இளையோர் மனநலம் மற்றும் செயற்கை நுண்ணறிவுக்காக அமெரிக்க உளவியல் சங்கத்துடன் இணைந்து பணியாற்றுதல்
இளையோர்கள் ஏற்கெனவே கற்கவும், படைக்கவும், கேள்விகள் கேட்கவும், ஆலோசனை பெறவும் செயற்கை நுண்ணறிவைப் பயன்படுத்துகின்றனர். இந்தப் பயன்பாடு அதிகரிக்கும்போது, குடும்பங்கள், பள்ளிகள், மருத்துவர்கள், சமூகங்கள் ஆகியவற்றுக்குத் தெளிவான ஆதாரங்கள், சிறந்த வளங்கள், வலுவான பாதுகாப்பு ஏற்பாடுகள் தேவைப்படுகின்றன. அதனால்தான், இளையோர்களிடையே செயற்கை நுண்ணறிவின் பொறுப்பான உருவாக்கத்தையும் பயன்பாட்டையும் அணுகும் விதத்தில் உளவியல் அறிவியலை இணைக்க, அமெரிக்க உளவியல் சங்கத்துடன் (APA) இணைந்து பணியாற்றுகிறோம். அமெரிக்காவில் உளவியலுக்கான முன்னணி அறிவியல் மற்றும் தொழில்முறை அமைப்பாக APA திகழ்கிறது. தொழில்நுட்பம் வளரும்போது, நமக்குத் தெரிந்தவை, உறுதியாகத் தெரியாதவை, பொறுப்பான செயற்கை நுண்ணறிவு எவ்வாறு அமைய வேண்டும் ஆகியவற்றைத் தெளிவுபடுத்த அதன் ஆதார அடிப்படையிலான பணி உதவும்.
“பதின்ம வயதினரின் வாழ்வில் ஒரு பகுதியாக தொழில்நுட்பம் உள்ளது. பாதுகாப்பான, வயதுக்கேற்ற, குடும்பங்களைக் கருத்தில்கொண்டு வடிவமைக்கப்பட்ட அனுபவங்கள் மூலம் அந்த யதார்த்தத்தை எதிர்கொள்வது நமது பொறுப்பு ஆகும். இளையோர் நம்பியிருக்கும் நிஜ உலக உறவுகளையும் பராமரிப்பையும் செயற்கை நுண்ணறிவு வலுப்படுத்த வேண்டுமே தவிர, அவற்றுக்கு மாற்றாக அமையக் கூடாது,” என்று OpenAI-இன் மனநலம் மற்றும் நல்வாழ்வுத் தயாரிப்புக் கொள்கைத் தலைவர் டாக்டர் சாரா யோஹான்சன் கூறினார். “நிபுணர்களுடன் நாங்கள் தொடர்ந்து மேற்கொள்ளும் முயற்சிகளின் அடுத்த கட்டமே இந்தப் பணி ஆகும். APA மற்றும் பிற முன்னணி நிபுணர்களுடன் இணைந்து, ஆதாரங்களை அடிப்படையாகக் கொண்ட எங்கள் அணுகுமுறையைத் தொடர்ந்து மேம்படுத்தி, பதின்ம வயதினரின் நல்வாழ்வுக்கு முன்னுரிமை அளிக்கும் நடைமுறைப் பாதுகாப்பு ஏற்பாடுகளை உருவாக்குகிறோம்.”
இந்த ஆண்டின் தொடக்கத்தில் APA உடன் இணைந்து பயனுள்ள கலந்துரையாடல் ஒன்றை நடத்தினோம். மனநல அமைப்புகளின் தலைவர்கள், ஆராய்ச்சியாளர்கள், மருத்துவர்கள், கல்வியாளர்கள், இளையோர் பிரதிநிதிகள் ஆகியோர் அதில் பங்கேற்று, இளையோர்களுக்குக் கிடைக்கும் ஆதரவில் தற்போது எங்கு இடைவெளிகள் உள்ளன என்றும், தகவலைக் கண்டறியவும் நிஜ உலக ஆதரவுடன் இணையவும் செயற்கை நுண்ணறிவு எங்கு பொறுப்புடன் உதவலாம் என்றும் விவாதித்தனர்.
இந்த உரையாடல்களைத் தொடர்ந்து, மனவேதனையான தருணங்களில் இளையோர்களுக்குச் செயற்கை நுண்ணறிவு எவ்வாறு உதவலாம், அவர்களின் வளர்ச்சிநிலைக்கு ஏற்றதாகவும் பயனுள்ளதாகவும் அதை எவ்வாறு வடிவமைக்கலாம், அதன் பயன்பாட்டில் இளையோர்களுக்கு வழிகாட்டப் பெற்றோர், பராமரிப்பாளர்கள், மருத்துவர்கள் ஆகியோரை எவ்வாறு சிறப்பாகத் தயார்படுத்தலாம் என்பது உள்ளிட்ட பல பகுதிகளில் இந்தப் பணி விரிவடையும் என எதிர்பார்க்கிறோம். இந்தப் பணி முழுவதும் மனித நடத்தையின் அறிவியலையும், பெற்றோர், பராமரிப்பாளர்கள், ஆசிரியர்கள் மற்றும் இளையோர்களின் கருத்துகளையும் வாழ்க்கை அனுபவங்களையும் அடிப்படையாகக் கொண்டிருக்கும். காலப்போக்கில், இளையோர்களின் வாழ்வில் செயற்கை நுண்ணறிவு எவ்வாறு இடம்பெற வேண்டும் என்பதற்கான வலுவான பாதுகாப்பு ஏற்பாடுகளையும் ஆதார அடிப்படையிலான அணுகுமுறைகளையும் உருவாக்க இந்தப் பணி உதவும்.
குறிப்பாகப் பதின்ம வயதினர் இந்தக் கருவிகளைப் பயன்படுத்தத் தொடங்கும்போது, வீட்டில் செயற்கை நுண்ணறிவுப் பயன்பாட்டை வழிநடத்தப் பெற்றோருக்கும் பராமரிப்பாளர்களுக்கும் நடைமுறைக் கருவிகளை வழங்குவது தொடக்ககட்ட முன்னுரிமைகளில் ஒன்றாகும். ஆரோக்கியமான பயன்பாட்டை ஆதரிக்கவும், பெரியவர்களின் தலையீடு எப்போது தேவைப்படலாம் என்பதை அறியவும், மனிதர்களுக்கோ பராமரிப்புக்கோ மாற்றாக அல்லாமல் ஒரு கருவியாகவே செயற்கை நுண்ணறிவு இருப்பதை வலியுறுத்தவும் பெற்றோருக்கும் பராமரிப்பாளர்களுக்கும் உதவும் குடும்பங்களுக்கான வளங்களை APA உடன் இணைந்து உருவாக்கத் திட்டமிட்டுள்ளோம். இந்த வழிகாட்டுதலைப் பள்ளிச் சமூகங்கள் முழுவதும் பரவலாகக் கிடைக்கச் செய்யவும் எண்ணியுள்ளோம்.
செயற்கை நுண்ணறிவு குறித்த கேள்விகளை அதிகளவில் எதிர்கொள்ளும் நிபுணர்களுக்கு ஆதரவளிக்கவும் APA உடன் இணைந்து பணியாற்றுகிறோம். ஆரோக்கியமான செயற்கை நுண்ணறிவுப் பயன்பாட்டை ஊக்குவித்தல், அளவுக்கு மீறிய சார்பைக் கண்டறிதல், ஆரோக்கியமற்ற பயன்பாட்டு முறைகளில் தலையிடுதல் ஆகியவற்றை மையமாகக் கொண்ட வளங்களை மருத்துவர்களுக்கும் பள்ளி உளவியலாளர்களுக்கும் உருவாக்குவது திட்டமிடப்பட்ட பணிகளில் அடங்கும். புதிய புரிதல்களைப் பரந்த துறைக்கான நடைமுறை வழிகாட்டுதலாக மாற்ற, சுகாதாரம், கல்வி, ஆராய்ச்சி, கொள்கை, தொழில்நுட்பம், இளையோர் உரிமை ஆதரவு ஆகிய துறைகளின் தலைவர்களையும் தொடர்ந்து ஒருங்கிணைப்போம்.
இந்த முயற்சிகள் ஊகங்களை அடிப்படையாகக் கொள்ளாமல், நேரடி வாழ்க்கை அனுபவம் உள்ளவர்களின் அனுபவங்களில் வேரூன்றி, அவர்களால் வடிவமைக்கப்படுவது அவசியம். செயற்கை நுண்ணறிவை இளையோர்கள் எவ்வாறு பயன்படுத்துகின்றனர், பள்ளிகள், சிகிச்சைச் சூழல்கள், குடும்பங்களில் அது தொடர்பான கேள்விகள் எவ்வாறு எழுகின்றன, தற்போதைய முறைமைகள் எங்கு குறைபடுகின்றன, அணுகல், கல்வி அல்லது சேவைகளைப் பெற வழிகாட்டுதல் ஆகியவற்றில் செயற்கை நுண்ணறிவு எங்கு பொறுப்புடன் உதவலாம் என்பதை நன்கு புரிந்துகொள்ள, பதின்ம வயதினர், குடும்பங்கள், மருத்துவர்கள், பள்ளி உளவியலாளர்கள் உள்ளிட்டோரை APA உடன் இணைந்து ஒன்றுகூட்டுவோம்.
உணர்வுபூர்வமான தருணங்களில் ChatGPT பதிலளிக்கும் விதத்தை மேம்படுத்தவும் இளம் பயனர்களுக்கு ஆதரவளிக்கவும் OpenAI மேற்கொண்டுவரும் முயற்சிகளின் அடுத்த கட்டமே இந்தப் பணி ஆகும். மனவேதனையின் அறிகுறிகளை ChatGPT சிறப்பாகக் கண்டறிந்து, அக்கறையுடன் பதிலளித்து, நிஜ உலக ஆதரவை நோக்கி மக்களை வழிநடத்த உதவுவதற்காக 260-க்கும் மேற்பட்ட மனநல நிபுணர்களுடன் இணைந்து பணியாற்றுகிறோம். உள்ளூர்மயமாக்கப்பட்ட நெருக்கடிகால வளங்கள் மற்றும் ஒரே சொடுக்கில் அணுகக்கூடிய உதவி எண்களுக்கான வசதியையும் விரிவுபடுத்தியுள்ளோம்; ஓய்வெடுக்க நினைவூட்டல்களைச் சேர்த்துள்ளோம்; பேரென்டல் கண்ட்ரோல்ஸ், பாதுகாப்புக் கவலைகளைப் பெற்றோருக்கு அறிவித்தல் போன்றவை, எங்கள் மாடல் ஸ்பெக்கில் 18 வயதுக்குட்பட்டோருக்கான கோட்பாடுகள், சரியான அனுபவத்தையும் பாதுகாப்பு ஏற்பாடுகளையும் வழங்க உதவும் வயதைக் கணிக்கும் மாடல் உள்ளிட்ட கூடுதல் பாதுகாப்புகளையும் இளம் பயனர்களுக்காக அறிமுகப்படுத்தியுள்ளோம்.
தகவலை முன்கூட்டியே கண்டறியவும் முறைமைகளைப் புரிந்துகொண்டு பயன்படுத்தவும் செயற்கை நுண்ணறிவு உதவக்கூடும். ஆனால் இளையோர்களின் நல்வாழ்வு வலுவான மனித உறவுகளையும் நம்பகமான ஆதரவையும் சார்ந்துள்ளது. இளையோர்களுக்கும் அவர்களைப் பராமரித்து, ஆதரித்து, வழிநடத்துவோருக்கும் செயற்கை நுண்ணறிவு உண்மையிலேயே உதவுவதை உறுதிசெய்யும் பணியில், நாங்கள் தொடர்ந்து கற்றுவரும் பல ஆராய்ச்சியாளர்கள், மருத்துவர்கள், கல்வியாளர்களுடன் சேர்ந்து APA உடன் பணியாற்றுவதில் மகிழ்ச்சியடைகிறோம்.
