Mas magagandang sagot, mas malawak na pag-iisip: Pakinabang sa ChatGPT at critical-thinking training

Ano ang nangyayari kapag gumagamit ang mga estudyante ng ChatGPT sa isang gawain sa totoong buhay? Nababawasan ba ang originalityd kapalit ng paghusay ng kalidad?

Natuklasan sa isang bagong eksperimento ng mga mananaliksik sa Bocconi University, sa pakikipagtulungan sa OpenAI Economic Research, na may magkakaiba pero magkakatugmang epekto ang paggamit ng ChatGPT at training sa kritikal na pag-iisip. Pinahusay ng access sa ChatGPT ang kalidad at lohikal na pagkakaugnay ng mga gawa ng estudyante, habang ang pagsasanay sa causal reasoning—na isang uri ng kritikal na pag-iisip—ay nakatulong sa kanilang makabuo ng mga mas natatanging ideya. Parehong nakita ang mga epektong ito sa mga estudyanteng binigyan ng access sa ChatGPT at sa training.

Binibigyang-diin din ng mga resulta ang kahalagahan ng pangkabuuang diskarte ng pagtatasa sa pag-usad ng estudyante. Dahil pinapadali ng AI para sa mga estudyante ang paggawa ng mahuhusay na sagot, maaaring kailangang iangkop ang mga gawain para masukat ang iba pang hinahangad na katangian, gaya ng originality. 

Sa eksperimento, mahigit 1,000 estudyante sa unang taon sa Bocconi University ang gumawa ng isang totoong sitwasyon sa negosyo, at bumuo sila ng mga rekomendasyon sa marketing para sa merchandise store ng unibersidad.

Random na itinalaga ang mga estudyante ayon sa oras ng klase sa isa sa apat na grupo na nakatanggap ng: access sa ChatGPT (GPT‑4o), training sa causal reasoning, pareho, o wala. Ang causal reasoning ay isang partikular na uri ng kritikal na pag-iisip na may kinalaman sa pag-uugnay ng sanhi at bunga at nagpapaliwanag kung bakit maaaring gumana o hindi gumana ang isang partikular na solusyon. Walang kaugnayan sa AI ang pagsasanay na natanggap ng mga estudyante. Sa halip, itinuro nito ang mga konsepto ng causal reasoning sa pamamagitan ng pagsasanay na may kasamang laro, mga halimbawa, mga tanong, at feedback. 

Sinuri ng mga sinanay na taong tagapagtasa ang mga isinumite ng estudyante gamit ang rubric na may limang punto. Bukod dito, gumamit ang mga mananaliksik ng naka-automate na pagsusuri ng text para sukatin ang dami at pagkakaiba-iba ng mga ideya sa bawat isinumite, mga palatandaan ng causal reasoning, at pagkakatulad sa mga isinumite ng tatlong eksperto. 

Halos isang buong puntos na mas mataas sa limang puntong scale ang nakuha ng mga estudyanteng may access sa ChatGPT. Mas maraming ideya ang nilalaman ng kanilang mga sagot, mas malinaw ang lohika ng mga ito, at mas katulad ang mga ito ng mga rekomendasyong isinulat ng mga eksperto. Sa madaling salita, nakatulong ang AI sa mga baguhan na gumawa ng trabahong mas mukhang propesyonal. Mahalagang tandaan na hindi basta ipinapagawa ng mga estudyante sa ChatGPT ang kanilang mga takdang-aralin. Kailangan pa rin nilang magpasya kung ano ang itatanong, suriin ang mga tugon, at piliin kung ano ang isasama sa kanilang pinal na isusumite. 

Nagbunga ng mas hindi inaasahang resulta ang training sa kritikal na pag-iisip. Mas malinaw na naipaliwanag ng mga estudyanteng tumapos sa pagsasanay kung bakit maaaring gumana ang kanilang mga ideya at kung kailan maaaring hindi. Gayunpaman, hindi tumaas ang kanilang marka sa rubric, na ang sinukat lang ay kung gaano kahusay natugunan ng mga rekomendasyon ang dalawang karaniwang layunin sa marketing: ang palawakin ang kaalaman at paggamit sa store ng unibersidad.

May isa pang pakinabang na natuklasan sa pagsusuri ng teksto na hindi nasukat ng rubric. Sa kabuuan ng grupo, ang mga estudyanteng nakatapos sa pagsasanay ay nakabuo ng mas maraming iba't ibang ideya na mas naiiba kumpara sa mga ginawa ng kanilang mga kapwa estudyante. Mahalaga ito dahil maaaring gantimpalaan ng isang tradisyonal na rubric, gaya ng ginamit sa pagmamarka sa mga estudyante sa eksperimentong ito, ang malinaw at maayos na sagot pero posibleng hindi nito mapansin kung nakaisip ang isang estudyante ng ideya na walang ibang nakaisip.

Madaling ilarawan ang debate sa edukasyon bilang pagdedesisyon kung dapat bang matutong mag-isip nang mag-isa ang mga estudyante o kung dapat ba silang matutong gumamit ng AI.

Binibigyang-diin ng ng eksperimentong ito na parehong mahalaga ang dalawa sa magkaibang paraan. Nakatulong ang paggamit ng AI sa mga estudyante na makagawa ng mga sagot na mas mahusay, mas hitik sa ideya, at mas lohikal na magkakaugnay. Sa training sa kritikal na pag-iisip, nahikayat silang bumuo ng mas malawak na hanay ng mga orihinal na ideya, kuwestyunin ang mga palagay, at ipaliwanag kung bakit dapat gumana ang kanilang mga ideya.

Kapag pinagsama, magkakatugma ang mga ito. 

Ipinakita ang mga pakinabang ng bawat isa ng mga estudyanteng binigyan ng access sa ChatGPT at sa training sa kritikal na pag-iisip. Ang pagkakaiba-iba ng kanilang mga ideya ay katulad ng sa mga estudyante na pagsasanay lang ang tinapos. Ang kanilang mga marka sa rubric at dami ng ideya ay katulad ng sa mga estudyanteng access lang sa ChatGPT ang natanggap. Nagpakita rin ang kanilang gawa ng mas matibay na lohikal na pagkakaugnay at mas maraming katibayan ng paghahanap ng mga paliwanag at pagkuwestyon sa mga palagay. Sa kabuuan, umunlad ang grupong ito sa pinakamalawak na hanay ng mga sukatan. 

Dahil randomized ang disenyo ng eksperimento, masusing nasuri ng mga mananaliksik ang iba't ibang salik na ito at naihiwalay ang mga epekto ng paggamit ng ChatGPT at ng training sa kritikal na pag-iisip mula sa epekto ng pagsasama ng mga ito. Dahil dito, partikular na kapaki-pakinabang ang ambag ng eksperimento sa mabilis na lumalawak na pananaliksik tungkol sa epekto ng AI sa mga estudyante at sa pinakamainam na paraan ng pagbuo at pagsuporta sa kanilang pagkatuto. 

Itinuturo ng pagkakaiba ng epekto ng pagsasanay sa mga estudyante at ng nasukat ng tradisyonal na rubric ang isang mas malawak na hamong kinakaharap ng mga paaralan. 

Kung makakatulong ang AI sa mga estudyante na gumawa ng trabahong mahusay at parang gawa ng eksperto, mas kaunti ang masasabi ng pagtingin lang sa pinal na sagot tungkol sa tunay na nauunawaan ng isang estudyante. 

Maraming guro ang nagsisimula nang humarap sa implikasyon na maaaring kailangang baguhin ang mga gawain at pagtatasa. Bahagi ito ng ilang dekada ng sabay na pag-unlad ng teknolohiya at edukasyon para suportahan ang mga kasanayang kailangan ng mga estudyante sa makabagong lipunan.

Binibigyang-diin ng mga resultang ito ang kahalagahan ng pagbibigay ng gantimpala sa mga estudyante para sa gawang nagpapakita ng originality, pangangatwiran, at pagsasaalang-alang sa maraming paraan, hindi lang sa pinakakaraniwan o pinakamahusay na mga sagot. 

Ang pangunahing aral: Nakatulong ang AI sa mga estudyante na paghusayin ang kanilang mga sagot. Nakatulong ang training sa kritikal na pag-iisip para mapalawak ang kanilang mga ideya. Magkaiba pero magkatugma ang papel ng dalawa sa paghahanda sa mga estudyante para sa hinaharap.