Þjónustusamningur OpenAI

Gildir frá: 1. janúar 2026

Þessi þjónustusamningur OpenAI gildir aðeins um notkun á API-viðmótum OpenAI, ChatGPT Enterprise, ChatGPT Business, ChatGPT fyrir lækna og annarri þjónustu fyrir viðskiptavini sem eru fyrirtæki og þróunaraðilar, og gildir ekki um þjónustu OpenAI sem neytendur eða einstaklingar nota nema tilgreint sé hér að ofan.

Samningur þessi um þjónustu OpenAI („samningurinn“) er gerður frá og með gildistökudegi milli stofnunarinnar sem samþykkir þessa skilmála („viðskiptavinurinn“) og þess samningsaðila OpenAI sem skilgreindur er hér að neðan („OpenAI“). Í samningi þessum er OpenAI og viðskiptavinurinn hvor um sig nefndur „aðili“ og sameiginlega „aðilar.“ Hugtök með hástaf sem ekki eru skilgreind í samningnum hafa þá merkingu sem þeim er gefin í pöntunareyðublaðinu; viðskiptavinur lýsir því yfir að hann sé lögum samkvæmt fær um að gera þennan samning og ef hann gerir samninginn fyrir hönd lögaðila, að hann hafi lagalega heimild til að skuldbinda þann lögaðila. Með því að smella á „Ég samþykki“, samþykkja pöntunareyðublaðið eða nota þjónustuna samþykkir viðskiptavinur þennan samning.

• 1.1. Þjónustutímabil. OpenAI mun veita viðskiptavini þjónustuna á þjónustutímabilinu. Þjónustutímabilið verður tilgreint á pöntunareyðublaðinu. Nema aðilar komi sér skriflega saman um annað skulu aukningar á þjónustunni sem keyptar eru á meðan þjónustutímabil stendur yfir gilda í hlutfallslegan tíma sem lýkur samhliða því þjónustutímabili sem þá er í gildi.
• 1.2. Endurnýjun. Endurnýjunarskilmálar, ef einhverjir eru, og hvort þjónusturnar endurnýjast sjálfkrafa, munu koma fram á viðeigandi pöntunareyðublaði. Tilkynning um að ekki verði endurnýjað eða um minnkun umfangs verður að berast eigi síðar en þrjátíu dögum fyrir upphaf næsta endurnýjunartímabils. Ef viðskiptavinur lækkar leyfafjölda sinn, magn eða lágmarksskuldbindingu getur OpenAI breytt eða fellt niður afslætti sem viðskiptavininum voru veittir á grundvelli fyrri kaupa hans.
• 1.3. Heimilaðir kaupendur.
  • a. Úthlutun. Til að útvega þjónustuna krefst OpenAI þess að netfang upphaflegs viðurkennds kaupanda sé tilgreint á pöntunareyðublaðinu. Ef réttar upplýsingar um heimilaðan kaupanda eru ekki tilgreindar á pöntunareyðublaðinu getur það valdið töfum.
  • b. Kaup. Þjónusturnar kunna að vera stilltar þannig að heimiluðum kaupendum sé gert kleift að kaupa viðbótarleyfi, viðbótarmagn eða viðbótar umfang þjónustunnar. Viðskiptavinurinn ber ábyrgð á að skilja stillingar þjónustunnar sem heimila viðbótarkaup. OpenAI mun innheimta hjá viðskiptavini gjald fyrir viðbótarleyfi, viðbótarmagn eða viðbótar umfang þjónustunnar fyrir það sem eftir er af þáverandi þjónustutímabili, miðað við þáverandi verð viðskiptavinar, nema annað sé tilgreint á pöntunareyðublaðinu.
• 1.4. Tengdir aðilar. 
  • a. Notkun. OpenAI útvegar þjónusturnar tilteknum aðilum með sérstökum vinnusvæðum og auðkennum skipulagsheilda. Tengdir aðilarviðskiptavinar mega nota þjónusturnar undir reikningi viðskiptavinar, sem þýðir að notkun viðskiptavinar og tengdra aðila hans fer fram á sama vinnusvæði og undir sama skipulagsauðkenni. Viðskiptavinur ber ábyrgð á og er bótaskyldur vegna allra athafna og athafnaleysis tengdra aðila sinna sem fá aðgang að þjónustunum í tengslum við þennan samning.
  • b. Aðskilin kaup. Ef kaup og notkun tengdra aðila viðskiptavinar á þjónustunum eiga að vera aðskilin frá kaupum og notkun viðskiptavinarins, verður viðkomandi tengdi aðili að undirrita sérstakt pöntunareyðublað. OpenAI mun síðan stofna sérstakt vinnusvæði og auðkenni fyrirtækis fyrir viðkomandi tengda aðila og setja þjónusturnar upp í samræmi við það. Ef tengdir aðilar viðskiptavinar gera pöntunareyðublöð samkvæmt þessum samningi verða þau bundin af þessum samningi. 
• 1.5. Notkunarmiðuð þjónusta. Ef viðskiptavinur kaupir þjónustu á grundvelli notkunar, viðurkennir hann að OpenAI muni innheimta gjöldin fyrir þjónustuna á grundvelli notkunar sem OpenAI reiknar út.

• 2.1. Almennt. Samningurinn gildir um aðgang viðskiptavinar að þjónustunni og notkun þjónustunnar. Viðskiptavinur getur fengið aðgang að og notað þjónustuna í samræmi við samninginn.
• 2.2. Notkun. OpenAI veitir viðskiptavini án einkaréttar til aðgangs að og notkunar á þjónustunum á gildistímanum. Þetta felur í sér réttinn til að nota OpenAI API til að samþætta þjónusturnar í forrit viðskiptavinar og gera forrit viðskiptavinar aðgengileg endalegum notendum. 
• 2.3. Breytingar. OpenAI kann að uppfæra þjónusturnar með reglulegu millibili. Ef uppfærsla frá OpenAI dregur verulega úr virkni þjónustunnar mun OpenAI tilkynna viðskiptavin um það á netfang reikningsins. Innan fimm virkra daga frá móttöku þessarar tilkynningar getur viðskiptavinur ákveðið að segja samningnum upp með þrjátíu daga skriflegum fyrirvara. Þessi réttur til uppsagnar gildir ekki um uppfærslur á eiginleikum sem eru veittir á beta- eða prófunargrundvelli.

• 3.1. Reikningur viðskiptavinar. Viðskiptavinur skal veita réttar og uppfærðar reikningsupplýsingar. Viðskiptavinur skal ekki deila aðgangsupplýsingum að reikningi eða einstaklingsbundnum innskráningarupplýsingum milli margra notenda. Viðskiptavinurinn má ekki endurselja eða leigja út aðgang að reikningi sínum eða neinum reikningi endanlegs notanda. Viðskiptavinur skal tilkynna OpenAI tafarlaust ef honum verður kunnugt um óheimilan aðgang að reikningnum eða þjónustunum. 
• 3.2. Endanlegir notendur Reikningar endanlegra otenda mega aðeins vera úthlutaðir til, skráðir á og notaðir af einum endanlegum notanda. Viðskiptavinur ber ábyrgð á öllum aðgerðum sem eiga sér stað á reikningi hans, þar með taldar aðgerðir endanlegs otenda sem eru með reikning endanlegs otanda eða fá aðgang að þjónustunni í gegnum forrit viðskiptavinar. Viðskiptavinur skal afla frá endanlegum notendum og viðhalda öllum samþykkjum sem nauðsynleg eru til að gera stjórnendum kleift að sinna þeim aðgerðum sem lýst er í samningnum og til að gera OpenAI kleift að veita þjónustuna.
• 3.3. Takmarkanir. Viðskiptavinur skal ekki, og skal ekki heimila endanlegum notendum að: (a) nota þjónusturnar eða efni viðskiptavinar á þann hátt sem brýtur gegn gildandi lögum eða stefnum OpenAI; (b) nota þjónusturnar eða efni viðskiptavinar á þann hátt sem brýtur gegn réttindum þriðju aðila; (c) leyfa ólögráða einstaklingum að nota þjónustur OpenAI án samþykkis foreldris eða forráðamanns; (d) beita afturverkfræði á nokkurn þátt þjónustanna eða kerfanna sem notuð eru til að veita þjónusturnar; (e) nema þegar um leyfilega undanþágu er að ræða, nota frálag til að þróa gervigreindarlíkön sem keppa við vörur og þjónustu OpenAI; (f) vinna gögn úr þjónustunum á annan hátt en heimilað er í gegnum þjónusturnar; (g) kaupa, selja eða framselja API-lykla frá, til eða með þriðja aðila; (h) trufla eða raska þjónustunum, þar á meðal að sniðganga hraðatakmörkun eða takmarkanir eða fara fram hjá verndarráðstöfunum eða öryggismildunum fyrir þjónusturnar; (i) brjóta gegn eða sniðganga notkunartakmörk eða að öðru leyti stilla þjónusturnar til að komast hjá notkunartakmörkum. 
• 3.4. Þjónusta þriðju aðila. Þjónusta þriðju aðila kann að vera tiltæk í gegnum þjónustuna, sem viðskiptavinur getur valið að nota eftir eigin höfði. Með því að fá aðgang að þjónustu þriðja aðila samþykkir viðskiptavinur viðeigandi skilmála þriðja aðila um þjónustu. Aðgangur eða notkun viðskiptavinar á þjónustu þriðju aðila lýtur þessum samningi og viðeigandi skilmálum þjónustu þriðju aðila.

• 4.1. Almennt. Viðskiptavinur og endanlegir otendur viðskiptavinar mega leggja fram inntak og fá úttak. Í innbyrðis réttarsambandi viðskiptavinar og OpenAI, að því marki sem gildandi lög heimila, (a) heldur viðskiptavinur öllum eignarréttindum að inntaki; og (b) á viðskiptavinur allt úttak. OpenAI framselur hér með til viðskiptavinar allan rétt, eignarrétt og hagsmuni OpenAI, ef einhverjir eru, á og yfir úttaki.
• 4.2. Skyldur OpenAI OpenAI mun aðeins nota efni viðskiptavinar eftir því sem nauðsynlegt er til að veita viðskiptavininum þjónustuna, fara að gildandi lögum, framfylgja stefnum OpenAI og koma í veg fyrir misnotkun. OpenAI mun ekki nota efni viðskiptavinar til að þróa eða bæta þjónusturnar, nema viðskiptavinurinn samþykki slíka notkun afdráttarlaust. 
• 4.3. Skyldur viðskiptavinar Viðskiptavinur ber ábyrgð á öllu inntaki og lýsir því yfir og ábyrgist að hann hafi öll réttindi, leyfi og heimildir sem nauðsynleg eru til að veita inntak til þjónustunnar. Viðskiptavinur ber eingöngu ábyrgð á allri notkun úttaks og á því að meta nákvæmni og viðeigandi eðli úttaks fyrir notkunartilvik viðskiptavinar.
• 4.4. Líkleiki úttaks Vegna eðlis þjónustu OpenAI og gervigreindar almennt er hugsanlegt að úttak sé ekki einstakt og að aðrir notendur fái svipað efni frá þjónustu OpenAI. Svör sem aðrir notendur óska eftir og eru búin til fyrir þá teljast ekki úttak viðskiptavinar.

• 5.1. Öryggisráðstafanir. OpenAI mun fara eftir öryggisráðstöfunum. OpenAI getur reglulega uppfært öryggisráðstafanirnar. Ef OpenAI uppfærir öryggisráðstafanirnar með þeim hætti að það skerði verulega stjórnsýsluleg, tæknileg eða efnisleg öryggiseinkenni þjónustunnar í heild, getur viðskiptavinur kosið að segja upp samningnum og tengdum pöntunareyðublöðum með því að senda OpenAI skriflega tilkynningu innan fimm virkra daga frá uppfærslunni. 
• 5.2. Skýrslur endurskoðunar OpenAI hefur lokið úttektum, framkvæmdum af óháðum úttektaraðila, þar sem lagt var mat á hönnun og virkni öryggisstefna, verklagsreglna og eftirlitsráðstafana OpenAI fyrir þjónusturnar. Að skriflegri beiðni viðskiptavinar, þó ekki oftar en einu sinni á ári, mun OpenAI láta viðskiptavini í té afrit af nýjustu endurskoðunarskýrslum, sem teljast trúnaðarupplýsingar OpenAI.
• 5.3. Persónuvernd. Ef viðskiptavinurinn notar þjónustuna til að vinna persónuupplýsingar munu OpenAI og viðskiptavinurinn fara eftir DPA, sem er felldur inn í samninginn með þessari tilvísun.
• 5.4. HIPAA. Viðskiptavinur samþykkir að nota ekki þjónustuna til að búa til, taka á móti, varðveita, senda eða vinna á annan hátt með verndaðar heilslaupplýsingar, nema viðskiptavinurinn hafi undirritað viðaukann um heilbrigðisþjónustu. ÞRÁTT FYRIR FRAMANGREINT ER EKKI ÖLL SÚ ÞJÓNUSTA SEM OPENAI BÝÐUR UPP Á HÖNNUÐ TIL VINNSLU VERNDAÐRA HEILSUUPPLÝSINGA. EF VIÐSKIPTAVINUR NOTAR ÞJÓNUSTU SEM ER EKKI HÖNNUÐ TIL VINNSLU VERNDRAÐRA UPPLÝSINGA UM HEILSU MÁ VIÐSKIPTAVINUR EKKI NOTA ÞJÓNUSTUNA TIL AÐ GEYMA, SENDA EÐA VINNA SLÍKAR UPPLÝSINGAR.

• 6.1. Gjöld. Viðskiptavinur skal greiða OpenAI eða endursöluaðila viðskiptavinar viðeigandi gjöld í þeim gjaldmiðli og samkvæmt þeim greiðsluskilmálum sem tilgreindir eru á pöntunareyðublaðinu. Viðskiptavinur veitir OpenAI, eða endursöluaðila viðskiptavinarins ef við á, heimild til að innheimta af viðskiptavini öll viðeigandi gjöld með greiðslumátanum sem skráður er á reikningnum. Gjöld eru ekki endurgreiðanleg nema lög kveði á um annað eða annað sé sérstaklega heimilað í samningnum. Ef pöntunareyðublað viðskiptavinarins felur í sér lágmarksskuldbindingu er fjárhæð lágmarksskuldbindingarinnar ekki niðurfellanleg, nema að því marki sem lög krefjast eða að öðru leyti er sérstaklega heimilað í samningnum.
• 6.2. Greiðsla. Viðskiptavinur skal greiða reikninga OpenAI með því greiðslumillibili sem tilgreint er í pöntunareyðublaðinu. OpenAI kann að stöðva tímabundið eða segja upp þjónustunni ef gjöld eru komin í vanskil. Viðskiptavinur skal veita OpenAI fullnægjandi og fullkomnar reiknings- og tengiliðaupplýsingar. 
• 6.3. Skattar. Gjöld eru án skatta, sem OpenAI eða endursöluaðili viðskiptavinar mun innheimta eins og krafist er samkvæmt gildandi lögum í tengslum við þjónustuna. OpenAI, eða endursöluaðili viðskiptavinarins, mun nota nafnið og heimilisfangið sem skráð eru á reikningnum sem afhendingarstað í skattalegum tilgangi. Öll gjöld samkvæmt þessum samningi skulu greidd að fullu, án nokkurs frádráttar eða staðgreiðslu vegna skatta, álagna, gjalda, tolla eða annarra gjalda hvers eðlis sem er sem lögð eru á af hvaða stjórnvaldi sem er. Ef slíkur frádráttur eða staðgreiðsla er krafist samkvæmt lögum skal viðskiptavinur hækka greiðsluna til OpenAI, eða til endursöluaðila viðskiptavinar, þannig að nettófjárhæðin sem berst jafngildi reikningsfærðu fjárhæðinni.
• 6.4. Ágreiningsmál. Til að véfengja reikning skal viðskiptavinur: (a) hafa samband við ar-enterprise@openai.com⁠ innan þrjátíu daga frá þeim degi sem hinn véfengdi reikningur var gefinn út; og (b) greiða allar óumdeildar fjárhæðir. Gjaldfallnar óumdeildar fjárhæðir kunna að bera fjármögnunargjald sem nemur 1,5% af ógreiddrum eftirstöðvum á mánuði.
• 6.5. Þjónustuinneignir. Viðskiptavinur kann að þurfa að greiða fyrir þjónustuna fyrirfram með því að kaupa þjónustuinneignir. Þjónustuinneignir falla undir skilmála þjónustuinneigna⁠.
• 6.6. Leiðréttingar. Verðbreytingar á verðlagningarsíðunni taka gildi fjórtán dögum eftir að þær eru birtar. OpenAI áskilur sér rétt til að leiðrétta villur eða mistök í verðlagningu, jafnvel eftir að reikningur hefur verið gefinn út eða greiðsla móttekin.

• 7.1. Notkun og þagnarskylda. Viðtakandi samþykkir að: (a) nota trúnaðarupplýsingar upplýsanda eingöngu til að nýta réttindi sín og efna skyldur sínar samkvæmt þessum samningi; (b) gera eðlilegar ráðstafanir til að vernda trúnaðarupplýsingarnar; og (c) ekki afhenda trúnaðarupplýsingarnar neinum þriðja aðila nema eins og sérstaklega er heimilað í þessum samningi.
• 7.2. Undantekningar. Skyldurnar samkvæmt grein 7.1 eiga ekki við um upplýsingar sem: (a) eru eða verða almennt aðgengilegar almenningi án sakar viðtakanda; (b) voru í vörslu viðtakanda eða honum kunnar áður en þær bárust frá upplýsingagjafa; (c) voru réttilega afhentar viðtakanda án takmarkana af þriðja aðila; eða (d) voru þróaðar sjálfstætt án notkunar á trúnaðarupplýsingum upplýsingagjafa.
• 7.3. Heimiluð upplýsingagjöf Viðtakanda er aðeins heimilt að miðla trúnaðarupplýsingum til tengdra aðila sinna, starfsmanna, verktaka og umboðsmanna sem þurfa að fá vitneskju um þær og eru bundnir trúnaðarskyldum sem eru að minnsta kosti jafn takmarkandi og þær sem kveðið er á um í þessum samningi. Viðtakandi ber ábyrgð á hvers kyns broti á þessum 7. kafla af hálfu starfsmanna sinna, verktaka sinna og umboðsmanna sinna. Viðtakanda er heimilt að miðla trúnaðarupplýsingum að því marki sem lög krefjast, ef viðtakandi leggur sig með sanngjörnum hætti fram um að tilkynna upplýsanda, að því marki sem heimilt er, áður en slík miðlun fer fram.
• 7.4. Réttarúrræði Viðtakandi viðurkennir að miðlun trúnaðarupplýsinga í bága við þessa skilmála myndi valda verulegu tjóni sem skaðabætur einar og sér væru ekki fullnægjandi úrræði fyrir, og því mun upplýsandi, komi til slíkrar miðlunar af hálfu viðtakanda, eiga rétt á að leita viðeigandi sanngjarnra réttarúrræða til viðbótar við önnur úrræði sem honum kunna að standa til boða samkvæmt lögum.

• 8.1. Um reikninga endanlegs notanda Ef endanlegur notandi: (a) brýtur gegn samningnum; eða (b) veldur, eða mun valda, öryggisneyðartilviki, getur OpenAI farið fram á að viðskiptavinurinn stöðvi tímabundið eða loki viðkomandi reikningi endanotanda. Ef viðskiptavinurinn bregst ekki við með því að stöðva eða loka reikningi endanlegs notandans tafarlaust, getur OpenAI gert það.
• 8.2. Um þjónustuna. OpenAI er heimilt að takmarka eða loka tímabundið fyrir aðgang viðskiptavinar að þjónustunum ef: (a) lög krefjast þess; (b) viðskiptavinur brýtur gegn samningnum eða stefnum OpenAI; eða (c) slíkt er nauðsynlegt til að koma í veg fyrir eða binda enda á öryggisneyðarástand. OpenAI mun gera sanngjarnar ráðstafanir til að tilkynna viðskiptavin áður en þjónustan er takmörkuð eða henni frestað samkvæmt undanfarandi setningu, en getur gert það án fyrirvara að því marki sem sanngjarnt telst nauðsynlegt. OpenAI mun gera sanngjarnar ráðstafanir til að: (i) afmarka takmörkun eða stöðvun eins þröngt og unnt er til að koma í veg fyrir eða binda enda á öryggisneyðarástandið; og (ii) vinna með viðskiptavin að því að veita aftur aðgang að þjónustunum án tafar þegar OpenAI hefur staðfest að viðskiptavinur hafi leyst úr þeim aðstæðum sem kröfðust stöðvunar.

• 9.1. Áskilnaður réttinda Nema að því marki sem berum orðum er kveðið á um hér, veitir samningurinn hvorki: (a) OpenAI nein hugverkaréttindi í efni viðskiptavinar; né (b) viðskiptavini nein hugverkaréttindi í þjónustunum. Viðskiptavinur öðlast eingöngu takmarkaðan rétt til að nota þjónusturnar og engin eignarréttindi eru framseld til viðskiptavinar eða endanlegs notenda hans samkvæmt þessum samningi.
• 9.2. Takmörkuð heimild. Viðskiptavinur veitir OpenAI aðeins þau takmörkuðu réttindi sem eru með sanngjörnum hætti nauðsynleg til að OpenAI geti veitt þjónustuna. Þessi takmarkaða heimild nær einnig til undirverktaka eða undirvinnsluaðila.
• 9.3. Endurgjöf. Ef viðskiptavinur veitir endurgjöf, veitir viðskiptavinur OpenAI rétt til að nota og hagnýta sér endurgjöfina án takmarkana eða endurgjalds.

• Nema með skýru skriflegu fyrirfram leyfi í hverju tilviki skal hvorugur aðili: (i) birta nafn eða merki hins aðilans á vefsíðum sínum, í miðlum eða markaðsefni; eða (ii) gefa opinbera yfirlýsingu um samband sitt við hinn aðilann eða þennan samning.

• 11.1. Samningstími. Samningurinn verður áfram í gildi til gildistíma.
• 11.2. Uppsögn. Hvor aðili um sig má segja upp þessum samningi, að meðtöldum öllum pöntunareyðublöðum, með skriflegri tilkynningu ef hinn aðilinn: (a) brýtur verulega gegn þessum samningi og bætir ekki úr brotinu innan þrjátíu daga frá móttöku skriflegrar tilkynningar; eða (b) hættir rekstri sínum eða verður tekinn til gjaldþrotaskipta eða annarrar greiðsluþrotameðferðar.
• 11.3. Áhrif uppsagnar. Ef samningur þessi fellur úr gildi: (a) falla réttindi sem OpenAI hefur veitt viðskiptavini tafarlaust niður; og (b) OpenAI mun eyða öllu efni viðskiptavinar úr kerfum sínum innan þrjátíu daga, nema: (i) OpenAI sé lagalega skylt að varðveita það; eða (ii) viðskiptavinur hafi samþykkt annað skriflega. Uppsögn eða lok gildistíma mun ekki hafa áhrif á nein réttindi eða skyldur, þar á meðal greiðslu gjaldfallinna fjárhæða, sem hafa stofnast samkvæmt þessum samningi fram að uppsagnardegi. Að auki, nema í tilviki uppsagnar af hálfu viðskiptavinar af réttmætri ástæðu, falla allar ógreiddar fjárhæðir lágmarksskuldbindingar sem tilgreindar eru á pöntunareyðublaðinu þegar í stað í gjalddaga ef samningi þessum lýkur. Þrátt fyrir ákvæði þessa samnings sem kunna að kveða á um hið gagnstæða, má OpenAI varðveita skaðlegt efni viðskiptavinar eða, ef aðgangur viðskiptavinar að þjónustunum er stöðvaður samkvæmt 8. kafla eða honum lokað samkvæmt 11. kafla, deila upplýsingum sem tengjast skaðlegu efni viðskiptavinar, eins og lög krefjast, eða eftir því sem telst með sanngirni nauðsynlegt til að vernda þjónusturnar eða þriðja aðila gegn tjóni.
• 11.4. Ending. Eftirfarandi ákvæði halda gildi sínu eftir uppsögn eða lok samningsins: 6.2 (Greiðsla), 7 (Trúnaður), 9 (Hugverkaréttindi), 11.3 (Áhrif uppsagnar), 11.4 (Endingi), 12 (Ábyrgðir; fyrirvarar), 13 (Skaðleysisábyrgð), 14 (Takmörkun ábyrgðar), 16 (Ýmislegt). 

• 12.1. Ábyrgðir. OpenAI ábyrgist að á gildistímanum, þegar þjónustan er notuð í samræmi við þennan samning, muni þjónustan í öllum verulegum atriðum samræmast skjöluninni.
• 12.2. Fyrirvari. MEÐ FYRIRVARA UM ÁKVÆÐI 12.1 ER ÞJÓNUSTAN VEITT „EINS OG HÚN ER.“ AÐ ÞVÍ MARKI SEM LÖG HEIMILA, OG NEMA AÐ ÞVÍ LEYTI SEM SÉRSTAKLEGA ER TEKIÐ FRAM Í SAMNINGNUM, VEITA OPENAI OG TENGD FÉLÖG ÞESS OG LEYFISVEITENDUR ENGA ÁBYRGÐ AF NEINU TAGI, HVORKI BEINA, ÓBEINA, LÖGBUNDNA NÉ AÐRA, ÞAR MEÐ TALIÐ ÁBYRGÐ Á SÖLUHÆFI, HÆFI TIL TILTEKINNAR NOTKUNAR EÐA AÐ EKKI SÉ BROTIÐ GEGN RÉTTINDUM ÞRIÐJA AÐILA. OPENAI GEFUR ENGA YFIRLÝSINGU, ÁBYRGÐ EÐA TRYGGINGU UM AÐ ÞJÓNUSTAN MUNI UPPFYLLA KRÖFUR EÐA VÆNTINGAR VIÐSKIPTAVINAR, AÐ EFNI VIÐSKIPTAVINAR VERÐI RÉTT, AÐ GALLAR VERÐI LEIÐRÉTTIR, EÐA VARÐANDI ÞJÓNUSTU ÞRIÐJU AÐILA. OPENAI BER EKKI ÁBYRGÐ Á EFNI VIÐSKIPTAVINA, ÞJÓNUSTU ÞRIÐJU AÐILA, EFNI ÞRIÐJU AÐILA EÐA ÞJÓNUSTU SEM EKKI ER FRÁ OPENAI, NÉ VERÐUR SKAÐABÓTASKYLT VEGNA ÞESS (ÞAR Á MEÐAL VEGNA TAFA, TRUFLANA, FLUTNINGSVILLNA, ÖRYGGISBILANA OG ANNARRA VANDAMÁLA SEM STAFA AF ÞESSUM ATRIÐUM).
• 12.3. Beta-þjónustur Þrátt fyrir hvaðeina sem kann að kveða á um hið gagnstæða í samningnum: (a) Viðskiptavinur getur valið að nota Beta-þjónustur að eigin ákvörðun; (b) Beta-þjónustur kunna að vera án stuðnings og þeim kann að vera breytt hvenær sem er án fyrirvara; (c) Beta-þjónustur kunna að vera ekki jafn áreiðanlegar eða tiltækar og þjónusturnar; (d) Beta-þjónustur hafa ekki sætt sömu öryggisráðstöfunum og úttektum og þjónusturnar; og (e) OpenAI ber enga ábyrgð sem leiðir af eða tengist Beta-þjónustum – notkun er á eigin ábyrgð.

• 13.1. Af OpenAI. OpenAI samþykkir að bæta, verja og halda viðskiptavini skaðlausum gagnvart allri ábyrgð, tjóni og kostnaði (þar á meðal sanngjörnum málflutningsþóknunum lögmanna) sem greiða ber til þriðja aðila og stafar af kröfu þar sem því er haldið fram að þjónustan brjóti gegn hugverkarétti þriðja aðila. Þetta undanskilur kröfur að því marki sem þær stafa af: (a) samsetningu hvers kyns þjónustu við vörur, þjónustu eða hugbúnað sem OpenAI lætur ekki í té eða sem ekki er látinn í té fyrir hönd OpenAI; (b) breytingum á hvers kyns þjónustu af hálfu annarra aðila en OpenAI; (c) efni viðskiptavinar; (d) forritum viðskiptavinar (ef einhver eru, og krafan hefði ekki komið fram nema vegna forrits viðskiptavinarins). Auk þess er skaðleysisábyrgð samkvæmt sértækum þjónustuskilmálum, frá og með gildistökudegi, innifalin í þessum samningi, fellur ekki undir neitt ábyrgðarþak og OpenAI má ekki skerða verulega þá vernd sem viðskiptavinur nýtur samkvæmt skaðleysisábyrgðinni í sértækum þjónustuskilmálum án skriflegs samþykkis viðskiptavinar.
• 13.2. Af viðskiptavini. Viðskiptavinur samþykkir að bæta, verja og halda OpenAI og tengdum aðilum þess og leyfisveitendum skaðlausum gagnvart hvers kyns ábyrgð, tjóni og kostnaði (þ.m.t. sanngjörnum lögmannskostnaði) sem greiða ber þriðja aðila og stafar af kröfu sem tengist: (a) notkun þjónustunnar í bága við þennan samning; (b) forritum viðskiptavinar, ef einhver eru; eða (c) efni viðskiptavinar.
• 13.3. Mótvægisaðgerðir. Ef OpenAI hefur ástæðu til að ætla að öll þjónustan eða einhver hluti hennar muni líklega verða tilefni kröfu vegna réttindabrots mun OpenAI: (a) afla, á kostnað OpenAI, réttar fyrir viðskiptavin til að halda áfram að nota þjónustuna í samræmi við þennan samning; (b) skipta út eða breyta þeirri þjónustu sem haldið er fram að brjóti gegn réttindum; eða (c) ef (a) og (b) eru ekki viðskiptalega framkvæmanleg, getur OpenAI, að eigin ákvörðun, sagt þessum samningi upp með skriflegri tilkynningu til viðskiptavinar og endurgreitt allar fyrirframgreiddar fjárhæðir vegna ónotaðrar þjónustu. Viðskiptavinur skal án tafar fara að öllum sanngjörnum fyrirmælum sem OpenAI veitir í tengslum við framangreint, þar á meðal fyrirmælum um að skipta þjónustunni út, breyta henni eða hætta notkun hennar.
• 13.4. Verklag. Aðili sem fer fram á skaðleysi skal, um leið og hann verður var við hvers kyns kröfu, veita aðilanum sem veitir skaðleysi tafarlausa skriflega tilkynningu, sanngjarna samvinnu við vörn gegn kröfunni eða rannsókn á henni og heimila aðilanum sem veitir skaðleysi að hafa einráða stjórn á vörn gegn kröfunni og sáttum vegna hennar, þar á meðal vali á lögmanni, að því tilskildu að aðilinn sem fer fram á skaðleysi eigi rétt á að taka þátt í eigin vörn á eigin kostnað. Skaðleysisskyldur aðili getur ekki gert neina sátt eða málamiðlun vegna neinnar kröfu án fyrirfram skriflegs samþykkis hins aðilans, sem ekki skal synjað án málefnalegrar ástæðu, þó megi skaðleysisskyldur aðili án samþykkis gera sátt um kröfu sem leysir úr kröfunni án þess að hinn aðilinn beri ábyrgð, án skerðingar á réttindum hins aðilans eða án þess að krafist sé að hinn aðilinn viðurkenni ábyrgð. SKAÐLEYSISBÆTUR ERU EINA ÚRRÆÐI AÐILA SAMKVÆMT ÞESSUM SAMNINGI VEGNA BROTS GAGNAÐILA Á HUGVERKARÉTTINDUM ÞRIÐJA AÐILA.

• 14.1. Takmörkun á óbeinni ábyrgð AÐ ÞVÍ MARKI SEM LÖG HEIMILA AÐ FULLU, AÐ UNDANSKILDU: (A) STÓRFELLDU GÁLEYSI EÐA ÁSETNINGSBUNDNU MISFERLI AÐILA; (B) BROTI VIÐSKIPTAVINAR Á KAFLA 3.3 (TAKMARKANIR); (C) BROTI OPENAI Á KAFLA 5.1 (ÖRYGGISRÁÐSTAFANIR), EÐA (D) BROTI HVORS AÐILA Á KAFLA 7 (TRÚNAÐUR), MUNU HVORKI VIÐSKIPTAVINUR NÉ OPENAI, EÐA TENGD FÉLÖG EÐA LEYFISVEITENDUR HVORS AÐILA, BERA ÁBYRGÐ SAMKVÆMT ÞESSUM SAMNINGI Á NEINU ÓBEINU, REFSIKENNDU, TILFALLANDI, SÉRSTÖKU, AFLEIDDU EÐA VIÐURLAGAKENNDU TJÓNI, ÞAR MEÐ TÖLDUM TÖPUÐUM HAGNAÐI, JAFNVEL ÞÓTT AÐILINN HAFI VITAÐ EÐA MÁTT VITA AÐ SLÍKT TJÓN VÆRI MÖGULEGT OG JAFNVEL ÞÓTT ÚRRÆÐI BREGÐIST MEGINMARKMIÐI SÍNU.
• 14.2. Takmörkun á fjárhæð ábyrgðar. AÐ ÞVÍ MARKI SEM LÖG HEIMILA, AÐ UNDANSKILDU: (A) STÓRFELLDU GÁLEYSI EÐA ÁSETNINGSBUNDNU MISFERLI AÐILA, (B) SKAÐLEYSISSKULDBINDINGUM AÐILA SAMKVÆMT ÞESSUM SAMNINGI, EÐA (C) GREIÐSLUSKULDBINDINGUM VIÐSKIPTAVINAR, SKAL HEILDARÁBYRGÐ HVORS AÐILA SAMKVÆMT SAMNINGNUM EKKI FARA FRAM ÚR HEILDARFJÁRHÆÐINNI SEM VIÐSKIPTAVINUR GREIDDI OPENAI Á TÓLF MÁNUÐUNUM SEM VORU STRAX Á UNDAN ATBURÐINUM SEM LEIDDI TIL ÁBYRGÐAR. FRAMANGREINDAR TAKMARKANIR GILDA ÞRÁTT FYRIR AÐ MEGINTILGANGUR HVERS KYNS TAKMARKAÐS ÚRRÆÐIS BREGÐIST.

• 15.1. Skyldubundin gerðardómsmeðferð Viðskiptavinurinn og OpenAI eru sammála um að leysa hvers kyns ágreiningsmál, óháð því hvenær þau komu upp, jafnvel þótt þau hafi komið upp áður en þessi samningur var gerður, með endanlegri og bindandi gerðardómsmeðferð.
• 15.2. Óformleg úrlausn ágreinings⁠. OpenAI vill skilja og bregðast við áhyggjum viðskiptavina áður en til formlegra lagalegra aðgerða kemur. Aðilarnir samþykkja að reyna að leysa ágreiningsmál með óformlegum hætti áður en þeir leggja fram kröfu hver á hendur öðrum. Viðskiptavinur gerir það með því að fylla út óformlegt úrlausnareyðublað ágreinings⁠. OpenAI mun gera það með því að senda tilkynningu til viðskiptavinar á netfangi OpenAI-reikningsins. Ef aðilum tekst ekki að leysa ágreining innan 60 daga getur hvor aðili hafið gerðardómsmeðferð. Báðir aðilar samþykkja einnig að mæta á sérstakan sáttafund ef annar hvor aðili óskar eftir slíkum fundi á þessu tímabili. Allir fyrningarfrestir verða frestaðir á meðan á þessu óformlega úrlausnarferli stendur.
• 15.3. Almennt. Viðskiptavinur og OpenAI samþykkja að leysa hvers kyns ágreiningsmál með endanlegri og bindandi gerðardómsmeðferð, nema að því marki sem kveðið er á um hér að neðan. Hvor aðili um sig getur hafið bindandi gerðardómsmeðferð hjá NAM eða, ef NAM er ekki tiltækt, hjá öðrum gerðardómsvettvangi sem aðilarnir velja. Sá aðili sem hefur gerðardómsmeðferðina skal greiða öll umsóknargjöld vegna gerðardómsins og greiðsla annars stjórnsýslukostnaðar og kostnaðar gerðardómsmanns skal fara eftir reglum gerðardómsþjónustuveitandans. Ef komist er að þeirri niðurstöðu að krafa aðila sé tilefnislaus, ber aðilanum sem setti fram hina tilefnislausu kröfu að endurgreiða hinum aðilanum öll umsýslu-, málsmeðferðar- og önnur gjöld sem stofnað er til vegna hinnar tilefnislausu kröfu.
• 15.4. Verklag. Gerðardómsmeðferðin fer fram í síma, á grundvelli skriflegra greinargerða, með myndfundi eða í eigin persónu í San Francisco í Kaliforníu eða á öðrum stað sem aðilar koma sér saman um. Gerðardómsmeðferðin skal fara fram hjá NAM, fyrir einum gerðarmanni, samkvæmt þeim reglum þess sem þá eru í gildi. Öll álitaefni skulu gerðarmanni til úrlausnar nema dómstóll í Kaliforníu hafi heimild til að ákvarða: (a) hvort ákvæði þessa gerðardómskafla skuli aðskilja og hverjar afleiðingar þess aðskilnaðar séu; (b) hvort aðilar hafi uppfyllt skilyrði sem þarf að uppfylla áður en gerðardómur fer fram; og (c) hvort gerðardómsaðili sé tiltækur til að taka gerðardómsmálið til meðferðar. Hvorugur aðili mun upplýsa gerðardómsmanninn um fjárhæð hvers kyns sáttatilboðs fyrr en eftir að gerðardómsmaðurinn hefur kveðið upp endanlegan gerðardómsúrskurð, ef einhver er.
• 15.5. Undantekningar. Ekkert í þessum samningi krefst þess að eftirfarandi kröfur fari í gerðardómsmeðferð: (a) einstaklingsbundnar kröfur sem lagðar eru fram fyrir smákröfudómstól; og (b) lögbann eða önnur sanngirnisúrræði til að stöðva óheimila notkun eða misnotkun á þjónustunni eða brot á hugverkaréttindum.
• 15.6. Engar hópmálsóknir. Ágreiningsmál skulu aðeins höfðuð á einstaklingsgrundvelli og ekki má höfða þau sem stefnandi eða meðlimur hóps í neinu meintu hópmáli, sameinuðu máli eða fyrirsvarsmáli. Gerðardómsmál fyrir hópa, hópmálsóknir, málshöfðanir einkaaðila í almannaþágu og sameining við önnur gerðardómsmál eru ekki heimilar. Ef ágreiningur er af einhverjum ástæðum rekinn fyrir dómstólum fremur en með gerðardómsmeðferð, afsalar hvor aðili sér með fullri vitund og óafturkallanlega öllum rétti til að fá mál dæmt af kviðdómi í hvers kyns málshöfðun, málsmeðferð eða gagnkröfu. Þetta kemur ekki í veg fyrir að hvor aðili taki þátt í sátt sem nær til krafna alls hópsins.
• 15.7. Gerðardómsmeðferð í lotum. Ef 25 eða fleiri kröfuhafar, sem sami eða sambærilegur lögmaður er í fyrirsvari fyrir, leggja fram kröfur um gerðardómsmeðferð vegna að verulegu leyti sambærilegra ágreiningsmála innan 90 daga hver frá öðrum, eru viðskiptavinur og OpenAI sammála um að NAM muni annast meðferð þeirra í lotum, nema kröfuhafarnir séu færri en 50 samtals eða eftir skiptingu í lotur, en þá skulu þau mynda eina lotu. NAM mun annast hverja lotu sem eina sameinaða gerðardómsmeðferð með einum gerðarmanni, einu setti gerðardómsgjalda og einum málflutningsfundi sem haldinn er með myndfundarbúnaði eða á stað sem gerðarmaður ákveður fyrir hverja lotu. Ef einhver hluti þessa ákvæðis reynist vera ógildur eða óframfylgjanlegur gagnvart tilteknum kröfuhafa eða lotu, verður hann aðskilinn og tekinn til gerðarmeðferðar í einstaklingsbundnu máli.
• 15.8. Skilja á milli gildra og ógildra greina Ef einhver hluti þessa 15. kafla telst ólögmætur eða óframfylgjanlegur mun það sem eftir stendur halda gildi sínu, nema að því leyti sem niðurstaða um ólögmæti eða óframfylgjanleika að hluta myndi heimila hópgerðardómsmeðferð eða gerðardómsmeðferð fyrir hönd annarra, en þá verður þessi 15. kafli óframfylgjanlegur í heild sinni. Ekkert í þessum kafla telst fela í sér afsal á eða takmörkun á réttinum til að leita lögbannsúrræða til verndar almannahagsmunum eða öðrum rétti sem ekki er unnt að afsala sér, þar til gerðarmaður hefur kveðið upp úrskurð um efni þeirrar kröfu.

• 16.1. Samningurinn í heild sinni Samningur þessi er heildarsamningur milli viðskiptavinar og OpenAI varðandi efni hans og leysir af hólmi alla fyrri eða samtímis samninga, samskipti og samkomulag, hvort sem þau eru skrifleg eða munnleg. Með þessari tilvísun eru reglur OpenAI og viðeigandi pöntunareyðublöð hér með felld inn í samning þennan. Viðskiptavinur samþykkir að allir skilmálar sem er að finna í hvers kyns kauppöntun sem viðskiptavinur sendir OpenAI eigi ekki við um þennan samning og séu ógildir og án réttaráhrifa.
• 16.2. Skilmálar sem stangast á. Ef misræmi er milli þeirra skjala sem mynda samninginn skulu skjölin hafa forgang í eftirfarandi röð: (a) pöntunareyðublað; (b) þjónustusértækir skilmálar; (c) samningurinn; og (d) stefnur OpenAI.
• 16.3. Gildandi lög. Samningur þessi skal lúta gildandi lögum. Með fyrirvara um 15. grein skal öllum kröfum sem rísa af eða tengjast samningi þessum eingöngu höfðað fyrir varnardómstólnum.
• 16.4. Skilja á milli gildra og ógildra greina Ákvæði sem eru óframfylgjanleg verða breytt þannig að þau endurspegli vilja samningsaðila og aðeins að því marki sem nauðsynlegt er til að gera þau framfylgjanleg, og önnur ákvæði samningsins halda fullu gildi.
• 16.5. Tilkynningar. Tilkynningar skulu sendar með tölvupósti, fyrsta flokks pósti, flugpósti eða hraðsendingu yfir nótt með sendiboða og teljast hafa verið gefnar þegar þær berast. Tilkynningar til viðskiptavinar má einnig senda á netfang viðkomandi reikningsins og teljast hafa verið afhentar þegar þær eru sendar. Tilkynningar til OpenAI skulu senda til lögfræðideildar OpenAI á contract-notices@openai.com⁠, með afriti til: (a) ef um OpenAI OpCo, LLC er að ræða, 1455 3rd Street, San Francisco, California 94158; eða (b) ef um OpenAI Ireland Ltd er að ræða, 1st Floor, The Liffey Trust Centre, 117-126 Sheriff Street Upper, Dublin 1, D01 YC43, Ireland.
• 16.6. Undanþága. Undanþága vegna vanefndar felur ekki í sér undanþágu vegna síðarnefndrar vanefndar.
• 16.7. Framsal. Óheimilt er að framselja þennan samning nema að því marki sem heimilað er samkvæmt þessari grein 16.7 (Framsal). OpenAI er heimilt að framselja þennan samning til tengds aðila án tilkynningar eða samþykkis viðskiptavinar. Hvor aðili má framselja þennan samning til aðila sem tekur við að verulegu leyti öllum eignum eða rekstri viðkomandi aðila, að því skilyrði að framseljandi aðili veiti skriflega tilkynningu um framsalið með að minnsta kosti þrjátíu daga fyrirvara. Samningur þessi skal vera bindandi fyrir aðila og viðkomandi arftaka þeirra og heimilaða framsalshafa.
• 16.8. Ekkert umboð OpenAI og viðskiptavinurinn eru ekki lagalegir samstarfsaðilar eða umboðsaðilar, heldur sjálfstæðir verktakar.
• 16.9. Óviðráðanleg atvik Að undanskildum greiðsluskyldum ber hvorki viðskiptavinur né OpenAI ábyrgð á vanefndum eða töfum sem stafa af aðstæðum sem eru utan sanngjarnrar stjórnunar viðskiptavinar eða OpenAI, þar á meðal, en ekki einskorðað við, aðgerðum stjórnvalda eða hryðjuverkum, jarðskjálftum eða öðrum náttúruhamförum, aðstæðum á vinnumarkaði eða rafmagnsleysi.
• 16.10. Engin réttindi til handa þriðju aðilum Engum þriðja aðila er ætlað að njóta réttinda samkvæmt þessum samningi og það er skýr ásetningur viðskiptavinarins og OpenAI að ekkert í þessum samningi skapi nokkurn rétt eða málsóknarrétt, samningsbundinn eða annan, fyrir neinn þriðja aðila eða fyrir hönd hans.
• 16.11. Viðskiptaeftirlit Viðskiptavinurinn ber einn ábyrgð á að tryggja að notkun hans á þjónustunni sé í samræmi við gildandi viðskiptalög, þar á meðal lög um viðskiptaþvinganir og útflutningseftirlit. Inntak viðskiptavinar má ekki innihalda efni eða upplýsingar sem krefjast leyfis stjórnvalda til afhendingar eða útflutnings. Viðskiptavinur má ekki nota þjónusturnar í eða í þágu landa sem sæta viðskiptabanni Bandaríkjanna, né flytja út eða endurflytja þjónusturnar til slíkra landa eða til einhvers sem er á lista yfir takmarkaða aðila. Viðskiptavinur lýsir því yfir og ábyrgist að viðskiptavinur og endanlegir notendur séu ekki staðsettir í neinum löndum sem sæta viðskiptabanni Bandaríkjanna, séu ekki tilgreindir á neinum lista yfir takmarkaða aðila og að viðskiptavinur muni fara að gildandi lögum um útflutningseftirlit, þar á meðal öllum kröfum eða skyldum um „þekktu viðskiptavin þinn“ sem eiga við um endanlega notendur viðskiptavinar.
• 16.12. Landfræðilegar takmarkanir á notkun. Viðskiptavinum og endannlegum otendum er óheimilt að fá aðgang að eða bjóða upp á aðgang að þjónustunum utan studdra landa og landsvæða. Brot á þessu ákvæði 16.12 getur leitt til stöðvunar á þjónustunni samkvæmt ákvæði 8.
• 16.13. Uppfærslur.
  • a. Almennt. OpenAI getur uppfært þennan samning eða reglur OpenAI með því að veita viðskiptavini hæfilegan fyrirvara, þar á meðal með því að birta uppfærsluna á vefsíðu OpenAI. Ef OpenAI ákveður að eigin mati að uppfærsla hafi veruleg áhrif á réttindi eða skyldur viðskiptavinar mun OpenAI tilkynna viðskiptavini um það með að minnsta kosti þrjátíu daga fyrirvara áður en uppfærslan tekur gildi, nema uppfærslan sé nauðsynleg til að OpenAI geti farið að gildandi lögum, en í því tilviki mun OpenAI tilkynna viðskiptavini um það með eins miklum fyrirvara og með sanngirni má ætlast til. Allar aðrar uppfærslur taka gildi þann dag sem OpenAI birtir uppfærða samninginn eða OpenAI-stefnuna. Áframhaldandi notkun viðskiptavinar á þjónustunum eða aðgangur að þeim, eftir að uppfærsla tekur gildi, telst samþykki á uppfærslunni. Ef viðskiptavinur samþykkir ekki uppfærslu getur viðskiptavinur hætt að nota þjónustuna eða sagt þessum samningi upp samkvæmt 11. kafla.
  • b. Undantekningar. Að undanskilinni uppfærslu sem gerð er til að fara að gildandi lögum skulu uppfærslur á þessum samningi eða stefnum OpenAI ekki gilda um: (i) ágreining milli viðskiptavinar og OpenAI sem kemur upp fyrir uppfærsluna; eða (ii) pöntunareyðublöð sem viðskiptavinur og OpenAI undirrituðu (öfugt við sjálfvirka pöntunarsíðu) áður en OpenAI tilkynnti viðskiptavini um uppfærsluna. Hins vegar að því marki sem uppfærsla varðar þjónustu eða eiginleika sem hleypt er af stokkunum eftir að pöntunareyðublað er undirritað tekur hún gildi við fyrstu notkun viðskiptavinar á þeirri þjónustu.
• 16.14. Réttindi opinbers aðila. Þessi grein 16.14 á við um opinbera aðila. Að því er varðar opinbera aðila alríkisstjórnar Bandaríkjanna telst þjónustan vera „viðskiptalegur tölvuhugbúnaður“ samkvæmt skilgreiningu í 48 C.F.R. § 2.101 og 48 C.F.R. § 252.227-7014(a)(1) og eins og hugtakið er notað í 48 C.F.R. §§ 12.212 og 227.7202, og tengd þjónusta telst vera „viðskiptaþjónusta“ samkvæmt skilgreiningu í 48 C.F.R. § 2.101. Þjónustan og fylgigögnin eru: (a) veitt viðskiptavinum sem eru opinberir aðilar og endanlegum notendum, til notkunar af hálfu opinbera aðilans eða fyrir hans hönd; (b) háð þessum samningi og einungis með þeim réttindum sem veitt eru öllum öðrum viðskiptavinum og endanlegum notendum, nema að því takmarkaða leyti sem gildandi lög banna.

„Móðgandi efni viðskiptavinar“ merkir inntök eða úttök sem brjóta gegn kafla 3.3.

„Reikningur“ merkir stjórnandareikning sem OpenAI veitir viðskiptavini í þeim tilgangi að hafa umsjón með þjónustunum.

„Stjórnandi“ merkir endanlegan notanda sem viðskiptavinur hefur tilnefnt og sem hefur stjórnunarréttindi.

„Reikningsstjórnborð“ merkir vefverkfæri sem OpenAI veitir viðskiptavini til að stjórna þjónustunum.

„Tengdur aðili“ merkir, að því er varðar hvorn samningsaðila um sig, hvern annan einstakling eða lögaðila sem beint, eða óbeint í gegnum einn eða fleiri milliliði, hefur yfirráð yfir þeim samningsaðila, lýtur yfirráðum þess samningsaðila eða lýtur sameiginlegum yfirráðum með þeim samningsaðila.

„API“ merkir forritaskil OpenAI.

„Endurskoðunarskýrslur“ merkir endurskoðunarskýrslur þriðja aðila fyrir þjónustuna.

„Heimilaður kaupandi“ merkir starfsmann viðskiptavinar sem viðskiptavinur hefur tilnefnt til að koma fram sem heimilaður kaupandi þjónustunnar. Viðskiptavinur getur tilnefnt heimilaða kaupendur á ótengdu pöntunareyðublaði eða í stjórnendaviðmótinu. Stjórnendur eru heimilaðir kaupendur. Viðskiptavinur getur reglulega uppfært heimilaða kaupendur í stjórnendaviðmótinu.

„Runa“ merkir, að því er varðar grein 15.7, hópur með allt að 50 kröfuhöfum.

„Beta-þjónusta“ merkir þjónustu eða eiginleika sem eru auðkenndir sem alfa, beta, forskoðun, snemmbúinn aðgangur eða matsútgáfa, eða orð eða orðasambönd með svipaða merkingu.

„Trúnaðarupplýsingar“ merkir hvers kyns viðskiptalegar, tæknilegar eða fjárhagslegar upplýsingar, efni eða annað viðfangsefni sem upplýsandi aðili miðlar til viðtakanda og sem: (a) eru auðkenndar sem trúnaðarmál við miðlun; eða (b) viðtakandi ætti með réttu, miðað við aðstæður, að skilja að séu trúnaðarmál. Trúnaðarupplýsingar fela í sér efni viðskiptavinar.

„Krafa“ merkir málsókn sem þriðji aðili höfðar.

„Forrit viðskiptavinar“ merkir forrit, vörur eða þjónustu viðskiptavinar sem samþættast við OpenAI API.

„Efni viðskiptavinar“ merkir inntakið og úttakið.

„Upplýsandi“ merkir þann aðila sem lætur hinum aðilanum í té trúnaðarupplýsingar samkvæmt þessum samningi.

„Ágreiningur“ merkir kröfu aðila sem stafar af eða tengist þessum samningi eða þjónustunni.

„Skjölun“ merkir skjölunina sem OpenAI lætur viðskiptavini í té eða gerir að öðru leyti aðgengilega almenningi.

„DPA“ merkir viðauki um gagnavinnslu OpenAI, sem er að finna á: https://openai.com/policies/data-processing-addendum.

„Gildistökudagur“ merkir þann dag sem aðilar gera þennan samning, annaðhvort með samþykki á netinu, með því að undirrita pöntunareyðublað sem vísar til samningsins, eða með því að undirrita samninginn sjálfan.

„Endanlegur notandi“ merkir sérhvern aðila: (a) sem hefur aðgang að þjónustunum í gegnum reikning viðskiptavinar; eða (b) sem notar forrit viðskiptavinar. Endanlegir notendur geta meðal annars verið starfsmenn viðskiptavinar og tengdra aðila hans, ráðgjafar, viðskiptavinir, umboðsmenn, fulltrúar, nemendur eða hver sá annar einstaklingur sem viðskiptavinur hefur heimilað að nota þjónustuna í gegnum reikning viðskiptavinar.

„Reikningur endanlegs notanda“ merkir reikning fyrir endanlegs notanda undir reikningi viðskiptavinar.

„Endurgjöf“ merkir hvers kyns endurgjöf sem viðskiptavinur veitir OpenAI varðandi þjónustuna.

„Gjöld“ merkir öll gjöld sem færð eru á reikning viðskiptavinarins í samræmi við pöntunareyðublað, eða ef pöntunareyðublað er ekki fyrir hendi, þá samkvæmt verðsíðu.

„Gildandi lög“ merkir: (a) að því er varðar viðskiptavini á EES-svæðinu, í Sviss eða Bretlandi, lög Írlands; og (b) að því er varðar alla aðra viðskiptavini, lög Kaliforníuríkis, að undanskildum reglum eða meginreglum Kaliforníu um lagaskil.

„Opinber aðili“ merkir sérhvert ríki eða ríkisstjórn, hvert fylki, sveitarfélag eða aðra stjórnsýslueiningu þess, og sérhvern aðila, stofnun, stjórnvald, nefnd, deild, ráð, skrifstofu eða dómstól, hvort sem er innlendur, erlendur eða fjölþjóðlegur, sem fer með framkvæmdar-, löggjafar-, dóms-, eftirlits- eða stjórnsýsluhlutverk stjórnvalda eða hlutverk sem varða stjórnvöld, ásamt sérhverjum starfsmanni eða embættismanni slíks aðila.

„Viðauki um heilbrigðisþjónustu“ merkir OpenAI-viðaukann um heilbrigðisþjónustu og samning um viðskiptaaðila sem OpenAI veitir viðskiptavini.

„Eyðublað fyrir óformlega úrlausn ágreinings“ merkir eyðublaðið sem er að finna á þessum tengli⁠.

„Upphafstímabil“ merkir upphaflegt tímabil þjónustunnar sem hefst á upphafsdegi og varir í þann tíma sem tilgreindur er á pöntunareyðublaðinu.

„Inntak“ merkir það sem viðskiptavinur og endanlegir notendur viðskiptavinar setja inn í þjónustuna.

„Hugverkaréttindi“ merkir öll skráð eða óskráð hugverkaréttindi um allan heim, þar á meðal réttindi til einkaleyfa, höfundarréttar, vörumerkja, viðskiptaleyndarmála, hönnunar, gagnagrunna, lénsheita og sæmdarréttindi.

„NAM“ merkir National Arbitration and Mediation.

„Samningsaðili OpenAI“ merkir: (a) OpenAI OpCo, LLC, fyrir viðskiptavini sem hafa aðsetur utan EES eða Sviss; (b) OpenAI Ireland Ltd. fyrir viðskiptavini sem hafa aðsetur innan EES eða í Sviss; eða (c) OpenAI Public Sector, LLC ef sá aðili er tilgreindur á pöntunareyðublaðinu.

Með „OpenAI-reglum“ er átt við þjónustusértæku skilmálana, stefnu um deilingu og birtingu og notkunarreglur. Sú útgáfa af OpenAI-reglum sem á við um viðskiptavininn er sú sem er í gildi á nýjasta gildistökudegi samningsins, nýjasta pöntunareyðublaðs viðskiptavinarins eða endurnýjunar þjónustunnar. Ef viðskiptavinur kýs að nota nýja þjónustu sem bætt hefur verið við þjónustusértæku skilmálana eftir nýjasta gildistökudag sem vísað er til í undanfarandi setningu, gilda OpenAI-reglur sem gilda þegar viðskiptavinurinn notar þjónustuna.

„Pöntunareyðublað“ merkir: (a) þegar keypt er af OpenAI, pöntunarskjalið sem viðskiptavinurinn og OpenAI undirrita eða vefsíðu OpenAI sem viðskiptavinurinn notar til að kaupa þjónusturnar; eða (b) þegar keypt er af endursöluaðila, pöntunarskjalið sem viðskiptavinurinn og endursöluaðili viðskiptavinarins undirrita eða vefsíðu endursöluaðilans sem viðskiptavinurinn notar til að kaupa þjónusturnar.

„Úttak“ merkir úttak frá þjónustunum sem byggir á inntakinu.

„Leyfileg undantekning“ merkir að viðskiptavinur noti úttak til að: (a) þróa gervigreindarlíkön sem eru fyrst og fremst ætluð til að flokka, raða eða skipuleggja gögn (t.d. innfellingar eða flokkara), ef þessum líkönum er ekki dreift eða þau gerð aðgengileg þriðju aðilum í viðskiptalegum tilgangi; og (b) fínstilla eða sérsníða líkön sem veitt eru sem hluti af fínstillingarþjónustu OpenAI eða annarri þjónustu sem tilgreind er á verðsíðu.

„Persónuupplýsingar“ eru eins og þær eru skilgreindar í DPA.

„Verðsíða“ merkir síðurnar sem eru aðgengilegar á https://openai.com/api/pricing eða https://openai.com/chatgpt/pricing⁠(opnast í nýjum glugga).

„ Verndaðar heilsufarsupplýsingar“ eru skilgreindar samkvæmt persónuverndarreglu HIPAA (45 CFR kafli 160.103).

„Viðtakandi“ merkir þann aðila sem tekur við trúnaðarupplýsingum frá upplýsandanum.

„Endurnýjunartímabil“ merkir tímabil endurnýjunar fyrir þjónustuna eftir annaðhvort upphafstímabilið eða fyrra endurnýjunartímabil. Athugið að ef viðskiptavinur endurnýjar án nýs pöntunareyðublaðs verður lengd endurnýjunartímabilsins sú sama og lengd þess upphafstímabils eða endurnýjunartímabils sem var næst á undan.

„Listi yfir takmarkaða aðila“ merkir lista skrifstofu Bandaríkjanna um eftirlit með erlendum eignum („OFAC“) yfir sérstaklega tilnefnda ríkisborgara (einnig kallaður „SDN-listinn“), lista iðnaðar- og öryggisskrifstofu Bandaríkjanna („BIS“) yfir synjaða aðila og aðilalista, og hvers kyns aðra viðeigandi lista yfir takmarkaða aðila sem OFAC, BIS eða aðrar stofnanir með sambærilega lögsögu gefa út, innan eða utan Bandaríkjanna, nú eða í framtíðinni.

„Bakhönnun“ merkir að baksmala, bakþýða, afþýða, þýða, stunda árásir sem miða að útdrætti eða stuldi líkana, eða á annan hátt reyna að uppgötva frumkóða eða undirliggjandi einingar þjónustunnar, reiknirita og kerfa þjónustunnar (nema að því marki sem þessar takmarkanir brjóta í bága við gildandi lög).

„Öryggisneyðartilvik“ merkir notkun viðskiptavinar eða endanlegs notanda viðskiptavinar á þjónustunni sem gæti með sanngjörnum hætti leitt til öryggisáhættu, trúverðugrar hættu á tjóni, brots á réttindum þriðja aðila eða ábyrgðar gagnvart OpenAI, þjónustunni eða þriðja aðila.

Með „öryggisráðstafanir“ er átt við þær öryggisráðstafanir sem eru aðgengilegar á: https://cdn.openai.com/osa/security-measures.pdf⁠(opnast í nýjum glugga)

„Þjónustuinneignir“ merkir, fyrir þjónusturnar, annaðhvort inneignir sem viðskiptavinur hefur keypt eða kynningarinneignir sem OpenAI veitir viðskiptavini.

„Skilmálar um þjónustuinneign“ merkir skilmálana sem eru aðgengilegir á: https://openai.com/policies/service-credit-terms.

„Þjónusta“ merkir þjónustu OpenAI fyrir fyrirtæki, stórfyrirtæki eða þróunaraðila sem eru í boði til kaupa eða notkunar á reikningi viðskiptavinar, ásamt hvers kyns tengdum hugbúnaði, verkfærum, þjónustu fyrir þróunaraðila, skjölum og vefsvæðum OpenAI, en að undanskilinni þjónustu þriðja aðila.

„Gildistími þjónustu“ merkir upphaflegt tímabil og öll endurnýjunartímabil.

„Þjónustusértækir skilmálar“ merkir skilmála sem eiga sérstaklega við um tilteknar þjónustur á: https://openai.com/policies/service-terms.

„Skaðleysi samkvæmt þjónustusértækum skilmálum“ merkir skaðleysisloforð OpenAI sem eru innifalin í þjónustusértæku skilmálunum.

„Stefna um miðlun og birtingu“ merkir skilmálana sem finna má á: https://openai.com/policies/sharing-publication-policy.

„Upphafsdagsetning“ merkir dagsetninguna þegar upphafstímabil eða endurnýjunartímabil hefst. Upphafsdagsetningar eru tilgreindar á pöntunareyðublaðinu. Athugið að ef viðskiptavinur endurnýjar án nýs pöntunareyðublaðs verður upphafsdagsetning þess endurnýjunartímabils reiknuð út frá upphaflegri upphafsdagsetningu.

„Studd lönd og yfirráðasvæði“ merkir þau lönd og yfirráðasvæði þar sem OpenAI styður aðgang að API-þjónustum og ChatGPT‑þjónustum okkar. Þessi lönd og landsvæði má finna á: https://help.openai.com/articles/5347006-openai-api-supported-countries-and-territories⁠(opnast í nýjum glugga) (fyrir API) eða https://help.openai.com/articles/7947663-chatgpt-supported-countries⁠(opnast í nýjum glugga) (fyrir ChatGPT), og kann að vera uppfært öðru hverju.

„Gildistími“ merkir gildistíma samningsins, sem hefst á gildistökudegi og heldur áfram þar til hið fyrra af eftirfarandi verður: (i) lok þjónustutímabilsins; eða (ii) uppsögn samningsins eins og kveðið er á um hér í samningnum.

„Þjónusta þriðju aðila“ merkir vörur, þjónustu eða efni sem aðrir aðilar en OpenAI bjóða upp á í gegnum þjónustuna.

„Skilmálar þjónustu þriðja aðila“ merkir hvers kyns viðbótarskilmála sem gilda um þjónustu þriðja aðila.

„Notkunartakmarkanir“ merkir takmarkanir á endanlegum notendum, skilaboðum, tókum, afkastahraða eða aðrar takmarkanir á notkun viðskiptavinar á þjónustunum, eins og lýst er í viðeigandi pöntunareyðublaði eða skjölum.

„Notkunarstefnur“ merkir notkunarstefnurnar á: https://openai.com/policies/usage-policies.

„Varnarþing“ merkir: (a) fyrir viðskiptavini á EES-svæðinu, í Sviss eða Bretlandi, dómstólarnir í Dyflinni á Írlandi; og (b) fyrir alla aðra viðskiptavini, alríkis- eða fylkisdómstólar staðsettir í San Francisco-sýslu í Kaliforníu.