LifeVal
ನಿತ್ಯಜೀವನದಲ್ಲಿ ಮುಖ್ಯವಾದ ಕಾರ್ಯಗಳಲ್ಲಿ AI ಪ್ರಗತಿಯನ್ನು ಅಳೆಯುವುದು.
ಆರ್ಟಿಫಿಷಿಯಲ್ ಜನರಲ್ ಇಂಟೆಲಿಜೆನ್ಸ್ ಇಡೀ ಮಾನವಕುಲಕ್ಕೆ ಪ್ರಯೋಜನಕಾರಿಯಾಗುವುದನ್ನು ಖಚಿತಪಡಿಸಿಕೊಳ್ಳುವುದೇ OpenAI ಯ ಧ್ಯೇಯ. ಪ್ರಸ್ತುತ ಪ್ರತಿ ವಾರ ChatGPT ಬಳಸುವ ನೂರು ಕೋಟಿಗೂ ಹೆಚ್ಚು ಜನರಿಗಾಗಿ, ನಿತ್ಯಜೀವನದ ಪ್ರಾಯೋಗಿಕ ಸವಾಲುಗಳಲ್ಲಿ ನೆರವಾಗುವ AI ರೂಪಿಸಲು ನಾವು ಬಯಸುತ್ತೇವೆ. ಮಕ್ಕಳ ಆರೈಕೆ ಸೌಲಭ್ಯ ಹುಡುಕುವುದು, ಸರ್ಕಾರಿ ಸೇವೆಗಳನ್ನು ಪಡೆಯುವುದು, ಬಜೆಟ್ ರೂಪಿಸುವುದು, ಶಾಲೆಗೆ ಸಿದ್ಧತೆ ಮಾಡುವುದು, ಅಡುಗೆ ವಿಧಾನಗಳನ್ನು ಬದಲಿಸಿಕೊಳ್ಳುವುದು, ದಿನಸಿ ಆರ್ಡರ್ ಮಾಡುವುದು, ವ್ಯಾಯಾಮ ಯೋಜನೆಗಳನ್ನು ರೂಪಿಸುವುದು ಹೀಗೆ ಹಲವು ಕೆಲಸಗಳಲ್ಲಿ ಅದು ನೆರವಾಗಬೇಕು.
ಜೀವನವನ್ನು ಸುಲಭಗೊಳಿಸಲು ನೆರವು ಬಯಸುವವರಿಗೆ ಕೇವಲ ಸಲಹೆ ಅಥವಾ ಸಂಭಾಷಣೆಯ ಉತ್ತರ ಸಾಕಾಗುವುದಿಲ್ಲ. ನಿಜವಾಗಿಯೂ ಉಪಯುಕ್ತ ವೈಯಕ್ತಿಕ ಅಸಿಸ್ಟೆಂಟ್ ಆಗಲು, ಕೆಲಸಗಳನ್ನು ವಾಸ್ತವವಾಗಿ ಪೂರ್ಣಗೊಳಿಸುವ ಕ್ರಮಗಳನ್ನು ChatGPT ಕೈಗೊಳ್ಳಬಲ್ಲದಾಗಿರಬೇಕು.
ನಿತ್ಯದ ಕಾರ್ಯಗಳಲ್ಲಿ ಕಾಲಕ್ರಮೇಣ ಮಾಡೆಲ್ ಕಾರ್ಯಕ್ಷಮತೆಯನ್ನು ಅಳೆಯಲು ನಾವು ಒಂದು ಮೌಲ್ಯಮಾಪನವನ್ನು ರೂಪಿಸಿದೆವು. ಬಳಕೆದಾರರು AI ಮತ್ತು ವೈಯಕ್ತಿಕ ಏಜೆಂಟ್‌ಗಳಿಂದ ಹೆಚ್ಚು ನೆರವು ಬಯಸಿದ ಕ್ಷೇತ್ರಗಳ ಕಾರ್ಯಗಳನ್ನು ಇದರಲ್ಲಿ ಸೇರಿಸಿದೆವು. ಕಳೆದ ವರ್ಷದಲ್ಲಿ ನಿತ್ಯದ ಕಾರ್ಯಗಳಲ್ಲಿ ಮಾಡೆಲ್ ಕಾರ್ಯಕ್ಷಮತೆಯ ಸುಧಾರಣೆಯನ್ನು ಗಮನಿಸಲು ಮತ್ತು ಉತ್ತೇಜಿಸಲು ಈ ಮೌಲ್ಯಮಾಪನವನ್ನು ಬಳಸಿದೆವು.
ಹಿನ್ನೆಲೆ
ಜನರು ಹೆಚ್ಚು ಮಹತ್ವ ನೀಡುವ ಕಾರ್ಯಗಳನ್ನು ಗುರುತಿಸಲು, ಅಮೆರಿಕದಲ್ಲಿ ಮತ್ತು ಅಂತರರಾಷ್ಟ್ರೀಯ ಮಟ್ಟದಲ್ಲಿ ಜನರು ಸಮಯವನ್ನು ಹೇಗೆ ಕಳೆಯುತ್ತಾರೆ ಎಂಬುದನ್ನು ದಾಖಲಿಸುವ ಎರಡು ದೊಡ್ಡ ಅಧ್ಯಯನಗಳಿಂದ ಆರಂಭಿಸಿದೆವು: ಅಮೆರಿಕದ ಸಮಯ ಬಳಕೆ ಸಮೀಕ್ಷೆ(ಹೊಸ ಕಿಟಕಿಯಲ್ಲಿ ತೆರೆಯುತ್ತದೆ) ಮತ್ತು ಬಹುರಾಷ್ಟ್ರೀಯ ಸಮಯ ಬಳಕೆ ಅಧ್ಯಯನ(ಹೊಸ ಕಿಟಕಿಯಲ್ಲಿ ತೆರೆಯುತ್ತದೆ). ಈ ದತ್ತಾಂಶ ಸಂಗ್ರಹಗಳು ಒಟ್ಟಾಗಿ, ವಿವಿಧ ಜನಸಮೂಹಗಳು ದಿನದ ಬೇರೆ ಬೇರೆ ಸಮಯಗಳಲ್ಲಿ ಮತ್ತು ಋತುಗಳಲ್ಲಿ ಮಾಡುವ ನಿತ್ಯಜೀವನದ ಕಾರ್ಯಗಳ ವಿವರವಾದ ಪಟ್ಟಿಯನ್ನು ಒದಗಿಸುತ್ತವೆ. ಯಾವ ಕೆಲಸಗಳಲ್ಲಿ AI ನೆರವನ್ನು ಜನರು ಹೆಚ್ಚು ಮೌಲ್ಯಯುತವೆಂದು ಪರಿಗಣಿಸುತ್ತಾರೆ ಎಂಬುದನ್ನು ಅರಿಯಲು, ಜನಸಂಖ್ಯೆಯ ವೈವಿಧ್ಯವನ್ನು ಪ್ರತಿನಿಧಿಸುವ 3,995 ಮಂದಿಯ ಹೊಸ ಸಮೀಕ್ಷೆ ನಡೆಸಿ, ಈ ಹಿಂದಿನ ಸಮೀಕ್ಷೆಗಳನ್ನು ವಿಸ್ತರಿಸಿದೆವು. ಸಾಮಾನ್ಯ ಜನರು ವೈಯಕ್ತಿಕ ಅಸಿಸ್ಟೆಂಟ್‌ನಿಂದ ಯಾವ ಕ್ಷೇತ್ರಗಳಲ್ಲಿ ಹೆಚ್ಚು ನೆರವು ಬಯಸುತ್ತಾರೆ ಎಂಬುದನ್ನು ಗುರುತಿಸಲು, ಪ್ರತಿ ಕಾರ್ಯಕ್ಕೂ ಸಂಬಂಧಿಸಿದಂತೆ ಹಲವು ಪ್ರಶ್ನೆಗಳನ್ನು ಕೇಳಿದೆವು. ಹೀಗೆ ಗುರುತಿಸಿದ ಕಾರ್ಯಗಳು ಜನರು ನೆರವು ಬಯಸುವ ಪ್ರಮುಖ ಕ್ಷೇತ್ರಗಳನ್ನು ಒಳಗೊಂಡಿವೆ: ಆರೈಕೆ, ಆರೋಗ್ಯ, ಶಿಕ್ಷಣ, ಮನೆ ನಿರ್ವಹಣೆ, ವೈಯಕ್ತಿಕ ಹಣಕಾಸು, ಶಾಪಿಂಗ್ ಮತ್ತು ಸರ್ಕಾರಿ ಸೇವೆಗಳನ್ನು ಪಡೆಯುವುದು.
ಪ್ರತ್ಯೇಕ ಕಾರ್ಯಗಳ ಉದಾಹರಣೆಗಳು
ದೈನಂದಿನ ಜೀವನದ ಪ್ರಾಯೋಗಿಕ ಕೆಲಸಗಳಲ್ಲಿ ನಮ್ಮ ಪ್ರಸ್ತುತ ಮಾಡೆಲ್‌ಗಳು ಹೇಗೆ ಕಾರ್ಯನಿರ್ವಹಿಸುತ್ತವೆ ಎಂಬುದಕ್ಕೆ ಕೆಲವು ಉದಾಹರಣೆಗಳು ಇಲ್ಲಿವೆ.
ಮನೆ ಬದಲಿಸಿದ ನಂತರ ಸೂಕ್ತ ಶಿಶುವಿಹಾರಕ್ಕೆ ದಾಖಲಿಸಿ
ನಮ್ಮ ಹೊಸ ಮನೆಯ ಸಮೀಪದ ಶಿಶುವಿಹಾರಗಳನ್ನು ಹೋಲಿಸಿ, ಹೆಚ್ಚು ಸೂಕ್ತವಾದವುಗಳ ಕಿರುಪಟ್ಟಿ ತಯಾರಿಸಿ.
ನಾನು ಮೂರು ಶಿಶುವಿಹಾರಗಳನ್ನು ಆಯ್ಕೆ ಮಾಡಿ, ದಾಖಲಾತಿ ವಿವರಗಳನ್ನು ವ್ಯವಸ್ಥಿತಗೊಳಿಸಿದ್ದೇನೆ. ಇನ್ನೂ ಎರಡು ಆದ್ಯತೆಗಳ ಬಗ್ಗೆ ನಿಮ್ಮ ನಿರ್ಧಾರ ಬೇಕಿದೆ. ಆಯ್ಕೆ ಮಾಡಿದ ಶಿಶುವಿಹಾರಗಳ ಕಿರುಪಟ್ಟಿಯನ್ನು ಪರಿಶೀಲಿಸಲು ಬಯಸುವಿರಾ?
ಪ್ರವಾಹದ ಮುನ್ನ ಸ್ವಯಂಸೇವಕರ ಕೆಲಸಗಳನ್ನು ಸಂಘಟಿಸಿ
ಪ್ರವಾಹದಿಂದ ರಕ್ಷಿಸಿಕೊಳ್ಳಲು ನೆರವು ಬೇಕಿರುವ ನಾಲ್ವರು ನೆರೆಹೊರೆಯವರಿಗಾಗಿ ನಮ್ಮ ಸಮುದಾಯದ ಪ್ರವಾಹ ಸಿದ್ಧತಾ ಸ್ವಯಂಸೇವಕ ತಂಡವನ್ನು ಸಂಘಟಿಸಲು ನನಗೆ ಸಹಾಯ ಮಾಡಿ.
ಉಲ್ಲೇಖಿಸಿದ ಸ್ಥಳಗಳನ್ನು ಪರಿಶೀಲಿಸಲು ಮತ್ತು ಮುಂಬರುವ ತೀವ್ರ ಹವಾಮಾನಕ್ಕೆ ಸಿದ್ಧರಾಗಲು ಸ್ವಯಂಸೇವಕರಿಗೆ ನೆರವಾಗುವ ಸರಳ ಕ್ರಿಯಾಯೋಜನೆಯನ್ನು ಸಿದ್ಧಪಡಿಸಿದ್ದೇನೆ.
ನನ್ನ ಕುಟುಂಬಕ್ಕೆ ಹೊಸ ಮನೆ ಹುಡುಕಿ
ಲುಝರ್ನ್ ಕೌಂಟಿಯಲ್ಲಿ ನನ್ನ ಬಜೆಟ್‌ಗೆ ಹೊಂದುವ, ಪ್ರತ್ಯೇಕ ವಾಸದ ಘಟಕವಿರುವ ಮತ್ತು ಮಕ್ಕಳನ್ನು ಶಾಲೆಗೆ ಬಿಟ್ಟ ನಂತರ ಕೆಲಸಕ್ಕೆ ಹೋಗಲು ಹೆಚ್ಚು ಸಮಯ ಹಿಡಿಯದಂತಹ ಮನೆ ಹುಡುಕಿ. ನಾನು ಪರಿಶೀಲಿಸಲು ಅದರ ಹಕ್ಕುಪತ್ರವನ್ನು ನನ್ನ ಕಾರ್ಟ್‌ಗೆ ಸೇರಿಸಿ.
ನಿಮ್ಮ ಅವಶ್ಯಕತೆಗಳಿಗೆ ಹೊಂದುವ ಒಂದು ಮನೆಯನ್ನು ಕಂಡುಕೊಂಡಿದ್ದೇನೆ. ವರ್ಗಾವಣೆ ತೆರಿಗೆಯನ್ನು ಲೆಕ್ಕಹಾಕಿ, ನೀವು ಪರಿಶೀಲಿಸಲು ಅದರ ಹಕ್ಕುಪತ್ರದ ಪ್ರತಿಯನ್ನು ಕೌಂಟಿ ದಾಖಲೆಗಳ ಕಾರ್ಟ್‌ಗೆ ಸೇರಿಸಿದ್ದೇನೆ.
ದೂರದಲ್ಲಿರುವ ಅಜ್ಜಿಯೊಂದಿಗೆ ಪಂದ್ಯ ವೀಕ್ಷಿಸಿ
ಅಜ್ಜಿ ಮತ್ತು ನಾನು ದೂರದಲ್ಲಿದ್ದರೂ ಒಟ್ಟಿಗೆ ಪಂದ್ಯ ವೀಕ್ಷಿಸಲು ಸುಲಭವಾದ ಸೆಟಪ್ ಸಿದ್ಧಪಡಿಸಿ.
ಪಂದ್ಯ ವೀಕ್ಷಣೆಗೆ ಅತ್ಯಂತ ಸರಳವಾದ ಸೆಟಪ್ ಸಿದ್ಧವಾಗಿದೆ. ಪ್ರಸಾರ ಸ್ಥಗಿತಗೊಂಡರೆ ಬಳಸಲು ಪರ್ಯಾಯ ವ್ಯವಸ್ಥೆಯೂ ಇದೆ. ನಿಮಗೂ ಅಜ್ಜಿಗೂ ಇದನ್ನು ಹಂತ ಹಂತವಾಗಿ ವಿವರಿಸಲೇ?
ಹೊಸದಾಗಿ ಮಧುಮೇಹ ಇರುವುದು ಪತ್ತೆಯಾಗಿ ಅದಕ್ಕೆ ಹೊಂದಿಕೊಳ್ಳುತ್ತಿರುವ ತಾಯಿ ಅಥವಾ ತಂದೆಗಾಗಿ ಊಟದ ಸಿದ್ಧತೆ
ಹೊಸದಾಗಿ ಮಧುಮೇಹ ಇರುವುದು ಪತ್ತೆಯಾದ ನನ್ನ ತಾಯಿ ಅಥವಾ ತಂದೆಗೆ ಪ್ರಾಯೋಗಿಕ ಆರೈಕೆ ಮತ್ತು ಊಟದ ಯೋಜನೆಯೊಂದಿಗೆ ಹೊಂದಿಕೊಳ್ಳಲು ನೆರವಾಗಿ.
ಊಟ, ರಿಮೈಂಡರ್‌ಗಳು ಮತ್ತು ಆರೈಕೆ ತಂಡಕ್ಕೆ ಕೇಳಬೇಕಾದ ಪ್ರಶ್ನೆಗಳನ್ನು ಒಳಗೊಂಡ ಮೊದಲ ವಾರದ ಯೋಜನೆ ಸಿದ್ಧವಾಗಿದೆ. ನಿಮ್ಮ ತಾಯಿ ಅಥವಾ ತಂದೆಯೊಂದಿಗೆ ಹಂಚಿಕೊಳ್ಳುವ ಮುನ್ನ ಇದನ್ನು ಒಟ್ಟಿಗೆ ಪರಿಶೀಲಿಸೋಣವೇ?
ನಮ್ಮ ಇತ್ತೀಚಿನ ಮಾಡೆಲ್‌ಗಳು ಹಲವು LifeVal ಕಾರ್ಯಗಳಲ್ಲಿ ಅತ್ಯುತ್ತಮ ಅಂಕಗಳನ್ನು ಗಳಿಸುತ್ತವೆ.
ಕಳೆದ ವರ್ಷದಲ್ಲಿ ಬ್ರೌಸರ್ ಬಳಕೆ, ಕಂಪ್ಯೂಟರ್ ಬಳಕೆ ಮತ್ತು ಕನೆಕ್ಟರ್‌ಗಳಿಗೆ ಸಂಬಂಧಿಸಿದ ಕಾರ್ಯಗಳಲ್ಲಿ ಇನ್ನಷ್ಟು ವೇಗವಾಗಿ, ಸಮರ್ಥವಾಗಿ ಮತ್ತು ಬಳಕೆದಾರರ ಉದ್ದೇಶಗಳಿಗೆ ಅನುಗುಣವಾಗಿ ಕಾರ್ಯನಿರ್ವಹಿಸಲು ನಮ್ಮ ಮಾಡೆಲ್‌ಗಳಿಗೆ ತರಬೇತಿ ನೀಡಿದ್ದೇವೆ. ChatGPT ಯಲ್ಲಿ ಈ ಸಾಮರ್ಥ್ಯಗಳನ್ನು ಸಕ್ರಿಯಗೊಳಿಸುವುದರಿಂದ ಮಾಡೆಲ್ ನೆರವಾಗಬಲ್ಲ ಕಾರ್ಯಗಳ ವ್ಯಾಪ್ತಿಯೂ ವಿಸ್ತರಿಸುತ್ತದೆ. ಇದರಿಂದ ChatGPT ಕೇವಲ ಸಂಭಾಷಣೆಯ ಸಾಧನವಾಗಿರದೆ, ನಿಜವಾಗಿಯೂ ಸ್ವತಂತ್ರವಾಗಿ ಕಾರ್ಯನಿರ್ವಹಿಸಬಲ್ಲ ವೈಯಕ್ತಿಕ ಅಸಿಸ್ಟೆಂಟ್ ಆಗುತ್ತದೆ.
ಇದು ಏಕೆ ಮುಖ್ಯ
AGI ಇಡೀ ಮಾನವಕುಲಕ್ಕೆ ಪ್ರಯೋಜನಕಾರಿಯಾಗುವುದನ್ನು ಖಚಿತಪಡಿಸಿಕೊಳ್ಳಲು, ಸಾಮಾನ್ಯ ಜನರ ಜೀವನದಲ್ಲಿ ಮುಖ್ಯವಾಗಿರುವ ವಿಷಯಗಳಲ್ಲಿ ಮಾಡೆಲ್‌ಗಳ ಪ್ರಗತಿಯನ್ನು ಅಳೆಯಬೇಕು ಮತ್ತು ಸುಧಾರಿಸಬೇಕು. ಅಂದರೆ ಮಾಡೆಲ್‌ನ ಜ್ಞಾನವನ್ನು ಶೈಕ್ಷಣಿಕವಾಗಿ ಮೌಲ್ಯಮಾಪನ ಮಾಡುವುದಕ್ಕಷ್ಟೇ ಸೀಮಿತವಾಗದೆ, ನಿರ್ಧಾರಗಳನ್ನು ತೆಗೆದುಕೊಳ್ಳಲು, ನಿತ್ಯದ ಜವಾಬ್ದಾರಿಗಳನ್ನು ನಿರ್ವಹಿಸಲು ಮತ್ತು ಅರ್ಥಪೂರ್ಣ ಕೆಲಸಗಳನ್ನು ಪೂರ್ಣಗೊಳಿಸಲು AI ಮಾಡೆಲ್‌ಗಳು ಜನರಿಗೆ ಎಷ್ಟು ಚೆನ್ನಾಗಿ ನೆರವಾಗಬಲ್ಲವು ಎಂಬುದನ್ನು ಅಳೆಯಬೇಕು. LifeVal ಆ ಗುರಿಯತ್ತ ಒಂದು ಹೆಜ್ಜೆಯಾಗಲಿದೆ ಎಂಬ ಆಶಯ ನಮ್ಮದು.
