OpenAI နှင့် AT&T ၏ ဥပဒေရေးရာလုပ်ငန်း ပြောင်းလဲမှု

AT&T ၏ ကုမ္ပဏီတွင်း ဥပဒေရေးရာဌာနတွင် ကမ္ဘာတစ်ဝန်းမှ ရှေ့နေများနှင့် ဥပဒေရေးရာကျွမ်းကျင်သူ ရာပေါင်းများစွာ ရှိသည်။ ကုမ္ပဏီကို အကြံပေးနိုင်ရန် ၎င်းတို့သည် အချက်အလက်များ၊ စာရွက်စာတမ်းများနှင့် သက်ဆိုင်ရာ ယခင်လုပ်ဆောင်ချက်များကို ဦးစွာစုစည်းရပြီး၊ မကြာခဏဆိုသလို အဖွဲ့အသီးသီး၏ ကျွမ်းကျင်မှုများကိုပါ ရယူအသုံးချရသည်။ AT&T ၏ အကြီးတန်း အမှုဆောင်ဒုဥက္ကဋ္ဌနှင့် ဥပဒေအကြံပေးချုပ် David McAtee အတွက် ထိုအတွေ့အကြုံများကို ပိုမိုလွယ်ကူစွာ ရယူအသုံးချနိုင်ရေးသည် ဌာန၏ လုပ်ငန်းများ တိုးတက်လာစေရန် အဓိကကျသည်။

ထိုသို့ ရှေ့တစ်ဆင့်တက်နိုင်ရန် AT&T သည် OpenAI နှင့် ပူးပေါင်းဆောင်ရွက်နေသည်။ “OpenAI နဲ့ ပူးပေါင်းခြင်းအားဖြင့် ကုမ္ပဏီတစ်ခုလုံးမှာ အသိပညာတွေ ဖြန့်ဝေအသုံးချနိုင်ပြီး ကျွန်တော်တို့အားလုံး ရယူသုံးစွဲနိုင်မယ့် အခြေခံစနစ်ကို တည်ဆောက်နိုင်မှာပါ” ဟု McAtee က ဆိုသည်။

ဤပူးပေါင်းဆောင်ရွက်မှုသည် အရေးကြီးသော ဥပဒေရေးရာကိစ္စများတွင် AI အသုံးချရေးကို အဓိကထားသည့် AT&T ၏ LegalEdge အဖွဲ့ကို အခြေခံ၍ ရှေ့ဆက်ခြင်းဖြစ်သည်။ ထိုအဖွဲ့တွင် ရှေ့နေများ၊ ဥပဒေရေးရာကျွမ်းကျင်သူများ၊ နည်းပညာရှင်များနှင့် စီမံကိန်းမန်နေဂျာများ ပါဝင်သည်။ နောက်တစ်ဆင့်မှာ ကုမ္ပဏီက စုဆောင်းရရှိထားသည့် အတွေ့အကြုံနှင့် ကျွမ်းကျင်မှုများကို ရှေ့နေတစ်ဦးထံ ရောက်လာသည့် လုပ်ငန်းများတွင် ပိုမိုချိတ်ဆက်အသုံးချနိုင်ရန် ဖြစ်သည်။

ကုမ္ပဏီ၏ ကဏ္ဍအသီးသီးမှ တောင်းဆိုချက်များ ရောက်လာသည့်အခါ ဥပဒေရေးရာအဖွဲ့များသည် အန္တရာယ်များကို မလွတ်တမ်း သတိပြုလျက် လျင်မြန်စွာ တုံ့ပြန်ဆောင်ရွက်ရန် လိုသည်။ အကြံမပေးမီ ကိစ္စရပ်ကို နားလည်အောင်လုပ်ရပြီး သက်ဆိုင်ရာ နောက်ခံအချက်အလက်များကို စုဆောင်းကာ မည်သည့်အရာကို ဦးစွာအာရုံစိုက်ရမည်ဟု ဆုံးဖြတ်ရသည်။ ထို့ကြောင့် တောင်းဆိုချက်များကို လက်ခံစိစစ်ခြင်းသည် ကုမ္ပဏီကို ကာကွယ်ရာတွင် အရေးပါသော အစိတ်အပိုင်းတစ်ခု ဖြစ်လာသည်။ AT&T ၏ စည်းမျဉ်းလိုက်နာမှုဆိုင်ရာ အရာရှိချုပ် Bill Ryan က စီစဉ်ထားသည့် လုပ်ငန်းတစ်ခုကို “နေ့စဉ်သုံးစကားနဲ့ တင်ပြချက်တွေကို လက်ခံပေးမယ့် ဝင်ပေါက်” ပါဝင်သော လက်ခံစိစစ်ရေးစနစ်ဟု ဖော်ပြသည်။ ထိုစနစ်က တောင်းဆိုချက်များကို အမျိုးအစားခွဲ၍ ဦးစားပေးအစီအစဉ် သတ်မှတ်ပေးမည်။ ထို့နောက် သက်ဆိုင်ရာ စီရင်ထုံးများ၊ သုတေသနများ၊ ယခင်လုပ်ဆောင်ချက်များနှင့် ချိတ်ဆက်ပေးပြီး တာဝန်ယူသည့် ဥပဒေရေးရာကျွမ်းကျင်သူအား ယခင်နောက်ခံအကြောင်းအရာများနှင့် စတင်လုပ်ဆောင်သင့်သည့် အဆင့်များကို အကြံပြုပေးမည်။

ထိုသို့ဆိုလျှင် ရှေ့နေများသည် ကိစ္စတစ်ခုကို သုံးသပ်ရန် လိုအပ်သည့် အချက်အလက်များ စုဆောင်းရာတွင် အချိန်ကုန်သက်သာလာပြီး အစကတည်းက ပိုမိုပြည့်စုံသော အချက်အလက်များဖြင့် အလုပ်စနိုင်မည်။ ဌာန၏ ဥပဒေရေးရာသုံးသပ်ဆုံးဖြတ်နိုင်စွမ်းကို ကုမ္ပဏီ၏ လိုအပ်ချက်များအတွက် ပိုမိုကျယ်ပြန့်စွာ အသုံးချနိုင်အောင် ကူညီပေးရန် အခွင့်အလမ်းရှိသည်ဟု Ryan က မြင်သည်။

“အနာဂတ်အတွက် ကျွန်တော် စိတ်အလှုပ်ရှားဆုံးက ဥပဒေရေးရာ သုံးသပ်ဆုံးဖြတ်ပေးနိုင်စွမ်းကို ပိုပြီးကျယ်ကျယ်ပြန့်ပြန့် ချဲ့ထွင်နိုင်မယ့် အချက်ပါ” ဟု ၎င်းက ဆိုသည်။

McAtee အတွက်မူ ဤလုပ်ငန်းကို လမ်းညွှန်သည့် အခြေခံမူက ရှင်းလင်းနေဆဲဖြစ်သည်။ “ဆုံးဖြတ်ချက်ချတာကိုတော့ ရှေ့နေတွေပဲ အမြဲတာဝန်ယူသွားမှာပါ။” ဤပူးပေါင်းမှု၏ ရည်ရွယ်ချက်မှာ ပိုကောင်းသော အချက်အလက်များကို အလွယ်တကူ ရယူနိုင်စေရန်ဖြစ်ပြီး၊ ထိုမှတစ်ဆင့် ရှေ့နေများက မိမိတို့၏ ကျွမ်းကျင်မှုကို အသုံးချရာတွင် အချိန်ပိုပေးနိုင်မည် ဖြစ်သည်။

LegalEdge နှင့် OpenAI နှင့်အတူ ရှေ့ဆက်မည့် AT&T ၏ ဥပဒေရေးရာလုပ်ငန်းများအကြောင်း McAtee နှင့် Ryan တို့ ဆွေးနွေးထားသည်ကို ကြည့်ရှုပါ။