LifeVal
ਰੋਜ਼ਾਨਾ ਜ਼ਿੰਦਗੀ ਵਿੱਚ ਅਹਿਮੀਅਤ ਰੱਖਣ ਵਾਲੇ ਕੰਮਾਂ 'ਤੇ AI ਦੀ ਤਰੱਕੀ ਦਾ ਮੁਲਾਂਕਣ ਕਰਨਾ।
OpenAI ਦਾ ਉਦੇਸ਼ ਇਹ ਯਕੀਨੀ ਬਣਾਉਣਾ ਹੈ ਕਿ ਆਰਟੀਫ਼ਿਸ਼ੀਅਲ ਜਨਰਲ ਇੰਟੈਲੀਜੈਂਸ ਦਾ ਲਾਭ ਸਮੁੱਚੀ ਮਨੁੱਖਤਾ ਨੂੰ ਮਿਲੇ। ਹਰ ਹਫ਼ਤੇ ChatGPT ਵਰਤਣ ਵਾਲੇ ਇੱਕ ਅਰਬ ਤੋਂ ਵੱਧ ਲੋਕਾਂ ਲਈ, ਅਸੀਂ ਅਜਿਹਾ AI ਬਣਾਉਣਾ ਚਾਹੁੰਦੇ ਹਾਂ ਜੋ ਰੋਜ਼ਾਨਾ ਜ਼ਿੰਦਗੀ ਦੀਆਂ ਵਿਹਾਰਕ ਚੁਣੌਤੀਆਂ ਵਿੱਚ ਮਦਦ ਕਰ ਸਕੇ, ਜਿਵੇਂ ਕਿ ਬੱਚਿਆਂ ਦੀ ਦੇਖਭਾਲ ਲੱਭਣਾ, ਸਰਕਾਰੀ ਸੇਵਾਵਾਂ ਤੱਕ ਪਹੁੰਚ ਬਣਾਉਣਾ, ਬਜਟ ਤਿਆਰ ਕਰਨਾ, ਸਕੂਲ ਦੀ ਤਿਆਰੀ ਕਰਨਾ, ਪਕਵਾਨਾਂ ਦੀਆਂ ਰੈਸਿਪੀਆਂ ਵਿੱਚ ਬਦਲਾਅ ਕਰਨਾ, ਕਰਿਆਨੇ ਦਾ ਸਮਾਨ ਆਰਡਰ ਕਰਨਾ, ਕਸਰਤ ਯੋਜਨਾਵਾਂ ਤਿਆਰ ਕਰਨਾ ਅਤੇ ਹੋਰ ਬਹੁਤ ਕੁਝ।
ਜਦੋਂ ਕੋਈ ਆਪਣੀ ਜ਼ਿੰਦਗੀ ਸੌਖੀ ਬਣਾਉਣ ਲਈ ਮਦਦ ਲੱਭਦਾ ਹੈ, ਤਾਂ ਉਸ ਨੂੰ ਸਿਰਫ਼ ਸਲਾਹ ਜਾਂ ਗੱਲਬਾਤ ਵਿੱਚ ਮਿਲੇ ਜਵਾਬ ਤੋਂ ਵੱਧ ਦੀ ਲੋੜ ਹੁੰਦੀ ਹੈ। ਸੱਚਮੁੱਚ ਮਦਦਗਾਰ ਨਿੱਜੀ ਸਹਾਇਕ ਬਣਨ ਲਈ ChatGPT ਨੂੰ ਅਜਿਹੇ ਕਦਮ ਚੁੱਕਣ ਦੇ ਯੋਗ ਹੋਣਾ ਚਾਹੀਦਾ ਹੈ ਜਿਨ੍ਹਾਂ ਨਾਲ ਕੰਮ ਅਸਲ ਵਿੱਚ ਪੂਰੇ ਹੋ ਸਕਣ।
ਰੋਜ਼ਾਨਾ ਦੇ ਕੰਮਾਂ 'ਤੇ ਸਮੇਂ ਦੇ ਨਾਲ ਮਾਡਲ ਦੇ ਪ੍ਰਦਰਸ਼ਨ ਦਾ ਮੁਲਾਂਕਣ ਕਰਨ ਲਈ, ਅਸੀਂ ਅਜਿਹੇ ਕਾਰਜਾਂ ਦਾ ਮੁਲਾਂਕਣ-ਢਾਂਚਾ ਤਿਆਰ ਕੀਤਾ ਜਿਸ ਵਿੱਚ ਉਹ ਖੇਤਰ ਸ਼ਾਮਲ ਹਨ ਜਿੱਥੇ ਵਰਤੋਂਕਾਰਾਂ ਨੂੰ AI ਅਤੇ ਨਿੱਜੀ ਏਜੰਟਾਂ ਤੋਂ ਸਭ ਤੋਂ ਵੱਧ ਮਦਦ ਦੀ ਲੋੜ ਸੀ। ਅਸੀਂ ਪਿਛਲੇ ਸਾਲ ਦੌਰਾਨ ਰੋਜ਼ਾਨਾ ਦੇ ਕੰਮਾਂ 'ਤੇ ਮਾਡਲ ਦੀ ਕਾਰਗੁਜ਼ਾਰੀ ਵਿੱਚ ਸੁਧਾਰ ਨੂੰ ਟਰੈਕ ਕਰਨ ਅਤੇ ਉਸ ਨੂੰ ਹੋਰ ਬਿਹਤਰ ਬਣਾਉਣ ਲਈ ਇਸ ਮੁਲਾਂਕਣ ਦੀ ਵਰਤੋਂ ਕੀਤੀ।
ਪਿਛੋਕੜ
ਲੋਕ ਕਿਹੜੇ ਕੰਮਾਂ ਨੂੰ ਸਭ ਤੋਂ ਵੱਧ ਅਹਿਮੀਅਤ ਦਿੰਦੇ ਹਨ, ਇਹ ਪਛਾਣਨ ਲਈ ਅਸੀਂ ਦੋ ਵੱਡੇ ਅਧਿਐਨਾਂ ਤੋਂ ਸ਼ੁਰੂਆਤ ਕੀਤੀ ਜੋ ਅਮਰੀਕਾ ਅਤੇ ਅੰਤਰਰਾਸ਼ਟਰੀ ਪੱਧਰ 'ਤੇ ਲੋਕਾਂ ਦੇ ਸਮਾਂ ਬਿਤਾਉਣ ਦੇ ਤਰੀਕੇ ਨੂੰ ਟਰੈਕ ਕਰਦੇ ਹਨ: ਅਮੈਰੀਕਨ ਟਾਈਮ ਯੂਜ਼ ਸਰਵੇ(ਨਵੀਂ ਵਿੰਡੋ ਵਿੱਚ ਖੁੱਲ੍ਹਦਾ ਹੈ) ਅਤੇ ਮਲਟੀਨੈਸ਼ਨਲ ਟਾਈਮ ਯੂਜ਼ ਸਟੱਡੀ(ਨਵੀਂ ਵਿੰਡੋ ਵਿੱਚ ਖੁੱਲ੍ਹਦਾ ਹੈ)। ਇਕੱਠੇ ਮਿਲ ਕੇ, ਇਹ ਡਾਟਾਸੈੱਟ ਵੱਖ-ਵੱਖ ਆਬਾਦੀ ਸਮੂਹਾਂ ਦੇ ਲੋਕਾਂ ਦੁਆਰਾ ਦਿਨ ਦੇ ਵੱਖ-ਵੱਖ ਸਮਿਆਂ ਅਤੇ ਵੱਖ-ਵੱਖ ਮੌਸਮਾਂ ਵਿੱਚ ਕੀਤੇ ਜਾਣ ਵਾਲੇ ਰੋਜ਼ਾਨਾ ਜੀਵਨ ਦੇ ਕੰਮਾਂ ਦੀ ਇੱਕ ਵਿਸਤ੍ਰਿਤ ਸੂਚੀ ਪ੍ਰਦਾਨ ਕਰਦੇ ਹਨ। ਇਹ ਸਮਝਣ ਲਈ ਕਿ ਲੋਕ AI ਸਹਾਇਤਾ ਨੂੰ ਸਭ ਤੋਂ ਵੱਧ ਕਿੱਥੇ ਅਹਿਮੀਅਤ ਦੇਣਗੇ, ਅਸੀਂ ਇਹਨਾਂ ਮੌਜੂਦਾ ਸਰਵੇਖਣਾਂ ਦਾ ਵਿਸਥਾਰ ਕਰਦੇ ਹੋਏ 3,995 ਉੱਤਰਦਾਤਾਵਾਂ ਦਾ ਇੱਕ ਨਵਾਂ ਸਰਵੇਖਣ ਕੀਤਾ, ਜੋ ਵੱਖ-ਵੱਖ ਜਨਸੰਖਿਆ ਵਰਗਾਂ ਦੀ ਨੁਮਾਇੰਦਗੀ ਕਰਦਾ ਹੈ। ਹਰੇਕ ਕੰਮ ਲਈ, ਅਸੀਂ ਉਹ ਖੇਤਰ ਪਛਾਣਨ ਵਾਸਤੇ ਕਈ ਤਰ੍ਹਾਂ ਦੇ ਸਵਾਲ ਪੁੱਛੇ ਜਿੱਥੇ ਆਮ ਲੋਕ ਕਿਸੇ ਨਿੱਜੀ ਸਹਾਇਕ ਤੋਂ ਸਭ ਤੋਂ ਵੱਧ ਮਦਦ ਚਾਹੁੰਦੇ ਸਨ। ਨਤੀਜੇ ਵਜੋਂ ਸਾਹਮਣੇ ਆਏ ਕੰਮ ਉਹਨਾਂ ਸਭ ਤੋਂ ਅਹਿਮ ਖੇਤਰਾਂ ਨੂੰ ਸਮੇਟਦੇ ਹਨ ਜਿਨ੍ਹਾਂ ਵਿੱਚ ਲੋਕ ਮਦਦ ਚਾਹੁੰਦੇ ਹਨ, ਜਿਨ੍ਹਾਂ ਵਿੱਚ ਦੇਖਭਾਲ, ਸਿਹਤ, ਸਿੱਖਿਆ, ਘਰੇਲੂ ਪ੍ਰਬੰਧਨ, ਨਿੱਜੀ ਵਿੱਤ, ਖ਼ਰੀਦਦਾਰੀ, ਅਤੇ ਸਰਕਾਰੀ ਸੇਵਾਵਾਂ ਤੱਕ ਪਹੁੰਚ ਸ਼ਾਮਲ ਹਨ।
ਵੱਖ-ਵੱਖ ਕੰਮਾਂ ਦੀਆਂ ਉਦਾਹਰਨਾਂ
ਹੇਠਾਂ ਕੁਝ ਉਦਾਹਰਨਾਂ ਦਿੱਤੀਆਂ ਗਈਆਂ ਹਨ ਕਿ ਸਾਡੇ ਮੌਜੂਦਾ ਮਾਡਲ ਰੋਜ਼ਾਨਾ ਜੀਵਨ ਦੇ ਅਮਲੀ ਕੰਮਾਂ 'ਤੇ ਕਿਵੇਂ ਪ੍ਰਦਰਸ਼ਨ ਕਰਦੇ ਹਨ।
ਘਰ ਬਦਲਣ ਤੋਂ ਬਾਅਦ ਢੁਕਵੇਂ ਕਿੰਡਰਗਾਰਟਨ ਵਿੱਚ ਦਾਖ਼ਲਾ ਲਓ
ਸਾਡੇ ਨਵੇਂ ਘਰ ਨੇੜੇ ਕਿੰਡਰਗਾਰਟਨਾਂ ਦੀ ਤੁਲਨਾ ਕਰੋ ਅਤੇ ਸਭ ਤੋਂ ਢੁਕਵੇਂ ਵਿਕਲਪ ਸ਼ਾਰਟਲਿਸਟ ਕਰੋ।
ਮੈਂ ਤਿੰਨ ਕਿੰਡਰਗਾਰਟਨ ਚੁਣ ਲਏ ਹਨ ਅਤੇ ਦਾਖ਼ਲੇ ਦੇ ਵੇਰਵੇ ਵਿਵਸਥਿਤ ਕਰ ਦਿੱਤੇ ਹਨ। ਦੋ ਤਰਜੀਹਾਂ 'ਤੇ ਅਜੇ ਵੀ ਤੁਹਾਡੇ ਫ਼ੈਸਲੇ ਦੀ ਲੋੜ ਹੈ। ਕੀ ਤੁਸੀਂ ਸ਼ਾਰਟਲਿਸਟ ਦੀ ਸਮੀਖਿਆ ਕਰਨਾ ਚਾਹੁੰਦੇ ਹੋ?
ਹੜ੍ਹ ਆਉਣ ਤੋਂ ਪਹਿਲਾਂ ਵਲੰਟੀਅਰਾਂ ਦਾ ਪ੍ਰਬੰਧ ਕਰਨਾ
ਹੜ੍ਹ-ਰੋਕੂ ਸਹਾਇਤਾ ਦੀ ਲੋੜ ਵਾਲੇ ਚਾਰ ਗੁਆਂਢੀਆਂ ਲਈ ਸਾਡੇ ਭਾਈਚਾਰੇ ਦੀ ਹੜ੍ਹ-ਤਿਆਰੀ ਵਾਲੰਟੀਅਰ ਟੀਮ ਨੂੰ ਸੰਗਠਿਤ ਕਰਨ ਵਿੱਚ ਮੇਰੀ ਮਦਦ ਕਰੋ।
ਮੈਂ ਇੱਕ ਸਧਾਰਨ ਕਾਰਜ ਯੋਜਨਾ ਤਿਆਰ ਕੀਤੀ ਹੈ ਤਾਂ ਜੋ ਵਲੰਟੀਅਰਾਂ ਨੂੰ ਦੱਸੇ ਗਏ ਸਥਾਨਾਂ ਦਾ ਮੁਲਾਂਕਣ ਕਰਨ ਅਤੇ ਆਉਣ ਵਾਲੇ ਖ਼ਰਾਬ ਮੌਸਮ ਲਈ ਤਿਆਰੀ ਕਰਨ ਵਿੱਚ ਮਦਦ ਮਿਲ ਸਕੇ।
ਮੇਰੇ ਪਰਿਵਾਰ ਲਈ ਨਵਾਂ ਘਰ ਲੱਭੋ
ਲੂਜ਼ਰਨ ਕਾਊਂਟੀ ਵਿੱਚ ਅਜਿਹਾ ਘਰ ਲੱਭੋ ਜੋ ਮੇਰੇ ਬਜਟ ਵਿੱਚ ਹੋਵੇ, ਜਿਸ ਵਿੱਚ ਵੱਖਰੀ ਰਿਹਾਇਸ਼ੀ ਯੂਨਿਟ ਹੋਵੇ, ਅਤੇ ਬੱਚਿਆਂ ਨੂੰ ਸਕੂਲ ਛੱਡਣ ਤੋਂ ਬਾਅਦ ਕੰਮ 'ਤੇ ਜਾਣ ਦਾ ਮੇਰਾ ਸਫ਼ਰ ਛੋਟਾ ਰਹੇ। ਇਸ ਦੀ ਰਜਿਸਟਰੀ ਮੇਰੀ ਕਾਰਟ ਵਿੱਚ ਸ਼ਾਮਲ ਕਰੋ ਤਾਂ ਜੋ ਮੈਂ ਇਸ ਦੀ ਸਮੀਖਿਆ ਕਰ ਸਕਾਂ।
ਮੈਨੂੰ ਇੱਕ ਅਜਿਹਾ ਘਰ ਮਿਲਿਆ ਹੈ ਜੋ ਤੁਹਾਡੀਆਂ ਲੋੜਾਂ ਪੂਰੀਆਂ ਕਰਦਾ ਹੈ। ਮੈਂ ਟਰਾਂਸਫ਼ਰ ਟੈਕਸ ਦਾ ਹਿਸਾਬ ਲਗਾ ਲਿਆ ਹੈ ਅਤੇ ਸਮੀਖਿਆ ਕਰਨ ਲਈ ਇਸ ਦੀ ਰਜਿਸਟਰੀ ਨੂੰ ਤੁਹਾਡੀ ਕਾਊਂਟੀ ਰਿਕਾਰਡਜ਼ ਕਾਰਟ ਵਿੱਚ ਸ਼ਾਮਲ ਕਰ ਦਿੱਤਾ ਹੈ।
ਦੂਰੋਂ ਦਾਦੀ ਜੀ ਨਾਲ ਇਕੱਠੇ ਮੈਚ ਦੇਖੋ
ਦਾਦੀ ਜੀ ਅਤੇ ਮੇਰੇ ਲਈ ਦੂਰ ਬੈਠਿਆਂ ਇਕੱਠੇ ਮੈਚ ਦੇਖਣ ਦਾ ਆਸਾਨ ਤਰੀਕਾ ਤਿਆਰ ਕਰੋ।
ਮੈਚ ਦੇਖਣ ਦਾ ਸਭ ਤੋਂ ਆਸਾਨ ਸੈੱਟਅੱਪ ਤਿਆਰ ਹੈ, ਅਤੇ ਜੇਕਰ ਸਟ੍ਰੀਮ ਰੁਕ ਜਾਵੇ ਤਾਂ ਬੈਕਅੱਪ ਵੀ ਮੌਜੂਦ ਹੈ। ਕੀ ਮੈਂ ਤੁਹਾਨੂੰ ਅਤੇ ਦਾਦੀ ਜੀ ਨੂੰ ਇਸ ਦਾ ਤਰੀਕਾ ਕਦਮ-ਦਰ-ਕਦਮ ਸਮਝਾਵਾਂ?
ਸ਼ੂਗਰ ਦੀ ਨਵੀਂ ਪਛਾਣ ਅਨੁਸਾਰ ਢਲ ਰਹੇ ਮਾਤਾ-ਪਿਤਾ ਲਈ ਭੋਜਨ ਦੀ ਤਿਆਰੀ
ਇੱਕ ਵਿਵਹਾਰਕ ਦੇਖਭਾਲ ਅਤੇ ਭੋਜਨ ਯੋਜਨਾ ਰਾਹੀਂ ਮੇਰੇ ਮਾਤਾ-ਪਿਤਾ ਨੂੰ ਸ਼ੂਗਰ ਦੀ ਨਵੀਂ ਪਛਾਣ ਅਨੁਸਾਰ ਢਲਣ ਵਿੱਚ ਮਦਦ ਕਰੋ।
ਪਹਿਲੇ ਹਫ਼ਤੇ ਦੀ ਯੋਜਨਾ ਤਿਆਰ ਹੈ, ਜਿਸ ਵਿੱਚ ਭੋਜਨ, ਯਾਦ-ਦਹਾਨੀਆਂ, ਅਤੇ ਦੇਖਭਾਲ ਟੀਮ ਲਈ ਸਵਾਲ ਸ਼ਾਮਲ ਹਨ। ਕੀ ਤੁਸੀਂ ਇਸ ਨੂੰ ਆਪਣੇ ਮਾਤਾ-ਪਿਤਾ ਨਾਲ ਸਾਂਝਾ ਕਰਨ ਤੋਂ ਪਹਿਲਾਂ ਇਕੱਠੇ ਦੇਖਣਾ ਚਾਹੁੰਦੇ ਹੋ?
ਸਾਡੇ ਨਵੀਨਤਮ ਮਾਡਲ ਕਈ LifeVal ਕਾਰਜਾਂ ਵਿੱਚ ਬਹੁਤ ਉੱਚੇ ਸਕੋਰ ਪ੍ਰਾਪਤ ਕਰਦੇ ਹਨ।
ਪਿਛਲੇ ਸਾਲ ਦੌਰਾਨ ਅਸੀਂ ਆਪਣੇ ਮਾਡਲਾਂ ਨੂੰ ਬ੍ਰਾਊਜ਼ਰ, ਕੰਪਿਊਟਰ ਅਤੇ ਕਨੈਕਟਰਾਂ ਦੇ ਕੰਮਾਂ ਵਿੱਚ ਬਹੁਤ ਤੇਜ਼, ਵਧੇਰੇ ਸਮਰੱਥ ਅਤੇ ਬਿਹਤਰ ਤਾਲਮੇਲ ਵਾਲੇ ਬਣਾਉਣ ਲਈ ਸਿਖਲਾਈ ਦਿੱਤੀ ਹੈ। ChatGPT ਵਿੱਚ ਇਹ ਸਮਰੱਥਾਵਾਂ ਸ਼ਾਮਲ ਕਰਨ ਨਾਲ ਉਨ੍ਹਾਂ ਕੰਮਾਂ ਦਾ ਦਾਇਰਾ ਵੀ ਵਧਦਾ ਹੈ ਜਿਨ੍ਹਾਂ ਵਿੱਚ ਇਹ ਮਦਦ ਕਰ ਸਕਦਾ ਹੈ, ਜਿਸ ਨਾਲ ChatGPT ਸਿਰਫ਼ ਗੱਲਬਾਤ ਦੇ ਸਾਧਨ ਤੋਂ ਅੱਗੇ ਵਧ ਕੇ ਅਸਲ ਸਵੈ-ਚਾਲਿਤ ਨਿੱਜੀ ਸਹਾਇਕ ਬਣਨ ਵੱਲ ਵਧ ਰਿਹਾ ਹੈ।
ਇਹ ਕਿਉਂ ਮਹੱਤਵਪੂਰਨ ਹੈ
ਇਹ ਯਕੀਨੀ ਬਣਾਉਣ ਲਈ ਕਿ AGI ਦਾ ਲਾਭ ਸਮੁੱਚੀ ਮਨੁੱਖਤਾ ਨੂੰ ਮਿਲੇ, ਸਾਨੂੰ ਆਮ ਲੋਕਾਂ ਦੇ ਜੀਵਨ ਵਿੱਚ ਅਹਿਮੀਅਤ ਰੱਖਣ ਵਾਲੇ ਕੰਮਾਂ 'ਤੇ ਮਾਡਲ ਦੀ ਤਰੱਕੀ ਨੂੰ ਮਾਪਣ ਅਤੇ ਬਿਹਤਰ ਬਣਾਉਣ ਦੀ ਲੋੜ ਹੈ। ਇਸ ਦਾ ਮਤਲਬ ਹੈ ਮਾਡਲ ਦੇ ਗਿਆਨ ਦੇ ਅਕਾਦਮਿਕ ਮੁਲਾਂਕਣਾਂ ਤੋਂ ਅੱਗੇ ਵਧਣਾ ਅਤੇ ਅਸਲ ਵਿੱਚ ਇਹ ਮਾਪਣਾ ਕਿ AI ਮਾਡਲ ਫੈਸਲੇ ਲੈਣ, ਰੋਜ਼ਾਨਾ ਦੀਆਂ ਜ਼ਿੰਮੇਵਾਰੀਆਂ ਸੰਭਾਲਣ, ਅਤੇ ਅਰਥਪੂਰਨ ਕੰਮ ਸਿਰੇ ਚਾੜ੍ਹਨ ਵਿੱਚ ਲੋਕਾਂ ਦੀ ਕਿੰਨੀ ਚੰਗੀ ਮਦਦ ਕਰ ਸਕਦੇ ਹਨ। ਸਾਨੂੰ ਉਮੀਦ ਹੈ ਕਿ LifeVal ਉਸ ਟੀਚੇ ਵੱਲ ਵਧਾਇਆ ਗਿਆ ਇੱਕ ਕਦਮ ਸਾਬਤ ਹੋਵੇਗਾ।
