முக்கிய இணையத் திறன்களின் அடுத்த கட்டத்தை எதிர்கொள்வது

மாடல்களின் திறன்கள் அதிகரித்து வருவதால், இணையப் பாதுகாப்பை வலுப்படுத்தவும், முன்னெப்போதும் இல்லாத வேகத்திலும் அளவிலும் தாக்குதல்களை நடத்தவும் முடியும் என்பதால், இணையப் பாதுகாப்புத் துறை வேகமாக மாறி வருகிறது.

விரைவில் வரவிருக்கும் எங்கள் மாடல்களில் ஒன்றான Astra குறித்து கடந்த சில நாட்களாக நாங்கள் மேற்கொண்ட சமீபத்திய உள் மதிப்பீடுகள், ஏஜென்டிக் கோடிங் மற்றும் இணையப் பாதுகாப்பில் குறிப்பிடத்தக்க முன்னேற்றங்களைக் காட்டுகின்றன. நிபுணர்களின் மதிப்பீடுகளுடன் இந்த முடிவுகளையும் பரிசீலித்த பிறகு, எங்கள் பிரிபேர்ட்நெஸ் ஃப்ரேம்வொர்க்⁠(புதிய சாளரத்தில் திறக்கும்) வரையறுக்கும் மிக முக்கியமான இணையப் பாதுகாப்புத் திறன்கள் இதில் இல்லை என்று உறுதியாகக் கூற முடியாது என நேற்று இரவு முடிவு செய்தோம்.

திறன்களில் ஏற்படக்கூடிய இந்த மாற்றம் குறித்து பொதுமக்களிடமும் பாதுகாப்புச் சமூகங்களிடமும் வெளிப்படையாக இருப்பது முக்கியம் என நம்புவதால் இதைப் பகிர்கிறோம்.

உயிரியல், வேதியியல், இணையப் பாதுகாப்பு மற்றும் செயற்கை நுண்ணறிவின் சுயமேம்பாடு ஆகியவற்றில் மாடல்கள் இந்த அளவிலான திறனை நெருங்குவதற்கு வெகு முன்பே, 2023 டிசம்பரில் எங்கள் பிரிபேர்ட்நெஸ் ஃப்ரேம்வொர்க்கை முதன்முதலில் வெளியிட்டோம். திறன்களின் முன்னேற்றத்தைக் கண்டறியவும், அவை உருவாகும்போது எங்கள் நிறுவனம் என்ன செய்ய வேண்டும் என்பதைத் திட்டமிடவும் வழிகாட்டியாக இதை உருவாக்கினோம். GPT‑5.6‑Sol உள்ளிட்ட முந்தைய மாடல்களின் அதிநவீன இணையப் பாதுகாப்புத் திறன்கள் மதிப்பிடப்பட்டு, மிக முக்கியமான நிலைக்குப் பதிலாக அதிகம் என்ற வரம்பில் இருப்பதாகத் தீர்மானிக்கப்பட்டன.

எங்கள் பிரிபேர்ட்நெஸ் ஃப்ரேம்வொர்க்கின்படி, மனிதத் தலையீடு இல்லாமல் வலுப்படுத்தப்பட்ட பல நிஜ உலக முக்கிய முறைமைகளில் எல்லாத் தீவிர நிலைகளிலும் செயல்படக்கூடிய பூஜ்ஜிய நாள் தாக்குதல் வழிமுறைகளை ஒரு மாடலால் கண்டறிந்து உருவாக்க முடிந்தால் அல்லது விரும்பிய இலக்கைப் பற்றிய மேல்நிலை விளக்கம் மட்டுமே வழங்கப்பட்ட நிலையில் வலுப்படுத்தப்பட்ட இலக்குகளுக்கு எதிரான இணையத் தாக்குதல்களுக்குப் புதிய உத்திகளைத் தொடக்கம் முதல் முடிவு வரை வகுத்துச் செயல்படுத்த முடிந்தால், அது மிக முக்கியமான இணையப் பாதுகாப்பு வரம்பை எட்டுகிறது. 

இந்த மாடலுக்கான தரஅளவீடுகளையும் மதிப்பீடுகளையும் நாங்கள் தொடர்ந்து மேற்கொண்டு வரும் நிலையில், தற்போதைக்கு இது மிக முக்கியமான திறன் நிலையை எட்டியிருக்கக்கூடும் என்பதை விலக்கிவிட முடியாத அளவுக்கு வலுவாகச் செயல்படுவதாக எங்கள் தொடக்கநிலை மதிப்பீடுகள் காட்டுகின்றன. Astra விரைவில் வரவிருக்கும் ஒரு மாடல்; Hugging Face மீதான தாக்குதலில் அது ஈடுபடவில்லை. 

எனவே, இந்தத் திறன்களைப் பயன்பாட்டுக்குக் கொண்டுவருவதற்கு ஏற்றவையாக எங்கள் பாதுகாப்பு ஏற்பாடுகளும் கட்டுப்பாடுகளும் இருப்பதை உறுதிசெய்ய, அவற்றின் உறுதித்தன்மைக்கான சோதனைகளை விரிவுபடுத்தியுள்ளோம். இந்த மாடலின் அடுத்தகட்ட உருவாக்கம் பாதுகாப்பாக நடைபெறுவதை உறுதிசெய்ய, நிறுவனத்திற்குள்ளும் பின்வரும் நடவடிக்கைகளை மேற்கொண்டுள்ளோம்: 

• அதிகத் திறன் கொண்ட மாடல்களுக்கும் அவை சார்ந்த செயல்பாடுகளுக்கும் கடுமையான பாதுகாப்புக் கட்டுப்பாடுகளைச் செயல்படுத்தி வருகிறோம். தனிமைப்படுத்தப்பட்ட சோதனைச் சூழல்கள், கட்டுப்படுத்தப்பட்ட பிணையம் மற்றும் கருவி அணுகல், மாடல் எடைகளுக்கான மேம்பட்ட பாதுகாப்பும் மறையாக்கமும், கூடுதல் கண்காணிப்பு மற்றும் கண்டறிதல் திறன்கள், தனிமைச் சூழலில் செயல்படுத்துதல் ஆகியவை இதில் அடங்கும்.
• இந்த வலுப்படுத்தப்பட்ட பாதுகாப்புக் கட்டுப்பாட்டு நிபந்தனைகளை இன்னும் பூர்த்திசெய்யாத Astra சார்ந்த உள் செயல்பாடுகளை இடைநிறுத்துகிறோம்.
• பயிற்சி மற்றும் மதிப்பீடு உட்பட Astra-இன் அனைத்து ஏஜென்டிக் செயலிகளிலும் ஆபத்தான செயல்கள் மற்றும் நோக்கத்திலிருந்து விலகும் நடத்தையைக் கண்டறிய, முழுமையான கண்காணிப்பைச் செயல்படுத்தியுள்ளோம். மாடலின் செயின்-ஆஃப்-தாட்டைக் கண்காணிப்பு அமைப்புகள் மதிப்பிட்டு, அதிக ஆபத்துள்ள செயல்பாட்டை ஆய்வுசெய்து தடுக்க பாதுகாப்பு நடவடிக்கையைத் தூண்டுகின்றன.
• இந்த மாடலின் திறன்களைச் சோதிக்க, தொடர்புடைய அரசு அமைப்புகள் மற்றும் தேர்ந்தெடுக்கப்பட்ட செயற்கை நுண்ணறிவுப் பாதுகாப்பு நிறுவனங்களுடன் இணைந்து செயல்படுவோம்.
• அதிக ஆபத்துள்ள மதிப்பீடுகளையும் பணிச்சுமைகளையும் பாதுகாப்பாக இயக்க, மூன்றாம் தரப்புச் சோதனைக் கூட்டாளிகளுக்குப் பரிந்துரைக்கப்பட்ட பாதுகாப்புக் கட்டுப்பாடுகளை வழங்குவோம். 

திறன்களில் முன்பு ஏற்பட்ட பிற மாற்றங்களின்போதும் இந்தக் கட்டமைப்பு எங்களுக்கு ஏற்கெனவே வழிகாட்டியுள்ளது. 2025 ஜூனில், பிரிபேர்ட்நெஸ் ஃப்ரேம்வொர்க்கின்படி உயிரியல் துறையில் எங்கள் மாடல்கள் அதிகம் என்ற திறன் வரம்பை நெருங்கியபோது, பாதுகாப்பு ஏற்பாடுகளை வலுப்படுத்தவும், சோதனைகளை விரிவுபடுத்தவும், வெளிப்புற நிபுணர்களுடன் இணைந்து செயல்படவும், கூடுதல் பாதுகாப்புக் கட்டுப்பாடுகளை நடைமுறைப்படுத்தவும் நாங்கள் மேற்கொண்ட நடவடிக்கைகளை விவரித்தோம். அதே கொள்கையை இங்கும் பின்பற்றுகிறோம்.

மேம்பட்ட இணையப் பாதுகாப்புத் திறன் கொண்ட மாடல்கள், தாக்குதல் நடத்துபவர்களுக்கு முன்பாகவே பாதிப்புகளைக் கண்டறிந்து சரிசெய்ய பாதுகாப்பாளர்களுக்கு உதவ வேண்டும் என நம்புகிறோம். Astra போன்ற மாடல்களிலும் அடுத்து வரும் மாடல்களிலும் உள்ள அதிநவீன திறன்கள் பொறுப்புடன் பயன்பாட்டுக்குக் கொண்டுவரப்பட்டு, மனிதகுலம் முழுவதற்கும் பரவலாகப் பயனளிப்பதை உறுதிசெய்ய அரசுகள், பாதுகாப்பு நிறுவனங்கள் மற்றும் குடிமைச் சமூகத்துடன் இணைந்து செயல்பட உறுதிபூண்டுள்ளோம்.