‘ચિલી માટે OpenAI’નો પરિચય
આજે અમે ‘ચિલી માટે OpenAI’ શરૂ કરી રહ્યા છીએ. ચિલીના વિજ્ઞાન, ટેક્નોલોજી, જ્ઞાન અને નવીનતા મંત્રાલયની આગેવાની હેઠળ ચિલી સરકાર સાથેની આ ભાગીદારી જાહેર વહીવટમાં AIનો જવાબદારીપૂર્વક ઉપયોગ કરવા, સરકારી કર્મચારીઓનાં કૌશલ્યો વિકસાવવા અને સ્થાનિક નવોદિત ઉદ્યોગોને AIની ઉપયોગી એપ્લિકેશનો વિકસાવવામાં મદદ કરશે.
આ ભાગીદારી ચિલીની રાષ્ટ્રીય AI નીતિ અને કાર્યયોજના(નવી વિન્ડોમાં ખૂલે છે)ને આગળ વધારે છે, જે પ્રતિભા વિકાસ, સંશોધન અને જવાબદારીપૂર્વકના ઉપયોગને સમર્થન આપે છે.
કેલિફોર્નિયામાં સેમાફોરના ‘સિલિકોન વેલી અને વિશ્વ’ સંમેલન દરમિયાન આયોજિત એક અલગ બેઠકમાં આ સમજૂતીપત્ર પર હસ્તાક્ષર કરવામાં આવ્યા હતા. ચિલી વતી મંત્રી હિમેના લિન્કોલાઓએ આ કરારમાં આગેવાની લીધી હતી.
આ ભાગીદારીને અમેરિકાના વાણિજ્ય વિભાગના અમેરિકન એસઆઈ નિકાસ કાર્યક્રમ(નવી વિન્ડોમાં ખૂલે છે)નો ટેકો છે, જેમાં OpenAI મુખ્ય ભાગીદાર છે. આ કાર્યક્રમ જાહેર ક્ષેત્રમાં નવીનતા, કૌશલ્ય વિકાસ અને ઉદ્યોગસાહસિકતા દ્વારા ચિલીને તેની પોતાની AI મહત્ત્વાકાંક્ષાઓ સાકાર કરવાની દિશામાં આગળ વધવામાં મદદ કરે છે.
“વૈજ્ઞાનિક શોધોને વેગ આપવાથી લઈને આપણે હજી કલ્પના પણ ન કરી હોય એવી વસ્તુઓ બનાવવામાં લોકોને મદદ કરવા સુધી, કૃત્રિમ બુદ્ધિમત્તા લોકોનું જીવન બહેતર બનાવવાના સૌથી મહત્વપૂર્ણ માધ્યમોમાંનું એક બનશે. સરકારી કર્મચારીઓને આ સાધનો વાપરવામાં મદદ કરવા, જાહેર સેવાઓ સુધારવા અને નવી કંપનીઓ ઊભી કરતા ઉદ્યોગસાહસિકોને ટેકો આપવા ચિલી સાથે કામ કરવા માટે હું ઉત્સાહિત છું. ચિલીના નવોદિત ઉદ્યોગો વિશ્વની કેટલીક સૌથી મહત્વપૂર્ણ સમસ્યાઓ ઉકેલે અને સર્વત્ર લોકોને લાભ થાય એવી વસ્તુઓ બનાવે તે જોવા હું ઉત્સુક છું.”
“આ સહયોગ અને તે સમગ્ર ચિલીમાં વૈજ્ઞાનિક શોધો, ઉદ્યોગસાહસિકતા અને નવીનતા માટે જે અસાધારણ તકો ઊભી કરશે તેના વિશે અમે ખૂબ જ ઉત્સાહિત છીએ. આ પહેલનો હેતુ ચિલીના લોકોને શક્યતાની સીમાઓ વિસ્તારવા, નવી ટેક્નોલોજીઓ બનાવવા અને લોકોનું જીવન સુધારે એવા ઉકેલો વિકસાવવા સક્ષમ બનાવવાનો છે.”
આ ભાગીદારી મંત્રાલયની વહીવટી પ્રક્રિયાઓમાં ટેક્નોલોજી અપનાવવાની શક્યતાઓ તપાસશે. તેમાં નવા મૉડલ અપનાવવા માટે OpenAI તરફથી સંભવિત સહાય તેમજ મંત્રાલયના કર્મચારીઓ માટે સલાહ અને તાલીમનો સમાવેશ થાય છે.
સરકારી કર્મચારીઓ માટે આ ભાગીદારી તેમની ભૂમિકાઓને અનુરૂપ AIનું વ્યવહારુ જ્ઞાન આપવા, હાલનાં કૌશલ્યો સુધારવા અને નવાં કૌશલ્યો શીખવવાની શક્યતાઓ તપાસશે. પ્રવૃત્તિઓમાં કાર્યશાળાઓ અને તાલીમ આપનારાઓને તાલીમ આપવાનો અભિગમ સામેલ હોઈ શકે છે. તેમાં AI સાધનોનો અસરકારક ઉપયોગ, પરિણામોની ચકાસણી, સંવેદનશીલ માહિતીનું રક્ષણ અને માનવીય દેખરેખ જાળવવા જેવા વિષયો આવરી લેવાશે.
ચિલીના AI આધારિત નવોદિત ઉદ્યોગો અને નવીનતાને પોષતા માળખાને ટેકો આપવા માટે ભાગીદારો સંબંધિત OpenAI કાર્યક્રમો અને ટેક્નોલોજીની ઉપલબ્ધતા, વ્યવહારુ શિક્ષણ, તકનીકી માર્ગદર્શન અને અનુભવી માર્ગદર્શકોની સહાયની શક્યતાઓ તપાસશે. આ સહકાર ઉદ્યોગસાહસિકોને જાહેર સંસ્થાઓ, યુનિવર્સિટીઓ અને અન્ય સ્થાનિક ભાગીદારો સાથે પણ જોડી શકે છે, જેથી ચિલીના આર્થિક વિકાસ અને જાહેર સેવાની પ્રાથમિકતાઓને ટેકો આપતી એપ્લિકેશનો વિકસાવી શકાય.
મંત્રાલય અને OpenAIના પ્રતિનિધિઓનું સંયુક્ત કાર્યદળ પ્રાથમિકતાઓ અને પ્રારંભિક કાર્યયોજના પર સંમત થાય તેવી અપેક્ષા છે. આ યોજનામાં દરેક પ્રવૃત્તિ માટે જવાબદાર આગેવાનો, તબક્કાવાર લક્ષ્યો અને સફળતાના માપદંડો નક્કી કરવામાં આવશે.
ચોક્કસ પ્રવૃત્તિઓ, પાત્રતા, સંસાધનો અને ટેક્નોલોજીની ઉપલબ્ધતા અંગે અલગથી સહમતી સાધવામાં આવશે. આ સમજૂતીપત્રમાં રોકાણ કે ખરીદીની કોઈ પ્રતિબદ્ધતા નથી. પ્રવૃત્તિઓમાં ગોપનીયતા, માહિતી સુરક્ષા અને જવાબદારીપૂર્વકના ઉપયોગ માટે યોગ્ય સુરક્ષા વ્યવસ્થાઓનું પાલન કરવું જરૂરી રહેશે.
‘ચિલી માટે OpenAI’ એ ‘દેશો માટે OpenAI’નો ભાગ છે. આ અમારી વૈશ્વિક પહેલ છે, જે દેશોને તેમની રાષ્ટ્રીય પ્રાથમિકતાઓ આગળ વધારવા, અર્થતંત્ર મજબૂત કરવા અને તકો વધારવા માટે AIનો ઉપયોગ કરવામાં મદદ કરે છે. AIની સંભાવનાઓને લોકો માટે વાસ્તવિક લાભોમાં ફેરવવા અમે સરકારો અને સ્થાનિક ભાગીદારો સાથે કામ કરીએ છીએ.


