சிலிக்கான OpenAI அறிமுகம்
சிலி அரசுடன் இணைந்து, அந்நாட்டின் அறிவியல், தொழில்நுட்பம், அறிவு மற்றும் புத்தாக்க அமைச்சகத்தின் தலைமையில், சிலிக்கான OpenAI திட்டத்தை இன்று தொடங்குகிறோம். பொது நிர்வாகத்தில் செயற்கை நுண்ணறிவைப் பொறுப்புடன் பயன்படுத்துவதை ஊக்குவிப்பது, அரசு ஊழியர்களின் திறன்களை வளர்ப்பது, பயனுள்ள செயற்கை நுண்ணறிவுச் செயலிகளை உருவாக்க உள்ளூர் புத்தொழில் நிறுவனங்களுக்கு உதவுவது ஆகியவை இந்தக் கூட்டாண்மையின் நோக்கங்களாகும்.
திறன் வளர்ப்பு, ஆராய்ச்சி மற்றும் பொறுப்பான பயன்பாட்டை ஆதரிக்கும் சிலியின் தேசிய செயற்கை நுண்ணறிவுக் கொள்கை மற்றும் செயல்திட்டத்தின்(புதிய சாளரத்தில் திறக்கும்) அடிப்படையில் இந்தக் கூட்டாண்மை அமைந்துள்ளது.
கலிஃபோர்னியாவில் நடைபெற்ற செமஃபோரின் ‘சிலிக்கான் பள்ளத்தாக்கும் உலகமும்’ மாநாட்டையொட்டி இந்தப் புரிந்துணர்வு ஒப்பந்தம் கையெழுத்தானது. சிலியின் சார்பில் அமைச்சர் ஹிமேனா லின்கோலாவ் இந்த ஒப்பந்தத்தை முன்னின்று வழிநடத்தினார்.
இந்தக் கூட்டாண்மைக்கு அமெரிக்காவின் வர்த்தகத் துறையின் அமெரிக்க எஸ்.ஐ. ஏற்றுமதித் திட்டம்(புதிய சாளரத்தில் திறக்கும்) ஆதரவளிக்கிறது. இத்திட்டத்தின் முக்கியக் கூட்டாளியான OpenAI, பொதுத் துறைப் புத்தாக்கம், திறன் மேம்பாடு மற்றும் தொழில்முனைவு மூலம் சிலி தனது செயற்கை நுண்ணறிவு இலக்குகளை நோக்கி முன்னேற உதவுகிறது.
“அறிவியல் கண்டுபிடிப்புகளை விரைவுபடுத்துவது முதல், நாம் இன்னும் கற்பனை செய்திராதவற்றை உருவாக்க மக்களுக்கு உதவுவது வரை, மக்களின் வாழ்க்கையை மேம்படுத்துவதற்கான மிக முக்கியமான வழிகளில் ஒன்றாகச் செயற்கை நுண்ணறிவு இருக்கப்போகிறது. அரசு ஊழியர்கள் இந்தக் கருவிகளைப் பயன்படுத்த உதவவும், பொதுச் சேவைகளை மேம்படுத்தவும், புதிய நிறுவனங்களை உருவாக்கும் தொழில்முனைவோருக்கு ஆதரவளிக்கவும் சிலியுடன் இணைந்து பணியாற்றுவதில் உற்சாகமாக இருக்கிறேன். உலகின் மிக முக்கியமான சில பிரச்சினைகளுக்குச் சிலியின் புத்தொழில் நிறுவனங்கள் தீர்வு கண்டு, உலகெங்கும் உள்ள மக்களுக்குப் பயனளிக்கும் படைப்புகளை உருவாக்குவதைக் காண ஆவலாக இருக்கிறேன்.”
“இந்த ஒத்துழைப்பையும், சிலி முழுவதும் அறிவியல் கண்டுபிடிப்புகள், தொழில்முனைவு மற்றும் புத்தாக்கத்திற்கு இது உருவாக்கவுள்ள அசாதாரண வாய்ப்புகளையும் எண்ணி மிகுந்த உற்சாகத்துடன் இருக்கிறோம். சாத்தியமானவற்றின் எல்லைகளை விரிவுபடுத்தவும், புதிய தொழில்நுட்பங்களை உருவாக்கவும், மக்களின் வாழ்க்கையை மேம்படுத்தும் தீர்வுகளை வடிவமைக்கவும் சிலி மக்களுக்கு ஆற்றலளிப்பதே இதன் நோக்கம்.”
அமைச்சகத்தின் நிர்வாகச் செயல்முறைகளில் தொழில்நுட்பத்தைப் பயன்படுத்துவதற்கான வாய்ப்புகளை இந்தக் கூட்டாண்மை ஆராயும். புதிய மாதிரிகளைப் பயன்படுத்துவதற்கு OpenAI வழங்கக்கூடிய ஆதரவும், அமைச்சகப் பணியாளர்களுக்கான ஆலோசனையும் பயிற்சியும் இதில் அடங்கும்.
அரசு ஊழியர்களின் பணிகளுக்கு ஏற்ற வகையில், நடைமுறை சார்ந்த செயற்கை நுண்ணறிவு அறிவை வழங்குவது, ஏற்கெனவே உள்ள திறன்களை மேம்படுத்துவது, புதிய திறன்களைக் கற்பிப்பது ஆகியவற்றுக்கான வாய்ப்புகளைக் கூட்டாண்மை ஆராயும். செயற்கை நுண்ணறிவுக் கருவிகளைத் திறம்படப் பயன்படுத்துதல், அவை வழங்கும் முடிவுகளைச் சரிபார்த்தல், முக்கியத் தகவல்களைப் பாதுகாத்தல், மனிதக் கண்காணிப்பைத் தக்கவைத்தல் ஆகியவை குறித்த பயிலரங்குகளும், பயிற்றுநர்களுக்குப் பயிற்சி அளிக்கும் அணுகுமுறையும் செயல்பாடுகளில் இடம்பெறலாம்.
சிலியின் செயற்கை நுண்ணறிவுப் புத்தொழில் மற்றும் புத்தாக்கச் சூழலை ஆதரிக்க, பொருத்தமான OpenAI திட்டங்கள் மற்றும் தொழில்நுட்பத்திற்கான அணுகல், நடைமுறைக் கற்றல், தொழில்நுட்ப வழிகாட்டுதல் மற்றும் வழிகாட்டுநர் ஆதரவு ஆகியவற்றுக்கான வாய்ப்புகளைக் கூட்டாளிகள் ஆராய்வார்கள். சிலியின் பொருளாதார வளர்ச்சிக்கும் பொதுச் சேவை முன்னுரிமைகளுக்கும் உதவும் செயலிகளை உருவாக்க, தொழில்முனைவோரை அரசு நிறுவனங்கள், பல்கலைக்கழகங்கள் மற்றும் பிற உள்ளூர்க் கூட்டாளிகளுடன் இணைக்கவும் இந்த ஒத்துழைப்பு வழிவகுக்கலாம்.
அமைச்சகம் மற்றும் OpenAI பிரதிநிதிகள் அடங்கிய கூட்டுப் பணிக்குழு, முன்னுரிமைகளையும் தொடக்க வேலைத் திட்டத்தையும் முடிவு செய்யும் என எதிர்பார்க்கப்படுகிறது. ஒவ்வொரு செயல்பாட்டிற்குமான பொறுப்பாளர்கள், முக்கிய இலக்குகள் மற்றும் வெற்றியை அளவிடும் அளவுகோல்கள் இதில் இடம்பெறும்.
குறிப்பிட்ட செயல்பாடுகள், தகுதி, வளங்கள் மற்றும் தொழில்நுட்ப அணுகல் ஆகியவை தனித்தனியாக ஒப்புக்கொள்ளப்படும். இந்தப் புரிந்துணர்வு ஒப்பந்தம் முதலீடு செய்வதற்கோ கொள்முதல் செய்வதற்கோ எந்தக் கட்டாய உறுதிப்பாட்டையும் விதிக்கவில்லை. தனியுரிமை, தகவல் பாதுகாப்பு மற்றும் பொறுப்பான பயன்பாட்டிற்கான உரிய பாதுகாப்பு நடைமுறைகளுக்கு உட்பட்டே செயல்பாடுகள் மேற்கொள்ளப்படும்.
நாடுகள் தங்கள் தேசிய முன்னுரிமைகளை முன்னெடுத்துச் செல்லவும், பொருளாதாரங்களை வலுப்படுத்தவும், வாய்ப்புகளை விரிவுபடுத்தவும் செயற்கை நுண்ணறிவைப் பயன்படுத்த உதவும் எங்களது உலகளாவிய முயற்சியே நாடுகளுக்கான OpenAI திட்டம். அதன் ஒரு பகுதிதான் சிலிக்கான OpenAI. செயற்கை நுண்ணறிவின் சாத்தியங்களை மக்களுக்கான நடைமுறைப் பயன்களாக மாற்ற, அரசுகளுடனும் உள்ளூர்க் கூட்டாளிகளுடனும் இணைந்து பணியாற்றுகிறோம்.


