OpenAI

చిలీ కోసం OpenAI పరిచయం

చిలీ ప్రభుత్వంతో భాగస్వామ్యంగా, ఆ దేశ విజ్ఞానశాస్త్రం, సాంకేతికత, జ్ఞానం, ఆవిష్కరణల మంత్రిత్వ శాఖ నేతృత్వంలో నేడు ‘చిలీ కోసం OpenAI’ కార్యక్రమాన్ని ప్రారంభిస్తున్నాం. ప్రభుత్వ పాలనలో బాధ్యతాయుత AI వినియోగానికి మద్దతివ్వడం, ప్రభుత్వ సిబ్బంది నైపుణ్యాలను పెంపొందించడం, ఉపయోగకరమైన AI అనువర్తనాలను అభివృద్ధి చేయడంలో స్థానిక అంకుర సంస్థలకు తోడ్పడటం దీని లక్ష్యాలు.

ప్రతిభా వికాసం, పరిశోధన, బాధ్యతాయుత వినియోగానికి మద్దతిచ్చే చిలీ జాతీయ AI విధానం, కార్యాచరణ ప్రణాళిక⁠(కొత్త విండోలో తెరుచుకుంటుంది)ను ఈ భాగస్వామ్యం మరింత ముందుకు తీసుకెళ్తుంది.

కాలిఫోర్నియాలో సెమాఫోర్ నిర్వహించిన ‘సిలికాన్ వ్యాలీ & ప్రపంచం’ సదస్సు సందర్భంగా ఈ అవగాహన ఒప్పందంపై సంతకాలు జరిగాయి. చిలీ తరఫున మంత్రి హిమెనా లింకోలావో ఈ ఒప్పందానికి నేతృత్వం వహించారు.

ఈ భాగస్వామ్యానికి అమెరికా వాణిజ్య శాఖకు చెందిన అమెరికన్ ఎస్‌ఐ ఎగుమతుల కార్యక్రమం⁠(కొత్త విండోలో తెరుచుకుంటుంది) మద్దతిస్తోంది. ఇందులో OpenAI ప్రధాన భాగస్వామిగా ఉంది. ప్రభుత్వ రంగంలో ఆవిష్కరణలు, నైపుణ్యాభివృద్ధి, వ్యవస్థాపకత ద్వారా చిలీ తన AI ఆశయాలను సాధించే దిశగా ముందుకు సాగేందుకు ఈ కార్యక్రమం తోడ్పడుతోంది.

“శాస్త్రీయ ఆవిష్కరణలను వేగవంతం చేయడం నుంచి మనం ఇంకా ఊహించని వాటిని సృష్టించడంలో ప్రజలకు తోడ్పడటం వరకు, ప్రజల జీవితాలను మెరుగుపరిచే అత్యంత ముఖ్యమైన మార్గాల్లో కృత్రిమ మేధస్సు ఒకటి కానుంది. ప్రభుత్వ సిబ్బంది ఈ సాధనాలను ఉపయోగించేందుకు సహకరించడం, ప్రజా సేవలను మెరుగుపరచడం, కొత్త కంపెనీలను స్థాపించే వ్యాపారవేత్తలకు మద్దతు ఇవ్వడం కోసం చిలీతో కలిసి పనిచేయడం నాకు ఎంతో ఉత్సాహాన్నిస్తోంది. ప్రపంచంలోని అత్యంత ముఖ్యమైన సమస్యల్లో కొన్నింటిని చిలీ అంకుర సంస్థలు పరిష్కరించి, అన్ని ప్రాంతాల ప్రజలకు మేలు చేసే వాటిని సృష్టించడం చూడాలని ఆసక్తిగా ఎదురుచూస్తున్నాను.”
—సామ్ ఆల్ట్‌మన్, ముఖ్య కార్యనిర్వహణాధికారి, OpenAI
“ఈ సహకారం, చిలీ అంతటా శాస్త్రీయ ఆవిష్కరణలు, వ్యవస్థాపకత, నవకల్పనలకు ఇది తెరిచే అపూర్వ అవకాశాలు మాకు ఎంతో ఉత్సాహాన్నిస్తున్నాయి. సాధ్యమయ్యే వాటి పరిధిని విస్తరించడానికి, కొత్త సాంకేతికతలను సృష్టించడానికి, ప్రజల జీవితాలను మెరుగుపరిచే పరిష్కారాలను అభివృద్ధి చేయడానికి చిలీ ప్రజలను శక్తిమంతం చేయడమే దీని ఉద్దేశం.”
—హిమెనా లింకోలావో, చిలీ విజ్ఞానశాస్త్రం, సాంకేతికత, జ్ఞానం, ఆవిష్కరణల శాఖ మంత్రి

చిలీలో AIని ఆచరణలోకి తీసుకురావడం

మంత్రిత్వ శాఖ పాలనా ప్రక్రియల్లో సాంకేతికతను వినియోగించే అవకాశాలను ఈ భాగస్వామ్యం పరిశీలిస్తుంది. కొత్త నమూనాలను స్వీకరించడంలో OpenAI నుంచి లభించగల సహకారంతో పాటు, మంత్రిత్వ శాఖ సిబ్బందికి సలహాలు, శిక్షణ అందించడం కూడా ఇందులో భాగం.

ప్రభుత్వ సిబ్బందికి వారి విధులకు అనుగుణంగా ఆచరణాత్మక AI అవగాహన కల్పించడం, ప్రస్తుత నైపుణ్యాలను మెరుగుపరచడం, కొత్త నైపుణ్యాల్లో శిక్షణ ఇవ్వడం వంటి అవకాశాలను ఈ భాగస్వామ్యం పరిశీలిస్తుంది. కార్యశాలలు, శిక్షకులకు శిక్షణ ఇచ్చే విధానం వంటి కార్యకలాపాలు ఇందులో ఉండవచ్చు. AI సాధనాలను సమర్థంగా ఉపయోగించడం, అవి ఇచ్చే ఫలితాలను తనిఖీ చేయడం, సున్నితమైన సమాచారాన్ని రక్షించడం, మానవ పర్యవేక్షణను కొనసాగించడం వంటి అంశాలను ఇవి కవర్ చేయవచ్చు.

చిలీలోని AI అంకుర సంస్థలు, ఆవిష్కరణల వ్యవస్థకు మద్దతుగా, సంబంధిత OpenAI కార్యక్రమాలు, సాంకేతికతను అందుబాటులోకి తీసుకురావడం, ఆచరణాత్మక అభ్యసనం, సాంకేతిక మార్గదర్శకత్వం, అనుభవజ్ఞుల సలహాలు అందించడం వంటి అవకాశాలను భాగస్వాములు పరిశీలిస్తారు. చిలీ ఆర్థికాభివృద్ధికి, ప్రజా సేవల ప్రాధాన్యాలకు తోడ్పడే అనువర్తనాలను అభివృద్ధి చేసేందుకు ఈ సహకారం వ్యాపారవేత్తలను ప్రభుత్వ సంస్థలు, విశ్వవిద్యాలయాలు, ఇతర స్థానిక భాగస్వాములతో కూడా అనుసంధానించవచ్చు.

మంత్రిత్వ శాఖ, OpenAI ప్రతినిధులతో కూడిన ఉమ్మడి కార్యదళం ప్రాధాన్యాలు, తొలి కార్యాచరణ ప్రణాళికను పరస్పర అంగీకారంతో ఖరారు చేస్తుందని భావిస్తున్నారు. ప్రతి కార్యకలాపానికి బాధ్యులు, మైలురాళ్లు, విజయాన్ని కొలిచే ప్రమాణాలు ఈ ప్రణాళికలో ఉంటాయి.

నిర్దిష్ట కార్యకలాపాలు, అర్హత, వనరులు, సాంకేతికతను అందుబాటులోకి తీసుకురావడం వంటి అంశాలపై విడిగా అంగీకారానికి వస్తారు. ఈ అవగాహన ఒప్పందం ఎలాంటి పెట్టుబడి లేదా కొనుగోలు నిబద్ధతను నిర్దేశించదు. గోప్యత, సమాచార భద్రత, బాధ్యతాయుత వినియోగం కోసం తగిన రక్షణ చర్యలకు లోబడే కార్యకలాపాలు జరుగుతాయి.

‘దేశాల కోసం OpenAI’ గురించి

‘చిలీ కోసం OpenAI’ అనేది మా ప్రపంచవ్యాప్త కార్యక్రమమైన ‘దేశాల కోసం OpenAI’లో భాగం. దేశాలు తమ జాతీయ ప్రాధాన్యాలను ముందుకు తీసుకెళ్లేందుకు, ఆర్థిక వ్యవస్థలను బలోపేతం చేసేందుకు, అవకాశాలను విస్తరించేందుకు AIని ఉపయోగించుకోవడంలో ఈ కార్యక్రమం తోడ్పడుతుంది. AI సామర్థ్యాన్ని ప్రజలకు ఆచరణాత్మక ప్రయోజనాలుగా మలిచేందుకు మేము ప్రభుత్వాలు, స్థానిక భాగస్వాములతో కలిసి పనిచేస్తాం.

రచయిత

OpenAI