“ਡਾਟਾ ਸੈਂਟਰ ਦੀ ਲਹਿਰ” ਮੁਹਿੰਮ: ਅਮਰੀਕਾ ਨੂੰ ਨਿਸ਼ਾਨਾ ਬਣਾਉਣ ਵਾਲੀ ਪ੍ਰਭਾਵਸ਼ਾਲੀ ਗਤੀਵਿਧੀ

ਇਹ ਕੇਸ ਅਧਿਐਨ ਮੂਲ ਰੂਪ ਵਿੱਚ ਜੂਨ 2026⁠(ਨਵੀਂ ਵਿੰਡੋ ਵਿੱਚ ਖੁੱਲ੍ਹਦਾ ਹੈ) ਵਿੱਚ OpenAI ਦੀ ਉਸ ਰਿਪੋਰਟ ਵਿੱਚ ਪ੍ਰਕਾਸ਼ਿਤ ਕੀਤਾ ਗਿਆ ਸੀ, ਜੋ ਅਮਰੀਕਾ ਵਿੱਚ AI ਬਹਿਸਾਂ ਨੂੰ ਨਿਸ਼ਾਨਾ ਬਣਾਉਣ ਵਾਲੀਆਂ PRC-ਸੰਬੰਧਿਤ ਪ੍ਰਭਾਵ ਕਾਰਵਾਈਆਂ ਨਾਲ ਸਬੰਧਤ ਹੈ।

ਅਸੀਂ ChatGPT ਖਾਤਿਆਂ ਦੇ ਇੱਕ ਸਮੂਹ 'ਤੇ ਪਾਬੰਦੀ ਲਗਾ ਦਿੱਤੀ ਹੈ, ਜੋ ਸੰਭੌਰ ਤੌਰ 'ਤੇ ਚੀਨ ਤੋਂ ਸ਼ੁਰੂ ਹੋਏ ਸਨ ਅਤੇ ਇੱਕ ਗੁਪਤ ਪ੍ਰਭਾਵ ਮੁਹਿੰਮ ਲਈ ਸੋਸ਼ਲ ਮੀਡੀਆ ਸਮੱਗਰੀ ਤਿਆਰ ਕਰਨ ਲਈ ChatGPT ਦੀ ਵਰਤੋਂ ਕਰਦੇ ਸਨ। ਉਨ੍ਹਾਂ ਨੇ ਅਮਰੀਕੀਆਂ ਵਜੋਂ ਵੱਖ-ਵੱਖ ਪਿਛੋਕੜਾਂ ਦਾ ਦਿਖਾਵਾ ਕਰਦੇ ਹੋਏ ਸਰਲ ਚੀਨੀ ਭਾਸ਼ਾ ਵਿੱਚ ChatGPT ਨੂੰ ਪ੍ਰੌੰਪਟ ਦਿੱਤੇ ਅਤੇ ਵਾਰ-ਵਾਰ ਅੰਗਰੇਜ਼ੀ ਅਤੇ ਚੀਨੀ ਭਾਸ਼ਾ ਵਿੱਚ ਆਉਟਪੁੱਟ ਮੰਗੇ, ਜਿਨ੍ਹਾਂ ਨੂੰ ਕਈ ਸੋਸ਼ਲ ਮੀਡੀਆ ਪਲੇਟਫਾਰਮਾਂ 'ਤੇ ਪੋਸਟ ਕੀਤਾ ਗਿਆ ਸੀ। ਕਿਉਂਕਿ ਅਸੀਂ ਚੀਨ ਤੋਂ ਆਪਣੇ ਮਾਡਲਾਂ ਤੱਕ ਪਹੁੰਚ ਦੀ ਇਜਾਜ਼ਤ ਨਹੀਂ ਦਿੰਦੇ, ਇਸ ਲਈ ਉਨ੍ਹਾਂ ਨੇ ਸਾਡੇ ਪਲੇਟਫਾਰਮ ਤੱਕ ਪਹੁੰਚ ਕਰਨ ਲਈ VPNs ਦੀ ਵਰਤੋਂ ਕੀਤੀ।

ਇਨ੍ਹਾਂ ਖਾਤਿਆਂ ਦੇ Operator ਸੰਭਾਵਤ ਤੌਰ 'ਤੇ ਇੱਕ ਨਿੱਜੀ ਚੀਨੀ ਤਕਨਾਲੋਜੀ ਕੰਪਨੀ ਦੀ ਸੋਸ਼ਲ ਮੀਡੀਆ ਆਪ੍ਰੇਸ਼ਨ ਟੀਮ ਦਾ ਹਿੱਸਾ ਸਨ, ਜੋ ਚੀਨ ਦੇ ਸੂਬਾਈ ਪੱਧਰ ਦੇ ਸਰਕਾਰੀ ਗਾਹਕਾਂ ਲਈ ਕੰਮ ਕਰ ਰਹੀ ਸੀ। ਇਹ ਗਤੀਵਿਧੀ ਉਸ ਵਪਾਰਕ ਤੰਤਰ ਨਾਲ ਮੇਲ ਖਾਂਦੀ ਜਾਪਦੀ ਹੈ, ਜੋ ਜਨਤਕ ਰਾਏ ਨੂੰ ਦਿਸ਼ਾ ਦੇਣ⁠(ਨਵੀਂ ਵਿੰਡੋ ਵਿੱਚ ਖੁੱਲ੍ਹਦਾ ਹੈ) ਸੰਬੰਧੀ ਪਾਰਟੀ-ਰਾਜ ਦੀਆਂ ਤਰਜੀਹਾਂ ਦਾ ਸਮਰਥਨ ਕਰਦਾ ਹੈ। ਉਨ੍ਹਾਂ ਵੱਲੋਂ ChatGPT 'ਤੇ ਅਪਲੋਡ ਕੀਤੀ ਗਈ ਇੱਕ ਵੱਖਰੀ ਰਿਪੋਰਟ ਵਿੱਚ ਜਨਤਕ ਰਾਇ ਨੂੰ ਪ੍ਰਭਾਵਿਤ ਕਰਨ ਅਤੇ ਪਲੇਟਫਾਰਮ ਦੀਆਂ ਖੋਜ ਪ੍ਰਣਾਲੀਆਂ ਤੋਂ ਬਚਣ ਲਈ ਤਿਆਰ ਕੀਤੇ ਗਏ ਸੋਸ਼ਲ ਮੀਡੀਆ ਖਾਤੇ ਬਣਾਉਣ ਦੇ ਉਨ੍ਹਾਂ ਦੇ ਉਦੇਸ਼ਾਂ ਅਤੇ ਰਣਨੀਤੀਆਂ ਦਾ ਵਰਣਨ ਕੀਤਾ ਗਿਆ ਸੀ।

ਜਿਨ੍ਹਾਂ ਖਾਤਿਆਂ 'ਤੇ ਅਸੀਂ ਪਾਬੰਦੀ ਲਗਾਈ, ਉਹ ਦਰਸ਼ਕਾਂ ਦੇ ਦੋ ਸਮੂਹਾਂ ਨੂੰ ਪ੍ਰਭਾਵਿਤ ਕਰਨਾ ਚਾਹੁੰਦੇ ਸਨ। ਉਨ੍ਹਾਂ ਦਾ ਮੁੱਖ ਨਿਸ਼ਾਨਾ ਅਮਰੀਕੀ ਦਰਸ਼ਕ ਸਨ। ਉਨ੍ਹਾਂ ਨੇ ਅੰਗਰੇਜ਼ੀ ਵਿੱਚ ਛੋਟੀਆਂ ਟਿੱਪਣੀਆਂ ਅਤੇ ਤਸਵੀਰਾਂ ਬਣਾਈਆਂ, ਜਿਨ੍ਹਾਂ ਵਿੱਚ ਦਾਅਵਾ ਕੀਤਾ ਗਿਆ ਕਿ ਡਾਟਾ ਸੈਂਟਰਾਂ ਅਤੇ AI ਵਰਤੋਂ ਨਾਲ ਬਿਜਲੀ ਦੀ ਮੰਗ ਵਧ ਰਹੀ ਹੈ ਅਤੇ ਆਮ ਅਮਰੀਕੀਆਂ ਨੂੰ ਹਾਈ ਖਰਚਾ ਝੱਲਣਾ ਪੈ ਰਿਹਾ ਹੈ।

ਉਦਾਹਰਣ ਵਜੋਂ, ਉਨ੍ਹਾਂ ਨੇ ਇੱਕ ਭਰੋਸੇਯੋਗ ਖੇਤਰੀ ਅਖ਼ਬਾਰ ਦੀ ਰਿਪੋਰਟ ਦੇ ਆਧਾਰ 'ਤੇ, ਪਾਵਰ ਗਰਿੱਡ Operator ਦੀ ਸਮਰੱਥਾ ਨਿਲਾਮੀ ਕੀਮਤਾਂ ਬਾਰੇ ਕਾਮਿਕ ਸਟ੍ਰਿਪਸ ਤਿਆਰ ਕਰਨ ਲਈ ਕਿਹਾ। ਉਨ੍ਹਾਂ ਨੇ ChatGPT ਨੂੰ ਟਿੱਪਣੀਆਂ ਵਿੱਚ ਇਸ ਗੱਲ 'ਤੇ ਜ਼ੋਰ ਦੇਣ ਲਈ ਕਿਹਾ ਕਿ ਬਿਜਲੀ ਦੀ ਸਿਖਰਲੀ ਮੰਗ ਕਾਰਨ ਸਮਰੱਥਾ ਦੀਆਂ ਕੀਮਤਾਂ ਵਧ ਰਹੀਆਂ ਹਨ, ਇਸ ਨਵੀਂ ਮੰਗ ਦਾ ਕਾਰਨ ਡਾਟਾ ਸੈਂਟਰਾਂ ਅਤੇ AI ਐਪਲੀਕੇਸ਼ਨਾਂ ਨੂੰ ਦੱਸਿਆ, ਅਤੇ ਇਹ ਦਲੀਲ ਦਿੱਤੀ ਕਿ ਆਖ਼ਰਕਾਰ ਇਹ ਖਰਚਾ ਆਮ ਘਰਾਂ 'ਤੇ ਪੈਂਦਾ ਹੈ। ਇਹ ਟਿੱਪਣੀਆਂ ਅਤੇ ਤਸਵੀਰਾਂ ਸੰਭਾਵਤ ਤੌਰ 'ਤੇ ਜਾਅਲੀ ਖਾਤਿਆਂ ਦੇ ਇੱਕ ਸਮੂਹ ਵੱਲੋਂ X 'ਤੇ ਪੋਸਟ ਕੀਤੀਆਂ ਗਈਆਂ ਸਨ, ਜਿਨ੍ਹਾਂ ਦੇ ਨਾਲ ਪਾਵਰ ਗਰਿੱਡ Operator ਦੀ ਸਮਰੱਥਾ ਨਿਲਾਮੀ ਅਤੇ ਡਾਟਾ ਸੈਂਟਰਾਂ ਦੀ ਬਿਜਲੀ ਮੰਗ ਬਾਰੇ ਭਰੋਸੇਯੋਗ ਖ਼ਬਰਾਂ ਦੇ ਲਿੰਕ ਵੀ ਸ਼ਾਮਲ ਸਨ।

AI ਨਾਲ ਬਣਾਈ ਸਮੱਗਰੀ X 'ਤੇ #capacityauction, #datacentersuccess ਅਤੇ #datacenters ਵਰਗੇ ਹੈਸ਼ਟੈਗਾਂ ਨਾਲ ਪੋਸਟ ਕੀਤੀ ਗਈ। ਉਨ੍ਹਾਂ ਨੇ ਆਮ ਲੋਕਾਂ ਵੱਲੋਂ AI ਬੁਨਿਆਦੀ ਢਾਂਚੇ ਨੂੰ ਸਬਸਿਡੀ ਦੇਣ ਬਾਰੇ ਇੱਕ ਬਿਰਤਾਂਤ ਨੂੰ ਹੁਲਾਰਾ ਦੇਣ ਲਈ, ਬਿਜਲੀ ਬਾਜ਼ਾਰ ਦੀਆਂ ਆਮ ਤਸਵੀਰਾਂ ਵਿੱਚ ਲਿਖਤ ਜੋੜ ਕੇ ਉਨ੍ਹਾਂ ਨੂੰ ਸੰਪਾਦਿਤ ਕਰਨ ਲਈ ਵੀ ChatGPT ਦੀ ਵਰਤੋਂ ਕੀਤੀ।

ChatGPT ਨਾਲ ਬਣਾਈ ਲਿਖਤ ਅਤੇ ਤਸਵੀਰਾਂ ਵਾਲੀਆਂ X ਪੋਸਟਾਂ ਦੇ ਸਕ੍ਰੀਨਸ਼ਾਟ।

ਇਸ ਸਮੂਹ ਦਾ ਦੂਜਾ ਨਿਸ਼ਾਨਾ ਵਿਦੇਸ਼ਾਂ ਵਿੱਚ ਰਹਿੰਦੇ ਚੀਨੀ ਲੋਕ ਸਨ, ਜੋ ਚੀਨੀ ਸਰਕਾਰ ਦੀਆਂ ਤਰਜੀਹਾਂ ਦਾ ਸਮਰਥਨ ਕਰਨ ਵਾਲੀ ਇਸ ਦੀ ਪ੍ਰਤੱਖ ਭੂਮਿਕਾ ਨਾਲ ਮੇਲ ਖਾਂਦਾ ਸੀ। ਉਨ੍ਹਾਂ ਨੇ ਚੀਨੀ ਅਸਹਿਮਤੀਵਾਦੀ ਲੀ ਯਿੰਗ, ਜਿਨ੍ਹਾਂ ਨੂੰ “ਅਧਿਆਪਕ ਲੀ” ਵੀ ਕਿਹਾ ਜਾਂਦਾ ਹੈ, ਬਾਰੇ ਜਨਤਕ ਤੌਰ 'ਤੇ ਉਪਲਬਧ ਜਾਣਕਾਰੀ ਮੰਗੀ। ਉਨ੍ਹਾਂ ਨੇ ChatGPT ਨੂੰ ਉਨ੍ਹਾਂ ਦਾ ਅਪਮਾਨ ਕਰਨ ਵਾਲੀਆਂ ਅਤੇ ਉਨ੍ਹਾਂ ਦੀ ਟੀਮ ਦੇ X ਖਾਤੇ @whyyoutouzhele ਨੂੰ ਨਿਸ਼ਾਨਾ ਬਣਾਉਂਦੀਆਂ ਛੋਟੀਆਂ ਟਿੱਪਣੀਆਂ ਬਣਾਉਣ ਲਈ ਵੀ ਕਿਹਾ। ਆਪਣੀ ਪਿਛਲੀ ਖ਼ਤਰਾ ਰਿਪੋਰਟ⁠ ਵਿੱਚ ਅਸੀਂ ਦੱਸਿਆ ਸੀ ਕਿ ਚੀਨੀ ਕਾਨੂੰਨ ਲਾਗੂਕਰਨ ਨਾਲ ਜੁੜੇ ਇੱਕ ਵਿਅਕਤੀ ਨੇ ਲੀ ਨੂੰ ਇਸੇ ਤਰ੍ਹਾਂ ਦੀ ਆਨਲਾਈਨ ਪਰੇਸ਼ਾਨੀ ਦਾ ਨਿਸ਼ਾਨਾ ਬਣਾਇਆ ਸੀ। ਇਸ ਮਾਮਲੇ ਵਿੱਚ ਸਾਡੇ ਮਾਡਲਾਂ ਨੇ ਲੀ ਵਿਰੁੱਧ ਭੜਕਾਊ ਜਾਂ ਨਿੱਜੀ ਹਮਲੇ ਬਣਾਉਣ ਤੋਂ ਇਨਕਾਰ ਕਰ ਦਿੱਤਾ। ਜਿਨ੍ਹਾਂ ਹੋਰ ਚੀਨੀ ਰਾਜਨੀਤਿਕ ਟਿੱਪਣੀਕਾਰਾਂ ਨੂੰ ਉਨ੍ਹਾਂ ਨੇ ਪ੍ਰੇਸ਼ਾਨ ਕਰਨ ਦੀ ਕੋਸ਼ਿਸ਼ ਕੀਤੀ, ਉਨ੍ਹਾਂ ਵਿੱਚ ਲੂ ਯੀਹੇਂਗ, ਸ਼ੂ ਚੀ ਅਤੇ X ਖਾਤਾ @SydneyDaddy1 ਸ਼ਾਮਲ ਸਨ।

ਇੱਕ ਜ਼ਿਕਰਯੋਗ ਰਣਨੀਤੀ ਇਸ ਧਿਰ ਦੀ ਇਹ ਯੋਜਨਾ ਸੀ ਜਿਸ ਵਿੱਚ ਉਹ ਆਨਲਾਈਨ ਅਮਰੀਕਾ ਵਿੱਚ ਰਹਿੰਦੇ ਚੀਨੀ ਪ੍ਰਵਾਸੀਆਂ, ਕਾਮਿਆਂ, ਵਿਦਿਆਰਥੀਆਂ, ਮਾਵਾਂ, ਕਲਰਕਾਂ ਅਤੇ ਨਿਵੇਸ਼ਕਾਂ ਵਜੋਂ ਪੇਸ਼ ਹੁੰਦੇ ਸਨ। ਉਨ੍ਹਾਂ ਦਾ ਉਦੇਸ਼ ਅਮਰੀਕਾ ਦੇ "ਕਾਲੇ ਪੱਖ" ਨੂੰ ਬੇਨਕਾਬ ਕਰਨ ਲਈ, ਅਮਰੀਕਾ ਵਿੱਚ ਰਹਿ ਰਹੇ ਇੱਕ ਸਾਬਕਾ ਚੀਨੀ ਪੁਲਿਸ ਅਧਿਕਾਰੀ ਬਾਰੇ ਅਮਰੀਕੀ ਆਲੋਚਨਾ ਨੂੰ ਉਤਸ਼ਾਹਿਤ ਕਰਨਾ ਸੀ। ਇਨ੍ਹਾਂ ਧਿਰਾਂ ਨੇ ChatGPT ਨੂੰ ਇੱਕ ਯੂਟਿਊਬਰ ਲਈ ਅਜਿਹੇ ਸੁਨੇਹੇ ਤਿਆਰ ਕਰਨ ਲਈ ਕਿਹਾ, ਜੋ ਉਸ ਸਾਬਕਾ ਅਧਿਕਾਰੀ ਨੂੰ ਅਮਰੀਕੀ ਨੀਤੀਆਂ ਦੀਆਂ ਨਾਕਾਮੀਆਂ ਬਾਰੇ ਬੋਲਣ ਲਈ ਪ੍ਰੇਰਿਤ ਕਰਨ। ਇਹ ਅਮਰੀਕਾ-ਅਧਾਰਤ ਅਤੇ ਚੀਨੀ ਪ੍ਰਵਾਸੀਆਂ ਦੀਆਂ ਘੜੀਆਂ ਹੋਈਆਂ ਨਕਲੀ ਪਛਾਣਾਂ ਦੀ ਵਰਤੋਂ ਕਰਕੇ ਕਿਸੇ ਪ੍ਰਭਾਵਸ਼ਾਲੀ ਸ਼ਖ਼ਸੀਅਤ ਦੀ ਅਮਰੀਕਾ ਦੀ ਆਲੋਚਨਾ ਕਰਨ ਵਾਲੀ ਸਮੱਗਰੀ ਨੂੰ ਹੁਲਾਰਾ ਦੇਣ ਦਾ ਇੱਕ ਨਿਵੇਕਲਾ ਅਤੇ ਨਵਾਂ ਤਰੀਕਾ ਜਾਪਦਾ ਸੀ।

ਸੋਸ਼ਲ ਮੀਡੀਆ ਸਮੱਗਰੀ ਤਿਆਰ ਕਰਨ ਤੋਂ ਇਲਾਵਾ, ਇਨ੍ਹਾਂ ਖਾਤਿਆਂ ਨੇ ਆਪਣੇ ਕਾਰਜ-ਪ੍ਰਵਾਹ ਨੂੰ ਸਵੈਚਾਲਿਤ ਕਰਨ ਅਤੇ ਇਸ ਦਾ ਦਾਇਰਾ ਵੱਡੇ ਪੱਧਰ 'ਤੇ ਵਧਾਉਣ ਲਈ ChatGPT ਦੀ ਵਰਤੋਂ ਕੀਤੀ। ਇਸ ਵਿੱਚ ਕਈ ਸੋਸ਼ਲ ਮੀਡੀਆ ਪਲੇਟਫਾਰਮਾਂ 'ਤੇ ਲੌਗਇਨ ਪ੍ਰਕਿਰਿਆ ਅਤੇ ਆਪਸੀ ਸੰਪਰਕਾਂ ਦੇ ਪ੍ਰਬੰਧ ਨੂੰ ਸਵੈਚਾਲਿਤ ਕਰਨ ਲਈ ਕੋਡ ਦੀ ਮੰਗ ਸ਼ਾਮਲ ਸੀ। ਉਨ੍ਹਾਂ ਨੇ ਵਰਤੋਂਕਾਰ ਨਾਮ ਕੱਢਣ, ਉਨ੍ਹਾਂ ਦੇ ਅੱਗੇ X ਜਾਂ YouTube ਲਿੰਕ ਜੋੜਨ, ਹਾਈਪਰਲਿੰਕ ਹਟਾਉਣ ਅਤੇ ਵਰਕਸ਼ੀਟਾਂ ਲਈ ਡਾਟਾ ਨੂੰ ਫਾਰਮੈਟ ਕਰਨ ਵਾਸਤੇ ਵੀ ChatGPT ਨੂੰ ਟੈਕਸਟ ਪ੍ਰੋਸੈਸਿੰਗ ਟੂਲ ਵਜੋਂ ਵਰਤਿਆ।

ਡਾਟਾ ਸੈਂਟਰ ਦੀ ਮੂਲ ਤਸਵੀਰ।

AI ਨਾਲ ਸੰਪਾਦਿਤ ਤਸਵੀਰ, ਜੋ ਸੰਭਾਵਤ ਤੌਰ 'ਤੇ ਜਾਅਲੀ ਖਾਤੇ ਨੇ X 'ਤੇ ਪੋਸਟ ਕੀਤੀ।

ਖਾਤਿਆਂ ਨੇ ChatGPT ਨੂੰ ਕੰਮਕਾਜੀ ਰਿਪੋਰਟਾਂ ਤਿਆਰ ਕਰਨ, ਉਨ੍ਹਾਂ ਨੂੰ ਨਿਖਾਰਨ ਅਤੇ ਸੰਪਾਦਿਤ ਕਰਨ ਲਈ ਕਿਹਾ, ਜਿਨ੍ਹਾਂ ਤੋਂ ਸੋਸ਼ਲ ਮੀਡੀਆ 'ਤੇ ਉਨ੍ਹਾਂ ਦੀਆਂ ਸਰਗਰਮੀਆਂ ਨਾਲ ਜੁੜੇ ਸੰਚਾਲਕੀ ਸੁਰੱਖਿਆ ਪਹਿਲੂਆਂ ਅਤੇ ਪਲੇਟਫਾਰਮ ਖੋਜ ਪ੍ਰਣਾਲੀਆਂ ਬਾਰੇ ਉਨ੍ਹਾਂ ਦੀ ਸਮਝ ਦਾ ਪਤਾ ਲੱਗਦਾ ਸੀ। ਉਨ੍ਹਾਂ ਨੇ ਆਪਣੇ ਉਦੇਸ਼ਾਂ ਵਿੱਚ ਟਿਕਾਊ ਅਤੇ ਭਰੋਸੇਯੋਗ ਖਾਤੇ ਸਥਾਪਤ ਕਰਨਾ, ਨਿਸ਼ਾਨਾ ਖੇਤਰਾਂ ਵਿੱਚ ਦਰਸ਼ਕਾਂ ਦੀ ਪਹੁੰਚ ਨੂੰ ਵਧਾਉਣ ਲਈ ਦਿੱਖ ਪੱਖੋਂ ਆਕਰਸ਼ਕ ਸਮੱਗਰੀ ਤਿਆਰ ਕਰਨਾ, ਅਤੇ ਪਲੇਟਫਾਰਮ ਦੀਆਂ ਕਾਰਵਾਈਆਂ ਦਾ ਅਗਾਊਂ ਅੰਦਾਜ਼ਾ ਲਾ ਕੇ ਖਾਤਿਆਂ ਨੂੰ ਲੰਬੇ ਸਮੇਂ ਤੱਕ ਚਾਲੂ ਰੱਖਣਾ ਸ਼ਾਮਲ ਦੱਸਿਆ।

ਇੱਕ ਰਿਪੋਰਟ ਖ਼ਾਸ ਤੌਰ 'ਤੇ Facebook ਦੀਆਂ ਕਾਰਵਾਈਆਂ 'ਤੇ ਕੇਂਦ੍ਰਿਤ ਸੀ, ਜਿਸ ਵਿੱਚ ਅਸਲੀ, ਭਰੋਸੇਯੋਗ ਅਤੇ ਰੋਜ਼ਾਨਾ ਜੀਵਨ ਨਾਲ ਜੁੜੇ ਕਿਰਦਾਰਾਂ ਨੂੰ ਸਿਰਜਣ 'ਤੇ ਜ਼ੋਰ ਦਿੱਤਾ ਗਿਆ ਸੀ। ਇਸ ਵਿੱਚ ਜੀਵਨਸ਼ੈਲੀ, ਮੌਜੂਦਾ ਮਾਮਲਿਆਂ, ਟਿੱਪਣੀਆਂ ਅਤੇ ਪੇਸ਼ੇਵਰ ਸਮੱਗਰੀ ਦੀ ਵਰਤੋਂ ਕਰਕੇ ਖਾਤਿਆਂ ਦੀ ਸ਼ੁਰੂਆਤੀ ਪਛਾਣ ਬਣਾਉਣ, ਅਤੇ ਸੁਭਾਵਿਕ ਸ਼ਮੂਲੀਅਤ ਦਾ ਪ੍ਰਭਾਵ ਬਣਾਈ ਰੱਖਦਿਆਂ ਆਪਸ ਵਿੱਚ ਜੁੜੇ ਖਾਤਿਆਂ ਦੇ ਸੰਪਰਕਾਂ ਰਾਹੀਂ ਬਿਰਤਾਂਤਾਂ ਨੂੰ ਉਤਸ਼ਾਹਿਤ ਕਰਨ ਦੀ ਗੱਲ ਕਹੀ ਗਈ ਸੀ। ਇਸ ਤੋਂ ਅਮਰੀਕੀ ਸੋਸ਼ਲ ਮੀਡੀਆ ਪਲੇਟਫਾਰਮਾਂ 'ਤੇ ਲਗਾਤਾਰ ਮੌਜੂਦਗੀ ਬਣਾਈ ਰੱਖਣ ਲਈ ਇੱਕ ਵਧੇਰੇ ਗੁੰਝਲਦਾਰ ਅਤੇ ਉੱਨਤ ਕਾਰਜ-ਪ੍ਰਵਾਹ, ਅਤੇ ਇਨ੍ਹਾਂ ਕਾਰਵਾਈਆਂ ਦੀ ਸੰਚਾਲਕੀ ਯੋਜਨਾਬੰਦੀ ਵਿੱਚ ਸਹਾਇਤਾ ਲਈ AI ਦੀ ਵਰਤੋਂ ਦਾ ਪਤਾ ਲੱਗਦਾ ਸੀ।

ਇਸੇ ਰਿਪੋਰਟ ਤੋਂ ਪਤਾ ਲੱਗਦਾ ਹੈ ਕਿ ਉਨ੍ਹਾਂ ਨੇ ਆਪਣੀ ਪਹੁੰਚ ਵਧਾਉਣ ਅਤੇ ਵਿਘਨ ਦੇ ਜੋਖਮ ਨੂੰ ਘਟਾਉਣ ਲਈ Facebook ਦੇ ਪਲੇਟਫਾਰਮ ਦਾ ਵਿਆਪਕ ਵਿਸ਼ਲੇਸ਼ਣ ਕੀਤਾ ਸੀ। ਉਨ੍ਹਾਂ ਨੇ ਇਸ ਗੱਲ 'ਤੇ ਚਰਚਾ ਕੀਤੀ ਕਿ ਸਮੇਂ ਦੇ ਨਾਲ ਪ੍ਰਭਾਵ ਪੈਦਾ ਕਰਨ ਅਤੇ ਨਵੇਂ ਦਰਸ਼ਕਾਂ ਤੱਕ ਪਹੁੰਚਣ ਲਈ Facebook ਦੇ ਸਮੱਗਰੀ ਤੰਤਰ, ਸਮੂਹਾਂ, ਪੰਨਿਆਂ, ਹੈਸ਼ਟੈਗਾਂ, ਵਿਗਿਆਪਨ ਸਾਧਨਾਂ, ਸਿਫ਼ਾਰਸ਼ ਪ੍ਰਣਾਲੀਆਂ ਅਤੇ ਰਿਪੋਰਟਿੰਗ ਵਿਧੀਆਂ ਦੀ ਵਰਤੋਂ ਕਿਵੇਂ ਕੀਤੀ ਜਾ ਸਕਦੀ ਹੈ। ਉਨ੍ਹਾਂ ਨੇ ਇਸ ਨੂੰ ਸੁਭਾਵਿਕ ਸ਼ਮੂਲੀਅਤ ਨੂੰ Facebook ਵਿਗਿਆਪਨਾਂ ਨਾਲ ਜੋੜਨ ਵਾਲੇ ਇੱਕ ਦੋਹਰੇ-ਪੜਾਅ ਤਰੀਕੇ ਵਜੋਂ ਪੇਸ਼ ਕੀਤਾ, ਜਿਸ ਵਿੱਚ ਵਿਸ਼ਿਆਂ, ਫਾਰਮੈਟਾਂ ਅਤੇ ਦਰਸ਼ਕਾਂ ਦੀ ਵਾਰ-ਵਾਰ ਜਾਂਚ ਸ਼ਾਮਲ ਸੀ। ਉਨ੍ਹਾਂ ਨੇ ਆਪਣੇ ਕਾਰਜ-ਪ੍ਰਵਾਹ ਦੇ ਹਿੱਸੇ ਵਜੋਂ ਖਾਤੇ ਦੀ ਸੁਰੱਖਿਆ, ਬੈਕਅੱਪ ਖਾਤੇ ਬਣਾਉਣ ਅਤੇ ਪਲੇਟਫਾਰਮ ਵੱਲੋਂ ਆਪਸੀ ਤਾਲਮੇਲ ਦਾ ਪਤਾ ਲਗਾਏ ਜਾਣ ਤੋਂ ਬਚਣ ਲਈ ਖਾਤਿਆਂ ਦੀਆਂ ਸੰਚਾਲਕੀ ਸਰਗਰਮੀਆਂ ਨੂੰ ਵੱਖ-ਵੱਖ ਰੱਖਣ 'ਤੇ ਵੀ ਜ਼ੋਰ ਦਿੱਤਾ।