LifeVal
ხელოვნური ინტელექტის პროგრესის გაზომვა ყოველდღიური ცხოვრებისთვის მნიშვნელოვან ამოცანებში.
OpenAI-ს მისიაა, უზრუნველყოს, რომ ზოგადი ხელოვნური ინტელექტი მთელი კაცობრიობისთვის სასარგებლო იყოს. დღეს ChatGPT‑ს ყოველკვირეულად მილიარდზე მეტი ადამიანი იყენებს. მათთვის გვინდა შევქმნათ ხელოვნური ინტელექტი, რომელიც ხელს შეუწყობს ისეთი ყოველდღიური პრაქტიკული საკითხების მოგვარებას, როგორიცაა ბავშვის მოვლის სერვისის მოძიება, სახელმწიფო სერვისებით სარგებლობა, ბიუჯეტის შედგენა, სკოლისთვის მომზადება, რეცეპტების შეცვლა, სურსათის შეკვეთა, ვარჯიშის გეგმის შედგენა და სხვა.
როცა ადამიანს ცხოვრების გამარტივებაში დახმარება სჭირდება, მხოლოდ რჩევა ან ჩატში მიღებული პასუხი საკმარისი არ არის. ნამდვილად სასარგებლო პირადი ასისტენტი რომ იყოს, ChatGPT‑ს უნდა შეეძლოს ისეთი ქმედებების განხორციელება, რომლებიც საქმეს რეალურად ასრულებს.
ყოველდღიურ ამოცანებში მოდელების შედეგების დროთა განმავლობაში გასაზომად შევქმენით შეფასების სისტემა, რომელიც მოიცავს იმ სფეროების ამოცანებს, სადაც მომხმარებლებს ყველაზე მეტად სურდათ ხელოვნური ინტელექტისა და პირადი აგენტების დახმარება. გასული წლის განმავლობაში ამ შეფასების სისტემას ყოველდღიურ ამოცანებში მოდელების შედეგებზე დასაკვირვებლად და მათ გასაუმჯობესებლად ვიყენებდით.
კონტექსტი
იმის დასადგენად, თუ რომელ ამოცანებს ანიჭებენ ადამიანები ყველაზე დიდ მნიშვნელობას, დავეყრდენით ორ ფართომასშტაბიან კვლევას, რომლებიც შეისწავლის, როგორ ანაწილებენ ადამიანები დროს აშშ-სა და სხვა ქვეყნებში: ამერიკელთა დროის გამოყენების კვლევას(იხსნება ახალ ფანჯარაში) და დროის გამოყენების მრავალეროვნულ კვლევას(იხსნება ახალ ფანჯარაში). ერთად ეს მონაცემები ქმნის ყოველდღიური საქმიანობის დეტალურ ჩამონათვალს სხვადასხვა დემოგრაფიული ჯგუფის, დღის მონაკვეთისა და სეზონის მიხედვით. იმის გასაგებად, თუ რაში იქნებოდა ადამიანებისთვის ხელოვნური ინტელექტის დახმარება ყველაზე ღირებული, ამ კვლევებს დავამატეთ ახალი, დემოგრაფიულად რეპრეზენტაციული გამოკითხვა, რომელშიც 3 995 რესპონდენტი მონაწილეობდა. თითოეულ ამოცანაზე სხვადასხვა კითხვას ვსვამდით იმის დასადგენად, თუ რაში სურდათ ჩვეულებრივ ადამიანებს პირადი ასისტენტის დახმარება ყველაზე მეტად. შედეგად შერჩეული ამოცანები მოიცავს ყველაზე მნიშვნელოვან სფეროებს, რომლებშიც ადამიანებს დახმარება სურთ: სხვაზე ზრუნვას, ჯანმრთელობას, განათლებას, საოჯახო საქმეების მართვას, პირად ფინანსებს, საყიდლებსა და სახელმწიფო სერვისებით სარგებლობას.
ცალკეული ამოცანების მაგალითები
ქვემოთ მოცემულია მაგალითები, თუ როგორ ასრულებს ჩვენი ამჟამინდელი მოდელები ყოველდღიურ პრაქტიკულ ამოცანებს.
ახალ საცხოვრებელში გადასვლის შემდეგ ბავშვის შეყვანა შესაფერის ბაღში
შეადარე ჩვენს ახალ სახლთან ახლოს მდებარე საბავშვო ბაღები და შეარჩიე ყველაზე შესაფერისი ვარიანტები.
სამი საბავშვო ბაღი შევარჩიე და ჩარიცხვის შესახებ ინფორმაცია მოვაწესრიგე. ორ საკითხში ჯერ კიდევ თქვენ უნდა გადაწყვიტოთ, რას ანიჭებთ უპირატესობას. გსურთ, შერჩეულ სიას გადახედოთ?
მოხალისეების კოორდინირება წყალდიდობის წინ
დამეხმარე ჩვენი თემის მოხალისეთა ჯგუფის ორგანიზებაში წყალდიდობისთვის მოსამზადებლად — ოთხ მეზობელს სახლების დატბორვისგან დაცვაში დახმარება სჭირდება.
მოვამზადე მარტივი სამოქმედო გეგმა, რომელიც მოხალისეებს აღნიშნული ადგილების შეფასებასა და მოსალოდნელი უამინდობისთვის მომზადებაში დაეხმარება.
იპოვე ახალი სახლი ჩემი ოჯახისთვის
იპოვე სახლი ლუზერნის ოლქში, რომელიც ჩემს ბიუჯეტში ჩაეტევა, ცალკე საცხოვრებელი ერთეული ექნება და სკოლაში ბავშვის დატოვების შემდეგ სამსახურამდე მისვლა დიდ დროს არ წამართმევს. საკუთრების საბუთი კალათაში დაამატე, რომ გადავხედო.
ვიპოვე ერთი სახლი, რომელიც თქვენს მოთხოვნებს აკმაყოფილებს. გამოვთვალე საკუთრების გადაცემის გადასახადი და საკუთრების საბუთი ოლქის რეესტრის კალათაში დავამატე, რომ გადახედოთ.
თამაშის ყურება ბებიასთან ერთად დისტანციურად
მომიმზადე მარტივი გზა, რომ მე და ბებიამ თამაშს ერთად, დისტანციურად ვუყუროთ.
ყურების უმარტივესი ვარიანტი მზადაა; თუ ტრანსლაცია შეფერხდება, სათადარიგო ვარიანტიც გვაქვს. გსურთ, თქვენ და ბებიას ნაბიჯ-ნაბიჯ აგიხსნათ?
საკვების მომზადება მშობლისთვის, რომელიც დიაბეტის ახალ დიაგნოზს ეგუება
დაეხმარე ჩემს მშობელს ახლახან დასმულ დიაბეტის დიაგნოზთან შეგუებაში — შეუდგინე მოვლისა და კვების პრაქტიკული გეგმა.
პირველი კვირის გეგმა მზადაა: კვება, შეხსენებები და კითხვები მკურნალი გუნდისთვის. გსურთ, რომ ერთად გადავხედოთ, სანამ მშობელს გაუზიარებთ?
ჩვენი უახლესი მოდელები LifeVal-ის მრავალ ამოცანაში ძალიან მაღალ შეფასებებს იღებს.
გასული წლის განმავლობაში ჩვენი მოდელები ისე გავწვრთენით, რომ ბრაუზერის, კომპიუტერისა და მაერთებლების გამოყენებასთან დაკავშირებული ამოცანების შესრულებისას გაცილებით მეტი სისწრაფე, სიმძლავრე და თანხვედრილობა აჩვენოს. ChatGPT‑ში ამ შესაძლებლობების ჩართვა ასევე აფართოებს იმ ამოცანების წრეს, რომელთა შესრულებაშიც მოდელს დახმარება შეუძლია. შედეგად, ChatGPT უბრალო სასაუბრო ხელსაწყოს სცდება და დამოუკიდებლად მოქმედ პირად ასისტენტად ყალიბდება.
რატომ არის ეს მნიშვნელოვანი
იმისთვის, რომ AGI მთელი კაცობრიობისთვის სასარგებლო იყოს, მოდელების პროგრესი უნდა გავზომოთ და გავაუმჯობესოთ იმ საკითხებში, რომლებიც ჩვეულებრივი ადამიანების ცხოვრებაში მნიშვნელოვანია. ეს ნიშნავს, რომ მოდელების ცოდნის აკადემიურ შეფასებებს უნდა გავცდეთ და რეალურად გავზომოთ, რამდენად კარგად ეხმარება ხელოვნური ინტელექტის მოდელები ადამიანებს გადაწყვეტილებების მიღებაში, ყოველდღიურ მოვალეობებთან გამკლავებასა და მნიშვნელოვანი საქმეების შესრულებაში. იმედი გვაქვს, რომ LifeVal ამ მიზნისკენ გადადგმული ნაბიჯია.
