Codex மூலம் செயல்திறனை வளர்க்கும் Cult.fit

இந்தியாவின் முன்னணி தொழில்நுட்பம் சார்ந்த உடற்பயிற்சி நிறுவனங்களில் ஒன்றான Cult.fit, 77 நகரங்களில் 708 உடற்பயிற்சி மையங்களை நடத்துகிறது. கட்டணம் செலுத்தும் சுமார் 10 லட்சம் உறுப்பினர்களுக்குச் சேவை வழங்குகிறது. சந்தா அடிப்படையில் உடற்பயிற்சிக் கூடங்களையும் பயிற்சியாளர் வழிநடத்தும் வகுப்புகளையும் அணுக உதவுகிறது. மேலும், உடற்பயிற்சிச் சாதனங்கள், துணைப்பொருட்கள், காலணிகள், ஆடைகள் என அதன் நுகர்வோர் பொருட்களின் வரிசையும் விரிவடைந்து வருகிறது.

நிறுவனம் வளர்ந்தபோது, செயல்முறைகளையும் சிக்கல்களையும் அதிகரிக்காமல், செயல்பாடுகளிலும் தயாரிப்புகளிலும் எழும் கூடுதல் சவால்களுக்குத் தீர்வு காண விரும்பியது. பொறியியல் பணிகளை Codex அடிப்படையில் ஒருங்கிணைத்து, பிற துறைகளுக்கும் அதை விரிவுபடுத்தியது cult.fit. இதன் மூலம் அனைத்துக் குழுக்களும் தரவைப் பகுப்பாய்வு செய்யவும், கருவிகளை உருவாக்கவும், யோசனைகளை நடைமுறைக்குக் கொண்டுவரவும் உதவுகிறது. Codex பயன்பாட்டுடன், தனது செயற்கை நுண்ணறிவுப் பயிற்சியாளர் உள்ளிட்ட சேவைகள் மூலம் உறுப்பினர்களுக்குத் தனிப்பயனாக்கப்பட்ட அனுபவங்களை உருவாக்க OpenAI பயன்பாட்டு நிரலாக்க இடைமுகத்தையும் பயன்படுத்துகிறது.

cult.fit நிறுவனத்தின் தலைமைத் தொழில்நுட்ப அதிகாரி சந்தோஷ் குமாருக்கு, நிறுவனம் செயல்படும் விதத்தை மாற்றும் வாய்ப்பாகச் செயற்கை நுண்ணறிவு அமைந்தது. “எங்கள் பணிகளை நடத்தும் விதத்தில் செயற்கை நுண்ணறிவை இயல்பான ஓர் அங்கமாக்க விரும்பினோம்,” என்கிறார் அவர். “செயற்கை நுண்ணறிவுக்கு முன்னுரிமை அளிக்கும் வகையில் எங்கள் செயல்பாடுகளை எப்படி நடத்துவது அல்லது மாற்றியமைப்பது? வாடிக்கையாளர்களுக்கு என்ன புதிய அனுபவங்களை வழங்கலாம்? எங்கள் நிறுவனத்தை நடத்தும் விதத்தை எப்படி மாற்றியமைக்கலாம்?”

Cult.fit நிறுவனத்தின் முதல் பெரிய மாற்றம் பொறியியல் துறையில் நிகழ்ந்தது. Codex பயன்பாட்டை ஒரே சீராக்குவதற்கு முன், நிரலாளர்கள் பல்வேறு நிரலாக்க ஏஜென்ட்களையும் உதவியாளர்களையும் பயன்படுத்தி வந்தனர். கருவிகள் மாறுபட்டதால் ரிபாசிட்டரிகள், ஏஜென்ட் வழிமுறைகள், திறன்கள், உருவாக்கப் பணிப்பாய்வுகள் ஆகியவற்றின் நடைமுறைகளும் மாறுபட்டன. இதனால் குழுக்களிடையே அறிவைப் பகிர்வதும் திறன்களை மறுபயன்பாடு செய்வதும் கடினமானது.

மென்பொருள் உருவாக்க வாழ்க்கைச் சுழற்சியை ஒரே சீராக்க ஒரு பொதுவான தளத்தை Cult.fit விரும்பியது. அதற்கான அடித்தளமாக Codex தளத்தை நிறுவனம் தேர்ந்தெடுத்தது. இப்போது ரிபாசிட்டரி கட்டமைப்புகள், திறன்கள், சோதனை, நிரல் மதிப்பாய்வு, பின்னூட்டச் சுழற்சிகள் ஆகியவற்றில் அனைத்துக் குழுக்களும் பொதுவான நடைமுறைகளைப் பின்பற்ற முடிந்தது.

அடுத்து, பிரத்யேகப் பொறியியல் பணிப்பாய்வுகளுக்கும் Codex பயன்பாட்டைக் குழு விரிவுபடுத்தியது. அதன் தள நம்பகத்தன்மைப் பொறியியல் ஏஜென்ட், கண்காணிப்புத் தளங்கள் மற்றும் பதிவுகளிலிருந்து தகவல்களைத் திரட்டி, சம்பவங்களை ஆராய்கிறது. பல நேரங்களில், பொறியாளர் மதிப்பாய்வுக்காகத் தீர்வை முன்மொழியும் pull request ஒன்றையும் உருவாக்குகிறது. பாதுகாப்பு ஏஜென்ட்கள் பாதிப்புகளைக் கண்டறிந்து சரிசெய்ய உதவுகின்றன. அவசர அழைப்புகளைக் கையாளும் பிற ஏஜென்ட்கள், பயன்பாட்டுச் சூழலில் மீண்டும் மீண்டும் ஏற்படும் சிக்கல்களை ஆராய்கின்றன.

முழுமையாக விவரக்குறிப்புகளைச் சார்ந்த உருவாக்க முறையை நோக்கியும் Cult.fit நகர்கிறது. இதில், மென்பொருள் உருவாக்க வாழ்க்கைச் சுழற்சி முழுவதையும் விவரக்குறிப்பு வழிநடத்தி, பொறியாளர் மதிப்பாய்வுக்கான pull request உருவாக உதவும். வரையறுக்கப்பட்ட தேவையிலிருந்து இயங்கும் நிரலுக்கு முன்னேற, மீண்டும் பின்பற்றக்கூடிய வழிமுறையைக் குழுக்களுக்கு இது வழங்குகிறது.

cult.fit செயலிக்கான சமூகப் பதிவோடை இதற்கு அண்மைய எடுத்துக்காட்டு. முன்பு இத்திட்டத்தை உருவாக்க ஓராண்டுக்கு மேல் ஆகியிருக்கும் எனக் குமார் மதிப்பிடுகிறார். புதிய பணிப்பாய்வைப் பயன்படுத்தி, குழு அதை முழுமையாக உருவாக்கி இரண்டு மாதங்களில் வெளியிட்டது.

அதன்பின் Codex பயன்பாடு பொறியியலைத் தாண்டியும் விரிவடைந்துள்ளது. Codex எளிதாகக் கையாளும் வகையில் நிறுவனத் தரவை cult.fit அமைத்தது. இதனால் குழுக்கள் தாங்களாகவே பதில்களைக் கண்டறிந்து, வழக்கமான பகுப்பாய்வுகளைச் செய்ய முடிகிறது. முன்பு, சிறிய தரவுக் கோரிக்கைகள்கூட மையப் பகுப்பாய்வாளர் குழுவின் வழியாகவே செல்ல வேண்டியிருந்ததால் பணிகள் தேங்கின.

குழுக்கள் தங்களுக்கான செயலிகளையும் பணிப்பாய்வுகளையும் உருவாக்குகின்றன. எடுத்துக்காட்டாக, செயல்திறன் மதிப்பாய்வுகள், நேரத்திட்டமிடல், பின்னூட்டச் சேகரிப்பு, அத்தகவல்களைத் தொகுத்தல் ஆகியவற்றை நிர்வகிக்க மனிதவளத் துறை Codex மூலம் ஒரு பணிப்பாய்வை உருவாக்கியது. அண்மைய மாதங்களில் பொறியியல் சாராத குழுக்கள் 20-க்கும் மேற்பட்ட உள்பயன்பாட்டுச் செயலிகளை உருவாக்கியுள்ளன.

தொழிலை நடத்தத் தேவையான மென்பொருள் குறித்த cult.fit நிறுவனத்தின் அணுகுமுறையை இந்த மாற்றம் மாற்றியமைக்கிறது. உள்பயன்பாட்டுத் தகவல் பலகை மென்பொருளின் செலவு கடுமையாக உயர்ந்தபோது, ஒரு பொறியாளர் வார இறுதியிலேயே Codex மூலம் அதன் செயல்பாடுகளை மீண்டும் உருவாக்கினார். இப்போது Cult.fit தனது சொந்தச் செயலியில் அந்தச் செயல்பாடுகளை இயக்குகிறது. இதனால் ஆண்டுக்கு $100,000-க்கும் மேற்பட்ட மென்பொருள் செலவைத் தவிர்க்கிறது.

இந்த மாற்றத்துக்கு ஊழியர்களுக்கு Codex அணுகலை வழங்குவது மட்டும் போதவில்லை. ஒரு பெரிய நிரலாக்கப் போட்டி, என்னென்ன சாத்தியம் என்பதை ஊழியர்கள் ஆரம்பத்திலேயே அறிய உதவியது. பின்னர், நிர்வாகக் குழுவை ஒன்றுதிரட்டி ஒருநாள் பயிலரங்கை நிறுவனம் நடத்தியது. அதில் பல்வேறு துறைத் தலைவர்கள் தங்கள் பணிக்குப் பொருத்தமான ஒன்றை Codex மூலம் உருவாக்கினர்.

ஊழியர்களின் திட்டங்களை யோசனையிலிருந்து பயன்பாட்டுக்குக் கொண்டுவர, பொறியியல் குழு வாரம் இருமுறை ஆலோசனை நேரங்களையும் நடத்துகிறது. தேர்ந்தெடுக்கப்பட்ட துறைகளில் தொழில்நுட்ப மற்றும் துறைசார் உதவிக்காகப் பொறியாளர்கள் இணைந்து பணியாற்றுகின்றனர்.

தனது செயற்கை நுண்ணறிவுப் பயிற்சியாளர் மூலம் உறுப்பினர் அனுபவத்திலும் செயற்கை நுண்ணறிவை இணைக்க OpenAI பயன்பாட்டு நிரலாக்க இடைமுகத்தை Cult.fit பயன்படுத்துகிறது. cult.fit உறுப்பினர்களில் 45%-க்கும் மேற்பட்டோர் முதன்முறையாக உடற்பயிற்சிக் கூடத்துக்கு வருபவர்கள். உடற்பயிற்சியைப் பழக்கமாக்கிக்கொள்ள அவர்களுக்கு வழிகாட்டுதல் முக்கியம். தனிப் பயிற்சியாளர் இல்லாமலேயே, தனிப்பயனாக்கப்பட்ட வழிகாட்டுதலுடன் உடற்பயிற்சி செய்ய உதவுவதற்காகச் சில ஆண்டுகளுக்கு முன் இச்செயற்கை நுண்ணறிவுப் பயிற்சியாளரை நிறுவனம் உருவாக்கியது.

Cult.fit உடற்பயிற்சிக் கூடப் பயனர்களில் சுமார் 20% பேர் தற்போது செயற்கை நுண்ணறிவுப் பயிற்சியாளரைப் பயன்படுத்துகின்றனர். மொழி மாடல்களின் முன்னேற்றத்தால், இந்த அனுபவத்தை மேலும் கலந்துரையாடலுக்கும் உரையாடலுக்கும் ஏற்றதாக மாற்றும் வாய்ப்பை cult.fit கண்டது.

புதிய பதிப்பு, குரல்வழித் தொடர்புக்கு முன்னுரிமை அளிக்கும் உடற்பயிற்சி அனுபவமாக வடிவமைக்கப்பட்டுள்ளது. OpenAI பயன்பாட்டு நிரலாக்க இடைமுகம் வழியாக GPT Realtime உடன் இணையும் இப்பயிற்சியாளர், இருவழிக் குரல் உரையாடல் மூலம் பயிற்சிக் குறிப்புகளை வழங்கவும் உடற்பயிற்சி விவரங்களைப் பதிவு செய்ய உதவவும் முடியும்.

முன்பு ஒவ்வொரு கோரிக்கையையும் மனிதப் பணியாளர்கள் மதிப்பிட வேண்டியிருந்த வாடிக்கையாளர் ஆதரவுப் பணிப்பாய்வுகளிலும் Cult.fit செயற்கை நுண்ணறிவைப் பயன்படுத்துகிறது. குழு உடற்பயிற்சி வகுப்புகளில் கலந்துகொள்ளாததற்கான அபராதத்தைத் தள்ளுபடி செய்யும் கோரிக்கைகள் ஓர் எடுத்துக்காட்டு.

நியாயமான காரணத்தால் வகுப்புக்கு வரவில்லை என உறுப்பினர் கூறும்போது, உள்ளூர் வானிலை, அந்த வகுப்பின் வருகைப் போக்கு போன்றவற்றைச் செயற்கை நுண்ணறிவு ஏஜென்ட் சரிபார்க்கும். அதன் அடிப்படையில் கோரிக்கையை மதிப்பிட்டு, அபராதத்தைத் தள்ளுபடி செய்வதா என முடிவெடுக்கும்.

Cult.fit இந்த ஏஜென்ட்களைத் தனது ஏற்கெனவே உள்ள Sprinklr ஆதரவுத் தளத்தில் உருவாக்கி, பின்தள அமைப்புகளுடன் இணைத்தது. இதனால் பெரும்பாலும் மனிதர்கள் நடத்திய அரட்டைச் சேவையிலிருந்து, செயற்கை நுண்ணறிவுக்கு முன்னுரிமை தரும் பணிப்பாய்வாக வாடிக்கையாளர் ஆதரவு மாறுகிறது.

• அண்மைய மாதங்களில் பொறியியல் சாராத குழுக்கள் உருவாக்கிய 20+ உள்பயன்பாட்டுச் செயலிகள்

• Codex மூலம் உள்பயன்பாட்டுச் செயல்பாட்டை மீண்டும் உருவாக்கியதால் ஆண்டுக்கு $100,000+ மென்பொருள் செலவு சேமிப்பு

• வாடிக்கையாளர் ஆதரவுச் செலவில் 50%+ குறைவு

தனித்தனி செயற்கை நுண்ணறிவுப் பணிப்பாய்வுகளைக் கடந்து, பணிகள் நடக்கும் விதத்திலேயே செயற்கை நுண்ணறிவை ஒருங்கிணைத்த நிறுவனமாக மாறுவதே Cult.fit நிறுவனத்தின் அடுத்த கட்டம். செயல்பாடுகளைப் பொறுத்தவரை, “தானாக இயங்கும் செயல்பாட்டு அமைப்பு” என்பதே இலக்கு என்கிறார் குமார். இதில் முன்களக் குழுக்களுக்கான ஆதரவுப் பணிகளைச் செயற்கை நுண்ணறிவு அதிகம் ஏற்றுக்கொள்ளும்.

உறுப்பினர் அனுபவத்தில், “உங்கள் கையடக்கத்தில் ஒரு பயிற்சியாளர்” என்பதே இலக்கு. மனிதப் பயிற்சியாளரால் பலருக்கும் வழங்கக்கூடிய அளவைத் தாண்டித் தனிப்பயனாக்கப்பட்ட வழிகாட்டுதலை விரிவுபடுத்துவதே நோக்கம். நிறுவனத்திற்குள், செயற்கை நுண்ணறிவால் குழுக்கள் நீக்கக்கூடிய பணித் தடைகளை cult.fit தொடர்ந்து தேடுகிறது. மேலும் பல ஊழியர்கள் தாங்களாகவே செயலிகளை உருவாக்கி, தகவல்களைப் பகுப்பாய்வு செய்து, பணிப்பாய்வுகளைத் தானியக்கமாக்கும்போது, மேலும் பல யோசனைகள் நேரடியாகச் செயல்படும் தீர்வுகளாக மாற முடியும்.