ಕೃತಕ ಬುದ್ಧಿಮತ್ತೆಯ ಭರವಸೆಯನ್ನು ಯುರೋಪ್ ಸಾಕಾರಗೊಳಿಸಲು, ಪ್ರದೇಶದಾದ್ಯಂತ ಸುಸ್ಥಿರ ಆರ್ಥಿಕ ಬೆಳವಣಿಗೆಗೆ ಉತ್ತೇಜನ ನೀಡಲು ಹಾಗೂ ಎಐಯನ್ನು ಯುರೋಪ್ನಿಂದ, ಯುರೋಪ್ನಲ್ಲೇ, ಯುರೋಪ್ಗಾಗಿ ಅಭಿವೃದ್ಧಿಪಡಿಸಿ ನಿಯೋಜಿಸುವುದನ್ನು ಖಚಿತಪಡಿಸಲು ನೆರವಾಗುವ ಪ್ರಸ್ತಾವಗಳ ಸಂಕಲನವಾದ ಇಯು ಆರ್ಥಿಕ ನೀಲನಕ್ಷೆಯನ್ನು OpenAI ಇಂದು ಹಂಚಿಕೊಳ್ಳುತ್ತಿದೆ.
ಇದರ ಸಾಮರ್ಥ್ಯ ಸ್ಪಷ್ಟವಾಗಿದೆ. ಎಐ ಹೊಸ ವೈಜ್ಞಾನಿಕ ಆವಿಷ್ಕಾರಗಳಿಗೆ ಉತ್ತೇಜನ ನೀಡಬಹುದು, ಶಿಕ್ಷಣವನ್ನು ಹೆಚ್ಚು ಒಳಗೊಳ್ಳುವಂತೆ ಮಾಡಬಹುದು, ಉತ್ಪಾದಕತೆಯನ್ನು ಹೆಚ್ಚಿಸಬಹುದು, ದೊಡ್ಡ ಮತ್ತು ಸಣ್ಣ ಉದ್ಯಮಗಳನ್ನು ಸಬಲಗೊಳಿಸಬಹುದು ಹಾಗೂ ಸೃಜನಶೀಲತೆಯ ಹೊಸ ರೂಪಗಳಿಗೆ ದಾರಿ ತೆರೆಯಬಹುದು. ಈ ಪ್ರಯೋಜನಗಳು ಪ್ರದೇಶದಾದ್ಯಂತ ಈಗಾಗಲೇ ಸಾಕಾರಗೊಳ್ಳುತ್ತಿವೆ. ಜರ್ಮನಿಯ ಮ್ಯಾಕ್ಸ್ ಪ್ಲಾಂಕ್ ಸೊಸೈಟಿ ಮತ್ತು ಫ್ರಾನ್ಸ್ನ ಸಿಯಾನ್ಸ್ ಪೋನಂತಹ ಯುರೋಪಿನ ಪ್ರಯೋಗಾಲಯಗಳು ಹಾಗೂ ವಿಶ್ವವಿದ್ಯಾಲಯಗಳ ಸಂಶೋಧಕರಿಂದ ಹಿಡಿದು, ಎಸ್ಟೋನಿಯಾದ ಶಾಲೆಗಳಲ್ಲಿ ChatGPT Edu ಪರಿಚಯಿಸಿರುವುದು ಮತ್ತು ಅಮೆರಿಕದ ಹೊರಗೆ OpenAI ತಂತ್ರಜ್ಞಾನ ಬಳಸಿ ನಿರ್ಮಿಸುತ್ತಿರುವ ಅತಿ ಹೆಚ್ಚು ಎಪಿಐ ಅಭಿವೃದ್ಧಿಪಡಿಸುವವರು ಜರ್ಮನಿಯಲ್ಲಿರುವವರೆಗೆ ಇದಕ್ಕೆ ಹಲವು ಉದಾಹರಣೆಗಳಿವೆ. ಆದರೆ ಈ ಅಪಾರ ಲಾಭಗಳನ್ನು ದೊಡ್ಡ ಪ್ರಮಾಣದಲ್ಲಿ ಖಚಿತಪಡಿಸಿಕೊಳ್ಳಲು ಯುರೋಪ್ ತುರ್ತಾಗಿ ಮತ್ತು ಸ್ಪಷ್ಟ ಉದ್ದೇಶದೊಂದಿಗೆ ಕಾರ್ಯನಿರ್ವಹಿಸಬೇಕು.
ಈ ನೀಲನಕ್ಷೆಯು ಯುರೋಪಿನ ಮೂಲದಲ್ಲಿರುವ ಉದ್ಯಮಶೀಲ ಮನೋಭಾವ, ವೈಜ್ಞಾನಿಕ ಶ್ರೇಷ್ಠತೆ ಮತ್ತು ವೈಯಕ್ತಿಕ ಸ್ವಾತಂತ್ರ್ಯಗಳ ಜೊತೆಗೆ ಸಾಮಾಜಿಕ ಒಳಗೊಳ್ಳುವಿಕೆ ಹಾಗೂ ಮೂಲಭೂತ ಹಕ್ಕುಗಳ ಬಗೆಗಿನ ಇಯುನ ಬದ್ಧತೆಯನ್ನು ಎತ್ತಿಹಿಡಿಯುತ್ತದೆ ಮತ್ತು ಎಐ-ಚಾಲಿತ ಬೆಳವಣಿಗೆಯ ಸಂಭಾವ್ಯ ಮುಂದಿನ ಹಾದಿಯನ್ನು ರೂಪಿಸುತ್ತದೆ.
- ಎಐಯ ನಿರಂತರ ಬೆಳವಣಿಗೆಗೆ ಅಗತ್ಯವಾದ ಅಡಿಪಾಯಗಳಾದ ಚಿಪ್ಗಳು, ದತ್ತಾಂಶ, ಇಂಧನ ಮತ್ತು ಪ್ರತಿಭೆಯನ್ನು ಸ್ಥಾಪಿಸಿ ಬೆಳೆಸುವುದು
ಎಐನಲ್ಲಿ ಮುನ್ನಡೆ ಸಾಧಿಸಲು ಚಿಪ್ಗಳು, ದತ್ತಾಂಶ, ಇಂಧನ ಮತ್ತು ಪ್ರತಿಭೆ ಮುಖ್ಯವಾಗಿವೆ. ಈ ಸ್ಪರ್ಧೆಯಲ್ಲಿ ಯುರೋಪ್ ಸ್ಪರ್ಧಿಸಬಲ್ಲದು ಮತ್ತು ಸ್ಪರ್ಧಿಸಲೇಬೇಕು. ಎಐ ಯುಗದಲ್ಲಿ ಈ ಮೂಲಭೂತ ಸಂಪನ್ಮೂಲಗಳೇ ಜಾಗತಿಕ ನಾಯಕತ್ವವನ್ನು ನಿರ್ಧರಿಸುತ್ತವೆ. ತನ್ನ ಸಮೃದ್ಧಿ ಮತ್ತು ಸ್ಪರ್ಧಾತ್ಮಕ ಮುನ್ನಡೆಯನ್ನು ಕಾಪಾಡಿಕೊಳ್ಳಲು ಯುರೋಪ್ ಈ ಸಂಪನ್ಮೂಲಗಳನ್ನು ಭದ್ರಪಡಿಸಿಕೊಂಡು ಅಭಿವೃದ್ಧಿಪಡಿಸಬೇಕು. - ಎಐ ಪ್ರಗತಿಗೆ ಅಡ್ಡಿಯಾಗದೆ ಅದನ್ನು ಸಾಧ್ಯವಾಗಿಸಲು ಇಯು ನಿಯಮಗಳನ್ನು ಸರಳಗೊಳಿಸಿ, ಅವು ಪರಸ್ಪರ ಹೊಂದಾಣಿಕೆಯಿಂದ ಕಾರ್ಯನಿರ್ವಹಿಸುವಂತೆ ನೋಡಿಕೊಳ್ಳುವುದು
ಮಾರಿಯೋ ಡ್ರಾಗಿ ತಮ್ಮ ವರದಿಯಲ್ಲಿ ಗಮನಿಸಿದಂತೆ, ಇಂದು ಯುರೋಪಿನ ನಿಯಂತ್ರಣ ವ್ಯವಸ್ಥೆಯು ಅನೇಕ ಬಾರಿ ಅತಿಯಾಗಿ ಸಂಕೀರ್ಣವಾಗಿದೆ. ಡಿಜಿಟಲ್ ನಿಯಮಾವಳಿಯನ್ನು ಸರಳಗೊಳಿಸುವ, ಅನಗತ್ಯ ಅಥವಾ ಹಳೆಯ ಪ್ರಸ್ತಾವಗಳನ್ನು ಕೈಬಿಡುವ ಮತ್ತು ಅತ್ಯಾಧುನಿಕ ಎಐಯ ಅಭಿವೃದ್ಧಿ ಹಾಗೂ ಬೆಂಬಲಕ್ಕೆ ಅಗತ್ಯವಾದ ಹೂಡಿಕೆಯನ್ನು ಆಕರ್ಷಿಸಲು ನಿಯಮಗಳನ್ನು ಸಮನ್ವಯಗೊಳಿಸುವ ಮೂಲಕ ಏಕ ಮಾರುಕಟ್ಟೆಯೊಳಗಿನ ಅಡೆತಡೆಗಳನ್ನು ಕಡಿಮೆ ಮಾಡಲು ಇಯು ನೀತಿ ರೂಪಿಸುವವರು ಗಮನಹರಿಸಬೇಕು. - ಎಲ್ಲ ಕ್ಷೇತ್ರಗಳು, ಪ್ರದೇಶಗಳು ಮತ್ತು ಸಮಾಜದಾದ್ಯಂತ ವ್ಯಾಪಕ ಅಳವಡಿಕೆಯ ಮೂಲಕ ಎಐ ಅವಕಾಶವನ್ನು ಗರಿಷ್ಠಗೊಳಿಸುವುದು
ದೊಡ್ಡ ಮತ್ತು ಸಣ್ಣ ಯುರೋಪಿಯನ್ ಉದ್ಯಮಗಳು, ಸಾರ್ವಜನಿಕ ಸೇವೆಗಳು ಹಾಗೂ ವಿಶಾಲ ಸಮಾಜದ ಮೇಲೆ ಎಐ ಸಕಾರಾತ್ಮಕ ಪರಿಣಾಮ ಬೀರುವುದನ್ನು ಖಚಿತಪಡಿಸಲು ಎಐ ಲಭ್ಯತೆ ಮತ್ತು ಸಾಕ್ಷರತೆಯನ್ನು ಹೆಚ್ಚಿಸುವುದು ಅತ್ಯಗತ್ಯ. ಎಲ್ಲ ಇಯು ನಾಗರಿಕರ ಜೀವನವನ್ನು ಎಐ ಸುಧಾರಿಸುವುದಕ್ಕೂ ಒಕ್ಕೂಟದ ಸ್ಪರ್ಧಾತ್ಮಕತೆಯನ್ನು ಹೆಚ್ಚಿಸುವುದಕ್ಕೂ ಎಐ ತಂತ್ರಜ್ಞಾನಗಳನ್ನು ಅರ್ಥಮಾಡಿಕೊಳ್ಳುವ, ಅವುಗಳೊಂದಿಗೆ ಕೆಲಸ ಮಾಡುವ ಮತ್ತು ಅವುಗಳನ್ನು ರೂಪಿಸುವ ಕೌಶಲಗಳು ಮುಖ್ಯವಾಗಿವೆ. - ಎಐಯನ್ನು ಜವಾಬ್ದಾರಿಯುತವಾಗಿ ನಿರ್ಮಿಸಿ, ಅದು ಯುರೋಪಿನ ಮೌಲ್ಯಗಳನ್ನು ಪ್ರತಿಬಿಂಬಿಸುವಂತೆ ನೋಡಿಕೊಳ್ಳುವುದು
ಎಐ ಸಾಧನಗಳು ಯುರೋಪಿಯನ್ನರ ದೈನಂದಿನ ಜೀವನದ ಭಾಗವಾಗುತ್ತಿರುವಂತೆ, ಬಳಕೆದಾರರು ತಮಗೂ ತಮ್ಮ ಕುಟುಂಬಗಳಿಗೂ ಈ ಉತ್ಪನ್ನಗಳನ್ನು ವಿಶ್ವಾಸದಿಂದ ಬಳಸುವಂತಾಗಲು ಇಯು ಮತ್ತು ಎಐ ಉದ್ಯಮವು ಕೈಜೋಡಿಸಿ ಕೆಲಸ ಮಾಡಬೇಕು. ತಮ್ಮ ನಿರ್ದಿಷ್ಟ ಅಗತ್ಯಗಳು ಮತ್ತು ಆದ್ಯತೆಗಳಿಗೆ ಅನುಗುಣವಾಗಿ ಈ ಸಾಧನಗಳನ್ನು ಅರ್ಥಪೂರ್ಣವಾಗಿ ನಿಯಂತ್ರಿಸಿ ವೈಯಕ್ತೀಕರಿಸಲು ಜನರಿಗೆ ಅಧಿಕಾರ ನೀಡುವುದೂ ಅಷ್ಟೇ ಮುಖ್ಯವಾಗಿದೆ. ಎಐಯನ್ನು ವ್ಯಾಪಕವಾಗಿ ಸ್ವೀಕರಿಸಿ, ಸಮಾಜದ ಪ್ರತಿಯೊಬ್ಬರೂ ಅದರ ಪ್ರಯೋಜನ ಪಡೆಯುವಂತೆ ಮಾಡಲು ಈ ವಿಶ್ವಾಸವನ್ನು ಬೆಳೆಸುವುದು ಅತ್ಯಂತ ಮುಖ್ಯವಾಗಿದೆ.
ಇಯು ನೀತಿ ರೂಪಿಸುವವರಿಗೆ ರಚನಾತ್ಮಕ ಪಾಲುದಾರರಾಗುವ ನಿಟ್ಟಿನಲ್ಲಿ, ಮೇಲಿನ ಶಿಫಾರಸುಗಳಿಂದ ಹೆಚ್ಚಿನ ಪರಿಣಾಮ ಸಾಧಿಸಲು ಆರಂಭಿಕ ಹೆಜ್ಜೆಗಳಾಗಿ ಈ ಅಳವಡಿಕೆ-ಕೇಂದ್ರಿತ ವಿಚಾರಗಳನ್ನು ಮುಂದಿಡುತ್ತೇವೆ:
- ಎಐ ಗಣನಾ ಸಾಮರ್ಥ್ಯ ವಿಸ್ತರಣೆ ಯೋಜನೆ: ತರಬೇತಿ-ಕೇಂದ್ರಿತ ಎಐ ಕಾರ್ಖಾನೆಗಳಿಗೆ ಪೂರಕವಾಗಿ, ನಿರ್ಣಯ ಕಾರ್ಯಕ್ಕೆ ಹೊಂದುವಂತೆ ರೂಪಿಸಿದ ಕಡಿಮೆ ವಿಳಂಬದ, ಭೌಗೋಳಿಕವಾಗಿ ವಿತರಿಸಿದ ಮೂಲಸೌಕರ್ಯಕ್ಕೆ ಸ್ಪಷ್ಟ ಆದ್ಯತೆ ನೀಡಿ, 2030ರ ವೇಳೆಗೆ ಇಯುನ ಗಣನಾ ಸಾಮರ್ಥ್ಯವನ್ನು ಕನಿಷ್ಠ ಶೇ. 300ರಷ್ಟು ಹೆಚ್ಚಿಸುವುದು.
- ಎಐ ವೇಗವರ್ಧಕ ನಿಧಿ: ಎಐಯ ಸ್ಪಷ್ಟ ಸಾಮಾಜಿಕ ಅಥವಾ ಆರ್ಥಿಕ ಮೌಲ್ಯವನ್ನು ಪ್ರದರ್ಶಿಸುವ ಪ್ರಾಯೋಗಿಕ ಯೋಜನೆಗಳಿಗೆ ತ್ವರಿತವಾಗಿ ಹಣಕಾಸು ಒದಗಿಸಲು ಮೀಸಲಾದ €1 ಬಿಲಿಯನ್ ನಿಧಿಯನ್ನು ಆರಂಭಿಸುವುದು.
- 10 ಕೋಟಿ ಎಐ ನಾಗರಿಕರು: ಇಯುನ ಎಲ್ಲ ಅಧಿಕೃತ ಭಾಷೆಗಳಲ್ಲಿ ಉಚಿತವಾಗಿ ಲಭ್ಯವಿರುವ ಆನ್ಲೈನ್ ಪಠ್ಯಕ್ರಮಗಳ ಮೂಲಕ 2030ರ ವೇಳೆಗೆ 10 ಕೋಟಿ ಯುರೋಪಿಯನ್ನರಿಗೆ ಎಐಯ ಮೂಲಭೂತ ಕೌಶಲಗಳ ತರಬೇತಿ ನೀಡುವುದು.
- ಎಐನಲ್ಲಿ ಯುವಜನರ ಡಿಜಿಟಲ್ ಕಾರ್ಯಸಾಮರ್ಥ್ಯ ಉಪಕ್ರಮ: ಯುವಜನರ ಸಹಭಾಗಿತ್ವದಲ್ಲಿ ವಿನ್ಯಾಸಗೊಳಿಸಿದ ಎಐ ಅನ್ವಯಗಳ ಅಭಿವೃದ್ಧಿಯನ್ನು ಬೆಂಬಲಿಸಲು ಇಯು ಅನುದಾನಿತ ಉಪಕ್ರಮವನ್ನು ಸ್ಥಾಪಿಸುವುದು. ಅವರ ಅಗತ್ಯಗಳು ಮತ್ತು ಮೌಲ್ಯಗಳನ್ನು ಪ್ರತಿಬಿಂಬಿಸುವ ವೈಶಿಷ್ಟ್ಯಗಳನ್ನು ನಿರ್ಮಿಸಲು ಶಿಕ್ಷಣ ಸಂಸ್ಥೆಗಳು, ಯುವ ಮಂಡಳಿಗಳು ಮತ್ತು ಮಕ್ಕಳ ಸುರಕ್ಷತಾ ಸಂಸ್ಥೆಗಳೊಂದಿಗೆ ಸಹಭಾಗಿತ್ವದ ವಿನ್ಯಾಸ ಕಾರ್ಯಾಗಾರಗಳನ್ನು ಇದು ಒಳಗೊಂಡಿರಬಹುದು.
ಎಐ ತಂತ್ರಜ್ಞಾನದ ತ್ವರಿತ ವಿಕಾಸವನ್ನು ಪ್ರತಿಬಿಂಬಿಸುವಂತೆ ಈ ನೀಲನಕ್ಷೆಯನ್ನು ನಿರಂತರವಾಗಿ ಪರಿಷ್ಕರಿಸಲಾಗುತ್ತದೆ. ಸಾರ್ವಜನಿಕ ಹಿತಕ್ಕಾಗಿ ಎಐ ತಂತ್ರಜ್ಞಾನವನ್ನು ವಿವೇಚನೆಯಿಂದ ನಿರ್ವಹಿಸುವ ಕುರಿತು ಯುರೋಪಿನಾದ್ಯಂತ ಸರ್ಕಾರಗಳೊಂದಿಗೆ ಕೆಲಸ ಮಾಡಿ ಕಲಿಯುತ್ತಾ, ನಮ್ಮ ತತ್ವಗಳನ್ನು ನವೀಕರಿಸುವುದನ್ನು ಮುಂದುವರಿಸುತ್ತೇವೆ.
ಇದರ ಭಾಗವಾಗಿ ಯುರೋಪಿನಾದ್ಯಂತ ಎಐ ಅರ್ಥಶಾಸ್ತ್ರ ಕುರಿತ ಕಾರ್ಯಕ್ರಮಗಳ ಸರಣಿಯನ್ನು ನಡೆಸುತ್ತಿದ್ದೇವೆ. ನಮ್ಮ ನೀತಿ ಶಿಫಾರಸುಗಳು ಮತ್ತು ಹಂತ ಹಂತದ ನಿಯೋಜನೆಗೆ ಮಾರ್ಗದರ್ಶನ ನೀಡಲು ಅವುಗಳಲ್ಲಿ ಒಳನೋಟಗಳು ಹಾಗೂ ಪ್ರತಿಕ್ರಿಯೆಗಳನ್ನು ಸಂಗ್ರಹಿಸುತ್ತಿದ್ದೇವೆ.
ಈ ಕೆಲಸಕ್ಕೆ ಮಾರ್ಗದರ್ಶನ ಪಡೆಯಲು ಬ್ರಸೆಲ್ಸ್ ಮತ್ತು ಪ್ಯಾರಿಸ್ನಲ್ಲಿ ಈಗಾಗಲೇ ಕಾರ್ಯಕ್ರಮಗಳನ್ನು ನಡೆಸಿದ್ದು, ಶೀಘ್ರದಲ್ಲೇ ವಾರ್ಸಾ ಮತ್ತು ಮ್ಯೂನಿಕ್ನಲ್ಲೂ ಇನ್ನಷ್ಟು ಕಾರ್ಯಕ್ರಮಗಳನ್ನು ಆಯೋಜಿಸಲಿದ್ದೇವೆ.
ಸರಿಯಾದ ದೂರದೃಷ್ಟಿ ಮತ್ತು ಕಾರ್ಯಗತಗೊಳಿಸುವಿಕೆಯೊಂದಿಗೆ, ಆರೋಗ್ಯ ಸೇವೆ ಹಾಗೂ ಶಿಕ್ಷಣವನ್ನು ಸುಧಾರಿಸುವುದರಿಂದ ಹಿಡಿದು ಹಸಿರು ಪರಿವರ್ತನೆಗೆ ನೆರವಾಗುವವರೆಗೆ ನಮ್ಮ ಕಾಲದ ಅತಿದೊಡ್ಡ ಸವಾಲುಗಳನ್ನು ಪರಿಹರಿಸಲು ಯುರೋಪ್ ಎಐಯನ್ನು ಬಳಸಿಕೊಳ್ಳಬಹುದು ಮತ್ತು ಆ ಮೂಲಕ ಎಲ್ಲರಿಗೂ ಪ್ರಯೋಜನ ಒದಗಿಸಬಹುದು ಎಂದು OpenAI ದೃಢವಾಗಿ ನಂಬುತ್ತದೆ.
ಈ ಗುರಿಯತ್ತ ಯುರೋಪ್ನೊಂದಿಗೆ ಕೆಲಸ ಮಾಡಲು ನಾವು ಎದುರು ನೋಡುತ್ತಿದ್ದೇವೆ.