OpenAI உடன் சட்டப் பணிகளை மாற்றியமைக்கும் AT&T

AT&T-யின் சட்டத் துறையில் உலகெங்கும் நூற்றுக்கணக்கான வழக்கறிஞர்களும் சட்ட வல்லுநர்களும் பணியாற்றுகிறார்கள். நிறுவனத்திற்கு ஆலோசனை வழங்குவதற்கு முன், அவர்கள் உண்மை விவரங்கள், ஆவணங்கள், தொடர்புடைய முந்தைய பணிகள் ஆகியவற்றைத் திரட்ட வேண்டும். இதற்குப் பல்வேறு குழுக்களின் நிபுணத்துவம் அடிக்கடி தேவைப்படுகிறது. AT&T-யின் மூத்த நிர்வாகத் துணைத் தலைவரும் தலைமைச் சட்ட ஆலோசகருமான டேவிட் மெக்காஃபீயைப் பொறுத்தவரை, அந்த அனுபவ அறிவை எளிதாக அணுக வழிசெய்வதே துறையின் பணிகளை மேம்படுத்துவதற்கு அடிப்படை.

அந்த அடுத்த கட்டத்தை உருவாக்க AT&T, OpenAI உடன் இணைந்து செயல்படுகிறது. “நிறுவனம் முழுவதும் அறிவை இணைத்து, நாம் அனைவரும் அதைப் பயன்படுத்த உதவும் அடிப்படைக் கட்டமைப்பை உருவாக்க OpenAI உடனான எங்கள் கூட்டாண்மை வழிவகுக்கும்” என்கிறார் மெக்காஃபீ.

இந்தக் கூட்டுச் செயல்பாடு, AT&T-யின் லீகல்எட்ஜ் குழுவின் பணிகளை அடுத்த கட்டத்துக்கு எடுத்துச் செல்கிறது. வழக்கறிஞர்கள், சட்ட வல்லுநர்கள், தொழில்நுட்ப வல்லுநர்கள், திட்ட மேலாளர்கள் அடங்கிய இக்குழு, முக்கியமான சட்ட விவகாரங்களில் செயற்கை நுண்ணறிவைப் பயன்படுத்துவதில் கவனம் செலுத்துகிறது. நிறுவனம் இதுவரை திரட்டியுள்ள நிபுணத்துவத்தை, வழக்கறிஞர்களிடம் வரும் பணிகளுடன் மேலும் விரிவாக இணைப்பதே அடுத்த படி.

நிறுவனத்தின் அனைத்துப் பிரிவுகளிலிருந்தும் கோரிக்கைகள் வருகின்றன. சட்டக் குழுக்கள் அபாயங்களைத் தவறவிடாமல் விரைவாகப் பதிலளிக்க வேண்டும். ஆலோசனை வழங்குவதற்கு முன், அவர்கள் பிரச்சினையைப் புரிந்துகொண்டு, தொடர்புடைய பின்னணித் தகவல்களைத் திரட்டி, எதற்கு முதலில் கவனம் செலுத்த வேண்டும் என்பதைத் தீர்மானிக்க வேண்டும். எனவே, கோரிக்கைகளைப் பெற்றுப் பரிசீலிக்கும் நடைமுறை, நிறுவனத்தைப் பாதுகாப்பதில் முக்கியப் பங்கு வகிக்கிறது. AT&T-யின் தலைமை இணக்க அதிகாரி பில் ரயன், திட்டமிடப்பட்டுள்ள ஒரு முயற்சியை, “இயல்பான மொழியில் கோரிக்கைகளைச் சமர்ப்பிக்க ஓர் நுழைவாயில்” கொண்ட அமைப்பு என விவரிக்கிறார். இந்த அமைப்பு கோரிக்கைகளை வகைப்படுத்தி, முன்னுரிமை அளித்து, தொடர்புடைய முன்னுதாரணங்கள், ஆய்வுகள், முந்தைய பணிகளுடன் அவற்றை இணைக்கும். மேலும், பொறுப்பான சட்ட வல்லுநருக்கு முந்தைய பின்னணித் தகவல்களையும் முதலில் மேற்கொள்ள வேண்டிய நடவடிக்கைகளுக்கான பரிந்துரைகளையும் வழங்கும்.

இதனால், ஒரு விவகாரத்தை மதிப்பிடத் தேவையான தகவல்களைத் திரட்டுவதில் குறைந்த நேரமே செலவாகும். வழக்கறிஞர்கள் தெளிவான புரிதலுடன் பணியைத் தொடங்க முடியும். நிறுவனத்தின் இன்னும் பல தேவைகளுக்குத் தங்களது சட்டரீதியான மதிப்பீட்டை வழங்கும் வகையில் துறைக்கு உதவுவதற்கான வாய்ப்பாக இதை ரயன் பார்க்கிறார்.

“சட்டரீதியான மதிப்பீட்டை இன்னும் பரவலாக வழங்கும் திறனை விரிவுபடுத்த முடியும் என்பதே எதிர்காலம் குறித்து எனக்கு மிகுந்த உற்சாகம் அளிக்கிறது” என்கிறார் அவர்.

மெக்காஃபீயைப் பொறுத்தவரை, இந்தப் பணிக்கு வழிகாட்டும் கொள்கை தெளிவாகவே உள்ளது: “முடிவெடுக்கும் அதிகாரம் எப்போதும் வழக்கறிஞர்களிடமே இருக்கும்.” சிறந்த தகவல்களை எளிதில் கிடைக்கச் செய்வதன் மூலம், வழக்கறிஞர்கள் தங்கள் நிபுணத்துவத்தைப் பயன்படுத்துவதற்கு அதிக நேரம் ஒதுக்க உதவுவதே இந்தக் கூட்டாண்மையின் நோக்கம்.

லீகல்எட்ஜ் குறித்தும் OpenAI உடனான AT&T-யின் அடுத்தகட்ட சட்டப் பணிகள் குறித்தும் மெக்காஃபீயும் ரயனும் கலந்துரையாடுவதைப் பாருங்கள்.