Franklin Templeton․ ներդրումների վերլուծություն OpenAI-ով

Franklin Templeton-ը ցանկանում է, որ ԱԲ-ն օգնի պորտֆելների կառավարիչներին ուսումնասիրել հետազոտական տարբեր տեսակետներ և ներդրումային գաղափարի հետ կապված ռիսկերը։ Codex-ն այն գործիքներից է, որոնցով մեր ներդրումային թիմերը մշակում են ներդրումային հետազոտությունների աշխատանքային գործընթացներ։

Երբ Franklin Templeton-ն առաջին անգամ փորձեց կիրառել ԱԲ-ն, թիմը տվյալները տեղադրեց տվյալների բազայում և մոդելները միացրեց դրան։ Սակայն թիմերը չստացան իրենց անհրաժեշտ պատասխանները, քանի որ մոդելները չէին հասկանում տվյալների միջև կապերը։ Արդյունքները փոխվեցին, երբ թիմն ավելացրեց գործակալներ և իմաստային շերտ՝ կառուցվածքային մոդել, որը ներկայացնում է ընկերության տվյալների նշանակությունն ու դրանց փոխկապակցվածությունը։ Թիմն օգտագործում է Codex-ը և այլ գործիքներ՝ այս փոխկապակցված վերլուծական շերտը մշակելու համար։ «Մեզ հաջողվել է կառուցել այն, ինչը մենք համարում ենք փոխկապակցված վերլուծական շերտ»,— ասում է Դադլին։ «Մենք տվյալները ներմուծում ենք գործիքների մեջ և բացահայտում եզրահանգումներ, որոնք իրական նշանակություն ունեն»։

Հետազոտության, ռիսկերի, կարգավորիչ պահանջների պահպանման և առևտրի գործառույթները ներդրումը դիտարկում են տարբեր տեսանկյուններից։ Franklin Templeton-ի նպատակն է համախմբել այդ տեղեկությունները պորտֆելների կառավարիչների համար։ «Մենք կարողանում ենք հավաքել այդ ամենը, ապա դրա հիման վրա արժեքավոր եզրահանգումներ ներկայացնել որոշում կայացնողներին՝ մեր պորտֆելների կառավարիչներին»,— ասում է Դադլին։

Դադլին բաժնետոմսերի հետազոտության նախկին գործընթացը նկարագրում է որպես մարդու ղեկավարած, հաջորդական աշխատանք. վերլուծաբանն իրականացնում է բաժնետոմսի նախնական վերլուծություն, ուսումնասիրում ֆինանսական արդյունքների քննարկումները և գործունեության յուրաքանչյուր ուղղության մրցակիցներին։ Նպատակը օգտակար տեղեկություններ բացահայտելն է, երբ վերլուծաբանները նոր գաղափարներ են պատրաստում պորտֆելների կառավարիչներին ներկայացնելու համար կամ թարմ տեղեկություններ են տրամադրում պորտֆելում առկա դիրքերի վերաբերյալ։ Ինչպես ինքն է ասում. «Սա պարզապես շարունակական վերլուծություն է՝ համադրված մարդկային դատողության հետ»։

Franklin Templeton-ի պատկերացրած աշխատանքային գործընթացում ներդրումային թիմերը կօգտվեն վերահսկվող, բազմակի օգտագործման վերլուծական հիմքից։ Այն կմիավորի վստահելի միակցիչները, պորտֆելի ու աշխատանքային գործընթացի համատեքստը և գործակալային հնարավորությունները՝ վերլուծաբանների ու պորտֆելների կառավարիչների համար գործնական եզրահանգումներ բացահայտելու նպատակով։

Franklin Templeton-ը Codex-ն օգտագործել է հաքաթոններում՝ փորձագետներին համախմբելով ներդրումային մասնագետների հետ, երբ վերջիններս մշակում են իրենց գործիքները։ Ներդրումներում ԱԲ-ի կիրառման առաջամարտիկներն աշխատում են փորձարկումները գործնական կիրառման պատրաստ գործընթացների վերածելու ուղղությամբ՝ ներառելով անվտանգության ստուգում, փորձագիտական աջակցություն և տվյալների վերահսկման միջոցներ։

Դադլին ասում է. «Մենք հետազոտական գործընթացի հնարավորություններն ընդլայնելուց անցել ենք ներդրումային հետազոտության ողջ ընթացքը վերաիմաստավորելուն»։

Այն հատկանիշներից մի քանիսը, որոնք ԱԲ-ն օգտակար են դարձնում այլ ոլորտներում, չեն գործում ակտիվների կառավարման մեջ։ Շատ գործիքներ սովորում են օգտատիրոջ նախասիրությունները և ավելի շատ նմանատիպ նյութեր են ցուցադրում։ Այսպես, եթե օգտատերը նախընտրում է հետազոտություններ տրամադրող որևէ ընկերության, գործիքն ավելի հաճախ է առաջարկում այդ ընկերության զեկույցները։ Ներդրումային թիմի համար տեսադաշտի այդ նեղացումը կարող է միակողմանի մոտեցում բերել ներդրումային գործընթաց։ Franklin Templeton-ը ձգտում է հակառակին։ «Մենք ուզում ենք համոզված լինել, որ նրանց հասանելի են բազմազան հետազոտություններ և կարծիքներ»,— ասում է Դադլին։

Franklin Templeton-ը ցանկանում է, որ իր ԱԲ համակարգերը շեշտադրեն ներդրումային ռիսկերը։ «Մեզ պետք է, որ ԱԲ-ն հասկանա՝ լավ ներդրումային գաղափարը ոչ միայն հիմնավորված է, այլև ներառում է ռիսկերի վերլուծություն և մեր պորտֆելների կառավարիչներին տեղեկացնում դրանց մասին»,— ասում է Դադլին։ «Հետազոտական գրությունն ուսումնասիրելիս ուշադրություն դարձնելը նրան, որ ինչ-որ մեկը բացահայտել է ներդրումային ռիսկերը, մեր տեսանկյունից վատ բան չէ։ Դա օգնում է ավելի տեղեկացված ներդրումային որոշում կայացնել»։

Franklin Templeton-ի փորձը մատնանշում է ներդրումների կառավարման մի քանի արդյունավետ մոտեցում։

• «Մեր ղեկավարության ուղերձն անփոփոխ է. մենք խրախուսում ենք ԱԲ-ով նորարարությունն ու փորձարկումները՝ ռիսկերի հստակ սահմանված սահմանափակումների շրջանակում։ Ոչ բոլոր նախաձեռնությունները կհաջողվեն, բայց յուրաքանչյուրից պետք է ստանանք գիտելիքներ, որոնք կզորացնեն մեր կարողությունները, կօգնեն հետագա որոշումներին և կնպաստեն շարունակական կատարելագործմանը»,— ասում է Դադլին։

• Նոր գործիքները հասանելի դարձրեք մարդկանց։ Դադլիի խոսքով՝ նոր տեխնոլոգիաների թողարկումից կարճ ժամանակ անց Franklin Templeton-ը թիմերի համար կազմակերպել է գործնական աշխատարաններ, որպեսզի նրանք փորձարկեն դրանց համապատասխանությունն իրենց աշխատանքին։

• Օգնեք թիմերին յուրացնել գործիքները։ Դադլին ասում է. «Նպատակն այն է, որ նրանք իսկապես հասկանան տեխնոլոգիայի ներուժը»։

• Մշակեք վերահսկման պատշաճ միջոցներով։ Անվտանգության ստուգումը, փորձագիտական աջակցությունը և տվյալների վերաբերյալ համաձայնագրերը փորձարկումներից դեպի գործնական կիրառման պատրաստ գործիքներ տանող Franklin Templeton-ի ուղու մասն են։

Դադլիի երկարաժամկետ նպատակն է այդ փոխկապակցված վերլուծությունը հասանելի դարձնել ներդրումային բոլոր թիմերին՝ վերլուծաբաններից մինչև յուրաքանչյուր ներդրումային խմբի ղեկավարները։

Նա ցանկանում է, որ վերլուծաբաններն ավելի շատ ժամանակ հատկացնեն տեղում ուսումնասիրություններին՝ զրուցելով տարբեր փորձագետների ու մասնագետների, այդ թվում՝ մասնավոր ընկերությունների ղեկավարների հետ, և ստացած գիտելիքները փոխանցեն իրենց ներդրումային թիմերին։ Դադլիի համար գործիքների զարգացմանը զուգընթաց մարդկային այդ տեսանկյունը շարունակում է առանցքային մնալ։