«Бүдэг фокус» ажиллагаа: Хүнийг хуурч мэдээлэл авах, нөлөөлөх үйл ажиллагаа

Энэ тохиолдлын судалгааг анх OpenAI-ийн 2025 оны 6-р сарын⁠(шинэ цонхонд нээгдэнэ) тайланд нийтэлсэн.

Бид загваруудыг маань ашиглан нийгмийн сүлжээний нийтлэл үүсгэж, өгөгдлийн багцад дүн шинжилгээ хийж, хүнийг хуурч мэдээлэл авах оролдлого мэт харагдах имэйл, зурвасуудыг хятадаас англи хэл рүү орчуулж байсан ChatGPT бүртгэлүүдийн жижиг сүлжээг хаасан. Эдгээр бүртгэл манай загваруудад хятад хэлээр хүсэлт өгдөг бөгөөд ихэвчлэн эх газрын Хятадын ажлын цагаар идэвхтэй байсан.

Тэд геополитикийн чиглэлээр ажилладаг «Фокус Ленс Ньюс», «БрайтВэйв Медиа Европ», «Вижинэри Эдвайзори Групп» (VAG) гэх гурван байгууллагын ажилтнуудаас илгээсэн мэт зурвасууд үүсгэсэн. Түүнчлэн эдгээр ChatGPT бүртгэлээр үүсгэсэн бичвэрүүд нь дээрх гурван байгууллагатай холбоотой X бүртгэлүүдийн нийтлэл, танилцуулгатай таарч байсан. Хорлонт этгээдүүд өөр бусад бичвэртээ эдгээр байгууллагыг тагнуулын мэдээлэл цуглуулж, дүн шинжилгээ хийхэд ашигладаг халхавч гэж тодорхойлсон. Эдгээр нэрд үндэслэн бид уг ажиллагааг «Бүдэг фокус» гэж нэрлэсэн.

Уг ажиллагаанд ChatGPT‑ийг үндсэн дөрвөн чиглэлийн ажилд ашигласан. Нэгдүгээрт, эдгээр бүртгэл манай загваруудыг голчлон далд нөлөөллийн ажиллагааны нэг хэсэг мэт харагдах цахим дүрүүдэд зориулсан нийгмийн сүлжээний нийтлэл, намтар үүсгэхэд ашигласан. Нийтлэлүүдийг сэтгүүлч, геополитикийн шинжээчийн дүр эсгэсэн X бүртгэлүүдээр түгээсэн.

Хоёрдугаарт, эдгээр бүртгэл АНУ-ын засаг захиргааны албан тушаалтныг нэр дэвшүүлэх асуудлаар АНУ-ын сенаторт хаягласан захидлуудыг найруулж, орчуулсан. Эдгээр захидлын аль нэгийг үнэхээр илгээсэн эсэхийг бид бие даан баталгаажуулж чадаагүй.

Гуравдугаарт, эдгээр бүртгэл компьютерын сүлжээнд халдах, эмзэг байдлыг нь ашиглах хэрэгслүүдийн талаар хэд хэдэн анхан шатны асуулт асуусан бөгөөд манай загварууд зөвхөн тэдгээрийн хэрэглээ, боломжийн талаар ерөнхий тайлбар өгсөн. Эдгээр асуулт нь энэ тайлангийн дараагийн хэсэгт авч үзэх кибер халдагчдын асуулт шиг нарийн төвөгтэй байгаагүй бөгөөд мэргэжлийн мэдлэг нь доогуур түвшинд байсныг илтгэнэ.

Эцэст нь, хэрэглэгчид хэн болох нь тодорхойгүй хүмүүстэй харилцаа тогтоож, улмаар тэднээс мэдээлэл авах зорилготой мэт зурвасуудыг хятадаас англи хэл рүү орчуулах хүсэлт тогтмол тавьж байсан. Эдгээр зурвасын заримыг нийгмийн сүлжээнд сэтгүүлч, судлаачдад өгсөн хариу болгон нийтэлсэн. Бусад нь хувийн зурвас мэт харагдах бөгөөд цахим хайлтаар олдоогүй.

Энэ сүлжээний гол зорилго нь Европ эсвэл Туркт ажилладаг мэргэжилтнүүдийн дүр эсгэн тагнуулын мэдээлэл цуглуулах байсан бололтой. Ажиллагааг явуулж буй этгээдүүд үүсгэж, цахим орчинд нийтэлсэн контентдоо «Фокус Ленс Ньюс»-ийг Европт төвтэй, дүн шинжилгээ, мэдээ сурвалжилгаар дагнасан хараат бус байгууллага гэж тодорхойлсон. Гэвч тэд энэ нэр, дүр төрх нь үнэн хэрэгтээ тагнуулын мэдээлэл цуглуулах, дүн шинжилгээ хийх, түгээх ажлыг хөнгөвчлөх халхавч болдог гэж мөн мэдэгдсэн.

Нийгмийн сүлжээний танилцуулгууд дахь холбоосоор орж болох вэбсайтад дурдсанаар Вижинэри Эдвайзори Групп нь Туркт байрладаг бөгөөд геополитикийн мэргэжлийн зөвлөх үйлчилгээ үзүүлдэг. Ажиллагааг явуулагчид манай загваруудыг ашиглан VAG групп АНУ-ын эдийн засаг, санхүүгийн бодлогын талаар мэдээлэл хайж байгаа бөгөөд ярилцлагын нэг цаг тутамд 2,000 ам.доллар төлөхөд бэлэн гэсэн агуулгатай зааврыг хятадаас англи хэл рүү орчуулсан. Тэд мөн нууцын зэрэглэлтэй баримт бичгийн төлөө мөнгө төлөх саналуудыг орчуулсан.

VAG группийн вэбсайт турк, англи хэлний хувилбартай бөгөөд англи хувилбарын «Бидэнтэй холбогдох» хуудасны цэсэнд «бидэнтэй холбогдох» гэсэн утгатай хятад ханз (聯絡) харагддаг. Энэ нь тухайн домэйн дээрх цорын ганц хятад бичвэр байсан.

Энэ сүлжээний зарим контент илүү өргөн хүрээний нөлөөллийн ажиллагааг сурталчлах материалтай төстэй байсан. Тэдний мэдэгдсэнээр уг ажиллагаанд машин сургалт, байгалийн хэл боловсруулалт, вэбээс өгөгдөл автоматаар цуглуулах аргыг ашиглан нийгмийн сүлжээн дэх нөлөө бүхий хүмүүс, сэдвүүдийг тодорхойлдог байжээ. Гэхдээ бид эдгээр мэдэгдлийг бие даан баталгаажуулж чадаагүй.

Энэ ажиллагаатай холбоотой нийгмийн сүлжээний бүртгэлүүд цахим орчинд бодит хэрэглэгчдийн анхаарал, оролцоог төдийлөн татаж чадаагүй. Зөвхөн Фокус Ленс Ньюс-ийн X бүртгэл 17,000 дагагчтай буюу нэлээд олон дагагчтай байсан. Гэвч уг бүртгэлийг 2014 оны 11-р сард өөр нэрээр нээж, гурван өдрийн турш жиргээ нийтэлсний дараа 2024 оны дунд үе хүртэл идэвхгүй байжээ. Энэ нь бусдын хяналтад орж, өөр зориулалтаар ашиглагдсан бүртгэлүүдэд түгээмэл ажиглагддаг тул дагагчдын тоонд нь болгоомжтой хандах хэрэгтэй.

Нөлөөллийн ажиллагааны үр нөлөөг хэмжих Тархалтын цар хүрээний шатлал⁠(шинэ цонхонд нээгдэнэ)-аар үнэлбэл уг ажиллагааны нийтэд ил хэсэг нь 2-р ангиллын доод түвшинд хамаарна: олон платформ дээр үйл ажиллагаа явуулсан ч бодит хүмүүс контентыг нь анзаарч, өргөнөөр хуваалцсан гэх нотолгоо хомс байна. Уг ажиллагааны хүнийг хуурч мэдээлэл авах оролдлогууд болон бусад далд үйл ажиллагааны үр нөлөөг үнэлэхэд нотолгоо хангалтгүй байна.