OpenAI ಆರ್ಥಿಕ ಸಂಶೋಧನಾ ವಿನಿಮಯ ವೇದಿಕೆ

ಕಾರ್ಮಿಕರು, ಉದ್ಯಮಗಳು, ಸಂಸ್ಥೆಗಳು ಮತ್ತು ಒಟ್ಟಾರೆ ಆರ್ಥಿಕತೆಯ ಮೇಲೆ ಕೃತಕ ಬುದ್ಧಿಮತ್ತೆ (ಎಐ) ಹೇಗೆ ಪರಿಣಾಮ ಬೀರುತ್ತಿದೆ ಎಂಬುದನ್ನು OpenAI ಆರ್ಥಿಕ ಸಂಶೋಧನಾ ತಂಡ ಅಧ್ಯಯನ ಮಾಡುತ್ತದೆ. ಇದಕ್ಕಾಗಿ ನಾವು ಕಟ್ಟುನಿಟ್ಟಾದ ಆರ್ಥಿಕ ಸಂಶೋಧನೆಯ ಜೊತೆಗೆ ಗೌಪ್ಯತೆಯನ್ನು ಕಾಪಾಡುವ ಉತ್ಪನ್ನ ಮತ್ತು ಬಳಕೆಯ ದತ್ತಾಂಶ ವಿಶ್ಲೇಷಣೆ, ಗ್ರಾಹಕರು ಮತ್ತು ಸಂಸ್ಥೆಗಳೊಂದಿಗಿನ ಪಾಲುದಾರಿಕೆ ಹಾಗೂ ಬಾಹ್ಯ ಸಂಶೋಧಕರೊಂದಿಗಿನ ಸಹಯೋಗವನ್ನು ಬಳಸಿಕೊಳ್ಳುತ್ತೇವೆ.

ಬಾಹ್ಯ ಸಂಶೋಧಕರೊಂದಿಗಿನ ನಮ್ಮ ಸಹಯೋಗಗಳಿಗೆ ಔಪಚಾರಿಕ ರೂಪ ನೀಡಿ, ಅವುಗಳನ್ನು ವಿಸ್ತರಿಸಲು ನಾವು OpenAI ಆರ್ಥಿಕ ಸಂಶೋಧನಾ ವಿನಿಮಯ ವೇದಿಕೆಯನ್ನು ಪ್ರಾರಂಭಿಸುತ್ತಿದ್ದೇವೆ. ಎಐನ ಆರ್ಥಿಕ ಪರಿಣಾಮಗಳ ಕುರಿತು ಉನ್ನತ ಗುಣಮಟ್ಟದ ಅನುಭವಾಧಾರಿತ ಸಂಶೋಧನೆ ನಡೆಸಲು, ಎಚ್ಚರಿಕೆಯಿಂದ ವ್ಯಾಪ್ತಿ ನಿಗದಿಪಡಿಸಲಾದ ಸಂಶೋಧನಾ ಸಹಯೋಗಗಳಿಗೆ ಈ ವೇದಿಕೆ ಬೆಂಬಲ ನೀಡುತ್ತದೆ.

ಎಐ ಕುರಿತ ಮಹತ್ವದ ಆರ್ಥಿಕ ಪ್ರಶ್ನೆಯಿಂದ ಆರಂಭವಾಗುವ ಯೋಜನೆಗಳನ್ನು ನಾವು ಎದುರುನೋಡುತ್ತಿದ್ದೇವೆ. ಬಳಕೆದಾರರ ಗೌಪ್ಯತೆಯನ್ನು ಕಾಪಾಡಿಕೊಂಡೇ, OpenAI ಪರಿಕರಗಳ ಬಳಕೆಯ ದತ್ತಾಂಶವು ಆ ಪ್ರಶ್ನೆಯನ್ನು ವಿಶಿಷ್ಟವಾದ, ಅನುಭವಾಧಾರಿತ ದೃಷ್ಟಿಕೋನದಿಂದ ಪರಿಶೀಲಿಸಲು ಹೇಗೆ ನೆರವಾಗುತ್ತದೆ ಎಂಬುದನ್ನು ಯೋಜನೆಗಳು ಸ್ಪಷ್ಟವಾಗಿ ಸಮರ್ಥಿಸಬೇಕು.

ಕೆಳಗಿನ ಮೂಲಭೂತ ಪ್ರಶ್ನೆಗಳಲ್ಲಿ ಒಂದು ಅಥವಾ ಹೆಚ್ಚಿನವುಗಳನ್ನು ಪರಿಶೀಲಿಸುವ ಪ್ರಸ್ತಾವನೆಗಳನ್ನು ನಾವು ಆಹ್ವಾನಿಸುತ್ತೇವೆ. ಈ ಪಟ್ಟಿಯೇ ಅಂತಿಮವಲ್ಲ. ವೇದಿಕೆಯ ವಿಶಾಲ ಉದ್ದೇಶಗಳಿಗೆ ಹೊಂದಿಕೆಯಾಗುವ ಸದೃಢ ಪ್ರಸ್ತಾವನೆಗಳನ್ನೂ ನಾವು ಸ್ವಾಗತಿಸುತ್ತೇವೆ:

• ಕಾರ್ಮಿಕ ಮಾರುಕಟ್ಟೆಯ ಮೇಲಿನ ಪರಿಣಾಮಗಳು: ಎಐಗೆ ಒಡ್ಡಿಕೊಳ್ಳುವ ಪ್ರಮಾಣವನ್ನು ಅಳೆಯುವುದಕ್ಕೆ ಸೀಮಿತವಾಗದೆ, ಮಾಡೆಲ್ ಸಾಮರ್ಥ್ಯಗಳು ಸುಧಾರಿಸಿದಂತೆ ಯಾವ ವೃತ್ತಿಗಳಲ್ಲಿ ಕಾರ್ಯಸಾಮರ್ಥ್ಯ ವೃದ್ಧಿ, ಉದ್ಯೋಗಿಗಳ ಸ್ಥಾನಪಲ್ಲಟ, ಹೊಸ ಕಾರ್ಯಗಳ ಸೃಷ್ಟಿ ಅಥವಾ ಉದ್ಯೋಗ ಬೆಳವಣಿಗೆ ವಾಸ್ತವವಾಗಿ ಸಂಭವಿಸುತ್ತಿದೆ ಅಥವಾ ಸಂಭವಿಸುವ ಸಾಧ್ಯತೆಯಿದೆ ಎಂಬುದನ್ನು ಹೇಗೆ ಅಳೆಯಬಹುದು?

• ಉದ್ಯೋಗದಾತರ ನಡವಳಿಕೆ ಮತ್ತು ಉದ್ಯೋಗ ವಿನ್ಯಾಸ: ನೇಮಕಾತಿ ಬೇಡಿಕೆ, ಖಾಲಿ ಹುದ್ದೆಗಳ ರೂಪುರೇಷೆ, ಅಭ್ಯರ್ಥಿಗಳ ಪರಿಶೀಲನೆ, ವೇತನ, ತಂಡದ ರಚನೆ ಸೇರಿದಂತೆ ಉದ್ಯೋಗದಾತರ ನಡವಳಿಕೆಯನ್ನು ಎಐ ಹೇಗೆ ಬದಲಿಸುತ್ತದೆ? ಉದ್ಯಮಗಳು ಎಐಗೆ ಅನುಗುಣವಾಗಿ ಉದ್ಯೋಗಗಳನ್ನು ಮರುವಿನ್ಯಾಸಗೊಳಿಸುತ್ತಿವೆಯೇ?

• ಕುಟುಂಬಗಳ ಕಲ್ಯಾಣ: ಔಪಚಾರಿಕ ಉದ್ಯೋಗದ ಹೊರತಾಗಿ, ನಿರ್ಧಾರ ತೆಗೆದುಕೊಳ್ಳುವಿಕೆ, ಸಮಯದ ಬಳಕೆ, ಆರೈಕೆ, ಹಣಕಾಸು ಯೋಜನೆ, ಆರೋಗ್ಯ ಸೇವೆಗಳನ್ನು ಪಡೆಯುವಿಕೆ ಮತ್ತು ದೈನಂದಿನ ಆರ್ಥಿಕ ಯೋಗಕ್ಷೇಮ ಸೇರಿದಂತೆ ಕುಟುಂಬಗಳ ಕಲ್ಯಾಣದ ಮೇಲೆ ಎಐ ಯಾವ ಪರಿಣಾಮ ಬೀರುತ್ತದೆ?

• ಎಐ ಮತ್ತು ಶಿಕ್ಷಣ: ಶಿಕ್ಷಕರು ಎಐ ಪರಿಕರಗಳನ್ನು ಹೇಗೆ ಬಳಸುತ್ತಿದ್ದಾರೆ? ಎಐನಿಂದಾಗಿ ಅವರ ಪಾತ್ರಗಳು ಬದಲಾಗುತ್ತಿವೆಯೇ ಅಥವಾ ವಿಸ್ತರಿಸುತ್ತಿವೆಯೇ, ಅಥವಾ ಎರಡೂ ಆಗುತ್ತಿವೆಯೇ? ಎಐನ ಪರಿಚಯವು ಕಲಿಕೆ ಮತ್ತು ವೃತ್ತಿಜೀವನದ ಸಿದ್ಧತೆಯ ಕುರಿತು ವಿದ್ಯಾರ್ಥಿಗಳು ಮಾಡುವ ಆಯ್ಕೆಗಳನ್ನು ಹೇಗೆ ಬದಲಿಸುತ್ತದೆ? 

• ಲಭ್ಯತೆ ಮತ್ತು ಪ್ರಯೋಜನದಲ್ಲಿನ ಅಸಮಾನತೆ: ಎಐನಿಂದ ಯಾರಿಗೆ ಪ್ರಯೋಜನವಾಗುತ್ತಿಲ್ಲ ಮತ್ತು ಏಕೆ? ಯಾವ ಅಡೆತಡೆಗಳು ಹೆಚ್ಚು ಮಹತ್ವದ್ದಾಗಿವೆ ಮತ್ತು ಅವುಗಳನ್ನು ನಿವಾರಿಸಲು ಏನು ಮಾಡಬಹುದು?

• ಸಣ್ಣ ಉದ್ಯಮಗಳು ಮತ್ತು ಸ್ವತಂತ್ರ ಕೆಲಸ: ಸಣ್ಣ ಉದ್ಯಮಗಳು, ಸ್ವತಂತ್ರ ವೃತ್ತಿಪರರು, ಏಕಮಾಲೀಕ ಉದ್ಯಮಿಗಳು, ಸೃಜನಶೀಲರು ಮತ್ತು ಇತರ ಸ್ವತಂತ್ರ ಅಥವಾ ಅನೌಪಚಾರಿಕ ಆರ್ಥಿಕ ಚಟುವಟಿಕೆಗಳ ಮೇಲೆ ಎಐ ಹೇಗೆ ಪರಿಣಾಮ ಬೀರುತ್ತದೆ?

• ಸಾರ್ವಜನಿಕ ವಲಯ ಮತ್ತು ನಾಗರಿಕ ಕ್ಷೇತ್ರಗಳು: ಸಾರ್ವಜನಿಕ ವಲಯದ ಉತ್ಪಾದಕತೆ, ಸೌಲಭ್ಯಗಳನ್ನು ಪಡೆಯುವಿಕೆ, ಶಿಕ್ಷಣ ಆಡಳಿತ, ಉದ್ಯೋಗ ಸೇವಾ ಸಂಸ್ಥೆಗಳು, ಅನುಮತಿ ನೀಡುವಿಕೆ, ತೆರಿಗೆ ಆಡಳಿತ ಮತ್ತು ಸಾರ್ವಜನಿಕ ಸೇವೆಗಳ ಪೂರೈಕೆ ಸೇರಿದಂತೆ ಸಾರ್ವಜನಿಕ ವಲಯ ಹಾಗೂ ನಾಗರಿಕ ಕ್ಷೇತ್ರಗಳಲ್ಲಿ ಎಐನ ಆರ್ಥಿಕ ಪರಿಣಾಮಗಳೇನು?

• ಜ್ಞಾನ ಸೃಷ್ಟಿ ಮತ್ತು ನಾವೀನ್ಯತೆ: ವಿಜ್ಞಾನ, ಸಂಶೋಧನೆ ಮತ್ತು ಅಭಿವೃದ್ಧಿ, ಸಂಶೋಧನಾ ಕಾರ್ಯಪ್ರವಾಹಗಳು, ತಜ್ಞರ ಉತ್ಪಾದಕತೆ, ಪೇಟೆಂಟ್‌ಗಳು ಮತ್ತು ಅತ್ಯಾಧುನಿಕ ಜ್ಞಾನದ ಪ್ರಸರಣ ಸೇರಿದಂತೆ ಜ್ಞಾನ ಸೃಷ್ಟಿ ಹಾಗೂ ನಾವೀನ್ಯತೆಯನ್ನು ಎಐ ಹೇಗೆ ಬದಲಿಸುತ್ತದೆ?

• ಮಾರುಕಟ್ಟೆಯ ರಚನೆ: ಮಾರುಕಟ್ಟೆಯ ಕೇಂದ್ರೀಕರಣ, ಉದ್ಯಮಗಳ ಮೇಲುಗೈ, ವೇದಿಕೆಗಳ ಮೇಲಿನ ಅವಲಂಬನೆ, ಚೌಕಾಶಿ ಸಾಮರ್ಥ್ಯ, ಪೂರೈಕೆದಾರರೊಂದಿಗಿನ ಸಂಬಂಧಗಳು ಮತ್ತು ಮಾರುಕಟ್ಟೆ ಪ್ರವೇಶಕ್ಕಿರುವ ಅಡೆತಡೆಗಳು ಸೇರಿದಂತೆ ಮಾರುಕಟ್ಟೆಯ ರಚನೆಯ ಮೇಲೆ ಎಐ ಅಳವಡಿಕೆ ಯಾವ ಪರಿಣಾಮ ಬೀರುತ್ತದೆ?

• ಮೌಲ್ಯವನ್ನು ಅಳೆಯುವುದು: ಹಣ ಪಾವತಿಸುವ ಇಚ್ಛೆ, ನೈಜ ಆಯ್ಕೆಗಳಿಂದ ವ್ಯಕ್ತವಾಗುವ ಮೌಲ್ಯ, ಕಾರ್ಯಮಟ್ಟದಲ್ಲಿ ಉಳಿಯುವ ಸಮಯ, ತಪ್ಪಿಸಬಹುದಾದ ವೆಚ್ಚಗಳು, ಗುಣಮಟ್ಟಕ್ಕೆ ಹೊಂದಿಸಿ ಅಳೆಯಲಾದ ಉತ್ಪಾದನೆ ಮತ್ತು ದೀರ್ಘಕಾಲ ಉಳಿಯುವ ಉತ್ಪಾದಕತೆಯ ಹೆಚ್ಚಳ ಸೇರಿದಂತೆ ಎಐನ ಆರ್ಥಿಕ ಮೌಲ್ಯವನ್ನು ನಾವು ಹೇಗೆ ಅಳೆಯಬೇಕು?

ಪ್ರಸ್ತಾವನೆಗಳು ಒಂದು ಪ್ರಶ್ನೆಯ ಮೇಲೆ ಕೇಂದ್ರೀಕರಿಸಬಹುದು ಅಥವಾ ಸಂಬಂಧಿತ ಪ್ರಶ್ನೆಗಳನ್ನು ಒಟ್ಟಿಗೆ ಪರಿಶೀಲಿಸಬಹುದು. ಸಂಶೋಧನಾ ಪ್ರಶ್ನೆಗೆ ಕಾರಣ-ಪರಿಣಾಮದ ಕುರಿತು ನಿರ್ಣಯಗಳು ಅಗತ್ಯವಿದ್ದಾಗ, ಕೇವಲ ಸಹಸಂಬಂಧಗಳನ್ನು ವಿವರಿಸುವುದನ್ನು ಮೀರಿ ಕಾರಣ-ಪರಿಣಾಮವನ್ನು ವಿಶ್ವಾಸಾರ್ಹವಾಗಿ ಗುರುತಿಸಬಲ್ಲ ಅಧ್ಯಯನ ವಿನ್ಯಾಸಗಳನ್ನು ನಾವು ಬಲವಾಗಿ ಪ್ರೋತ್ಸಾಹಿಸುತ್ತೇವೆ.

ನಾವು ಉದ್ದೇಶಪೂರ್ವಕವಾಗಿ ವಿವಿಧ ಕಾಲಾವಧಿಗಳಲ್ಲಿ ನಡೆಯುವ ವೈವಿಧ್ಯಮಯ ಯೋಜನೆಗಳನ್ನು ಬೆಂಬಲಿಸುತ್ತಿದ್ದೇವೆ:

• ಅಲ್ಪಾವಧಿ (2-6 ತಿಂಗಳು): ಆರಂಭಿಕ ಸೂಚನೆಗಳನ್ನು ಪಡೆಯಲು ಈಗಾಗಲೇ ಲಭ್ಯವಿರುವ ಅನುಮೋದಿತ ದತ್ತಾಂಶ, ಸಾರ್ವಜನಿಕ ದತ್ತಾಂಶ ಅಥವಾ ಸ್ಪಷ್ಟವಾಗಿ ವ್ಯಾಪ್ತಿ ನಿಗದಿಪಡಿಸಿದ ಪಾಲುದಾರರ ದತ್ತಾಂಶ ಬಳಸಿ ತ್ವರಿತವಾಗಿ ಪೂರ್ಣಗೊಳಿಸುವ ಅಧ್ಯಯನಗಳು.

• ಮಧ್ಯಮಾವಧಿ (6-12 ತಿಂಗಳು): ಕಾಲಕ್ರಮೇಣ ಫಲಿತಾಂಶಗಳನ್ನು ಗಮನಿಸುವ, ನಿರ್ದಿಷ್ಟ ಹಸ್ತಕ್ಷೇಪಗಳನ್ನು ಪರೀಕ್ಷಿಸುವ ಅಥವಾ ಅರೆ-ಪ್ರಾಯೋಗಿಕ ವ್ಯತ್ಯಾಸಗಳನ್ನು ಬಳಸಿಕೊಳ್ಳುವ ಅಧ್ಯಯನಗಳು.

ತಮ್ಮ ಪ್ರಸ್ತಾವನೆ ಯಾವ ಕಾಲಾವಧಿಯನ್ನು ಗುರಿಯಾಗಿಸಿಕೊಂಡಿದೆ ಮತ್ತು ಅಧ್ಯಯನದ ಪ್ರಶ್ನೆಗೆ ಆ ಅವಧಿ ಏಕೆ ಸೂಕ್ತವಾಗಿದೆ ಎಂಬುದನ್ನು ಅರ್ಜಿದಾರರು ತಿಳಿಸಬೇಕು.

ಆಯ್ಕೆಯಾದ ಪ್ರತಿ ಯೋಜನೆಗೆ ಇವು ದೊರೆಯುತ್ತವೆ:

• ಪ್ರಧಾನ ಸಂಶೋಧಕರಿಗೆ ಒಮ್ಮೆ ನೀಡುವ ಸಂಶೋಧನಾ ಅನುದಾನ: $25,000

• ಸಂಶೋಧನಾ ಸಹಾಯಕರಿಗೆ ಮಾಸಿಕ ಶಿಷ್ಯವೇತನ ಅಥವಾ ಗುತ್ತಿಗೆದಾರರಿಗೆ ಸಂಭಾವನೆ: $7,500

• ದತ್ತಾಂಶ ಆಡಳಿತ, ಗೌಪ್ಯತೆ, ಕಾನೂನು ಮತ್ತು ಭದ್ರತಾ ಅವಶ್ಯಕತೆಗಳಿಗೆ ಒಳಪಟ್ಟು, ಗೌಪ್ಯತೆ ಕಾಪಾಡುವ ಒಪ್ಪಂದದ ಅಡಿಯಲ್ಲಿ ಅನುಮೋದಿತ, ಗೌಪ್ಯತೆಗೆ ಸುರಕ್ಷಿತವಾದ ಉತ್ಪನ್ನ ಮತ್ತು ಬಳಕೆಯ ದತ್ತಾಂಶದ ಪ್ರವೇಶ.

• ಯೋಜನೆಯ ವ್ಯಾಪ್ತಿ ನಿಗದಿ, ಸೇರ್ಪಡೆ ಪ್ರಕ್ರಿಯೆ, ದತ್ತಾಂಶ ಅನುಮೋದನೆಗಳು, ಪರಿಶೀಲನೆ ಮತ್ತು ಫಲಿತಾಂಶಗಳ ಪ್ರಸಾರಕ್ಕೆ ನಿಗದಿತ ಆಂತರಿಕ ಬೆಂಬಲ ವ್ಯವಸ್ಥೆ.

ಈ ವ್ಯವಸ್ಥೆಯನ್ನು ಸಮನ್ವಯದ ವೆಚ್ಚ ತಗ್ಗಿಸಲು, ಅನುಷ್ಠಾನವನ್ನು ವೇಗಗೊಳಿಸಲು ಮತ್ತು ಕಾರ್ಯಸಾಧ್ಯತೆಯನ್ನು ಖಚಿತಪಡಿಸಿಕೊಳ್ಳುತ್ತಲೇ ಸಂಶೋಧಕರ ಸ್ವಾತಂತ್ರ್ಯವನ್ನು ಕಾಪಾಡಲು ರೂಪಿಸಲಾಗಿದೆ. ಬಾಹ್ಯ ಸಹಯೋಗಗಳಿಗೆ ಅಗತ್ಯವಾದ ನೇರ ವಿಶ್ಲೇಷಣಾ ಕೆಲಸವನ್ನು ಅತಿಥಿ ಸಂಶೋಧಕರು ಅಥವಾ ಅವರ ಸಂಶೋಧನಾ ಸಹಾಯಕರು ಮಾಡಬೇಕು. ಯೋಜನೆಗೆ ನಿರ್ದಿಷ್ಟವಾಗಿ ಬೇಕಾದ ದತ್ತಾಂಶವನ್ನು ಹೊರತೆಗೆಯಲು ಅಥವಾ ವಿಶ್ಲೇಷಿಸಲು ಆರ್ಥಿಕ ಸಂಶೋಧನಾ ತಂಡವನ್ನು ಅವಲಂಬಿಸಬಾರದು.

ಅನುದಾನ ಪಡೆದ ಯೋಜನೆಗಳು ಕೇವಲ ಅಂತಿಮ ಸಂಶೋಧನಾ ಪ್ರಬಂಧಗಳನ್ನಷ್ಟೇ ಅಲ್ಲ, ಸ್ಪಷ್ಟ ಮಧ್ಯಂತರ ಮೈಲಿಗಲ್ಲುಗಳನ್ನೂ ಒಳಗೊಂಡಿರಬೇಕು. ಸಂಶೋಧಕರು ಕನಿಷ್ಠ ಈ ಕೆಳಗಿನವುಗಳನ್ನು ಮಾಡಬೇಕೆಂದು ನಿರೀಕ್ಷಿಸಲಾಗುತ್ತದೆ:

• ಅಧ್ಯಯನ ವಿನ್ಯಾಸವನ್ನು ಅಂತಿಮಗೊಳಿಸುವುದು, ದತ್ತಾಂಶ ಪ್ರವೇಶ, ಮಧ್ಯಂತರ ವಿಶ್ಲೇಷಣೆ ಮತ್ತು ಕರಡು ಕೃತಿಯಂತಹ ಪ್ರಮುಖ ಮೈಲಿಗಲ್ಲುಗಳನ್ನು ಯೋಜನೆಯ ವೇಳಾಪಟ್ಟಿಗೆ ಅನುಗುಣವಾಗಿ ನಿಗದಿಪಡಿಸುವುದು.

• ವಿಶ್ಲೇಷಣೆ ಆರಂಭಿಸುವ ಮೊದಲು ಸೇರ್ಪಡೆ, ಒಪ್ಪಂದ ಮತ್ತು ಅನುಮೋದಿತ ದತ್ತಾಂಶ ಪ್ರವೇಶದ ಪ್ರಕ್ರಿಯೆಗಳನ್ನು ಪೂರ್ಣಗೊಳಿಸುವುದು.

• ಮಧ್ಯಂತರ ಫಲಿತಾಂಶಗಳನ್ನು OpenAI ಆರ್ಥಿಕ ಸಂಶೋಧನಾ ತಂಡದೊಂದಿಗೆ ಹಂಚಿಕೊಳ್ಳುವುದು.

• ನಿಯತಕಾಲಿಕ ಸಂಶೋಧನಾ ವರದಿ ಮಂಡನೆಗಳಲ್ಲಿ ಅಥವಾ ಸಂಶೋಧನಾ ಒಕ್ಕೂಟದ ಚರ್ಚೆಗಳಲ್ಲಿ ಭಾಗವಹಿಸುವುದು.

• ಟಿಪ್ಪಣಿ, ಕಾರ್ಯಪ್ರಬಂಧ, ಪ್ರಕಟಣೆಯ ಕರಡು, ಸಾರ್ವಜನಿಕ ಸಂಕ್ಷಿಪ್ತ ವರದಿ, ಮಾನದಂಡ ಅಥವಾ ದತ್ತಾಂಶ ಸಮೂಹದ ದಾಖಲೆಯಂತಹ ಕನಿಷ್ಠ ಒಂದು ಲಿಖಿತ ಕೃತಿಯನ್ನು ಸಿದ್ಧಪಡಿಸುವುದು.

• ಒಪ್ಪಿಕೊಂಡಿರುವ OpenAI ಪರಿಶೀಲನಾ ಪ್ರಕ್ರಿಯೆಯ ಮೂಲಕ ಬಾಹ್ಯ ಸಂವಹನ ಅಥವಾ ಪ್ರಕಟಣೆಯನ್ನು ಸಮನ್ವಯಗೊಳಿಸುವುದು.

ಪುರಾವೆಗಳು, ಆಂತರಿಕ ಕಲಿಕೆ ಮತ್ತು ಆರ್ಥಿಕ ಸಂಶೋಧನಾ ಪರಿಸರದ ನಡುವೆ ನಿಕಟವಾದ, ಪರಸ್ಪರ ಪ್ರತಿಕ್ರಿಯೆಯ ವಿನಿಮಯಕ್ಕೆ ಅವಕಾಶ ಕಲ್ಪಿಸುವ ಕೆಲಸಕ್ಕೆ ನಾವು ಆದ್ಯತೆ ನೀಡುತ್ತಿದ್ದೇವೆ.

ಈ ಕೆಳಗಿನ ಅಂಶಗಳ ಆಧಾರದ ಮೇಲೆ ಪ್ರಸ್ತಾವನೆಗಳನ್ನು ಮೌಲ್ಯಮಾಪನ ಮಾಡಲಾಗುತ್ತದೆ:

• ಆರ್ಥಿಕ ಸಂಶೋಧನಾ ತಂಡದ ಆದ್ಯತೆಯ ಪ್ರಶ್ನೆಗಳಿಗೆ ಪ್ರಸ್ತುತತೆ

• ಸಂಶೋಧನಾ ವಿಧಾನದಲ್ಲಿನ ಕಟ್ಟುನಿಟ್ಟು ಮತ್ತು ವಿಶ್ವಾಸಾರ್ಹತೆ

• ಯೋಜನೆಯ ವ್ಯಾಪ್ತಿ, ದತ್ತಾಂಶ, ಗೌಪ್ಯತೆ, ಕಾನೂನು ಮತ್ತು ಕಾಲಾವಧಿಯ ಮಿತಿಗಳೊಳಗೆ ಕಾರ್ಯಸಾಧ್ಯತೆ (ಉದಾಹರಣೆಗೆ: ನಾವು ಯಾವುದೇ ಸಂದರ್ಭದಲ್ಲೂ ಸಂಭಾಷಣೆಯ ದತ್ತಾಂಶವನ್ನು ಹಂಚಿಕೊಳ್ಳುವುದಿಲ್ಲ)

• ಮೈಲಿಗಲ್ಲುಗಳು ಮತ್ತು ವರದಿ ಸಲ್ಲಿಸುವ ಯೋಜನೆಗಳ ಸ್ಪಷ್ಟತೆ

• ನೇರವಾಗಿ ಕೆಲಸವನ್ನು ಯಾರು ಮಾಡುತ್ತಾರೆ ಎಂಬುದೂ ಸೇರಿದಂತೆ, ವೇದಿಕೆಯ ಕಾರ್ಯವಿಧಾನಕ್ಕೆ ಹೊಂದಾಣಿಕೆ

• ಎಐನ ಆರ್ಥಿಕ ಪರಿಣಾಮಗಳ ಕುರಿತು ವಿಶ್ವಾಸಾರ್ಹ ಬಾಹ್ಯ ಪುರಾವೆಗಳಿಗೆ ಕೊಡುಗೆ ನೀಡುವ ಸಾಮರ್ಥ್ಯ

• ಅನುಮೋದಿತ OpenAI ದತ್ತಾಂಶವನ್ನು ಗೌಪ್ಯತೆ ಕಾಪಾಡುವ ನವೀನ ವಿಧಾನಗಳಲ್ಲಿ ಬಳಸುವ ಸಾಮರ್ಥ್ಯ

ಈ ಕೆಳಗಿನ ಸಂಶೋಧಕರ ಪ್ರಸ್ತಾವನೆಗಳಿಗೆ ನಾವು ಆದ್ಯತೆ ನೀಡುತ್ತೇವೆ: 

• ತಾವು ಪ್ರಸ್ತಾಪಿಸುತ್ತಿರುವ ಸಂಶೋಧನಾ ಕ್ಷೇತ್ರಗಳಲ್ಲಿ ಈ ಹಿಂದೆ ಕೃತಿಗಳನ್ನು ಪ್ರಕಟಿಸಿದ ಅನುಭವ ಹೊಂದಿರುವ ಸಂಶೋಧಕರು

• ಮಹತ್ವಾಕಾಂಕ್ಷೆಯ ಸಹಯೋಗಗಳಿಗೆ ನೆರವಾಗಬಲ್ಲ ವಿಶಿಷ್ಟ ದತ್ತಾಂಶದ ಲಭ್ಯತೆ ಹೊಂದಿರುವ ಸಂಶೋಧಕರು

ಅಧ್ಯಯನದ ವಿನ್ಯಾಸ ಮತ್ತು ವಿಶ್ಲೇಷಣೆಯಲ್ಲಿ ಸಂಶೋಧಕರು ಸ್ವಾತಂತ್ರ್ಯವನ್ನು ಉಳಿಸಿಕೊಳ್ಳುತ್ತಾರೆ. ನಿಖರತೆ, ಗೌಪ್ಯತೆ ರಕ್ಷಣೆ, ಕಾನೂನು ಪಾಲನೆ ಮತ್ತು ಸೂಕ್ತ ಸಂದರ್ಭವನ್ನು ಖಚಿತಪಡಿಸಿಕೊಳ್ಳಲು, ಫಲಿತಾಂಶಗಳ ಬಾಹ್ಯ ಪ್ರಕಟಣೆ ಅಥವಾ ಸಾರ್ವಜನಿಕ ಬಳಕೆಯನ್ನು OpenAI ಜೊತೆ ಸಮನ್ವಯಗೊಳಿಸಲಾಗುತ್ತದೆ. ವಿಶ್ವಾಸಾರ್ಹ ಮಾಪನವಿಲ್ಲದೆ ನಾವು ಹೊರಜಗತ್ತಿಗೆ ಯಾವುದೇ ಪ್ರತಿಪಾದನೆಗಳನ್ನು ಮಾಡುವುದಿಲ್ಲ.

ಪ್ರಸ್ತಾವನೆಗಳನ್ನು ಈ ನಮೂನೆಯ ಮೂಲಕ ಸಲ್ಲಿಸಬೇಕು. ಹೆಚ್ಚುವರಿ ಮಾಹಿತಿಯನ್ನು ಒಂದೇ ಗೂಗಲ್ ಡಾಕ್ ಕೊಂಡಿಯಾಗಿ ಒದಗಿಸಬೇಕು. ಉಲ್ಲೇಖಗಳು ಮತ್ತು ಅನುಬಂಧಗಳನ್ನು ಹೊರತುಪಡಿಸಿ, ಪ್ರಸ್ತಾವನೆ ಮೂರು ಪುಟಗಳನ್ನು ಮೀರಬಾರದು. ಪ್ರತಿ ಪ್ರಸ್ತಾವನೆಯು ಇವುಗಳನ್ನು ಒಳಗೊಂಡಿರಬೇಕು:

• ಸಂಶೋಧನಾ ಪ್ರಶ್ನೆಗಳು ಮತ್ತು ಅವುಗಳನ್ನು ಅಧ್ಯಯನ ಮಾಡಲು ಪ್ರೇರಣೆ

• ವೇದಿಕೆಯ ಒಂದು ಅಥವಾ ಹೆಚ್ಚಿನ ಆದ್ಯತೆಯ ಪ್ರಶ್ನೆಗಳಿಗೆ ಹೊಂದಾಣಿಕೆ

• ಪ್ರಸ್ತಾಪಿತ ಸಂಶೋಧನಾ ವಿಧಾನ ಮತ್ತು ಅನುಭವಾಧಾರಿತ ಪರಿಶೀಲನಾ ತಂತ್ರ

• ದತ್ತಾಂಶದ ಅಗತ್ಯಗಳು: ಎಐ ಕುರಿತ ವಿಶಾಲ ಪ್ರಶ್ನೆಗೆ ಉತ್ತರಿಸಲು ನೆರವಾಗುವ, OpenAI ಪರಿಕರಗಳ ಬಳಕೆಗೆ ಸಂಬಂಧಿಸಿದ ನಿರ್ದಿಷ್ಟ ಅನುಮೋದಿತ ಸೂಚಕ ಮತ್ತು ಅಧ್ಯಯನದ ವಿನ್ಯಾಸವು ಗೌಪ್ಯತೆಯನ್ನು ಹೇಗೆ ಕಾಪಾಡುತ್ತದೆ ಎಂಬ ವಿವರಗಳು

• ಉದ್ದೇಶಿತ ಕಾಲಾವಧಿ ಮತ್ತು ಪ್ರಮುಖ ಮೈಲಿಗಲ್ಲುಗಳು

• ಸಂಶೋಧನಾ ತಂಡ ಮತ್ತು ಪ್ರಸ್ತಾಪಿತ ಸಂಶೋಧನಾ ಸಹಾಯಕರು ಅಥವಾ ಅತಿಥಿ ಸಂಶೋಧಕರ ಪರಿಚಯ

• ಪುರಾವೆಗಳು, ಆಂತರಿಕ ಕಲಿಕೆ ಮತ್ತು ಅನುಮೋದಿತ ಸಾರ್ವಜನಿಕ ಸಂವಹನಕ್ಕೆ ನಿರೀಕ್ಷಿತ ಕೊಡುಗೆಗಳು

• ವ್ಯಾಪ್ತಿಯ ವ್ಯಾಖ್ಯಾನ: ಒಳಗೊಳ್ಳುವ ಮತ್ತು ಹೊರಗಿಡುವ ವಿಶ್ಲೇಷಣೆಗಳು, ಕೃತಿಗಳು, ಭೌಗೋಳಿಕ ಪ್ರದೇಶಗಳು ಹಾಗೂ ಹಿತಾಸಕ್ತಿದಾರರ ಸ್ಪಷ್ಟ ವಿವರಗಳು

• ಯಶಸ್ಸಿನ ಮಾನದಂಡಗಳು, ವಿಫಲತೆಯನ್ನು ನಿರ್ಧರಿಸುವ ಪರಿಸ್ಥಿತಿಗಳು, ಅವಲಂಬನೆಗಳು, ಮಿತಿಗಳು ಮತ್ತು ಒದಗಿಸಲು ಬದ್ಧವಾಗಿರುವ ಸಂಪನ್ಮೂಲಗಳು

• ಪ್ರಸ್ತಾವನೆಗಳಿಗೆ ಆಹ್ವಾನ ಪ್ರಕಟಣೆ: ಜೂನ್ 8, 2026

• ಪ್ರಸ್ತಾವನೆ ಸಲ್ಲಿಸಲು ಕೊನೆಯ ದಿನ: ಜುಲೈ 5, 2026

• ಪ್ರಸ್ತಾವನೆಗಳ ಕುರಿತ ನಿರ್ಧಾರಗಳ ಪ್ರಕಟಣೆ: ಜುಲೈ 31, 2026

ಹಕ್ಕುನಿರಾಕರಣೆ: ಪ್ರಸ್ತಾವನೆಗಳಿಗೆ ಈ ಆಹ್ವಾನವನ್ನು ಮಾಹಿತಿ ಮತ್ತು ಮೌಲ್ಯಮಾಪನದ ಉದ್ದೇಶಗಳಿಗೆ ಮಾತ್ರ ನೀಡಲಾಗಿದೆ. ಇದು OpenAI ಅಥವಾ ಯಾವುದೇ ಅರ್ಜಿದಾರರ ಮೇಲೆ ಬದ್ಧತೆಯನ್ನು ಹೇರುವುದಿಲ್ಲ. ಇಲ್ಲಿ ವಿವರಿಸಿರುವ ಎಲ್ಲಾ ಷರತ್ತುಗಳು ಪ್ರಾಥಮಿಕವಾಗಿದ್ದು, ಬದಲಾವಣೆಗೆ ಒಳಪಟ್ಟಿವೆ. ಪ್ರಸ್ತಾವನೆ ಸಲ್ಲಿಸುವುದರಿಂದ ಅಥವಾ OpenAI ಆರ್ಥಿಕ ಸಂಶೋಧನಾ ವಿನಿಮಯ ವೇದಿಕೆಯಲ್ಲಿ ಭಾಗವಹಿಸಲು ಆಯ್ಕೆಯಾಗುವುದರಿಂದ ಅನುದಾನ, ಸಂಭಾವನೆ ಅಥವಾ ಕೆಲಸದ ಒಪ್ಪಂದ ಪಡೆಯುವ ಹಕ್ಕು ಉಂಟಾಗುವುದಿಲ್ಲ. OpenAI ಮತ್ತು ಆಯ್ಕೆಯಾದ ಪಕ್ಷದ ನಡುವೆ ಅಂತಿಮ ಲಿಖಿತ ಒಪ್ಪಂದಕ್ಕೆ ಸಹಿ ಹಾಕಿದಾಗ ಮಾತ್ರ ಅಂತಹ ಯಾವುದೇ ಬಾಧ್ಯತೆಗಳು ಉಂಟಾಗುತ್ತವೆ.