OpenAI-ის სერვისების ხელშეკრულება

ძალაშია: 2026 წლის 1 იანვრიდან

OpenAI-ის მომსახურების ეს ხელშეკრულება ვრცელდება მხოლოდ OpenAI-ის API-ების, ChatGPT Enterprise-ის, ChatGPT Business-ის, ChatGPT კლინიცისტებისთვის და სხვა მომსახურებების გამოყენებაზე იმ მომხმარებლებისთვის, რომლებიც არიან ბიზნესები და დეველოპერები, და არ ვრცელდება OpenAI-ის მომსახურებებზე, რომლებსაც იყენებენ მომხმარებლები ან ფიზიკური პირები, თუ ზემოთ სხვაგვარად არ არის მითითებული.

წინამდებარე OpenAI-ის სერვისის ხელშეკრულება („ხელშეკრულება“) იდება ძალაში შესვლის თარიღში, ამ პირობებზე თანხმობის განმცხადებელ ორგანიზაციას („მომხმარებელი“) და ქვემოთ განსაზღვრულ OpenAI-ის ხელშეკრულების მხარეს („OpenAI“) შორის. წინამდებარე ხელშეკრულებაში OpenAI და მომხმარებელი თითოეული ცალ-ცალკე მოიხსენიება როგორც „მხარე“, ხოლო ერთობლივად — როგორც „მხარეები“. ასომთავრულით დაწყებულ ტერმინებს, რომლებიც არ არის განსაზღვრული მოცემულ ხელშეკრულებაში, გააჩნიათ შეკვეთის ფორმაში მითითებული მნიშვნელობები; მომხმარებელი ადასტურებს, რომ კანონიერად უფლებამოსილია დადოს წინამდებარე ხელშეკრულება და, თუ იგი ხელშეკრულებას დებს რომელიმე სუბიექტის სახელით, მას გააჩნია სამართლებრივი უფლებამოსილება, სავალდებულო გახადოს წინამდებარე ხელშეკრულება ამ სუბიექტისთვის. ღილაკზე „ვეთანხმები“ დაწკაპუნებით, შეკვეთის ფორმის მიღებით ან სერვისების გამოყენებით, მომხმარებელი ეთანხმება მოცემულ ხელშეკრულებას.

• 1.1. სერვისების მიწოდების ვადა OpenAI მიაწვდის სერვისებს მომხმარებელს სერვისების მიწოდების ვადაში. სერვისების მიწოდების ვადა მითითებული იქნება შეკვეთის ფორმაში. თუ მხარეები წერილობით სხვაგვარად არ შეთანხმდებიან, სერვისების მიწოდების ვადის განმავლობაში შეძენილი სერვისების რაოდენობის ზრდის შემთხვევაში, ვადა გამოთვლლილი იქნება პროპორციულად და დასრულდება იმ დროისთვის მოქმედი სერვისების მიწოდების ვადის დასრულებისას.
• 1.2. განახლება. განახლების პირობები, ასეთის არსებობის შემთხვევაში და ინფორმაცია იმის შესახებ, განახლდება თუ არა სერვისები ავტომატურად, მითითებული იქნება შესაბამის შეკვეთის ფორმაში. შეტყობინება არგანახლების ან მოცულობის შემცირების შესახებ უნდა გაიგზავნოს შემდეგი განახლების ვადის დაწყებამდე არანაკლებ ოცდაათი დღით ადრე. თუ მომხმარებელი შეამცირებს საკუთარი ლიცენზიების რიცხვს, რაოდენობას ან მინიმალურ ვალდებულებას, OpenAI-ს შეუძლია შეცვალოს ან გააუქმოს მომხმარებლისთვის მისი წინა შესყიდვის საფუძველზე შეთავაზებული ფასდაკლებები.
• 1.3. უფლებამოსილი შემსყიდველები.
  • ა. სერვისის ინიციალიზაცია სერვისის ინიციალიზაციისათვის, OpenAI მოითხოვს, რომ შეკვეთის ფორმაში მითითებული იყოს პირველი უფლებამოსილი შემსყიდველის ელ. ფოსტის მისამართი. შეკვეთის ფორმაში უფლებამოსილი შემსყიდველის სწორი ინფორმაციის მიუთითებლობამ შესაძლოა შეფერხებები გამოიწვიოს.
  • ბ. შესყიდვები. სერვისები შესაძლოა კონფიგურირებული იყოს ისე, რომ უფლებამოსილ შემსყიდველებს მიეცეს სერვისების დამატებითი ლიცენზიების, რაოდენობების ან მოცულობების შეძენის შესაძლებლობა. მომხმარებელი პასუხისმგებელია სერვისების იმ პარამეტრების გაგებაზე, რომლებიც დამატებითი შესყიდვების განხორციელების საშუალებას იძლევა. OpenAI მომხმარებელს დააკისრებს საფასურს დამატებითი ლიცენზიების, რაოდენობების ან სერვისების მოცულობებისთვის იმ მომენტისთვის მოქმედი სერვისების ვადის დარჩენილი პერიოდისთვის, მომხმარებლის იმ მომენტისთვის მოქმედი ფასის საფუძველზე, თუ შეკვეთის ფორმაში სხვაგვარად არ არის მითითებული.
• 1.4. აფილირებული პირები. 
  • ა. გამოყენება. OpenAI სერვისებს კონკრეტულ სუბიექტებს აწვდის გამოყოფილი სამუშაო სივრცეებისა და ორგანიზაციული ID-ების გამოყენებით. მომხმარებლის აფილირებულ პირებს შეუძლიათ სერვისების გამოყენება მომხმარებლის ანგარიშის ფარგლებში, რაც ნიშნავს, რომ მომხმარებლისა და მისი აფილირებული პირების გამოყენება მოხდება იმავე სამუშაო სივრცეში და იმავე ორგანიზაციული ID-ით. მომხმარებელი პასუხისმგებელი იქნება და პასუხს აგებს მისი აფილირებული პირების ყველა ქმედებასა და უმოქმედობაზე, რომლებსაც ამ ხელშეკრულებასთან დაკავშირებით წვდომა აქვთ სერვისებზე.
  • b. ცალკეული შესყიდვები. თუ მომხმარებლის აფილირებული პირების მიერ მომსახურებების შეძენა და გამოყენება განზრახულია მომხმარებლის მიერ მათი შეძენისა და გამოყენებისგან განცალკევებით, ამ შემთხვევაში აფილირებულმა პირმა უნდა გააფორმოს ცალკე შეკვეთის ფორმა. შემდეგ OpenAI შექმნის ცალკე სამუშაო სივრცესა და ორგანიზაციულ ID-ს ამ აფილირებული პირისთვის და შესაბამისად უზრუნველყოფს სერვისების მიწოდებას. თუ მომხმარებლის აფილირებული პირები ამ ხელშეკრულების ფარგლებში გააფორმებენ შეკვეთის ფორმებს, მათზე გავრცელდება ამ ხელშეკრულების პირობები. 
• 1.5. გამოყენებაზე დაფუძნებული სერვისები. თუ მომხმარებელი სერვისებს იძენს გამოყენებაზე დაყრდნობით, მომხმარებელი ადასტურებს, რომ OpenAI მომხმარებელს სერვისის საფასურს დააკისრებს OpenAI-ის მიერ გამოთვლილი გამოყენების საფუძველზე.

• 2.1. ზოგადი ნაწილი. ხელშეკრულება არეგულირებს მომხმარებლის წვდომას სერვისებზე და მათ გამოყენებას. მომხმარებელს შეუძლია ხელშეკრულების შესაბამისად წვდომა ჰქონდეს სერვისებზე და გამოიყენოს ისინი.
• 2.2. გამოყენება OpenAI მომხმარებელს ანიჭებს არაექსკლუზიურ უფლებას, ჰაონდეს წვდომა სერვისებზე და გამოიყენოს ისინი მოცემული ვადის განმავლობაში. ეს მოიცავს OpenAI-ის API-ის გამოყენების უფლებას, რათა სერვისები ინტეგრირდეს მომხმარებლის აპლიკაციებში და მომხმარებლის აპლიკაციები ხელმისაწვდომი გახდეს საბოლოო მომხმარებლებისთვის. 
• 2.3. ცვლილებები. OpenAI-მ შესაძლოა პერიოდულად განაახლოს სერვისები. თუ OpenAI-ის განახლება არსებითად შეამცირებს სერვისების ფუნქციონალურობას, OpenAI მომხმარებელს ანგარიშის ელფოსტის მისამართზე შეატყობინებს. ამ შეტყობინების მიღებიდან ხუთი სამუშაო დღის განმავლობაში, მომხმარებელს შეუძლია ხელშეკრულების შეწყვეტა ოცდაორი დღით ადრე წერილობითი შეტყობინების წარდგენით. შეწყვეტის ეს უფლება არ გავრცელდება იმ ფუნქციების განახლებებზე, რომლებიც მოწოდებულია ბეტა ან შეფასების რეჟიმში.

• 3.1. მომხმარებლის ანგარიში მომხმარებელი ვალდებულია, მიაწოდოს ზუსტი და აქტუალური ინფორმაცია ანგარიშის შესახებ. მომხმარებელი არ გაუზიარებს ანგარიშზე წვდომის საავტორიზაციო მონაცემებს ან ინდივიდუალური შესვლის საავტორიზაციო მონაცემებს რამდენიმე მომხმარებელს. მომხმარებელს არ აქვს უფლება, გადაყიდოს ან იჯარით გასცეს წვდომა საკუთარ ანგარიშზე ან ნებისმიერი საბოლოო მომხმარებლის ანგარიშზე. თუ მომხმარებლისთვის ცნობილი გახდება ანგარიშზე ან სერვისებზე არაავტორიზებული წვდომის შესახებ, იგი დაუყოვნებლივ აცნობებს OpenAI-ს. 
• 3.2. საბოლოო მომხმარებლები. საბოლოო მომხმარებლის ანგარიშები შეიძლება გამოიყოს და დარეგისტრირდეს მხოლოდ ერთი საბოლოო მომხმარებლის სახელზე და გამოყენებულ იქნეს მხოლოდ ერთი საბოლოო მომხმარებლის მიერ. მომხმარებელი პასუხისმგებელია ყველა იმ აქტივობაზე, რომელიც ხორციელდება მისი ანგარიშის ფარგლებში, მათ შორის იმ საბოლოო მომხმარებლების აქტივობებზე, რომლებსაც აქვთ საბოლოო მომხმარებლის ანგარიში ან რომლებიც სერვისებზე წვდომას იღებენ მომხმარებლის აპლიკაციის მეშვეობით. მომხმარებელი საბოლოო მომხმარებლებისგან მოიპოვებს და შეინარჩუნებს ყველა საჭირო თანხმობას, რათა ადმინისტრატორებს მიეცეთ ხელშეკრულებაში აღწერილი საქმიანობების განხორციელების შესაძლებლობა და OpenAI-მ შეძლოს სერვისების მიწოდება.
• 3.3. შეზღუდვები. მომხმარებელი არ განახორციელებს და არ მისცემს საბოლოო მომხმარებლებს უფლებას: (ა) გამოიყენონ სერვისები ან მომხმარებლის კონტენტი ისე, რომ დაირღვეს მოქმედი კანონები ან OpenAI-ის პოლიტიკები; (ბ) გამოიყენონ სერვისები ან მომხმარებლის კონტენტი ისე, რომ დაირღვეს მესამე პირების უფლებები; (გ) დაუშვან არასრულწლოვნების მიერ OpenAI-ის სერვისების გამოყენება მათი მშობლის ან მეურვის თანხმობის გარეშე; (დ) განახორციელონ სერვისების ან სერვისების მიწოდებისთვის გამოყენებული სისტემების ნებისმიერი ასპექტის უკუინჟინერია; (ე) დაშვებული გამონაკლისის გარდა, გამოიყენონ გამომავალი შედეგი ხელოვნური ინტელექტის ისეთი მოდელების შესაქმნელად, რომლებიც კონკურენციას უწევს OpenAI-ის პროდუქტებსა და სერვისებს; (ვ) ამოიღონ მონაცემები სერვისებიდან და სხვ., გარდა სერვისების მეშვეობით დაშვებული გზისა; (ზ) შეიძინონ API გასაღები მესამე პირისგან, გაყიდონ ან გადასცენ API გასაღები მესამე პირს ან მესამე პირთან; (თ) ხელი შეუშალონ ან დაარღვიონ სერვისების მუშაობსა, მათ შორის გვერდი აუარონ მოთხოვნების ლიმიტებს ან შეზღუდვებს, ან გვერდი აუარონ სერვისების დამცავ ზომებს ან უსაფრთხოების შემარბილებელ მექანიზმებს; (ი) დაარღვიონ ან გვერდი აუარონ გამოყენების ლიმიტებს, ან სხვაგვარად დააკონფიგურირონ სერვისები გამოყენების ლიმიტების თავიდან ასაცილებლად. 
• 3.4. მესამე მხარის სერვისები. მესამე მხარის სერვისები შეიძლება ხელმისაწვდომი იყოს სერვისების მეშვეობით, რომელთა გამოყენების არჩევა მომხმარებელს შეუძლია თავისი ერთპიროვნული შეხედულებისამებრ. მესამე მხარის სერვისზე წვდომის მიღებით, მომხმარებელი ეთანხმება მესამე მხარის სერვისის შესაბამის პირობებს. მომხმარებლის მიერ მესამე მხარის სერვისებზე წვდომა ან მათი გამოყენება რეგულირდება წინამდებარე ხელშეკრულებითა და შესაბამისი მესამე მხარის სერვისის პირობებით.

• 4.1. ზოგადი ნაწილი. მომხმარებელს და მის საბოლოო მომხმარებლებს შეუძლიათ მიაწოდონ შესაყვანი მასალა და მიიღონ გამოტანილი შედეგი. მომხმარებელსა და OpenAI-ს შორის ურთიერთობაში, მოქმედი კანონმდებლობით დაშვებულ ფარგლებში, მომხმარებელი (ა) ინარჩუნებს საკუთრების ყველა უფლებას შეყვანილ მასალაზე; და (ბ) ფლობს მთელ მიღებულ შედეგს. OpenAI ამით მომხმარებელს გადასცემს OpenAI-ის ყველა უფლებას, საკუთრების უფლებასა და ინტერესს მიღებულ შედეგზე და მასთან დაკავშირებით (ასეთის არსებობის შემთხვევაში).
• 4.2. OpenAI-ის ვალდებულებები OpenAI გამოიყენებს მომხმარებლის კონტენტს მხოლოდ იმ მოცულობით, რამდენადაც აუცილებელია მომხმარებლისთვის სერვისების მისაწოდებლად, მოქმედ კანონმდებლობასთან შესაბამისობის უზრუნველსაყოფად, OpenAI-ის პოლიტიკების მოთხოვნების შესასრულებლად და ბოროტად გამოყენების თავიდან ასაცილებლად. OpenAI არ გამოიყენებს მომხმარებლის კონტენტს სერვისების განვითარებისთვის ან გაუმჯობესებისთვის, გარდა იმ შემთხვევისა, თუ მომხმარებელი ცალსახად დათანხმდება ასეთ გამოყენებას. 
• 4.3. მომხმარებლის ვალდებულებები მომხმარებელი პასუხისმგებელია მთელ შეყვანილ მასალაზე და აცხადებს და გარანტიას იძლევა, რომ მას აქვს ყველა უფლება, ლიცენზია და ნებართვა, რომლებიც საჭიროა სერვისებისთვის შესაყვანი მასალის მისაწოდებლად. მომხმარებელი ერთპიროვნულად პასუხისმგებელია მიღებული შედეგების ნებისმიერ გამოყენებაზე და მომხმარებლის გამოყენების სცენარისთვის მიღებული შედეგის სიზუსტისა და შესაფერისობის შეფასებაზე.
• 4.4. მიღებული შედეგის მსგავსება OpenAI-ის სერვისებისა და ზოგადად ხელოვნური ინტელექტის ბუნებიდან გამომდინარე, მიღებული შედეგი შეიძლება უნიკალური არ იყოს და სხვა მომხმარებლებმაც შეიძლება მიიღონ მსგავსი კონტენტი OpenAI-ის სერვისებიდან. პასუხები, რომლებიც მოთხოვნილი და გენერირებულია სხვა მომხმარებლების მიერ ან მათთვის, არ მიიჩნევა მომხმარებლის მიღებულ შედეგად.

• 5.1. უსაფრთხოების ზომები. OpenAI დაიცავს უსაფრთხოების ზომებს. OpenAI-მ შესაძლოა პერიოდულად განაახლოს უსაფრთხოების ზომები. თუ OpenAI განაახლებს უსაფრთხოების ზომებს ისე, რომ ეს მთლიანობაში არსებითად შეამცირებს მომსახურების ადმინისტრაციულ, ტექნიკური ან ფიზიკური უსაფრთხოების მახასიათებლებს, მომხმარებელს შეუძლია ხელშეკრულებისა და მასთან დაკავშირებული შეკვეთის ფორმების შეწყვეტა, OpenAI-სთვის განახლებიდან ხუთი სამუშაო დღის განმავლობაში წერილობითი შეტყობინების გაგზავნით. 
• 5.2. აუდიტის ანგარიშები. OpenAI-მ დაასრულა დამოუკიდებელი აუდიტორის მიერ ჩატარებული აუდიტები, რომლებმაც შეაფასა სერვისებისთვის OpenAI-ის უსაფრთხოების პოლიტიკების, პროცედურებისა და კონტროლის მექანიზმების დიზაინი და ეფექტიანობა. მომხმარებლის წერილობითი მოთხოვნის საფუძველზე, მაგრამ არაუმეტეს წელიწადში ერთხელ, OpenAI მომხმარებელს მიაწვდის უახლესი აუდიტის ანგარიშების ასლს, რომელიც მიჩნეული იქნება OpenAI-ის კონფიდენციალურ ინფორმაციად.
• 5.3. კონფიდენციალურობა. თუ მომხმარებელი იყენებს სერვისებს პერსონალური მონაცემების დასამუშავებლად, OpenAI და მომხმარებელი დაიცავენ DPA-ს მოთხოვნებს, რომელიც ამ მითითებით შეტანილია ხელშეკრულებაში.
• 5.4. HIPAA. მომხმარებელი თანხმდება, რომ არ გამოიყენებს სერვისებს დაცული ჯანმრთელობის ინფორმაციის შესაქმნელად, მისაღებად, შესანახად, გადასაცემად ან სხვაგვარად დასამუშავებლად, თუ მას ხელმოწერილი არ აქვს ჯანმრთელობის დაცვის დანართი. ზემოაღნიშნულის მიუხედავად, OpenAI-ის მიერ შემოთავაზებული სერვისებიდან ყველა არ არის განკუთვნილი დაცული ჯანმრთელობის ინფორმაციის დასამუშავებლად. თუ მომხმარებელი იყენებს სერვისს, რომელიც არ არის განკუთვნილი დაცული ჯანმრთელობის ინფორმაციის დასამუშავებლად, მომხმარებელს არ შეუძლია გამოიყენოს სერვისები ამ ინფორმაციის შესანახად, გადასაცემად ან დასამუშავებლად.

• 6.1. საფასურები მომხმარებელი OpenAI-ს ან მომხმარებლის გადამყიდველს გადაუხდის შესაბამის საფასურებს იმ ვალუტაში და გადახდის იმ პირობების შესაბამისად, რომლებიც მითითებულია შეკვეთის ფორმაში. მომხმარებელი უფლებამოსილებას ანიჭებს OpenAI-ს ან, საჭიროების შემთხვევაში, მომხმარებლის გადამყიდველს, ანგარიშში მითითებული გადახდის მეთოდის გამოყენებით მომხმარებელს დააკისროს ყველა შესაბამისი საფასური. საფასურები არ ექვემდებარება დაბრუნებას, გარდა კანონით მოთხოვნილი შემთხვევებისა ან ხელშეკრულებით სხვაგვარად პირდაპირ დაშვებული შემთხვევებისა. თუ მომხმარებლის შეკვეთის ფორმა მოიცავს მინიმალურ ვალდებულებას, მინიმალური ვალდებულების თანხა გაუქმებას არ ექვემდებარება, გარდა იმ შემთხვევებისა, როდესაც ეს კანონით არის მოთხოვნილი ან სხვაგვარად პირდაპირ არის დაშვებული ხელშეკრულებაში.
• 6.2. გადახდა. მომხარებელი აანაზღაურებს OpenAI-ის ანგარიშ-ფაქტურებს შეკვეთის ფორმაში მითითებული გადახდის პერიოდულობით. OpenAI-ს შეუძლია შეაჩეროს ან შეწყვიტოს სერვისების მიწოდება, თუ საფასურის გადახდა ვადაგადაცილებულია. მომხმარებელი OpenAI-ს მიაწვდის სრულ და ზუსტ ანგარიშსწორებისა და საკონტაქტო ინფორმაციას. 
• 6.3. გადასახადები. საფასურები არ მოიცავს გადასახადებს, რომლებსაც OpenAI ან მომხმარებლის გადამყიდველი დააკისრებს სერვისებთან დაკავშირებით მოქმედი კანონმდებლობის მოთხოვნისამებრ. OpenAI ან მომხმარებლის გადამყიდველი ანგარიშში მითითებულ სახელსა და მისამართს საგადასახადო მიზნებისთვის მიწოდების ადგილად გამოიყენებს. ამ ხელშეკრულებით გათვალისწინებული ყველა საფასური სრულად უნდა იქნეს გადახდილი, ნებისმიერი სახელმწიფო ორგანოს მიერ დაწესებული გადასახადების, მოსაკრებლების, ბაჟების, ტარიფების ან ნებისმიერი სხვა სახის გადასახადების გამო რაიმე დაქვითვის ან დაკავების გარეშე. თუ კანონით მოითხოვება ნებისმიერი ასეთი გამოქვითვა ან დაკავება, მომხმარებელმა უნდა გაზარდოს OpenAI-სთვის ან მომხმარებლის გადამყიდველისთვის გადასახდელი თანხა ისე, რომ მიღებული წმინდა თანხა ინვოისში მითითებულ თანხას გაუტოლდეს.
• 6.4. დავები. ინვოისის გასაჩივრებისთვის მომხმარებელი უნდა: (ა) დაუკავშირდეს ar-enterprise@openai.com⁠ -ს სადავო ინვოისის გაცემის თარიღიდან ოცდაათი დღის განმავლობაში; და (ბ) გადაიხადოს ყველა არასადავო თანხა. ვადაგადაცილებულ არასადავო თანხებს შეიძლება დაერიცხოს ფინანსური საკომისიო გადაუხდელი ნაშთის 1,5 % ოდენობით თვეში.
• 6.5. სერვისის კრედიტები მომხმარებელს შეიძლება დასჭირდეს სერვისის საფასურის წინასწარ გადახდა სერვისის კრედიტების შეძენის გზით. სერვისის კრედიტები ექვემდებარება სერვისის კრედიტების პირობებს.
• 6.6. შესწორებები. ფასების გვერდზე გამოქვეყნებული ფასების ცვლილებები ძალაში შევა მათი გამოქვეყნებიდან თოთხმეტი დღის შემდეგ. OpenAI-ს უფლება აქვს, გამოასწოროს ფასებთან დაკავშირებული შეცდომები ან უზუსტობები ინვოისის გაცემის ან გადახდის მიღების შემდეგაც.

• 7.1. გამოყენება და გაუმჟღავნებლობა. მიმღები თანხმდება, რომ იგი: (ა) გამმჟღავნებლის კონფიდენციალურ ინფორმაციას გამოიყენებს მხოლოდ ამ ხელშეკრულებით გათვალისწინებული თავისი უფლებების განსახორციელებლად და ვალდებულებების შესასრულებლად; (ბ) მიიღებს გონივრულ ზომებს კონფიდენციალური ინფორმაციის დასაცავად; და (გ) არ გაამჟღავნებს კონფიდენციალურ ინფორმაციას რომელიმე მესამე პირისადმი, გარდა იმ შემთხვევებისა, როდესაც ეს პირდაპირ არის დაშვებული ამ ხელშეკრულებით.
• 7.2. გამონაკლისები. 7.1 პუნქტით გათვალისწინებული ვალდებულებები არ ვრცელდება ინფორმაციაზე, რომელიც: (ა) არის ან ხდება საყოველთაოდ ხელმისაწვდომი საზოგადოებისთვის მიმღების ბრალეულობის გარეშე; (ბ) იმყოფებოდა მიმღების მფლობელობაში ან მისთვის ცნობილი იყო გამმჟღავნებლისგან მიღებამდე; (გ) მართლზომიერად გამჟღავნდა მიმღებისთვის შეზღუდვის გარეშე მესამე მხარის მიერ; ან (დ) დამოუკიდებლად იქნა შემუშავებული გამმჟღავნებლის კონფიდენციალური ინფორმაციის გამოყენების გარეშე.
• 7.3. ნებადართული გამჟღავნება. მიმღებს შეუძლია გაუმჟღავნოს კონფიდენციალური ინფორმაცია მხოლოდ საკუთარ აფილირებულ პირების, თანამშრომლებს, კონტრაქტორებს და აგენტებს, რომლებსაც აქვთ საჭიროება იცოდნენ და რომლებიც ვალდებულნი არიან დაიცვან კონფიდენციალურობის ვალდებულებები, რომლებიც არანაკლებ შემზღუდავია, ვიდრე ამ ხელშეკრულებით გათვალისწინებული ვალდებულებები. მიმღები მხარე პასუხს აგებს მისი თანამშრომლების, კონტრაქტორებისა და აგენტების მიერ წინამდებარე მე-7 მუხლის ნებისმიერი დარღვევისთვის. მიმღებს უფლება აქვს გაამჟღავნოს კონფიდენციალური ინფორმაცია იმ ფარგლებში, რამდენადაც ეს კანონით მოითხოვება, თუ მიმღები გონივრულ ძალისხმევას გამოიყენებს გამჟღავნებლის წინასწარ შეტყობინებისთვის, რამდენადაც ეს ნებადართულია, ასეთ გამჟღავნებამდე.
• 7.4. სამართლებრივი დაცვის საშუალებები. მიმღები აღიარებს, რომ წინამდებარე პირობების დარღვევით კონფიდენციალური ინფორმაციის გამჟღავნება გამოიწვევდა არსებით ზიანს, რომლისთვისაც მხოლოდ ზიანის ანაზღაურება არ იქნებოდა საკმარისი დაცვის საშუალება, და, შესაბამისად, მიმღების მიერ ნებისმიერი ასეთი გამჟღავნების შემთხვევაში, გამმჟღავნებელი უფლებამოსილი იქნება მოითხოვოს სამართლიანობის პრინციპებზე დაფუძნებული შესაბამისი დაცვის საშუალება, გარდა ნებისმიერი სხვა დაცვის საშუალებისა, რომელიც მას შეიძლება გააჩნდეს კანონის შესაბამისად.

• 8.1. საბოლოო მომხმარებლის ანგარიშები. თუ საბოლოო მომხმარებელი: (ა) არღვევს ხელშეკრულებას; ან (ბ) იწვევს, ან გამოიწვევს, უსაფრთხოების საგანგებო ვითარებას, მაშინ OpenAI-მ შეიძლება მოითხოვოს, რომ მომხმარებელ,ა შეაჩეროს ან შეწყვიტოს შესაბამისი საბოლოო მომხმარებლის ანგარიში. თუ მომხმარებელი დაუყოვნებლივ არ შეაჩერებს ან არ გააუქმებს საბოლოო მომხმარებლის ანგარიშს, ეს შეიძლება გააკეთოს OpenAI-მ.
• 8.2. სერვისების OpenAI-ს შეუძლია შეზღუდოს ან შეაჩეროს მომხმარებლის წვდომა სერვისებზე, თუ: (ა) ამას კანონი მოითხოვს; (ბ) მომხმარებელი დაარღვევს ხელშეკრულებას ან OpenAI-ის პოლიტიკებს; ან (გ) ამის გაკეთება აუცილებელია უსაფრთხოების საგანგებო სიტუაციის თავიდან ასაცილებლად ან შესაწყვეტად. OpenAI გონივრულ ძალისხმევას გამოიყენებს, რათა მომხმარებელს აცნობოს სერვისების შეზღუდვამდე ან შეჩერებამდე, წინა წინადადების შესაბამისად, თუმცა შეუძლია ამის გაკეთება წინასწარი შეტყობინების გარეშე იმ ფარგლებში, რამდენადაც გონივრულად აუცილებელია. OpenAI გონივრულ ზომებს მიიღებს იმისთვის, რომ: (i) შეზღუდოს ან შეაჩეროს უსაფრთხოების საგანგებო მდგომარეობის თავიდან აცილების ან შეწყვეტის მიზნით; და (ii) ითანამშრომლოს მომხმარებლებთან სერვისებზე წვდომის სწრაფად აღსადგენად მას შემდეგ, რაც OpenAI დაადასტურებს, რომ მომხმარებელმა აღმოფხვრა შეჩერების საჭიროების გამომწვევი გარემოება.

• 9.1. უფლებების შენარჩუნება ამ ხელშეკრულებით განსაზღვრული შემთხვევების გამოკლებით, ხელშეკრულება არ ანიჭებს: (ა) OpenAI-ს რაიმე ინტელექტუალური საკუთრების უფლებებს მომხმარებლის კონტენტზე; ან (ბ) მომხარებელს რაიმე ინტელექტუალური საკუთრების უფლებებს სერვისებზე. მომხმარებელი იღებს მხოლოდ შეზღუდულ უფლებას, ისარგებლოს სერვისებით, და ამ ხელშეკრულების საფუძველზე მომხმარებელს ან მის საბოლოო მომხმარებლებს საკუთრების რაიმე უფლებები არ გადაეცემათ.
• 9.2. შეზღუდული ნებართვა მომხმარებელი OpenAI-ს ანიჭებს მხოლოდ იმ შეზღუდულ უფლებებს, რომლებიც გონივრულ ფარგლებში აუცილებელია OpenAI-ის მიერ სერვისების მიწოდებისთვის. ეს შეზღუდული ნებართვა ასევე ვრცელდება ქვეკონტრაქტორებზე ან ქვე-დამმუშავებლებზე.
• 9.3. უკუკავშირი. თუ მომხმარებელი წარადგენს უკუკავშირს, მომხმარებელი ანიჭებს OpenAI-ს უფლებას, შეზღუდვისა და ანაზღაურების გარეშე გამოიყენოს უკუკავშირი და ისარგებლოს მისით.

• თითოეულ კონკრეტულ შემთხვევაში წინასწარი, პირდაპირი წერილობითი ნებართვის გარეშე, არც ერთი მხარე არ: (i) განათავსებს მეორე მხარის სახელს ან ლოგოს თავის ვებსაიტებზე, მედიაში ან მარკეტინგულ მასალებში; ან (ii) გააკეთებს რაიმე საჯარო განცხადებას მეორე მხარესთან თავისი ურთიერთობის ან წინამდებარე ხელშეკრულების შესახებ.

• 11.1. ხელშეკრულების ვადა ხელშეკრულება ძალაში იქნება ვადის განმავლობაში.
• 11.2. შეწყვეტა ნებისმიერ მხარეს შეუძლია შეწყვიტოს წინამდებარე ხელშეკრულება, მათ შორის ყველა შეკვეთის ფორმა, წერილობითი შეტყობინების საფუძველზე, თუ მეორე მხარე: (ა) არსებითად არღვევს წინამდებარე ხელშეკრულებას და არ აღმოფხვრის დარღვევას წერილობითი შეტყობინების მიღებიდან ოცდაათი დღის განმავლობაში; ან (ბ) წყვეტს თავის საქმიანობას ან მის მიმართ იწყება გადახდისუუნარობის წარმოება.
• 11.3. შეწყვეტის შედეგები ამ ხელშეკრულების შეწყვეტის შემთხვევაში: (ა) OpenAI-ის მიერ მომხმარებლისთვის მინიჭებული უფლებები დაუყოვნებლივ შეწყდება; და (ბ) OpenAI ოცდაათი დღის განმავლობაში წაშლის მომხმარებლის მთელ კონტენტს თავისი სისტემებიდან, გარდა იმ შემთხვევებისა, როდესაც: (i) OpenAI-ს კანონით მოეთხოვება მისი შენარჩუნება; ან (ii) მომხმარებელი წერილობით დათანხმდა სხვაგვარად. შეწყვეტა ან ვადის გასვლა გავლენას არ მოახდენს ნებისმიერ უფლებებსა ან ვალდებულებებზე, მათ შორის გადასახდელი თანხების გადახდაზე, რომლებიც წარმოიშვა წინამდებარე ხელშეკრულების საფუძველზე შეწყვეტის თარიღამდე. ასევე, მომხმარებლის მიერ საფუძვლიანი მიზეზით შეწყვეტის შემთხვევის გარდა, ამ ხელშეკრულების შეწყვეტის შემთხვევაში, შეკვეთის ფორმაში მითითებული ნებისმიერი გადაუხდელი მინიმალური ფინანსური ვალდებულების თანხა დაუყოვნებლივ გახდება გადასახდელი. ამ ხელშეკრულებაში არსებული ნებისმიერი საწინააღმდეგო დებულების მიუხედავად, OpenAI-ს შეუძლია შეინახოს მომხმარებლის შეურაცხმყოფელი კონტენტი ან, თუ მომხმარებლის წვდომა სერვისებზე შეჩერებულია მე-8 პუნქტის საფუძველზე ან შეწყვეტილია მე-11 პუნქტის საფუძველზე, შეუძლია გააზიაროს მომხმარებლის შეურაცხმყოფელ კონტენტთან დაკავშირებული ინფორმაცია, როგორც ამას კანონი მოითხოვს, ან იმ შემთხვევაში, როდესაც ეს გონივრულ ფარგლებში აუცილებელია სერვისების ან ნებისმიერი მესამე მხარის ზარალისგან დასაცავად.
• 11.4. ძალაში დარჩენა. შემდეგი დებულებები ძალაში დარჩება ხელშეკრულების შეწყვეტის ან ვადის გასვლის შემდეგ: 6.2 (გადახდა), 7 (კონფიდენციალურობა), 9 (ინტელექტუალური საკუთრების უფლებები), 11.3 (შეწყვეტის შედეგები), 11.4 (ძალაში დარჩენა), 12 (გარანტიები; პასუხისმგებლობის უარყოფა), 13 (ზარალის ანაზღაურება), 14 (პასუხისმგებლობის შეზღუდვა), 16 (სხვადასხვა). 

• 12.1. გარანტიები OpenAI იძლევა გარანტიას, რომ ვადის განმავლობაში, წინამდებარე ხელშეკრულების შესაბამისად გამოყენებისას, სერვისები ყველა არსებითი ასპექტით შესაბამისობაში იქნება დოკუმენტაციასთან.
• 12.2. პასუხისმგებლობის უარყოფა. 12.1-ე პუნქტის გათვალისწინებით, სერვისები წარმოდგენილია „როგორც არის“. კანონით ნებადართული ფარგლებში, გარდა იმ შემთხვევებისა, რომლებიც პირდაპირ არის მითითებული ხელშეკრულებაში, OpenAI, მისი აფილირებული პირები და ლიცენზიარები არ იძლევიან რაიმე სახის გარანტიას, იქნება ეს პირდაპირი, ნაგულისხმევი, კანონით დადგენილი თუ სხვაგვარი, მათ შორის, ვარგისიანობის, კონკრეტული გამოყენებისთვის შესაბამისობის ან დაურღვევლობის გარანტიებს. OPENAI არ აკეთებს რაიმე განცხადებას, არ იძლევა გარანტიას ან პირობას იმასთან დაკავშირებით, რომ სერვისები დააკმაყოფილებს მომხმარებლის მოთხოვნებს ან მოლოდინებს, რომ მომხმარებლის კონტენტი იქნება ზუსტი, რომ ხარვეზები გამოსწორდება, ან ნებისმიერი მესამე მხარის სერვისებთან დაკავშირებით. OPENAI პასუხისმგებელი არ იქნება და პასუხისმგებლობა არ დაეკისრება მომხმარებლის ნებისმიერ კონტენტზე, მესამე მხარის სერვისებზე, მესამე მხარის კონტენტზე ან არა-OPENAI სერვისებზე (მათ შორის, ამით გამოწვეულ ნებისმიერ დაგვიანებაზე, შეფერხებაზე, გადაცემის შეცდომაზე, უსაფრთხოების ხარვეზსა და სხვა პრობლემაზე).
• 12.3. ბეტა სერვისები. ხელშეკრულებაში საპირისპირო დებულებების არსებობის მიუხედავად: (ა) მომხმარებელს შეუძლია, საკუთარი შეხედულებისამებრ აირჩიოს ბეტა სერვისების გამოყენება; (ბ) ბეტა სერვისებს შეიძლება არ ჰქონდეს მხარდაჭერა და შეიძლება შეიცვალოს ნებისმიერ დროს წინასწარი შეტყობინების გარეშე; (გ) ბეტა სერვისები შეიძლება არ იყოს ისეთივე საიმედო ან ხელმისაწვდომი, როგორც სერვისები; (დ) ბეტა სერვისებზე არ გავრცელებულა უსაფრთხოების იგივე ზომები და აუდიტი, რაც სერვისებზე; და (ე) OPENAI-ს არ დაეკისრება არანაირი პასუხისმგებლობა, რომელიც გამომდინარეობს ბეტა სერვისებიდან ან დაკავშირებულია მათთან – გამოიყენეთ საკუთარი რისკით.

• 13.1. OpenAI-ის მიერ. OpenAI იღებს ვალდებულებას აუნაზღაუროს ზიანი მომხმარებელს, დაიცვას და გაათავისუფლოს იგი ნებისმიერი პასუხისმგებლობისგან, ზიანისა და ხარჯისგან (მათ შორის, გონივრულ ფარგლებში, იურისტის მომსახურებაზე გაწეული ხარჯებისგან), რომლებიც გადასახდელია მესამე მხარისადმი და წარმოიშობა პრეტენზიიდან, რომლის თანახმადაც სერვისები არღვევს მესამე მხარის ინტელექტუალური საკუთრების რაიმე უფლებას. ეს გამორიცხავს პრეტენზიებს თუ ისინი გამოწვეულია: (ა) ნებისმიერი სერვისის კომბინირებით პროდუქტებთან, სერვისებთან ან პროგრამულ უზრუნველყოფასთან, რომლებიც არ არის მოწოდებული OpenAI-ის მიერ ან OpenAI-ის სახელით; (ბ) ნებისმიერი სერვისების შეცვლით OpenAI-ის გარდა ნებისმიერი სხვა მხარის მიერ; (გ) მომხმარებლის კონტენტით; (დ) მომხმარებლის აპლიკაციებით (ასეთის არსებობის შემთხვევაში, და თუ პრეტენზია არ წარმოიშობოდა მომხმარებლის აპლიკაციის გარეშე). გარდა ამისა, ძალაში შესვლის თარიღიდან, წინამდებარე ხელშეკრულებაში შედის სერვისის სპეციფიკური პირობებით ზარალის ანაზღაურების ვალდებულება, რომელზეც არ ვრცელდება პასუხისმგებლობის რაიმე ლიმიტი და OpenAI-ს არ შეუძლია მატერიალურად შეამციროს მომხმარებლის დაცვის გარანტიები სერვისის სპეციფიკური პირობებით ზარალის ანაზღაურების ვალდებულების ფარგლებში, მომხარებლის წერილობითი თანხმობის გარეშე.
• 13.2. მომხმარებლის მიხედვით მომხმარებელი თანახმაა, აუნაზღაუროს, დაიცვას და პასუხისმგებლობისგან გაათავისუფლოს OpenAI, მისი აფილირებული პირები და ლიცენზიარები ნებისმიერ ვალდებულებასთან, ზიანსა და ხარჯთან დაკავშირებით (მათ შორის, გონივრულ ფარგლებში იურისტის ჰონორარებისგან), რომელიც გადასახდელია მესამე მხარისთვის და გამომდინარეობს მოთხოვნიდან, რომელიც დაკავშირებულია: (ა) სერვისების გამოყენებასთან ამ ხელშეკრულების დარღვევით; (ბ) მომხმარებლის აპლიკაციებთან, ასეთის არსებობის შემთხვევაში; ან (გ) მომხმარებლის კონტენტთან.
• 13.3. შერბილება თუ OpenAI გონივრულ ფარგლებში მიიჩნევს, რომ სერვისების მთელი ან ნებისმიერი ნაწილი, სავარაუდოდ, დარღვევასთან დაკავშირებული პრეტენზიის საგანი გახდება, OpenAI: (ა) OpenAI-ის ხარჯით მოიპოვებს მომხმარებლისთვის უფლებას, განაგრძოს სევრისების გამოყენება ამ ხელშეკრულების შესაბამისად; (ბ) შეცვლის ან მოდიფიცირებას გაუკეთებს სავარაუდოდ დამრღვევ სერვისს; ან (გ) თუ (ა) და (ბ) კომერციულად განხორციელებადი არ არის, OpenAI-ს შეუძლია, საკუთარი ერთპიროვნული შეხედულებისამებრ, შეწყვიტოს ეს ხელშეკრულება მომხმარებლისთვის წერილობითი შეტყობინების გაგზავნით და დააბრუნოს გამოუყენებელი სერვისებისთვის წინასწარ გადახდილი ნებისმიერი თანხა. მომხმარებელი დაუყოვნებლივ შეასრულებს OpenAI-ის მიერ ზემოაღნიშნულთან დაკავშირებით მიწოდებულ ყველა გონივრულ მითითებას, მათ შორის ნებისმიერ მითითებას სერვისის ჩანაცვლების, შეცვლის ან მისი გამოყენების შეწყვეტის შესახებ.
• 13.4. პროცედურა. მხარე, რომელიც ზიანის ანაზღაურებას ითხოვს, ზიანის ანაზღაურებაზე პასუხისმგებელ მხარეს ნებისმიერი პრეტენზიის შესახებ ინფორმაციის მიღებისთანავე მიაწვდის დაუყოვნებლივ წერილობით შეტყობინებას, გაუწევს გონივრულ თანამშრომლობას პრეტენზიისგან დაცვის ან მისი გამოძიების პროცესში და მისცემს ზიანის ანაზღაურებაზე პასუხისმგებელ მხარეს პრეტენზიისგან დაცვისა და მისი მოგვარების ერთპიროვნულ კონტროლს, მათ შორის ადვოკატის შერჩევის უფლებას, იმ პირობით, რომ ზიანის ანაზღაურების მომთხოვნ მხარეს უფლება აქვს, მონაწილეობა მიიღოს საკუთარ დაცვაში მხოლოდ საკუთარი ხარჯით. ზარალის ანაზღაურებაზე პასუხისმგებელ მხარეს არ აქვს უფლება, მეორე მხარის წინასწარი წერილობითი თანხმობის გარეშე დადოს რაიმე გარიგება ან კომპრომისული შეთანხმება რაიმე მოთხოვნასთან დაკავშირებით; ასეთი თანხმობის გაცემაზე უარი არ უნდა იყოს უსაფუძვლო. გამონაკლისია შემთხვევა, როდესაც ზარალის ანაზღაურებაზე პასუხისმგებელ მხარეს შეუძლია თანხმობის გარეშე დადოს მოთხოვნასთან დაკავშირებული ისეთი მორიგება, რომელიც აგვარებს აღნიშნულ მოთხოვნას ისე, რომ მეორე მხარეს არ აკისრებს პასუხისმგებლობას, არ ზღუდავს მეორე მხარის რომელიმე უფლებას და არ მოითხოვს მეორე მხარისგან პასუხისმგებლობის აღიარებას. ზარალის ანაზღაურების ვალდებულებები წარმოადგენს მხარის ერთადერთ სამართლებრივი დაცვის საშუალებას ამ ხელშეკრულების ფარგლებში, მეორე მხარის მიერ მესამე პირის ინტელექტუალური საკუთრების უფლებების დარღვევისთვის.

• 14.1. ირიბი პასუხისმგებლობის შეზღუდვა. კანონით დასაშვებ მაქსიმალურ ფარგლებში, გარდა შემდეგი შემთხვევებისა: (ა) მხარის უხეში გაუფრთხილებლობა ან განზრახ მართლსაწინააღმდეგო ქმედება; (ბ) მომხმარებლის მიერ 3.3 პუნქტის (შეზღუდვები) დარღვევა; (გ) OpenAI-ის მიერ 5.1 პუნქტის (უსაფრთხოების ზომები) დარღვევა, ან (დ) რომელიმე მხარის მიერ მე-7 პუნქტის (კონფიდენციალურობა) დარღვევა, არც მომხმარებელი და არც OpenAI, ან რომელიმე მხარის აფილირებული პირები ან ლიცენზიის გამცემები, არ იქნებიან პასუხისმგებელნი ამ ხელშეკრულების საფუძველზე რაიმე არაპირდაპირ, სადამსჯელო, შემთხვევით, სპეციალურ, თანმდევ ან სამაგალითო ზარალზე, მათ შორის დაკარგულ მოგებაზე, მაშინაც კი, თუ მხარემ იცოდა ან უნდა სცოდნოდა, რომ ასეთი ზიანი შესაძლებელი იყო, და მაშინაც კი, თუ სამართლებრივი დაცვის საშუალება თავის არსებით მიზანს ვერ აღწევს.
• 14.2. პასუხისმგებლობის შეზღუდვა. კანონით დასაშვებ ფარგლებში, გარდა შემდეგისა: (ა) მხარის უხეში გაუფრთხილებლობა ან განზრახი არამართლზომიერი ქმედება, (ბ) მხარის ზიანის ანაზღაურების ვალდებულებები წინამდებარე ხელშეკრულების ფარგლებში, ან (გ) მომხმარებლის გადახდის ვალდებულებები, თითოეული მხარის საერთო პასუხისმგებლობა წინამდებარე ხელშეკრულების ფარგლებში არ გადააჭარბებს იმ მთლიან თანხას, რომელიც მომხმარებელმა გადაუხადა OpenAI-ს უშუალოდ პასუხისმგებლობის წარმოშობის გამომწვევი მოვლენის დადგომამდე თორმეტი თვის განმავლობაში. ზემოაღნიშნული შეზღუდვები მოქმედებს ნებისმიერი შეზღუდული სამართლებრივი დაცვის საშუალების არსებითი მიზნის ვერ მიღწევის მიუხედავად.

• 15.1. სავალდებულო არბიტრაჟი მომხმარებელი და OpenAI თანხმდებიან, რომ ნებისმიერი დავა, მიუხედავად იმისა, როდის წარმოიშვა იგი, მაშინაც კი, თუ ეს მოხდა ამ ხელშეკრულების არსებობამდე, გადაწყდეს საბოლოო და სავალდებულო არბიტრაჟის გზით.
• 15.2. დავის არაფორმალური გადაწყვეტა⁠ OpenAI-ს სურს გაიგოს და მოაგვაროს მომხმარებლის წუხილები ფორმალური სამართლებრივი ქმედების დაწყებამდე. მხარეები თანხმდებიან, რომ ერთმანეთის წინააღმდეგ სარჩელის შეტანამდე შეეცადონ დავების არაფორმალური გზით მოგვარებას. მომხმარებელი ამას გააკეთებს, შევსებით დავის არაფორმალური გადაწყვეტის ფორმა⁠. OpenAI ამას გააკეთებს მომხმარებლისთვის ანგარიშის ელფოსტის მისამართზე შეტყობინებით. თუ მხარეები ვერ შეძლებენ დავის გადაწყვეტას სამოცი დღის განმავლობაში, ნებისმიერ მხარეს შეუძლია დაიწყოს საარბიტრაჟო წარმოება. ორივე მხარე ასევე თანხმდება, რომ დაესწრონ ინდივიდუალურ მორიგების კონფერენციას, თუ ამ პერიოდში რომელიმე მხარე მოითხოვს მისი ჩატარებას. ხანდაზმულობის ვადა შეჩერდება ამ არაფორმალური გადაწყვეტის პროცესის განმავლობაში.
• 15.3. ზოგადი ნაწილი. მომხმარებელი და OpenAI თანხმდებიან, რომ ნებისმიერი დავა გადაწყვიტონ საბოლოო და სავალდებულო არბიტრაჟის გზით, გარდა ქვემოთ მითითებული შემთხვევებისა. ნებისმიერ მხარეს შეუძლია დაიწყოს სავალდებულო არბიტრაჟი NAM-ის მეშვეობით, ან, თუ NAM ხელმისაწვდომი არ არის, მხარეების მიერ შერჩეული ალტერნატიული საარბიტრაჟო ფორუმის მეშვეობით. ინიციატორი მხარე გადაიხდის არბიტრაჟის განაცხადის შეტანის ყველა მოსაკრებელს, ხოლო სხვა ადმინისტრაციული და არბიტრის ხარჯების გადახდა დარეგულირდება არბიტრაჟის პროვაიდერის წესებით. თუ დადგინდება, რომ მხარის მოთხოვნა უსაფუძვლოა, მოთხოვნის წამომწყები მხარე ვალდებულია აუნაზღაუროს მეორე მხარეს ყველა ადმინისტრაციული, მოსმენისა და სხვა საფასური, რომელიც წარმოიშვა აღნიშნული მოთხოვნის შედეგად.
• 15.4. პროცედურა. არბიტრაჟი ჩატარდება ტელეფონით, წერილობითი წარდგინებების საფუძველზე, ვიდეოკონფერენციის მეშვეობით ან პირადად სან-ფრანცისკოში, კალიფორნიის შტატში, ან სხვა, ურთიერთშეთანხმებულ ადგილზე. არბიტრაჟი ჩატარდება NAM-ის ერთპიროვნული არბიტრის მიერ, NAM-ის იმ დროისთვის მოქმედი წესების შესაბამისად. ყველა საკითხი არბიტრის გადასაწყვეტია, გარდა იმ შემთხვევებისა, როდესაც კალიფორნიის სასამართლოს აქვს უფლებამოსილება დაადგინოს: (ა) უნდა გამოიყოს თუ არა ამ საარბიტრაჟო განყოფილების რომელიმე დებულება და რა შედეგები მოჰყვება ასეთ გამოყოფას; (ბ) შეასრულეს თუ არა მხარეებმა არბიტრაჟის დაწყების წინაპირობები; და (გ) ხელმისაწვდომია თუ არა საარბიტრაჟო მომსახურების მიმწოდებელი არბიტრაჟის განსახილველად. ნებისმიერი მორიგების შეთავაზების ოდენობას არცერთი მხარე არ გაამჟღავნებს არბიტრისთვის მანამ, სანამ არბიტრი არ განსაზღვრავს საბოლოო საარბიტრაჟო გადაწყვეტილებას, ასეთის არსებობის შემთხვევაში.
• 15,5 გამონაკლისები. ამ ხელშეკრულებაში არაფერი მოითხოვს შემდეგი პრეტენზიების არბიტრაჟში განხილვას: (ა) ინდივიდუალური მოთხოვნები, რომლებიც შეტანილია მცირე სარჩლების სასამართლოში; და (b) აკრძალვითი ან სხვა სამართლიანობაზე დაფუძნებული დაცვის საშუალება სერვისების უნებართვო ან ბოროტად გამოყენების ან ინტელექტუალური საკუთრების უფლების დარღვევის შესაჩერებლად.
• 15.6. ჯგუფური სარჩელები დაუშვებელია. დავები უნდა წარდგენილ იქნეს მხოლოდ ინდივიდუალურ საფუძველზე და არ შეიძლება წარდგენილ იქნეს მოსარჩელის ან ჯგუფის წევრის სტატუსით სავარაუდო ჯგუფურ, გაერთიანებულ ან წარმომადგენლობით წარმოებაში. ჯგუფური არბიტრაჟები, ჯგუფური სარჩელები, კერძო პირების მიერ საზოგადოებრივი ინტერესების დასაცავად წამოწყებული სამართლებრივი ქმედებები და სხვა არბიტრაჟებთან გაერთიანება დაუშვებელია. თუ რაიმე მიზეზით დავა არბიტრაჟის ნაცვლად სასამართლოში განიხილება, თითოეული მხარე გაცნობიერებულ და უპირობო უარს განაცხადებს ნაფიცი მსაჯულების მონაწილეობით საქმის განხილვის უფლებაზე ნებისმიერ სარჩელში, წარმოებაში ან შეგებებულ სარჩელში. ეს არ უშლის ხელს არცერთ მხარეს, მონაწილეობა მიიღოს ჯგუფური პრეტენზიების დაკმაყოფილებაში.
• 15.7. პაკეტური საარბიტრაჟო განხილვა თუ ოცდახუთი ან მეტი მომჩივანი, რომლებსაც ერთი და იგივე ან მსგავსი იურიდიული წარმომადგენელი წარმოადგენს, ერთმანეთისგან ოთხმოცდაათი დღის დაცილებით ვადაში წარადგენს საარბიტრაჟო მოთხოვნებს, რომლებიც არსებითად მსგავს დავებს ეხება, მაშინ მომხმარებელი და OpenAI თანხმდებიან, რომ NAM მათ პაკეტურ ადმინისტრირებას გაუწევს, გარდა იმ შემთხვევისა, როდესაც მომჩივანთა საერთო რაოდენობა ან პაკეტებად დაყოფის შემდეგ მათი რაოდენობა 50-ზე ნაკლებია, რაც ერთ პაკეტს შეადგენს. NAM განახორციელებს თითოეული პაკეტის ადმინისტრირებას, როგორც ერთიან კონსოლიდირებულ არბიტრაჟს, ერთი არბიტრით, საარბიტრაჟო მოსაკრებლების ერთ ნაკრებად და ერთი მოსმენით, რომელიც ჩატარდება ვიდეოკონფერენციის საშუალებით ან თითოეული პაკეტისათვის არბიტრის მიერ განსაზღვრულ ადგილას. თუ დადგინდა, რომ ამ პუნქტის რომელიმე ნაწილი კონკრეტული მოსარჩლის ან პაკეტის მიმართ ბათილია ან აღუსრულებელია, ის გამოიყოფა და ინდივიდუალურ წარმოებაში საარბიტრაჟო წესით განიხილება.
• 15.8. ცალკეული დებულებების დამოუკიდებლობა. თუ წინამდებარე მე-15 მუხლის რომელიმე ნაწილი უკანონოდ ან აღუსრულებლად იქნება მიჩნეული, მისი დანარჩენი ნაწილი ძალაში დარჩება, გარდა იმ შემთხვევისა, როდესაც ნაწილობრივი უკანონობის ან აღუსრულებლობის დადგენა შესაძლებელს გახდიდა ჯგუფურ ან წარმომადგენლობით არბიტრაჟს; ასეთ შემთხვევაში წინამდებარე მე-15 მუხლი მთლიანად აღუსრულებელი იქნება. ამ ნაწილში არაფერი ჩაითვლება საჯარო აკრძალვითი დაცვის ღონისძიების ან ნებისმიერი სხვა უფლების, რომელზეც უარის თქმა დაუშვებელია, მოთხოვნის უფლებაზე უარის თქმად ან მის სხვაგვარად შეზღუდვად, სანამ არბიტრი არ გამოიტანს გადაწყვეტილებას ამ მოთხოვნის არსებით მხარეზე.

• 16.1. სრული ხელშეკრულება წინამდებარე ხელშეკრულება წარმოადგენს სრულ ხელშეკრულებას მომხმარებელსა და OpenAI-ს შორის მის თემასთან დაკავშირებით და ანაცვლებს ყველა წინარე ან თანადროულ ხელშეკრულებას, კომუნიკაციასა და გაგებას, წერილობითს თუ ზეპირს. მოცემული მითითებით, OpenAI-ის პოლიტიკები და შესაბამისი შეკვეთის ფორმები წინამდებარე ხელშეკრულების ნაწილს წარმოადგენს. მომხმარებელი თანახმაა, რომ ნებისმიერი პირობები და დებულებები, რომლებიც მოცემულია ნებისმიერ შესყიდვის შეკვეთაში, რომელსაც მომხმარებელი უგზავნის OpenAI-ს, არ გავრცელდება ამ ხელშეკრულებაზე, ბათილია და იურიდიული ძალა არ გააჩნიათ.
• 16.2. ურთიერთსაწინააღმდეგო პირობები თუ ხელშეკრულების შემადგენელ დოკუმენტებს შორის არსებობს წინააღმდეგობა, დოკუმენტებს უპირატესობა მიენიჭება შემდეგი თანმიმდევრობით: (ა) შეკვეთის ფორმა; (ბ) მომსახურების სპეციფიკური პირობები; (გ) ხელშეკრულება; და (დ) OpenAI-ის
  პოლიტიკები.
• 16.3. მარეგულირებელი სამართალი წინამდებარე ხელშეკრულება რეგულირდება მარეგულირებელი სამართლის მიერ. მე-15 პუნქტის დებულებების შეუზღუდავად, ყველა მოთხოვნა, რომელიც გამომდინარეობს წინამდებარე ხელშეკრულებიდან ან უკავშირდება მას, წარდგენილი იქნება მხოლოდ ადგილზე.
• 16.4. ცალკეული დებულებების დამოუკიდებლობა. აღუსრულებადი დებულებები შეიცვლება ისე, რომ ასახავდეს მხარეთა განზრახვას და მხოლოდ იმ მოცულობით, რაც აუცილებელია მათი აღსრულებადობის უზრუნველსაყოფად, ხოლო ხელშელრულების დანარჩენი დებულებები სრულად დარჩება ძალაში.
• 16.5. შეტყობინებები. შეტყობინებები უნდა გაიგზავნოს ელ. ფოსტით, პირველი კლასის ფოსტით, ავიაფოსტით ან სადღეღამისო საკურიერო მომსახურებით და ჩაბარებულად ითვლება მათი მიღების მომენტიდან. მომხმარებლისთვის განკუთვნილი შეტყობინებები ასევე შეიძლება გაიგზავნოს შესაბამისი ანგარიშის ელ. ფოსტის მისამართზე და გაგზავნისთანავე ჩაითვლება ჩაბარებულად. OpenAI-სთვის განკუთვნილი შეტყობინებები უნდა გაეგზავნოს OpenAI Legal-ს ბმულზე: contract-notices@openai.com⁠, ხოლო ასლი უნდა გაიგზავნოს მისამართზე: (ა) OpenAI OpCo, LLC-ის შემთხვევაში, 1455 3rd Street, San Francisco, California 94158; ან (ბ) OpenAI Ireland Ltd-ს შემთხვევაში, 1st Floor, The Liffey Trust Centre, 117-126 Sheriff Street Upper, Dublin 1, D01 YC43, Ireland.
• 16.6. უფლებებზე უარის თქმა ნებისმიერი დარღვევის გამო უფლებებზე უარის თქმა არ ითვლება რაიმე შემდგომი დარღვევის გამო უფლებებზე უარის თქმად.
• 16.7. უფლების გადაცემა წინამდებარე ხელშეკრულებაზე უფლების გადაცემა დაუშვებელია, გარდა ამ 16.7 პუნქტით (უფლების გადაცემა) ნებადართული შემთხვევებისა. OpenAI-ს შეუძლია, შეტყობინების ან მომხმარებლის თანხმობის გარეშე, გადასცეს აფილირებულ პირს ეს უფლება წინამდებარე ხელშეკრულებაზე. ნებისმიერ მხარეს შეუძლია წინამდებარე ხელშეკრულება გადასცეს უფლებამონაცვლეს, რომელზეც გადადის შესაბამისი მხარის აქტივების ან საქმიანობის არსებითი ნაწილი, გადამცემი მხარის მიერ გადაცემის შესახებ არანაკლებ ოცდაათი დღით ადრე წერილობითი შეტყობინების შემთხვევაში. წინამდებარე ხელშეკრულებას სავალდებულო ძალა ექნება მხარეებისთვის და მათი შესაბამისი სამართალმემკვიდრეებისა და ნებადართული უფლებამონაცვლეებისთვის.
• 16.8. სააგენტო არ არის OpenAI და მომხმარებელი არ წარმოადგენენ სამართლებრივ პარტნიორებს ან აგენტებს, არამედ დამოუკიდებელი კონტრაქტორები არიან.
• 16.9. ფორსმაჟორი. გადახდის ვალდებულებების გარდა, არც მომხმარებელს და არც OpenAI-ს არ დაეკისრება რაიმე პასუხისმგებლობა შეუსრულებლობისთვის ან შეფერხებებისთვის, რომლებიც გამოწვეულია მომხმარებლის ან OpenAI-ის გონივრულ კონტროლის მიღმა არსებული გარემოებებით, მათ შორის, მაგრამ არამხოლოდ, სახელმწიფო ორგანოების ქმედებებით ან ტერორისტული აქტებით, მიწისძვრით ან დაუძლეველი ძალის მქონე სხვა გარემოებებით, შრომითი პირობებით ან ელექტროენერგიის მიწოდების შეფერხებებით.
• 16.10. მესამე მხარის ბენეფიციარები არ არსებობენ ამ ხელშეკრულებას არ ჰყავს მესამე მხარის განზრახ განსაზღვრული ბენეფიციარები და მომხმარებლისა და OpenAI-ის კონკრეტული მიზანია, რომ ამ ხელშეკრულებაში მესამე მხარისთვის ან მისი სახელით არაფერი არ წარმოშობს რაიმე სახელშეკრულებო თუ სხვაგვარ უფლებას ან სარჩელის საფუძველს.
• 16.11. სავაჭრო კონტროლი მომხმარებელი ერთპიროვნულად არის პასუხისმგებელი იმის უზრუნველყოფაზე, რომ მის მიერ სერვისების გამოყენება შეესაბამებოდეს მოქმედ სავაჭრო კანონმდებლობას, სანქციებისა და ექსპორტის კონტროლის კანონმდებლობის ჩათვლით. მომხმარებლის მიერ შეყვანილი მონაცემები არ უნდა შეიცავდეს მასალას ან ინფორმაციას, რომლის გამოშვებისთვის ან ექსპორტისთვის საჭიროა სახელმწიფო ლიცენზია. მომხმარებელს არ აქვს უფლება გამოიყენოს სერვისები აშშ-ის ემბარგოს ქვეშ მყოფ რომელიმე ქვეყანაში ან მის სასარგებლოდ, ან მოახდინოს სერვისების ექსპორტი ან რეექსპორტი აშშ-ის ემბარგოს ქვეშ მყოფ რომელიმე ქვეყანაში ან აკრძალული მხარეების სიაში შეტანილი ნებისმიერი პირისთვის. მომხმარებელი აცხადებს და იძლევა გარანტიას, რომ მომხმარებელი და საბოლოო მომხმარებლები არ იმყოფებიან აშშ-ის ემბარგოს ქვეშ მყოფ რომელიმე ქვეყანაში, არ არიან მითითებულნი აკრძალული მხარეების რომელიმე სიაში და რომ მომხმარებელი დაიცავს მოქმედ ექსპორტის კონტროლის კანონებს, მათ შორის ნებისმიერ „იცნობდეთ თქვენს მომხმარებელს“ მოთხოვნას ან ვალდებულებას, რომელიც ვრცელდება მომხმარებლის საბოლოო მომხმარებლებზე.
• 16.12. გამოყენების გეოგრაფიული შეზღუდვები მომხმარებელს და საბოლოო მომხმარებლებს არ აქვთ უფლება, ჰქონდეთ წვდომა ან შესთავაზონ წვდომა სერვისებზე მხარდაჭერილი ქვეყნებისა და ტერიტორიების ფარგლებს გარეთ. ამ 16.12 პუნქტის დარღვევამ შესაძლოა გამოიწვიოს სერვისების შეჩერება მე-8 პუნქტის შესაბამისად.
• 16.13. განახლებები
  • ა. ზოგადი ნაწილი OpenAI-ს უფლება აქვს განაახლოს წინამდებარე ხელშეკრულება ან OpenAI-ის პოლიტიკები, მომხმარებლისთვის გონივრულ ფარგლებში წინასწარი შეტყობინების მიწოდებით, მათ შორის განახლების OpenAI-ის ვებსაიტზე გამოქვეყნების გზით. თუ OpenAI თავისი ერთპიროვნული გადაწყვეტილებით დაადგენს, რომ განახლება არსებითად მოქმედებს მომხმარებლის უფლებებზე ან ვალდებულებებზე, OpenAI მომხმარებელს განახლების ძალაში შესვლამდე სულ მცირე ოცდაათი დღით ადრე შეატყობინებს, გარდა იმ შემთხვევისა, როდესაც განახლება აუცილებელია OpenAI-ის მიერ მოქმედ კანონმდებლობასთან შესაბამისობის უზრუნველსაყოფად; ასეთ შემთხვევაში OpenAI მომხმარებელს შეატყობინებს იმდენი ხნით ადრე, რამდენიც გონივრულ ფაგლებში შესაძლებელი იქნება. ნებისმიერი სხვა განახლება ძალაში შევა OpenAIს მიერ განახლებული ხელშეკრულების ან OpenAI-ის პოლიტიკის გამოქვეყნების შემდეგ. მომხმარებლის მიერ სერვისებით სარგებლობის ან მათზე წვდომის გაგრძელება განახლების ძალაში შესვლის შემდეგ მიჩნეული იქნება განახლებაზე თანხმობად. თუ მომხმარებელი არ ეთანხმება განახლებას, მომხმარებელს შეუძლია შეწყვიტოს სერვისების გამოყენება ან შეწყვიტოს წინამდებარე ხელშეკრულება მე-11 პუნქტის შესაბამისად.
  • b. გამონაკლისები გარდა იმ განახლებისა, რომელიც მოქმედ კანონმდებლობასთან შესაბამისობის უზრუნველსაყოფად ხდება, წინამდებარე ხელშეკრულების ან OpenAI-ის პოლიტიკების განახლებები არ გავრცელდება: (i) მომხმარებელსა და OpenAI-ს შორის დავებზე, რომლებიც განახლებამდე წარმოიშვა; ან (ii) შეკვეთის ფორმებზე, რომლებსაც მომხმარებელმა და OpenAI-მ ხელი მოაწერეს (არა ავტომატიზებული შეკვეთის გვერდზე) მანამდე, სანამ OpenAI მომხმარებელს განახლების შესახებ შეატყობინებდა. თუმცა, თუ განახლება უკავშირდება სერვისს ან ფუნქციას, რომელიც ამოქმედდა შეკვეთის ფორმის ხელმოწერის შემდეგ, იგი ძალაში შევა მომხმარებლის მიერ აღნიშნული სერვისის პირველად გამოყენებისთანავე.
• 16.14 სახელმწიფო უწყების უფლებები წინამდებარე 16.14 პუნქტი ვრცელდება სახელმწიფო უწყებებზე. აშშ-ის ფედერალური სამთავრობო სუბიექტებისთვის სერვისები წარმოადგენს „კომერციულ კომპიუტერულ პროგრამულ უზრუნველყოფას“, როგორც ეს განსაზღვრულია პარაგრაფებით 48 C.F.R. § 2.101 და 48 C.F.R. § 252.227-7014(a)(1) და როგორც ეს ტერმინი გამოიყენება პარაგრაფებში 48 C.F.R. §§ 12.212 და 227.7202, ხოლო დაკავშირებული მომსახურებები წარმოადგენს „კომერციულ მომსახურებებს“, როგორც ეს განსაზღვრულია პარაგრაფში 48 C.F.R. § 2.101. სერვისები და დოკუმენტაცია: (ა) მიეწოდება სახელმწიფო უწყების ტიპის მომხმარებლებს და საბოლოო მომხმარებლებს სახელმწიფო უწყების მიერ ან მისი სახელით გამოყენებისთვის; (ბ) ექვემდებარება წინამდებარე ხელშეკრულებას და ითვალისწინებს მხოლოდ იმ უფლებებს, რომლებიც ენიჭება ყველა სხვა მომხმარებელსა და საბოლოო მომხმარებელს, გარდა იმ შეზღუდული ფარგლებისა, რამდენადაც ეს აკრძალულია მოქმედი კანონმდებლობით.

„მომხმარებლის შეურაცხმყოფელი კონტენტი“ გულისხმობს შეყვანილ მონაცემებს ან გამოტანილ შედეგებს, რომლებიც არღვევს 3.3 პუნქტს.

„ანგარიში“ გულისხმობს ადმინისტრაციულ ანგარიშს, რომელსაც OpenAI აწვდის მომხმარებელს სერვისების ადმინისტრირების მიზნით.

„ადმინისტრატორი“ გულისხმობს მომხმარებლის მიერ განსაზღვრულ საბოლოო მომხმარებელს, რომელსაც აქვს ადმინისტრაციული პრივილეგიები.

„ანგარიშის კონსოლი“ ნიშნავს ონლაინ ინსტრუმენტს, რომელსაც OpenAI აწვდის მომხმარებელს სერვისების ადმინისტრირებისთვის გამოსაყენებლად.

„აფილირებული პირი“ ნიშნავს, თითოეულ მხარესთან მიმართებით, ნებისმიერ სხვა პირს ან სუბიექტს, რომელიც პირდაპირ ან არაპირდაპირ, ერთი ან მეტი შუამავლის მეშვეობით, აკონტროლებს ამ მხარეს, კონტროლდება ამ მხარის მიერ ან იმყოფება ამ მხარესთან საერთო კონტროლის ქვეშ.

„API“ ნიშნავს OpenAI-ის აპლიკაციის პროგრამირების ინტერფეისს.

„აუდიტის ანგარიშები“ ნიშნავს სერვისებთან დაკავშირებით მესამე მხარის აუდიტის ანგარიშებს.

„უფლებამოსილი შემსყიდველი“ ნიშნავს მომხმარებლის თანამშრომელს, რომელიც მომხმარებელმა დანიშნა რათა იმოქმედოს როგორც სერვისების უფლებამოსილმა შემსყიდველმა. მომხმარებელს შეუძლია უფლებამოსილი შემსყიდველების განსაზღვრა ხაზგარეშე შეკვეთის ფორმაში ან ადმინისტრატორის კონსოლში. ადმინისტრატორები უფლებამოსილი შემსყიდველები არიან. მომხმარებელს შეუძლია პერიოდულად განაახლოს უფლებამოსილი შემსყიდველები ადმინისტრატორის კონსოლში.

„ჯგუფი“ 15.7 პუნქტში ნიშნავს არაუმეტეს 50 მოსარჩელისგან შემდგარ ჯგუფს.

„ბეტა სერვისები“ ნიშნავს სერვისებს ან ფუნქციებს, რომლებიც იდენტიფიცირებულია როგორც ალფა, ბეტა, წინასწარი ვერსია, ადრეული წვდომა ან შეფასება, ან მსგავსი მნიშვნელობის მქონე სიტყვებითა თუ ფრაზებით.

„კონფიდენციალური ინფორმაცია“ ნიშნავს ნებისმიერ ბიზნეს, ტექნიკურ ან ფინანსურ ინფორმაციას, მასალებს ან სხვა საკითხს, რომელიც გამმჟღავნებელი მხარის მიერ გამჟღავნებულია მიმღებისთვის და რომელიც: (ა) გამჟღავნების მომენტში აღნიშნულია, როგორც კონფიდენციალური; ან (ბ) გარემოებებიდან გამომდინარე, მიმღებმა გონივრულად უნდა მიიჩნიოს კონფიდენციალურად. კონფიდენციალური ინფორმაცია მოიცავს მომხმარებლის მასალას.

„სარჩელი“ გულისხმობს მესამე მხარის მიერ დაწყებულ სამართლებრივ წარმოებას.

„მომხმარებლის აპლიკაცია“ გულისხმობს მომხმარებლის აპლიკაციებს, პროდუქტებს ან სერვისებს, რომლებიც ინტეგრირდება OpenAI API-თან.

„მომხმარებლის კონტენტი“ გულისხმობს შეყვანილ მასალას და გამოტანილ შედეგს.

„გამმჟღავნებელი“ გულისხმობს მხარეს, რომელიც წინამდებარე ხელშეკრულების ფარგლებში მეორე მხარეს უმჟღავნებს კონფიდენციალურ ინფორმაციას.

„დავა“ გულისხმობს რომელიმე მხარის პრეტენზიას, რომელიც გამომდინარეობს ამ ხელშეკრულებიდან ან მომსახურებებიდან, ან უკავშირდება მათ.

„დოკუმენტაცია“ გულისხმობს დოკუმენტაციას, რომელსაც OpenAI აწვდის მომხმარებელს ან სხვაგვარად ხდის საჯაროდ ხელმისაწვდომს.

„DPA“ გულისხმობს OpenAI-ის მონაცემთა დამუშავების დანართს, რომელიც ხელმისაწვდომია მისამართზე: https://openai.com/policies/data-processing-addendum.

„ძალაში შესვლის თარიღი“ გულისხმობს თარიღს, როდესაც მხარეები დებენ წინამდებარე ხელშეკრულებაას — ონლაინ რეჟიმში მიღებით, ხელშეკრულების მითითებით შეკვეთის ფორმის ხელმოწერით ან თავად ხელშეკრულების ხელმოწერით.

„საბოლოო მომხმარებელი“ გულისხმობს ნებისმიერ მხარეს: (ა) რომელიც წვდომას იღებს სერვისებზე მომხმარებლის ანგარიშის ფარგლებში ან (ბ) რომელიც იყენებს მომხმარებლის აპლიკაციებს. საბოლოო მომხმარებლები შეიძლება მოიცავდნენ მომხმარებლისა და მისი აფილირებული პირის თანამშრომლებს, კონსულტანტებს, მომხმარებლებს, აგენტებს, წარმომადგენლებს, სტუდენტებს ან ნებისმიერ სხვა პირს, რომელსაც მომხმარებელ,ა მისცა უფლებამოსილება, გამოიყენოს სერვისები მომხმარებლის ანგარიშის მეშვეობით.

„საბოლოო მომხმარებლის ანგარიში“ ნიშნავს საბოლოო მომხმარებლისთვის შექმნილ ანგარიშს მომხმარებლის ანგარიშის ფარგლებში.

„გამოხმაურება“ ნიშნავს მომხმარებლის მიერ OpenAI-სთვის სერვისებთან დაკავშირებით მიწოდებულ ნებისმიერ გამოხმაურებას.

„საფასურები“ გულისხმობს ყველა საფასურს, რომელიც იქვითება მომხმარებლის ანგარიშიდან შეკვეთის ფორმის შესაბამისად, ან, თუ შეკვეთის ფორმა არ არსებობს, ფასების გვერდის მიხედვით.

„მარეგულირებელი კანონმდებლობა“ გულისხმობს: (ა) EEA-ში, შვეიცარიაში ან გაერთიანებულ სამეფოში მყოფი მომხმარებლებისთვის — ირლანდიის კანონმდებლობას; და (ბ) ყველა სხვა მომხმარებლისთვის — კალიფორნიის შტატის კანონმდებლობას, კალიფორნიის კანონთა კოლიზიის წესებისა ან პრინციპების გამოკლებით.

„სახელმწიფო სუბიექტი“ გულისხმობს ნებისმიერ ერს ან მთავრობას, ნებისმიერ შტატს, მუნიციპალიტეტს ან მათ ნებისმიერ სხვა პოლიტიკურ ქვედანაყოფს, აგრეთვე ნებისმიერ იურიდიულ პირს, ორგანოს, სააგენტოს, კომისიას, დეპარტამენტს, საბჭოს, ბიუროს ან სასამართლოს, იქნება ეს ადგილობრივი, უცხოური თუ მრავალეროვნული, რომელიც ახორციელებს მთავრობის აღმასრულებელ, საკანონმდებლო, სასამართლო, მარეგულირებელ ან ადმინისტრაციულ ფუნქციებს ან ასეთ ფუნქციებთან დაკავშირებულ საქმიანობას, ასევე მათ ნებისმიერ თანამშრომელს ან თანამდებობის პირს.

„ჯანდაცვის დანართი“ გულისხმობს OpenAI-ის ჯანდაცვის დანართსა და ბიზნეს-პარტნიორის ხელშეკრულებას, რომელსაც OpenAI აწვდის მომხმარებელს.

„დავის არაფორმალური გადაწყვეტის ფორმა“ გულისხმობს ფორმას, რომელიც განთავსებულია ამ ბმულზე⁠.

„საწყისი ვადა“ გულისხმობს მომსახურებების საწყის ვადას, რომელიც იწყება დაწყების თარიღიდან და გრძელდება შეკვეთის ფორმაში მითითებული ხანგრძლივობის განმავლობაში.

„შეყვანილი მასალა“ გულისხმობს მომხმარებლისა და მომხმარებლის საბოლოო მომხმარებლების მიერ სერვისებში შეყვანილ მონაცემებს.

„ინტელექტუალური საკუთრების უფლებები“ გულისხმობს ყველა რეგისტრირებულ ან არარეგისტრირებულ ინტელექტუალური საკუთრების უფლებას მთელ მსოფლიოში, მათ შორის საპატენტო უფლებებს, საავტორო უფლებებს, უფლებებს სასაქონლო ნიშნებზე, კომერციულ საიდუმლოებებზე, დიზაინებზე, მონაცემთა ბაზებზე, დომენის სახელებსა და პირად არაქონებრივ უფლებებზე.

„NAM“ გულოისხმობს ეროვნულ არბიტრაჟსა და შუამდგომლობას.

„OpenAI-ის ხელშემკვრელი მხარე“ გულისხმობს: (ა) OpenAI OpCo, LLC-ს, იმ მომხმარებლებისთვის, რომლებიც მდებარეობენ EEA-ის ან შვეიცარიის ფარგლებს გარეთ; (ბ) OpenAI Ireland Ltd.-ს, იმ მომხმარებლებისთვის, რომლებიც მდებარეობენ EEA-ში ან შვეიცარიაში; ან (გ) OpenAI Public Sector, LLC-ს, თუ მითითებულია შეკვეთის ფორმაში.

„OpenAI-ის პოლიტიკები“ გულისხმობს სერვისის სპეციფიკურ პირობებს, გაზიარებისა და გამოქვეყნების პოლიტიკას და გამოყენების პოლიტიკებს. OpenAI-ის პოლიტიკების ის ვერსია, რომელიც ვრცელდება მომხმარებელზე, არის ის ვერსია, რომელიც ძალაშია ხელშეკრულების, მომხმარებლის უახლესი შეკვეთის ფორმის ან სერვისების განახლების ძალაში შესვლის თარიღებს შორის ყველაზე ბოლო თარიღში. თუ მომხმარებელი გადაწყვეტს გამოიყენოს ახალი სერვისები, რომლებიც სერვისის სპეციფიკურ პირობებს დაემატა წინა წინადადებაში მითითებული ძალაში შესვლის ბოლო თარიღის შემდეგ, მაშინ გამოყენებული იქნება OpenAI-ის პოლიტიკები, რომლებიც მოქმედებს მომხმარებლის მიერ ასეთი გამოყენების მომენტისთვის.

„შეკვეთის ფორმა“ გულისხმობს: (ა) OpenAI-სგან შეძენისას, შეკვეთის დოკუმენტს, რომელსაც ხელს აწერენ მომხმარებელი და OpenAI, ან OpenAI-ის ვებგვერდს, რომელსაც მომხმარებელი იყენებს სერვისების შესაძენად; ან (ბ) გადამყიდველისგან შეძენისას, შეკვეთის დოკუმენტს, რომელსაც ხელს აწერენ მომხმარებელი და მისი გადამყიდველი, ან გადამყიდველის ვებგვერდს, რომელსაც მომხმარებელი იყენებს სერვისების შესაძენად.

„შედეგი“ გულისხმობს სერვისებიდან მიღებულ შედეგს, რომელიც ეფუძნება შეყვანილ მონაცემებს.

„ნებადართული გამონაკლისი“ გულისხმობს მომხმარებლის მიერ გამომავალი შედეგის გამოყენებას შემდეგი მიზნებისთვის: (ა) ხელოვნური ინტელექტის მოდელების შემუშავება, რომლებიც ძირითადად განკუთვნილია მონაცემების კატეგორიზაციისთვის, კლასიფიკაციისთვის ან ორგანიზებისთვის (მაგ., ჩაშენებები ან კლასიფიკატორები), იმ პირობით, რომ ეს მოდელები არ ვრცელდება და არ ხდება კომერციულად ხელმისაწვდომი მესამე პირებისთვის; და (ბ) OpenAI-ის დამატებითი ვარჯიშის ან ფასების გვერდზე მითითებული სხვა სერვისების ფარგლებში მოწოდებული მოდელების დამატებითი ვარჯიში ან მორგება.

“პერსონალური მონაცემები” განიმარტება DPA-ში მოცემული განმარტების შესაბამისად.

„ფასების გვერდი“ გულისხმობს გვერდებს, რომლებიც ხელმისაწვდომია ბმულზე: https://openai.com/api/pricing ან https://openai.com/chatgpt/pricing⁠(იხსნება ახალ ფანჯარაში).

„დაცული ჯანმრთელობის ინფორმაცია“ განსაზღვრულია HIPAA-ის კონფიდენციალურობის წესით (45 C.F.R. Section 160.103).

„მიმღები“ გულისხმობს მხარეს, რომელიც იღებს კონფიდენციალურ ინფორმაციას გამმჟღავნებლისგან.

„განახლების ვადა“ გულისხმობს სერვისების განახლების ვადას, რომელიც მოჰყვება საწყის ვადას ან წინა განახლების ვადას. გაითვალისწინეთ, რომ თუ მომხმარებელი განახლებას განახორციელებს ახალი შეკვეთის ფორმის გარეშე, აღნიშნული განახლების ვადის ხანგრძლივობა იქნება იგივე, რაც უშუალოდ წინა საწყისი ვადის ან განახლების ვადის ხანგრძლივობა.

„შეზღუდული მხარეების სია“ ნიშნავს აშშ-ის საგარეო აქტივების კონტროლის ოფისის („OFAC“) სპეციალურად განსაზღვრული მოქალაქეების სიას (ასევე ცნობილი როგორც „SDN სია“), აშშ-ის მრეწველობისა და უსაფრთხოების ბიუროს („BIS“) აკრძალულ პირთა სიასა და სუბიექტების სიას, აგრეთვე ნებისმიერ სხვა მოქმედ შეზღუდული მხარეების სიას, რომელიც გამოცემულია OFAC-ის, BIS-ის ან მსგავსი იურისდიქციის მქონე სხვა უწყებების მიერ, აშშ-ის შიგნით ან მის ფარგლებს გარეთ, ამჟამად ან მომავალში.

„უკუინჟინერია“ ნიშნავს უკუასემბლირებას, უკუკომპილირებას, დეკომპილირებას, თარგმნას, მოდელის ექსტრაქციაში ან მოპარვის შეტევებში ჩართვას, ან სხვაგვარად მცდელობას, აღმოჩენილ იქნეს სერვისების, ალგორითმებისა და სერვისების სისტემების საწყისი კოდი ან სძირითადი კომპონენტები (გარდა იმ შემთხვევებისა, როდესაც ეს შეზღუდვები ეწინააღმდეგება მოქმედ კანონმდებლობას).

„უსაფრთხოების საგანგებო შემთხვევა“ გულისხმობს სერვისების გამოყენებას მომხმარებლის ან მისი საბოლოო მომხმარებლის მიერ, რამაც გონივრულ ფარგლებში შეიძლება გამოიწვიოს უსაფრთხოების რისკი, ზიანის მიყენების სარწმუნო რისკი, მესამე მხარის უფლებების დარღვევა ან პასუხისმგებლობა OpenAI-ის, სერვისების ან მესამე მხარის წინაშე.

„უსაფრთხოების ზომები“ გულისხმობს უსაფრთხოების ზომებს, რომლებიც ხელმისაწვდომია შემდეგ ბმულზე: https://cdn.openai.com/osa/security-measures.pdf⁠(იხსნება ახალ ფანჯარაში)

„სერვისის კრედიტები“ გულისხმობს, სერვისებთან მიმართებით, მომხმარებლის მიერ შეძენილ კრედიტებს ან OpenAI-ის მიერ მომხმარებლისთვის მიწოდებულ სააქციო კრედიტებს.

„სერვისის კრედიტების პირობები“ გულოისხმობს პირობებს, რომლებიც ხელმისაწვდომია შემდეგ ბმულზე: https://openai.com/policies/service-credit-terms.

„სერვისები“ გულისხმობს OpenAI-ის სერვისებს ბიზნესებისთვის, საწარმოებისთვის ან დეველოპერებისთვის, რომლებიც ხელმისაწვდომია შესაძენად ან გამოსაყენებლად მომხმარებლის ანგარიშში, OpenAI-ის ნებისმიერ დაკავშირებულ პროგრამულ უზრუნველყოფასთან, ინსტრუმენტებთან, დეველოპერულ სერვისებთან, დოკუმენტაციასა და ვებსაიტებთან ერთად, მაგრამ არ მოიცავს მესამე მხარის არცერთ სერვისს.

„სერვისების მიწოდების ვადა“ გულისხმობს საწყის ვადასა და განახლების ყველა ვადას.

„სერვისის სპეციფიკური პირობები“ გულისხმობს პირობებს, რომლებიც სპეციფიკურია გარკვეული სერვისებისთვის და მოცემულია შემდეგ ბმულზე: https://openai.com/policies/service-terms.

„სერვისების სპეციფიკურ პირობებში გათვალისწინებული პასუხისმგებლობისგან გათავისუფლება“ ნიშნავს OpenAI-ის პასუხისმგებლობისგან გათავისუფლებას, რომელიც შედის სერვისების სპეციფიკურ პირობებში.

„გაზიარებისა და გამოქვეყნების პოლიტიკა“ გულისხმობს პირობებს, რომლებიც მოცემულია ბმულზე: https://openai.com/policies/sharing-publication-policy.

„დაწყების თარიღი“ ნიშნავს თარიღს, როდესაც იწყება საწყისი ვადა ან განახლების ვადა. დაწყების თარიღები მითითებულია შეკვეთის ფორმაში. გაითვალისწინეთ, რომ თუ მომხმარებელი განახლებას განახორციელებს ახალი შეკვეთის ფორმის გარეშე, ამ განახლების ვადის დაწყების თარიღი გამოითვლება თავდაპირველი დაწყების თარიღის საფუძველზე.

“მხარდაჭერილი ქვეყნები და ტერიტორიები” გულისხმობს ქვეყნებსა და ტერიტორიებს, რომლებშიც OpenAI უზრუნველყოფს წვდომას API სერვისებსა და ჩვენს ChatGPT სერვისებზე. ეს ქვეყნები და ტერიტორიები ხელმისაწვდომია შემდეგ ბმულზე: https://help.openai.com/articles/5347006-openai-api-supported-countries-and-territories⁠(იხსნება ახალ ფანჯარაში) (API-სთვის) ან https://help.openai.com/articles/7947663-chatgpt-supported-countries⁠(იხსნება ახალ ფანჯარაში) (ChatGPT‑სთვის), და შეიძლება დროდადრო განახლდეს.

„ვადა“ გულისხმობს ხელშეკრულების ვადას, რომელიც დაიწყება ძალაში შესვლის თარიღიდან და გაგრძელდება იმ თარიღამდე, რომელიც უფრო ადრე დადგება: (i) სერვისების მიწოდების ვადის დასრულება; ან (ii) ხელშეკრულების შეწყვეტა წინამდებარე ხელშეკრულებით დადგენილი წესით.

„მესამე მხარის სერვისები“ გულისხმობს პროდუქტებს, სერვისებს ან კონტენტს, რომლებსაც OpenAI-ის გარდა სხვა მხარეები სერვისების საშუალებით სთავაზობენ.

„მესამე მხარის სერვისის პირობები“ გულისხმობს ნებისმიერ დამატებით პირობებს, რომლებიც ვრცელდება მესამე მხარის სერვისზე.

„გამოყენების ლიმიტები“ გულისხმობს საბოლოო მომხმარებლის, შეტყობინებების, token-ის, მწარმოებლურობის მაჩვენებლის ან სხვა ლიმიტებს მომხმარებლის მიერ სერვისების გამოყენებაზე, როგორც აღწერილია შესაბამის შეკვეთის ფორმაში ან დოკუმენტაციაში.

„გამოყენების პოლიტიკები“ ნიშნავს გამოყენების პოლიტიკებს ბმულზე: https://openai.com/policies/usage-policies.

„ადგილმდებარეობა“ გულისხმობს: (ა) ევროპის ეკონომიკურ ზონაში, შვეიცარიაში ან გაერთიანებულ სამეფოში მყოფი მომხმარებლების შემთხვევაში — დუბლინის, ირლანდიის სასამართლოებს; და (ბ) ყველა სხვა მომხმარებლების შემთხვევაში — კალიფორნიის შტატის სან-ფრანცისკოს ოლქში მდებარე ფედერალურ ან შტატის სასამართლოებს.