சீரான தரநிலைகள் மூலம் பரவலான அணுகல்

எங்கள் மாடல்களை வழங்கும் சேவைகளில் பாதுகாப்புக் கொள்கைகளை ஒருமைப்படுத்த, கடந்த சில மாதங்களாக வாடிக்கையாளர்களுடனும் கூட்டாளர்களுடனும் இணைந்து பணியாற்றியுள்ளோம். அந்தத் தேவைகளை மேலும் தெளிவாக்கவும், உருவாக்குநர்கள் எளிதாகப் பின்பற்றவும் எங்கள் பயன்பாட்டுக் கொள்கைகளையும் புதுப்பிக்கிறோம்.

GPT‑6 Astra போன்ற மாடல்கள், உருவாக்குநர்களும் வணிகங்களும் உருவாக்கக்கூடியவற்றின் சாத்தியங்களை விரிவுபடுத்துகின்றன. இந்தத் திறன்கள் வளரும்போது, பாதுகாப்பு நடவடிக்கைகள் பயனுள்ளதாக இருப்பதையும், எங்கள் மாடல்களை வழங்கும் சேவைகள் அனைத்திலும் ஒரே சீராகப் பயன்படுத்தப்படுவதையும் உறுதிசெய்யப் பணியாற்றுகிறோம்.

ஒரு மாடலைப் பயன்பாட்டுக்குக் கொண்டுவரும் முன், அதன் திறன்களையும் அபாயங்களையும் மதிப்பிடுகிறோம்; பாதுகாப்புத் தேவைகளைப் பின்பற்றப் பயிற்சியளிக்கிறோம்; அதன் பாதுகாப்பு நடவடிக்கைகளை மக்கள் வேண்டுமென்றே மீற முயலும்போதும் அவை தாக்குப்பிடிக்கின்றனவா எனச் சோதிக்கிறோம். எங்கள் பாதுகாப்பு மற்றும் மனித நோக்கங்களுடன் ஒத்திசைவதற்கான அணுகுமுறையில் விளக்கியுள்ளபடி, ஒன்றையொன்று வலுப்படுத்தும் வகையில் வடிவமைக்கப்பட்ட பாதுகாப்பு நடவடிக்கைகளை ஒருங்கிணைக்கிறோம்.

பயன்பாட்டுக்குக் கொண்டுவந்த பிறகு, தவறாகப் பயன்படுத்தப்படும் சாத்தியங்களைக் கண்காணித்து, கவலைக்குரியவற்றை விசாரிக்கிறோம். எடுத்துக்காட்டாக, இணையவெளியில் தவறான பயன்பாட்டைக் குறைக்க, தீங்கு விளைவிக்கும் கோரிக்கைகளை மறுக்க மாடல்களுக்குப் பயிற்சியளிக்கிறோம். மேலும், எவ்வாறு செயல்படுவது எனத் தீர்மானிக்க, பல்வேறு உரையாடல்களில் சந்தேகத்திற்குரிய போக்குகளைக் கண்டறியும் முறைமைகளைப் பயன்படுத்துகிறோம். நம்பகமான அணுகலுக்கான திட்டங்கள் கூடுதல் பாதுகாப்பை வழங்குவதுடன், எங்களின் மிக ஆற்றல்மிக்க திறன்களை அணுகுவதற்கான தகுதித் தேவைகளையும் நிபந்தனைகளையும் நிர்ணயிக்கின்றன.

மாடலிலேயே சில பாதுகாப்பு நடவடிக்கைகள் உள்ளமைக்கப்பட்டுள்ளன; மற்றவை அதைச் சார்ந்த முறைமைகளையும் நபர்களையும் சார்ந்துள்ளன. மக்கள் எங்கள் மாடல்களை நேரடியாக அணுகினாலும், கூட்டாளர் வழியாக அணுகினாலும், இருவகைப் பாதுகாப்பு நடவடிக்கைகளும் பயனுள்ளதாக இருக்க வேண்டும்.

எங்கள் மாடல்களை எந்தச் சேவை வழியாக அணுகுவது என்பதை உருவாக்குநர்களும் வணிகங்களும் தேர்வுசெய்ய முடிவதோடு, அந்தச் சேவைகள் அனைத்திலும் ஒரே சீரான பாதுகாப்பு நடவடிக்கைகள் இருக்க வேண்டும். வழங்குநர்கள் அனைவரிடமும் எங்கள் பாதுகாப்பு நடவடிக்கைகளை ஒருமைப்படுத்தக் கொள்கைகளை உருவாக்கியுள்ளோம். அவற்றைச் செயல்படுத்தும் விதம் எங்கள் பாதுகாப்புத் தரநிலைகளுக்கு இணையாகவோ அவற்றை விஞ்சியோ இருப்பதை உறுதிசெய்ய ஒவ்வொரு கூட்டாளருடனும் பணியாற்றுகிறோம். மக்கள் எங்கள் மாடல்களை OpenAI மூலம் நேரடியாகவோ, அவற்றைத் தங்கள் உள்கட்டமைப்பில் இயக்கும் கூட்டாளர்கள் மூலமாகவோ, மறுவிற்பனைக் கூட்டாளர்கள் மூலமாகவோ அணுகினாலும் இந்தக் கொள்கைகள் பொருந்தும்.

OpenAI மாடல்களுக்கான அணுகலை வழங்கும் கூட்டாளர்கள், எங்களுடையவற்றுக்கு இணையான பாதுகாப்பு நடவடிக்கைகளைப் பராமரிக்கவும், சாத்தியமான விதிமீறல்களை விசாரிக்கவும், சிக்கல்கள் கண்டறியப்படும்போது உரிய நடவடிக்கை எடுக்கவும் இந்தக் கொள்கைகள் வலியுறுத்துகின்றன. எங்கள் மாடல்களுக்கான அணுகலை வழங்கும் சேவைகள் அனைத்திலும் கட்டுப்பாடுகள் பயனுள்ளதாக நீடிக்க, அமலாக்கத்தில் ஒருங்கிணைந்து செயல்படுவதும் இதில் அடங்கும்.

இதை நடைமுறைப்படுத்த, வெவ்வேறு சேவைகள் எவ்வாறு செயல்படுகின்றன என்பதையும் வாடிக்கையாளர்கள் அவற்றை எவ்வாறு பயன்படுத்துகிறார்கள் என்பதையும் கருத்தில் கொள்ள வேண்டும். தனிப்பட்ட பாதுகாப்புச் செயலாக்கம் தொடர்பாக வாடிக்கையாளர்களுடனும் கூட்டாளர்களுடனும் நாங்கள் மேற்கொள்ளும் பணி இதற்கு ஓர் எடுத்துக்காட்டு ஆகும். வாடிக்கையாளர்களின் நுணுக்கமான தரவுகள் குறித்து அவர்களுக்கு அதிகத் தேர்வுச் சுதந்திரமும் கட்டுப்பாடும் அளித்தபடியே, பயனுள்ள பாதுகாப்பு நடவடிக்கைகளை உருவாக்க முடியும் என்பதை இது காட்டுகிறது.

பாதுகாப்பான மாடல் உருவாக்கம் மற்றும் செயற்கை நுண்ணறிவின் கவனத்துடன் கையாள வேண்டிய பயன்பாடுகளுக்கான விதிகளைத் தெளிவுபடுத்த, எங்கள் பயன்பாட்டுக் கொள்கைகளையும் புதுப்பிக்கிறோம். இவை நவம்பர் 20, 2026 முதல் நடைமுறைக்கு வரும். அந்தப் பணியின் தொடர்ச்சியாக, புதுப்பிக்கப்பட்ட பயன்பாட்டுக் கொள்கைகள் ஒரு தேவையை விதிக்கின்றன: மாடல் வழிப்படுத்திகள் அல்லது செயற்கை நுண்ணறிவு நுழைவாயில்கள் போன்ற, எங்கள் மாடல்களுக்கு நேரடி அணுகலை வழங்கும் சேவைகள், அந்த அணுகலை வழங்குவதற்கு முன் எங்கள் மதிப்பாய்வையும் ஒப்புதலையும் பெற வேண்டும்.

எவை அனுமதிக்கப்படுகின்றன, எவை கட்டுப்படுத்தப்படுகின்றன, வாடிக்கையாளர்களும் கூட்டாளர்களும் எவ்வாறு கேள்விகள் கேட்கலாம் அல்லது கொள்கைகளைப் பின்பற்றுவதிலுள்ள சிக்கல்களைத் தீர்க்கலாம் என்பதைத் தொடர்ந்து விளக்குவோம்.

எங்கள் மாடல்களின் திறன்கள் மேம்படும்போது, தவறான பயன்பாட்டைக் கண்டறியும், விசாரிக்கும், அதற்கு எதிராக நடவடிக்கை எடுக்கும் முறைகளைத் தொடர்ந்து மேம்படுத்துவோம். இறுதிப் பயனர்கள், ஊடுருவப்பட்ட கணக்குகள் அல்லது கசிந்த பயன்பாட்டு நிரலாக்க இடைமுகக் குறியீடுகள் வழியாக வாடிக்கையாளர்கள் தவறான பயன்பாட்டை எதிர்கொள்ளலாம். அத்தகைய சிக்கல்களைப் புரிந்துகொண்டு தீர்க்க அவர்களுடன் இணைந்து பணியாற்றுகிறோம்.

SafetyIDகளை அறிமுகப்படுத்தவும் வாடிக்கையாளர்களுடன் இணைந்து பணியாற்றுகிறோம். விசாரணையின்போது தனித்தனி இறுதிப் பயனர்களை வேறுபடுத்தி அறிய உதவும் இவற்றை வாடிக்கையாளர்கள் வழங்கலாம். இதற்கு அந்தப் பயனர்களின் அடையாளங்களை OpenAI அறிய வேண்டியதில்லை. SafetyIDகள் மூலம், மற்றவர்களுக்கு ஏற்படும் இடையூறுகளைக் குறைத்தபடியே, சாத்தியமான தவறான பயன்பாட்டுக்கு எதிராக இன்னும் துல்லியமாக நடவடிக்கை எடுக்க முடியும்.

பதிவுசெய்யப்பட்ட நடத்தை மற்றும் அபாயத்தின் அடிப்படையில் அமலாக்க முடிவுகளை எடுக்கிறோம்; எங்கள் விதிகளை ஒரே சீராகப் பயன்படுத்துகிறோம்; சூழ்நிலைக்கு ஏற்ற அளவில் நடவடிக்கை எடுக்கிறோம். அணுகலைக் கட்டுப்படுத்திய பிறகு, நடத்தை, உறுதிமொழிகள் அல்லது பாதுகாப்பு நடவடிக்கைகளில் ஏற்படும் குறிப்பிடத்தக்க மாற்றங்கள் எங்கள் முடிவுக்குக் காரணமான சிக்கல்களைத் தீர்த்தால், அந்தக் கட்டுப்பாடுகளை மறுபரிசீலனை செய்கிறோம்.

செயற்கை நுண்ணறிவால் மேலும் பலர் பயனடைய வேண்டும் என்பதே எங்கள் விருப்பம் ஆகும். தெளிவான விதிகளும் ஒரே சீரான பாதுகாப்பு நடவடிக்கைகளும், உருவாக்குநர்களும் வணிகங்களும் புதியவற்றை உருவாக்கவும், போட்டியிடவும், தங்களுக்கு மிகவும் ஏற்ற சேவைகளைத் தேர்வுசெய்யவும் உதவ வேண்டும்.