“తప్పుడు నంబర్” కార్యాచరణ: AI సహాయంతో పనుల మోసం
కంబోడియా నుంచి ఉద్భవించి, యూకేలోని ప్రజలను లక్ష్యంగా చేసుకున్న మోసపూరిత ప్రక్రియలకు AIని ఉపయోగించినట్లు భావిస్తున్న ఖాతాలను OpenAI నిషేధించింది.
ఈ కేసు అధ్యయనం మొదట OpenAI జూన్ 2025(కొత్త విండోలో తెరుచుకుంటుంది) నివేదికలో ప్రచురితమైంది.
పాత్రధారి
ఇంగ్లీష్, స్పానిష్, స్వాహిలీ, కిన్యార్వాండా, జర్మన్, హైటియన్ క్రియోల్ భాషల్లో నియామక ప్రకటనలను పోలిన సంక్షిప్త సందేశాలను రూపొందిస్తున్న ChatGPT ఖాతాలను మేము నిషేధించాం. సోషల్ మీడియా పోస్ట్లను ఇష్టపడటం వంటి చిన్న పనులకు అధిక వేతనాలు ఇస్తామని ఈ సందేశాలు గ్రహీతలకు హామీ ఇచ్చి, ఇతరులను చేర్చుకోవాలని ప్రోత్సహించాయి. ఈ కార్యాచరణ అత్యంత కేంద్రీకృతంగా ఉన్నట్లు, బహుశా కంబోడియా నుంచి ప్రారంభమైనట్లు కనిపించింది.
AI ఆధారిత అనువాద సాధనాలను ఉపయోగించి, ఈ ప్రచారం OpenAI సేవలను ఎలా వినియోగిస్తోందో వేగంగా దర్యాప్తు చేసి అడ్డుకోగలిగాం.
ప్రవర్తన
ఈ ముఠా సంభాషణల్లో అధిక భాగం అనువాద పనులకు సంబంధించినవే. చైనీస్ నుంచి అనేక ఇతర భాషలకు, ముఖ్యంగా ఇంగ్లీష్, స్పానిష్, కిన్యార్వాండా, స్వాహిలీ, జర్మన్, హైటియన్ క్రియోల్ భాషలకు సంభాషణ వాక్యాలను అనువదించేందుకు వారు ChatGPTని ఉపయోగించారు. సాధారణంగా ఈ పనుల్లో వచ్చిన సందేశాన్ని చైనీస్లోకి అనువదించడం, ఆపై చైనీస్లోని సమాధానాన్ని తిరిగి అసలు భాషలోకి అనువదించడం వరుసగా జరిగేవి.
ఈ సందేశాల్లో కొన్ని, అతి తక్కువ పనికి అధిక గంట వేతనం ఇస్తామనే ముందస్తు పరిచయం లేని ఉద్యోగ ప్రకటనలను పోలి ఉన్నాయి. అలాంటి ఒక సందేశాన్ని యూకేలో యాదృచ్ఛికంగా ఎంచుకున్నట్లు కనిపించే మొబైల్ ఫోన్ నంబర్లకు SMS ద్వారా పంపారు. వాటిలో ఒకటి OpenAI పరిశోధకుడిది. తొలి SMSను దృష్టిలో ఉంచుకుని ఈ కార్యాచరణకు మేము “తప్పుడు నంబర్” అని పేరు పెట్టాం.
ChatGPTతో రూపొందించి, OpenAI పరిశోధకుడికి యాదృచ్ఛికంగా పంపిన SMS.
ఈ ముప్పు సృష్టికర్తలు అనేక సందేశ వేదికలపై ఆధారపడినట్లు కనిపించింది. తొలి SMS గ్రహీతలను WhatsApp ద్వారా సంప్రదించమని సూచించింది. అక్కడ స్పందించినవారిని Telegramలోని ఒక “మార్గదర్శి” వద్దకు మళ్లించారు. కొంత కార్యకలాపంలో BonChat సందేశ అనువర్తనం ప్రస్తావన కూడా కనిపించింది. ఈ మార్గాల ద్వారా పంపిన తొలి పరిచయ సందేశాలు మా నమూనాలతో రూపొందించినట్లు కనిపించలేదు. అవి దాదాపు ప్రతి సంభాషణకూ సరిపోయే సాధారణ సందేశాలు.
SMSకు కొనసాగింపుగా పంపిన WhatsApp సందేశం. ఈ సందేశం మా నమూనాలతో రూపొందించినట్లు కనిపించడం లేదు.
అనేక అనువాద పనుల్లో, “యజమాని” సంస్థల ప్రతినిధుల నుంచి వచ్చినట్లు చెప్పుకున్న సందేశాలు ఉన్నాయి. ఈ దర్యాప్తు పరిధిలోని అనేక ChatGPT సంభాషణల్లో అవే సంస్థల పేర్లు పదేపదే కనిపించాయి. వాటిలో Hyesung Advertising(కొత్త విండోలో తెరుచుకుంటుంది), Lightning Shared Scooter Co (LSSC)(కొత్త విండోలో తెరుచుకుంటుంది) ఉన్నాయి. బహిరంగ నివేదికలు Hyesung, LSSCలను అనుమానిత పని పథకాలుగా గుర్తించాయి. ఈ సంస్థల స్వభావాన్ని మేము స్వతంత్రంగా నిర్ధారించనప్పటికీ, వాటి నుంచి వచ్చినట్లు చెప్పుకున్న సందేశాలను బహుశా కంబోడియా నుంచి కార్యకలాపాలు నిర్వహిస్తున్న చైనీస్ మాట్లాడే ChatGPT వినియోగదారులు రూపొందించినట్లు మా దర్యాప్తులో తేలింది.
రూపొందించిన అంశాలు
ఈ ముఠా తాము ప్రాతినిధ్యం వహిస్తున్నట్లు చెప్పుకున్న సంస్థలు స్టాక్ వ్యాపారం, స్కూటర్ అద్దె, సోషల్ మీడియా ఇష్టాలను విక్రయించడం వంటి అనేక రంగాలకు చెందినవి. ఒక్క TikTok ఇష్టానికి $5కు పైగా చెల్లిస్తామనడం స్పష్టమైన హెచ్చరిక సంకేతం. దీనికి భిన్నంగా, మేము ఆన్లైన్ మార్కెట్లను స్వయంగా పరిశీలించినప్పుడు కొందరు విక్రేతలు 1,000 సోషల్ మీడియా ఇష్టాలకు $10 కంటే తక్కువ వసూలు చేస్తున్నట్లు తెలిసింది.
వేదిక వెలుపలి సంకేతాలను అంతర్గత పరిశీలనలతో కలిపి, పదేపదే అమలవుతున్న ఒక ప్రక్రియ నమూనాను గుర్తించాం. ఈ ఎత్తుగడపై విస్తృత అవగాహన కల్పించి, దాని వర్గీకరణను సులభతరం చేయడానికి ఈ నమూనాను ఇలా వివరిస్తున్నాం: పలకరింపు (అపరిచిత సంప్రదింపు), ప్రేరణ (ఉత్సాహం కలిగించడం), పీడన (డబ్బు రాబట్టడం):
పలకరింపు (అపరిచిత సంప్రదింపు): ముందస్తు పరిచయం లేనివారిని సంప్రదించేందుకు ఈ ముఠా సందేశాలను రూపొందిస్తుంది. సాధారణంగా అతి తక్కువ పనికి అసాధారణంగా అధిక వేతనం లేదా స్టాక్ మార్కెట్ పెట్టుబడులపై భారీ లాభాలు ఇస్తామని చెబుతుంది. సోషల్ మీడియా పోస్ట్లను ఇష్టపడటం వంటి సులభమైన పనులకు అధిక వేతనం లేదా ఆకర్షణీయమైన పెట్టుబడి అవకాశాలు ఈ ప్రతిపాదనల్లో ఉంటాయి.
ప్రేరణ (ఉత్సాహం కలిగించడం): బహుశా Operatorకు, వారి “ఉద్యోగులకు” మధ్య జరిగే సంభాషణలను ఈ ముఠా అనువదిస్తుంది. ఈ సంభాషణల్లో పనులకు సంబంధించిన నిర్వహణ వివరాలు ఉంటాయి. వాటి మధ్య ఆదాయం, సంభావ్య అదనపు చెల్లింపుల గురించి ప్రోత్సాహక సందేశాలు తరచూ కనిపిస్తాయి.
పీడన (డబ్బు రాబట్టడం): పెద్ద బహుమతులను పొందాలంటే డబ్బు చెల్లించాలని “ఉద్యోగి” లేదా “పెట్టుబడిదారు”పై ఒత్తిడి తెచ్చే సందేశాలను ఈ ముఠా రూపొందిస్తుంది లేదా పంపుతుంది. ఇది తొలి “డిపాజిట్”, క్రిప్టోకరెన్సీ కొనుగోళ్లు, “నిర్వహణ రుసుములు” వంటి అనేక రూపాల్లో ఉంటుంది.
ChatGPTతో రూపొందించి ఈ ముఠా పంపిణీ చేసిన, ముందస్తు పరిచయం లేని సందేశానికి ఉదాహరణ. గ్రహీత పరిచయాల జాబితాలో లేని ఎనిమిది ఫోన్ నంబర్లకు ఈ సందేశాన్ని ఒకేసారి పంపారు. ఒక గ్రహీత వెంటనే సమూహం నుంచి నిష్క్రమించారు.
£20 విలువైన క్రిప్టోకరెన్సీని కొనుగోలు చేసి, పేరు వెల్లడించని వ్యాపారికి బదిలీ చేయాలని సంభావ్య బాధితుడికి సూచిస్తూ ఈ ముఠా పంపిన Telegram సందేశం.
కొత్తగా చేరేవారి నుంచి కొన్ని సంస్థలు భారీ ప్రవేశ రుసుములు వసూలు చేసి, ఆ మొత్తంలో కొంత భాగాన్ని ఇప్పటికే ఉన్న “ఉద్యోగులు” కొనసాగేందుకు సరిపడేంతగా వారికి చెల్లించేవని బహిరంగ నివేదికలు(కొత్త విండోలో తెరుచుకుంటుంది) సూచిస్తున్నాయి. ఈ నిర్మాణం పనుల మోసాలకు(కొత్త విండోలో తెరుచుకుంటుంది) విలక్షణమైనది.
ప్రభావం
మాకు పరిమిత సమాచారం మాత్రమే అందుబాటులో ఉన్నందున ఈ ముఠా వాస్తవంగా ఎంతమందిని చేరుకుందో లెక్కించడం కష్టం. అయితే, కనీసం కొందరు ఈ అనుమానిత యజమానులకు డబ్బు చెల్లించినట్లు వేదిక వెలుపలి నివేదికలు(కొత్త విండోలో తెరుచుకుంటుంది), డబ్బు తిరిగి ఇవ్వాలని “ఉద్యోగులు” కోరిన సంభాషణలు సూచిస్తున్నాయి. సోషల్ మీడియాలో నిజమైన వినియోగదారులు ఈ సంస్థలను సమర్థించడాన్ని కూడా మేము గమనించాం. ఇది వాస్తవ ప్రపంచంలో కొంతమేర ప్రజలు వీటితో మమేకమైనట్లు సూచిస్తోంది.