OpenAI-ს წესდება

ეს დოკუმენტი ასახავს სტრატეგიას, რომელიც ბოლო ორი წლის განმავლობაში დავხვეწეთ, მათ შორის OpenAI-ის შიდა და გარე წყაროებიდან მიღებული მრავალი ადამიანის უკუკავშირს. AGI-მდე მისვლის ვადები კვლავ გაურკვეველია, თუმცა ჩვენი წესდება იქნება ჩვენი გზამკვლევი, რათა მისი განვითარების მთელ პროცესში კაცობრიობის საუკეთესო ინტერესებიდან გამომდინარე ვიმოქმედოთ.

OpenAI-ის მისიაა უზრუნველყოს, რომ ხელოვნურმა ზოგადმა ინტელექტმა (AGI) — რაც ჩვენი განმარტებით გულისხმობს მაღალავტონომიურ სისტემებს, რომლებიც ადამიანებს სჯობნიან ეკონომიკურად ყველაზე ღირებული სამუშაოების უმეტესობაში — სარგებელი მოუტანოს მთელ კაცობრიობას. ჩვენ შევეცდებით პირდაპირ ავაგოთ უსაფრთხო და სასარგებლო AGI, თუმცა ჩვენს მისიას შესრულებულად ჩავთვლით იმ შემთხვევაშიც, თუ ჩვენი ნამუშევარი სხვებს დაეხმარება ამ შედეგის მიღწევაში. ამ მიზნით, ჩვენ ვიღებთ ვალდებულებას, დავიცვათ შემდეგი პრინციპები:

ჩვენ მოწადინებული ვართ, რომ ნებისმიერი გავლენა, რომელსაც AGI-ს დანერგვაზე მოვიპოვებთ, გამოვიყენოთ ყველას სასარგებლოდ და თავი ავარიდოთ AI-ს ან AGI-ს ისეთ გამოყენებას, რომელიც ზიანს მიაყენებს კაცობრიობას ან გამოიწვევს ძალაუფლების არამართლზომიერ კონცენტრაციას.

ჩვენი მთავარი ფიდუციური ვალდებულება კაცობრიობის წინაშეა. ჩვენ ვვარაუდობთ, რომ ჩვენი მისიის შესასრულებლად მნიშვნელოვანი რესურსების მობილიზება დაგვჭირდება, თუმცა ყოველთვის გულმოდგინედ ვიმოქმედებთ იმისათვის, რომ მინიმუმამდე დავიყვანოთ ინტერესთა კონფლიქტი ჩვენს თანამშრომლებსა და დაინტერესებულ მხარეებს შორის, რომელმაც შესაძლოა საფრთხე შეუქმნას საყოველთაო სარგებელს.

ჩვენ ვალდებულნი ვართ ჩავატაროთ AGI-ის უსაფრთხოების უზრუნველსაყოფად საჭირო კვლევა და ხელი შევუწყოთ ასეთი კვლევის ფართო დანერგვას AI  საზოგადოების ფარგლებში.

ჩვენ გვაშფოთებს, რომ AGI-ს განვითარების დასკვნითი ეტაპი შეიძლება გადაიქცეს კონკურენტულ რბოლად, რაც არ დატოვებს დროს უსაფრთხოების ადეკვატური ზომების მისაღებად. ამიტომ, თუ ღირებულებებთან თავსებადი და უსაფრთხოებაზე ორიენტირებული პროექტი ჩვენზე ადრე მიუახლოვდება AGI-ს შექმნას, ჩვენ ვიღებთ ვალდებულებას, შევწყვიტოთ მასთან კონკურენცია და დავიწყოთ ამ პროექტის დახმარება. სპეციფიკურ დეტალებს თითოეულ შემთხვევაში ცალკეული შეთანხმებებით დავადგენთ, თუმცა ტიპური მაპროვოცირებელი პირობა შეიძლება იყოს „„მომდევნო ორი წლის განმავლობაში წარმატების მიღწევის საუკეთესო შანსი“.

იმისათვის, რომ ეფექტურად მართოს AGI-ს გავლენა საზოგადოებაზე, OpenAI უნდა იყოს ხელოვნური ინტელექტის შესაძლებლობების მოწინავე პოზიციებზე — მხოლოდ პოლიტიკისა და უსაფრთხოების ადვოკატირება არასაკმარისი იქნება.

ჩვენ გვჯერა, რომ ხელოვნურ ინტელექტს ექნება ფართო სოციალური გავლენა AGI-მდე, და ჩვენ ვეცდებით ვიყოთ ლიდერები იმ სფეროებში, რომლებიც პირდაპირ შეესაბამება ჩვენს მისიასა და ექსპერტიზას.

ჩვენ აქტიურად ვითანამშრომლებთ სხვა კვლევით და პოლიტიკის ინსტიტუტებთან; ჩვენ ვცდილობთ შევქმნათ გლობალური საზოგადოება, რომელიც ერთად იმუშავებს AGI-ის გლობალური გამოწვევების გადასაჭრელად.

ჩვენ ვალდებულნი ვართ შევქმნათ საზოგადოებრივი სიკეთე, რომელიც დაეხმარება საზოგადოებას AGI-სკენ მიმავალ გზაზე ორიენტირებაში. დღეს ეს მოიცავს ჩვენი AI კვლევების უმეტესობის გამოქვეყნებას, თუმცა ვვარაუდობთ, რომ მომავალში უსაფრთხოებისა და დაცულობის საკითხები შეამცირებს ტრადიციულ პუბლიკაციებს, ამავდროულად კი გაზრდის უსაფრთხოების, პოლიტიკისა და სტანდარტების  კვლევების გაზიარების მნიშვნელობას.