OpenAI പിയർ കംപ്യൂട്ടർ കമ്പനി, ഇൻക്. ഏറ്റെടുക്കും.
കോഡ് എഴുതാനും മനസ്സിലാക്കാനും പരിശോധിക്കാനുമുള്ള Codex ഉപകരണങ്ങൾ വിപുലമാക്കുന്നു.
കോഡ് സ്റ്റോറേജും(പുതിയ വിൻഡോയിൽ തുറക്കുന്നു) ശ്രദ്ധേയമായ നിരവധി ഓപ്പൺ സോഴ്‌സ് വികസന ഉപകരണങ്ങളും ഒരുക്കിയ പിയർ കംപ്യൂട്ടർ കമ്പനി, ഇൻക്(പുതിയ വിൻഡോയിൽ തുറക്കുന്നു). (“പിയർ”) എന്ന കമ്പനിയെ OpenAI ഏറ്റെടുക്കുമെന്ന് ഇന്ന് ഞങ്ങൾ പ്രഖ്യാപിക്കുന്നു. Codex ആപ്പിൽ ഫയലുകൾ തുറന്നുനോക്കുകയോ ഒരു മാറ്റം പരിശോധിക്കുകയോ ചെയ്തിട്ടുണ്ടെങ്കിൽ, നിങ്ങൾ ഇതിനകം പിയറിന്റെ ട്രീസ്, ഡിഫ്സ് ലൈബ്രറികൾ ഉപയോഗിച്ചിട്ടുണ്ട്. വികസിപ്പിക്കുന്നവർ ഇതിനകം ആശ്രയിക്കുന്ന ഗിറ്റ് പ്രവർത്തനരീതികൾ മെച്ചപ്പെടുത്താനും, കോഡിങ് ഏജന്റുകൾക്കൊപ്പം സംഘങ്ങൾ പ്രവർത്തിക്കുന്ന രീതിക്ക് അനുയോജ്യമാക്കാനും പിയർ സംഘത്തോടൊപ്പം പ്രവർത്തിക്കുന്നതിൽ ഞങ്ങൾ ആവേശഭരിതരാണ്.
കൂടുതൽ ജോലികൾ ഒരേസമയം നടക്കുമ്പോൾ, ഗിറ്റിനെ ചുറ്റിപ്പറ്റിയുള്ള സംവിധാനങ്ങൾ എങ്ങനെ വികസിക്കണമെന്ന് ഞങ്ങളുടെ സ്വന്തം എൻജിനീയറിങ് ജോലികളിൽ കണ്ടറിഞ്ഞിട്ടുണ്ട്. ഈ ആഴ്ചയുടെ തുടക്കത്തിൽ, എൻജിനീയർമാർക്കും ഏജന്റുകൾക്കുമായി ഞങ്ങൾ സ്വന്തമായി നിർമിച്ച സോഴ്‌സ് കൺട്രോൾ ബാക്കെൻഡായ പാൻഡോ ഉപയോഗിച്ച് OpenAI-യിൽ ഗിറ്റിന്റെ പ്രവർത്തനശേഷി വിപുലമാക്കുന്നത് എങ്ങനെയെന്ന് ഞങ്ങൾ പങ്കുവെച്ചിരുന്നു. ഒരു ഏജന്റ് സൃഷ്ടിക്കുന്ന ആദ്യ ശാഖ മുതൽ കോഡ് ലോകത്തിന് ലഭ്യമാകുന്ന ആ വിസ്മയനിമിഷം വരെ, ആധുനിക സോഫ്‌റ്റ്‌വെയർ വികസനത്തിന്റെ നിലവാരമാനദണ്ഡം നിർണയിക്കാൻ പിയർ സംഘത്തോടൊപ്പം ഞങ്ങൾ ആഗ്രഹിക്കുന്നു. വികസിപ്പിക്കുന്നവരും ഏജന്റുകളും തങ്ങളുടെ ഏറ്റവും വലിയ ലക്ഷ്യങ്ങളുള്ള പദ്ധതികൾ ഏറ്റെടുക്കുന്ന ഇടമായി Codex-നെ മാറ്റാനാണ് ഞങ്ങൾ ആഗ്രഹിക്കുന്നത്.
ഗിറ്റ് ഉപയോഗിച്ചുള്ള ജോലിയുടെ മറ്റൊരു ഭാഗമാണ് കോഡ് വികസിപ്പിക്കുന്നവർ അത് പരിശോധിക്കുന്ന രീതി. ഇതിൽ പിയർ പുലർത്തുന്ന ശ്രദ്ധയെ ഞങ്ങൾ ഏറെക്കാലമായി വിലമതിക്കുന്നു. ഇന്ന് Codex-ൽ ഞങ്ങൾ ഉപയോഗിക്കുന്ന ലൈബ്രറികളിൽ ആ ശ്രദ്ധ കാണാം. ഒരു പദ്ധതിയിലെ ഫയലുകൾക്കിടയിൽ വേഗത്തിൽ സഞ്ചരിക്കാൻ ട്രീസ് സഹായിക്കുന്നു. എന്താണ് മാറിയതെന്ന് കാണുന്നത് ഡിഫ്സ് എളുപ്പമാക്കുന്നു. പ്രവർത്തനക്ഷമതയിൽ വിട്ടുവീഴ്ചയില്ലാതെ വലിയ അളവിലുള്ള കോഡ് പരിശോധിക്കാനും അതിലൂടെ സഞ്ചരിക്കാനും ഈ രണ്ട് ഉപകരണങ്ങളും സഹായിക്കുന്നു.
സൂക്ഷ്മാംശങ്ങളോടുള്ള ഇതേ ശ്രദ്ധ പിയറിന്റെ മറ്റു പ്രവർത്തനങ്ങളിലും കാണാം. ഡിഫ്സിലെ തിരുത്തൽ രീതി ഉപയോഗിച്ച്, പരിശോധിക്കുന്നയാൾക്ക് പ്രശ്നം കണ്ടെത്തിയ അതേ ഇടത്തുതന്നെ കോഡിന്റെ വരി തിരുത്താം. വികസിപ്പിക്കുന്നയാൾ ടൈപ്പ് ചെയ്യുമ്പോഴോ ഒരു ഏജന്റ് തുടർച്ചയായി കോഡ് നൽകുമ്പോഴോ അതിനൊപ്പം പുതുക്കപ്പെടുന്ന, അതിവേഗത്തിൽ കോഡിന്റെ വാക്യഘടന എടുത്തുകാട്ടുന്ന ഹൈലൈറ്റ്സ് എന്ന ഉപകരണം പിയർ അടുത്തിടെ പുറത്തിറക്കി. കോഡിലെ വ്യത്യാസങ്ങൾ കാണിക്കുന്ന സംവിധാനത്തിനുള്ളിൽ തിരുത്താനുള്ള സൗകര്യം ഒരുക്കിയ അതേ ചെറിയ സംഘമാണ് കോഡ് സ്റ്റോറേജിന്റെ എപിഐയും രൂപകൽപ്പന ചെയ്തത്. ഗിറ്റ് ഉപയോഗിച്ച് കോഡ് സൂക്ഷിക്കാനും അതിന്റെ മാറ്റങ്ങളുടെ ചരിത്രം പിന്തുടരാനും ആപ്പുകളെ സഹായിക്കുന്ന സേവനമാണ് കോഡ് സ്റ്റോറേജ്.
വികസിപ്പിക്കുന്നവർ ഏറെ ഇഷ്ടപ്പെടുന്ന ഉപകരണങ്ങളാണ് പിയർ നിർമിച്ചിട്ടുള്ളത്. ഞങ്ങൾ ഒരുമിച്ച് എല്ലാവർക്കും പ്രയോജനപ്പെടുന്ന പുതിയ ഉൽപ്പന്നങ്ങളും വേദികളും പുറത്തിറക്കും. ഏറ്റെടുക്കൽ പൂർത്തിയായാൽ, വ്യവസായമേഖലയിലുടനീളം സോഴ്‌സ് കൺട്രോളിന്റെ ഭാവിയെ മുന്നോട്ടുനയിക്കുകയാണ് ഞങ്ങളുടെ ലക്ഷ്യം. ഒരു കമ്പനി പുറത്തിറക്കുന്ന കോഡിനെയും അവിടെയുള്ളവർ എടുക്കുന്ന തീരുമാനങ്ങളെയും ഭാവി ആവശ്യപ്പെടുന്ന തോതിൽ പരസ്പരം ബന്ധിപ്പിക്കാൻ Codex-ന് കഴിയണമെന്നാണ് ഞങ്ങളുടെ ആഗ്രഹം.
പിയറിന്റെ ഓപ്പൺ സോഴ്‌സ് പദ്ധതികൾ ഓപ്പൺ സോഴ്‌സ് ആയിത്തന്നെ തുടരും. അവയ്ക്ക് ഞങ്ങൾ തുടർന്നും സംഭാവനകൾ നൽകും. കോഡ് സ്റ്റോറേജിന്റെ സവിശേഷതകളും പ്രവർത്തനങ്ങളും Codex-ലേക്ക് കൊണ്ടുവരാൻ ഞങ്ങൾ പ്രവർത്തിക്കുമ്പോഴും, ഏറ്റെടുക്കൽ പൂർത്തിയായ ശേഷവും ഉപഭോക്താക്കൾക്ക് കോഡ് സ്റ്റോറേജ് ഉപയോഗിക്കുന്നത് തുടരാം.
നിയന്ത്രണാധികാരികളുടെ അനുമതി ലഭിക്കുന്നതടക്കം, ഇത്തരം ഇടപാടുകൾക്ക് സാധാരണ ബാധകമായ വ്യവസ്ഥകൾ പാലിച്ചാൽ മാത്രമേ ഏറ്റെടുക്കൽ പൂർത്തിയാകൂ. അതുവരെ OpenAI-യും പിയറും വേറിട്ടതും സ്വതന്ത്രവുമായ കമ്പനികളായി തുടരും.
