ள குழுவையும், மருந்து உருவாக்கத்தை ஒருங்கிணைப்பதற்காக வடிவமைக்கப்பட்ட தளத்தையும் கொண்டுவருகிறது. ஒரு மருந்தாக உருவாகக்கூடிய பொருளை அடுத்த கட்டத்துக்கு எடுத்துச் செல்லத் தேவையான ஆய்வுகள், முடிவுகள், அடுத்தகட்ட நடவடிக்கைகள் ஆகியவற்றுடன் அறிவியல் கண்டுபிடிப்புகளை இணைக்கக் குழுக்களுக்கு உதவும் செயலிகளை ஒன்றிணைந்து உருவாக்குவதே எங்கள் நோக்கம்.

மருந்துத் திட்டங்களை முன்னெடுக்க மனிதர்களும் செயற்கை நுண்ணறிவுச் செயலிகளும் இணைந்து பணியாற்றும் தளமே ஆர்கெஸ்ட்ரா பயோ. விஞ்ஞானிகளும் திட்டத் தலைவர்களும் ஆய்வுகள் மற்றும் தொடர் நடவடிக்கைகளைக் கண்காணித்து அவற்றின் முன்னேற்றத்தைப் பின்தொடரும் பணிகளைச் செயலிகளிடம் ஒப்படைக்கின்றனர். இதனால், பணிகளை வழிநடத்தவும், முடிவுகளை எடுக்கவும், சிக்கல்கள் தாமதங்களை ஏற்படுத்தும் முன்பே அவற்றைத் தீர்க்கவும் அவர்களுக்கு நேரம் கிடைக்கிறது.

ஒரு மருந்துத் திட்டத்தின் ஒரு பகுதியில் ஏற்படும் சிக்கல், பல பகுதிகளைப் பாதிக்கக்கூடும். எடுத்துக்காட்டாக, ஒரு உற்பத்தித் தொகுதியில் ஏற்படும் தோல்வி, மருத்துவப் பரிசோதனையின் தொடக்கத்தைத் தாமதப்படுத்தலாம். எந்தச் செயல்பாடுகளும் கால அட்டவணைகளும் பாதிக்கப்படுகின்றன என்பதை அடையாளம் காணவும், தொடர்புடைய தகவல்களைச் சேகரிக்கவும், சிக்கலை எதிர்கொள்ளும் வழிகளை ஒப்பிடவும் ஆர்கெஸ்ட்ராவின் செயலிகள் குழுக்களுக்கு உதவுகின்றன. அந்தப் பகுப்பாய்வைப் பயன்படுத்தி, அடுத்து என்ன செய்ய வேண்டும் என்பதை விஞ்ஞானிகளும் திட்டத் தலைவர்களும் முடிவு செய்யலாம்.

உயிர் அறிவியலில் செயற்கை நுண்ணறிவின் சாத்தியங்களை நனவாக்க, மருந்துக் கண்டுபிடிப்பு மற்றும் உருவாக்கத்தில் முன்னணியில் உள்ள நிறுவனங்களுடன் நெருங்கிய ஒத்துழைப்பு தேவை. நோவோ நார்டிஸ்க்⁠ உடனான எங்கள் கூட்டாண்மை, அந்நிறுவனத்தின் பரந்த செயல்பாட்டுத் திறனையும் அறிவியல் நிபுணத்துவத்தையும் பயன்படுத்தி, வலுவான நிர்வாகக் கட்டுப்பாடுகளைப் பேணியபடியே ஆராய்ச்சி, மேம்பாடு மற்றும் வணிகச் செயல்பாடுகளை விரைவுபடுத்துவதை நோக்கமாகக் கொண்டுள்ளது. மாடர்னாவில்⁠, சிக்கலான தரவுகளிலிருந்து பெறப்படும் நுண்ணறிவுகளைப் பரிசோதனைச் செயல்முறைகளாக மாற்றக் குழுக்களுக்குச் செயற்கை நுண்ணறிவு உதவுகிறது. இது ஆராய்ச்சி மற்றும் மேம்பாட்டை விரைவுபடுத்தும் சாத்தியத்தைக் கொண்டுள்ளது.

புதிய மருந்துகளைக் கண்டுபிடித்து உருவாக்கும் முழுச் செயல்முறையிலும் செயற்கை நுண்ணறிவு விஞ்ஞானிகளுக்கு உதவ வேண்டும் என்பதே எங்கள் தொலைநோக்கு. யோசனைகளை ஆராய்வது, பரிசோதனைகளை வடிவமைப்பது, முடிவுகளைப் புரிந்துகொள்வது, நம்பிக்கையளிக்கும் சிகிச்சைகளை முன்னெடுக்கத் தேவையான பணிகளை ஒருங்கிணைப்பது ஆகிய அனைத்தும் இதில் அடங்கும். ஆர்கெஸ்ட்ரா பயோவை ரோசலிண்டுடன் இணைப்பது அந்தத் தொலைநோக்கை நோக்கிய ஒரு படியாகும். ஆராய்ச்சியாளர்களுடனும் எங்கள் கூட்டாளர்களுடனும் இணைந்து, மேலும் பல கண்டுபிடிப்புகளைச் சாத்தியமாக்கவும் புதிய மருந்துகள் நோயாளிகளை விரைவில் சென்றடைய உதவவும் முனைகிறோம்.