Како вработените откриваат нови начини на работа

Нашето најново истражување укажува дека, покрај пристапот до алатки за ВИ, важно е и како се распределуваат и извршуваат задачите. Овие нови задачи надвор од вообичаениот опис на нивното работно место стануваат редовен дел од начинот на кој вработените користат ВИ. Ако тие активности станат редовни одговорности, опсегот на работните места би можел да се прошири дури и ако нивните називи останат исти.

Нашиот прв извештај „Работа на границата“ ⁠го документираше „преминувањето меѓу задачи“: вработените користат ВИ за активности што историски се поврзуваат со друга професија. Нашето најново истражување го разгледува она што се случува потоа.

Анализирајќи повеќе од 1,5 милиони пораки поврзани со работата во ChatGPT од април до јули 2026 година, најдовме докази дека дел од користењето ВИ за други професии се повторува. Вработените повторно се навраќаат на задачи надвор од границите на својата професија, а овие активности со текот на времето заземаат сѐ поголем дел од нивното забележано користење на ВИ.

Наодите даваат првичен увид во тоа како пристапот до ВИ може да доведе од испробување нови задачи до нивно вклучување во редовните работни рутини. За компаниите што се обидуваат да утврдат како најдобро да ја усвојат и користат ВИ во своите организации, трендовите утврдени во нашето четиримесечно истражување на користењето ВИ и промптови од страна на професионалците нудат важен увид во тоа како може да се намалат пречките меѓу утврдувањето проблем и унапредувањето на севкупната работа со помош на ВИ. Нашите наоди укажуваат дека при спроведувањето на стратегиите за ВИ, организациите треба да обрнат внимание и на осмислувањето на работата, а не само на пристапот до алатки за ВИ.

Вработените ја користат ВИ на различен начин во зависност од тоа дали задачата се вклопува во нивната улога во одредена област. Вработените ѝ задаваат различни промптови на ВИ за задачи во и надвор од своите вообичаени улоги. Кога прашуваат за задачи надвор од својата професија, нивните промптови во просек се пократки отколку за задачи во нејзините рамки. Исто така, поретко бараат објаснувања, упатства за постапката, конкретен формат на одговорот или совети.

Истовремено, кога бараат помош од ВИ надвор од својата професија, вработените почесто даваат примери или дополнителен контекст. Исто така, почесто бараат од ВИ да провери или потврди нешто.

Едно можно толкување е дека вработените ја користат ВИ за да позајмат стручност. Наместо да бараат од ВИ да ги научи на сосема нова област, вработените можеби приложуваат проблем и релевантен контекст — како документ, пример или информација од колега — и бараат ВИ да им помогне да применат знаење поврзано со друга област. 

Следното прашање е дали вработените повторно се навраќаат на овие активности. Кај околу 6.200 вработени што редовно ги следевме од април до јули, претходно користените задачи од други професии се зголемија од 13,1 % од користењето ВИ за конкретната професија во април на 25,9 % во јули¹. Овој образец укажува дека вработените вклучуваат дел од помошта за задачи од други професии во тековните работни процеси, наместо само еднаш да експериментираат со неа. 

Посебна анализа го става повторувањето во поширок контекст. Во примерокот од усогласени набљудувања со едномесечно следење, вработените повторно се навратиле на задача од друга професија користена претходниот месец во 23,6 % од случаите. Кај споредливите вработени кај кои не била забележана употреба на истата задача претходниот месец, таа била користена во 8,4 % од случаите. Слични разлики се забележуваат кај задачите во рамките на професијата и кај општите задачи.

Степенот на повторување значително се разликува во зависност од видот на работата. Вработените релативно често повторно се навраќале на следниве задачи од други професии во наредниот месец:

• Разговарање со клиенти за стоки или услуги: 54 %

• Пишување рекламни или промотивни текстови: 44 %

• Создавање маркетиншки материјали: 37 %

За споредба, вработените повторно се навраќале на задачата да објаснуваат финансиски информации во околу 15 % од случаите. Просечната стапка на повторно навраќање следниот месец за задачите од други професии изнесуваше 18,5 %. Овие разлики може да покажуваат каде ВИ природно се вклопува во повторливите работни текови. Тие може да ги одразуваат и разликите во нормите на работното место, претпазливоста или согледаните последици од евентуална грешка. 

Првите два извештаи „Работа на границата“ прикажуваат како работата може да се промени пред да се сменат називите на работните места. Првиот извештај покажа дека вработените користат ВИ за да ги преминат традиционалните професионални граници. Овој извештај покажува дека дел од тие активности стануваат дел од редовните работни текови. Овие обрасци укажуваат на можен пат за преобразба на работните места поттикната од ВИ: вработениот експериментира со активност надвор од својата традиционална улога, утврдува дека ВИ е корисна за неа и почнува повторно да ѝ се навраќа како дел од работата.

ВИ може да ги преобликува работните места многу пред да се сменат нивните називи: вработените ја користат за активности поврзани со друга професија и со текот на времето повторно се навраќаат на дел од нив. Ако тие активности станат редовни одговорности, опсегот на активности во рамките на работното место би можел да се прошири дури и ако неговиот назив остане ист. Ќе продолжиме да ги проучуваме овие промени за да изградиме појасна слика за тоа како ВИ ја менува поделбата на трудот и што значи тоа за вработените, компаниите и пошироката економија.

• Прочитајте го нашето истражување за преминувањето меѓу задачи⁠ за да дознаете како вработените го користат ChatGPT за да преземаат задачи надвор од своите традиционални улоги.

• Прочитајте ја нашата Рамка за транзицијата на работните места со ВИ⁠ за да дознаете како способностите на ВИ, човечките улоги и побарувачката би можеле да го обликуваат вработувањето.