OpenAI ਤਕਨਾਲੋਜੀ ਨਾਲ ਬਲਾਕ ਦੀ ਏਆਈ-ਆਧਾਰਿਤ ਸੁਰੱਖਿਆ

ਸਕਵੇਅਰ, ਕੈਸ਼ ਐਪ ਅਤੇ ਆਫ਼ਟਰਪੇ ਬਣਾਉਣ ਵਾਲੀ ਕੰਪਨੀ ਬਲਾਕ ਦੀ ਸੁਰੱਖਿਆ ਟੀਮ OpenAI ਡਿਫੈਂਸ ਫੈਕਟਰੀ ਦੀ ਵਰਤੋਂ ਕਰਦੀ ਹੈ. ਇਸ ਵਿੱਚ ਏਆਈ ਕਮਜ਼ੋਰੀਆਂ ਲੱਭਣ, ਖ਼ਤਰਿਆਂ ਦੀ ਪਛਾਣ ਕਰਨ ਅਤੇ ਜਵਾਬੀ ਕਾਰਵਾਈ ਕਰਨ ਦਾ ਕੰਮ ਇੰਨੇ ਵੱਡੇ ਪੱਧਰ ’ਤੇ ਕਰਦੀ ਹੈ ਕਿ ਕੋਈ ਵੀ ਮਨੁੱਖੀ ਟੀਮ ਇਸ ਦੀ ਬਰਾਬਰੀ ਨਹੀਂ ਕਰ ਸਕਦੀ. OpenAI ਡੇਬ੍ਰੇਕ ਸਮੇਤ ਏਆਈ ਪ੍ਰਣਾਲੀਆਂ ਨਾਲ ਬਲਾਕ ਹੁਣ ਉਹ ਕੰਮ ਕੁਝ ਘੰਟਿਆਂ ਵਿੱਚ ਕਰ ਰਿਹਾ ਹੈ, ਜਿਸ ਨੂੰ ਪਹਿਲਾਂ ਕਈ ਹਫ਼ਤੇ ਲੱਗਦੇ ਸਨ.

ਬਲਾਕ ਦੀ ਸੁਰੱਖਿਆ ਟੀਮ ਦਾ ਧਿਆਨ ਕੰਮ ਦੀਆਂ ਵੱਖ-ਵੱਖ ਪ੍ਰਕਿਰਿਆਵਾਂ ਵਿੱਚ ਜ਼ਿੰਮੇਵਾਰੀ ਨਾਲ ਏਆਈ ਅਪਣਾਉਣ ’ਤੇ ਰਿਹਾ ਹੈ, ਭਾਵੇਂ ਉਹ ਕੋਡ ਤਿਆਰ ਕਰਨਾ ਹੋਵੇ ਜਾਂ ਸੁਰੱਖਿਆ ਕਾਰਜ. ਮੁੱਖ ਸੂਚਨਾ ਸੁਰੱਖਿਆ ਅਧਿਕਾਰੀ ਜੇਮਜ਼ ਨੈੱਟਸਹਾਈਮ ਕਹਿੰਦੇ ਹਨ, “ਇਸ ਦਾ ਅਸਲ ਮਕਸਦ ਇੱਕ ਅਜਿਹਾ ਨਵਾਂ ਸਾਥੀ ਮਿਲਣਾ ਹੈ ਜਿਸ ਨਾਲ ਤੁਸੀਂ ਆਪਣੇ ਕੰਮ ਦਾ ਦਾਇਰਾ ਵਧਾ ਸਕੋ.” “ਇਹ ਰਵਾਇਤੀ ਸਵੈਚਾਲਨ ਵਰਗਾ ਨਹੀਂ ਹੈ, ਜਿੱਥੇ ਤੁਹਾਨੂੰ ਹਰ ਕਦਮ ਵੱਖਰੇ ਤੌਰ ’ਤੇ ਦੱਸਣਾ ਪੈਂਦਾ ਸੀ. ਤੁਸੀਂ ਇਸ ਨੂੰ ਆਪਣੀਆਂ ਖ਼ਾਸ ਲੋੜਾਂ ਨਾਲ ਜੁੜੀ, ਭਾਵੇਂ ਪੂਰੀ ਤਰ੍ਹਾਂ ਸਪਸ਼ਟ ਨਾ ਵੀ ਹੋਵੇ, ਕੋਈ ਸਮੱਸਿਆ ਦੇ ਸਕਦੇ ਹੋ ਅਤੇ ਮਿਲ ਕੇ ਉਸ ਦਾ ਹੱਲ ਕੱਢ ਸਕਦੇ ਹੋ.”

ਸਾਫ਼ਟਵੇਅਰ ਦੀ ਕਿਸੇ ਗ਼ਲਤੀ ਦੀ ਸਮੀਖਿਆ ਕਰਨ ਜਾਂ ਕਿਸੇ ਲੌਗ ਦਾ ਵਿਸ਼ਲੇਸ਼ਣ ਕਰਨ ਵਰਗੇ ਕੰਮ ਪੂਰੇ ਹੋਣ ਵਿੱਚ ਕਈ ਦਿਨ ਜਾਂ ਹਫ਼ਤੇ ਲੱਗਦੇ ਸਨ. ਹੁਣ ਟੀਮ ਇਹ ਕੰਮ ਪਹਿਲਾਂ ਨਾਲੋਂ ਬਹੁਤ ਘੱਟ ਸਮੇਂ ਵਿੱਚ ਪੂਰੇ ਕਰ ਸਕਦੀ ਹੈ, ਅਤੇ ਹਰ ਨਤੀਜੇ ਦੀ ਪੁਸ਼ਟੀ ਅਜੇ ਵੀ ਕੋਈ ਮਨੁੱਖ ਕਰਦਾ ਹੈ.

ਮਿਸਾਲ ਵਜੋਂ, ਖ਼ਤਰੇ ਪਛਾਣਨ ਦੀ ਪ੍ਰਕਿਰਿਆ ਨੂੰ ਸੁਧਾਰਨ ਲਈ ਹਰ ਜਾਂਚ ਵਿੱਚ ਕਿਊਰੀ ਤੋਂ ਮਿਲੇ ਮੂਲ ਸਬੂਤ ਸੰਭਾਲੇ ਜਾਂਦੇ ਹਨ. ਇਸ ਲਈ ਟੀਮ ਹੁਣ ਪਛਾਣ ਪ੍ਰਕਿਰਿਆ ਵਿੱਚ ਪ੍ਰਸਤਾਵਿਤ ਤਬਦੀਲੀ ਨੂੰ ਸੱਤ ਮਹੀਨਿਆਂ ਦੇ ਚੱਲਦੇ ਸਿਸਟਮਾਂ ਦੇ ਟੈਲੀਮੈਟਰੀ ਡਾਟੇ ਉੱਤੇ ਇੱਕ ਘੰਟੇ ਤੋਂ ਵੀ ਘੱਟ ਸਮੇਂ ਵਿੱਚ ਮੁੜ ਚਲਾ ਕੇ ਪਰਖ ਸਕਦੀ ਹੈ. ਪਹਿਲਾਂ ਇਸ ਕੰਮ ਲਈ ਸੈਂਕੜੇ ਪੁਰਾਣੇ ਮਾਮਲਿਆਂ ’ਤੇ ਹੱਥੀਂ ਮੁੜ ਕਿਊਰੀਆਂ ਚਲਾਉਣੀਆਂ ਪੈਂਦੀਆਂ ਸਨ. ਇਸ ਵਿੱਚ ਇੰਨਾ ਸਮਾਂ ਲੱਗਦਾ ਸੀ ਕਿ ਅਮਲ ਵਿੱਚ ਇਹ ਕੰਮ ਘੱਟ ਹੀ ਹੋ ਪਾਉਂਦਾ ਸੀ.

ਟੀਮ ਹੁਣ ਇਸ ਗੱਲ ਦੀ ਚੋਣ ਵੀ ਹੋਰ ਸੋਚ-ਸਮਝ ਕੇ ਕਰਦੀ ਹੈ ਕਿ ਕਿਸ ਕੰਮ ਲਈ ਕਿਹੜਾ ਮਾਡਲ ਵਰਤਣਾ ਹੈ. ਉਹ ਕਹਿੰਦੇ ਹਨ, “ਅਸੀਂ ਪਹਿਲਾਂ ਸਭ ਤੋਂ ਨਵਾਂ ਮਾਡਲ ਵਰਤਦੇ ਸੀ, ਪਰ ਹੁਣ ਅਜਿਹਾ ਕਰਨਾ ਜ਼ਰੂਰੀ ਨਹੀਂ ਹੈ.” “ਵੱਖ-ਵੱਖ ਕੰਮਾਂ ਲਈ ਵੱਖ-ਵੱਖ ਮਾਡਲ ਚੁਣਦਿਆਂ ਸਾਨੂੰ ਬਹੁਤ ਕੁਝ ਸਿੱਖਣ ਨੂੰ ਮਿਲਿਆ ਹੈ.” ਬਲਾਕ ਦਾ ਸੁਰੱਖਿਆ ਜਾਂਚ-ਢਾਂਚਾ ਡੇਬ੍ਰੇਕ ਉੱਤੇ ਬਣਾਇਆ ਗਿਆ ਹੈ, ਤਾਂ ਜੋ ਕੰਮ ਸਹੀ ਮਾਡਲ ਤੱਕ ਪਹੁੰਚ ਸਕਣ. ਇਸ ਵਿੱਚ ਮਨੁੱਖਾਂ ਲਈ ਕੰਮ ਦੀ ਵਾਗਡੋਰ ਸੰਭਾਲਣ ਜਾਂ ਏਜੰਟਾਂ ਲਈ ਇੱਕ-ਦੂਜੇ ਦੇ ਕੰਮ ਦੀ ਪੁਸ਼ਟੀ ਕਰਨ ਦੇ ਪ੍ਰਬੰਧ ਵੀ ਹਨ. ਟੀਮ ਅੰਦਰੂਨੀ ਮਾਪਦੰਡਾਂ ਅਤੇ ਅਸਲ ਵਰਤੋਂ ਵਿੱਚ ਕਾਰਗੁਜ਼ਾਰੀ ਦੇ ਆਧਾਰ ’ਤੇ ਇਨ੍ਹਾਂ ਪ੍ਰਣਾਲੀਆਂ ਦਾ ਲਗਾਤਾਰ ਮੁਲਾਂਕਣ ਕਰਦੀ ਹੈ ਅਤੇ ਲੋੜ ਪੈਣ ’ਤੇ ਆਪਣਾ ਤਰੀਕਾ ਬਦਲਦੀ ਹੈ. ਜਿੱਥੇ ਜ਼ਿੰਮੇਵਾਰੀ ਨਿਭਾਉਣ ਲਈ ਮਨੁੱਖੀ ਸਮੀਖਿਆ ਜ਼ਰੂਰੀ ਹੋਵੇ, ਉੱਥੇ ਕੰਮ ਮਨੁੱਖਾਂ ਕੋਲ ਭੇਜਿਆ ਜਾਂਦਾ ਹੈ.

ਮਾਮਲਿਆਂ ਦੀ ਸਵੈਚਾਲਿਤ ਮੁੱਢਲੀ ਜਾਂਚ ਅਤੇ ਤਰਜੀਹ ਤੈਅ ਕਰਨ ਵਾਲੀ ਪ੍ਰਣਾਲੀ ਨਾਲ ਹੁਣ ਵੱਧ ਕੰਮ, ਹੋਰ ਤੇਜ਼ੀ ਨਾਲ ਹੋ ਰਿਹਾ ਹੈ. ਬਲਾਕ ਦੀ ਸੁਰੱਖਿਆ ਟੀਮ ਦੀ ਮੁੱਢਲੀ ਜਾਂਚ ਦੀ ਥਰੂਪੁੱਟ ਵਿੱਚ 50% ਵਾਧਾ ਹੋਇਆ ਹੈ. ਖ਼ਤਰਿਆਂ ਬਾਰੇ ਜਾਣਕਾਰੀ ਇਕੱਠੀ ਕਰਨ ਅਤੇ ਜਾਂਚਾਂ ਵਿੱਚ ਵੀ 50% ਵਾਧਾ ਹੋਇਆ ਹੈ, ਅਤੇ ਖ਼ੁਦਮੁਖ਼ਤਿਆਰੀ ਨਾਲ ਖ਼ਤਰੇ ਲੱਭਣ ਦੀ ਬਿਲਕੁਲ ਨਵੀਂ ਸਮਰੱਥਾ ਮਿਲੀ ਹੈ. ਨੈੱਟਸਹਾਈਮ ਕਹਿੰਦੇ ਹਨ, “ਇਹ ਹਰ ਤਿਮਾਹੀ ਵਿਸ਼ਲੇਸ਼ਕਾਂ ਦੇ ਲਗਭਗ 1,100 ਘੰਟਿਆਂ ਦੇ ਕੰਮ ਬਰਾਬਰ ਜਾਂਚ ਕਰਦੀ ਹੈ, ਕਿਉਂਕਿ ਹੁਣ ਹਰ ਚਿਤਾਵਨੀ ਨਾਲ ਜੁੜੇ ਸਾਰੇ ਪਹਿਲੂਆਂ ਦੀ ਪੂਰੀ ਅਤੇ ਡੂੰਘੀ ਜਾਂਚ ਹੁੰਦੀ ਹੈ. ਸਾਡੀ ਪ੍ਰਣਾਲੀ ਹਰ ਚਿਤਾਵਨੀ ਨੂੰ ਇੰਨਾ ਧਿਆਨ ਦਿੰਦੀ ਹੈ ਜਿਵੇਂ ਉਸ ਦਿਨ ਸਾਨੂੰ ਸਿਰਫ਼ ਉਹੀ ਚਿਤਾਵਨੀ ਮਿਲੀ ਹੋਵੇ.”

ਰਵਾਇਤੀ ਸਕੈਨਿੰਗ ਸਾਧਨ ਕਿਸੇ ਇੱਕ ਕਮਜ਼ੋਰੀ ਨੂੰ ਬਾਕੀਆਂ ਤੋਂ ਵੱਖ ਕਰਕੇ ਦਿਖਾਉਂਦੇ ਹਨ, ਪਰ ਡੇਬ੍ਰੇਕ ਨਾਲ ਬਲਾਕ ਦੀ ਸੁਰੱਖਿਆ ਟੀਮ ਇਸ ਤੋਂ ਕਿਤੇ ਅੱਗੇ ਜਾ ਸਕਦੀ ਹੈ. ਮਾਡਲ ਹਮਲਿਆਂ ਦੇ ਸੰਭਾਵੀ ਤਰੀਕਿਆਂ ਬਾਰੇ ਅਨੁਮਾਨ ਲਗਾਉਣ ਅਤੇ ਕਈ ਹਮਲਿਆਂ ਨੂੰ ਜੋੜ ਕੇ ਸ਼ੁਰੂ ਤੋਂ ਅੰਤ ਤੱਕ ਸਿਸਟਮ ਵਿੱਚ ਸੰਨ੍ਹ ਲਾਉਣ ਦਾ ਪੂਰਾ ਰਾਹ ਲੱਭਣ ਵਿੱਚ ਮਦਦ ਕਰਦਾ ਹੈ. ਇਸ ਨਾਲ ਉਹ ਕਮਜ਼ੋਰੀਆਂ ਵੀ ਸਾਹਮਣੇ ਆਉਂਦੀਆਂ ਹਨ ਜੋ ਸ਼ਾਇਦ ਸਾਲਾਂ ਤੋਂ ਮੌਜੂਦ ਹੋਣ.

ਇੱਕ ਮਾਮਲੇ ਵਿੱਚ, ਇੱਕ ਲੈਪਟਾਪ ਤੋਂ ਮਿਲੀ ਚਿਤਾਵਨੀ ਨੂੰ ਇਕੱਲਿਆਂ ਦੇਖਣ ’ਤੇ ਉਹ ਨੀਤੀ ਨਾਲ ਜੁੜਿਆ ਇੱਕ ਮਾਮੂਲੀ ਮੁੱਦਾ ਲੱਗਦੀ ਸੀ. ਪਰ ਸਾਥੀ ਸਮੀਖਿਆ ਦੌਰਾਨ ਮਾਡਲ ਨੇ ਇੱਕ ਅਜਿਹੇ ਸੰਕੇਤ ਦੀ ਪੜਤਾਲ ਕੀਤੀ ਜੋ ਸਬੂਤਾਂ ਵਿੱਚ ਸਿਰਫ਼ ਇਤਫ਼ਾਕ ਨਾਲ ਨਜ਼ਰ ਆਇਆ ਸੀ. ਉਸ ਨੇ ਇਸ ਨੂੰ ਬਲਾਕ ਦੇ ਪਛਾਣ ਸੰਬੰਧੀ ਲੌਗਾਂ ਨਾਲ ਜੋੜਿਆ ਅਤੇ ਕਿਤੇ ਵੱਧ ਸਮੱਸਿਆਵਾਂ ਸਾਹਮਣੇ ਲਿਆਂਦੀਆਂ. “ਇੱਕ ਡਿਵਾਈਸ ਤੋਂ ਆਈ ਆਮ ਚਿਤਾਵਨੀ ਦੇ ਆਧਾਰ ’ਤੇ ਹਮਲਿਆਂ ਦੀ ਪੂਰੀ ਮੁਹਿੰਮ ਠੱਪ ਕਰ ਦਿੱਤੀ ਗਈ. ਕੋਈ ਇਕੱਲਾ ਸਾਧਨ ਇਹ ਕੜੀ ਨਹੀਂ ਜੋੜਦਾ. ਇਹ ਸੰਕੇਤ ਦੋ ਉਤਪਾਦਾਂ ਦੇ ਲੌਗਾਂ ਨੂੰ ਇਕੱਠਿਆਂ ਦੇਖਣ ’ਤੇ ਹੀ ਮਿਲਦਾ ਹੈ,” ਜੇਮਜ਼ ਕਹਿੰਦੇ ਹਨ.

ਡੇਬ੍ਰੇਕ ਦੀ ਮਦਦ ਦੀ ਇੱਕ ਹੋਰ ਮਿਸਾਲ ਹਾਲ ਹੀ ਵਿੱਚ ਰੈਡ ਟੀਮ ਦੇ ਇੱਕ ਅਭਿਆਸ ਦੌਰਾਨ ਮਿਲੀ. ਮਾਡਲ ਨੂੰ ਇੱਕ ਅੰਦਰੂਨੀ ਸਿਸਟਮ ਬਾਰੇ ਕੁਝ ਸੰਕੇਤ ਦਿੱਤੇ ਗਏ. ਉਸ ਨੇ ਲਗਭਗ ਦੋ ਘੰਟਿਆਂ ਵਿੱਚ ਹਮਲੇ ਦਾ ਪੂਰਾ ਰਾਹ ਜੋੜ ਲਿਆ—SQL ਇੰਜੈਕਸ਼ਨ, ਪਹੁੰਚ ਅਧਿਕਾਰ ਵਧਾਉਣਾ, ਸਿਸਟਮ ਵਿੱਚ ਪੈਰ ਜਮਾਉਣਾ, ਪ੍ਰਮਾਣ-ਪੱਤਰਾਂ ਦੀ ਸੂਚੀ ਤਿਆਰ ਕਰਨਾ ਅਤੇ ਫਿਰ ਉੱਥੋਂ ਹੋਰ ਸਿਸਟਮਾਂ ਤੱਕ ਪਹੁੰਚਣਾ. ਆਮ ਤੌਰ ’ਤੇ ਕਿਸੇ ਮਨੁੱਖੀ ਰੈਡ ਟੀਮਿੰਗ ਮਾਹਰ ਨੂੰ ਇਸ ਕੰਮ ਵਿੱਚ ਕਈ ਦਿਨ ਲੱਗਦੇ. ਹਾਲੀਆ ਰੈਡ ਟੀਮ ਅਭਿਆਸਾਂ ਵਿੱਚ ਉੱਚ-ਪੱਧਰੀ ਕਮਜ਼ੋਰੀ ਦੀ ਜਾਣਕਾਰੀ ਦੇਣ ਤੋਂ ਆਪਣੇ ਆਪ ਪੈਚ ਦਾ ਪ੍ਰਸਤਾਵ ਮਿਲਣ ਤੱਕ ਸਿਰਫ਼ 18 ਮਿੰਟ ਲੱਗੇ.

ਕਮਜ਼ੋਰੀਆਂ ਲੱਭਣ ਦਾ ਫ਼ਾਇਦਾ ਤਦ ਹੀ ਹੈ ਜੇ ਉਨ੍ਹਾਂ ਨੂੰ ਦੂਰ ਵੀ ਕੀਤਾ ਜਾ ਸਕੇ. ਨੈੱਟਸਹਾਈਮ ਦੱਸਦੇ ਹਨ ਕਿ ਉਨ੍ਹਾਂ ਦੀ ਟੀਮ ਹਰ ਮਿਲੀ ਕਮਜ਼ੋਰੀ ਲਈ ਕਿਹੜੀ ਪ੍ਰਕਿਰਿਆ ਅਪਣਾਉਂਦੀ ਹੈ: ਪਹਿਲਾਂ ਇਹ ਲੱਭਣਾ ਕਿ ਸਮੱਸਿਆ ਕੋਡ ਵਿੱਚ ਕਿੱਥੇ ਹੈ ਅਤੇ ਉਸ ਹਿੱਸੇ ਦੀ ਜ਼ਿੰਮੇਵਾਰੀ ਕਿਸ ਦੀ ਹੈ, ਫਿਰ ਉਸ ਨੂੰ ਦੂਰ ਕਰਨਾ. “ਤੁਸੀਂ ਪੈਚ ਸੁਝਾਉਂਦੇ ਹੋ, ਪੁਸ਼ਟੀ ਕਰਦੇ ਹੋ ਕਿ ਕਮਜ਼ੋਰੀ ਦਾ ਫ਼ਾਇਦਾ ਚੁੱਕ ਕੇ ਹਮਲਾ ਕੀਤਾ ਜਾ ਸਕਦਾ ਹੈ, ਅਤੇ ਫਿਰ ਜਾਂਚਦੇ ਹੋ ਕਿ ਤੁਸੀਂ ਉਸ ਨੂੰ ਦੂਰ ਕਰ ਦਿੱਤਾ ਹੈ. ਇਸ ਪ੍ਰਕਿਰਿਆ ਵਿੱਚ ਇੱਕ ਮਨੁੱਖ ਦਿਸ਼ਾ ਦਿੰਦਾ ਹੈ ਅਤੇ ਕੋਡ ਦੀਆਂ ਤਬਦੀਲੀਆਂ ਲਾਗੂ ਕਰਦਾ ਹੈ.”

ਭਾਵੇਂ ਏਜੰਟ ਤਕਨੀਕੀ ਤੌਰ ’ਤੇ ਸਮਰੱਥ ਹਨ, ਪਰ ਉਨ੍ਹਾਂ ਕੋਲ ਸੰਸਥਾ ਦੇ ਹਾਲਾਤ ਦੀ ਸਮਝ ਜਾਂ ਪਿਛਲੇ ਫ਼ੈਸਲਿਆਂ ਪਿੱਛੇ ਦੇ ਤਰਕ ਦੀ ਜਾਣਕਾਰੀ ਨਹੀਂ ਹੁੰਦੀ. ਇਹ ਸੰਦਰਭ ਅਤੇ ਰਣਨੀਤੀ ਕੋਈ ਮਨੁੱਖ ਹੀ ਦਿੰਦਾ ਹੈ, ਅਤੇ ਇੱਥੇ ਉਨ੍ਹਾਂ ਦੀ ਟੀਮ ਮਨੁੱਖੀ ਸਮੀਖਿਆ ਦੀ ਜ਼ਿੰਮੇਵਾਰੀ ਸੰਭਾਲਦੀ ਹੈ. ਨੈੱਟਸਹਾਈਮ ਕਹਿੰਦੇ ਹਨ ਕਿ ਜਿਵੇਂ-ਜਿਵੇਂ ਅਮਲੀ ਵਰਤੋਂ ਵਿੱਚ ਏਆਈ ਦੀ ਫ਼ੈਸਲਾ ਲੈਣ ਦੀ ਸਮਰੱਥਾ ਸਾਬਤ ਹੁੰਦੀ ਜਾਵੇਗੀ, “ਅਸੀਂ ਹੌਲੀ-ਹੌਲੀ ਜੋਖਮ ਦਾ ਪੱਧਰ ਵਧਾਉਂਦਿਆਂ ਇਸ ਨੂੰ ਹੋਰ ਸੰਵੇਦਨਸ਼ੀਲ ਸਿਸਟਮਾਂ ਲਈ ਵਰਤਾਂਗੇ.”

• ਖ਼ਤਰੇ ਦੀ ਪਛਾਣ ਵਿੱਚ ਪ੍ਰਸਤਾਵਿਤ ਤਬਦੀਲੀ ਨੂੰ ਸੱਤ ਮਹੀਨਿਆਂ ਦੇ ਟੈਲੀਮੈਟਰੀ ਡਾਟੇ ’ਤੇ ਮੁੜ ਪਰਖਣ ਲਈ ਇੱਕ ਘੰਟੇ ਤੋਂ ਵੀ ਘੱਟ ਸਮਾਂ.

• ਹਾਲੀਆ ਰੈਡ ਟੀਮ ਅਭਿਆਸਾਂ ਵਿੱਚ ਉੱਚ-ਪੱਧਰੀ ਕਮਜ਼ੋਰੀ ਦੀ ਜਾਣਕਾਰੀ ਦੇਣ ਤੋਂ ਆਪਣੇ ਆਪ ਪੈਚ ਦਾ ਪ੍ਰਸਤਾਵ ਮਿਲਣ ਤੱਕ 18 ਮਿੰਟ.

• ਗ਼ਲਤ ਚਿਤਾਵਨੀਆਂ ਦੀ ਮੁੱਢਲੀ ਜਾਂਚ ਵਿੱਚ ਹਰ ਤਿਮਾਹੀ ਵਿਸ਼ਲੇਸ਼ਕਾਂ ਦੇ ਲਗਭਗ 600 ਘੰਟਿਆਂ ਦੀ ਬੱਚਤ.

• ਹਰ ਤਿਮਾਹੀ ਵਿਸ਼ਲੇਸ਼ਕਾਂ ਦੇ ਲਗਭਗ 1,100 ਘੰਟਿਆਂ ਦੇ ਕੰਮ ਬਰਾਬਰ ਜਾਂਚ ਪੂਰੀ.

• ਮੁੱਢਲੀ ਜਾਂਚ ਦੀ ਥਰੂਪੁੱਟ ਵਿੱਚ 50% ਵਾਧਾ.

• ਖ਼ਤਰਿਆਂ ਬਾਰੇ ਜਾਣਕਾਰੀ ਇਕੱਠੀ ਕਰਨ ਅਤੇ ਜਾਂਚਾਂ ਵਿੱਚ 50% ਵਾਧਾ.

ਸਿਰਫ਼ ਖ਼ਤਰਿਆਂ ਦੀ ਪਛਾਣ ਅਤੇ ਜਵਾਬੀ ਕਾਰਵਾਈ ਦੇ ਕੰਮ ਨਾਲ ਹੀ ਹਰ ਤਿਮਾਹੀ ਵਿਸ਼ਲੇਸ਼ਕਾਂ ਦੇ ਲਗਭਗ 600 ਘੰਟੇ ਬਚੇ ਹਨ, ਜੋ ਪਹਿਲਾਂ ਗ਼ਲਤ ਚਿਤਾਵਨੀਆਂ ਦੀ ਮੁੱਢਲੀ ਜਾਂਚ ’ਤੇ ਲੱਗਦੇ ਸਨ. ਇਹ ਸਮਾਂ ਬਚਣ ਨਾਲ ਟੀਮ ਹੁਣ ਡੂੰਘੀਆਂ ਜਾਂਚਾਂ ਕਰਨ ਅਤੇ ਜ਼ਿੰਮੇਵਾਰੀ ਨਾਲ ਹੋਰ ਸਵੈਚਾਲਿਤ ਪ੍ਰਕਿਰਿਆਵਾਂ ਬਣਾਉਣ ’ਤੇ ਵੱਧ ਸਮਾਂ ਲਗਾਉਂਦੀ ਹੈ.

ਜਿਵੇਂ-ਜਿਵੇਂ ਹਮਲਿਆਂ ਦੀ ਰਫ਼ਤਾਰ ਵਧਦੀ ਹੈ ਅਤੇ ਏਆਈ ਮਾਡਲ ਅੱਗੇ ਵਧਦੇ ਹਨ, ਨੈੱਟਸਹਾਈਮ ਨੂੰ ਸ਼ੁਰੂ ਤੋਂ ਹੀ ਘੱਟ ਕਮਜ਼ੋਰੀਆਂ ਪੈਦਾ ਹੋਣ ਦੇਣ ਦਾ ਮੌਕਾ ਨਜ਼ਰ ਆਉਂਦਾ ਹੈ. ਇਸ ਨਾਲ ਸੁਰੱਖਿਆ ਟੀਮਾਂ ਪੈਚ ਲਗਾਉਣ ’ਤੇ ਘੱਟ ਅਤੇ ਰੋਕਥਾਮ ਤੇ ਰਣਨੀਤਕ ਕੰਮ ’ਤੇ ਵੱਧ ਸਮਾਂ ਲਗਾ ਸਕਣਗੀਆਂ.

ਉਹ ਕਹਿੰਦੇ ਹਨ, “ਇਹ ਉੱਨਤ ਸਮਰੱਥਾਵਾਂ ਸਾਰਿਆਂ ਨੂੰ ਦੇ ਕੇ OpenAI ਸੁਰੱਖਿਆ ਕਰਨ ਵਾਲਿਆਂ ਦਾ ਪੱਲੜਾ ਭਾਰੀ ਕਰ ਰਿਹਾ ਹੈ.” “ਆਮ ਤੌਰ ’ਤੇ ਇਹ ਸਮਰੱਥਾਵਾਂ ਸਿਰਫ਼ ਬਹੁਤ ਵੱਡੀਆਂ ਤਕਨਾਲੋਜੀ ਕੰਪਨੀਆਂ ਅਤੇ ਸਰਕਾਰਾਂ ਕੋਲ ਹੀ ਹੁੰਦੀਆਂ ਸਨ. ਪਰ ਹੁਣ ਜ਼ਰੂਰੀ ਬੁਨਿਆਦੀ ਢਾਂਚੇ ਦੇ ਸੰਚਾਲਕਾਂ, ਸਕੂਲਾਂ ਅਤੇ ਛੋਟੇ ਕਾਰੋਬਾਰਾਂ ਸਮੇਤ ਹਰ ਕੋਈ ਆਪਣੇ ਨੈੱਟਵਰਕਾਂ ਦੀ ਸੁਰੱਖਿਆ ਲਈ ਇਸ ਤਕਨਾਲੋਜੀ ਦੀ ਵਰਤੋਂ ਸ਼ੁਰੂ ਕਰ ਸਕਦਾ ਹੈ.”