ChatGPT Sites
அத்தகைய எளிய இணையதளம் அல்லது செயலியை Codex மூலம் உருவாக்குங்கள்.
Codex மூலம் பயன்பாட்டுக்குத் தயாரான இணையதளத்தையோ எளிய செயலியையோ உருவாக்கிப் பகிர ChatGPT தளங்கள் உதவுகின்றன.
உங்கள் தேவையை விவரித்து, Codex உடன் இணைந்து தளத்தை உருவாக்கி வெளியிடலாம். அதை உங்கள் வர்க்ஸ்பேஸில் உள்ளவர்கள் திறந்து பயன்படுத்தலாம்.
ஒரு பணிக்கெனத் தனி இடம் தேவைப்படும்போது தளம் உதவும். அது வெளியீட்டுப் பணிக் கண்காணிப்புக் கருவியாகவோ, வாராந்திர ஆய்வுக்கான தகவல் பலகையாகவோ, தேர்வுகளை ஆராயும் கணக்கீட்டுக் கருவியாகவோ, புதிய திட்டப்பணிக்கான அறிமுகப் பக்கமாகவோ இருக்கலாம்.
உங்கள் நிறுவனம் அல்லது வர்க்ஸ்பேஸில் உள்ளவர்களுக்காக உருவாக்கப்படும் வலைப்பக்கமே உள்பயன்பாட்டுத் தளம். குறிப்பிட்ட பணிக்காகக் குழுவினர் மீண்டும் மீண்டும் பயன்படுத்தக்கூடிய ஒரே இடத்தை அது வழங்குகிறது.
எடுத்துக்காட்டாக, ஒரு தயாரிப்பின் வெளியீட்டுக்கான முக்கியக் கட்டங்கள், பொறுப்பாளர்கள், இணைப்புகள், இடர்கள் ஆகியவற்றை உள்பயன்பாட்டுத் தளம் ஒருங்கிணைக்கலாம். பல ஆவணங்களில் தேடுவதற்குப் பதிலாக, குழு உறுப்பினர்கள் ஒரே பக்கத்தைத் திறந்து சமீபத்திய தகவல்களைப் பார்க்கலாம்.
எளிய செயலியும் இதைப் போன்றதே. ஆனால் அதில் தகவல்களைக் கொண்டு பயனர்கள் செயல்படுவதற்கான வசதியும் இருக்கும். ஒரு கணக்கீட்டுக் கருவி சில உள்ளீடுகளைக் கேட்டு முடிவைக் காட்டலாம். ஒரு தகவல் பலகை, ஒரே சீரான வடிவத்தில் தகவல்களை ஆய்வு செய்ய உதவலாம்.
இத்தகைய கருவிகளின் செயல்பாட்டு வரம்பு பொதுவாக ஒரு முழுமையான மென்பொருள் தயாரிப்பைவிடக் குறைவாகவே இருக்கும். இவை பெரும்பாலும் ஒரு குழு, ஒரு திட்டப்பணி அல்லது மீண்டும் மீண்டும் நடைபெறும் ஒரு பணிச்செயல்முறைக்காக உருவாக்கப்படுகின்றன.
வடிவம் | எதற்குப் பயன்படும் | எடுத்துக்காட்டு |
|---|---|---|
ஆவணம் | தகவல்களைப் படிக்க அல்லது பகிர | எழுதப்பட்ட வெளியீட்டுத் திட்டம் |
உள்பயன்பாட்டுத் தளம் | குழுவினர் மீண்டும் மீண்டும் பார்க்க ஒரே பக்கத்தை வழங்க | முக்கியக் கட்டங்களும் இணைப்புகளும் கொண்ட வெளியீட்டுப் பணிக் கண்காணிப்புக் கருவி |
எளிய செயலி | தகவல்களைக் கொண்டு பணியாற்ற உதவ | திட்டப்பணிக்கான தேர்வுகளை ஒப்பிடும் கணக்கீட்டுக் கருவி |
பெரிய அளவிலான மென்பொருள் திட்டப்பணி | தயாரிப்பின் அதிகச் சிக்கலான அல்லது நீண்டகாலத் தேவையை நிறைவேற்ற | மேம்பட்ட உள்கட்டமைப்பு தேவைப்படும் தனிப்பயன் அமைப்பு |
Codex கணினிச் செயலியில், நடைமுறைப் பணிக்கான தளம் அல்லது எளிய செயலியை உருவாக்க Codex-இடம் கேட்கலாம்.
தளத்தை உருவாக்கவும், உருவாக்கிய அதே வர்க்ஸ்பேஸிலிருந்து வெளியிடவும் Codex உதவுகிறது. உருவாக்கப்பட்டதைச் சரிபார்த்து, எதை மாற்ற வேண்டும் என்று Codex-இடம் கூறலாம். பிறர் பயன்படுத்தத் தயாரானதும் புதுப்பித்த பதிப்பை வெளியிடலாம்.
ChatGPT தளங்களில் வலையேற்றம், அணுகல் கட்டுப்பாடுகள், சேமிப்பகம், தரவுத்தள ஆதரவு ஆகியவை உள்ளன.
ஒரு குறிப்பிட்ட குழுவின் தெளிவான ஒரு சிக்கலைத் தீர்ப்பதே நல்ல முதல் தளத்திற்கான அடிப்படை.
உங்கள் குழுவின் தேவை… | நீங்கள் உருவாக்கக்கூடியது… | சேர்க்க வேண்டியவை… |
|---|---|---|
வெளியீட்டுப் பணிகளைக் கண்காணித்தல் | வெளியீட்டுப் பணிக் கண்காணிப்புக் கருவி | முக்கியக் கட்டங்கள், பொறுப்பாளர்கள், இணைப்புகள், இடர்கள் |
ஒவ்வொரு வாரமும் தகவல்களை ஆய்வு செய்தல் | தகவல் பலகை | ஆய்வுக் கூட்டத்தில் பயன்படுத்தப்படும் தகவல்கள் |
தேர்வுகளை ஒப்பிடுதல் | கணக்கீட்டுக் கருவி | உள்ளீடுகள், அனுமானங்கள், தெளிவான முடிவு |
திட்டப்பணியில் புதிதாகச் சேர்பவர்களுக்கு உதவுதல் | அறிமுகப் பக்கம் | பின்னணித் தகவல்கள், வளங்கள், அடுத்த படிகள் |
திட்டப்பணியை ஒழுங்குபடுத்துதல் | உள்பயன்பாட்டுப் பக்கம் | முக்கிய இணைப்புகள், புதிய தகவல்கள், குறிப்பு ஆவணங்கள் |
பயனுள்ள தளம் சிறியதாகவும் இருக்கலாம். ஒரு குறிப்பிட்ட பணிக்காக மக்கள் திறந்து பயன்படுத்தக்கூடிய ஒன்றை உருவாக்குவதே நோக்கம்.
எதை உருவாக்க விரும்புகிறீர்கள், அதை யார் பயன்படுத்துவார்கள் என்பதை முதலில் Codex-இடம் தெரிவிக்கவும்.
எடுத்துக்காட்டாக:
பல துறைகளைச் சேர்ந்த எங்கள் குழுவுக்காக வெளியீட்டுப் பணிகளைக் கண்காணிக்கும் கருவியை உருவாக்கு. முக்கியக் கட்டங்கள், பொறுப்பாளர்கள், இணைப்புகள், இடர்கள் மற்றும் வாராந்திர நிலவரப் பகுதியைச் சேர். எங்கள் வாராந்திர ஆய்வின்போது பக்கத்தை விரைவாகப் பார்த்துப் புரிந்துகொள்ளும் வகையில் அமை.
தளத்தைத் திறந்து, நீங்கள் நினைத்த பணிச்செயல்முறைக்கு ஏற்றபடி உள்ளதா எனச் சரிபார்க்கவும்.
உள்ளடக்கம், அமைப்பு, பெயரிடல்கள், கணக்கீடுகள் மற்றும் பயனர் செயல்படுத்தக்கூடிய அம்சங்களைப் பார்க்கவும். குழு உறுப்பினர் ஒருவர் முதல்முறையாகத் திறப்பதுபோல், தளத்தின் முக்கியச் செயல்பாடுகளைச் சோதிக்கவும்.
உரையாடலைத் தொடர்ந்து, எதை மாற்ற விரும்புகிறீர்கள் என்பதை விவரிக்கலாம்.
எடுத்துக்காட்டாக:
இடர்கள் பகுதியைப் பக்கத்தில் மேலே நகர்த்து. முக்கியக் கட்டங்களின் பொறுப்பாளரைக் கொண்டு வடிகட்டும் வசதியைச் சேர். வாராந்திர நிலவரங்களை விரைவாகப் பார்த்துப் புரிந்துகொள்ளும்படி அமை.
தளம் தயாரானதும், அதை வெளியிட Codex-இடம் கேட்கவும்.
வெளியிடப்பட்ட பதிப்புக்கான இணைய முகவரியை Codex வழங்கும். தளம் தானாக வெளியிடப்படவில்லை என்றால், இவ்வாறு கேட்கவும்:
இந்தத் தளத்தை வெளியிட்டு அதன் இணைய முகவரியை எனக்குக் கொடு.
வெளியிடப்பட்ட தளத்தின் இணைப்பை Chrome-இல் திறந்து, பகிர்வதற்கு முன் தளத்தை மீண்டும் ஒருமுறை சரிபார்க்கவும். செயலிக்குள் உள்ள உலாவிக்குத் தற்போது ஆதரவு இல்லை.
மேலும் பலருக்கு அணுகலை வழங்கத் தயாரானதும், Codex பதிலின் முடிவில் உள்ள பகிர் பொத்தானைக் கிளிக் செய்யவும்.
உங்கள் வர்க்ஸ்பேஸ் அமைப்புகளைப் பொறுத்து, குறிப்பிட்ட நபர்கள் அல்லது குழுக்களுடன் தளத்தைப் பகிரலாம். தள அமைப்புகளைச் சரிபார்க்கவும் அணுகலை நிர்வகிக்கவும், பின்னர் Codex பக்கப்பட்டியில் உள்ள தளங்கள் பக்கத்திற்குத் திரும்பலாம்.
Enterprise வர்க்ஸ்பேஸ்களில், ChatGPT தளங்கள் கிடைக்க வேண்டுமா என்பதை நிர்வாகிகள் கட்டுப்படுத்துவார்கள்.
ஒரு தளத்தில் திட்டங்கள், பகுப்பாய்வுகள், திட்டப்பணி விவரங்கள் அல்லது பயனர் உள்ளீடுகள் இருக்கலாம். பகிர்வதற்கு முன், உள்ளடக்கத்தையும் அதைப் பார்க்கப்போகும் நபர்களையும் சரிபார்க்கவும்.
Sites மூலம் தற்போது நேரடித் தரவுடன் இணைக்க முடியாது. தளத்தின் தகவல்கள் அடிக்கடி மாறினால், திட்டமிட்ட நேரங்களில் சமீபத்திய தகவல்களைச் சேகரித்து, தளத்திற்கான புதுப்பித்த பதிப்பைத் தயாரிக்கத் தனியான தானியக்கச் செயல்முறையை உருவாக்கலாம். எடுத்துக்காட்டாக, ஒவ்வொரு வாரநாள் காலையிலும் அங்கீகரிக்கப்பட்ட திட்டப்பணிக் கண்காணிப்புக் கருவியை ஒரு தானியக்கச் செயல்முறை ஆய்வு செய்யலாம். மாறியவற்றைச் சுருக்கி, சமீபத்திய முக்கியக் கட்டங்கள், பொறுப்பாளர்கள், இடர்கள் ஆகியவற்றை ஒரே சீரான வடிவத்தில் ஒழுங்குபடுத்தலாம். பின்னர் புதிய தகவல்களைச் சரிபார்த்து, தேவைப்படும்போது தளத்தைப் புதுப்பிக்கலாம்.
ChatGPT தளங்கள், குறிப்பிட்ட நோக்கத்திற்கான இணையதளங்களையும் எளிய செயலிகளையும் உருவாக்குவதற்காக வடிவமைக்கப்பட்டவை. சில திட்டப்பணிகளுக்கு வேறொரு கருவியோ கூடுதல் மென்பொருள் உருவாக்கப் பணியோ தேவைப்படலாம்.
உங்கள் குழு ஏற்கெனவே அறிந்துள்ள நடைமுறைத் திட்டப்பணிக்கு உதவும் தளத்துடன் தொடங்கவும்.
இந்தத் திட்டப்பணியில் புதிதாகச் சேரும் உறுப்பினர்களுக்கான அறிமுகத் தளத்தை உருவாக்கு. சுருக்கமான கண்ணோட்டம், முக்கிய ஆவணங்கள், குழு உறுப்பினர்களின் விவரப் பட்டியல், பொதுவான கேள்விகள், முதல் வாரத்திற்கான சரிபார்ப்புப் பட்டியல் ஆகியவற்றைச் சேர். உருவாக்குவதற்கு முன், எளிய பக்க அமைப்பை முன்மொழிந்து, உனக்குத் தேவையான கேள்விகளை என்னிடம் கேள்.
அல்லது ஒரு கணக்கீட்டுக் கருவியை முயன்று பாருங்கள்:
திட்டப்பணிக்கான தேர்வுகளை ஒப்பிட எங்கள் குழுவுக்கு உதவும் எளிய செயலியை உருவாக்கு. முதலில் உள்ளீடுகள், அனுமானங்கள், மதிப்பெண் வழங்கும் விதிகளை என்னிடம் கேள். பின்னர் மதிப்பெண் எப்படிக் கணக்கிடப்பட்டது என்பதைக் காட்டும் முடிவுகள் பக்கத்தை உருவாக்கு.
தளத்தைப் பற்றி எளிய மொழியில் விவரிப்பதன் மூலம் தொடங்கலாம். Codex முதல் பதிப்பை உருவாக்கி, உங்கள் கருத்துகளின் அடிப்படையில் மாற்றங்களைச் செய்ய முடியும்.
குறிப்பிட்ட நோக்கத்திற்கான உள்பயன்பாட்டுக் கருவி, பக்கம், தகவல் பலகை அல்லது கணக்கீட்டுக் கருவியை உருவாக்க ஒரு தளம் பொருத்தமானது. அதிகச் சிக்கலான தயாரிப்புக்குத் தனியான மென்பொருள் உருவாக்கத் திட்டம் தேவைப்படலாம்.
மாற்றத்தைச் செய்ய Codex-இடம் கேட்டு, புதிய பதிப்பைச் சரிபார்த்து, தயாரானதும் புதுப்பிப்பை வெளியிடவும்.
Sites மூலம் தற்போது நேரடித் தரவு மூலங்களுடன் இணைக்க முடியாது. அடிக்கடி மாறும் தகவல்களுக்கு, திட்டமிட்ட நேரங்களில் புதிய தகவல்களைச் சேகரிக்கத் தனியான தானியக்கச் செயல்முறையைப் பயன்படுத்தவும். பின்னர் மாற்றங்களைச் சரிபார்த்து, தேவைப்படும்போது தளத்தைப் புதுப்பிக்கவும்.
ChatGPT தளங்கள் இயக்கப்பட்டுள்ளனவா, யார் தளங்களை உருவாக்கவும் பகிரவும் முடியும், வர்க்ஸ்பேஸில் என்னென்ன தளங்கள் உள்ளன, அவற்றை யார் அணுகலாம், ஒரு தளத்தை எப்போது அகற்ற வேண்டும் ஆகியவற்றை நிர்வாகிகள் உறுதிப்படுத்த வேண்டும்.
