Stripe

በዚህ ዓመት መጀመሪያ ላይ፣ Stripe 100 ለሚሆኑ ሠራተኞቹ በጣም ያልተለመደ ነገር እንዲያደርጉ ጠይቆ ነበር፦ የዕለት ተዕለት ሥራቸውን እንዲያቆሙ እና በምትኩ፣ በአዲሱ የOpenAI የቋንቋ ትምህርት ሞዴል GPT‑4 በመታገዝ ለክፍያ መድረኩ አዲስ አገልግሎቶችን እና ተግባራትን እንዲያልሙ አዟቸው ነበር። ከድጋፍ፣ ማቀላቀያ፣ ስጋት እና ሰነዶች የተውጣጡ መሐንዲሶች፣ ነፃ-ቅርጽ ጽሑፍ እና ምስሎችን ተረድቶ ሰው-መሰል ምላሽ መስጠት የሚችለውን የሰው ሠራሽ አስተብህሎት በመጠቀም የትኞቹን ባህሪያት ወይም የሥራ ፍሰቶች ማሻሻል-ወይም መለወጥ-እንደሚቻል መክረዋል።

"ተልዕኳችን በStripe ውስጥ በታላቅ የቋንቋ ሞዴሎች ሊፋጠኑ የሚችሉ ምርቶችን እና የሥራ ሂደቶችን መለየት፣ እንዲሁም LLMዎች ዛሬ ላይ የት ጋር በጥሩ ሁኔታ እንደሚሰሩ እና የት ጋር እንደሚቸገሩ በሚገባ መረዳት ነበር፣" ይላሉ የStripe ተግባራዊ የማሽን መማሪያ ቡድን የምርት መሪ Eugene Mann። "ነገር ግን የGPT‑4 መዳረሻ ማግኘታችን ብቻ፣ 'ኦ! እነዚህ ሁሉ ችግሮች በGPT በሚገርም ሁኔታ ሊፈቱ ይችላሉ ለካ' ብለን እንድንገነዘብ አስችሎናል።"

Stripe በመላው በይንበመርብ ላይ ያሉ ትናንሽ እና ግዙፍ የንግድ ተቋማትን የክፍያ ሂደት ያከናውናል። Stripe የክፍያ ሂደቱን ሁሉንም ገጽታዎች የሚደግፍ ሥነ-ምህዳር ቢገነባም፣ ገንቢዎች-የStripe ሶፍትዌርን የሚገነቡ እና የሚያዋህዱ-ዋና ተጠቃሚዎቻቸው ናቸው። የStripe ገንቢዎች Stripeን ሥራ ላይ በማዋል ረገድ ይበልጥ ብቁ በሆኑ ቁጥር፣ Stripe በዲጂታል የክፍያ ዓለም ውስጥ በስፋት እየተሰራጨ ይሄዳል፣ የበይነመረብንም ጠቅላላ የሀገር ውስጥ ምርት ያሳድጋል።

Stripe ከዚህ ቀደም የድጋፍ ሰጪ ቡድኑ የቅሬታ ቲኬቶችን በትክክል እንዲመድብ እና የተጠቃሚዎችን ጥያቄዎች በአጭሩ እንዲያጠቃልል በማገዝ፣ ተጠቃሚዎችን በተሻለ ሁኔታ እንዲያገለግሉ ለማድረግ በGPT‑3 ይጠቀም ነበር።

የStripe ቡድን GPT‑4ን ለመፈተሽ የሚያስችሉ 50 ሊሆኑ የሚችሉ ተግባራትን ዝርዝር አዘጋጅቶ ነበር፤ ከጥልቀት ምርመራ እና ሙከራ በኋላም፣ ከእነዚህ የሙከራ ናሙናዎች መካከል 15ቱ በመድረኩ ላይ ለመካተት ብቁ ሆነው የተገኙ ሲሆን እነዚህም የድጋፍ ማበጀትን፣ ስለ ድጋፍ ሰጪ አገልግሎቶች ለሚነሱ ጥያቄዎች ምላሽ መስጠትን እና የማጭበርበር ድርጊቶችን መለየትን ያካትታሉ።

ተጠቃሚዎችን በተሻለ ሁኔታ ለማገልገል እና ትክክለኛውን የድጋፍ ዓይነት ለመስጠት፣ Stripe እያንዳንዱ የንግድ ተቋም መድረኩን በትክክል እንዴት እንደሚጠቀም ለመረዳት እና በዚያው መሠረት ድጋፉን ለተጠቃሚው በሚመች መልኩ ለማበጀት ይጥራል። ይህ ግልጽ እና አስፈላጊ እርምጃ ቢሆንም፣ ብዙ የሰው ጉልበት ሰዓታትን የሚጠይቅ ነው።

"እንደ የምሽት ክለቦች ያሉ ብዙ የንግድ ተቋማት ድረ-ገጻቸውን በጣም አነስተኛ መረጃ ያለው እና ምስጢራዊ ስለሚያደርጉት፣ ምን እየተካሄደ እንዳለ ለመረዳት ብዙ ፍለጋ እና ጠግ ማድረግ ሊጠይቅ ይችላል፣" ይላሉ Mann።

አሁን ላይ Stripe እነዚህን ገጾች ለመቃኘት እና ከሰው የተሻለ ማጠቃለያ ለማቅረብ GPT‑4ን ይጠቀማል።

"ውጤቶቹን በእጃችን መፈተሽ ስንጀምር፣ 'ቆይ እስቲ፣ ሰዎቹ ተሳስተው ሞዴሉ ግን በትክክል ሰርቷል' ብለን አስተዋልን።" ይላሉ Mann። "GPT‑4 በመሠረቱ ከሰዎች ገምጋሚዎች የተሻለ ነበር።"

ሌላው Stripe ለገንቢዎች ድጋፍ የሚሰጥበት ወሳኝ መንገድ፣ ሰፊ የቴክኒክ ሰነዶችን በማዘጋጀት እና የቴክኒክ ጥያቄዎችን ለመመለስ ወይም ችግሮችን ለመፍታት የሚያስችል ጠንካራ የገንቢ ድጋፍ ቡድን በማቅረብ ነው። GPT‑4 እነዚህን መረጃዎች የመቀበል፣ የመረዳት እና ወደዚያ ምናባዊ ረዳትነት የመቀየር ችሎታ አለው-ይህም ሁሉ በቅጽበት ውስጥ ይከናወናል።

"GPT ልክ እንደተከፈተ ያለምንም ተጨማሪ ዝግጅት ወዲያውኑ ሥራ ይጀምራል፣" ይላሉ። "ትልቅ የቋንቋ ሞዴሎች ሶፍትዌር በዚህ መልኩ ይሰራል ተብሎ አይጠበቅም ነበር፣" ይላሉ።

GPT የተጠቃሚውን ጥያቄ የመረዳት፣ በእነሱ ስም ዝርዝር ሰነዶችን የማንበብ፣ ተገቢውን ክፍል የመለየት እና መፍትሄውን በአንድ ቦታ የማጠቃለል ብቃት አለው።

እንዲሁም ተንኮል አዘል ዓላማ ያላቸውን ወይም መጥፎ ተዋንያንን የመቆጣጠር አስፈላጊነት አለ። Stripe እንደ Discord ባሉ መድረኮች ላይ ጠንካራ ማህበረሰብ ያለው ሲሆን ይህም ለተወሳሰቡ የቴክኒክ ጥያቄዎች ከማህበረሰቡ ድጋፍ እንዲገኝ ከማድረጉም ባለፈ፣ ገንቢዎች ለወደፊት ሥራዎቻቸው ያላቸው ታይነት እንዲጨምር ያደርጋል። ይሁን እንጂ-መድረኩ በበይነመረብ ላይ የሚገኝ በመሆኑ-ተንኮል አዘል ዓላማ ያላቸው አካላት ወደ እነዚህ መድረኮች መንገዳቸውን የሚያገኙ ሲሆን ይህም ብዙውን ጊዜ ከማህበረሰቡ አባላት ወሳኝ መረጃዎችን ለማግኘት ወይም ከመድረኩ ከተባረሩ በኋላ ከStripe የማህበረሰብ ቡድን ጋር የነበራቸውን ተዓማኝነት እንደገና ለመገንባት የሚያደርጉት ጥረት ነው።

በDiscord ላይ ያሉ ልጥፎችን የአገባብ ስልት በመተንተን ብቻ፣ የStripe የማጭበርበር መከላከያ ቡድን ክትትል ሊያደርግባቸው የሚገቡ መለያዎችን GPT‑4 ለይቶ እያመለከተ የሚገኝ ሲሆን ይህም አንድ አጭበርባሪ ጥሩ ሰው መስሎ ለመቅረብ እየሞከረ እንዳልሆነ ለማረጋገጥ ይረዳል። GPT‑4 ወደ ውስጥ የሚገቡ መልዕክቶችን በመቃኘት፣ ከተንኮል አዘል አካላት የሚሰነዘሩ የተቀናጁ እንቅስቃሴዎችን ለይቶ ለማወቅ ይረዳል።

አሁን የStripe ቡድን ስለሚቀጥሉት ተጨማሪ ባህሪያት እያሰበ ነው። GPT የገቢ ሞዴሎችን ሊረዳ ወይም ለንግድ ድርጅቶች ስለ ስልቶች ምክር ሊሰጥ የሚችል የንግድ ሥራ አሰልጣኝ ሆኖ ሊሰማራ ይችላል። GPT በጊዜ ሂደት ይበልጥ ብልህ እየሆነ ሲሄድ፣ ሊተገበርባቸው የሚችሉባቸው መስኮችም ከጊዜ ወደ ጊዜ እየሰፉ ይሄዳሉ።

Mann እርሱ እና ቡድኑ በየቀኑ አዲስ ሰሌዳ ላይ ስዕል እንደሚስሉ ያህል አዲስ ነገሮችን እየፈጠሩ መሆናቸውን ይናገራል።

እስካሁን Stripe ስኬታማ የሆነባቸውን መንገዶች በሙሉ ከዘረዘሩ በኋላ፣ "ከእነዚህ ተግባራት መካከል አንዳንዶቹ፣" ይላሉ፣ "ልክ እንደ አስማት ሆነው ይሰማሉ።"