ვქმნით რეკლამას იმის მიხედვით, თუ როგორ იყენებენ ადამიანები AI-ს
ვიზუალური რეკლამის ახალი ფორმატი ადამიანებს პროდუქტებისა და სერვისების გაცნობაში ეხმარება, გაზომვის გაფართოებული შესაძლებლობები კი ბიზნესებს რეკლამის გავლენას უკეთ აჩვენებს.
ChatGPT‑ში ვიზუალური რეკლამის ახალ ფორმატს ვნერგავთ, ვაფართოებთ შედეგების გაზომვის ხელსაწყოებსა და პარტნიორობებს და ვქმნით ახალ გზებს იმის შესაფასებლად, რამდენად შესაფერისია სარეკლამო კონტექსტი ბრენდისთვის.
ChatGPT‑ს ყოველკვირეულად 1,2 მილიარდი ადამიანი იყენებს, რაც მას მსოფლიოში უდიდეს, უშუალოდ ხელოვნურ ინტელექტზე დაფუძნებულ სამომხმარებლო პლატფორმად აქცევს. რეკლამა გვეხმარება, ხელოვნური ინტელექტის სარგებელი მეტი ადამიანისთვის გავხადოთ ხელმისაწვდომი. ასეთი ფართო ხელმისაწვდომობა ჩვენი მისიის უმთავრესი ნაწილია და ჩვენი ბიზნესის ძლიერი მხარეც. ეს საშუალებას გვაძლევს, ბევრად უფრო დიდ ბაზარს მოვემსახუროთ, ვიდრე მხოლოდ გამოწერებით შევძლებდით. ამავე დროს, ბიზნესებს ვთავაზობთ ადამიანებთან დაკავშირების ახალ გზას მაშინ, როცა ისინი იდეებს იკვლევენ, გადაწყვეტილებებს იღებენ და თავიანთი მიზნებისთვის შესაფერის პროდუქტებსა და სერვისებს აღმოაჩენენ.
ჩვენი ახალი ვიზუალური რეკლამის ფორმატი ადამიანებს ეხმარება წარმოიდგინონ, როგორ გამოიყენებენ პროდუქტებსა და სერვისებს თავიანთ ცხოვრებაში. სურათები, რომლებიც პროდუქტთან დაკავშირებულ იდეებს, მისი გამოყენების გზებსა თუ მისგან მიღებულ შთაბეჭდილებებს ასახავს, ადამიანებს ახალი ბრენდის აღმოჩენაში, შეთავაზების გამორჩეულობის დანახვასა და საყიდლის შერჩევაში ეხმარება. რეკლამის განმთავსებლებისთვის ეს სურათებით საკუთარი ამბის მოყოლის ახალ შესაძლებლობებს ქმნის.
თავდაპირველად რეკლამის ამ ახალ ფორმატს ChatGPT‑ში სურათის გენერირებისას გამოვცდით. რეკლამას მკაფიო აღნიშვნა ექნება და შექმნის პროცესში მყოფი სურათისგან განცალკევებული დარჩება. ჩვენი სხვა სარეკლამო ფორმატების მსგავსად, რეკლამა გავლენას არ ახდენს ChatGPT‑ის პასუხებზე.
ტესტირება ამავე თვის განმავლობაში აშშ-ში, რეკლამის განმთავსებელთა საწყის ჯგუფთან დაიწყება.
ChatGPT‑რეკლამების შედეგების გაზომვის ჩვენი მიდგომა ორიენტირებულია როგორც შიდა, ისე პარტნიორების მიერ შემუშავებული გადაწყვეტების მხარდაჭერაზე. დღეს ვაფართოებთ შედეგების გაზომვის ხელსაწყოებსა და პარტნიორთა ეკოსისტემას, რათა რეკლამის განმთავსებლებმა მათთვის ნაცნობი სისტემებით შეაფასონ, რა წვლილი შეაქვს ChatGPT‑რეკლამებს მათ ბიზნესში.
Hightouch-თან, Tealium-სა და LiveRamp-თან ინტეგრაციები რეკლამის განმთავსებლებს უადვილებს არსებული სისტემებიდან კონვერსიის მონაცემების ChatGPT‑რეკლამებში გაგზავნას.
ახლა მხარს ვუჭერთ ატრიბუციის წამყვან პარტნიორებს ვებსივრცესა და აპებში. ისეთ კომპანიებთან ერთად, როგორებიცაა AppsFlyer, Triple Whale, Adjust, DV Rockerbox, Northbeam, Branch, Singular, Kochava, Airbridge და Tenjin, ხელმისაწვდომს ვხდით კონვერსიების API-ს, ანგარიშგებისა და დაწკაპუნებების ატრიბუციის გადაწყვეტებს. ასევე ვთანამშრომლობთ კომპანიებთან, რომლებიც მომხმარებლის მთელ გზაზე შედეგების გაზომვასა და შეფასების მოწინავე მეთოდებზე მუშაობენ, მათ შორისაა Fospha, Measured და INCRMNTAL.
რეკლამით გამოწვეული დამატებითი ეფექტის გაზომვა მნიშვნელოვან როლს ასრულებს ბიზნესზე რეკლამის გავლენის სრულფასოვნად გააზრებაში. დამატებითი ეფექტის გაზომვაზე მუშაობა ჯერ საწყის ეტაპზეა, თუმცა Haus-თან, Measured-სა და WorkMagic-თან ერთად ვიკვლევთ გეოგრაფიულ ექსპერიმენტებს, რათა რეკლამის განმთავსებლებს ChatGPT‑რეკლამების მიზეზშედეგობრივი გავლენის გაგებაში დავეხმაროთ.
პარტნიორების საწყისი მიგნებები გაზომვის სხვადასხვა მეთოდის გამოყენებისას მაღალ ეფექტიანობაზე მიუთითებს. DV Rockerbox-ის მონაცემებით, WeightWatchers-ის მიერ ChatGPT‑რეკლამებისთვის მიკუთვნებული მომხმარებლის მოზიდვის ღირებულება 15,3%-ით დაბალი იყო, ვიდრე ფასიან ძიებაში მისი საშუალო საორიენტაციო მაჩვენებელი. WorkMagic-მა ჯანსაღი ცხოვრების ბრენდ Dose-ისთვის სტატისტიკურად მნიშვნელოვანი ზრდა დააფიქსირა; დამატებითი შესყიდვების 67% სრულიად ახალ მომხმარებლებზე მოდიოდა. Triple Whale-ის მონაცემებით კი, ChatGPT‑რეკლამებიდან Portland Leather-ში გადასული ვიზიტორების 93% ახალი იყო.
შედეგების გაზომვის ამ ხელსაწყოებისა და პარტნიორობების შესახებ ვრცლად წაიკითხეთ ჩვენს სარეკლამო ბლოგზე აქ(იხსნება ახალ ფანჯარაში).
რეკლამისადმი ნდობა იმ გარემოს ცოდნაზეც არის დამოკიდებული, სადაც ის შეიძლება გამოჩნდეს. OpenAI-ის სარეკლამო წესები და დამცავი მექანიზმები შექმნილია მომხმარებელთა დასაცავად, ნდობის შესანარჩუნებლად და ბრენდების დასარწმუნებლად, რომ მათი რეკლამა სათანადოდ განთავსდება. რეკლამის განთავსების ჩვენი დამცავი მექანიზმები აფასებს, რამდენად შესაფერისია საუბარი რეკლამისთვის, რათა ის არ გამოჩნდეს ემოციური მოწყვლადობის, სენსიტიურ ან სხვა შეუსაბამო კონტექსტში.
ავტომატური შემოწმება, ადამიანების ზედამხედველობა და მუდმივი მონიტორინგი გვეხმარება წესების დარღვევების გამოვლენასა და აღმოფხვრაში, ასევე დამცავი მექანიზმების თანდათან გაუმჯობესებაში. ბრენდის შიდა წესებით განსაზღვრული სპეციფიკური მოთხოვნების დასაცავად, შესაბამისი კრიტერიუმების მქონე რეკლამის განმთავსებლებისთვის უკვე ხელმისაწვდომია ფუნქცია „გამოსარიცხი ფრაზები“.
DoubleVerify-სა (DV) და Integral Ad Science-თან (IAS) ერთად ასევე ვამუშავებთ საპილოტე პროექტებს ბრენდისთვის კონტექსტის შესაფერისობის შესაფასებლად, რათა რეკლამის განმთავსებლებს სარეკლამო გარემოს უკეთ გაგებაში დავეხმაროთ. ეს მიდგომა დამოუკიდებელ პარტნიორებს საშუალებას აძლევს, კონტროლირებად სატესტო გარემოში შეაფასონ ჩვენი ბრენდის უსაფრთხოების სტანდარტების გამოყენება ისე, რომ მომხმარებელთა პირად საუბრებზე წვდომა არ ჰქონდეთ. ჩვენი მიზანია, რეკლამის განმთავსებლებისთვის უფრო გამჭვირვალე გავხადოთ ამ დამცავი მექანიზმების მუშაობა ისე, რომ საუბრების კონფიდენციალურობა დავიცვათ.
„ხელოვნურ ინტელექტზე დაფუძნებულ გარემოებში რეკლამის გავრცელებასთან ერთად, მარკეტერებს სჭირდებათ რწმენა, რომ ბრენდის უსაფრთხოების მექანიზმები მდგრადია, თანმიმდევრულად მუშაობს და დიდ მასშტაბებზეა გათვლილი. IAS დამოუკიდებლად შეაფასებს, როგორ მუშაობს OpenAI-ის დამცავი მექანიზმები მრავალფეროვან და მუდმივად ცვალებად სცენარებში. ეს რეკლამის განმთავსებლებს ბრენდის უსაფრთხოებისა და მისთვის კონტექსტის შესაფერისობის შესახებ მეტ სიცხადეს მისცემს, რეალური მომხმარებლების საუბრების კონფიდენციალურობის დაცვით.“
„ChatGPT ფუნდამენტურად განსხვავებულ სარეკლამო გარემოს ქმნის, სადაც კონტექსტს თავად საუბარი განსაზღვრავს და არა გვერდი ან ვიდეო. ასეთ გარემოებში რეკლამის მასშტაბის ზრდასთან ერთად აუცილებელი ხდება, რეკლამა იმ საუბრებთან გამოჩნდეს, რომლებიც განმთავსებლების მოთხოვნებს შეესაბამება. მოხარული ვართ OpenAI-სთან პარტნიორობით. ჩვენი მიზანია, ამ დინამიკურ გარემოში დამოუკიდებელი გაზომვა დავნერგოთ მომხმარებელთა კონფიდენციალურობის დაცვით და რეკლამის განმთავსებლებს მეტი თავდაჯერება შევძინოთ ამ ახალი და პერსპექტიული არხის ათვისებისას.“
ჩვენი ახალი ვიზუალური რეკლამის ფორმატი ადამიანებს პროდუქტებისა და სერვისების აღმოჩენაში ეხმარება და წარმოდგენას უქმნის, თუ როგორ გამოიყენებენ მათ ცხოვრებაში. ამავე დროს, რეკლამის განმთავსებლებს ამბის ვიზუალურად გადმოცემის ახალ გზებს სთავაზობს. ChatGPT‑რეკლამებში შედეგების გაზომვისა და ბრენდისთვის შესაფერისი კონტექსტის შეფასების გაფართოებული შესაძლებლობები ბიზნესებს კამპანიის გავლენის გააზრებაში ეხმარება და მეტ თავდაჯერებას სძენს იმის თაობაზე, თუ სად გამოჩნდება მათი რეკლამა. ეს ფუნქციები ჩვენს სარეკლამო პრინციპებს შეესაბამება: ChatGPT‑ის პასუხები დამოუკიდებელი რჩება, საუბრები — კონფიდენციალური, ხოლო მომხმარებლები კვლავ თავად აკონტროლებენ სერვისით სარგებლობის პროცესს.
დღევანდელი სიახლეები ჩვენი უფრო ფართო მიზნის ნაწილია: დავეხმაროთ ადამიანებს ChatGPT‑ში პროდუქტებისა და სერვისების აღმოჩენაში, ვარიანტების შეფასებასა და გადაწყვეტილებების მიღებაში. ჩვენ გავაგრძელებთ სარეკლამო პლატფორმის განვითარებას ახალი ფორმატებითა და შესაძლებლობებით, რათა ბიზნესებმა მომხმარებლებს მათთვის სასარგებლო და რელევანტური გზებით მიაწვდინონ ხმა, ნებისმიერი ზომის კომპანიას კი ზრდისა და წარმატების შესაძლებლობა ჰქონდეს.
ბიზნესებს რეკლამის განსათავსებლად რეგისტრაცია დღესვე შეუძლიათ მისამართზე ads.openai.com(იხსნება ახალ ფანჯარაში).
