ਘੁਟਾਲਾ ਕਾਰਵਾਈਆਂ: ਆਨਲਾਈਨ ਧੋਖਾਧੜੀ ਨੈੱਟਵਰਕ

ਇਹ ਕੇਸ ਅਧਿਐਨ ਮੂਲ ਰੂਪ ਵਿੱਚ OpenAI ਦੀ ਅਕਤੂਬਰ 2025⁠(ਨਵੀਂ ਵਿੰਡੋ ਵਿੱਚ ਖੁੱਲ੍ਹਦਾ ਹੈ) ਦੀ ਰਿਪੋਰਟ ਵਿੱਚ ਪ੍ਰਕਾਸ਼ਿਤ ਹੋਇਆ ਸੀ.

ਸੰਭਾਵਤ ਤੌਰ ’ਤੇ ਕੰਬੋਡੀਆ, ਮਿਆਂਮਾਰ ਅਤੇ ਨਾਈਜੀਰੀਆ ਤੋਂ ਚੱਲ ਰਹੇ ਨੈੱਟਵਰਕ, ਲੋਕਾਂ ਨਾਲ ਆਨਲਾਈਨ ਧੋਖਾਧੜੀ ਕਰਨ ਦੀਆਂ ਕੋਸ਼ਿਸ਼ਾਂ ਵਿੱਚ ChatGPT ਦੀ ਦੁਰਵਰਤੋਂ ਕਰ ਰਹੇ ਹਨ.

ਅਸੀਂ ਨੁਕਸਾਨਦੇਹ ਉਦੇਸ਼ਾਂ ਲਈ ਆਪਣੇ ਮਾਡਲਾਂ ਦੀ ਦੁਰਵਰਤੋਂ ਦੀਆਂ ਕੋਸ਼ਿਸ਼ਾਂ ਦੀ ਪਛਾਣ ਕਰਨ, ਉਨ੍ਹਾਂ ਨੂੰ ਰੋਕਣ ਅਤੇ ਨਾਕਾਮ ਕਰਨ ਲਈ ਵਚਨਬੱਧ ਹਾਂ. ਇਨ੍ਹਾਂ ਦੁਰਵਰਤੋਂ ਵਿੱਚ ਘੁਟਾਲੇ ਵੀ ਸ਼ਾਮਲ ਹਨ, ਜਿਨ੍ਹਾਂ ਵਿੱਚ ਅਸੀਂ ਲੋਕਾਂ ਨੂੰ ਗੁਮਰਾਹ ਕਰਕੇ ਉਨ੍ਹਾਂ ਨਾਲ ਧੋਖਾਧੜੀ ਕਰਨ ਲਈ ਸਾਡੇ ਮਾਡਲਾਂ ਦੀ ਦੁਰਵਰਤੋਂ ਦੀ ਕੋਸ਼ਿਸ਼ ਕਰਨ ਵਾਲੇ ਮਾੜੇ ਅਨਸਰਾਂ ਦਾ ਪਤਾ ਲਗਾ ਕੇ ਉਨ੍ਹਾਂ ’ਤੇ ਪਾਬੰਦੀ ਲਗਾਉਂਦੇ ਹਾਂ. ਪਿਛਲੇ ਤਿੰਨ ਮਹੀਨਿਆਂ ਵਿੱਚ ਅਸੀਂ ਉਨ੍ਹਾਂ ਘੁਟਾਲਾ ਨੈੱਟਵਰਕਾਂ ਨੂੰ ਨਾਕਾਮ ਕੀਤਾ ਹੈ ਜੋ ਸੰਭਾਵਤ ਤੌਰ ’ਤੇ ਕੰਬੋਡੀਆ, ਮਿਆਂਮਾਰ ਅਤੇ ਨਾਈਜੀਰੀਆ ਤੋਂ ਚੱਲ ਰਹੇ ਸਨ. ਧੋਖਾਧੜੀ ਨਾਲ ਨਜਿੱਠਣ ਵਿੱਚ ਏਆਈ ਦੀ ਸੰਭਾਵੀ ਭੂਮਿਕਾ ਦਾ ਸੰਕੇਤ ਇਸ ਗੱਲ ਤੋਂ ਵੀ ਮਿਲਦਾ ਹੈ ਕਿ ਦੁਰਵਰਤੋਂ ਦੇ ਇਨ੍ਹਾਂ ਰੁਝਾਨਾਂ ਦੀ ਜਾਂਚ ਦੌਰਾਨ ਅਸੀਂ ਬਹੁਤ ਸਾਰੇ ਲੋਕਾਂ ਨੂੰ ਘੁਟਾਲਿਆਂ ਦੀ ਪਛਾਣ ਕਰਨ ਲਈ ਸਾਡੇ ਮਾਡਲ ਵਰਤਦੇ ਦੇਖਿਆ ਹੈ. ਇਸ ਰਿਪੋਰਟ ਵਿੱਚ ਵਰਤੋਂ ਦੇ ਦੋਵਾਂ ਮਾਮਲਿਆਂ ਦੀ ਚਰਚਾ ਕੀਤੀ ਗਈ ਹੈ.

ਘੁਟਾਲਿਆਂ ਵਿੱਚ ਮਦਦ ਲਈ ਸਾਡੇ ਮਾਡਲਾਂ ਦੀ ਦੁਰਵਰਤੋਂ ਇਕੱਲੇ ਵਿਅਕਤੀਆਂ ਦੀਆਂ ਧੋਖਾਧੜੀ ਦੀਆਂ ਕੋਸ਼ਿਸ਼ਾਂ ਤੋਂ ਲੈ ਕੇ ਸੰਗਠਿਤ ਅਪਰਾਧੀ ਗਰੋਹਾਂ ਨਾਲ ਸੰਭਾਵਤ ਤੌਰ ’ਤੇ ਜੁੜੀਆਂ ਵੱਡੇ ਪੱਧਰ ਦੀਆਂ ਲਗਾਤਾਰ ਕਾਰਵਾਈਆਂ ਤੱਕ ਫੈਲੀ ਹੋਈ ਹੈ. ਉਨ੍ਹਾਂ ਦੇ ਮੂਲ ਅਤੇ ਸਟੀਕ ਤਰੀਕਿਆਂ ਤੋਂ ਪਰੇ, ਸਾਡੇ ਵੱਲੋਂ ਨਾਕਾਮ ਕੀਤੀ ਘੁਟਾਲਿਆਂ ਨਾਲ ਸਬੰਧਤ ਸਰਗਰਮੀ ਆਮ ਤੌਰ ’ਤੇ ਇੱਕੋ ਢਾਂਚੇ ’ਤੇ ਚੱਲਦੀ ਹੈ: ਪਹਿਲੀ ਟੋਹ (ਬਿਨਾਂ ਜਾਣ-ਪਛਾਣ ਸੰਪਰਕ), ਉਕਸਾਹਟ (ਉਤਸ਼ਾਹ ਜਾਂ ਘਬਰਾਹਟ ਪੈਦਾ ਕਰਨ ਦੀ ਕੋਸ਼ਿਸ਼) ਅਤੇ ਅੰਤਿਮ ਵਾਰ (ਪੈਸਾ ਜਾਂ ਕੀਮਤੀ ਜਾਣਕਾਰੀ ਹਾਸਲ ਕਰਨਾ).

ਇਹ ਠੱਗ ਪਹਿਲਾਂ ਸੁਨੇਹਾ ਸੇਵਾਵਾਂ ਅਤੇ ਇੰਟਰਨੈੱਟ ’ਤੇ ਸਮੱਗਰੀ ਖਿਲਾਰਦੇ ਹਨ, ਭਾਵੇਂ ਉਹ ਏਆਈ ਨਾਲ ਬਣੀ ਹੋਵੇ ਜਾਂ ਨਾ, ਜਿਸ ਵਿੱਚ ਸੋਸ਼ਲ ਮੀਡੀਆ ਇਸ਼ਤਿਹਾਰ ਚਲਾਉਣਾ ਵੀ ਸ਼ਾਮਲ ਹੈ. ਫਿਰ ਉਹ ਜਵਾਬ ਦੇਣ ਵਾਲੇ ਕਿਸੇ ਵੀ ਵਿਅਕਤੀ ਵਿੱਚ ਮੁਨਾਫ਼ੇ ਵਾਲੇ ਮੌਕੇ ਲਈ ਉਤਸ਼ਾਹ ਜਾਂ ਨੇੜੇ ਆ ਰਹੇ ਵਿੱਤੀ ਨੁਕਸਾਨ ਦਾ ਡਰ ਪੈਦਾ ਕਰਨ ਦੀ ਕੋਸ਼ਿਸ਼ ਕਰਦੇ ਹਨ ਅਤੇ ਉਸ ਭਾਵਨਾ ਦਾ ਲਾਭ ਲੈ ਕੇ ਨਿਸ਼ਾਨੇ ਨੂੰ ਪੈਸਾ ਜਾਂ ਸੰਵੇਦਨਸ਼ੀਲ ਜਾਣਕਾਰੀ ਸੌਂਪਣ ਲਈ ਮਨਾਉਂਦੇ ਹਨ.

ਅਸੀਂ ਅਜਿਹੇ ਕਈ ਮਾਮਲੇ ਵੀ ਦੇਖੇ ਹਨ ਜਿੱਥੇ ਸਾਡੇ ਮਾਡਲਾਂ ਨੇ ਸੰਭਾਵਤ ਤੌਰ ’ਤੇ ਲੋਕਾਂ ਨੂੰ ਧੋਖਾਧੜੀ ਤੋਂ ਸੁਰੱਖਿਅਤ ਰੱਖਣ ਵਿੱਚ ਮਦਦ ਕੀਤੀ ਹੈ. ਅਸੀਂ ਸਬੂਤ ਦੇਖੇ ਹਨ ਕਿ ਲੋਕ ਹਰ ਮਹੀਨੇ ਲੱਖਾਂ ਵਾਰ ਆਨਲਾਈਨ ਘੁਟਾਲਿਆਂ ਦੀ ਪਛਾਣ ਕਰਨ ਅਤੇ ਉਨ੍ਹਾਂ ਤੋਂ ਬਚਣ ਵਿੱਚ ਮਦਦ ਲਈ ChatGPT ਵਰਤਦੇ ਹਨ. ਇਸ ਰਿਪੋਰਟ ਵਿੱਚ ਸ਼ਾਮਲ ਹਰ ਘੁਟਾਲਾ ਕਾਰਵਾਈ ਵਿੱਚ ਅਸੀਂ ਮਾਡਲ ਨੂੰ ਲੋਕਾਂ ਦੀ ਘੁਟਾਲੇ ਦੀ ਸਹੀ ਪਛਾਣ ਕਰਨ ਅਤੇ ਢੁਕਵੇਂ ਸੁਰੱਖਿਆ ਉਪਾਵਾਂ ਬਾਰੇ ਸਲਾਹ ਦੇਣ ਵਿੱਚ ਮਦਦ ਕਰਦੇ ਦੇਖਿਆ ਹੈ. ਸਾਡਾ ਮੌਜੂਦਾ ਅਨੁਮਾਨ ਹੈ ਕਿ ChatGPT ਨੂੰ ਘੁਟਾਲਿਆਂ ਲਈ ਵਰਤੇ ਜਾਣ ਦੇ ਮੁਕਾਬਲੇ ਉਨ੍ਹਾਂ ਦੀ ਪਛਾਣ ਕਰਨ ਲਈ ਤਿੰਨ ਗੁਣਾ ਵੱਧ ਵਰਤਿਆ ਜਾ ਰਿਹਾ ਹੈ.

OpenAI ਦੇ ਇੱਕ ਜਾਂਚਕਰਤਾ ਵੱਲੋਂ ਮਿਲੇ ਘੁਟਾਲੇਬਾਜ਼ੀ ਵਾਲੇ ਐੱਸਐੱਮਐੱਸ ਸੁਨੇਹੇ ਦਾ ਸਕ੍ਰੀਨਸ਼ਾਟ ChatGPT ਵਿੱਚ ਚਿਪਕਾ ਕੇ ਮਾਡਲ ਦੀ ਮਦਦ ਨਾਲ ਉਸ ਦੀ ਸਫਲਤਾਪੂਰਵਕ ਘੁਟਾਲੇ ਵਜੋਂ ਪਛਾਣ ਕਰਨ ਦੀ ਉਦਾਹਰਨ. ਇਸ ਮਾਮਲੇ ਵਿੱਚ ਖ਼ਤਰਾ ਪੈਦਾ ਕਰਨ ਵਾਲੇ ਅਨਸਰਾਂ ਨੇ TikTok ਦੇ ਭਰਤੀਕਾਰਾਂ ਦਾ ਭੇਸ ਧਾਰਨ ਦੀ ਕੋਸ਼ਿਸ਼ ਕੀਤੀ ਸੀ.

ਆਪਣੀ ਪਿਛਲੀ ਰਿਪੋਰਟ ਤੋਂ ਬਾਅਦ ਅਸੀਂ ਘੁਟਾਲਿਆਂ ਦਾ ਪਤਾ ਲਗਾਉਣ ਅਤੇ ਉਨ੍ਹਾਂ ਨੂੰ ਨਾਕਾਮ ਕਰਨ ਦੀ ਆਪਣੀ ਸਮਰੱਥਾ ਹੋਰ ਮਜ਼ਬੂਤ ਕੀਤੀ ਹੈ. ਅਸੀਂ ਹੋਰ ਘੁਟਾਲਾ ਨੈੱਟਵਰਕਾਂ ਨੂੰ ਨਾਕਾਮ ਕੀਤਾ ਹੈ ਜੋ ਕੰਬੋਡੀਆ, ਮਿਆਂਮਾਰ ਅਤੇ ਨਾਈਜੀਰੀਆ ਤੋਂ ਚੱਲਦੇ ਜਾਪਦੇ ਸਨ. ਸਾਡੀਆਂ ਪਹਿਲੀਆਂ ਕਾਰਵਾਈਆਂ ਦੇ ਨਾਲ ਮਿਲ ਕੇ, ਇਹ ਬੰਦਿਸ਼ਾਂ ਸਾਨੂੰ ਵੱਖ-ਵੱਖ ਦੇਸ਼ਾਂ ਦੀਆਂ ਕਈ ਘੁਟਾਲਾ ਕਾਰਵਾਈਆਂ ਵਿੱਚ ਉੱਭਰ ਰਹੇ ਕੁਝ ਰੁਝਾਨ ਪਛਾਣਨ ਦੇ ਯੋਗ ਬਣਾਉਂਦੀਆਂ ਹਨ.

ਸਾਡੇ ਵੱਲੋਂ ਨਾਕਾਮ ਕੀਤੀ ਜ਼ਿਆਦਾਤਰ ਘੁਟਾਲਾ ਸਰਗਰਮੀ ਏਆਈ ਦੁਆਲੇ ਨਵੀਆਂ ਯੋਜਨਾਵਾਂ ਬਣਾਉਣ ਦੀ ਬਜਾਏ ਮੌਜੂਦਾ ਘੁਟਾਲਾ ਯੋਜਨਾਵਾਂ ਵਿੱਚ ਏਆਈ ਨੂੰ ਫਿੱਟ ਕਰਨ ’ਤੇ ਕੇਂਦਰਿਤ ਸੀ. ਇਸ ਸਾਲ ਸਾਡੇ ਵੱਲੋਂ ਪਛਾਣੀਆਂ ਅਤੇ ਪਾਬੰਦੀਸ਼ੁਦਾ ਕੀਤੀਆਂ ਸਾਰੀਆਂ ਘੁਟਾਲਾ ਕਾਰਵਾਈਆਂ ਨੇ ਮੁੱਖ ਤੌਰ ’ਤੇ ਏਆਈ ਨੂੰ ਪੈਮਾਨਾ ਵਧਾਉਣ ਅਤੇ ਕਾਰਜਕੁਸ਼ਲਤਾ ਦੇ ਸਾਧਨ ਵਜੋਂ ਵਰਤਿਆ. ਇਸ ਵਿੱਚ ਆਮ ਤੌਰ ’ਤੇ ਅਨੁਵਾਦ, ਸੁਨੇਹੇ ਲਿਖਣ ਅਤੇ ਸੋਸ਼ਲ ਮੀਡੀਆ ਲਈ ਸਮੱਗਰੀ ਬਣਾਉਣ ਵਾਸਤੇ ਸਾਡੇ ਮਾਡਲਾਂ ਦੀ ਵਰਤੋਂ ਸ਼ਾਮਲ ਸੀ.

ਉਦਾਹਰਨ ਵਜੋਂ, ਅਸੀਂ ਹਾਲ ਹੀ ਵਿੱਚ ਸੰਭਾਵਤ ਤੌਰ ’ਤੇ ਕੰਬੋਡੀਆ ਅਤੇ ਨਾਈਜੀਰੀਆ ਤੋਂ ਚੱਲ ਰਹੀਆਂ ਉਨ੍ਹਾਂ ਘੁਟਾਲਾ ਕਾਰਵਾਈਆਂ ’ਤੇ ਪਾਬੰਦੀ ਲਗਾਈ ਜੋ ਕਈ ਦੇਸ਼ਾਂ ਦੇ ਪੀੜਤਾਂ ਨਾਲ ਧੋਖਾਧੜੀ ਕਰਨ ਲਈ ਆਪਣੇ ਆਪ ਨੂੰ “ਨਿਵੇਸ਼ ਕੰਪਨੀਆਂ” ਵਜੋਂ ਪੇਸ਼ ਕਰਦੀਆਂ ਸਨ. ਠੱਗਾਂ ਨੇ ਨਕਲੀ ਕੰਪਨੀਆਂ ਦਾ ਪ੍ਰਚਾਰ ਕਰਨ ਲਈ ਵੈੱਬਸਾਈਟਾਂ ਅਤੇ ਆਨਲਾਈਨ ਇਸ਼ਤਿਹਾਰ ਬਣਾਏ ਅਤੇ ਵਪਾਰ ਮਾਹਰਾਂ ਦਾ ਭੇਸ ਧਾਰਨ ਵਾਲੇ ਸੰਭਾਵਤ ਤੌਰ ’ਤੇ ਨਕਲੀ ਸੋਸ਼ਲ ਮੀਡੀਆ ਖਾਤਿਆਂ ਰਾਹੀਂ ਲੋਕਾਂ ਨੂੰ ਨਿੱਜੀ ਸੁਨੇਹਾ ਸਮੂਹਾਂ ਵਿੱਚ ਸ਼ਾਮਲ ਹੋਣ ਲਈ ਸੱਦਾ ਦਿੱਤਾ. ਮੋਟੇ ਮੁਨਾਫ਼ੇ ਅਤੇ ਬਿਨਾਂ ਜੋਖ਼ਮ ਕਮਾਈ ਦੇ ਮੌਕਿਆਂ ਦਾ ਵਾਅਦਾ ਕਰਕੇ, ਖ਼ਤਰਾ ਪੈਦਾ ਕਰਨ ਵਾਲੇ ਅਨਸਰ ਸੰਭਾਵੀ ਪੀੜਤਾਂ ਨੂੰ ਕਾਲਪਨਿਕ ਵਪਾਰ ਮੰਚਾਂ ਵਿੱਚ ਭੁਗਤਾਨ ਕਰਨ ਲਈ ਲੁਭਾਉਂਦੇ ਸਨ. ਸਾਰੇ ਘੁਟਾਲਿਆਂ ਵਿੱਚ ਠੱਗਾਂ ਨੇ ਮੁੱਖ ਤੌਰ ’ਤੇ ਪੱਤਰ-ਵਿਹਾਰ ਬਣਾਉਣ ਅਤੇ ਅਨੁਵਾਦ ਕਰਨ, ਆਪਣੀਆਂ ਵੈੱਬਸਾਈਟਾਂ ਤੇ ਸੋਸ਼ਲ ਮੀਡੀਆ ਖਾਤਿਆਂ ਲਈ ਸਮੱਗਰੀ ਬਣਾਉਣ ਅਤੇ ਮੁੱਢਲੀ ਖੋਜ ਕਰਨ ਲਈ ਸਾਡੇ ਮਾਡਲ ਵਰਤੇ.

ਇੱਕ ਹੋਰ ਮਾਮਲੇ ਵਿੱਚ ਅਸੀਂ ਸੰਭਾਵਤ ਤੌਰ ’ਤੇ ਮਿਆਂਮਾਰ ਵਿੱਚ ਸਥਿਤ ਇੱਕ ਘੁਟਾਲਾ ਕੇਂਦਰ ’ਤੇ ਪਾਬੰਦੀ ਲਗਾਈ, ਜੋ ਆਪਣੀਆਂ ਧੋਖਾਧੜੀ ਯੋਜਨਾਵਾਂ ਲਈ ਸਮੱਗਰੀ ਬਣਾਉਣ ਅਤੇ ਰੋਜ਼ਾਨਾ ਕਾਰੋਬਾਰੀ ਕੰਮ ਕਰਨ ਦੋਵਾਂ ਲਈ ਸਾਡੇ ਮਾਡਲ ਵਰਤਦਾ ਸੀ. ਇਸ ਵਿੱਚ ਸਮਾਂ-ਸਾਰਣੀਆਂ ਵਿਵਸਥਿਤ ਕਰਨਾ, ਅੰਦਰੂਨੀ ਐਲਾਨਾਂ ਦੇ ਖਰੜੇ ਬਣਾਉਣਾ, ਮੇਜ਼ਾਂ ਅਤੇ ਰਿਹਾਇਸ਼ੀ ਕਮਰਿਆਂ ਦੀ ਵੰਡ ਕਰਨਾ ਅਤੇ ਵਿੱਤੀ ਖਾਤਿਆਂ ਦਾ ਪ੍ਰਬੰਧ ਕਰਨਾ ਸ਼ਾਮਲ ਸੀ. ਕੁਝ ਸੰਚਾਲਕਾਂ ਨੇ ਆਨਲਾਈਨ ਘੁਟਾਲੇ ਕਰਦੇ ਫੜੇ ਗਏ ਲੋਕਾਂ ਲਈ ਅਪਰਾਧਿਕ ਸਜ਼ਾਵਾਂ ਬਾਰੇ ਪੁੱਛਿਆ.

ਸਾਡੇ ਵੱਲੋਂ ਨਾਕਾਮ ਕੀਤੇ ਸਾਰੇ ਠੱਗਾਂ ਨੇ ਸਾਡੇ ਮਾਡਲਾਂ ਨੂੰ ਇੱਕੋ ਤਰੀਕੇ ਜਾਂ ਇੱਕੋ ਪੱਧਰ ਦੀ ਜਟਿਲਤਾ ਨਾਲ ਨਹੀਂ ਵਰਤਿਆ. ChatGPT ਨਾਲ ਠੱਗਾਂ ਦੀਆਂ ਜ਼ਿਆਦਾਤਰ ਗੱਲਬਾਤਾਂ ਵਿੱਚ ਅਨੁਵਾਦ ਵਰਗੇ ਮੁਕਾਬਲਤਨ ਸੌਖੇ ਕੰਮ ਸ਼ਾਮਲ ਸਨ, ਪਰ ਕੁਝ ਘੁਟਾਲਾ ਕਾਰਵਾਈਆਂ ਵਧੇਰੇ ਅਭਿਲਾਸ਼ੀ ਅਤੇ ਵਿਸਤ੍ਰਿਤ ਸਨ.

ਮਿਸਾਲ ਵਜੋਂ, ਸਾਡੇ ਵੱਲੋਂ ਨਾਕਾਮ ਕੀਤੀ ਸੰਭਾਵਤ ਤੌਰ ’ਤੇ ਕੰਬੋਡੀਆ ਤੋਂ ਚੱਲ ਰਹੀ ਇੱਕ ਘੁਟਾਲਾ ਕਾਰਵਾਈ ਨੇ ਨਕਲੀ ਨਿਵੇਸ਼ ਮਾਹਰਾਂ ਅਤੇ ਨਕਲੀ ਵਪਾਰ ਕੰਪਨੀਆਂ ਦੇ ਕਾਲਪਨਿਕ ਕਰਮਚਾਰੀਆਂ ਦੀਆਂ ਵਿਸਤ੍ਰਿਤ ਜੀਵਨੀਆਂ ਬਣਾਉਣ ਲਈ ਸਾਡੇ ਮਾਡਲ ਵਰਤੇ. ਫਿਰ ਠੱਗਾਂ ਨੇ ChatGPT ਨੂੰ ਉਨ੍ਹਾਂ ਕਿਰਦਾਰਾਂ ਦੀ ਬੋਲਚਾਲ ਵਿੱਚ ਸੋਸ਼ਲ ਮੀਡੀਆ ਸੁਨੇਹੇ ਲਿਖਣ ਲਈ ਕਿਹਾ. ਖ਼ਤਰਾ ਪੈਦਾ ਕਰਨ ਵਾਲੇ ਅਨਸਰ ਅਕਸਰ ਆਪਣੇ ਨਿਸ਼ਾਨਿਆਂ ਤੋਂ ਮਿਲੇ ਜਾਪਦੇ ਸੁਨੇਹੇ ਸਾਡੇ ਮਾਡਲ ਵਿੱਚ ਦਾਖ਼ਲ ਕਰਦੇ ਅਤੇ ਮਾਡਲ ਨੂੰ ਨਕਲੀ ਪਛਾਣ ਵਜੋਂ ਗੱਲਬਾਤ ਜਾਰੀ ਰੱਖਣ ਲਈ ਕਹਿੰਦੇ ਸਨ.

ਇੱਕ ਦੂਜੀ ਘੁਟਾਲਾ ਕਾਰਵਾਈ, ਜੋ ਸੰਭਾਵਤ ਤੌਰ ’ਤੇ ਕੰਬੋਡੀਆ ਤੋਂ ਹੀ ਚੱਲ ਰਹੀ ਸੀ, ਨੇ ਸਾਡੇ ਮਾਡਲਾਂ ਨਾਲ ਬਿਨਾਂ ਜਾਣ-ਪਛਾਣ ਸੰਪਰਕ ਵਾਲੇ ਐੱਸਐੱਮਐੱਸ ਸੁਨੇਹੇ ਬਣਾਉਣ ਤੋਂ ਸ਼ੁਰੂਆਤ ਕੀਤੀ, ਜਿਨ੍ਹਾਂ ਨੂੰ ਅਮਰੀਕੀ ਫ਼ੋਨ ਨੰਬਰਾਂ ’ਤੇ ਵੱਡੀ ਗਿਣਤੀ ਵਿੱਚ ਭੇਜਿਆ ਗਿਆ. ਇਨ੍ਹਾਂ ਵਿੱਚੋਂ ਇੱਕ ਸੁਨੇਹਾ OpenAI ਦੇ ਇੱਕ ਜਾਂਚਕਰਤਾ ਨੂੰ ਭੇਜਿਆ ਗਿਆ ਸੀ, ਜੋ ਸਾਡੇ ਵੱਲੋਂ ਜੂਨ ਵਿੱਚ ਰਿਪੋਰਟ ਕੀਤੇ ਮਾਮਲੇ ਵਰਗਾ ਸੀ. ਇਨ੍ਹਾਂ ਐੱਸਐੱਮਐੱਸ ਸੁਨੇਹਿਆਂ ਵਿੱਚ WhatsApp ਸਮੂਹਾਂ ਵਿੱਚ ਸ਼ਾਮਲ ਹੋਣ ਦੇ ਸੱਦੇ ਸਨ, ਜਿਨ੍ਹਾਂ ਦੇ ਨਾਮ ਇੱਕ ਅਸਲੀ ਨਿਵੇਸ਼ ਕੰਪਨੀ ਨਾਲ ਮਿਲਦੇ-ਜੁਲਦੇ ਸਨ ਅਤੇ ਜਿਨ੍ਹਾਂ ’ਤੇ ਬਾਅਦ ਵਿੱਚ ਪਾਬੰਦੀ ਲਗਾ ਦਿੱਤੀ ਗਈ.

OpenAI ਦੇ ਜਾਂਚਕਰਤਾ ਨੂੰ ਭੇਜੇ ਗਏ WhatsApp ਸੁਨੇਹਿਆਂ ਦੀ ਲੜੀ ਤੋਂ ਪਤਾ ਲੱਗਦਾ ਹੈ ਕਿ ਜੇ ਕੋਈ ਸੰਭਾਵੀ ਨਿਸ਼ਾਨਾ ਇਨ੍ਹਾਂ ਵਿੱਚੋਂ ਕਿਸੇ ਸਮੂਹ ਵਿੱਚ ਸ਼ਾਮਲ ਹੁੰਦਾ, ਤਾਂ ਉਹ ਛੇ ਕੁ ਵੱਖ-ਵੱਖ ਖਾਤਿਆਂ ਵਿਚਾਲੇ ਨਿਵੇਸ਼ ਬਾਰੇ ਹੋ ਰਹੀ ਇੱਕ “ਗੱਲਬਾਤ” ਤੁਰੰਤ ਦੇਖਦਾ. ਇਨ੍ਹਾਂ ਵਿੱਚੋਂ ਇੱਕ ਖਾਤਾ “ਨਿਵੇਸ਼ ਮਾਹਰ” ਵਜੋਂ ਪੇਸ਼ ਹੁੰਦਾ ਸੀ, ਜਦਕਿ ਬਾਕੀ ਵੱਖ-ਵੱਖ ਪੱਧਰ ਦੇ ਭਰੋਸੇ ਅਤੇ ਤਜਰਬੇ ਵਾਲੇ ਨਿਵੇਸ਼ਕਾਂ ਵਜੋਂ ਪੇਸ਼ ਹੁੰਦੇ ਸਨ. ਇਸ ਗੱਲਬਾਤ ਦਾ ਹਰ ਹਿੱਸਾ ਠੱਗਾਂ ਨੇ ਬਣਾਇਆ ਸੀ ਅਤੇ ਉਨ੍ਹਾਂ ਨੇ ਇਸ ਦਾ ਚੀਨੀ ਤੋਂ ਇੱਕੋ ਵਾਰ ਅਨੁਵਾਦ ਕੀਤਾ ਸੀ. ਸੰਭਾਵਤ ਤੌਰ ’ਤੇ ਇਸ ਦਾ ਮਕਸਦ ਉਤਸ਼ਾਹੀ ਅਤੇ ਸਫਲ ਵਪਾਰੀਆਂ ਦੇ ਸਰਗਰਮ ਸਮੂਹ ਦਾ ਪ੍ਰਭਾਵ ਪੈਦਾ ਕਰਨਾ ਸੀ. ਅੰਤ ਵਿੱਚ “ਨਿਵੇਸ਼ ਮਾਹਰ” ਨਿਸ਼ਾਨੇ ਨੂੰ ਵੀ ਨਿਵੇਸ਼ ਅਜ਼ਮਾਉਣ ਦਾ ਸੁਝਾਅ ਦਿੰਦਾ.

ਵੱਖਰੇ ਤੌਰ ’ਤੇ, ਸੰਭਾਵਤ ਤੌਰ ’ਤੇ ਨਾਈਜੀਰੀਆ ਤੋਂ ਚੱਲ ਰਹੀ ਇੱਕ ਨਿਵੇਸ਼ ਘੁਟਾਲਾ ਕਾਰਵਾਈ ਨੇ ਮਾਡਲ ਤੋਂ ਇਸ ਬਾਰੇ ਕਦਮ-ਦਰ-ਕਦਮ ਸਲਾਹ ਮੰਗੀ ਕਿ ਸੋਸ਼ਲ ਮੀਡੀਆ ਇਸ਼ਤਿਹਾਰਾਂ ਰਾਹੀਂ ਲਾਤੀਨੀ ਅਮਰੀਕਾ ਦੇ ਅਮੀਰ ਲੋਕਾਂ ਤੱਕ ਕਿਵੇਂ ਪਹੁੰਚਿਆ ਜਾਵੇ, ਆਪਣਾ ਸਥਾਨ ਕਿਵੇਂ ਲੁਕਾਇਆ ਜਾਵੇ ਅਤੇ ਸੋਸ਼ਲ ਮੀਡੀਆ ਮੰਚਾਂ ਦੀਆਂ ਪਾਬੰਦੀਆਂ ਤੋਂ ਕਿਵੇਂ ਬਚਿਆ ਜਾਵੇ. ਇਸ ਲਈ ਮਾਡਲ ਨੂੰ ਕਿਸੇ ਮੰਚ ਦੀਆਂ ਜਨਤਕ ਸੇਵਾ ਸ਼ਰਤਾਂ ਵੱਲ ਭੇਜਿਆ ਜਾਂਦਾ ਅਤੇ ਪ੍ਰਸਤਾਵਿਤ ਇਸ਼ਤਿਹਾਰ ਸਮੱਗਰੀ ਦੀ ਪਾਲਣਾ ਦੇ ਪੱਖੋਂ ਸਮੀਖਿਆ ਕਰਨ ਲਈ ਕਿਹਾ ਜਾਂਦਾ ਸੀ.

ਠੱਗ, ਖ਼ਾਸ ਕਰਕੇ ਵੱਡੇ ਪੱਧਰ ਦੇ ਘੁਟਾਲਾ ਕੇਂਦਰ, ਲਗਾਤਾਰ ਕੋਸ਼ਿਸ਼ ਕਰਦੇ ਰਹਿੰਦੇ ਹਨ. ਨਾਕਾਮ ਕੀਤੇ ਜਾਣ ’ਤੇ ਉਹ ਅਕਸਰ ਆਪਣੇ ਵਿਹਾਰ ਦੇ ਕੁਝ ਤੱਤ ਬਦਲ ਕੇ ਨਿਯਮਾਂ ਦੀ ਉਲੰਘਣਾ ਕਰਨ ਵਾਲੀ ਸਰਗਰਮੀ ਮੁੜ ਸ਼ੁਰੂ ਕਰਨ ਦੀ ਕੋਸ਼ਿਸ਼ ਕਰਦੇ ਹਨ, ਸੰਭਾਵਤ ਤੌਰ ’ਤੇ ਅੱਗੇ ਪਛਾਣੇ ਜਾਣ ਤੋਂ ਬਚਣ ਲਈ. ਇਸ ਲਈ ਉਦਯੋਗ ਭਰ ਵਿੱਚ ਉਨ੍ਹਾਂ ਦੀ ਬਦਲਦੀ ਸਰਗਰਮੀ ਬਾਰੇ ਜਾਣਕਾਰੀ ਸਾਂਝੀ ਕਰਨਾ ਮਹੱਤਵਪੂਰਨ ਹੈ. ਮਿਸਾਲ ਵਜੋਂ, OpenAI ਅਤੇ Meta ਨੇ ਖ਼ਤਰਾ ਪੈਦਾ ਕਰਨ ਵਾਲੇ ਅਨਸਰਾਂ ਬਾਰੇ ਜਾਣਕਾਰੀ ਸਾਂਝੀ ਕੀਤੀ, ਜਿਸ ਨੇ ਅਗਲੀ ਜਾਂਚ ਅਤੇ ਕਾਰਵਾਈ ਵਿੱਚ ਯੋਗਦਾਨ ਪਾਇਆ.

ਸੰਭਵ ਹੈ ਕਿ ਨਾਕਾਮ ਕੀਤੇ ਜਾਣ ਜਾਂ ਏਆਈ ਦੀ ਵਰਤੋਂ ਦਾ ਭੇਤ ਖੋਲ੍ਹ ਸਕਣ ਵਾਲੇ ਸੰਕੇਤਾਂ ਬਾਰੇ ਵਿਆਪਕ ਆਨਲਾਈਨ ਚਰਚਾ ਦੇ ਜਵਾਬ ਵਿੱਚ ਠੱਗਾਂ ਨੇ ਆਨਲਾਈਨ ਸਮੱਗਰੀ ਅਤੇ ਨਿਸ਼ਾਨਿਆਂ ਨਾਲ ਸੰਚਾਰ ਵਿੱਚ ਏਆਈ ਦੀ ਆਪਣੀ ਵਰਤੋਂ ਲੁਕਾਉਣ ਦੀ ਕੋਸ਼ਿਸ਼ ਕੀਤੀ ਹੋਵੇ. ਇਸ ਵਿੱਚ ਸੰਭਾਵਤ ਤੌਰ ’ਤੇ ਕੰਬੋਡੀਆ ਤੋਂ ਚੱਲ ਰਹੀਆਂ ਘੁਟਾਲਾ ਕਾਰਵਾਈਆਂ ਵੱਲੋਂ ਮਾਡਲ ਨੂੰ ਨਤੀਜਿਆਂ ਵਿੱਚੋਂ ਲੰਬੀਆਂ ਡੈਸ਼ਾਂ ਹਟਾਉਣ ਦੇ ਨਿਰਦੇਸ਼ ਦੇਣਾ ਵੀ ਸ਼ਾਮਲ ਹੈ.

ਇੱਕ ਮਾਮਲੇ ਵਿੱਚ ਠੱਗਾਂ ਨੇ ਪਾਬੰਦੀ ਲੱਗਣ ਦਾ ਬਹਾਨਾ ਘੜ ਕੇ ਆਪਣੀਆਂ ਸੋਸ਼ਲ ਮੀਡੀਆ ਸੰਪਤੀਆਂ ਵੱਡੇ ਪੱਧਰ ’ਤੇ ਬੰਦ ਕੀਤੇ ਜਾਣ ਦੀ ਵਿਆਖਿਆ ਕਰਨ ਦੀ ਕੋਸ਼ਿਸ਼ ਕੀਤੀ. ਇਹ ਉੱਪਰ ਵਰਣਿਤ ਸੰਭਾਵਤ ਤੌਰ ’ਤੇ ਕੰਬੋਡੀਆ ਤੋਂ ਚੱਲਦੇ ਉਸ ਘੁਟਾਲਾ ਕੇਂਦਰ ਨਾਲ ਸਬੰਧਤ ਸੀ, ਜੋ ਐੱਸਐੱਮਐੱਸ ਅਤੇ WhatsApp ’ਤੇ ਸਰਗਰਮ ਸੀ. WhatsApp ਵੱਲੋਂ ਇਸ ਕਾਰਵਾਈ ਨਾਲ ਜੁੜੇ “ਨਿਵੇਸ਼ ਸਮੂਹਾਂ” ’ਤੇ ਪਾਬੰਦੀ ਲਗਾਉਣ ਤੋਂ ਬਾਅਦ, ਸੰਚਾਲਕਾਂ ਨੇ ਅਜਿਹੇ ਸੁਨੇਹੇ ਬਣਾਉਣੇ ਸ਼ੁਰੂ ਕੀਤੇ ਜਿਨ੍ਹਾਂ ਵਿੱਚ ਦਾਅਵਾ ਕੀਤਾ ਗਿਆ ਸੀ ਕਿ ਕਿਸੇ ਮੁਕਾਬਲੇਬਾਜ਼ ਨੇ ਉਨ੍ਹਾਂ ਸਮੂਹਾਂ ਬਾਰੇ ਝੂਠੀ ਰਿਪੋਰਟ ਕੀਤੀ ਸੀ, ਸੰਭਾਵਤ ਤੌਰ ’ਤੇ ਪਾਬੰਦੀਆਂ ਦਾ ਬਹਾਨਾ ਬਣਾਉਣ ਲਈ.

WhatsApp ਵੱਲੋਂ ਕਾਰਵਾਈ ਕੀਤੇ ਜਾਣ ਤੋਂ ਬਾਅਦ ਕੰਬੋਡੀਆ ਨਾਲ ਜੁੜੀ ਘੁਟਾਲਾ ਕਾਰਵਾਈ ਵੱਲੋਂ OpenAI ਦੇ ਇੱਕ ਜਾਂਚਕਰਤਾ ਨੂੰ ਭੇਜੇ WhatsApp ਸੁਨੇਹੇ ਦਾ ਸਕ੍ਰੀਨਸ਼ਾਟ.