ಬೆಳ್ಳಿ ಅಂಚಿನ ಕಾರ್ಯತಂತ್ರ: ಅಮೆರಿಕದ ವ್ಯಕ್ತಿಗಳನ್ನು ಗುರಿಯಾಗಿಸಿದ, ಬಹುಶಃ ಚೀನಾ ಮೂಲದ ಚಟುವಟಿಕೆ

ಈ ಪ್ರಕರಣ ಅಧ್ಯಯನವು ಮೂಲತಃ ಕೃತಕ ಬುದ್ಧಿಮತ್ತೆಯ ದುರುದ್ದೇಶಪೂರಿತ ಬಳಕೆಗಳನ್ನು ತಡೆಯುವ ಕುರಿತ OpenAI ಯ ಫೆಬ್ರವರಿ 2026ರ⁠(ಹೊಸ ಕಿಟಕಿಯಲ್ಲಿ ತೆರೆಯುತ್ತದೆ) ವರದಿಯಲ್ಲಿ ಪ್ರಕಟವಾಯಿತು.

ಬಹುಶಃ ಚೀನಾ ಮೂಲದವಾಗಿದ್ದ ಕೆಲವು ChatGPT ಖಾತೆಗಳನ್ನು ನಾವು ನಿಷೇಧಿಸಿದೆವು. ಅವು ನಮ್ಮ ಮಾಡೆಲ್‌ಗಳನ್ನು ಬಳಸಿ ಅಮೆರಿಕದ ವ್ಯಕ್ತಿಗಳು, ಚರ್ಚಾ ವೇದಿಕೆಗಳು ಮತ್ತು ಫೆಡರಲ್ ಕಟ್ಟಡಗಳ ಸ್ಥಳಗಳ ಬಗ್ಗೆ ಮಾಹಿತಿ ಹಾಗೂ ಮುಖ ಬದಲಿಸುವ ತಂತ್ರಾಂಶದ ಬಗ್ಗೆ ಮಾರ್ಗದರ್ಶನ ಕೋರಿದ್ದವು. ಅಲ್ಲದೆ, ನಂಬಿಕೆ ಗಳಿಸಿ ವಂಚಿಸುವ ಪ್ರಯತ್ನಗಳಂತೆ ಕಾಣುವ ಇಂಗ್ಲಿಷ್ ಇಮೇಲ್‌ಗಳನ್ನು ರಚಿಸಿದ್ದವು. ಅವರು ನಮ್ಮ ಮಾಡೆಲ್‌ಗಳಿಗೆ ಚೀನೀ ಭಾಷೆಯಲ್ಲಿ ಸೂಚನೆಗಳನ್ನು ನೀಡುತ್ತಿದ್ದರು. ಹೆಚ್ಚಾಗಿ ಚೀನಾದ ಮುಖ್ಯಭೂಭಾಗದ ಕಚೇರಿ ವೇಳೆಯಲ್ಲಿ ಸಕ್ರಿಯರಾಗಿದ್ದು, ನಮ್ಮ ವೇದಿಕೆಯನ್ನು ಪ್ರವೇಶಿಸಲು ವರ್ಚುವಲ್ ಖಾಸಗಿ ಜಾಲಗಳನ್ನು ಬಳಸುತ್ತಿದ್ದರು.

ಈ ಖಾತೆಗಳು ಹಾಂಗ್ ಕಾಂಗ್ ಮೂಲದ “ನಿಂಬಸ್ ಹಬ್ ಕನ್ಸಲ್ಟಿಂಗ್” ಎಂಬ ಕಂಪನಿಯ ಉದ್ಯೋಗಿಗಳು ಕಳುಹಿಸಿದಂತೆ ತೋರುವ ಇಮೇಲ್ ಕರಡುಗಳನ್ನು ರಚಿಸಿದ್ದವು. ಆದರೆ ಅವರು ನಮ್ಮ ಮಾಡೆಲ್‌ಗಳಿಗೆ ಸೂಚನೆಗಳನ್ನು ನೀಡುವಾಗ ಸಾಂಪ್ರದಾಯಿಕ ಚೀನೀ ಅಕ್ಷರಗಳ (ಸಾಮಾನ್ಯವಾಗಿ ಹಾಂಗ್ ಕಾಂಗ್‌ನಲ್ಲಿ ಬಳಸುವ) ಬದಲು ಸರಳೀಕೃತ ಚೀನೀ ಅಕ್ಷರಗಳನ್ನು (ಸಾಮಾನ್ಯವಾಗಿ ಚೀನಾದ ಮುಖ್ಯಭೂಭಾಗದಲ್ಲಿ ಬಳಸುವ) ಬಳಸಿದ್ದರು. ಇದು ನಿಜವಾದ ನಿರ್ವಾಹಕರು ಚೀನಾದ ಮುಖ್ಯಭೂಭಾಗದಲ್ಲಿದ್ದರೆಂದು ಸೂಚಿಸುತ್ತದೆ. ಜೊತೆಗೆ, ಅಮೆರಿಕ ಮತ್ತು ಶಾಂಘೈ ನಡುವಿನ ಆರ್ಥಿಕ ಹಾಗೂ ಸಾಂಸ್ಕೃತಿಕ ವಿನಿಮಯಗಳನ್ನು ಉತ್ತೇಜಿಸುವ ಶಾಂಘೈ ಮೂಲದ ಸಾರ್ವಜನಿಕ ಸಂಪರ್ಕ ಸಂಸ್ಥೆಯ ಪ್ರತಿನಿಧಿ ಕಳುಹಿಸಿದಂತೆ ತೋರುವ ಇಮೇಲ್ ಅನ್ನು ಒಂದು ಖಾತೆ ರಚಿಸಿತ್ತು. ಕಂಪನಿಯ ಹೆಸರಿನಲ್ಲಿ ಮಳೆಮೋಡ ಅಥವಾ ಪ್ರಭಾವಲಯ ಎಂಬ ಅರ್ಥದ “ನಿಂಬಸ್” ಪದವಿರುವುದರಿಂದ, ನಾವು ಈ ಕಾರ್ಯಾಚರಣೆಗೆ “ಬೆಳ್ಳಿ ಅಂಚಿನ ಕಾರ್ಯತಂತ್ರ” ಎಂದು ಹೆಸರಿಟ್ಟೆವು.

ಈ ಖಾತೆಗಳು ಅಮೆರಿಕದ ರಾಜ್ಯಮಟ್ಟದ ಅಧಿಕಾರಿಗಳಿಗೆ ಅಥವಾ ವ್ಯಾಪಾರ ಮತ್ತು ಹಣಕಾಸು ಕ್ಷೇತ್ರಗಳಲ್ಲಿ ಕೆಲಸ ಮಾಡುವ ನೀತಿ ವಿಶ್ಲೇಷಕರಿಗೆ ಉದ್ದೇಶಿಸಿದ ಇಂಗ್ಲಿಷ್ ಇಮೇಲ್ ಕರಡುಗಳನ್ನು ರಚಿಸಿದ್ದವು. ಶುಲ್ಕದ ಪ್ರತಿಯಾಗಿ ಸಲಹೆ ನೀಡುವ ಸಮಾಲೋಚನೆಗಳಲ್ಲಿ ಭಾಗವಹಿಸುವಂತೆ ಇವು ಸ್ವೀಕರಿಸುವವರನ್ನು ಆಹ್ವಾನಿಸುವಂತಿದ್ದವು. ತಮ್ಮ ಗ್ರಾಹಕರಿಗಾಗಿ ನೀತಿಗಳನ್ನು ವಿವರಿಸುವುದು ಮತ್ತು ಕಾರ್ಯತಂತ್ರದ ಸಲಹೆಗಳನ್ನು ನೀಡುವುದು ಈ ಕೆಲಸ ಎಂದು ಅವರು ವರ್ಣಿಸಿದ್ದರು. ಇಮೇಲ್ ಕರಡುಗಳು ಸಂಕ್ಷಿಪ್ತ, ಸ್ಪಷ್ಟ ಮತ್ತು ವೃತ್ತಿಪರವಾಗಿರಬೇಕು ಹಾಗೂ ವಿಷಯದ ಸಾಲುಗಳು ತುರ್ತು ಭಾವನೆ ಮೂಡಿಸುವಂತೆಯೂ ಸೂಕ್ಷ್ಮವಾಗಿ ಮನಸ್ಸಿನ ಮೇಲೆ ಪ್ರಭಾವ ಬೀರುವಂತೆಯೂ ಇರಬೇಕು ಎಂದು ಅವರು ಕೋರಿದ್ದರು.

ಜೊತೆಗೆ, ಈ ChatGPT ಖಾತೆಗಳು ಸಾಮಾನ್ಯ ಮಾಹಿತಿ ಪಡೆಯಲು ನಮ್ಮ ಮಾಡೆಲ್‌ಗಳನ್ನು ಬಳಸಿದ್ದವು. ನಮ್ಮ ಮಾಡೆಲ್ ಸಾರ್ವಜನಿಕವಾಗಿ ಲಭ್ಯವಿರುವ ಮೂಲಗಳನ್ನು ಆಧರಿಸಿ ಅವುಗಳಿಗೆ ಪ್ರತಿಕ್ರಿಯಿಸಿತ್ತು. ಇದರಲ್ಲಿ ಈ ಕೆಳಗಿನ ವಿಷಯಗಳ ಕುರಿತ ಪ್ರಶ್ನೆಗಳು ಸೇರಿದ್ದವು:

• ಮುಖ್ಯ ಕಚೇರಿಗಳು ಸೇರಿದಂತೆ ಅಮೆರಿಕದ ಫೆಡರಲ್ ಸರ್ಕಾರದ ಕಚೇರಿಗಳ ಸ್ಥಳಗಳು ಮತ್ತು ಫೆಡರಲ್ ಸಂಸ್ಥೆಗಳು ಹಾಗೂ ಅಧಿಕಾರಿಗಳು ಹೆಚ್ಚಿನ ಸಂಖ್ಯೆಯಲ್ಲಿರುವ ರಾಜ್ಯಗಳ ಶ್ರೇಯಾಂಕಿತ ಪಟ್ಟಿ.

• ರಾಜ್ಯವಾರು ಅಮೆರಿಕದ ಫೆಡರಲ್ ಸಿಬ್ಬಂದಿಯ ಹಂಚಿಕೆ.

• ವಾಯ್ಸ್ ಆಫ್ ಅಮೆರಿಕದ ನಿರೂಪಕರಂತಹ ಅಮೆರಿಕದ ವ್ಯಕ್ತಿಗಳು, ಅವರ ಹಿಂದಿನ ಸಂದರ್ಶನಗಳು ಮತ್ತು ಆಸಕ್ತಿಯ ವಿಷಯಗಳು.

• ಅಮೆರಿಕದ ಅರ್ಥಶಾಸ್ತ್ರ ಮತ್ತು ಹಣಕಾಸು ಕ್ಷೇತ್ರದ ವೃತ್ತಿಪರರು ಹಾಗೂ ಉದ್ಯೋಗಾಕಾಂಕ್ಷಿಗಳು ಸಾಮಾನ್ಯವಾಗಿ ಬಳಸುವ ಆನ್‌ಲೈನ್ ಚರ್ಚಾ ವೇದಿಕೆಗಳು ಮತ್ತು ಜಾಲತಾಣಗಳು.

ಗಮನಾರ್ಹವಾಗಿ, ಮುಖ ಬದಲಿಸುವ ಮತ್ತು ಇತರ ಮಾಧ್ಯಮ ಸುಧಾರಣೆಗಳನ್ನು ಮಾಡುವ ಫೇಸ್‌ಫ್ಯೂಷನ್ ಎಂಬ ಮುಖ ಮಾರ್ಪಾಡು ವೇದಿಕೆಯನ್ನು ತನ್ನ ಗಣಕಯಂತ್ರಕ್ಕೆ ಹೇಗೆ ಇಳಿಸಿಕೊಳ್ಳಬೇಕು ಮತ್ತು ಸ್ಥಾಪಿಸಬೇಕು ಎಂಬುದರ ಬಗ್ಗೆ ಒಂದು ಖಾತೆ ಮಾರ್ಗದರ್ಶನ ಕೋರಿತ್ತು. ಅವರ ChatGPT ಚಟುವಟಿಕೆಯ ಪ್ರಕಾರ, ಅದರ ನೇರಪ್ರಸಾರದಲ್ಲಿ ಮುಖ ಬದಲಿಸುವ ಸೌಲಭ್ಯವನ್ನು ನಿರ್ದಿಷ್ಟವಾಗಿ ಬಳಸುವ ಉದ್ದೇಶವಿದೆ ಎಂದು ಅವರು ಹೇಳಿದ್ದರು. ಅವರು ತಾಂತ್ರಿಕ ಪದಗಳಿಲ್ಲದ, ಹಂತ ಹಂತದ ಸ್ಥಾಪನಾ ಮಾರ್ಗದರ್ಶನವನ್ನು ಕೇಳಿದ್ದರು. ತಾವು ಗಣಕಯಂತ್ರ ಪ್ರೋಗ್ರಾಮಿಂಗ್‌ಗೆ ಹೊಸಬರೆಂದು ಹೇಳಿಕೊಂಡು, ಸೂಚನೆಗಳು ಸರಳವಾಗಿರಬೇಕೆಂದು ತಿಳಿಸಿದ್ದರು. ಸ್ಥಾಪನೆಗೆ ನೆರವಾಗಲೆಂದು ಅವರು ತಮ್ಮ ಗಣಕಯಂತ್ರದ ಯಂತ್ರಾಂಶದ ವಿವರಗಳ ಪರದೆಚಿತ್ರವನ್ನು ಅಪ್‌ಲೋಡ್ ಮಾಡಿದ್ದರು. ಫೇಸ್‌ಫ್ಯೂಷನ್‌ನ ಸಾರ್ವಜನಿಕವಾಗಿ ಲಭ್ಯವಿರುವ ಜಾಲತಾಣ ಮತ್ತು ದಸ್ತಾವೇಜುಗಳಿಂದ ಪಡೆದ ಮಾಹಿತಿಯೊಂದಿಗೆ ಮಾಡೆಲ್ ಪ್ರತಿಕ್ರಿಯಿಸಿತ್ತು.

ನಮ್ಮ ಮಾಡೆಲ್‌ಗಳನ್ನು ಬಳಸಿ ಇಮೇಲ್ ಕರಡುಗಳನ್ನು ರಚಿಸಲು ಅವರು ನೀಡಿದ ಸೂಚನೆಗಳು ಸಾಮಾನ್ಯ ನೇಮಕಾತಿ ಸಂದೇಶಗಳಿಗಿಂತ, ವಿದೇಶಿ ಗುಪ್ತಚರ ಸಂಸ್ಥೆಯೊಂದು ಜನರನ್ನು ಸಂಪರ್ಕಿಸುವಾಗ ನಂಬಿಕೆ ಗಳಿಸಿ ವಂಚಿಸಲು ಬಳಸುವ ಕಾರ್ಯತಂತ್ರವನ್ನು⁠(ಹೊಸ ಕಿಟಕಿಯಲ್ಲಿ ತೆರೆಯುತ್ತದೆ) ಹೋಲುತ್ತಿದ್ದವು. ಪ್ರತಿ ಇಮೇಲ್ ಕರಡಿನಲ್ಲೂ ಈ ಕೆಳಗಿನ ವಿಭಾಗಗಳನ್ನು ಸೇರಿಸಲು ಅವರು ಕೋರಿದ್ದರು:

ವಿಶ್ವಾಸಾರ್ಹತೆಯನ್ನು ಸ್ಥಾಪಿಸುವುದು: ಅವರು “ನಿಂಬಸ್ ಹಬ್” ಅನ್ನು ಭೂರಾಜಕೀಯ ಮತ್ತು ಅಂತರರಾಷ್ಟ್ರೀಯ ನೀತಿಗಳಲ್ಲಿ ಅಧಿಕೃತ ಪರಿಣತಿ ಹೊಂದಿರುವ ವೃತ್ತಿಪರ ಕಾರ್ಯತಂತ್ರ ಸಲಹಾ ಸಂಸ್ಥೆಯಾಗಿ ಪರಿಚಯಿಸಿದ್ದರು. ಅವರು ನಿಂಬಸ್ ಹಬ್‌ನ ಜಾಲತಾಣದ ಕೊಂಡಿಯನ್ನು ಸೇರಿಸಿದ್ದರು (ಕೆಳಗಿನ ಪರದೆಚಿತ್ರ ನೋಡಿ).

ಗುರಿಯಾಗಿಸಿದ ವ್ಯಕ್ತಿಗೆ ತಕ್ಕಂತೆ ಬರೆದು ಹೊಗಳುವುದು: ಸ್ವೀಕರಿಸುವವರು ಈ ಹುದ್ದೆಗೆ ನಿಖರವಾಗಿ ಸೂಕ್ತರು ಎಂಬುದಕ್ಕೆ ಪುರಾವೆಯಾಗಿ ಅವರ ಸಾರ್ವಜನಿಕ ವಲಯದ ಹಿನ್ನೆಲೆಯನ್ನು ಸ್ಪಷ್ಟವಾಗಿ ಉಲ್ಲೇಖಿಸುವಂತೆ ಅವರು ಮಾಡೆಲ್‌ಗೆ ಸೂಚಿಸಿದ್ದರು. ಒಂದು ಸಂದರ್ಭದಲ್ಲಿ, ಶಾಂಘೈನಲ್ಲಿರುವ ಅಮೆರಿಕದ ವ್ಯಕ್ತಿಯ ಲಿಂಕ್ಡ್‌ಇನ್ ಪರಿಚಯಪುಟದ ಪರದೆಚಿತ್ರಗಳನ್ನು ಒಂದು ಖಾತೆ ಅಪ್‌ಲೋಡ್ ಮಾಡಿತ್ತು. ಆ ಪರದೆಚಿತ್ರಗಳಲ್ಲಿದ್ದ ವ್ಯಕ್ತಿಯ ವೈಯಕ್ತಿಕ ಅನುಭವಗಳು ಮತ್ತು ಹಿನ್ನೆಲೆಯ ಕುರಿತ ಪಠ್ಯವನ್ನು ಆಧರಿಸಿ, ಅವರಿಗೆ ತಕ್ಕಂತೆ ಇಮೇಲ್ ಕರಡನ್ನು ಬರೆಯಲು ಮಾಡೆಲ್‌ಗೆ ಸೂಚಿಸಿತ್ತು.

ಹಲವು ಪ್ರೋತ್ಸಾಹಕಗಳ ಆಮಿಷ ಒಡ್ಡುವುದು: ಸಲಹಾ ಕೆಲಸವನ್ನು ಸಾಮಾನ್ಯವಾಗಿ ಉತ್ತಮ ಆದಾಯ ನೀಡುವ ಆನ್‌ಲೈನ್ ಅವಕಾಶವಾಗಿ ಬಿಂಬಿಸಲಾಗಿತ್ತು. ಕಾರ್ಯಕ್ಷಮತೆಗೆ ಹೆಚ್ಚುವರಿ ಹಣ ಮತ್ತು ಇತರರನ್ನು ಶಿಫಾರಸು ಮಾಡಿದ್ದಕ್ಕೆ ಬಹುಮಾನಗಳ ಆಮಿಷವನ್ನೂ ಒಡ್ಡಲಾಗಿತ್ತು. ಆದರೆ ನಿಜವಾದ ಕೆಲಸದ ವಿವರಗಳನ್ನು ಅಸ್ಪಷ್ಟವಾಗಿಯೇ ಇಡಲಾಗಿತ್ತು.

ಭರವಸೆ ನೀಡುವ ಭಾಷೆ ಬಳಸಿ ಅಪಾಯದ ಆತಂಕ ತಗ್ಗಿಸುವುದು: ಕೆಲಸವು ಒತ್ತಡರಹಿತವಾಗಿರುತ್ತದೆ, ಸಮಯಕ್ಕೆ ಸರಿಯಾಗಿ ಹಣ ಪಾವತಿಸಲಾಗುತ್ತದೆ ಮತ್ತು ಗೌಪ್ಯತೆ ಕಾಪಾಡಲಾಗುತ್ತದೆ ಎಂದು ಅವರು ಆಗಾಗ ಹೇಳುತ್ತಿದ್ದರು.

ಸಂವಹನವನ್ನು ತ್ವರಿತವಾಗಿ ಬೇರೆ ವೇದಿಕೆಗೆ ವರ್ಗಾಯಿಸುವುದು: ಅವರು ಯಾವಾಗಲೂ ಸ್ವೀಕರಿಸುವವರನ್ನು ಇಮೇಲ್‌ನಿಂದ ಹೊರತಂದು, ವಾಟ್ಸ್‌ಆ್ಯಪ್, ಜೂಮ್ ಅಥವಾ ಟೀಮ್ಸ್ ಮೂಲಕ ಆರಂಭಿಕ ಆನ್‌ಲೈನ್ ವೀಡಿಯೊ ಸಭೆಗೆ ಸೇರಿಸಲು ಪ್ರಯತ್ನಿಸುತ್ತಿದ್ದರು.

ಈ ಪ್ರಕರಣದಲ್ಲಿ ಜಾಲಗಳು ಮಾಡೆಲ್‌ಗಳೊಂದಿಗೆ ನಡೆಸಿದ ಸಂವಾದಗಳು ತಾಂತ್ರಿಕವಾಗಿ ಸಂಕೀರ್ಣವಾಗಿರಲಿಲ್ಲ. ಅವುಗಳ ಕೋರಿಕೆಗಳು ಕೆಲವೊಮ್ಮೆ ಸಹಜ ನೇಮಕಾತಿ ಆಹ್ವಾನಗಳನ್ನು ಬರೆಯುವ ಅಥವಾ ಕಾನೂನುಬದ್ಧ ತಂತ್ರಾಂಶವನ್ನು ಸ್ಥಾಪಿಸುವ ವಿನಂತಿಗಳಂತೆ ಕಾಣುತ್ತಿದ್ದವು. ಆದರೆ, ನಕಲಿ ಕಂಪನಿಯ ಗುರುತಿನ ಹಿಂದೆ ಅಡಗಿಕೊಳ್ಳುವ ಬಳಕೆದಾರರ ತಂತ್ರಗಳು ಮತ್ತು ಭೂರಾಜಕೀಯ ವಿಷಯಗಳಲ್ಲಿನ ಅವರ ಆಸಕ್ತಿಯು, ವಿರೋಧಿ ಉದ್ದೇಶಗಳಿಗಾಗಿ ಜನರನ್ನು ನೇಮಿಸಿಕೊಳ್ಳುವ ಸಂಭವನೀಯ ಉದ್ದೇಶವನ್ನು ಸೂಚಿಸುತ್ತವೆ.

ಈ ಖಾತೆಗಳು ChatGPT ಅನ್ನು ಬಳಸಿದ ರೀತಿಯನ್ನು ಪರಿಶೀಲಿಸಿದಾಗ, ಅವರು ಗುರಿಯಾಗಿಸಿಕೊಂಡವರಿಂದ ತಮ್ಮ ಆಹ್ವಾನಗಳಿಗೆ ಪ್ರತಿಕ್ರಿಯೆ ಪಡೆಯುವಲ್ಲಿ ಯಶಸ್ವಿಯಾದರು ಎಂಬುದಕ್ಕೆ ಯಾವುದೇ ಪುರಾವೆ ಕಂಡುಬರಲಿಲ್ಲ. ಇಮೇಲ್ ಆಹ್ವಾನಗಳನ್ನು ನಿಜವಾಗಿಯೂ ಕಳುಹಿಸಲಾಗಿತ್ತೇ ಅಥವಾ ಉದ್ದೇಶಿತ ಸ್ವೀಕರಿಸುವವರಲ್ಲಿ ಯಾರಾದರೂ ಪ್ರತಿಕ್ರಿಯಿಸಿದ್ದರೇ ಎಂಬುದನ್ನು ನಮಗೆ ಸ್ವತಂತ್ರವಾಗಿ ನಿರ್ಧರಿಸಲು ಸಾಧ್ಯವಾಗಲಿಲ್ಲ.

ವಿದೇಶಿ ಗುಪ್ತಚರ ಸಂಸ್ಥೆಗಳು ಸಾಮಾಜಿಕ ಮತ್ತು ವೃತ್ತಿಪರ ಸಂಪರ್ಕ ವೇದಿಕೆಗಳಲ್ಲಿ ಸಲಹಾ ಸಂಸ್ಥೆಗಳು ಹಾಗೂ ಇತರ ಘಟಕಗಳ ಸೋಗಿನಲ್ಲಿ ಹಾಲಿ ಮತ್ತು ಮಾಜಿ ಸರ್ಕಾರಿ ನೌಕರರನ್ನು ನೇಮಿಸಿಕೊಳ್ಳಲು ಗುರಿಯಾಗಿಸುತ್ತಿವೆ ಎಂದು ಹಲವು ಪ್ರಜಾಸತ್ತಾತ್ಮಕ ಸರ್ಕಾರಗಳು (ಉದಾ. ಅಮೆರಿಕ⁠(ಹೊಸ ಕಿಟಕಿಯಲ್ಲಿ ತೆರೆಯುತ್ತದೆ), ಯುನೈಟೆಡ್ ಕಿಂಗ್‌ಡಮ್⁠(ಹೊಸ ಕಿಟಕಿಯಲ್ಲಿ ತೆರೆಯುತ್ತದೆ), ಆಸ್ಟ್ರೇಲಿಯಾ⁠(ಹೊಸ ಕಿಟಕಿಯಲ್ಲಿ ತೆರೆಯುತ್ತದೆ)) ಎಚ್ಚರಿಸಿವೆ. ಸಾಮಾನ್ಯ ನೇಮಕಾತಿ ಸಂದೇಶಗಳು ಮತ್ತು ನಂಬಿಕೆ ಗಳಿಸಿ ವಂಚಿಸುವ ಈ ಉದ್ದೇಶಿತ ಪ್ರಯತ್ನಗಳಲ್ಲಿ ಕೆಲವು ಸಾಮ್ಯತೆಗಳಿರುವುದರಿಂದ, ಅವುಗಳ ನಡುವಿನ ವ್ಯತ್ಯಾಸ ಗುರುತಿಸುವುದು ಗೊಂದಲಮಯವಾಗಬಹುದು. ಆದರೆ, ನೈಜ ನೇಮಕಾತಿಗಾಗಿ ಸಂಪರ್ಕಿಸುವವರು ಸಾಮಾನ್ಯವಾಗಿ ಸಮಯ ತೆಗೆದುಕೊಳ್ಳುವ ಪರಿಶೀಲನಾ ಪ್ರಕ್ರಿಯೆಗಳಿಗೆ ಅನುಗುಣವಾಗಿ ನಡೆದುಕೊಳ್ಳುತ್ತಾರೆ. ಅವರ ಸಂದೇಶಗಳಲ್ಲಿ ಹುದ್ದೆಯ ಹೆಸರಿನ ಬಗ್ಗೆ ಪರಿಶೀಲಿಸಬಹುದಾದ ಮಾಹಿತಿ, ಉದ್ಯೋಗದಾತರ ವಿಶ್ವಾಸಾರ್ಹ ವಿವರಗಳು, ಮಾರುಕಟ್ಟೆಗೆ ತಕ್ಕ ಸಮಂಜಸ ವೇತನ ಶ್ರೇಣಿ ಮತ್ತು ನೈಜ ಉದ್ಯೋಗ ಪ್ರಕಟಣೆಗಳ ಕೊಂಡಿಗಳಿರುತ್ತವೆ. ಸಂಕ್ಷಿಪ್ತವಾಗಿ ಹೇಳುವುದಾದರೆ, ನಂಬಲಾಗದಷ್ಟು ಒಳ್ಳೆಯ ಕೊಡುಗೆಯಂತೆ ಕಂಡರೆ, ಅದು ನಿಜವಲ್ಲದಿರುವ ಸಾಧ್ಯತೆಯೇ ಹೆಚ್ಚು.