ਅੱਜ ਅਸੀਂ ਸਾਂਝਾ ਕਰ ਰਹੇ ਹਾਂ ਕਿ ਭੌਤਿਕ ਪ੍ਰੋਡਕਟਾਂ ਦੇ ਡਿਜ਼ਾਈਨ, ਸਿਮੂਲੇਸ਼ਨ ਅਤੇ ਨਿਰਮਾਣ ਵਿੱਚ ਇੰਜੀਨੀਅਰਾਂ ਦੀ ਮਦਦ ਕਰਨ ਲਈ OpenAI ਦੇ ਮਾਡਲਾਂ ਦੀਆਂ ਸਮਰੱਥਾਵਾਂ ਵਿੱਚ ਕਿਵੇਂ ਤਰੱਕੀ ਹੋਈ ਹੈ. ਇਹ ਸਮਰੱਥਾਵਾਂ ਮਕੈਨੀਕਲ ਅਤੇ ਇਲੈਕਟ੍ਰੀਕਲ ਇੰਜੀਨੀਅਰਿੰਗ ਤੋਂ ਲੈ ਕੇ ਸ਼ੁਰੂ ਤੋਂ ਅੰਤ ਤੱਕ ਸਿਸਟਮ ਡਿਜ਼ਾਈਨ ਤੱਕ ਫੈਲੀਆਂ ਹੋਈਆਂ ਹਨ ਅਤੇ ਪਹਿਲਾਂ ਹੀ ਸਾਡੀਆਂ ਅੰਦਰੂਨੀ ਟੀਮਾਂ ਨੂੰ ਵਿਚਾਰਾਂ ਦੀ ਜਾਂਚ ਕਰਨ ਅਤੇ ਤੇਜ਼ੀ ਨਾਲ ਦੁਹਰਾਅ ਰਾਹੀਂ ਸੁਧਾਰ ਕਰਨ ਵਿੱਚ ਮਦਦ ਕਰ ਰਹੀਆਂ ਹਨ.
ਇਨ੍ਹਾਂ ਪ੍ਰੋਜੈਕਟਾਂ ਦੌਰਾਨ, ਇੰਜੀਨੀਅਰਾਂ ਨੂੰ ਵਿਸ਼ੇਸ਼ ਟੂਲਾਂ ਦੀ ਵਰਤੋਂ ਕਰਕੇ ਮਕੈਨੀਕਲ ਡਿਜ਼ਾਈਨਾਂ, ਇਲੈਕਟ੍ਰੌਨਿਕਸ, ਸੌਫ਼ਟਵੇਅਰ ਅਤੇ ਮੈਨੂਫੈਕਚਰਿੰਗ ਦੀਆਂ ਲੋੜਾਂ ਨੂੰ ਇਕੱਠੇ ਜੋੜਨਾ ਪੈਂਦਾ ਹੈ. ਅਸੀਂ ਮਾਡਲਾਂ ਨੂੰ ਇਸ ਕੰਮ ਵਿੱਚ ਸਹਾਇਤਾ ਕਰਨ ਲਈ ਸਿਖਲਾਈ ਦੇ ਰਹੇ ਹਾਂ. ਇਸ ਵਿੱਚ ਡਰਾਇੰਗਾਂ ਤਿਆਰ ਕਰਨ ਅਤੇ ਸਿਮੂਲੇਸ਼ਨ ਸੈੱਟ ਅੱਪ ਕਰਨ ਤੋਂ ਲੈ ਕੇ ਵੱਖ-ਵੱਖ ਵਿਸ਼ਿਆਂ ਦੇ ਮਾਹਰਾਂ ਵਿਚਕਾਰ ਤਬਦੀਲੀਆਂ ਦਾ ਤਾਲਮੇਲ ਬਿਠਾਉਣਾ ਸ਼ਾਮਲ ਹੈ. ਸਾਡਾ ਉਦੇਸ਼ ਇੰਜੀਨੀਅਰਾਂ ਨੂੰ ਵਿਚਾਰਾਂ ਦੀ ਪੜਚੋਲ ਕਰਨ ਅਤੇ ਡਿਜ਼ਾਈਨਾਂ ਵਿੱਚ ਸੁਧਾਰ ਕਰਨ ਲਈ ਵਧੇਰੇ ਸਮਾਂ ਦੇਣਾ ਹੈ.
ਪਿਛਲੇ ਇੱਕ ਸਾਲ ਦੌਰਾਨ, ਅਤਿ-ਆਧੁਨਿਕ ਮਾਡਲਾਂ ਦੀਆਂ ਬਿਹਤਰ ਹੋਈਆਂ ਸਮਰੱਥਾਵਾਂ ਨੇ ਸਾਡੀਆਂ ਅੰਦਰੂਨੀ ਟੀਮਾਂ ਨੂੰ ਨਵੇਂ ਵਿਚਾਰਾਂ ਦੀ ਜਾਂਚ ਕਰਨ ਅਤੇ ਤੇਜ਼ੀ ਨਾਲ ਦੁਹਰਾਅ ਰਾਹੀਂ ਸੁਧਾਰ ਕਰਨ ਵਿੱਚ ਮਦਦ ਕੀਤੀ ਹੈ. ਹੁਣ ਸਾਨੂੰ ਇਸ ਗੱਲ ਦੇ ਸ਼ੁਰੂਆਤੀ ਸਬੂਤ ਵੀ ਮਿਲ ਰਹੇ ਹਨ ਕਿ ਇਹ ਸਮਰੱਥਾਵਾਂ ਉਦਯੋਗ ਵਿੱਚ ਪੇਸ਼ੇਵਰ ਵਰਕਫਲੋਜ਼ ਨੂੰ ਵੀ ਬਿਹਤਰ ਬਣਾ ਰਹੀਆਂ ਹਨ. ਅਸੀਂ ਸਹਿਯੋਗੀਆਂ ਨਾਲ ਮਿਲ ਕੇ ਇਹ ਸਮਝਣ ਲਈ ਕੰਮ ਕਰ ਰਹੇ ਹਾਂ ਕਿ ਇਹ ਸਮਰੱਥਾਵਾਂ ਕਿਹੜੇ ਖੇਤਰਾਂ ਵਿੱਚ ਸਭ ਤੋਂ ਵੱਧ ਫ਼ਰਕ ਪਾ ਸਕਦੀਆਂ ਹਨ ਅਤੇ ਇਨ੍ਹਾਂ ਵਿੱਚ ਹੋਰ ਕਿਹੜੇ ਸੁਧਾਰਾਂ ਦੀ ਲੋੜ ਹੈ. ਜੇ ਤੁਸੀਂ ਇੱਕ ਇੰਜੀਨੀਅਰ, ਇੰਜੀਨੀਅਰਿੰਗ ਫਰਮ ਜਾਂ ਸੌਫ਼ਟਵੇਅਰ ਵਿਕਰੇਤਾ ਹੋ ਅਤੇ ਜਟਿਲ ਭੌਤਿਕ ਪ੍ਰੋਡਕਟਾਂ ਦੇ ਡਿਜ਼ਾਈਨ, ਸਿਮੂਲੇਸ਼ਨ, ਮੈਨੂਫੈਕਚਰਿੰਗ ਜਾਂ ਪ੍ਰੋਡਕਸ਼ਨ ਨਾਲ ਜੁੜੇ ਹੋ, ਤਾਂ ਅਸੀਂ ਤੁਹਾਡੇ ਨਾਲ ਮਿਲ ਕੇ ਇਸ ਯਤਨ ਨੂੰ ਤੁਹਾਡੇ ਵੱਲੋਂ ਵਰਤੇ ਜਾਂਦੇ ਟੂਲਾਂ ਅਤੇ ਤੁਹਾਡੇ ਵੱਲੋਂ ਹੱਲ ਕੀਤੀਆਂ ਜਾਣ ਵਾਲੀਆਂ ਸਮੱਸਿਆਵਾਂ ਦੇ ਅਨੁਸਾਰ ਢਾਲਣਾ ਚਾਹਾਂਗੇ.
ਅਸੀਂ ਮਲਟੀਮੋਡਲ ਅਤੇ ਕੰਪਿਊਟਰ ਯੂਜ਼ ਵਰਕਫਲੋਜ਼ ਵਿੱਚ Astra ਦੀ ਅਤਿ-ਆਧੁਨਿਕ ਕਾਰਗੁਜ਼ਾਰੀ ਦੀ ਜਾਂਚ ਇਹ ਦੇਖ ਕੇ ਕੀਤੀ ਕਿ ਕੀ ਮਨੁੱਖ ਵੱਲੋਂ ਕੋਈ ਸਿੱਧੀ ਸੋਧ ਕੀਤੇ ਬਿਨਾਂ ਇੱਕ ਡਿਵਾਈਸ ਤਿਆਰ ਕੀਤਾ ਜਾ ਸਕਦਾ ਹੈ. ਇਸ ਲਈ, ਅਸੀਂ GPT‑6 ਦੀ ਵਰਤੋਂ ਕਰਕੇ ਕਾਰਜਾਤਮਕ ਲੋੜਾਂ ਨਿਰਧਾਰਤ ਕੀਤੀਆਂ ਅਤੇ ਉਸ ਡਿਵਾਈਸ ਨੂੰ ਬਣਾਉਣ ਲਈ ਲੋੜੀਂਦੇ ਐਨਕਲੋਜ਼ਰ, ਪ੍ਰਿੰਟਿਡ ਸਰਕਟ ਬੋਰਡ (PCB) ਅਤੇ ਸੌਫ਼ਟਵੇਅਰ ਇੰਟੀਗ੍ਰੇਸ਼ਨਾਂ ਦਾ ਡਿਜ਼ਾਈਨ ਤਿਆਰ ਕੀਤਾ, ਜਿਸ ਦੀ ਵਰਤੋਂ ਕਰਕੇ ਵਰਤੋਂਕਾਰ Codex ਨਾਲ ਗੱਲ ਕਰ ਸਕਦੇ ਹਨ.
ਸੁੰਦਰਤਾ ਅਤੇ ਡਿਜ਼ਾਈਨ: Astra ਨੇ ਡਿਵਾਈਸ ਦੀ ਦਿੱਖ ਵਿਕਸਿਤ ਕੀਤੀ, ਜਿਸ ਲਈ ਸਾਡੇ ਹਾਲ ਹੀ ਦੇ Work Louder(ਨਵੀਂ ਵਿੰਡੋ ਵਿੱਚ ਖੁੱਲ੍ਹਦਾ ਹੈ) ਸਹਿਯੋਗ ਅਤੇ ਗੇਮਾਂ ਤੇ ਖਿਡੌਣਿਆਂ ਤੋਂ ਲਏ ਗਏ ਹਵਾਲਿਆਂ ਨੂੰ ਆਧਾਰ ਬਣਾਇਆ ਗਿਆ.
ਮਕੈਨੀਕਲ ਡਿਜ਼ਾਈਨ: Astra ਨੇ ਐਨਕਲੋਜ਼ਰ(ਨਵੀਂ ਵਿੰਡੋ ਵਿੱਚ ਖੁੱਲ੍ਹਦਾ ਹੈ) ਅਤੇ ਉਨ੍ਹਾਂ ਅੰਦਰੂਨੀ ਬਣਤਰਾਂ ਦਾ ਡਿਜ਼ਾਈਨ ਤਿਆਰ ਕੀਤਾ ਜੋ ਪੁਰਜ਼ਿਆਂ ਨੂੰ ਉਨ੍ਹਾਂ ਦੀ ਥਾਂ 'ਤੇ ਟਿਕਾਈ ਰੱਖਦੀਆਂ ਹਨ.
ਇਲੈਕਟ੍ਰੀਕਲ ਡਿਜ਼ਾਈਨ: Astra ਨੇ ਇਲੈਕਟ੍ਰੌਨਿਕ ਪੁਰਜ਼ਿਆਂ ਦੀ ਚੋਣ ਕੀਤੀ ਅਤੇ ਐਨਕਲੋਜ਼ਰ ਦੇ ਅੰਦਰ ਫਿੱਟ ਹੋਣ ਲਈ ਪ੍ਰਿੰਟਿਡ ਸਰਕਟ ਬੋਰਡ (PCB) ਦਾ ਡਿਜ਼ਾਈਨ ਤਿਆਰ ਕੀਤਾ, ਜਿਸ ਵਿੱਚ ਪੁਰਜ਼ਿਆਂ ਦੀ ਪਲੇਸਮੈਂਟ ਅਤੇ ਉਨ੍ਹਾਂ ਦੇ ਕਨੈਕਸ਼ਨ ਵੀ ਸ਼ਾਮਲ ਸਨ.
UI/UX ਅਤੇ ਸੌਫ਼ਟਵੇਅਰ: Astra ਨੇ ਯੂਜ਼ਰ ਇੰਟਰਫੇਸ ਡਿਜ਼ਾਈਨ ਕੀਤਾ ਅਤੇ ਡਿਵਾਈਸ ਨੂੰ Codex ਨਾਲ ਕਨੈਕਟ ਕਰਨ ਲਈ ਲੋੜੀਂਦਾ ਫਰਮਵੇਅਰ ਅਤੇ ਸੌਫ਼ਟਵੇਅਰ ਇੰਟੀਗ੍ਰੇਸ਼ਨਾਂ ਤਿਆਰ ਕੀਤੀਆਂ.
ਟੀਮ ਦੇ ਦੋ ਮੈਂਬਰਾਂ ਨੇ ਸਾਈਡ ਪ੍ਰੋਜੈਕਟ ਵਜੋਂ ਇਸ 'ਤੇ ਕੰਮ ਕਰਦਿਆਂ Astra ਦੀ ਮਦਦ ਨਾਲ ਇੱਕ ਹਫ਼ਤੇ ਤੋਂ ਵੀ ਘੱਟ ਸਮੇਂ ਵਿੱਚ ਇਹ ਟੈਸਟ ਡਿਵਾਈਸ ਡਿਜ਼ਾਈਨ ਕੀਤਾ. ਇੱਕ ਕੰਟਰੈਕਟ ਮੈਨੂਫੈਕਚਰਰ ਨੇ ਇੱਕ ਮਹੀਨੇ ਤੋਂ ਵੀ ਘੱਟ ਸਮੇਂ ਵਿੱਚ ਪ੍ਰੋਟੋਟਾਈਪਾਂ ਦੀ ਇੱਕ ਛੋਟੀ ਖੇਪ ਤਿਆਰ ਕੀਤੀ.
ਡਿਵਾਈਸ ਨੂੰ ਮੈਨੂਫੈਕਚਰਿੰਗ ਲਈ ਤਿਆਰ ਕਰਨ ਵਾਸਤੇ ਫਿਰ ਵੀ ਸਮੀਖਿਆ ਅਤੇ ਦੁਹਰਾਅ ਰਾਹੀਂ ਸੁਧਾਰ ਦੇ ਕਈ ਦੌਰਾਂ ਦੀ ਲੋੜ ਪਈ. Astra ਨੇ ਨਿਰਮਾਤਾ ਦੀਆਂ ਪ੍ਰੋਡਕਸ਼ਨ ਸੀਮਾਵਾਂ, ਟੌਲਰੈਂਸਾਂ ਅਤੇ ਅਸੈਂਬਲੀ ਲਈ ਲੋੜੀਂਦੇ ਵੇਰਵਿਆਂ ਦਾ ਹਰ ਵਾਰ ਇਕਸਾਰ ਢੰਗ ਨਾਲ ਧਿਆਨ ਨਹੀਂ ਰੱਖਿਆ. ਇਹ ਕਮੀਆਂ ਸਾਨੂੰ ਇਹ ਪਛਾਣਨ ਵਿੱਚ ਮਦਦ ਕਰ ਰਹੀਆਂ ਹਨ ਕਿ ਭਵਿੱਖ ਦੇ ਮਾਡਲਾਂ ਨੂੰ ਕਿਹੜੇ ਪੱਖਾਂ ਵਿੱਚ ਹੋਰ ਬਿਹਤਰ ਬਣਨ ਦੀ ਲੋੜ ਹੈ.
OpenAI ਦੀਆਂ ਹਾਰਡਵੇਅਰ ਅਤੇ ਬੁਨਿਆਦੀ ਢਾਂਚੇ ਦੀਆਂ ਟੀਮਾਂ ਕੰਪਿਊਟਰ-ਸਹਾਇਤਾ ਪ੍ਰਾਪਤ ਡਿਜ਼ਾਈਨ (CAD) ਮਾਡਲ ਬਣਾਉਣ ਅਤੇ ਉਨ੍ਹਾਂ ਵਿੱਚ ਸੋਧ ਕਰਨ, ਮੈਨੂਫੈਕਚਰਿੰਗ ਡਰਾਇੰਗਾਂ ਤਿਆਰ ਕਰਨ, ਸਿਮੂਲੇਸ਼ਨ ਸੈੱਟ ਅੱਪ ਕਰਨ ਅਤੇ ਡਿਜ਼ਾਈਨਾਂ ਦੀ ਸਮੀਖਿਆ ਕਰਨ ਲਈ Codex ਅਤੇ ChatGPT ਦੀ ਵਰਤੋਂ ਕਰਦੀਆਂ ਹਨ. ਇਹ ਕੰਮ ਰੋਬੋਟਿਕਸ ਅਤੇ ਕੰਪਿਊਟ ਇੰਫਰਾਸਟ੍ਰਕਚਰ ਦੇ ਖੇਤਰਾਂ ਤੱਕ ਫੈਲਿਆ ਹੋਇਆ ਹੈ. ਫ਼ਰਵਰੀ ਤੋਂ, ਸਾਡੀਆਂ ਹਾਰਡਵੇਅਰ ਟੀਮਾਂ ਵਿੱਚ ਟੋਕਨਾਂ ਦੇ ਆਧਾਰ 'ਤੇ ਮਾਪੀ ਗਈ ਮਾਡਲਾਂ ਦੀ ਵਰਤੋਂ 23 ਗੁਣਾ ਵਧੀ ਹੈ.
ਅਸੀਂ ਕੋਡਿੰਗ ਅਤੇ ਇੰਜੀਨੀਅਰਿੰਗ ਦੇ ਗਿਆਨ ਨੂੰ ਜੋੜਨ ਵਾਲੀਆਂ ਟਾਸਕਾਂ ਵਿੱਚ ਨਵੇਂ ਮਾਡਲਾਂ ਦੀ ਪ੍ਰਗਤੀ ਵੀ ਮਾਪ ਰਹੇ ਹਾਂ. BenchCAD 2.0 ਇਹ ਪਰਖਦਾ ਹੈ ਕਿ ਕੀ ਮਾਡਲ 3D ਪੁਰਜ਼ਿਆਂ ਅਤੇ ਅਸੈਂਬਲੀਆਂ ਨੂੰ ਮੁੜ ਤਿਆਰ ਕਰ ਸਕਦੇ ਹਨ ਅਤੇ ਸਰਕਟ ਬੋਰਡਾਂ ਵਿੱਚ ਕਨੈਕਸ਼ਨਾਂ ਦੀ ਪਛਾਣ ਕਰ ਸਕਦੇ ਹਨ. ਇੱਕ ਨਵੇਂ ਅੰਦਰੂਨੀ ਮਾਡਲ ਨੇ 0.875 ਦਾ ਔਸਤ ਸਕੋਰ ਹਾਸਲ ਕੀਤਾ, ਜਦਕਿ GPT‑6 Astra ਨੇ ਆਪਣੀ ਸਭ ਤੋਂ ਉੱਚੀ ਰੀਜ਼ਨਿੰਗ ਸੈਟਿੰਗ 'ਤੇ 0.594 ਦਾ ਸਕੋਰ ਹਾਸਲ ਕੀਤਾ. ਭਾਵੇਂ ਇੰਜੀਨੀਅਰਿੰਗ ਦੇ ਪੂਰੇ ਜੀਵਨ ਚੱਕਰ ਵਿੱਚ ਡਿਜ਼ਾਈਨ ਤੋਂ ਇਲਾਵਾ ਵੀ ਕਈ ਹੋਰ ਪਹਿਲੂ ਸ਼ਾਮਲ ਹੁੰਦੇ ਹਨ, ਅਸੀਂ ਇਸ ਖੇਤਰ ਵਿੱਚ ਸਮਰੱਥਾਵਾਂ ਦੇ ਸੁਧਾਰ ਨੂੰ ਇਸ ਗੱਲ ਦਾ ਸ਼ੁਰੂਆਤੀ ਸਬੂਤ ਮੰਨਦੇ ਹਾਂ ਕਿ AI ਮਾਡਲ ਪੇਸ਼ੇਵਰ ਵਰਕਫਲੋਜ਼ ਵਿੱਚ ਦੁਹਰਾਅ ਰਾਹੀਂ ਸੁਧਾਰ ਦੀ ਗਤੀ ਨੂੰ ਸਕਾਰਾਤਮਕ ਤੌਰ 'ਤੇ ਪ੍ਰਭਾਵਿਤ ਕਰ ਸਕਦੇ ਹਨ.
ਅਸੀਂ ਇੰਜੀਨੀਅਰਿੰਗ ਦੀਆਂ ਅਸਲ ਸਮੱਸਿਆਵਾਂ 'ਤੇ ਇਨ੍ਹਾਂ ਸਮਰੱਥਾਵਾਂ ਦੀ ਜਾਂਚ ਕਰਨ ਲਈ ਉਦਯੋਗਿਕ ਸਹਿਯੋਗੀਆਂ ਦੇ ਇੱਕ ਛੋਟੇ ਸਮੂਹ ਨਾਲ ਕੰਮ ਕਰ ਰਹੇ ਹਾਂ. ਉਨ੍ਹਾਂ ਦੇ ਇੰਜੀਨੀਅਰ ਮਾਡਲਾਂ ਦੇ ਆਊਟਪੁੱਟ ਦੀ ਸਟੀਕਤਾ ਅਤੇ ਵਿਹਾਰਕ ਵਰਤੋਂ ਦੇ ਪੱਖੋਂ ਸਮੀਖਿਆ ਕਰਦੇ ਹਨ. ਇਸ ਨਾਲ ਸਾਨੂੰ ਇਹ ਸਮਝਣ ਵਿੱਚ ਮਦਦ ਮਿਲਦੀ ਹੈ ਕਿ ਮਾਡਲ ਇਸ ਸਮੇਂ ਕਿਹੜੀਆਂ ਟਾਸਕਾਂ ਵਿੱਚ ਸਹਾਇਤਾ ਕਰ ਸਕਦੇ ਹਨ ਅਤੇ ਸੁਰੱਖਿਅਤ ਤੇ ਭਰੋਸੇਯੋਗ ਵਰਤੋਂ ਲਈ ਕਿਹੜੇ ਸੁਧਾਰਾਂ ਦੀ ਲੋੜ ਹੈ.
ਅਸੀਂ Chip Ganassi Racing (CGR) ਨਾਲ ਆਪਣਾ ਸਹਿਯੋਗ ਵਧਾ ਰਹੇ ਹਾਂ, ਤਾਂ ਜੋ ਇਹ ਪਤਾ ਲਗਾਇਆ ਜਾ ਸਕੇ ਕਿ OpenAI ਦੇ ਮਾਡਲ ਇੰਜੀਨੀਅਰਿੰਗ ਅਤੇ ਪ੍ਰੋਟੋਟਾਈਪਿੰਗ ਦੀ ਪ੍ਰਕਿਰਿਆ ਨੂੰ ਕਿਵੇਂ ਤੇਜ਼ ਕਰ ਸਕਦੇ ਹਨ. ਇਸ ਦੀ R&D ਟੀਮ ਨਾਲ ਮਿਲ ਕੇ, ਅਸੀਂ ਅਜਿਹੇ ਵਰਕਫਲੋਜ਼ ਦੀ ਜਾਂਚ ਕਰ ਰਹੇ ਹਾਂ ਜੋ ਮੌਜੂਦਾ ਪੁਰਜ਼ਿਆਂ ਦੇ 3D ਸਕੈਨਾਂ ਨੂੰ ਸੋਧਣਯੋਗ CAD ਮਾਡਲਾਂ ਅਤੇ 2D ਮੈਨੂਫੈਕਚਰਿੰਗ ਡਰਾਇੰਗਾਂ ਵਿੱਚ ਬਦਲਦੇ ਹਨ. ਇਹ ਖ਼ਾਸ ਤੌਰ 'ਤੇ ਉਦੋਂ ਉਪਯੋਗੀ ਹੁੰਦਾ ਹੈ, ਜਦੋਂ ਅਸਲ ਡਿਜ਼ਾਈਨ ਫਾਈਲਾਂ ਉਪਲਬਧ ਨਹੀਂ ਹੁੰਦੀਆਂ.
CGR ਦੇ ਇੰਜੀਨੀਅਰ ਮਾਡਲਾਂ ਅਤੇ ਡਰਾਇੰਗਾਂ ਦੀ ਸਟੀਕਤਾ ਅਤੇ ਉਨ੍ਹਾਂ ਦੇ ਮੈਨੂਫੈਕਚਰਿੰਗ ਲਈ ਢੁੱਕਵੇਂ ਹੋਣ ਦੀ ਸਮੀਖਿਆ ਕਰਦੇ ਹਨ. ਉਨ੍ਹਾਂ ਦਾ ਫੀਡਬੈਕ ਸਾਨੂੰ ਇਹ ਪਛਾਣਨ ਵਿੱਚ ਮਦਦ ਕਰਦਾ ਹੈ ਕਿ ਮਾਡਲ ਕਿੱਥੇ ਹੱਥੀਂ ਕੀਤੇ ਜਾਣ ਵਾਲੇ ਕੰਮ ਨੂੰ ਘਟਾ ਸਕਦੇ ਹਨ ਅਤੇ ਕਿੱਥੇ ਹੋਰ ਸੁਧਾਰਾਂ ਦੀ ਲੋੜ ਹੈ.
ਅਸੀਂ Mazda ਨਾਲ ਇੱਕ ਨਵੇਂ ਖੋਜ ਸਹਿਯੋਗ ਦਾ ਐਲਾਨ ਵੀ ਕਰ ਰਹੇ ਹਾਂ. ਸਾਡੀਆਂ ਖੋਜ ਅਤੇ ਫਾਰਵਰਡ ਡਿਪਲੌਏਡ ਇੰਜੀਨੀਅਰਿੰਗ ਟੀਮਾਂ Mazda ਦੇ ਹਵਾਗਤੀ ਅਤੇ ਟੱਕਰ ਸੁਰੱਖਿਆ ਇੰਜੀਨੀਅਰਾਂ ਨਾਲ ਮਿਲ ਕੇ ਇਹ ਪਤਾ ਲਗਾਉਣ ਲਈ ਕੰਮ ਕਰ ਰਹੀਆਂ ਹਨ ਕਿ OpenAI ਦੇ ਮਾਡਲ ਵਾਹਨਾਂ ਦੇ ਨਵੇਂ ਡਿਜ਼ਾਈਨਾਂ ਨੂੰ ਵਿਕਸਿਤ ਕਰਨ ਅਤੇ ਉਨ੍ਹਾਂ ਦਾ ਮੁਲਾਂਕਣ ਕਰਨ ਵਿੱਚ ਕਿਵੇਂ ਮਦਦ ਕਰ ਸਕਦੇ ਹਨ.
ਇਸ ਕੰਮ ਵਿੱਚ ਹਵਾ ਦੇ ਵਹਾਅ ਅਤੇ ਢਾਂਚਾਗਤ ਵਿਹਾਰ ਦੀਆਂ ਸਿਮੂਲੇਸ਼ਨਾਂ ਦੀ ਵਰਤੋਂ ਕਰਕੇ ਡਿਜ਼ਾਈਨ ਦੀ ਦਿੱਖ ਅਤੇ ਲਾਗਤ ਦਾ ਧਿਆਨ ਰੱਖਦਿਆਂ ਕਾਰਗੁਜ਼ਾਰੀ ਵਿੱਚ ਸੁਧਾਰ ਕਰਨ ਦੇ ਤਰੀਕਿਆਂ ਦੀ ਪੜਚੋਲ ਕੀਤੀ ਜਾਂਦੀ ਹੈ. ਆਉਣ ਵਾਲੇ ਮਹੀਨਿਆਂ ਵਿੱਚ ਅਸੀਂ ਇਸ ਸੰਬੰਧੀ ਹੋਰ ਪ੍ਰਗਤੀ ਅਤੇ ਨਤੀਜੇ ਸਾਂਝੇ ਕਰਾਂਗੇ.
GPT‑6 Astra ਅਗਲੇ ਸਿਰੇ ਦੇ ਨਵੇਂ ਆਕਾਰਾਂ ਦੀ ਮਾਡਲਿੰਗ ਕਰਨ, ਹਵਾ ਦੇ ਵਹਾਅ ਦੀ ਸਿਮੂਲੇਸ਼ਨ ਕਰਨ ਅਤੇ ਸਭ ਤੋਂ ਵਧੀਆ ਸੰਭਾਵਨਾਵਾਂ ਵਾਲੇ ਡਿਜ਼ਾਈਨਾਂ ਨੂੰ ਹੋਰ ਬਿਹਤਰ ਬਣਾਉਣ ਰਾਹੀਂ Mazda ਦੇ ਹਵਾਗਤੀ ਇੰਜੀਨੀਅਰਾਂ ਨੂੰ ਵਾਹਨ ਦੇ ਹਵਾ ਪ੍ਰਤੀ ਰੋਧ ਨੂੰ ਘਟਾਉਣ ਦੇ ਤਰੀਕੇ ਖੋਜਣ ਵਿੱਚ ਮਦਦ ਕਰਦਾ ਹੈ. ਇਸ ਦੀ ਵਰਤੋਂ ਲਈ Mazda Motor Corporation ਤੋਂ ਸਹਿਮਤੀ ਪ੍ਰਾਪਤ ਕੀਤੀ ਗਈ ਹੈ. ਕਿਸੇ ਹੋਰ ਥਾਂ ਮੁੜ ਪ੍ਰਕਾਸ਼ਿਤ ਕਰਨਾ ਜਾਂ ਦੁਬਾਰਾ ਵਰਤਣਾ ਸਖ਼ਤ ਮਨ੍ਹਾ ਹੈ.
ਅਸੀਂ ਹਾਰਡਵੇਅਰ ਅਤੇ ਮੈਨੂਫੈਕਚਰਿੰਗ ਵਿੱਚ AI ਏਜੰਟਾਂ ਦੀਆਂ ਸਮਰੱਥਾਵਾਂ ਦੀਆਂ ਹੱਦਾਂ ਨੂੰ ਅੱਗੇ ਵਧਾਉਣ ਲਈ ਉਦਯੋਗਿਕ ਭਾਈਵਾਲਾਂ ਅਤੇ ਸ਼ੁਰੂਆਤੀ ਵਰਤੋਂਕਾਰਾਂ ਨਾਲ ਨੇੜਿਓਂ ਮਿਲ ਕੇ ਕੰਮ ਕਰ ਰਹੇ ਹਾਂ. ਇਨ੍ਹਾਂ ਸ਼ੁਰੂਆਤੀ ਨਤੀਜਿਆਂ ਨੇ ਕਾਫ਼ੀ ਉਮੀਦਜਨਕ ਸੰਭਾਵਨਾਵਾਂ ਦਿਖਾਈਆਂ ਹਨ. ਹੁਣ ਅਸੀਂ ਅਜਿਹੇ ਸਹਿਯੋਗੀਆਂ ਦੀ ਭਾਲ ਕਰ ਰਹੇ ਹਾਂ ਜੋ ਇਨ੍ਹਾਂ ਸਮਰੱਥਾਵਾਂ ਵਿੱਚ ਸੁਧਾਰ ਦੀ ਪ੍ਰਕਿਰਿਆ ਨੂੰ ਤੇਜ਼ ਕਰਨ ਅਤੇ ਉਦਯੋਗ ਵਿੱਚ ਇਨ੍ਹਾਂ ਦੀ ਸੁਰੱਖਿਅਤ ਡਿਪਲੌਇਮੈਂਟ ਯਕੀਨੀ ਬਣਾਉਣ ਵਿੱਚ ਸਾਡੀ ਮਦਦ ਕਰ ਸਕਣ.
ਜੇ ਤੁਸੀਂ ਮਕੈਨੀਕਲ ਇੰਜੀਨੀਅਰਿੰਗ, ਇਲੈਕਟ੍ਰੀਕਲ ਇੰਜੀਨੀਅਰਿੰਗ, ਇਲੈਕਟ੍ਰੋਮਕੈਨੀਕਲ ਡਿਜ਼ਾਈਨ, ਮੈਕਾਟ੍ਰੋਨਿਕਸ ਜਾਂ ਕਿਸੇ ਸੰਬੰਧਿਤ ਖੇਤਰ ਵਿੱਚ ਉੱਚ-ਮੁੱਲ ਵਾਲੇ ਵਰਤੋਂ ਦੇ ਮਾਮਲਿਆਂ, ਸੌਫ਼ਟਵੇਅਰ ਟੂਲਾਂ ਜਾਂ ਭਵਿੱਖ ਦੇ ਮੌਕਿਆਂ ਦੀ ਪਛਾਣ ਕਰਕੇ ਸਾਡੇ ਅਤਿ-ਆਧੁਨਿਕ ਮਾਡਲਾਂ ਦੀ ਸਿਖਲਾਈ ਅਤੇ ਵਿਕਾਸ ਨੂੰ ਦਿਸ਼ਾ ਦੇਣ ਲਈ ਸਾਡੇ ਨਾਲ ਕੰਮ ਕਰਨ ਵਿੱਚ ਦਿਲਚਸਪੀ ਰੱਖਦੇ ਹੋ, ਤਾਂ ਕਿਰਪਾ ਕਰਕੇ ਇਹ ਫਾਰਮ ਭਰੋ. ਅਸੀਂ ਤੁਹਾਡੇ ਨਾਲ ਸੰਪਰਕ ਕਰਾਂਗੇ.
