Codex ಜೊತೆ ಕಾರ್ಯಾಚರಣೆ ಬಲಪಡಿಸಿದ Cult.fit

Cult.fit ಭಾರತದ ಪ್ರಮುಖ ತಂತ್ರಜ್ಞಾನಾಧಾರಿತ ದೈಹಿಕ ಸದೃಢತಾ ಕಂಪನಿಗಳಲ್ಲೊಂದು. 77 ನಗರಗಳಲ್ಲಿ 708 ವ್ಯಾಯಾಮ ಕೇಂದ್ರಗಳನ್ನು ನಡೆಸುತ್ತಿದ್ದು, ಶುಲ್ಕ ಪಾವತಿಸುವ ಸುಮಾರು ಹತ್ತು ಲಕ್ಷ ಸದಸ್ಯರಿಗೆ ಸೇವೆ ನೀಡುತ್ತಿದೆ. ಇದು ಚಂದಾದಾರಿಕೆಯ ಮೂಲಕ ವ್ಯಾಯಾಮಶಾಲೆಗಳು ಮತ್ತು ತರಬೇತುದಾರರು ನಡೆಸುವ ತರಗತಿಗಳಿಗೆ ಪ್ರವೇಶ ನೀಡುತ್ತದೆ. ಜೊತೆಗೆ ವ್ಯಾಯಾಮ ಉಪಕರಣಗಳು, ಪರಿಕರಗಳು, ಪಾದರಕ್ಷೆಗಳು ಮತ್ತು ಉಡುಪುಗಳ ಉತ್ಪನ್ನ ಶ್ರೇಣಿಯನ್ನೂ ವಿಸ್ತರಿಸುತ್ತಿದೆ.

ಕಂಪನಿ ಬೆಳೆದಂತೆ, ಪ್ರಕ್ರಿಯೆಗಳನ್ನೂ ಸಂಕೀರ್ಣತೆಯನ್ನೂ ಹೆಚ್ಚಿಸದೆ ಕಾರ್ಯಾಚರಣೆ ಮತ್ತು ಉತ್ಪನ್ನಗಳಿಗೆ ಸಂಬಂಧಿಸಿದ ಇನ್ನಷ್ಟು ಸವಾಲುಗಳನ್ನು ಪರಿಹರಿಸಲು ಬಯಸಿತು. ತಾಂತ್ರಿಕ ಅಭಿವೃದ್ಧಿಗೆ Codex ಅನ್ನು ಸಾಮಾನ್ಯ ವೇದಿಕೆಯಾಗಿ ಅಳವಡಿಸಿ, ಬಳಿಕ ಇತರ ವಿಭಾಗಗಳಿಗೂ ವಿಸ್ತರಿಸಿದ cult.fit, ಸಂಸ್ಥೆಯ ತಂಡಗಳಿಗೆ ದತ್ತಾಂಶ ವಿಶ್ಲೇಷಿಸಲು, ಸಾಧನಗಳನ್ನು ನಿರ್ಮಿಸಲು ಮತ್ತು ಆಲೋಚನೆಗಳನ್ನು ಬಳಕೆಗೆ ತರಲು ನೆರವಾಗುತ್ತಿದೆ. Codex ಅಳವಡಿಕೆಯ ಜೊತೆಗೆ, ತನ್ನ AI ತರಬೇತುದಾರ ಸೇರಿದಂತೆ ಸದಸ್ಯರ ಅಗತ್ಯಕ್ಕೆ ಹೆಚ್ಚು ಹೊಂದುವ ಅನುಭವಗಳನ್ನು ರೂಪಿಸಲು OpenAI API ಬಳಸುತ್ತಿದೆ.

cult.fit ಮುಖ್ಯ ತಂತ್ರಜ್ಞಾನ ಅಧಿಕಾರಿ ಸಂತೋಷ್ ಕುಮಾರ್ ಅವರಿಗೆ, ಸಂಸ್ಥೆಯ ಕಾರ್ಯವಿಧಾನವನ್ನು ಬದಲಿಸುವ ಅವಕಾಶವನ್ನು AI ಒದಗಿಸಿತು. “ನಮ್ಮ ಕೆಲಸದ ವಿಧಾನದಲ್ಲಿ AI ಅನ್ನು ಇನ್ನಷ್ಟು ಮೂಲಭೂತವಾಗಿ ಅಳವಡಿಸಿಕೊಳ್ಳಲು ಬಯಸಿದೆವು” ಎನ್ನುತ್ತಾರೆ ಅವರು. “AIಗೆ ಆದ್ಯತೆ ನೀಡುವಂತೆ ನಮ್ಮ ಕಾರ್ಯಾಚರಣೆಗಳನ್ನು ನಡೆಸುವುದು ಅಥವಾ ಬದಲಿಸುವುದು ಹೇಗೆ? ಗ್ರಾಹಕರಿಗೆ ಯಾವ ಹೊಸ ಅನುಭವಗಳನ್ನು ಒದಗಿಸಬಹುದು? ನಮ್ಮ ಸಂಸ್ಥೆಯನ್ನು ನಡೆಸುವ ವಿಧಾನವನ್ನು ಹೇಗೆ ಬದಲಿಸಬಹುದು?”

Cult.fit ಮೊದಲ ದೊಡ್ಡ ಬದಲಾವಣೆ ತಂದದ್ದು ತಾಂತ್ರಿಕ ಅಭಿವೃದ್ಧಿಯಲ್ಲಿ. Codex ಅನ್ನು ಸಾಮಾನ್ಯ ವೇದಿಕೆಯಾಗಿ ಅಳವಡಿಸುವ ಮೊದಲು, ಅಭಿವೃದ್ಧಿಕಾರರು ಕೋಡ್ ಬರೆಯುವ ವಿವಿಧ ಏಜೆಂಟ್‌ಗಳು ಮತ್ತು ಸಹಾಯಕಗಳನ್ನು ಬಳಸುತ್ತಿದ್ದರು. ಪ್ರತಿ ಸಾಧನಕ್ಕೂ ರಿಪೊಸಿಟರಿಗಳು, ಏಜೆಂಟ್ ಸೂಚನೆಗಳು, ಕೌಶಲಗಳು ಮತ್ತು ಅಭಿವೃದ್ಧಿ ಕಾರ್ಯಪ್ರವಾಹಗಳ ನಿಯಮಗಳು ಬೇರೆಯಾಗಿದ್ದವು. ಇದರಿಂದ ತಂಡಗಳ ನಡುವೆ ಜ್ಞಾನ ಹಂಚಿಕೊಳ್ಳುವುದು ಮತ್ತು ಸಾಮರ್ಥ್ಯಗಳನ್ನು ಮರುಬಳಸುವುದು ಕಷ್ಟವಾಗಿತ್ತು.

ತಂತ್ರಾಂಶ ಅಭಿವೃದ್ಧಿಯ ಜೀವನಚಕ್ರಕ್ಕೆ ಏಕರೂಪತೆ ತರಲು Cult.fit ಒಂದು ಸಾಮಾನ್ಯ ವೇದಿಕೆಯನ್ನು ಬಯಸಿತು. ಅದಕ್ಕೆ ಆಧಾರವಾಗಿ ಕಂಪನಿ Codex ಅನ್ನು ಆಯ್ಕೆ ಮಾಡಿತು. ಈಗ ರಿಪೊಸಿಟರಿ ರಚನೆಗಳು, ಕೌಶಲಗಳು, ಪರೀಕ್ಷೆ, ಕೋಡ್ ಪರಿಶೀಲನೆ ಮತ್ತು ಪ್ರತಿಕ್ರಿಯೆ ಆಧಾರಿತ ಸುಧಾರಣೆಯಲ್ಲಿ ಎಲ್ಲ ತಂಡಗಳೂ ಒಂದೇ ನಿಯಮಗಳನ್ನು ಅನುಸರಿಸಬಹುದಾಗಿತ್ತು.

ಬಳಿಕ ತಂಡವು ಹೆಚ್ಚು ವಿಶೇಷವಾದ ತಾಂತ್ರಿಕ ಕಾರ್ಯಪ್ರವಾಹಗಳಿಗೂ Codex ಅನ್ನು ವಿಸ್ತರಿಸಿತು. ಅದರ ಸೇವಾ ವಿಶ್ವಾಸಾರ್ಹತೆ ಎಂಜಿನಿಯರಿಂಗ್ ಏಜೆಂಟ್, ನಿಗಾ ವೇದಿಕೆಗಳು ಮತ್ತು ದಾಖಲೆಗಳಿಂದ ಮಾಹಿತಿ ಸಂಗ್ರಹಿಸಿ, ಘಟನೆಗಳನ್ನು ತನಿಖೆ ಮಾಡಬಲ್ಲದು. ಅನೇಕ ಸಂದರ್ಭಗಳಲ್ಲಿ ಎಂಜಿನಿಯರ್ ಪರಿಶೀಲನೆಗಾಗಿ ಪ್ರಸ್ತಾವಿತ ಪರಿಹಾರದೊಂದಿಗೆ pull request ರಚಿಸಬಲ್ಲದು. ಭದ್ರತಾ ಏಜೆಂಟ್‌ಗಳು ದೌರ್ಬಲ್ಯಗಳನ್ನು ಗುರುತಿಸಿ ಸರಿಪಡಿಸಲು ನೆರವಾಗುತ್ತವೆ. ಇತರ ತುರ್ತು ಸೇವಾ ಏಜೆಂಟ್‌ಗಳು ಚಾಲ್ತಿಯಲ್ಲಿರುವ ವ್ಯವಸ್ಥೆಗಳಲ್ಲಿ ಮರುಕಳಿಸುವ ಸಮಸ್ಯೆಗಳನ್ನು ತನಿಖೆ ಮಾಡುತ್ತವೆ.

Cult.fit ಇನ್ನಷ್ಟು ಸಂಪೂರ್ಣವಾಗಿ ನಿರ್ದಿಷ್ಟತೆಗಳನ್ನು ಆಧರಿಸಿದ ಅಭಿವೃದ್ಧಿ ವಿಧಾನದೆಡೆಗೆ ಸಾಗುತ್ತಿದೆ. ಇದರಲ್ಲಿ ನಿರ್ದಿಷ್ಟತೆಯೊಂದು ತಂತ್ರಾಂಶ ಅಭಿವೃದ್ಧಿಯ ಜೀವನಚಕ್ರದುದ್ದಕ್ಕೂ ಕೆಲಸಕ್ಕೆ ಮಾರ್ಗದರ್ಶನ ನೀಡಿ, ಎಂಜಿನಿಯರ್ ಪರಿಶೀಲಿಸುವ pull request ವರೆಗೆ ಕೊಂಡೊಯ್ಯಬಲ್ಲದು. ಇದು ತಂಡಗಳಿಗೆ ನಿರ್ದಿಷ್ಟ ಅಗತ್ಯದಿಂದ ಕಾರ್ಯನಿರ್ವಹಿಸುವ ಕೋಡ್‌ವರೆಗೆ ಸಾಗಲು ಪುನರಾವರ್ತಿಸಬಹುದಾದ ವಿಧಾನವನ್ನು ಒದಗಿಸುತ್ತದೆ.

ಇತ್ತೀಚಿನ ಒಂದು ಉದಾಹರಣೆಯೆಂದರೆ cult.fit ಅಪ್ಲಿಕೇಶನ್‌ನ ಸಾಮಾಜಿಕ ಚಟುವಟಿಕೆಗಳ ಸುದ್ದಿ ಹರಿವು. ಹಿಂದಿನ ವಿಧಾನದಲ್ಲಿ ಇದನ್ನು ನಿರ್ಮಿಸಲು ಒಂದು ವರ್ಷಕ್ಕೂ ಹೆಚ್ಚು ಸಮಯ ಬೇಕಾಗುತ್ತಿತ್ತು ಎಂದು ಕುಮಾರ್ ಅಂದಾಜಿಸುತ್ತಾರೆ. ಹೊಸ ಕಾರ್ಯಪ್ರವಾಹ ಬಳಸಿ, ತಂಡವು ಅದನ್ನು ಕೇವಲ ಎರಡು ತಿಂಗಳಲ್ಲಿ ಸಂಪೂರ್ಣವಾಗಿ ನಿರ್ಮಿಸಿ ಬಿಡುಗಡೆ ಮಾಡಿತು.

ಬಳಿಕ Codex ಬಳಕೆ ತಾಂತ್ರಿಕ ಅಭಿವೃದ್ಧಿಯ ಹೊರಗೂ ವಿಸ್ತರಿಸಿದೆ. Codex ಸುಲಭವಾಗಿ ಬಳಸುವಂತೆ cult.fit ತನ್ನ ದತ್ತಾಂಶವನ್ನು ಸಿದ್ಧಪಡಿಸಿತು. ಇದರಿಂದ ತಂಡಗಳು ತಾವೇ ಉತ್ತರಗಳನ್ನು ಕಂಡುಕೊಂಡು, ದೈನಂದಿನ ವಿಶ್ಲೇಷಣೆ ನಡೆಸಲು ಸಾಧ್ಯವಾಯಿತು. ಹಿಂದೆ ದತ್ತಾಂಶದ ಸಣ್ಣ ಬೇಡಿಕೆಗಳಿಗೂ ಕೇಂದ್ರ ವಿಶ್ಲೇಷಕರ ತಂಡವನ್ನೇ ಅವಲಂಬಿಸಬೇಕಿತ್ತು. ಇದು ಕೆಲಸಕ್ಕೆ ಅಡ್ಡಿಯಾಗುತ್ತಿತ್ತು.

ತಂಡಗಳು ತಮ್ಮದೇ ಅಪ್ಲಿಕೇಶನ್‌ಗಳು ಮತ್ತು ಕಾರ್ಯಪ್ರವಾಹಗಳನ್ನೂ ನಿರ್ಮಿಸುತ್ತಿವೆ. ಉದಾಹರಣೆಗೆ, ಮಾನವ ಸಂಪನ್ಮೂಲ ತಂಡವು ಕಾರ್ಯಕ್ಷಮತೆ ಪರಿಶೀಲನೆ, ವೇಳಾಪಟ್ಟಿ, ಪ್ರತಿಕ್ರಿಯೆ ಸಂಗ್ರಹ ಮತ್ತು ಆ ಮಾಹಿತಿಯನ್ನು ಒಗ್ಗೂಡಿಸುವ ಕೆಲಸಕ್ಕಾಗಿ Codex ನಲ್ಲಿ ಕಾರ್ಯಪ್ರವಾಹ ರೂಪಿಸಿತು. ಇತ್ತೀಚಿನ ತಿಂಗಳುಗಳಲ್ಲಿ ತಾಂತ್ರಿಕೇತರ ತಂಡಗಳು 20ಕ್ಕೂ ಹೆಚ್ಚು ಆಂತರಿಕ ಅಪ್ಲಿಕೇಶನ್‌ಗಳನ್ನು ನಿರ್ಮಿಸಿವೆ.

ಈ ಬದಲಾವಣೆ, ವ್ಯವಹಾರ ನಡೆಸಲು ಬೇಕಾದ ತಂತ್ರಾಂಶದ ಬಗ್ಗೆ cult.fit ಚಿಂತಿಸುವ ರೀತಿಯನ್ನೇ ಬದಲಿಸುತ್ತಿದೆ. ಆಂತರಿಕ ಮಾಹಿತಿ ಫಲಕದ ತಂತ್ರಾಂಶ ವೆಚ್ಚ ತೀವ್ರವಾಗಿ ಏರಿದಾಗ, ಒಬ್ಬ ಎಂಜಿನಿಯರ್ ವಾರಾಂತ್ಯದಲ್ಲೇ Codex ಬಳಸಿ ಅದರ ಕಾರ್ಯಗಳನ್ನು ಮರುನಿರ್ಮಿಸಿದರು. ಈಗ Cult.fit ತನ್ನದೇ ಅಪ್ಲಿಕೇಶನ್‌ನಲ್ಲಿ ಆ ಕಾರ್ಯಗಳನ್ನು ನಡೆಸುತ್ತಿದ್ದು, ವರ್ಷಕ್ಕೆ $100,000ಕ್ಕೂ ಹೆಚ್ಚಿನ ತಂತ್ರಾಂಶ ವೆಚ್ಚವನ್ನು ಉಳಿಸುತ್ತಿದೆ.

ಈ ಬದಲಾವಣೆಗೆ ಉದ್ಯೋಗಿಗಳಿಗೆ Codex ಪ್ರವೇಶ ನೀಡುವುದಷ್ಟೇ ಸಾಕಾಗಲಿಲ್ಲ. ದೊಡ್ಡ ಮಟ್ಟದ ತಂತ್ರಾಂಶ ನಿರ್ಮಾಣ ಸ್ಪರ್ಧೆಯು ಉದ್ಯೋಗಿಗಳಿಗೆ ಅದರ ಸಾಧ್ಯತೆಗಳ ಮೊದಲ ಪರಿಚಯ ನೀಡಿತು. ಬಳಿಕ ಕಂಪನಿ ನಿರ್ವಹಣಾ ತಂಡಕ್ಕಾಗಿ ಒಂದು ದಿನದ ಕಾರ್ಯಾಗಾರ ನಡೆಸಿತು. ಅದರಲ್ಲಿ ವಿವಿಧ ವಿಭಾಗಗಳ ನಾಯಕರು Codex ಬಳಸಿ ತಮ್ಮ ಕೆಲಸಕ್ಕೆ ಸಂಬಂಧಿಸಿದ ಸಾಧನಗಳನ್ನು ನಿರ್ಮಿಸಿದರು.

ಆಲೋಚನೆಗಳನ್ನು ಬಳಕೆಗೆ ತರಲು ಉದ್ಯೋಗಿಗಳಿಗೆ ನೆರವಾಗುವ ಸಲುವಾಗಿ ತಾಂತ್ರಿಕ ತಂಡ ವಾರಕ್ಕೆ ಎರಡು ಸಲ ಸಲಹಾ ಅವಧಿಗಳನ್ನು ನಡೆಸುತ್ತದೆ. ಆಯ್ದ ವಿಭಾಗಗಳಲ್ಲಿ ಎಂಜಿನಿಯರ್‌ಗಳು ಕಾರ್ಯನಿರ್ವಹಿಸುತ್ತಾ ತಾಂತ್ರಿಕ ಮತ್ತು ವಿಷಯ ಪರಿಣತಿಯ ನೆರವು ನೀಡುತ್ತಾರೆ.

Cult.fit ತನ್ನ AI ತರಬೇತುದಾರನ ಮೂಲಕ ಸದಸ್ಯರ ಅನುಭವಕ್ಕೂ AI ಅನ್ನು ವಿಸ್ತರಿಸಲು OpenAI API ಬಳಸುತ್ತಿದೆ. cult.fit ಸದಸ್ಯರಲ್ಲಿ 45%ಕ್ಕೂ ಹೆಚ್ಚು ಮಂದಿ ಮೊದಲ ಬಾರಿಗೆ ವ್ಯಾಯಾಮಶಾಲೆಗೆ ಬರುವವರು. ಅವರು ವ್ಯಾಯಾಮದ ಅಭ್ಯಾಸ ಬೆಳೆಸಿಕೊಳ್ಳಲು ಮಾರ್ಗದರ್ಶನ ಮುಖ್ಯವಾಗಿದೆ. ವೈಯಕ್ತಿಕ ತರಬೇತುದಾರರಿಲ್ಲದೆಯೇ ಸದಸ್ಯರಿಗೆ ಅವರ ಅಗತ್ಯಕ್ಕೆ ತಕ್ಕ ವ್ಯಾಯಾಮ ಮತ್ತು ಮಾರ್ಗದರ್ಶನ ನೀಡಲು ಕಂಪನಿ ಹಲವು ವರ್ಷಗಳ ಹಿಂದೆಯೇ AI ತರಬೇತುದಾರನನ್ನು ನಿರ್ಮಿಸಿತು.

ಪ್ರಸ್ತುತ Cult.fit ವ್ಯಾಯಾಮಶಾಲೆ ಬಳಕೆದಾರರಲ್ಲಿ ಸುಮಾರು 20% ಮಂದಿ AI ತರಬೇತುದಾರನನ್ನು ಬಳಸುತ್ತಿದ್ದಾರೆ. ಭಾಷಾ ಮಾಡೆಲ್‌ಗಳ ಪ್ರಗತಿಯೊಂದಿಗೆ, ಈ ಅನುಭವವನ್ನು ಹೆಚ್ಚು ಸಂವಾದಾತ್ಮಕವಾಗಿಸುವ ಅವಕಾಶವನ್ನು cult.fit ಕಂಡುಕೊಂಡಿತು.

ಇತ್ತೀಚಿನ ಆವೃತ್ತಿಯಲ್ಲಿ ಧ್ವನಿ ಸಂವಾದಕ್ಕೆ ಆದ್ಯತೆ ನೀಡುವ ವ್ಯಾಯಾಮ ಅನುಭವವನ್ನು ರೂಪಿಸಲಾಗಿದೆ. OpenAI API ಸಂಯೋಜನೆಯ ಮೂಲಕ GPT Realtime ಬಳಸುವ ಈ ತರಬೇತುದಾರ, ದ್ವಿಮುಖ ಧ್ವನಿ ಸಂವಾದದಲ್ಲಿ ತರಬೇತಿ ಸೂಚನೆಗಳನ್ನು ನೀಡಬಲ್ಲದು ಮತ್ತು ವ್ಯಾಯಾಮದ ವಿವರ ದಾಖಲಿಸಲು ನೆರವಾಗಬಲ್ಲದು.

ಹಿಂದೆ ಪ್ರತಿ ಪ್ರಕರಣವನ್ನೂ ಸಿಬ್ಬಂದಿಯೇ ಪರಿಶೀಲಿಸಬೇಕಿದ್ದ ಗ್ರಾಹಕ ಬೆಂಬಲ ಕಾರ್ಯಪ್ರವಾಹಗಳಿಗೂ Cult.fit ಈಗ AI ಅಳವಡಿಸುತ್ತಿದೆ. ಗುಂಪು ವ್ಯಾಯಾಮ ತರಗತಿಗಳಿಗೆ ಗೈರಾದಾಗ ವಿಧಿಸುವ ದಂಡ ಮನ್ನಾ ಮಾಡುವ ವಿನಂತಿಗಳು ಇದಕ್ಕೊಂದು ಉದಾಹರಣೆ.

ಸದಸ್ಯರು ಸಮಂಜಸ ಕಾರಣದಿಂದ ತರಗತಿ ತಪ್ಪಿದ್ದಾಗಿ ಹೇಳಿದಾಗ, AI ಏಜೆಂಟ್ ಸ್ಥಳೀಯ ಹವಾಮಾನ, ಆ ತರಗತಿಯ ಹಾಜರಾತಿ ಪ್ರವೃತ್ತಿ ಮುಂತಾದ ಸೂಚಕಗಳನ್ನು ಪರಿಶೀಲಿಸಿ ವಿನಂತಿಯನ್ನು ಮೌಲ್ಯಮಾಪನ ಮಾಡಬಲ್ಲದು. ಬಳಿಕ ದಂಡ ಮನ್ನಾ ಮಾಡಬೇಕೇ ಎಂದು ನಿರ್ಧರಿಸಬಲ್ಲದು.

Cult.fit ಈ ಏಜೆಂಟ್‌ಗಳನ್ನು ತನ್ನ ಅಸ್ತಿತ್ವದಲ್ಲಿರುವ Sprinklr ಬೆಂಬಲ ವೇದಿಕೆಗೆ ಅಳವಡಿಸಿ, ಹಿಂಬದಿಯ ವ್ಯವಸ್ಥೆಗಳಿಗೆ ಜೋಡಿಸಿತು. ಹೀಗೆ, ಮುಖ್ಯವಾಗಿ ಸಿಬ್ಬಂದಿ ನಡೆಸುತ್ತಿದ್ದ ಸಂಭಾಷಣೆ ಆಧಾರಿತ ಗ್ರಾಹಕ ಬೆಂಬಲವನ್ನು AIಗೆ ಆದ್ಯತೆ ನೀಡುವ ಕಾರ್ಯಪ್ರವಾಹದತ್ತ ಕೊಂಡೊಯ್ಯಿತು.

• ಇತ್ತೀಚಿನ ತಿಂಗಳುಗಳಲ್ಲಿ ತಾಂತ್ರಿಕೇತರ ತಂಡಗಳಿಂದ 20ಕ್ಕೂ ಹೆಚ್ಚು ಆಂತರಿಕ ಅಪ್ಲಿಕೇಶನ್‌ಗಳ ನಿರ್ಮಾಣ

• Codex ಬಳಸಿ ಆಂತರಿಕ ಸೌಲಭ್ಯ ಮರುನಿರ್ಮಾಣದಿಂದ ವಾರ್ಷಿಕ ತಂತ್ರಾಂಶ ವೆಚ್ಚದಲ್ಲಿ $100,000ಕ್ಕೂ ಹೆಚ್ಚು ಉಳಿತಾಯ

• ಗ್ರಾಹಕ ಬೆಂಬಲ ವೆಚ್ಚದಲ್ಲಿ 50%ಕ್ಕೂ ಹೆಚ್ಚು ಕಡಿತ

ಪ್ರತ್ಯೇಕ AI ಕಾರ್ಯಪ್ರವಾಹಗಳಿಂದ ಮುಂದೆ ಸಾಗಿ, ಕೆಲಸ ಮಾಡುವ ವಿಧಾನದಲ್ಲೇ AI ಅಳವಡಿಸಿಕೊಂಡ ಸಂಸ್ಥೆಯಾಗುವುದು Cult.fit ಮುಂದಿನ ಹೆಜ್ಜೆ. ಕಾರ್ಯಾಚರಣೆಯ ಗುರಿಯನ್ನು ಕುಮಾರ್ “ಸ್ವಯಂಚಾಲಿತ ಕಾರ್ಯಾಚರಣೆಯ ಸಂಸ್ಥೆ” ಎಂದು ವಿವರಿಸುತ್ತಾರೆ. ಇದರಲ್ಲಿ ಮುಂಚೂಣಿ ತಂಡಗಳಿಗೆ ನೆರವಾಗುವ ಹೆಚ್ಚಿನ ಕೆಲಸಗಳನ್ನು AI ವಹಿಸಿಕೊಳ್ಳಲಿದೆ.

ಸದಸ್ಯರ ಅನುಭವದ ಗುರಿ “ನಿಮ್ಮ ಜೇಬಿನಲ್ಲೇ ತರಬೇತುದಾರ”. ಮಾನವ ತರಬೇತುದಾರರು ದೊಡ್ಡ ಪ್ರಮಾಣದಲ್ಲಿ ನೀಡಬಹುದಾದ ಮಾರ್ಗದರ್ಶನದ ಮಿತಿಯನ್ನು ಮೀರಿ, ವೈಯಕ್ತಿಕ ಮಾರ್ಗದರ್ಶನ ವಿಸ್ತರಿಸುವುದು ಇದರ ಉದ್ದೇಶ. ಸಂಸ್ಥೆಯೊಳಗೆ ತಂಡಗಳು AI ಮೂಲಕ ನಿವಾರಿಸಬಹುದಾದ ಅಡೆತಡೆಗಳನ್ನು cult.fit ನಿರಂತರವಾಗಿ ಹುಡುಕುತ್ತಿದೆ. ಹೆಚ್ಚು ಉದ್ಯೋಗಿಗಳು ತಾವೇ ಅಪ್ಲಿಕೇಶನ್‌ಗಳನ್ನು ನಿರ್ಮಿಸಿ, ಮಾಹಿತಿ ವಿಶ್ಲೇಷಿಸಿ, ಕಾರ್ಯಪ್ರವಾಹಗಳನ್ನು ಸ್ವಯಂಚಾಲಿತಗೊಳಿಸಿದಂತೆ, ಹೆಚ್ಚು ಆಲೋಚನೆಗಳು ನೇರವಾಗಿ ಕಾರ್ಯನಿರ್ವಹಿಸುವ ಪರಿಹಾರಗಳಾಗಬಲ್ಲವು.