Codex, OpenAI-യുടെ ക്രിയേറ്റീവ് ടീമിൻ്റെ സഹകാരിയായി മാറിയ വിധം

OpenAI സ്വന്തം സാങ്കേതികവിദ്യയും API-കളും എങ്ങനെ ഉപയോഗിക്കുന്നു എന്നതിൻ്റെ ആന്തരിക ഉദാഹരണങ്ങൾ പങ്കിടുന്ന ഞങ്ങളുടെ പരമ്പരയുടെ ഭാഗമാണിത്. ഈ ടൂളുകൾ OpenAI-യ്ക്കുള്ളിൽ തന്നെയാണ് ഉപയോഗിക്കുന്നത്; അത്യാധുനിക AI ഞങ്ങളുടെ വിവിധ ടീമുകളെ എങ്ങനെ സഹായിക്കുന്നു എന്നതിൻ്റെ ഉദാഹരണങ്ങളാണ് ഇവിടെ കൊടുത്തിരിക്കുന്നത്.

Codex വെറും എഞ്ചിനീയർമാർക്കും ഡെവലപ്പർമാർക്കും മാത്രമുള്ളതാണെന്നാണ് ഭൂരിഭാഗം ആളുകളും കരുതുന്നത്; എന്നാൽ OpenAI-യിലെ ക്രിയേറ്റീവ് സ്പെഷ്യലിസ്റ്റായ Chad Nelson-നെ സംബന്ധിച്ചിടത്തോളം അതൊരു സർഗ്ഗാത്മക പ്രശ്നപരിഹാരകനും മികച്ചൊരു സഹപ്രവർത്തകനുമാണ്. OpenAI മോഡലുകൾ ഉപയോഗിച്ച് ക്രിയേറ്റീവ് ടീമുകൾക്ക് എന്തൊക്കെ ചെയ്യാൻ സാധിക്കുമെന്ന് കണ്ടെത്തുകയും ആ സാധ്യതകളെ ബ്രാൻഡ് പങ്കാളികൾക്ക് പ്രയോജനപ്പെടുത്താൻ കഴിയുന്ന ഡെമോകൾ, പ്രവർത്തന രീതികൾ, പുതിയ ആശയങ്ങൾ എന്നിവയാക്കി മാറ്റുകയുമാണ് Chad-ൻ്റെ ചുമതല.

സർഗ്ഗാത്മക ആവശ്യങ്ങൾക്കായുള്ള സാധാരണ സോഫ്റ്റ്‌വെയറുകളുടെ പരിമിതികൾക്കുള്ളിൽ നിന്ന് മാത്രം പ്രവർത്തിച്ച് ശീലിച്ച Chad-നെ Codex-ൻ്റെ മികവുകൾ ഏറെ ആകർഷിച്ചു. മികച്ച ടൂളുകൾ ഉണ്ടാക്കാനും അനുയോജ്യമായ പ്രവർത്തന രീതികൾ നിർമ്മിക്കാനും ഒരു പ്രോജക്റ്റിൻ്റെ മുഴുവൻ വിവരങ്ങളും ഉൾക്കൊണ്ടുകൊണ്ട് ക്യാംപെയ്നുകൾക്ക് കൃത്യമായ ദിശാബോധം നൽകാനും Codex അദ്ദേഹത്തെ സഹായിക്കുന്നു.

“എൻ്റെ കരിയറിലുടനീളം ഞാൻ ഉപയോഗിച്ചുകൊണ്ടിരുന്ന ടൂളുകൾക്ക് ഞാൻ ഏത് പ്രോജക്റ്റിലാണ് ജോലി ചെയ്യുന്നതെന്നോ ഏത് ബ്രാൻഡിനുവേണ്ടിയാണ് ജോലി ചെയ്യുന്നതെന്നോ അല്ലെങ്കിൽ ഏത് ഉൽപ്പന്നത്തിൻ്റെ പ്രൊമോഷനാണ് ഞാൻ ഉദ്ദേശിക്കുന്നതെന്നോ ഉള്ള യാതൊരു അറിവും ഇല്ലായിരുന്നു, Chad പറയുന്നു. “Codex-നും ChatGPT‑ക്കും പശ്ചാത്തലം അറിയാം. ഞാൻ ഈ കക്ഷിക്ക് വേണ്ടിയാണ് ജോലി ചെയ്യുന്നതെന്നും ഉൽപ്പന്നം ഇതാണെന്നും ഇതിൻ്റെ തന്ത്രപരമായ ലക്ഷ്യങ്ങൾ എന്തൊക്കെയാണെന്നും അവയ്ക്ക് കൃത്യമായി അറിയാം."

ബ്രാൻഡ് ബുക്കുകൾ, സ്റ്റൈൽ ഗൈഡുകൾ, ഫോണ്ടുകൾ, കോംപോസിഷൻ എന്നിവയെല്ലാം മനസ്സിലാക്കാൻ Codex-ന് കഴിയും—ഈ അറിവോടെ ഒരു പ്രോജക്റ്റിൻ്റെ സർഗ്ഗാത്മക ആവശ്യങ്ങളെ കൃത്യമായി ഉൾക്കൊള്ളാൻ അതിന് സാധിക്കുന്നു.

ഒരു ക്യാമ്പെയിൻ്റെ ദിശാബോധം നിശ്ചയിക്കപ്പെടുന്നത്, അത് ഏത് ബ്രാൻഡിന് വേണ്ടിയുള്ളതാണ്, ഏത് ഉൽപ്പന്നമാണ്, ആ സൃഷ്ടിയിലൂടെ നിങ്ങൾ കൈമാറാൻ ആഗ്രഹിക്കുന്ന വൈകാരികമായ ഗുണനിലവാരം എന്താണ് എന്നിവയെ അടിസ്ഥാനമാക്കിയാണ്. ഈ വിവരങ്ങളെല്ലാം പൂർണ്ണമായി ഉൾക്കൊണ്ടുകൊണ്ട് പരമ്പരാഗത ടൂളുകൾക്ക് സാധിക്കാത്ത രീതിയിൽ പ്രവർത്തിക്കാൻ Codex-ന് കഴിയുമെന്ന് Chad തിരിച്ചറിഞ്ഞു.

കൂടാതെ, പ്രത്യേക പ്രശനങ്ങൾ പരിഹരിക്കാൻ സഹായിക്കുന്ന ടൂളുകൾ നിർമ്മിക്കുന്നതിനും അവ ഇഷ്ടാനുസൃതമാക്കുന്നതിനും അദ്ദേഹം Codex ഉപയോഗിക്കുന്നുണ്ട്.

സ്വാഭാവിക ഭാഷ ഉപയോഗിച്ച്, തനിക്ക് ആവശ്യമുള്ള ജോലി രീതി വിവരിക്കാനും അത് നിർമ്മിക്കാൻ സഹായിക്കാൻ Codex-നോട് ആവശ്യപ്പെടാനും അദ്ദേഹത്തിന് സാധിക്കും. അതിൽ ഒരു API കീ ബന്ധിപ്പിക്കുന്നതോ ഒരു പ്രോട്ടോടൈപ്പ് ഇൻ്റർഫേസ് നിർമ്മിക്കുന്നതോ അല്ലെങ്കിൽ വ്യത്യസ്ത ദൃശ്യ ശൈലികൾ പരീക്ഷിച്ചുനോക്കാൻ സഹായിക്കുന്ന ഒരു ഇഷ്ടാനുസൃതമാക്കാവുന്ന UI രൂപപ്പെടുത്തുന്നതോ ഉൾപ്പെടാം.

“Codex ഉപയോഗിച്ച്, എനിക്ക് ടൂളുകൾ, ഉപയോക്തൃ ഇൻ്റർഫേസുകൾ, സ്ലൈഡറുകൾ, കൺട്രോളുകൾ എന്നിവയൊക്കെ ശരിക്കും നിർമ്മിക്കാൻ സാധിക്കും," അദ്ദേഹം പറയുന്നു. “എനിക്ക് ക്യാമറ കോമ്പോസിഷനും ലൈറ്റിംഗും ക്രമീകരിക്കാനും കൃത്യമായ ആഴവും മാനങ്ങളുമുള്ള തത്സമയ നിഴലുകൾ സൃഷ്ടിക്കാനും സാധിക്കും."

Codex സർഗ്ഗാത്മകമായ പര്യവേക്ഷണങ്ങളുടെ വേഗതയും വർദ്ധിപ്പിക്കുണ്ട്. അടുത്തിടെ, ഒരു പുതിയ കക്ഷിക്ക് വേണ്ടി ക്യാംപെയ്ൻ ആശയങ്ങൾ തയ്യാറാക്കാൻ Chad-ന് വെറും ഒറ്റ ദിവസം മാത്രമാണ് ലഭിച്ചത്. സാധാരണഗതിയിൽ, അദ്ദേഹത്തിന് പരമാവധി അഞ്ച് സാധ്യതകൾ മാത്രമേ ആലോചിക്കാൻ സാധിക്കുമായിരുന്നുള്ളൂ, അല്ലെങ്കിൽ ആവശ്യത്തിന് സമയമുണ്ടെങ്കിൽ ഒരുപക്ഷേ 10 എണ്ണം വരെ. അവയിൽ പലതും ഒരേ ആശയത്തിൻ്റെ തന്നെ വകഭേദങ്ങളായിരിക്കാറാണ് പതിവ്.

ബ്രാൻഡ്, അതിൻ്റെ ഉൽപ്പന്നങ്ങൾ, ചില മാർഗ്ഗനിർദ്ദേശങ്ങൾ, കക്ഷിയുടെ ലക്ഷ്യങ്ങൾ എന്നിവയുൾപ്പെടെയുള്ള പ്രോജക്റ്റിൻ്റെ മുഴുവൻ വിവരങ്ങളും സിസ്റ്റത്തിന് നൽകിക്കൊണ്ടാണ് Chad, Codex-ൻ്റെ പ്രവർത്തനം തുടങ്ങിയത്. കൂടാതെ ആ ക്യാമ്പെയ്ൻ ഏത് തരത്തിലുള്ള ശൈലിയിലായിരിക്കണം എന്നതിനെക്കുറിച്ചുള്ള വിവരങ്ങളും അദ്ദേഹം നൽകിയിരുന്നു.

വെറും ഒരു ദിവസം കൊണ്ട്, Chad-ഉം Codex-ഉം ചേർന്ന് 50 രീതികൾ തയ്യാറാക്കി; തുടർന്ന് അദ്ദേഹം അവ പരിശോധിക്കുകയും അതിൽ നിന്നും ഏറ്റവും മികച്ച 10 ആശയങ്ങൾ വര്ത്തിരിച്ചെടുക്കുകയും ചെയ്തു. “കൂടുതൽ സ്വാതന്ത്ര്യത്തോടെ സർഗ്ഗാത്മകമായി ചിന്തിക്കാനും വ്യത്യസ്തമായ ഈ സാധ്യതകളെല്ലാം പരീക്ഷിച്ചു നോക്കാനും Codex എന്നെ സഹായിക്കുന്നുവെന്നാണ് ഞാൻ മനസ്സിലാക്കിയത്," അദ്ദേഹം പറയുന്നു.

കൂടുതൽ ആശയങ്ങൾ കൈവശമുണ്ടായിരുന്നതിനാൽ, സമയപരിധി വളരെ കുറവായിരുന്നിട്ടും പ്രോജക്റ്റ് അവതരിപ്പിച്ച സമയത്ത് വളരെ ശക്തമായ ചില ഓപ്ഷനുകൾ അവതരിപ്പിക്കാൻ Chad-ന് സാധിച്ചു.

ആശയ രൂപീകരണം, പ്രവർത്തന രീതി രൂപകൽപ്പന ചെയ്യൽ, സാങ്കേതികമായി നടപ്പിലാക്കൽ എന്നിവ പോലെ സാധാരണയായി ജോലി വൈകുന്ന ഘട്ടങ്ങളിൽ ക്രിയേറ്റീവ് ടീമുകൾക്ക് വേഗതയും സഹായവും നൽകാൻ Codex-ന് സാധിക്കുന്നു.

മനസ്സിൽ ഒരു പ്രോട്ടോടൈപ്പ് രൂപപ്പെട്ടാൽ, അത് വിവരിക്കാനും നിർമ്മാണം ആരംഭിക്കാനും Chad-ന് സാധിക്കും. ഒരു പ്രവർത്തന രീതി നിലനിൽക്കുന്നത് പുതിയ സാങ്കേതിക രീതികളെയോ API കണക്ഷനുകളെയോ ആശ്രയിച്ചയാണെങ്കിൽ, അവ തമ്മിൽ ബന്ധിപ്പിക്കാൻ Codex-ൻ്റെ സഹായം തേടാൻ അദ്ദേഹത്തിന് കഴിയും. ഇനി എവിടെയെങ്കിലും തടസ്സമുണ്ടായാൽ പോലും, സാധാരണ ഭാഷയിൽ തന്നെ ആ പ്രശ്നം വിവരിക്കാനും തൻ്റെ സർഗ്ഗാത്മക ചിന്തകളുടെ ഒഴുക്ക് നഷ്ടപ്പെടാതെ തന്നെ അത് പരിഹരിക്കാനും അദ്ദേഹത്തിന് സാധിക്കും.

സർഗ്ഗാത്മകമായി ചിന്തിക്കുന്നവരെ സംബന്ധിച്ചിടത്തോളം ഇത് ആശയവും അതിൻ്റെ നിർവ്വഹണവും തമ്മിലുള്ള ദൂരം ഗണ്യമായി കുറയ്ക്കുന്നു:

• മുമ്പൊക്കെ മറ്റൊരു ടീമിന് കൈമാറേണ്ടി വന്നിരുന്ന സങ്കീർണ്ണമായ സാങ്കേതിക തടസ്സങ്ങളെ ഇനി മുതൽ ഒരേ സർഗ്ഗാത്മക പ്രക്രിയയുടെ തന്നെ ഭാഗമാക്കി മാറ്റാൻ സാധിക്കും.
• ദൈർഘ്യമേറിയ പ്രോംപ്റ്റുകൾക്ക് പകരം കോംപോസിഷനിലും ലൈറ്റിംഗിലുമുള്ള നിയന്ത്രണങ്ങൾ ഉപയോഗിച്ച് തന്നെ ക്രിയേറ്റീവ് ഡയറക്ടർമാർക്ക് ജോലി ചെയ്യാൻ സാധിക്കും.
• പ്രത്യേക ടൂളുകളുടെ ആവശ്യകത വിലയിരുത്തി അവ നിർമ്മിച്ച് കിട്ടുന്നതുവരെ കാത്തുനിൽക്കാതെ തന്നെ ഡിസൈനർമാർക്ക് ഒരു ഇൻ്റർഫെസിൻ്റെ പ്രോട്ടോടൈപ്പ് തയ്യാറാക്കാൻ സാധിക്കും.
• മനുഷ്യരുടെ വിവേചനശേഷിക്ക് പ്രാധാന്യം കൊടുത്തുകൊണ്ട് തന്നെ ടീമുകൾക്ക് കൂടുതൽ ആശയങ്ങൾ പര്യവേക്ഷണം ചെയ്യാൻ കഴിയും.

കൂടുതൽ വ്യക്തമായി പറഞ്ഞാൽ, സർഗ്ഗാത്മക ടീമുകൾ AI ഉപയോഗിക്കുന്ന പുതിയ രീതികളെയാണ് Chad-ൻ്റെ അനുഭവം കാണിക്കുന്നത്: അതായത്, പ്രോജക്റ്റുകൾ രൂപപ്പെടുന്നതനുസരിച്ച് ആശയങ്ങൾ നിർമ്മിക്കാനും അവ വിലയിരുത്താനും കൂടുതൽ മെച്ചപ്പെടുത്താനും ആവശ്യമായ സംവിധാനങ്ങൾ അവർ സ്വയം നിർമ്മിച്ചെടുക്കുകയാണ്.

“Codex ഉപയോഗിച്ചതിലൂടെ ഞാൻ മനസ്സിലാക്കിയ ഒരു കാര്യം, ഒരു സർഗ്ഗാത്മക പ്രവർത്തന രീതിയെക്കുറിച്ചോ ഒരു പരിഹാരത്തെക്കുറിച്ചോ ഒരു ഇൻ്റർഫേസിനെക്കുറിച്ചോ നിങ്ങളുടെ മനസ്സിൽ എന്തെങ്കിലും ആശയമുണ്ടെങ്കിൽ, അത് Codex-നോട് നേരിട്ട് ചോദിക്കുക മാത്രമാണ് ചെയ്യേണ്ടത്," അദ്ദേഹം പറയുന്നു. “നിങ്ങളുടെ ചിന്തയിലുള്ളത് എന്താണെന്ന് അതിനോട് പറയുക, വെറും 10 മിനിറ്റുകൾക്കുള്ളിൽ തന്നെ അതിൻ്റെ ഒരു പ്രോട്ടോടൈപ്പ് നിങ്ങളുടെ മുന്നിൽ തെളിയുന്നതായിരിക്കും."