ಆಗ್ನೇಯ ಏಷ್ಯಾ ಮತ್ತು ತೈವಾನ್‌ಗೆ ವಿಸ್ತರಿಸುತ್ತಿರುವ ChatGPT ಜಾಹೀರಾತುಗಳು

ಇಂದಿನಿಂದ ಇಂಡೋನೇಷ್ಯಾ, ಮಲೇಷ್ಯಾ, ಫಿಲಿಪ್ಪೀನ್ಸ್, ಸಿಂಗಾಪುರ, ಥೈಲ್ಯಾಂಡ್, ವಿಯೆಟ್ನಾಂ ಮತ್ತು ತೈವಾನ್‌ನಲ್ಲಿ ChatGPT ಜಾಹೀರಾತುಗಳನ್ನು ಹಂತಹಂತವಾಗಿ ಪರಿಚಯಿಸಲಾಗುತ್ತದೆ. ಏಷ್ಯಾ ಪೆಸಿಫಿಕ್ ಪ್ರದೇಶದ ಆಸ್ಟ್ರೇಲಿಯಾ, ನ್ಯೂಜಿಲೆಂಡ್, ಜಪಾನ್, ದಕ್ಷಿಣ ಕೊರಿಯಾ ಮತ್ತು ಭಾರತದಲ್ಲಿ ಸೇವೆ ಪ್ರಾರಂಭಿಸಿದ ಬಳಿಕ ಈ ಘೋಷಣೆ ಮಾಡಲಾಗಿದೆ. ಇದರಿಂದ ಈ ಪ್ರದೇಶದ ಎಲ್ಲ ಗಾತ್ರದ ವ್ಯವಹಾರಗಳಿಗೂ ಸೇವೆಯ ಲಭ್ಯತೆ ವಿಸ್ತರಿಸಲಿದೆ.

ಜಾಹೀರಾತುದಾರರು OpenAI ಜಾಹೀರಾತು ಪರಿಹಾರಗಳ ತಂಡ, ಡೆಂಟ್ಸು, ಹವಾಸ್ ಮೀಡಿಯಾ, ಓಮ್ನಿಕಾಮ್ ಮೀಡಿಯಾ, ಪಬ್ಲಿಸಿಸ್ ಗ್ರೂಪ್ ಮತ್ತು ಡಬ್ಲ್ಯೂಪಿಪಿ ಸೇರಿದಂತೆ ನಮ್ಮ ಜಾಹೀರಾತು ಸಂಸ್ಥೆ ಪಾಲುದಾರರು ಹಾಗೂ ತಂತ್ರಜ್ಞಾನ ಪಾಲುದಾರರ ಮೂಲಕ ChatGPT ಜಾಹೀರಾತುಗಳನ್ನು ಬಳಸಬಹುದು. ಅರ್ಹ ವ್ಯವಹಾರಗಳಿಗೆ ಜಾಹೀರಾತು ವ್ಯವಸ್ಥಾಪಕ⁠(ಹೊಸ ಕಿಟಕಿಯಲ್ಲಿ ತೆರೆಯುತ್ತದೆ) ಮೂಲಕ ಸ್ವಯಂ ಸೇವೆಯ ಸೌಲಭ್ಯವೂ ಲಭ್ಯವಿದೆ.

ಆರ್ಟಿಫಿಷಿಯಲ್ ಜನರಲ್ ಇಂಟೆಲಿಜೆನ್ಸ್ ಇಡೀ ಮಾನವಕುಲಕ್ಕೆ ಪ್ರಯೋಜನವಾಗುವಂತೆ ನೋಡಿಕೊಳ್ಳುವುದು ನಮ್ಮ ಧ್ಯೇಯವಾಗಿದೆ. ChatGPT ಅನ್ನು ಉಚಿತವಾಗಿ ಮತ್ತು ಕಡಿಮೆ ದರದಲ್ಲಿ ಒದಗಿಸಲು ನೆರವಾಗುವ ಮೂಲಕ ಜಾಹೀರಾತುಗಳು ಈ ಬುದ್ಧಿಮತ್ತೆಯನ್ನು ಎಲ್ಲರಿಗೂ ಲಭ್ಯವಾಗಿಸುತ್ತವೆ. ನಮ್ಮ ಪ್ರಸ್ತುತ ಮಾರುಕಟ್ಟೆಗಳಲ್ಲಿರುವಂತೆಯೇ, ಫ್ರೀ ಮತ್ತು ಗೋ ಯೋಜನೆಗಳ ಬಳಕೆದಾರರಿಗೆ ಮಾತ್ರ ಜಾಹೀರಾತುಗಳನ್ನು ತೋರಿಸಲಾಗುತ್ತದೆ. ಪ್ಲಸ್, Pro ಮತ್ತು ಎಂಟರ್‌ಪ್ರೈಸ್ ಚಂದಾದಾರಿಕೆಗಳು ಜಾಹೀರಾತುಮುಕ್ತವಾಗಿಯೇ ಮುಂದುವರಿಯುತ್ತವೆ.

ಜನರು ನಿರ್ದಿಷ್ಟ ಗುರಿಗಳೊಂದಿಗೆ ChatGPT ಬಳಸಲು ಬರುತ್ತಾರೆ. ಅವರು ಪ್ರವಾಸದ ಯೋಜನೆ ರೂಪಿಸುತ್ತಿರಬಹುದು, ತಮ್ಮ ವ್ಯವಹಾರಕ್ಕೆ ತಂತ್ರಾಂಶ ಆಯ್ಕೆ ಮಾಡುತ್ತಿರಬಹುದು ಅಥವಾ ಮನೆಗೆ ಪೀಠೋಪಕರಣಗಳನ್ನು ಖರೀದಿಸುತ್ತಿರಬಹುದು. ಸಂಭಾಷಣೆಯ ಮೂಲಕ ಜನರು ತಾವು ಏನನ್ನು ಸಾಧಿಸಬೇಕೆಂದಿದ್ದಾರೆ, ತಮಗೆ ಯಾವುದು ಮುಖ್ಯ ಮತ್ತು ತಾವು ಎದುರಿಸುತ್ತಿರುವ ಮಿತಿಗಳೇನು ಎಂಬುದನ್ನು ವಿವರಿಸುತ್ತಾರೆ.

ಜನರು ತಮ್ಮ ಆಯ್ಕೆಗಳನ್ನು ಅನ್ವೇಷಿಸಿ, ಅವುಗಳನ್ನು ಮೌಲ್ಯಮಾಪನ ಮಾಡುವ ಸಂದರ್ಭದಲ್ಲೇ ಅವರನ್ನು ತಲುಪುವ ಅವಕಾಶವನ್ನು ChatGPT ಜಾಹೀರಾತುಗಳು ಮಾರಾಟ ಪ್ರಚಾರಕರಿಗೆ ನೀಡುತ್ತವೆ. ಸೂಕ್ತ ಉತ್ಪನ್ನಗಳು ಮತ್ತು ಸೇವೆಗಳನ್ನು ಪರಿಚಯಿಸುವ ಮೂಲಕ, ಹೊಸ ಆಯ್ಕೆಗಳನ್ನು ಕಂಡುಕೊಳ್ಳುವ ಮತ್ತು ನಿರ್ಧಾರಗಳನ್ನು ರೂಪಿಸುವ ಕ್ಷಣಗಳಲ್ಲಿ ಜಾಹೀರಾತುಗಳು ಉಪಯುಕ್ತವಾಗಬಲ್ಲವು.

ಜನರು ChatGPT ಮೇಲೆ ಇಟ್ಟಿರುವ ವಿಶ್ವಾಸವನ್ನು ಕಾಪಾಡುವುದೇ ಜಾಹೀರಾತಿನ ಕುರಿತ ನಮ್ಮ ನಿಲುವಿನ ಅಡಿಪಾಯ.

OpenAI ಯ ಜಾಹೀರಾತು ತತ್ವಗಳ ಮಾರ್ಗದರ್ಶನದಂತೆ, ನಾವು ಸಂಭಾಷಣೆಗಳನ್ನು ಜಾಹೀರಾತುದಾರರೊಂದಿಗೆ ಹಂಚಿಕೊಳ್ಳದೆ ಖಾಸಗಿಯಾಗಿಡುತ್ತೇವೆ ಮತ್ತು ಗ್ರಾಹಕರ ದತ್ತಾಂಶವನ್ನು ಎಂದಿಗೂ ಮಾರಾಟ ಮಾಡುವುದಿಲ್ಲ. ChatGPT ಯಲ್ಲಿನ ಜಾಹೀರಾತುಗಳನ್ನು ಯಾವಾಗಲೂ ಸ್ಪಷ್ಟವಾಗಿ ಗುರುತಿಸಲಾಗುತ್ತದೆ ಮತ್ತು ChatGPT ಯ ಉತ್ತರಗಳಿಂದ ಪ್ರತ್ಯೇಕವಾಗಿ ತೋರಿಸಲಾಗುತ್ತದೆ. ChatGPT ನೀಡುವ ಉತ್ತರಗಳ ಮೇಲೆ ಜಾಹೀರಾತುಗಳು ಪ್ರಭಾವ ಬೀರುವುದಿಲ್ಲ. ಜಾಹೀರಾತುಗಳನ್ನು ತಮಗೆ ಅನುಗುಣವಾಗಿ ಹೊಂದಿಸುವುದರ ಮೇಲೂ ಬಳಕೆದಾರರಿಗೆ ನಿಯಂತ್ರಣವಿರುತ್ತದೆ. ಜಾಹೀರಾತುಗಳನ್ನು ನೋಡಲು ಇಷ್ಟಪಡದವರಿಗೆ ಜಾಹೀರಾತುಮುಕ್ತ ಪಾವತಿ ಯೋಜನೆಗಳು ಲಭ್ಯವಿವೆ.

ನಮ್ಮ ಗುರಿ ಸರಳವಾಗಿದೆ: ಜನರು ತಮ್ಮ ಗುರಿಗಳನ್ನು ಸಾಧಿಸಲು ಪ್ರಯತ್ನಿಸುವಾಗ ಮತ್ತು ನಿರ್ಧಾರಗಳನ್ನು ತೆಗೆದುಕೊಳ್ಳುವಾಗ ಜಾಹೀರಾತುಗಳು ಅವರಿಗೆ ಉಪಯುಕ್ತವಾಗಿರಬೇಕು. ಜೊತೆಗೆ, ನಮ್ಮಲ್ಲಿ ಜಾಹೀರಾತು ನೀಡುವ ವ್ಯವಹಾರಗಳಿಗೂ ಅವು ಪರಿಣಾಮಕಾರಿಯಾಗಿರಬೇಕು.

ChatGPT ಜಾಹೀರಾತುಗಳು ಪ್ರಾರಂಭವಾದ 200 ದಿನಗಳೊಳಗೇ, ಅಂದಿನ ಆದಾಯದ ಗತಿಯ ಆಧಾರದಲ್ಲಿ ವಾರ್ಷಿಕವಾಗಿ 1 ಬಿಲಿಯನ್ ಡಾಲರ್ ಆದಾಯ ತಲುಪುವ ಮಟ್ಟಕ್ಕೆ ಬೆಳೆದಿವೆ ಎಂದು ಆಗಸ್ಟ್ ಅಂತ್ಯದಲ್ಲಿ ನಾವು ಘೋಷಿಸಿದ್ದೇವೆ. ಈಗ ಹತ್ತಾರು ಸಾವಿರ ಜಾಹೀರಾತುದಾರರು ChatGPT ಯಲ್ಲಿ ಜಾಹೀರಾತುಗಳನ್ನು ನೀಡುತ್ತಿದ್ದಾರೆ. ಅವರಲ್ಲಿ ಅನೇಕರು ಹಲವು ದೇಶಗಳ ಜನರನ್ನು ತಲುಪುತ್ತಿದ್ದಾರೆ. ಈ ವಿಸ್ತರಣೆಯು ಆಗ್ನೇಯ ಏಷ್ಯಾ ಮತ್ತು ತೈವಾನ್‌ನ ಇನ್ನಷ್ಟು ವ್ಯವಹಾರಗಳಿಗೆ ಆ ಅವಕಾಶವನ್ನು ಒದಗಿಸುತ್ತದೆ. ಇಂದಿನ ಘೋಷಣೆಯೊಂದಿಗೆ, ChatGPT ಜಾಹೀರಾತುಗಳು ಈಗ 60 ದೇಶಗಳಿಗೂ⁠(ಹೊಸ ಕಿಟಕಿಯಲ್ಲಿ ತೆರೆಯುತ್ತದೆ) ಹೆಚ್ಚು ಕಡೆಗಳಲ್ಲಿ ಲಭ್ಯವಿವೆ.

ಇದುವರೆಗಿನ ನಮ್ಮ ಪ್ರಗತಿಯು ChatGPT ಜಾಹೀರಾತುಗಳ ಮುಂದಿನ ಬೆಳವಣಿಗೆಯ ಮೊದಲ ಅಧ್ಯಾಯವಷ್ಟೇ. ಮುಂದಿನ ಕೆಲವು ತಿಂಗಳುಗಳಲ್ಲಿ ನಾವು ಹೊಸ ಮಾರುಕಟ್ಟೆಗಳಿಗೆ ವಿಸ್ತರಿಸುವುದನ್ನು ಮುಂದುವರಿಸುತ್ತೇವೆ. ಹೊಸ ಜಾಹೀರಾತು ಸ್ವರೂಪಗಳು, ಕಾರ್ಯಕ್ಷಮತೆ ಸುಧಾರಿಸುವ ಸಾಧನಗಳು ಮತ್ತು ಫಲಿತಾಂಶಗಳನ್ನು ಅಳೆಯುವ ಪರಿಹಾರಗಳನ್ನು ಅಭಿವೃದ್ಧಿಪಡಿಸುತ್ತೇವೆ. ಈ ಎಲ್ಲ ಪ್ರಯತ್ನಗಳಲ್ಲೂ ಕೃತಕ ಬುದ್ಧಿಮತ್ತೆಯನ್ನು ಇನ್ನಷ್ಟು ಜನರಿಗೆ ಲಭ್ಯವಾಗಿಸುವುದು, ಜನರು ChatGPT ಮೇಲೆ ಇಟ್ಟಿರುವ ವಿಶ್ವಾಸವನ್ನು ಕಾಪಾಡುವುದು, ಅವರಿಗೆ ಉಪಯುಕ್ತ ಜಾಹೀರಾತುಗಳನ್ನು ತೋರಿಸುವುದು ಮತ್ತು ವ್ಯವಹಾರಗಳು ತಮ್ಮ ಗುರಿಗಳನ್ನು ಸಾಧಿಸಲು ನೆರವಾಗುವುದರ ಮೇಲೆ ನಮ್ಮ ಗಮನವಿರುತ್ತದೆ.

ಪ್ರಾರಂಭಿಸಲು ಆಸಕ್ತಿ ಹೊಂದಿರುವ ವ್ಯವಹಾರಗಳು ads.openai.com⁠(ಹೊಸ ಕಿಟಕಿಯಲ್ಲಿ ತೆರೆಯುತ್ತದೆ) ಗೆ ಭೇಟಿ ನೀಡಬಹುದು.