LifeVal

ఆర్టిఫిషియల్ జనరల్ ఇంటెలిజెన్స్ మానవాళి అంతటికీ మేలు చేసేలా చూడటమే OpenAI ధ్యేయం. ప్రస్తుతం ప్రతి వారం ChatGPTను వాడుతున్న వంద కోట్లకు పైగా ప్రజల కోసం, రోజువారీ జీవితంలోని ఆచరణాత్మక సవాళ్లలో సహాయపడే AIని రూపొందించాలనుకుంటున్నాం. పిల్లల సంరక్షణ సేవలను వెతకడం, ప్రభుత్వ సేవలను పొందడం, బడ్జెట్ రూపొందించడం, బడికి సిద్ధం కావడం, వంటకాల తయారీలో మార్పులు చేయడం, సరకులు ఆర్డర్ చేయడం, వ్యాయామ ప్రణాళికలు రూపొందించడం వంటివి వీటిలో ఉన్నాయి.

తమ జీవితాన్ని సులభం చేసుకోవడానికి సహాయం కోరేవారికి సలహా లేదా సంభాషణలో వచ్చే సమాధానం మాత్రమే సరిపోదు. నిజంగా ఉపయోగపడే వ్యక్తిగత సహాయకంగా ఉండాలంటే, ChatGPT పనులను పూర్తి చేసే చర్యలు చేపట్టగలగాలి.

రోజువారీ పనుల్లో మోడల్ పనితీరును కాలక్రమేణా కొలవడానికి, వినియోగదారులు AI, వ్యక్తిగత ఏజెంట్ల నుంచి ఎక్కువగా సహాయం కోరిన రంగాల్లోని పనులతో ఒక మూల్యాంకనాన్ని రూపొందించాం. గత ఏడాదిగా రోజువారీ పనుల్లో మోడల్ పనితీరులో మెరుగుదలను గమనించడానికి, మరింత మెరుగుపరచడానికి ఈ మూల్యాంకనాన్ని ఉపయోగించాం. 

ప్రజలు అత్యంత విలువైనవిగా భావించే పనులను గుర్తించడానికి, అమెరికాలోనూ అంతర్జాతీయంగానూ ప్రజలు సమయాన్ని ఎలా గడుపుతున్నారో పరిశీలించే రెండు భారీ అధ్యయనాలతో ప్రారంభించాం: అమెరికా సమయ వినియోగ సర్వే⁠(కొత్త విండోలో తెరుచుకుంటుంది), బహుళదేశాల సమయ వినియోగ అధ్యయనం⁠(కొత్త విండోలో తెరుచుకుంటుంది). వివిధ జనాభా వర్గాల ప్రజలు రోజులో వేర్వేరు సమయాల్లో, వివిధ కాలాల్లో చేసే రోజువారీ పనుల విపులమైన జాబితాను ఈ రెండు డేటా సమితులు కలిపి అందిస్తాయి. AI సహాయం ఎక్కడ అత్యంత విలువైనదిగా ప్రజలు భావిస్తారో అర్థం చేసుకోవడానికి, ఇప్పటికే ఉన్న ఈ సర్వేలకు అదనంగా జనాభాలోని విభిన్న వర్గాలకు ప్రాతినిధ్యం వహించే 3,995 మందితో కొత్త సర్వే నిర్వహించాం. సాధారణ ప్రజలు వ్యక్తిగత సహాయకం నుంచి ఏ అంశాల్లో ఎక్కువగా సహాయం కోరుకుంటున్నారో గుర్తించడానికి ప్రతి పనిపై పలు ప్రశ్నలు అడిగాం. అలా గుర్తించిన పనులు ప్రజలు సహాయం కోరుకునే అత్యంత ముఖ్యమైన రంగాలకు చెందినవి. వీటిలో సంరక్షణ, ఆరోగ్యం, విద్య, ఇంటి వ్యవహారాల నిర్వహణ, వ్యక్తిగత ఆర్థిక వ్యవహారాలు, కొనుగోళ్లు, ప్రభుత్వ సేవలు పొందడం ఉన్నాయి. 

మా తాజా మోడళ్లు అనేక LifeVal పనుల్లో చాలా ఎక్కువ స్కోర్లు సాధిస్తున్నాయి.

AGI మానవాళి అంతటికీ మేలు చేసేలా చూడాలంటే, సాధారణ ప్రజల జీవితాల్లో ముఖ్యమైన విషయాల్లో మోడల్ పురోగతిని కొలిచి, మెరుగుపరచాలి. అంటే, మోడల్ పరిజ్ఞానాన్ని పరీక్షించే విద్యాసంబంధ మూల్యాంకనాలకే పరిమితం కాకూడదు. ప్రజలు నిర్ణయాలు తీసుకోవడంలో, రోజువారీ బాధ్యతలు నిర్వహించడంలో, ప్రాధాన్యమున్న పనులు పూర్తి చేయడంలో AI మోడళ్లు ఎంత బాగా సహాయపడగలవో వాస్తవంగా కొలవాలి. ఆ లక్ష్యం వైపు LifeVal ఒక ముందడుగు అవుతుందని ఆశిస్తున్నాం.