Услови на програмата за клиенти за Пазар на OpenAI
Програмата за Пазар на OpenAI („Програмата за пазарот“) им овозможува на клиентите на OpenAI (секој од нив, „клиент“) да купуваат одобрени производи или услуги од трети лица (секој од нив, „подобен производ на партнер“) на Пазар на OpenAI („пазарот“) од даватели-трети лица што учествуваат („партнери“). Набавките извршени преку Програмата за пазарот може да се вбројат во износот на обврската на илиентот наведен во применливиот образец за нарачка на OpenAI, согласно овие услови. Клиентот го купува секој подобен производ на партнер врз основа на посебен договор со соодветниот партнер. Овие услови го дополнуваат договорот што го уредува применливиот образец за нарачка на OpenAI на плиентот, заедно со тој образец за нарачка на OpenAI („Договорот со OpenAI“).
Подобност и минимални износи на обврската. За да учествува во програмата за пазарот, клиентот мора да има образец за нарачка директно со OpenAI („образец за нарачка на OpenAI“) во кој е наведен износ на обврската од најмалку 1.000.000 американски долари, освен ако OpenAI писмено не се согласи поинаку, вклучително и преку е-пошта. „Износ на обврската“ значи износот наведен под „Износ на обврската“ во применливиот образец за нарачка на OpenAI. Подобната потрошувачка кај партнерите може да се вброи само во обврските за услугите на апликацискиот програмски интерфејс (API) на OpenAI и на ChatGPT/Codex што се изречно наведени како подобни во применливиот образец за нарачка на OpenAI или во негова измена.
Подобни трошоци на партнер. „Подобни трошоци на партнер“ значи износи што клиентот навистина ги плаќа за подобен производ на партнер, намалени за попусти, рабати, кредити, поврати на средства и поништувања, и во согласност со правилата за временско утврдување подолу. Даноците, банкарските и финансиските трошоци, казните и трошоците за податоци, стручни услуги, поддршка или други неодобрени производи или услуги не се подобни. Набавките извршени пред датумот на учество на клиентот не се подобни, освен ако не ги одобри OpenAI, при што важат сите услови наведени во тоа одобрение. Набавките врз основа на постоен договор со партнер, направени пред клиентот да стекне право на учество во Marketplace, не се подобни, освен ако не ги одобри OpenAI, под условите наведени во тоа одобрение.
Купување производ на партнер. OpenAI ќе му достави на клиентот писмена потврда дека ги исполнува условите за учество во Програмата за пазарот, во која ќе бидат наведени датумот на учество на клиентот и сите применливи услови за купување. Клиентот ќе му ја достави таа потврда на соодветниот партнер при договарање на набавка во рамките на Програмата за пазарот. На секоја набавка и понатаму се применуваат овие услови и сите применливи услови наведени во потврдата. Партнерот и клиентот директно ќе склучат договор за подобниот производ на партнер, а партнерот ќе му издава фактури на клиентот и ќе ја наплатува сумата директно од него. Клиентот е одговорен за применливите даноци за подобните производи на партнер, кои партнерот или OpenAI, зависно од случајот, ќе ги наплати кога тоа е законски задолжително. Клиентот може да побара подобните трошоци кај партнер да се вбројат во неговиот износ на обврската преку постапката за потврдување утврдена од OpenAI. OpenAI нема да вброи износи за одредена трансакција, освен ако клиентот изречно не го одобрил тоа вбројување.
Период на обврската и повеќегодишни набавки. „Период на обврската“ означува секој годишен период наведен во соодветниот образец за нарачка на OpenAI во кој клиентот треба да го исполни износот на обврската. Повеќегодишниот образец за нарачка на OpenAI има посебен период на обврската за секоја годишна обврска. OpenAI ќе ги наплатува трошоците за најмногу дванаесет месеци од претплатата на партнерот одеднаш. За повеќегодишна претплата на партнер, секоја година од претплатата започнува на датумот на почеток на претплатата или на годишнината од тој датум. Трошоците за секоја наредна година од претплатата може да се достават најрано на почетокот на таа година, дури и ако клиентот ги платил однапред. Партнерот мора да ја поднесе или повторно да ја поднесе применливата фактура во која се наведени трошоците за таа година од претплатата. Секое поднесување и понатаму подлежи на соодветниот период на обврската, неискористениот дозволен износ за пазарот и преостанатиот износ на обврската. Истите трошоци не може да се вбројат повеќе од еднаш. Квалификуваните трошоци што покриваат до дванаесет месеци од претплата на партнер може да се применат дури и ако периодот на таа претплата се протега надвор од соодветниот период на обврската, под услов OpenAI да ја прими фактурата во текот на тој период на обврската.
Дозволен износ за пазарот. Освен ако OpenAI не се согласи поинаку, „дозволениот износ за пазарот“ на клиентот изнесува 25 % од неговиот износ на обврската за соодветниот период на обврската. Овој дозволен износ се применува збирно за сите партнери, а веќе применетите износи се вбројуваат во него. Последователните фактури не создаваат нов дозволен износ. За повеќегодишен образец за нарачка на OpenAI, за секој период на обврската важи посебен дозволен износ за пазарот. Секој неискористен дозволен износ престанува да важи на крајот на тој период на обврската и не може да се пренесе на друг износ на обврската или на друга сметка.
Како OpenAI ги применува трошоците. OpenAI ќе ги вброи подобните износи наведени во фактурите на партнерот во износот на обврската на клиентот, во сооднос долар за долар, по редоследот по кој OpenAI ги прима фактурите, што подлежи на проверка. Секое вбројување е ограничено на неискористениот дозволен износ за пазарот и преостанатиот износ на обврската, по пресметувањето на веќе направените трошоци за услугите на OpenAI и веќе вброените трошоци на партнерот. Вбројувањето пред клиентот да му плати на партнерот и понатаму подлежи на корекција согласно овие услови. Вброените износи го намалуваат делот од износот на обврската на клиентот што останува да се исполни. Тие не ги плаќаат фактурите на партнерот, не создаваат кредити за користење на OpenAI, не ги намалуваат надоместоците за услугите на OpenAI ниту му даваат право на клиентот на готовина или поврат на средства. Постојните припејд салда и кредити на OpenAI остануваат непроменети, освен ако во образецот за нарачка на OpenAI не е предвидено поинаку. Клиентот и понатаму е одговорен за надоместоците за услугите на OpenAI и за евентуалниот преостанат недостиг во износот на обврската. OpenAI мора да ја прими фактурата во текот на соодветниот период на обврската и на датумот на учество на клиентот или по него, освен ако OpenAI писмено не одобри поинаку.
Повеќекратни обврски за потрошувачка. Ако клиентот има подобни износи на обврската според повеќе од еден образец за нарачка на OpenAI, OpenAI ќе утврди на која обврска се однесува фактурираниот износ, согласно применливиот дозволен износ за пазарот и периодот на обврската. Клиентот може да побара поинаква распределба, под услов OpenAI да ја одобри. Истиот износ не може да се вброи повеќе од еднаш.
Известување и проверка. Партнерот ќе ги пријавува трансакциите и плаќањата што ги исполнуваат условите на OpenAI. Клиентот ги овластува OpenAI и партнерот да разменуваат информации што се разумно потребни за проверка и признавање на подобните трошоци кај партнер, вклучувајќи идентификатори на сметки, фактури, информации за плаќањата и датуми на услугите. Клиентот ќе достави разумни придружни информации на барање. Без оглед на одредбите за доверливост од Договорот на OpenAI, клиентот го овластува OpenAI да го открие постоењето на тој договор и подобноста на клиентот за Програмата за пазарот на партнерот од кој клиентот има намера да купи. Клиентот е одговорен да се координира со партнерот за да обезбеди навремено доставување на фактурите и придружните информации потребни за признавање на подобните трошоци кај партнер.
Спорови и корекции. Клиентот ќе ги решава споровите во врска со трошоците на партнерот директно со партнерот. OpenAI може да ја задржи или да ја приспособи примената на спорните износи; неспорните износи може одделно да ги исполнуваат условите. OpenAI може и да ги коригира износите применети поради неплаќање при доспевање, повратни средства, кредити, откажувања, двојно пријавување или други грешки и ќе го извести клиентот за корекцијата. Клиентот и понатаму е одговорен според Договорот на OpenAI за секој настанат недостиг во исполнувањето на обврската, вклучително и по завршувањето на периодот на обврската. Ако клиентот последователно плати износ што бил сторниран поради неплаќање, OpenAI може повторно да го примени подобниот износ на првичниот период на обврската, предмет на проверка и применливиот дозволен износ за пазарот.
Промени во подобноста. OpenAI ќе го извести клиентот ако некој подобен производ на партнер повеќе не ги исполнува условите за нови набавки или обновувања во рамките на Програмата за пазарот. Набавките одобрени пред тоа известување ќе продолжат да ги исполнуваат условите до крајот на постојниот период на претплата што не може да се откаже или до крајот на применливиот период на обврската, што и да настапи прво, согласно дозволениот износ за пазарот. OpenAI нема да ги поништи износите што биле валидно применети пред известувањето само затоа што партнерот или подобниот производ на партнер подоцна ќе престане да ги исполнува условите.
Промени во наплатата. Ако OpenAI започне да ги наплатува плаќањата за подобни производи на партнер преку пазарот, постојните набавки на клиентот и понатаму ќе му ги фактурира директно соодветниот партнер, освен ако клиентот, партнерот и OpenAI не се договорат поинаку. Секој премин ќе подлежи на прифаќање од страна на клиентот на применливите услови за наплата и на договорен датум на стапување во сила. Клиентот нема да биде фактуриран двапати за истата набавка, а истиот подобен трошок на партнер нема да се пресметува повеќе од еднаш кон износот на обврската. Плаќањата извршени на OpenAI како овластен агент за наплата на партнерот според применливите услови за наплата ќе се сметаат за плаќања на партнерот за целите на овие услови.
Производи на партнер. Вклучувањето на подобен производ на партнер на пазарот или одобрувањето на купување за учество во Програмата за пазарот не претставува одобрување, гаранција или препорака од OpenAI за партнерот или неговиот производ. Купувањето и користењето на подобен производ на партнер од страна на клиентот се уредуваат исклучиво со договорот на клиентот со соодветниот партнер. OpenAI не е страна на тој договор, а партнерот е исклучиво одговорен за обезбедувањето, поддршката и одржувањето на својот производ. Во најголемата можна мера дозволена со закон, OpenAI не дава никакви гаранции за подобните производи на партнери и ја исклучува својата одговорност што произлегува од купувањето или користењето на тие производи од страна на клиентот, или од дејствијата или пропустите на партнерот. Оваа одредба не ги ограничува изричните обврски на OpenAI според овие услови или Договорот со OpenAI.
Однос со договорот со OpenAI. Овие услови го уредуваат само учеството на клиентот во програмата за пазарот. Договорот со OpenAI продолжува да го регулира користењето на услугите на OpenAI и пристапот до нив од страна на клиентот. Ако овие услови се во спротивност со одредена одредба од образецот за нарачка на OpenAI, предност има таа одредба од образецот за нарачка на OpenAI. Промените на дозволениот износ или на пресметката на трошењето за одобрена набавка бараат согласност од клиентот.