GPT-6.1Terra

ನಾವು GPT-6.1 Terra ಪರಿಚಯಿಸುತ್ತಿದ್ದೇವೆ. ಇದು ವಿವರವಾದ ದೃಶ್ಯ ರೀಜನಿಂಗ್ ಮತ್ತು ನಿಖರವಾದ ಕಂಪ್ಯೂಟರ್ ಬಳಕೆಯ ಜೊತೆಗೆ ಹೆಚ್ಚು ಸ್ಪಷ್ಟವಾದ, ಸಹಜವಾದ ಬರವಣಿಗೆಯನ್ನು ಒದಗಿಸುವ ವೇಗದ, ದಕ್ಷ ಮಾಡೆಲ್ ಆಗಿದೆ. GPT‑5.6 Terraಗಿಂತ ಗಮನಾರ್ಹವಾಗಿ ಸುಧಾರಿಸಿರುವ ಇದು, ಪ್ರಸ್ತಾವನೆಗಳನ್ನು ಬರೆಯುವುದು ಮತ್ತು ತಾಂತ್ರಿಕ ರೇಖಾಚಿತ್ರಗಳನ್ನು ಅರ್ಥೈಸುವುದರಿಂದ ಹಿಡಿದು ನಮೂನೆಗಳನ್ನು ಭರ್ತಿ ಮಾಡುವುದು ಮತ್ತು ವೀಡಿಯೊಗಳನ್ನು ಸಂಪಾದಿಸುವವರೆಗೆ, ಕೆಲಸದ ದಿನವಿಡೀ ಎದುರಾಗುವ ಸಂವಹನ ಮತ್ತು ಕಂಪ್ಯೂಟರ್ ಆಧಾರಿತ ಕಾರ್ಯಗಳಲ್ಲಿ ಉತ್ಕೃಷ್ಟವಾಗಿ ಕಾರ್ಯನಿರ್ವಹಿಸುತ್ತದೆ.

ವೇಗ, ಸಾಮರ್ಥ್ಯ ಮತ್ತು ವೆಚ್ಚದ ನಡುವೆ ಹೊಸ ಸಮತೋಲನವನ್ನು ಒದಗಿಸುವ ಮೂಲಕ, ನಮ್ಮ ಮಾಡೆಲ್ ಕುಟುಂಬಗಳಾದ್ಯಂತ ಕಡಿಮೆ ವೆಚ್ಚದಲ್ಲಿ ಹೆಚ್ಚಿನ ಬುದ್ಧಿಮತ್ತೆ ಒದಗಿಸುವ ನಿಟ್ಟಿನಲ್ಲಿ Terra ಪ್ರಗತಿ ಸಾಧಿಸುತ್ತಲೇ ಇದೆ. ಇದರ ಪ್ರಮಾಣಿತ ಎಪಿಐ ದರಗಳು GPT-5.6 Terra ಮತ್ತು GPT-6.1 Sol ದರಗಳಿಗಿಂತ 50% ಕಡಿಮೆಯಾಗಿವೆ. ಇದರಿಂದ, ಸ್ವೀಕರಿಸಿದ ಸರಕುಪಟ್ಟಿಗಳನ್ನು ಓದಿ ಅವುಗಳ ವಿವರಗಳನ್ನು ಲೆಕ್ಕಪತ್ರ ತಂತ್ರಾಂಶದಲ್ಲಿ ನಮೂದಿಸುವಂತಹ ದೊಡ್ಡ ಪ್ರಮಾಣದ ಕೆಲಸಗಳನ್ನು ಸ್ವಯಂಚಾಲಿತಗೊಳಿಸುವುದು ಡೆವಲಪರ್‌ಗಳಿಗೆ ಕಾರ್ಯಸಾಧ್ಯವಾಗುತ್ತದೆ. ChatGPT Work ಮತ್ತು Codex ನಲ್ಲಿ, GPT-6.1 Terra ಬಳಸಿದಾಗ ನಿಮ್ಮ ಚಂದಾದಾರಿಕೆ ಯೋಜನೆಯಿಂದ ಹೆಚ್ಚಿನ ಪ್ರಯೋಜನ ಪಡೆಯಬಹುದು—ಒಂದೇ ಬಳಕೆ ಮಿತಿಯೊಳಗೆ GPT‑5.6 Terra ಗಿಂತ ಹೆಚ್ಚು ಕೆಲಸಗಳನ್ನು ಮತ್ತು GPT‑6.1 Sol ಅಥವಾ GPT‑6 Astra ಗಿಂತ ಗಣನೀಯವಾಗಿ ಹೆಚ್ಚು ಕೆಲಸಗಳನ್ನು ಮಾಡಬಹುದು.

ದೃಶ್ಯಗಳನ್ನು ಅರ್ಥಮಾಡಿಕೊಳ್ಳುವುದರಿಂದ ಕಾರ್ಯಪ್ರವೃತ್ತವಾಗುವವರೆಗೆ

ವೃತ್ತಿಪರ ಕಾರ್ಯಗಳ ಮಾನದಂಡವಾದ Agents’ Last Exam ಮೂಲಕ ನಾವು GPT-6.1 Terra ದ ಕಂಪ್ಯೂಟರ್ ಬಳಕೆ ಸಾಮರ್ಥ್ಯಗಳನ್ನು ಅಳೆಯುತ್ತೇವೆ. ಈ ಮಾನದಂಡದಲ್ಲಿ ವಾಸ್ತುಶಿಲ್ಪದ ರೇಖಾಚಿತ್ರಗಳನ್ನು ತ್ರಿಮಿತೀಯ ಮಾದರಿಯಾಗಿ ಪರಿವರ್ತಿಸುವುದು ಮತ್ತು ಮರುಸ್ಥಾಪನಾ ತಂಡಕ್ಕಾಗಿ ಸಮಯ ಸೂಚಕಗಳಿರುವ ದಾಖಲೆಯನ್ನು ರಚಿಸಲು ಅನಿಮೇಷನ್ ಚಲನಚಿತ್ರವನ್ನು ಪ್ರತಿ ಶಾಟ್‌ಗೂ ಪರಿಶೀಲಿಸುವುದು ಸೇರಿವೆ. ಮೀಡಿಯಂ ರೀಜನಿಂಗ್ ಪ್ರಯತ್ನದ ಮಟ್ಟದಲ್ಲಿ, GPT-6.1 Terra ಸುಮಾರು ಮೂರನೇ ಒಂದು ಭಾಗದಷ್ಟು ವೆಚ್ಚದಲ್ಲಿ GPT-5.6 Terra ಗಿಂತ 15 ಶೇಕಡಾ ಅಂಕಗಳಷ್ಟು ಹೆಚ್ಚಿನ ಅಂಕ ಗಳಿಸುತ್ತದೆ. ಇದು GPT-6 Astra ದ ಪ್ರತಿ ಟೋಕನ್ ದರದ ಕೇವಲ ಹತ್ತನೇ ಒಂದು ಭಾಗದಷ್ಟು ದರದಲ್ಲಿಯೇ ಅದಕ್ಕೆ ಸಮನಾದ ಕಾರ್ಯಕ್ಷಮತೆಯನ್ನೂ ತೋರಿಸುತ್ತದೆ. Max ಪ್ರಯತ್ನದ ಮಟ್ಟದಲ್ಲಿ, Terra ದ ಟೋಕನ್ ಬಳಕೆ ದಕ್ಷತೆ Claude Opus 5.5 ಗಿಂತ ಮೂರು ಪಟ್ಟು ಹೆಚ್ಚು. ಅಲ್ಲದೆ, ಇದರ ಪ್ರತಿ ಟೋಕನ್ ದರವು ಅದರ ದರದ ನಾಲ್ಕನೇ ಒಂದು ಭಾಗದಷ್ಟಿದ್ದು, ಪ್ರತಿ ಕಾರ್ಯದ ವೆಚ್ಚ ಸುಮಾರು 9 ಪಟ್ಟು ಕಡಿಮೆಯಾಗುತ್ತದೆ. Terra ಇನ್ನಷ್ಟು ವೇಗವಾಗಿಯೂ ಕಾರ್ಯನಿರ್ವಹಿಸುತ್ತದೆ. ಇದು GPT-6 Astra ಮತ್ತು GPT-6.1 Sol ಎರಡಕ್ಕೂ ಹೋಲಿಸಿದರೆ ಕಾರ್ಯಗಳನ್ನು ಮೂರು ಪಟ್ಟು ಹೆಚ್ಚು ವೇಗವಾಗಿ ಪೂರ್ಣಗೊಳಿಸುತ್ತದೆ.

ದೃಶ್ಯ ರೀಜನಿಂಗ್ ಮಾನದಂಡವಾದ MMMU-Pro ನಲ್ಲಿ, GPT-6.1 Terra ಪ್ರತಿ ರೀಜನಿಂಗ್ ಸೆಟ್ಟಿಂಗ್‌ನಲ್ಲೂ GPT-5.6 Terra ಗಿಂತ ಉತ್ತಮವಾಗಿ ಕಾರ್ಯನಿರ್ವಹಿಸುತ್ತದೆ. ಇದು ಅತ್ಯಂತ ಕಡಿಮೆ ವೆಚ್ಚದಲ್ಲಿಯೇ ನಮ್ಮ ಅತ್ಯಂತ ಸಮರ್ಥ ಅತ್ಯಾಧುನಿಕ ಮಾಡೆಲ್ GPT-6 Astra ಮತ್ತು GPT-6.1 Sol ಗಳ ಅಂಕಗಳಿಗೆ ಬಹುತೇಕ ಸಮನಾದ ಅಂಕಗಳನ್ನೂ ಗಳಿಸುತ್ತದೆ.

ತಾಂತ್ರಿಕ ರೇಖಾಚಿತ್ರದಿಂದ 3D ಮಾಡೆಲ್ ಅನ್ನು ನಿರ್ಮಿಸುವಂತಹ ಹಲವು ಹಂತಗಳ ಕಾರ್ಯಗಳನ್ನು ಪೂರ್ಣಗೊಳಿಸಲು AI ಏಜೆಂಟ್‌ಗಳು ಡೆಸ್ಕ್‌ಟಾಪ್ ಆ್ಯಪ್‌ಗಳನ್ನು ಎಷ್ಟು ಸಮರ್ಥವಾಗಿ ಬಳಸುತ್ತವೆ ಎಂಬುದನ್ನು OSWorld 2.1 ಪರೀಕ್ಷಿಸುತ್ತದೆ. ಮೀಡಿಯಂ ಮಟ್ಟದ ರೀಜನಿಂಗ್ ಪ್ರಯತ್ನದಲ್ಲಿ, GPT-6.1 Terra ಪ್ರತಿ ಕಾರ್ಯಕ್ಕೆ ತಗಲುವ ವೆಚ್ಚದ ಅಲ್ಪ ಭಾಗದಲ್ಲೇ GPT-5.6 Terra ದ ಅತ್ಯುತ್ತಮ ಅಂಕವನ್ನು ಮೀರಿಸುತ್ತದೆ.

ವಾಸ್ತವಿಕ ನಿಖರತೆ ಮತ್ತು ಪ್ರೋಗ್ರಾಮಿಂಗ್‌ನಲ್ಲಿ ಗಮನಾರ್ಹ ಸುಧಾರಣೆ

ಈ ವರ್ಷ, ನಮ್ಮ ಮಾಡೆಲ್‌ಗಳು ಸೃಷ್ಟಿಸುವ ಆಧಾರರಹಿತ ಮಾಹಿತಿ ಮತ್ತು ವಾಸ್ತವಿಕ ದೋಷಗಳನ್ನು ಕಡಿಮೆ ಮಾಡಲು ನಾವು ಹೆಚ್ಚಿನ ಸಂಪನ್ಮೂಲಗಳನ್ನು ಹೂಡಿದ್ದೇವೆ. ದೋಷಗಳಿಗೆ ಎಡೆಮಾಡಿಕೊಡುವ ಪ್ರಾಂಪ್ಟ್‌ಗಳ ನಮ್ಮ ಆಂತರಿಕ ಮಾನದಂಡ ಪರೀಕ್ಷೆಯಲ್ಲಿ, ಕಡಿಮೆ ರೀಜನಿಂಗ್ ಪ್ರಯತ್ನದ ಮಟ್ಟದಲ್ಲಿನ ದೋಷ ಪ್ರಮಾಣವು GPT-5.6 Terraದ 53.6%ರಿಂದ GPT-6.1 Terraದಲ್ಲಿ 16.7%ಕ್ಕೆ ಇಳಿಯಿತು. ಇದು ಸುಮಾರು 37 ಶೇಕಡಾಂಶಗಳ ಇಳಿಕೆಯಾಗಿದೆ. ಗರಿಷ್ಠ ಪ್ರಯತ್ನದ ಮಟ್ಟದಲ್ಲಿ, ದೋಷ ಪ್ರಮಾಣವು 18 ಶೇಕಡಾಂಶಗಳಷ್ಟು ಇಳಿದು 4.3% ತಲುಪಿತು. ಇದು GPT-6 Astra ಮತ್ತು GPT-6.1 Sol ದೋಷ ಪ್ರಮಾಣಗಳಿಗೆ ಬಹುತೇಕ ಸರಿಸಮನಾಗಿದೆ.

ತಂತ್ರಾಂಶ ಎಂಜಿನಿಯರಿಂಗ್‌ನಲ್ಲಿ GPT-6.1 Terra, GPT-5.6 Terraಗಿಂತ ಗಣನೀಯವಾಗಿ ಸುಧಾರಿಸಿದೆ. ಲೋಡ್ ಆಗುವಾಗ ವಿನ್ಯಾಸ ಬದಲಾಗುವ ಜಾಲಪುಟವನ್ನು ಸರಿಪಡಿಸುವಂತಹ ಸಮಸ್ಯೆಗಳನ್ನು ಪ್ರೋಗ್ರಾಮಿಂಗ್ ಏಜೆಂಟ್‌ಗಳು ಆಜ್ಞಾ ಸಾಲಿನ ಮೂಲಕ ಎಷ್ಟು ಚೆನ್ನಾಗಿ ಪರಿಹರಿಸುತ್ತವೆ ಎಂಬುದನ್ನು Terminal-Bench 4.0 ಪರೀಕ್ಷಿಸುತ್ತದೆ. ಗರಿಷ್ಠ ರೀಜನಿಂಗ್ ಪ್ರಯತ್ನದ ಮಟ್ಟದಲ್ಲಿ, GPT‑6.1 Terra 50.3% ಕಾರ್ಯಗಳನ್ನು ಪರಿಹರಿಸುತ್ತದೆ. ಇದು GPT‑5.6 Terraದ ಪ್ರಕಟಿತ ಅಂಕವಾದ 21.5%ರ ಎರಡರಷ್ಟಕ್ಕಿಂತಲೂ ಹೆಚ್ಚು. ಅತ್ಯಂತ ಸಂಕೀರ್ಣ ಪ್ರೋಗ್ರಾಮಿಂಗ್ ಕಾರ್ಯಗಳಿಗೆ, GPT-6.1 Sol ಮತ್ತು GPT-6 Astra ಇನ್ನೂ ಉತ್ತಮ ಆಯ್ಕೆಗಳಾಗಿವೆ.

ಕಾಲಾಂತರದ ಬದಲಾವಣೆಗಳನ್ನು ವೇಗವಾಗಿ ತೋರಿಸುವ ವೀಡಿಯೊದಲ್ಲಿ ಕೋಶ ವಿಭಜನೆಗಳನ್ನು ಗುರುತಿಸಿ ಅನುಸರಿಸುವಂತಹ ವೈಜ್ಞಾನಿಕ ಸಂಶೋಧನಾ ಕಾರ್ಯಗಳನ್ನು ನಡೆಸಲು ಏಜೆಂಟ್‌ಗಳು ಪ್ರೋಗ್ರಾಂ ಸಂಕೇತವನ್ನು ಎಷ್ಟು ಚೆನ್ನಾಗಿ ಬಳಸುತ್ತವೆ ಎಂಬುದನ್ನು Terminal-Bench-Science 0.1 ಪರೀಕ್ಷಿಸುತ್ತದೆ. Max ರೀಜನಿಂಗ್ ಮಟ್ಟದಲ್ಲಿ, GPT-6.1 Terra ಕಡಿಮೆ ವೆಚ್ಚದಲ್ಲೇ GPT-6.1 Sol ಅನ್ನು ಮೀರಿಸುತ್ತದೆ. ಅಲ್ಲದೆ, Opus 5.5ರ ಅಂದಾಜು ವೆಚ್ಚದ ಐದನೇ ಒಂದು ಭಾಗಕ್ಕಿಂತಲೂ ಕಡಿಮೆ ವೆಚ್ಚದಲ್ಲಿ, ಅದರ ಅಂಕಗಳಿಗೆ ಐದು ಅಂಕಗಳ ಅಂತರದೊಳಗೆ ಬರುತ್ತದೆ.

ಸುರಕ್ಷತೆ ಮತ್ತು ಮಾನವ ಉದ್ದೇಶಗಳೊಂದಿಗೆ ಹೊಂದಾಣಿಕೆ

ಶಕ್ತಿಶಾಲಿ ಕೃತಕ ಬುದ್ಧಿಮತ್ತೆಯನ್ನು ಹೆಚ್ಚು ದಕ್ಷವಾಗಿಯೂ ಸುಲಭವಾಗಿ ಲಭ್ಯವಾಗುವಂತೆಯೂ ಮಾಡುವುದರ ಜೊತೆಗೆ, ನಾವು ತರಬೇತಿ ಮತ್ತು ಪರೀಕ್ಷೆಯನ್ನು ಮುಂದುವರಿಸುತ್ತಾ ನಮ್ಮ ಸುರಕ್ಷತಾ ಕ್ರಮಗಳನ್ನು ಪರಿಷ್ಕರಿಸುತ್ತಿದ್ದೇವೆ. GPT‑6.1 Terra ನಮ್ಮ ಪ್ರಿಪೇರ್ಡ್‌ನೆಸ್ ಫ್ರೇಮ್‌ವರ್ಕ್ ಅಡಿಯಲ್ಲಿ ಸೈಬರ್ ಭದ್ರತೆಗೆ ಸಂಬಂಧಿಸಿದ ನಿರ್ಣಾಯಕ ಮಿತಿಯನ್ನು ತಲುಪುತ್ತದೆ ಮತ್ತು GPT‑6 Astra ಗಾಗಿ ಅಭಿವೃದ್ಧಿಪಡಿಸಿದ ರಕ್ಷಣಾ ಕ್ರಮಗಳನ್ನು ಉಳಿಸಿಕೊಂಡಿದೆ.

GPT-6 ಸರಣಿಯ ಹೊಂದಾಣಿಕೆ ಸುಧಾರಣೆಗಳನ್ನು GPT-6.1 Terra ಕೂಡ ಒಳಗೊಂಡಿದೆ. ನಮ್ಮ ಮೌಲ್ಯಮಾಪನಗಳ ಪ್ರಕಾರ, GPT-5.6 Terra ಗೆ ಹೋಲಿಸಿದರೆ GPT-6.1 Terra ನಿಗದಿತ ಕಾರ್ಯವ್ಯಾಪ್ತಿಯೊಳಗೆ ಉಳಿಯುವ ಮತ್ತು ಮಿತಿಗಳು ಹಾಗೂ ಎದುರಾಗಬಹುದಾದ ಅಡೆತಡೆಗಳನ್ನು ಬಳಕೆದಾರರಿಗೆ ಪ್ರಾಮಾಣಿಕವಾಗಿ ತಿಳಿಸುವ ಸಾಧ್ಯತೆ ಹೆಚ್ಚು. ನಮ್ಮ ಪ್ರಾಂಪ್ಟ್-ಇಂಜೆಕ್ಷನ್ ಪರೀಕ್ಷೆಗಳಲ್ಲಿಯೂ, ಬಳಕೆದಾರರ ಕಾರ್ಯದಿಂದ ತನ್ನನ್ನು ಬೇರೆಡೆಗೆ ತಿರುಗಿಸಲು ವಿನ್ಯಾಸಗೊಳಿಸಿದ ದುರುದ್ದೇಶಪೂರಿತ ಸೂಚನೆಗಳಿಗೆ GPT-6.1 Terra ಬಲವಾದ ಪ್ರತಿರೋಧ ತೋರಿಸಿದೆ. ಹೆಚ್ಚಿನ ವಿವರಗಳು ಸಿಸ್ಟಮ್ ಕಾರ್ಡ್⁠(ಹೊಸ ಕಿಟಕಿಯಲ್ಲಿ ತೆರೆಯುತ್ತದೆ) ನಲ್ಲಿ ಲಭ್ಯವಿವೆ.

ದರಗಳು ಮತ್ತು ಲಭ್ಯತೆ

ಇಂದಿನಿಂದ, ChatGPT Work ಮತ್ತು Codex‌ ನಲ್ಲಿ ಎಲ್ಲಾ Plus, Pro, Enterprise ಮತ್ತು Edu ಬಳಕೆದಾರರಿಗೆ GPT-6.1 Terra ಲಭ್ಯವಿದೆ. ಅಭಿವೃದ್ಧಿಪರರು OpenAI API ಮೂಲಕವೂ ಇದನ್ನು gpt-6.1-terra ಎಂಬ ಹೆಸರಿನಲ್ಲಿ ಬಳಸಬಹುದು.

ಪ್ರಮಾಣಿತ API ದರಗಳು ಪ್ರತಿ ಹತ್ತು ಲಕ್ಷ ಇನ್‌ಪುಟ್ ಟೋಕನ್‌ಗಳಿಗೆ $1, ಪ್ರತಿ ಹತ್ತು ಲಕ್ಷ ಕ್ಯಾಶ್ ಮಾಡಿದ ಇನ್‌ಪುಟ್ ಟೋಕನ್‌ಗಳಿಗೆ $0.05 ಮತ್ತು ಪ್ರತಿ ಹತ್ತು ಲಕ್ಷ ಔಟ್‌ಪುಟ್ ಟೋಕನ್‌ಗಳಿಗೆ $5 ಆಗಿವೆ.